Nin-tɩrg yɩɩb sẽn wat ne bark ninsã
Nin-tɩrg yɩɩb sẽn wat ne bark ninsã
“Yaa a Zeova bark n kõt arzɛka, la a ka paasd toog ne rẽ ye.”—YELBŨNA 10:22, NW.
1, 2. Bõe yĩng tɩ d pa segd n tagsd beoog daarã yell tɩ loog nugu?
AMERIK filozof a yembr yeelame tɩ “ned sã n nong n tagsd bũmb nins a sẽn na n paam beoogã yell tɩ loog nugu, a wat n yĩma bũmb nins a sẽn zoe n tarẽ wã yõodo.” Wala makre, kamb kẽer sẽn yãgd n dat n yɩ kãsembã yĩnga, b wat n lebga kãsemb tɩ b pa paam n dɩ b yãadmã yõod ye.
2 Baa d sẽn yaa a Zeova balemdbã, tõnd me tõe n wa tagsda beoog daarã yell tɩ loog nugu. Bõe yĩng tɩ d yet woto? Bala tõnd rata ne d sũy fãa tɩ Wẽnnaam pids a sẽn kãab tɩ tẽngã na n lebga arzãnã. D yãgdame tɩ wakat ning bãase, kʋʋlem, tood la namsg buud fãa sẽn na n menemã ta. Yaa sɩd tɩ pa wẽng tɩ d tagsd bark nins sẽn watã yell ye. La d sã n tagsd rẽ yell tɩ loog nug tɩ wa kɩt tɩ d yĩm bark nins Wẽnnaam sẽn zoe n kõt-d rũndã-rũndã wã, sɩd na n yɩɩ kaeto! Bũmb nins d sẽn gũudã sã n pa wat tao-tao, d tõee nana-nana n wa koms raood tɩ d sũur sãame. (Yelbũna 13:12) Wakat kãnga, vɩɩmã zu-loees tõe n kɩtame tɩ d wa kʋmd d mens tɩ looge. Wall tɩ d mao n welg d zu-loeesã, d tõe n wa yẽgemda wakat fãa. La d sã n nanda bark nins d sẽn tar masã wã la d bʋgsd b zutu, d na n tõog n gila yel-kãens fãa.
3. Bõe yell la d na n gom sõs-kãngã pʋgẽ?
3 Yelbũna 10:22, NW yetame tɩ “yaa a Zeova bark n kõt arzɛka, la a ka paasd toog ne rẽ ye.” Rẽ yĩnga d sũy pa segd n yɩ noog bark nins a Zeova sẽn kõ-d tẽebã wɛɛngẽ rũndã-rũndã wã yĩng sɩda? Bɩ d ges bark kẽer n bãng b sẽn nafd tõnd ned kam fãa to-to wã. D sã n dɩk sẽk n bʋgs bark nins a Zeova sẽn ning pʋ-peelem dãmbã bɩ nin-tɩrsã zutã, sɩd na n kõ-d-la raood tɩ d kell n sak d saasẽ Ba wã ne sũ-noogo.—Yelbũna 20:7.
Bark toor-toor sẽn kõt-d sũ-noog masã menga
4, 5. Bõe la Biiblã yet tɩ noom yãmb wʋsgo, la bõe yĩnga?
4 D mii Biiblã sẽn sɩd yet bũmb ninsã sõma. Kiris-neb ne yʋʋr tũudmã neb nong n yetame tɩ b tẽeda Biiblã. La b yaool n pa zemsd taab Biiblã sẽn yet bũmb ninsã zug ye. Naoor wʋsgo, b wẽn-do-yɛng neb meng tõe n tara tagsa toɛy-toɛy Biiblã sẽn yetã zugu. Ad woto sɩd kɩtame t’a Zeova sõgen dãmbã yaa toor fasɩ ne-ba. Baa ne tõnd ned kam fãa sẽn yit tẽng ning la d buud la d minimd sẽn yaa to-to, d fãa mii sɩd Wẽnnaamã d sẽn balemdã yʋʋre. A pa wẽnnaam sẽn tar mens a tãab tɩ b pa tõe n bãng n bilg rẽ võor ye. (Tõodo 6:4; Yɩɩl Sõamyã 83:19; Mark 12:29) D leb n miime tɩ ka la bilfu, b na n welga no-koeemd ning b sẽn wẽ Wẽnnaam naam sẽn ka to wã zugã, la tɩ tõnd ned kam fãa sã n kell n yɩ sakda, d wilgdame tɩ Wẽnnaam tara bʋʋm. D mii ned sẽn lebgd bũmb ning a kũum poorã vẽenega. D leb n miime tɩ b sẽn yeel tɩ Wẽnnaam sɩbgda nebã bugum yir bɩ zĩig a to wã pa sɩd ye. Rẽ kɩtame tɩ pa sɩbgr dabeem la sẽn kɩt tɩ d zoet Wẽnnaamã ye.—Koɛɛg Soaba 9:5, 10.
5 Sẽn paase, d sẽn mi tɩ yaa Wẽnnaam n naan tõnd a meng wõneg la tɩ pa tũ ne bũmb d sẽn pa mi sabab tɩ d wa beẽ wã, d sũy yaa noogo. (Sɩngre 1:26; Malaki 2:10) Yɩɩl-gʋlsdã ra yeela Wẽnnaam woto: “Mam pʋʋsda yãmb bark bõn-kãsems a woto yĩnga. Mam wẽnda bõn-bãnde, yãmb tʋʋma yaa bõn-bãna.”—Yɩɩl Sõamyã 139:14.
6, 7. Toeem-bʋs la yãmb mengã bɩ neb y sẽn mi maanẽ tɩ tall nafa?
6 D tõog n basa minimd la tʋʋm wẽnse. Televiziõ wã, radio wã la zʋrno rãmbã wae n keoogda nebã sɩgaarã yũubã, ra-tɩgrã la yoobã sẽn wat ne yel-beed ninsã. Baa ne rẽ, naoor wʋsgo, nebã pa tũud keoog-kãens ye. La pʋ-peelem soab sã n wa bãng tɩ sɩd Wẽnnaamã gɩdga tʋʋm kãense, la t’a sũur pa noom ne neb nins sẽn maand-bã, bõe n na n yɩ? Ad rẽ sɩd na kɩt t’a bas tʋʋm kãense! (Ezai 63:10; 1 Korẽnt dãmba 6:9, 10; 2 Korẽnt dãmba 7:1; Efɛɛz rãmba 4:30) Yaa sɩd tɩ yaa sẽn na yɩl n noog Wẽnnaam a Zeova sũur yĩng la a sẽn na n bas bõn-kãensã, la rẽ na n kɩtame me t’a paam laafɩ la yam sẽn gãe bãane.
7 Minim-wẽns basg yaa toog ne neb wʋsgo. La yʋʋmd fãa yaa neb tusa n yaool n tõogd n basd b minim-wẽnse. B rɩkda b mens n kõt a Zeova n deegd lisg zãma sʋka, tɩ wilgdẽ tɩ b basa yɛl b sẽn da maand tɩ pa tat Wẽnnaam yam ye. Ad woto sɩd kengda d fãa raoodo, bala, kɩtdame tɩ d nangd pãng n paasdẽ, n pa rat n tol n le yɩ yel-wẽnã la tʋʋm-wẽnsã yembs ye.
8. Biiblã sagl-bʋs n tõe n kɩt tɩ zak vɩɩm tall sũ-noogo?
8 D tõe n tõogame tɩ d zagsã vɩɩm yɩɩ noogo. Tẽns wʋsg pʋsẽ, zagsã pʋs vɩɩmã tara sãoong n dabda. Yikãadb wʋsg wat n baas n kaoa b kãadem, n bas b kambã ne sũ-sãams la nimbãanega. Erop tẽns kẽer pʋsẽ, zags 100 sʋka, sẽn kolg zags 20 tara roagd a ye bala. Wãn-wãn la a Zeova sõngd tõnd tɩ d yaa nin-tɩrs d zagsã pʋsẽ? D bõos tɩ y karem Efɛɛz rãmb 5:22–6:4 goamã n ges sagls nins Wẽnnaam Gomdã sẽn kõt sɩdbã, pagbã la kambã. Yaa vẽeneg tɩ kãadb sã n tũud sagl-kãensã la a taab sẽn be Biiblã pʋgẽ, paasda b kãadmã pãnga, n sõngd-b tɩ b tõogd n wubd kambã sõma, la kɩtdẽ tɩ b zagsã tar sũ-noogo. Rẽ yĩnga woto pa bark sẽn segd n noogd d sũy sɩda?
9, 10. Wãn to la tõnd sẽn get beoog daarã to-to wã yaa toor ne dũniyã rãmb sẽn get-a to-to wã?
9 D tara bas-m-yam tɩ d zu-loeesã na n saa ka la bilfu. Baa ne bãngrã sẽn kẽng taoorã, la nanambs kẽer sẽn maood ne b sũy fãa n na n welg rũndã-rũndã zu-loeesã, b pa tõog ye. Sẽn nan pa kaoose, a Klaus Schwab sẽn yaa siglg a yembr (Forum économique mondial) lugundã yeelame tɩ “dũniyã zu-loees tara paasgo, tɩ sẽk ning b sẽn tar n na n welg-bã yaool n tar boogre.” A goma yɛl wala “terorismã, pemsmã, koomã la tẽngã rẽgeng n paas ligdã zu-loees sẽn pak dũniyã tõr fãa nebã yelle.” Sẽn na n baase, a Schwab yeela woto: “Masã, lebga tɩlae tɩ nebã fãa naag taab n maan bũmb tao-tao n welg d zu-loeesã.” Rũndã-rũndã, beoog sẽn vẽeg fãa, dũni kãngã nebã pa ne baa fʋɩ b sẽn tõe n tik n saag tɩ beoog daarã na n yɩɩ sõma ye.
10 Ad tõnd sẽn mi t’a Zeova lugla Mesi Rĩungã t’a na n welg ãdem-biisã zu-loeesã fãa wã sɩd yaa bark tɛkẽ! Ne Rĩung kãng maasem, sɩd Wẽnnaamã na n kɩtame tɩ ‘zabã sa’ la a wa ne ‘laafɩ wʋsgo.’ (Yɩɩl Sõamyã 46:10; 72:7) A Zezi Kirist sẽn yaa Rĩm ning a sẽn zaeyã ‘na n fãaga nimbãan-ned sẽn kelemda la naong soab sẽn ka tar sõangda. Yẽ na n fãaga bãmb ne toolem la pãnga.’ (Yɩɩl Sõamyã 72:12-14) Rĩungã naamẽ, kom pa na n ye zĩnd yɛs ye. (Yɩɩl Sõamyã 72:16) A Zeova ‘na n yẽesa d nintãmã fãa t’a ra le zĩnd d ninẽ ye, la kũum ka na n le zĩnd ye, la sũ-sãoong bɩ yãbre wall toog kõn le zĩnd yɛs ye, tɩ bõe, dẽenem bũmb fãa loogame.’ (Wilgri 21:4) Rĩungã zoe n lugla saasẽ la ka la bilfu, a na n maana bũmb nins fãa sẽn yaa tɩlaeyã n welg zu-loees nins fãa sẽn be tẽngã zugã.—Daniɛll 2:44; Wilgri 11:15.
11, 12. a) Yõ-noogrã bɩ naarã kõta sũ-noog hakɩk bɩ? Wilg-y y leoorã võore. b) Bõe n kõt sũ-noog hakɩkã?
11 D mii bũmb ning sẽn kõt sũ-noog hakɩkã. Bõe n kõt sũ-noog hakɩka? Bãngd a yembr yeelame tɩ f sã n dat sũ-noog hakɩka, yɛl a tãab n yaa tɩlae. A yeelame tɩ yaa f sẽn na n noogd f yõor la f tar nug-tʋʋmd tɩ sõngd-f tɩ f get f zak neb yelle, la f le tʋmd tʋʋmd sẽn nafd neb wʋsgo. Yel-kãensã b tãabã sʋka, a yeelame tɩ yɛl a yiibã n lʋɩt yõ-noogrã taoore, la a paas tɩ “yãoã na n linga neb wʋsgo, bala yaa yõ-noogrã la wʋsg lʋɩɩsd taoor b vɩɩmã pʋgẽ.” La bõe la Biiblã yẽ yet sũ-noog hakɩkã wɛɛngẽ?
12 Pĩnd wẽndẽ Israɛll rĩm a Salomo yeela woto: “Mam tagsa m sũur pʋgẽ tɩ mam na n makame n maan sũ-noogo la m yã naare. La gese, yõwã me yaa zaalem. Mam yeelame tɩ laad yaa yalemdo la sũ-noog nafr yaa bõe.” (Koɛɛg Soaba 2:1, 2) Sã n yaa ne Biiblã, naar bɩ yõ-noogr sẽn kõt sũ-noog ningã kaoosda wakat bilf bala. La yaa wãn to yẽ ne sũ-noog ning tʋʋmd sẽn tõe n kõ-dã? Tõnd tara tʋʋmd sẽn tar yõod n yɩɩd tʋʋmã fãa sẽn yaa Rĩungã koɛɛg mooneg la karen-biisã maanego. (Matɩe 24:14; 28:19, 20) D sã n moond nebã fãagr koɛɛgã sẽn be Biiblã pʋgẽ wã, d tʋmda tʋʋmd sẽn tõe n fãag tõnd la neb nins sẽn kelgd tõndã. (1 Tɩmote 4:16) D sẽn tʋmd tʋʋm kãngã n yaa ‘Wẽnnaam tʋmd-n-taasã,’ kɩtame tɩ d bãng tɩ kũun wata ne sũ-noog n yɩɩd reegre. (1 Korẽnt dãmba 3:9; Tʋʋma 20:35) Tʋʋm kãngã kɩtdame tɩ d vɩɩmã tar võore, la kɩtdẽ me tɩ Naandã tõe n leok a Sʋɩtãan no-baoodmã. (Yelbũna 27:11) Sãmbg sẽn ka be, Wẽnnaam a Zeova wilga tõnd tɩ yaa yẽ sakr bal n kõt sũ-noog hakɩk sẽn kaoosd wakat fãa.—1 Tɩmote 4:8.
13. a) Bõe yĩng tɩ d tõe n yeel tɩ Wẽnnaam Tʋʋmdã Lekoll yaa bark bũmb sẽn segd n kõ-d sũ-noogo? b) Wãn to la Wẽnnaam Tʋʋmdã Lekoll naf yãmba?
13 D paamda zãmsg sẽn tar yõod wʋsgo. A Gerhard yaa a Zeova Kaset rãmbã tiging a ye kãsem soaba. A tẽega a bi-bɩɩlmã wakat yell n yeel woto: “Mam sẽn da wa n yaa bi-bɩɩgã, goam da yaa toog wʋsg ne-ma. Mam sã n da wa be yell taoor tɩ yaa tɩlae tɩ m gome, m da pa tõe n gom fasɩ ye, m gomd n bidimdame. Woto ra sãamda mam sũur wʋsgo. Kɩtame tɩ m da pa nand m mengã ye. Mam doagdbã kẽesa maam lekoll a ye sẽn zãmsd neb tɩ b tõe n gom sõma pʋgẽ, la pa yãk neng ye. Mam nengẽ wã ra pa m zɩlemdã n pa lak sõma ye, yaa nif-zoeer n da tar-ma. La Wẽnnaam Tʋʋmdã Lekoll a Zeova sẽn siglã sõng-m-la hal wʋsgo. Mam sẽn kẽ lekoll kãngã, kenga m daoodo. M modga m sẽn tõe tɛk n tũ bũmb ning m sẽn zãmsã, la ad sɩd sõng-m-la wʋsgo! M nif-zoeerã saame tɩ m tõe n gom ne raood koe-moonegã pʋgẽ. Masã m kõta zãma sõss menga. M tara mi-beoog wʋsg ne a Zeova a sẽn tũnug ne lekoll kãngã n sõng-mã.” Rẽ yĩnga a Zeova sẽn zãmsd tõnd sẽn na yɩl tɩ d tõog n tʋm a tʋʋmdã, pa kõt-d sũ-noog sɩda?
14, 15. Sõng-bʋg la d tõe n paam sũ-sãoong wakate? Kõ-y makre.
14 D tara zems-n-taar ne a Zeova la d saam-biisã sẽn be dũniyã gill zugã. Tõnd saam-bi-poak a ye sẽn be Alemayn t’a yʋʋr boond t’a Katrin sũur sãama wʋsgo, a sẽn wʋm tɩ Aazi di siidɛste, seb-kãseng ning b sẽn boond tɩ sunami wã kɩtame tɩ tẽngã rigimd Taylãnd soolmẽ wã. Yel-beedã sẽn wa n maandẽ wã t’a Katrin bipugl a ye n da kẽng n na n tɩ kaag Taylãnd tẽngã. Maana lɛɛr 32 tɩ pʋg-kãngã ra pa mi a bipuglã sã n ket n vɩɩme bɩ a maana yõore, tɩ neb nins sẽn ki yel-beedã pʋgẽ wã sõor yaool n da tar paasgo. La ad b sẽn wa n bool a Katrin telefõnnẽ n wilg-a tɩ bũmb pa maan a bipuglã, sɩd yols-a-la hal wʋsgo!
15 A Katrin sẽn da wa n nan pa tar a biigã kibar tɩ rabeem tar-a wã, bõe n sõng-a? A gʋlsa woto: “Mam da tara a Zeova pʋʋsg bala. Pʋʋsgã sɩd ra kengda m pɛlg la sigsd m sũuri. Sẽn paase, tẽebã pʋgẽ saam-biisã ra wat n kaagd-m lame tɩ paasd m daoodo.” (Filip rãmba 4:6, 7) A Katrin sã n da pa pʋʋs a Zeova n kos a sõngr la a paam a tẽed-n-taasã belsgo, a toogã ra na n yɩɩga a pãnga. Zems-n-taar ning d sẽn tar ne a Zeova, ne a Biriblã la ne d tẽebã pʋgẽ saam-biisã sɩd yaa bark sẽn ka to sẽn segd n kõ-d sũ-noogo.
16. Kõ-y makr sẽn wilgd kũum vʋʋgr saagrã yõodo.
16 D saagd n na n wa leb n yãa d neb nins sẽn ki wã. (Zã 5:28, 29) Rao a yembr yʋʋr sẽn boond t’a Matthias talla roagdb sẽn yaa a Zeova Kaset rãmb tɩ b wub-a t’a sak tẽebã. La a sẽn da pa nand bark nins a sẽn tarã yĩnga, a bɩʋʋng zugẽ, a wa n basa tigingã. Rũndã-rũndã, a gʋlsa woto: “Mam da zɩ n sõs ne m ba wã sõma woto ye. Tõnd da pa noom ne taab sõma ye. La wakat fãa m baaba da rata mam neere. Mam da pa mi t’a ra nong-m-la wʋsg ye. Yʋʋmd 1996, mam sẽn da wa n zĩ a gãagã zug n gãd a nugã n yãbdã, m kos-a lame t’a kõ-m sugr bũmb nins fãa m sẽn maanã yĩnga, la m yeel-a tɩ m nong-a-la wʋsgo. Bʋko, a ra pa ye tõe n wʋm mam goamã ye, bala rẽ wẽnd t’a sobgame. Yaa bã-koɛɛg n yõk-a, la tũu ne a yõore. M sã n wa paam n yã-a kũum vʋʋgrã wakate, d na n maana bũmb nins fãa d sẽn pa paam n maan ne taabã. Sãmbg sẽn ka be, a sã n wʋm t’a biigã yõdg n lebga kãsem soaba, la t’a ne a pagã paama zu-noog n yaa so-pakdba, a sũur na n yɩɩ noogo.” Ad kũum vʋʋgr saagrã sɩd yaa bark tɛkẽ n kõ-do!
A pa paasd toog ne rẽ ye
17. D sã n bʋgs bark nins a Zeova sẽn ningd tõndã zutu, wãn-wãn la rẽ na n naf-do?
17 A Zezi Kirist goma a saasẽ Ba yell n yeel woto: “Bãmb kɩtdame tɩ bãmb wĩntoog zẽk nin-wẽns la nin-tɩrs yĩnga, la bãmb tʋmda saaga nin-tɩrs la nin-wẽns yĩnga.” (Matɩe 5:45) Wẽnnaam sã n ningda nin-wẽnsã meng barka, ad a sɩd na ning nin-tɩrsã zut bark n yɩɩge! Yɩɩl Sõamyã 84:12 yeta woto: ‘Zusoaba kõn mong neb nins sẽn kẽnd ne pʋ-peelmã bõn-sõma ye.’ D sã n tags n ges a Zeova sẽn get neb nins sẽn nong-a wã yell neer to-to wã, d sũy sɩd na n yɩɩ noogo, la d na n tall mi-beoog wʋsg ne-a.
18. a) Bõe yĩng tɩ d tõe n yeel tɩ bark nins a Zeova sẽn ningd tõndã pa lagem ne toogo? b) La bõe yĩng tɩ neb wʋsg sẽn sakd Wẽnnaam namsdẽ?
18 Yaa a Zeova barkã n kɩt t’a nin-buiidã tar bark wʋsg tẽebã wɛɛngẽ wã, la d tara bas-m-yam t’a pa paasd toog ne rẽ ye. (Yelbũna 10:22) La bõe yĩng masã tɩ neb wʋsg sẽn sakd Wẽnnaam yaool n namsdẽ la b paamd makr toor-toore? Yaa bʋʋm a tãab yĩnga. Pipi, yaa wẽngã tʋlsem sẽn be ne-dã yĩnga. (Sɩngre 6:5; 8:21; Zak 1:14, 15) Sẽn paas yiibu, yaa a Sʋɩtãan ne a zĩn dãmbã sababo. (Efɛɛz rãmba 6:11, 12) Sẽn na n baas tãabo, yaa dũni kãngã sẽn yaa wẽngã yĩnga. (Zã 15:19) Baa a Zeova sẽn basd yel-be-kãensã tɩ b paamd tõndã, pa yẽ n wat ne-b ye. Sɩd me d miime tɩ bark sõma fãa la kũun sõma fãa yita yẽ sẽn yaa yĩngr vẽenem Ba wã nengẽ n sigda. (Zak 1:17) Bark nins a Zeova sẽn ningd tõndã pa lagem ne toog ye.
19. Bark bʋs la neb nins sẽn ket n sakd Wẽnnaamã na n paame?
19 Sẽn na yɩl n paam tẽeb bark sẽn kaoosd wakat fãa, d segd n bao n talla zems-n-taar ne Wẽnnaam. D sã n bao zems-n-taar ne-a, d bĩngda arzɛgs beoog yĩng yẽbgr ninga sẽn tar pãnga zugu, n na n wa paam vɩɩm hakɩkã sẽn yaa vɩɩm sẽn-kõn-sa wã. (1 Tɩmote 6:12, 17-19) Dũni-paalg ning Wẽnnaam sẽn na n lugl beoog daarã pʋgẽ, a na n ning-d-la bark wʋsg tẽebã wɛɛngẽ la a kõ-d arzɛgs me. Wakat kãnga, yaa neb nins sẽn sakd Wẽnnaam a Zeova koɛɛgã n na n paam vɩɩm hakɩkã la bark kãense. (Tõodo 28:2) Bɩ d kell n nang pãng ne d sũy fãa n ket n sakd a Zeova ne sũ-noogo.
Bõe la yãmb zãms-yã?
• Bõe yĩng tɩ d pa segd n tagsd beoog daarã yell tɩ loog nugu?
• Bark bʋs la d tar masã menga?
• Bõe yĩng tɩ Wẽnnaam sõgen dãmb nins sẽn sakd-a wã namsdẽ?
[Zãmsgã sogsgã]