D sak Kirist sẽn yaa rĩmã wakat fãa
D sak Kirist sẽn yaa rĩmã wakat fãa
“B kõo yẽ soolem ne waoogre la naam, tɩ tẽnsa fãa neb sẽn yaa soolem toɛy-toɛya n gomd goam toor-toora sak-a.”—DANIƐLL 7:14.
1, 2. Bõe n wilgd tɩ yʋʋmd 33 wã, Kirist ra pa rɩt naam nebã fãa zugu?
NA-BƲG n tõe n ki a neb yĩnga, la a tõog n vʋʋg n yɩ b rĩma? Na-bʋg n tõe n zĩnd tẽngã zug n kɩt t’a sõgen dãmbã tall bas-yard ne-a la b sak-a wakat fãa, la a wa tõog n tɩ zĩnd saasẽ n yɩ b naaba? Yaa a Zezi Kirist bal n tõe n maan woto, la yɛl a taab me. (Luk 1:32, 33) Yʋʋmd 33 Pãntekotẽ wã, Kirist kũuma, a vʋʋgrã, la a saasẽ rʋʋbã poore, Wẽnnaam kɩtame t’a “yɩ bãmb neba zug ne bũmb fãa.” (Efɛɛz rãmba 1:20-22; Tʋʋma 2:32-36) Rẽ tɛka, Kirist sɩnga naam dɩɩb neb sõor bilf zugu. A pipi sõgen dãmbã yɩɩ kiris-neb nins sẽn paam vʋʋsem sõngã zaeebã, b sẽn boond tɩ “Israɛll sẽn yaa Wẽnnaam dẽnda.”—Galat dãmba 6:16; Kolos rãmba 1:13.
2 Sẽn kolg yʋʋm 30, yʋʋmd 33 Pãntekotã loogr poore, tʋm-tʋmd a Poll wilgame tɩ Kirist sɩd ra nan pa rɩt naam nebã fãa zug ye, la t’a ra ‘zaoo Wẽnnaam dɩtg . . . n gũud a bɛɛba sẽn na n lebg a nao wã roagendga.’ (Hebre dãmba 10:12, 13) Yʋʋmd 96 sẽnesã, tʋm-tʋmd a Zã sẽn da kʋʋlã paama vẽnegr n yã ãndũni wã fãa naab a Zeova sẽn kõt a Zezi Kirist saasẽ Rĩungã sẽn lugl paalmã naam. (Wilgri 11:15; 12:1-5) Tõnd wakatã, d nee yɛl sẽn wilgd vẽeneg tɩ Kirist sɩnga a Mesi Rĩungã naam dɩɩb saasẽ yʋʋmd 1914. *
3. a) Yʋʋmd 1914 tɛka, nen-bʋg la Rĩungã koe-noog tara? b) Bõe la d segd n sok d mense?
3 Hakɩka, yʋʋmd 1914 tɛkã, Rĩungã koe-noog tara neng a to sẽn yaa kãsenga. Kirist yaa Wẽnnaam Rĩungã Rĩm n dɩt naam saasẽ, baa a sã n dɩta a naamã a “bɛɛba sʋka.” (Yɩɩl Sõamyã 110:1, 2; Matɩe 24:14; Wilgri 12:7-12) Sẽn paase, dũniyã gill zugu, a sõgen dãmbã sakda a zu-sobendã ne b sũy fãa, n zãmsd nebã Biiblã. La tʋʋm-kãngã ra zɩ n tall to pĩnd ye. (Daniɛll 7:13, 14; Matɩe 28:18) Kiris-neb nins sẽn paam vʋʋsem sõngã zaeebã tɩ b boond-b me tɩ “soolem kambã” yaa “Kirist tʋm-tʋmdba.” Kirist “piis a taabã” sẽn yaa wʋsgã sõngd-b-la wakat fãa. Bãmb yaa Wẽnnaam Rĩungã koe-taasdba. (Matɩe 13:38; 2 Korẽnt dãmba 5:20; Zã 10:16) Baasgo, tõnd ned kam fãa segd n soka a meng n ges a sã n sɩd sakda Kirist zu-sobendã. Rẽ yĩnga tõnd sakd-a-la wakat fãa bɩ? Wãn to la d tõe n sak Rĩm sẽn dɩt naam saasẽ? Bɩ d reng n ges bʋʋm nins sẽn kɩt tɩ d segd n sak Kirist wakat fãa wã.
Rĩm sẽn yaa sõma t’a sõgen dãmbã sakd-a
4. A Zezi sẽn yaa Rĩm ning Wẽnnaam sẽn yãkã sẽn wa n be tẽng zugã, bõe la a maan-yã?
4 Yaa tõnd sẽn tar mi-beoog ne Kirist sẽn maan bũmb nins n kõ tõndã la a zʋg-sõmã wã yĩnga, n kɩt tɩ tõnd segd n sak-a wakat fãa wã. (1 Pɩɛɛr 1:8) A Zezi sẽn yaa Rĩm ning Wẽnnaam sẽn yãkã sẽn wa n be tẽng zugã, a maana yɛl bilf n wilg bũmb nins a sẽn na n maane, a sã n wa rɩt naam dũniyã gill zugu, wakat ning Wẽnnaam sẽn yãkã. A rɩlga kom sẽn da tar-b rãmbã. A sãooga bãad dãmba, zoense, koms rãmba, wʋmse, la mugsi. A vʋʋga kũ-rãmb menga. (Matɩe 15:30, 31; Luk 7:11-16; Zã 6:5-13) Sẽn paase, d sã n bãng a Zezi sẽn vɩɩmd to-to tẽngã zugu, d na n tõog n bãnga a sẽn na n yɩ naab ning buudu, a sã n wa rɩt naam tẽngã gill zugu. Sẽn tɩ yɩɩd fãa, d bãngdame t’a na n yɩɩ naab sẽn get neb a taabã yell ne nonglem. (Mark 1:40-45) A Napoleõ Bonapart mengã goma a Zezi yell n yeel woto: “A Alɛgsãndr, a Sezaar, a Sarlemayn la mam mengã tõog n lugla soolem sẽn yaa kãsemse. La tõnd tõog n maana rẽ ne bõe? Yɩɩ ne pãnga. Yaa a Zezi Kirist a ye tãa n lugl a naamã ne nonglem, la hal ne rũndã, neb sõor ka tɛk n ket n kiid a yĩnga.”
5. Bõe n kɩt tɩ nebã ra nong a Zezi zĩigẽ?
5 A Zezi sẽn da yaa sũ-mar la sik-m-meng soabã yĩnga, a sõmblmã la a sẽn zãms nebã bũmb ninsã ra kengda neb nins yɛlã sẽn da namsdã raoodo. (Matɩe 11:28-30) Kambã ra nonga a zĩigẽ. Sik-m-mens rãmbã ra sakd n lebgda a karen-biisi. (Matɩe 4:18-22; Mark 10:13-16) A sẽn da waoogd nebã kɩtame tɩ pagb wʋsg sẽn yaa wẽn-zoɛtb sak-a, n dɩk b sẽka, b paoong la b keelem n teel-a a tʋʋmdã pʋgẽ.—Luk 8:1-3.
6. A Lazaar kũumẽ wã, wãn-wãn la a Zezi wilg t’a sɩd yaa nimbãan-zoɛta?
6 Kirist wilga a zo-nongr a Lazaar kũumẽ wã t’a sɩd yaa nimbãan-zoɛta. A Mart ne a Maari sũ-sãoongã kɩtame t’a wẽ sir la a yãbe. Baa ne a sẽn da mi tɩ rẽ poor bilfu, a na n vʋʋga a Lazaarã, a sũur sãama wʋsgo. A Zezi nonglmã la a nimbãan-zoeerã kɩtame t’a tʋm ne pãng ning Wẽnnaam sẽn kõ-a wã n vʋʋg a Lazaare.—Zã 11:11-15, 33-35, 38-44.
7. Bõe yĩng tɩ d segd n sak a Zezi wakat fãa? (Ges-y zĩ-gũbrã seb-neng 31.)
7 A Zezi sẽn nong tɩrlem wʋsg la a kis zãmb la wẽnemã yĩng kɩtame tɩ d waoogd-a wʋsgo. Naoor a yiib fãa, a riga lɛɛbdbã sẽn da wẽgd nebã n yiis wẽn-doogẽ wã. (Matɩe 21:12, 13; Zã 2:14-17) Sẽn paase, a sẽn wa n be tẽng zugã, a paama namsg buud toor-toore, la woto kɩtame t’a bãng namsg la zu-loees nins pʋgẽ tõnd sẽn be wã. (Hebre dãmba 5:7-9) A Zezi leb n miime tɩ b sã n wẽg ned la b nams-a zaalem, zabdame. (Zã 5:15-18; 11:53, 54; 18:38–19:16) Ne raoodo, a sakame tɩ b nams-a wʋsg hal n wa kʋ-a Wẽnnaam raabã pidsg yĩnga, la sẽn na yɩl me t’a Rĩungã sõgen dãmb tõog n vɩɩmd wakat sẽn pa sate. (Zã 3:16) Kirist zʋg-sõmã kãensa kɩtame tɩ d sɩd rat n sak-a wakat fãa. (Hebre dãmba 13:8; Wilgri 5:6-10) La bõe la ned segd n maan n tõog n yɩ Kirist Rĩungã sõgne?
Bũmb nins f sẽn segd n maan n yɩ Kirist Rĩungã sõgnã
8. Bõe la b rat tɩ Kirist Rĩungã sõgen dãmb maane?
8 Wala makre, ned sã n dat n yɩ tẽng neda, naoor wʋsgo, rẽnda a soab maan yɛl kẽere. Tõe tɩ b na n yeela nin-kãng t’a segd n talla zʋg-sõngo, la yĩns laafɩ. Woto me, Kirist Rĩungã sõgen dãmb segd n kell n talla zʋg la yel-manesem sẽn yaa sõma wʋsgo, la b tall keelem tẽebã pʋgẽ.—1 Korẽnt dãmba 6:9-11; Galat dãmba 5:19-23.
9. Wãn-wãn la d tõe n wilg tɩ d sakda Kiristã?
9 A Zezi Kirist leb n datame t’a Rĩungã sõgen dãmb sak yẽ la a Rĩungã. Yaa b sẽn na n tũ a sẽn togs bũmb nins a sẽn wa n be tẽng zugã, la b na n wilg tɩ b sɩd yaa sakdba. Wala makre, b lʋɩɩsda Wẽnnaam Rĩungã la a raabã maaneg bũmbã fãa taoore, la pa ligdã baoob ye. (Matɩe 6:31-34) B leb n mogdame n talld Kirist zʋg-sõma wã buudu, baa yel-tood pʋsẽ menga. (1 Pɩɛɛr 2:21-23) Sẽn paase, Kirist Rĩungã sõgen dãmb rɩkda Kirist togs-n-taare, n maand neb a taabã neere.—Matɩe 7:12; Zã 13:3-17.
10. Wãn-wãn la d tõe n wilg tɩ d sakda Kiristã a) zakã pʋgẽ la b) tigingã pʋgẽ?
10 Kirist Rĩungã sõgen dãmb tara Kirist zʋg-sõma wã b zagsã pʋsẽ me, sẽn na yɩl n wilg tɩ b sakd-a lame. Wala makre, sɩdbã wilgdame tɩ b sakda b Rĩmã, n get b pagbã la b kambã yell wa a Zezi sẽn get a karen-biisã yell to-to wã. (Efɛɛz rãmba 5:25, 28-30; 6:4; 1 Pɩɛɛr 3:7) Pagbã wilgdame tɩ b sakda Kiristã, n tar yel-manesem sẽn yaa sõma, la b tar “sũ-bʋgsem la sũ-maasem.” (1 Pɩɛɛr 3:1-4; Efɛɛz rãmba 5:22-24) Kambã sã n dɩk Kirist togs-n-taar n sakd b roagdbã, b wilgdame tɩ b sakda Kiristã. A Zezi sẽn wa n yaa biiga, a kell n saka a roagdbã, baa b sẽn da pa zems zãngã. (Luk 2:51, 52; Efɛɛz rãmba 6:1) Kirist Rĩungã sõgen dãmb maanda b sẽn tõe fãa sẽn na yɩl n dɩk a togs-n-taare, n nong b ba-biisã, la b tar sũ-bʋgsem. B leb n modgdame n na n yɩ neb sẽn tar “sik-m-menga,” sẽn pa ‘lebsd wẽng wẽng yĩnga, walla tʋʋsg tʋʋsg yĩng ye.’—1 Pɩɛɛr 3:8, 9; 1 Korẽnt dãmba 11:1.
Kirist Rĩungã sõgen dãmb sakda a noyã
11. No-bʋs la Kirist Rĩungã sõgen dãmb sakda?
11 Wala ned sẽn dat n yɩ tẽng ned sẽn sakd tẽn-kãng noyã, Kirist Rĩungã sõgen dãmb sakda “Kirist tõogã,” n tũud a zãmsgã la noy nins a sẽn kõ wã. (Galat dãmba 6:2) Sẽn tɩ yɩɩda, b tũuda “naam tõogã” sẽn yaa nonglmã. (Zak 2:8) Bõe la tõod kãens yeta?
12, 13. Wãn to la d wilgd tɩ d sakda “Kirist tõogã”?
12 Kirist Rĩungã sõgen dãmb yaa pãn-komsem dãmba. (Rom dãmba 3:23) Rẽ n so tɩ b segd n ket n “nong ba-biisã” ne pʋ-peelem la b ‘nong taab wʋsg ne b sũyã fãa.’ (1 Pɩɛɛr 1:22) Kiris-nebã nin-yend “sã n tar yell ne a to,” a tũuda Kirist noorã n maan sũ-mar ne to wã la a kõ-a sugri. B sẽn tũud no-kãngã wã, b pa get taab pãn-komsem ye. B ned kam fãa geta a to zʋg-sõma, n nong-a rẽ yĩnga. D sũy sɩd yaa noogo, d sẽn naag neb sẽn sakd d Rĩmã wakat fãa la b tar nonglem sẽn “yaa bũmb fãa loɛtg sɩd-sɩdã.”—Kolos rãmba 3:13, 14.
13 Sẽn paase, a Zezi wilgame tɩ yẽ sẽn da nong nebã to-to wã yɩɩda nin-buiidã sẽn nong taab to-to wã. (Zã 13:34, 35) Sã n yaa neb nins sẽn nong tõndã bal la d nonga, d sẽn maandã pa yɩɩd neb a taabã ye. Tõnd sã n maan woto, tõnd nonglmã pa na n yɩ nonglem hakɩk ye. A Zezi sagla tõnd tɩ d rɩk a Ba wã togs-n-taar n nong d bɛɛbã sẽn kis-d la b namsd-dã menga. (Matɩe 5:46-48) Nonglmã me le kɩtdame t’a Zezi Rĩungã sõgen dãmb ket n tʋmd b tʋʋmdã. Tʋʋm-kãng la bʋgo?
D sẽn sakd Kiristã d paamda makre
14. Bõe yĩng tɩ koe-noogã mooneg tar yõod wʋsgo?
14 Wẽnnaam Rĩungã sõgen dãmb tara tʋʋm-kãseng ning sẽn yaa “kɩs kaset ne Wẽnnaam soolem koɛɛgã.” (Tʋʋma 28:23) Woto maaneg tara yõodo, bala Mesi Rĩungã na n wilgame tɩ yaa a Zeova bal n yaa naab sẽn-ka-to. (1 Korẽnt dãmba 15:24-28) Tõnd sã n moond koe-noogã, sẽn kelgd-bã tõe n wa lebga Wẽnnaam Rĩungã sõgen dãmba. Sẽn paase, yaa manesem ning nebã sẽn tar ne koɛɛgã zugu, la Kirist sẽn yaa Rĩmã na n tik n kao b bʋʋdo. (Matɩe 24:14; 2 Tesalonik rãmba 1:6-10) Dẽnd bõn-kãseng ning d sẽn na n maan n wilg tɩ d sakda Kiristã yaa d sak a noorã n taas neb a taabã Rĩungã koɛɛga.—Matɩe 28:18-20.
15. Bõe yĩng tɩ kiris-nebã paamd makre?
15 A Sʋɩtãan maanda a sẽn tõe tɛk n na n gɩdg koe-noogã moonego. Dũni wã nanambs me pa sakd n deeg tɩ Wẽnnaam kõo Kirist zu-sobend ye. (Yɩɩl Sõamyã 2:1-3, 6-8) Rẽ n so t’a Zezi ra keoog a karen-biisã ne gom-kãensã: “Tʋm-tʋmd ka yɩɩd a zu-soab ye. Bãmb sã n nams maam, b na n namsa yãmb me.” (Zã 15:20) Woto yĩnga, kiris-nebã zabda ne a Sʋɩtãan la a poorẽ dãmbã, tɩ rẽ kɩt tɩ b paamd makre, b sẽn sakd Kiristã yĩnga.—2 Korẽnt dãmba 10:3-5; Efɛɛz rãmba 6:10-12.
16. Wãn to la Wẽnnaam Rĩungã sõgen dãmb “kõt Wẽnnaam bũmb nins sẽn yaa Wẽnnaam dẽnda”?
16 Baasg zãnga, Wẽnnaam Rĩungã sõgen dãmb ket n sakda b Rĩmã. La rẽ pa rat n yeel tɩ b kɩɩsda dũni wã pãn-soaadb ye. (Tɩt 3:1, 2) A Zezi yeelame: ‘Bɩ y kõ a Sezaar bũmb nins sẽn yaa a Sezaar dẽnda, la y kõ Wẽnnaam bũmb nins sẽn yaa Wẽnnaam dẽnda.’ (Mark 12:13-17) Rẽ n so tɩ Kirist Rĩungã sõgen dãmb sakd goosneema rãmbã noy nins sẽn pa kɩɩsd Wẽnnaam noyã. (Rom dãmba 13:1-7) La Zʋɩf rãmbã bʋ-kaoodb sul-kãsengã sẽn wa n yik n na n kɩɩs Wẽnnaam noorã n yeel a Zezi karen-biisã tɩ b ra ye moon koɛɛgã, karen-biisã yeela ne raood la waoogr tɩ b segd n “saka Wẽnnaam n yɩɩd nebã.”—Tʋʋma 1:8; 5:27-32.
17. Bõe yĩng tɩ d tõe n tall raood makr pʋgẽ?
17 Yaa vẽeneg tɩ Kirist Rĩungã neb sã n paamd namsg b bɛɛbã nusẽ, b segd n talla raood wʋsg sẽn na yɩl n kell n sak b Rĩmã. Baasg zãnga, a Zezi yeelame: “Bark bee yãmb zutu neb sẽn na n gom yãmb wẽnga, la nams yãmba, la sãbs yãmb mam yĩnga. Bɩ y maan sũ-noogo n kɩdem, yãmb keoor sẽn yaa kãseng [saasẽ] wã yĩnga.” (Matɩe 5:11, 12) Kirist pipi karen-biisã bãnga gom-kãensa yõodo. Baa b sẽn da ket n moond koe-noogã tɩ b pãbd-bã, b ra tara “sũ-noogo b sẽn zems tɩ paam namsg a Zezi yʋʋra yĩngã. La daar fãa Wẽnnaam dooga pʋgẽ ne dot pʋsẽ bãmb zãmsa neba la b moon a Zezi Kirist koe-noogã n ka bas ye.” (Tʋʋma 5:41, 42) Yãmb me zemsa ne pẽgre, y sẽn maand wa bãmb n ket n sakd Kiristã baa ne y sẽn mi n tar zu-loeese, bãase, sũ-sãamse ka rẽ bɩ y mi n paamd namsg y tẽebã yĩnga menga.—Rom dãmba 5:3-5; Hebre dãmba 13:6.
18. A Zezi sẽn yeel a Põns Pɩlat bũmb ningã wilgda bõe?
18 A Zezi sẽn yaa Rĩm ning Wẽnnaam sẽn yãkã sẽn wa n be tẽng zugã, a yeela Rom naab a Põns Pɩlat woto: “Mam soolem ka dũniyã rẽnd ye. Mam soolem sã n da yaa dũniyã rẽnda, mam tʋm-tʋmdba ra na n zabame tɩ b ra yõk maam n kõ Zʋɩf rãmba ye. La masã mam soolem ka dũniyã ka rẽnd ye.” (Zã 18:36) Yaa rẽ n so tɩ Wẽnnaam Rĩungã sõgen dãmb zɩ n dɩk zab-teoog n zab ne neda, bɩ n kẽes b toog dũniyã zab pʋsẽ wã. B sẽn sakd “Laafɩ-naabã” yĩnga, b lakda b mens zãng-zãng ne dũniyã politik yɛlã.—Ezai 2:2-4; 9:5, 6.
Sẽn sakd-b Kiristã na n paama bark sẽn ka saabo
19. Bõe yĩng tɩ Kirist Rĩungã sõgen dãmb tõe n gũ beoog-daarã ne bas-m-yam?
19 Neb nins sẽn sakd Kirist sẽn yaa “Rĩm dãmb Dĩma” gũuda beoog-daarã ne bas-m-yam. Ne b sũy fãa, b gũuda wakat ning a sẽn na n zĩnd saasẽ n tʋm ne a pãn-kãsengã tẽngã zugã. (Wilgri 19:11–20:3; Matɩe 24:30) Wẽnnaam ‘soolmã kamb’ sẽn paam vʋʋsem sõngã zaeebã n ket tẽng zug n yaa sakdbã gũuda ne b sũy fãa n na n wa tɩ rɩ naam ne Kiristã saasẽ. Woto yaa b pʋɩɩr sẽn yaa kãseng wʋsgo. (Matɩe 13:38; Luk 12:32) Kirist “piis a taab” nins sẽn yaa sakdbã gũuda wakat ning b Rĩmã sẽn na n wa yeel-b tɩ: “Wa-yã, yãmb dãmba sẽn tar m Ba barka. Bɩ y reeg [tẽng zug arzãnã] soolem ninga sẽn segl yãmb yĩng hal dũniyã naaneg wakatã.” (Zã 10:16; Matɩe 25:34) Woto yĩnga, bɩ Wẽnnaam Rĩungã sõgen dãmb fãa yãk yam n kell n sak Kiristã sẽn yaa Rĩmã wakat fãa.
[Tẽngr note]
^ sull 2 Ges-y Comment raisonner à partir des Écritures sebrã, gom-zug ning sẽn yaa “Pourquoi les Témoins de Jéhovah disent-ils que le Royaume de Dieu a été établi en 1914?,” seb-neng 86-88. Yaa a Zeova Kaset rãmbã n yiis seb-kãnga.
Y tõe n wilga a võor bɩ?
• Bõe yĩng tɩ d segd n sak Kiristã wakat fãa?
• Wãn to la Kirist sõgen dãmbã wilgd tɩ b yaa sakdba?
• Bõe n kɩt tɩ d rat n sak Kirist sẽn yaa Rĩmã wakat fãa?
[Zãmsgã sogsgã]
[Zĩ-gũbri, seb-neng 31]
KIRISTÃ ZƲG-KÃSEMS A TAABA
A pa tũusd neb ye—Zã 4:7-30.
A yaa nimbãan-zoɛta—Matɩe 9:35-38; 12:18-21; Mark 6:30-34.
A geta neb a taabã yelle—Zã 13:1; 15:12-15.
A sakda Wẽnnaam—Matɩe 4:1-11; 28:20; Mark 11:15-18.
A kʋmda neba—Mark 7:32-35; Luk 7:11-15; Hebre dãmba 4:15, 16.
A yaa maan-tɩ-zems soaba—Matɩe 15:21-28.
[Foto, seb-neng 29]
D sẽn nong taabã, d sakda “Kirist tõogã”
[Foto rãmba, seb-neng 31]
Kirist zʋg-sõma wã kɩtame tɩ y sakd-a bɩ?