Yãmb me tõe n wʋma Biiblã sẽn yetã võore

BIIBLÃ pʋgẽ, Wẽnnaam togsda tõnd yɛl sẽn yaa sɩd la sẽn tar yõod wʋsgo. A wilgda tõnd vɩɩmã võore, bũmb ning sẽn kɩt tɩ nebã namsdẽ wã, la ninsaalbã beoog raare. A wilgda tõnd d sẽn na n maaneg n paam sũ-noogo, n paam zo-rãmba, la d mao n tõog zu-loeesã. Sẽn yɩɩd fãa, Biiblã sõngda tõnd tɩ d bãng d Naandã sẽn yaa tõnd saasẽ Ba a Zeova wã. D sã n bãng yɛl a woto, d sũur na n yɩɩ noogo, la a na n kɩtame tɩ d vɩɩmã tall võore.

Biiblã pʋgẽ, b rɩka Wẽnnaam bãngrã baoob n mak ne ned sẽn dɩte. A Zezi yeelame: “Ninsaal ka na n vɩ ne rɩɩb bal ye, la yaa ne goam nins sẽn yit Wẽnnaam noorẽ wã.” (Matɩe 4:4; Hebre dãmba 5:12-14) Wala sẽn yaa tɩlae tɩ d rɩt daar fãa sẽn na yɩl n vɩɩmdã, woto me, Wẽnnaam gomdã kareng wakat fãa yaa tɩlae ne-do, d sã n dat n wa paam vɩɩm wakat sẽn ka sɛt yĩng Wẽnnaam sẽn kãab tɩ watẽ wã.

Tõnd sã n dɩtẽ noom-d lame, bala a Zeova n naan tõnd woto, la sẽn paase, rɩɩbã yaa tɩlae ne-do. La bãng-y tɩ bũmb a to me n yaa tɩlae ne-do, d sã n dat n paam sũ-noogo. A Zezi yeelame: “Sũ-noog rãmb la neb nins sẽn mi tɩ b tara tẽeb ratmã.” (Matɩe 5:3, NW) D tõe n paama sũ-no-kãnga, d sã n wʋm Wẽnnaam Gomdã võore.

Yaa sɩd tɩ neb kẽer tagsdame tɩ Biiblã goam võor wʋmb yaa toog wʋsgo. Wala makre, y sã n wa karemd kibar sẽn gomd yɛl b sẽn ka maand yãmb babgẽ wã, bɩ goam sẽn yaa makr goama, tõe tɩ y na n baooda sõngr sẽn na yɩl n wʋm b võore. Tõe n yɩɩ woto me, y sã n wa karemd bãngr-goam sẽn tar makr toor-toore, tɩ y ka tõe n wʋm a võorã, sã n ka y tɩ karma Biiblã zĩis a taab sẽn gomd bõn-yɛngã yellã. (Daniɛll 7:1-7;  Wilgri 13:1, 2) La baa ne rẽ fãa, y sɩd tõe n wʋma Biiblã sẽn yetã võore. Wãn to la yãmb sɩd tõe n kɩs sɩd tɩ y tõe n wʋma a võore?

Neba fãa tõe n wʋma Biiblã võore

Biiblã yaa Wẽnnaam Gomde. Wẽnnaam tũnugda ne Biiblã n wilgd tõnd a sẽn datã. La rẽ yĩnga, Wẽnnaam na kɩt tɩ b gʋls sebr a woto buud n yaool n kɩt tɩ ned ka tõe n wʋm a võor sɩda? Bɩ a kɩt tɩ yaa neb nins sẽn karem n zãagã bal n tõe n vʋm a võorã? Ayo, a Zeova ka na n maan woto ye. A Zezi yeelame: “Ãnda n be yãmb sʋka, a biig sẽn na n kos-a buri t’a rɩk kugr n kõ-a? Walla a sã n kos-a zĩifu, a na n rɩk waaf n kõ-a n ka kõ-a zĩif bɩ? Walla a sã n kos-a gelle, a na rɩk nang n kõ-a bɩ? A sã n yaa woto tɩ yãmb a nin-wẽnsa bãng tɩ kõ yãmb kamba kũun sẽn yaa sõama; dẽ, sẽn yɩɩda yãmb arzãn Ba kõn kõ neb nins sẽn kot bãmba Sɩɩg Sõng bɩ?” (Luk 11:11-13) Woto yĩnga, yãmb tõe n kɩsa sɩd tɩ y tõe n wʋma Biiblã goam võore, tɩ y sã n kos Wẽnd ne y sũur fãa, a na n kɩtame tɩ y paam sõngr ning sẽn yaa tɩlae sẽn na yɩl n wʋm a Gomdã võorã. D sã n na n gese, baa kom-bõonegã meng tõe n wʋma Biiblã zãms yẽgã võor la b tũ-ba.—2 Tɩmote 3:15.

Baa ne Biiblã goam võor wʋmb sẽn baood modgrã, d sã n maan woto, a na n kõ-d-la sũ-noog wʋsgo. A Zezi vʋʋgrã poore, a vẽnega a meng ne a karen-biis a yiib n gom ne-b Biiblã bãngr-goamã kẽer zugu. A Luk sebrã yeta woto: “La bãmb sɩnga ne a Moiiz la Wẽnnaam no-rɛɛsdba fãa n bilg Gʋlsg Sõamyã fãa võyã sẽn wilgd bãmb yelle.” Woto waa ne bõe? Baraar zaabrã, b sẽn tags bũmb nins a sẽn wilg bãmbã zug poore, b yeela taab woto: “Tõnd ka paam sũ-noog kãsenga bãmb sẽn gom ne tõnd sora zugu, la bãmb sẽn bilg tõnd Gʋlsg Sõamyã sɩda?” (Luk 24:13-32) B sẽn wʋm Wẽnnaam Gomdã võorã kõ-b-la sũ-noogo, bala a kenga tẽeb ning b sẽn da tar ne Wẽnnaam kãabsã, la a ye kɩt tɩ b bãng tɩ beoog raarã ra na n yɩɩ sõma.

Wẽnnaam gomdã võor wʋmb ka na n yɩ namsg zaalem ne-d ye. Sẽn yaa lebend ne rẽ, a na n talla yamleoog la yõod ne-do, wa rɩ-noog rɩɩbo. La rẽ yĩnga, yãmb mii bũmb ning y sẽn segd n maan n paam bãngr-kãnga wã bɩ? Sõsg ning sẽn pʋgdã na n wilga y sẽn segd n maaneg tɩ Wẽnnaam bãngrã kõ-y sũ-noogo.—Yelbũna 2:1-5.

[Foto, seb-neng a 4]

Wala ba sẽn nong a kamba, a Zeova tũnugda ne a vʋʋsem sõngã n sõngd tõnd tɩ d wʋmd Biiblã goam võore