Karemdbã sogsgo

Bõe n kɩtd tɩ ‘buudã fãa soolem bõn-neebã’ wat Wẽnnaam baleng hakɩkã “roog” pʋgẽ?—Aze 2:7.

A Zeova ra pĩnd n kɩtame tɩ no-rɛɛs a Aze togs woto: “M na n digimda buuda fãa soolem tɩ b bõn-neebã wa ka tɩ m dooga pid ne arzɛgse.” (Aze 2:7) Rẽ yĩnga yaa “buuda fãa soolem” digimdgã n kɩtd tɩ “b bõn-neebã,” sẽn dat n yeel tɩ pʋ-peelem dãmbã sakd n lebgd Wẽnnaam tũudum hakɩkã nebã bɩ? Leokrã yaa ayo.

Bɩ d bao n bãng bũmb ning sẽn digimded buudã fãa soolmã, la rẽ sẽn wat ne bũmb ningã. Biiblã yeta woto: ‘Dũniyã buud toɛy-toɛyã sũy puudame, la b nebã tagsda tags-yaalse.’ (Yɩɩl Sõamyã 2:1) B sẽn yeel tɩ dũniyã soolem dãmb tagsda tags-yaalsã, yaa b sẽn ket n dat n soog b mens n dɩt naamã. Bũmb ning sẽn dĩmsd-b n tɩ yɩɩdã yaa b sẽn zoet tɩ b na n wa reeg b naamã.

Dẽnd a Zeova Kaset rãmbã sẽn moond dũniyã gill zug tɩ b zoe n lugla Wẽnnaam Rĩungã saasẽ wã kẽesda dũniyã nanambs rabeem. Sɩd me, Mesi Rĩungã Wẽnnaam sẽn bobl a Zezi Kiristã na n wa ‘wãa ninsaalbã soolem fãa tɩ b meneme.’ (Daniɛll 2:44) Koɛɛg ning tõnd sẽn moondã naaga ne bʋ-kaoor koɛɛg sẽn kẽesd dũniyã soolem fãa nanambs rabeem meng-menga. (Ezai 61:2) B sẽn ne tɩ koɛɛgã tara yelgr n dabdã, maneg n paasda b rabeemã. La wãn to masã la rigimdg ning yell Aze 2:7 sẽn pĩnd n togsã pidsda?

A Zeova yeela Aze 2:6 pʋgẽ woto: “A keta wakat bilf bal tɩ m digimd yĩngri ne dũniyã la ko-kãsengã.” Tʋm-tʋmd a Poll tika gom-kãensã zug n gʋls woto: “Bãmb kãabame n yeele: ‘Mam ka na n le rigimd dũniyã bal ye, mam na n digimda yĩngr me.’ Gom-kãensa sẽn yet tɩ: ‘Leb n digimdã’ wilgda bũmb fãa sẽn tõe n digimda loogre sẽn naan wakat bilf yĩnga, tɩ bũmb nins sẽn ka tõe n digimda [sẽn dat n yeel tɩ Wẽnnaam Rĩungã] yalse.” (Hebre dãmba 12:26, 27) Sɩda, Wẽnnaam na n sãamã dũni-kãngã ne a tʋʋm wẽnsã zãnga, la a lebs n luglg dũni-paalga.

Pʋ-peelem dãmbã sẽn sakd n lebgd tũudum hakɩkã nebã pa b sẽn digimd tẽnsã bɩ buudã fãa soolmã yĩng ye. Yaa bũmb ning sẽn digimd dũniyã soolem nanambsã n kɩtd me tɩ pʋ-peelem dãmbã wat a Zeova nengẽ n sakd tũudum hakɩkã. Yaa koɛɛg ning b sẽn moond dũniyã gill zug n yetẽ tɩ Wẽnnaam Rĩungã luglame wã. Koe-kãng sẽn yaa “koe-noog sẽn ka sɛta” mooneg kɩtdame tɩ dũniyã fãa pʋ-peelem dãmbã sakd n lebgd Wẽnnaam tũudum hakɩkã neba.—Wilgri 14:6, 7.

Wẽnnaam Rĩungã koɛɛgã b sẽn moondã yaa Wẽnnaam sũ-dokrã daar koɛɛga, la fãagr koɛɛg me. (Ezai 61:1, 2) Yaa koe-kãng n digimded dũniyã buud fãa soolem nanambsã. Leb n yaa koe-kãng b sẽn moondã n kɩtd tɩ dũniyã fãa soolem bõn-neebã wat n naagd n pẽgd a Zeova.