Wẽnnaam geta sẽn kʋʋl-bã yelle

TÕND sẽn ne nebã sẽn namsd sẽn kʋʋl-bã wʋsg n paasdẽ wã pa segd n ling-d ye. Hal sẽn kaoose, Biiblã reng n wilgame tɩ dũni wẽng kãngã yaoolem wakate, “neba na n yɩɩ beed dãmba, . . . la neb sẽn ka tar nimbãan-zoeere.” (2 Tɩmote 3:1-3) Gɛrɛk gom-biig ning b sẽn lebg ka tɩ ‘nimbãan-zoeerã’ yaa nonglem ning sẽn be zak neb ne taab sʋkã me. Biiblã reng n wilgame tɩ nonglem kãng kaalmã na n yɩɩ vẽeneg rũndã-rũndã n yɩɩda.

Nebã sɩd namsda sẽn kʋʋl-bã, la a Zeova yẽ nanda sẽn kʋʋl-bã wʋsgo, la a geta b yell sõma me. D ges b sẽn wilg rẽ Biiblã pʋgẽ to-to.

“Pʋg-kõap sõngda”

D sã n ges Hebre Gʋlsg Sõamyã pʋgẽ, d sɩd yãta vẽeneg tɩ Wẽnnaam a Zeova geta sẽn kʋʋl-bã yelle. Yɩɩl Sõamyã 68:6 pʋgẽ, a Davɩɩd boola a Zeova tɩ “pʋg-kõap sõngda,” la tõnd miime tɩ pʋg-kõapã nong n yaa pʋg-yãanse. * Vẽenega, a Zeova sɩd geta pʋg-kõapã yelle. Biiblã wilgame meng tɩ ned sã n nams-ba, Wẽnnaam sũur na n yika ne a soaba. (Yikri 22:21-23) Pʋg-kõapã la sẽn kʋʋl-bã fãa sẽn yaa wẽn-sakdbã tara yõod wʋsg Wẽnnaam la a sõgen dãmbã nifẽ. Yelbũna 16:31 wilgda Wẽnnaam a Zeova la a nin-buiidã tagsg rẽ wɛɛngẽ n yetẽ: “Zoob-peend yaa wa waoogr maanfo. La yaa tɩrlem sor zug la b paamd-a.”

Rẽnd pa lingri, kãsembã waoogr sẽn yaa bũmb sẽn tar yõod wʋsg a Zeova Tõogã a sẽn kõ Israɛllã pʋgẽ wã ye.  Wẽnnaam yeela Israɛll nebã yaa: “Bɩ f waoog zoob-peend soab la nin-kẽema. Bɩ f zoe fo Wẽnnaam. Mam yaa Zusoaba.” (Maankʋʋre 19:32) Rẽnd Israɛlle, ned zood ne a Zeova bee ne a soabã sẽn waoogd kãsembã to-to wã. Ned pa tõe n yeel tɩ yẽ nonga Wẽnnaam, n yaool n namsd sẽn kʋʋl-bã ye.

Kiris-nebã pa tũud a Moiiz Tõogã ye. La baasgo, b tũuda “Kirist tõogã,” sẽn tar pãng wʋsg b manesmã la b tagsa wã zutã, tɩ baoodẽ tɩ b ges b roagdbã la sẽn kʋʋl-bã yelle. (Galat rãmba 6:2; Efɛɛz rãmba 6:1-3; 1 Tɩmote 5:1-3) Kiris-nebã sẽn nong ned buud fãa wã, pa b sẽn kõ-b noor tɩ b nong neb a taabã yĩng bal ye. Yaa nonglem sẽn sɩd yit sũur pʋgẽ. Tʋm-tʋmd a Pɩɛɛr saglame tɩ d “nong taab wʋsg ne [d] sũyã fãa.”—1 Pɩɛɛr 1:22.

Karen-biig a Zak paasa bʋʋm a to sẽn kɩt tɩ d segd n ges sẽn kʋʋl-bã yellã. A gʋlsame: “Tẽeb sẽn yaa sõma sẽn ka tar yell tõnd Ba a Wẽnnaam nifẽ yaa tɩ y kẽng n sõng kɩɩbs ne pʋg-kõap bãmb toog pʋgẽ, la y gũus ne dũniyã wẽngã.” (Zak 1:27) A Zak wilga bũmb sẽn tar yõod wʋsgo. A tẽegda tõnd tɩ sẽn kʋʋl-bã tara yõod wʋsg a Zeova nifẽ.

Rẽnd bas sẽn kʋʋl-bã namsg bal pa sek ye. D segd n maana bũmb n sɩd wilg vẽeneg tɩ d nong-b lame. (Ges-y zĩ-gũbrã: “B wilgda b nonglmã vẽeneg ne tʋʋma,” seb-neng a 6-7.) A Zak gʋlsame tɩ “tẽeb sã n ka lagem ne tʋʋma, a yaa [kɩɩnga].”—Zak 2:26.

D bels-b ‘b toogã pʋgẽ’

Saglg a to me la d ye tõe n paam a Zak goamã pʋgẽ. Tẽeg-y t’a yeela kiris-nebã tɩ b sõng pʋg-kõapã ‘b toogã pʋgẽ.’ Yaa “toog” ning vɩɩmã zu-loees sẽn wat ne wã yell la b gomd ka. La sãmbg sẽn ka be, sẽn kʋʋl-bã sʋka wʋsg tara zu-loe-kãensã buudu. Kẽer vɩɩ b yembre. Kẽer sũur sãama wʋsgo, kʋʋlmã sẽn kɩt tɩ b ye pa tõe n maan yɛlã wa pĩndã yĩnga. Baa b rãmb nins sẽn ket n tʋmd Wẽnnaam tʋʋmdã wʋsgã tõe n komsa raoodo. Ges-y a John * kibarã. Sẽn yɩɩd yʋʋm 40 masã la a sẽn yaa Wẽnnaam Rĩungã koe-moond sẽn yaa kɩs-sɩd soabã. La a yaa so-pakd sẽn na maan yʋʋm 30 masã. A John tara sẽn yɩɩd yʋʋm 80 masã, la a yeelame tɩ wakat ninga yẽ komsda raoodo. A yeelame: “Mam mi n tagsda sẽn loogã yelle, n tẽegd m sẽn tudgẽ zĩis ninsã, la yaa wʋsgo. Wakat fãa m tagsdame tɩ m da tõe n maanẽ lame tɩ yɩ sõma n yɩɩg woto.”

Nin-kãensã tõe n paama belsgo, b sẽn mi tɩ baa ne a Zeova sẽn zems zãngã, a pa baood tɩ tõnd maan bũmba fãa tɩ zems zãngã. Baa ne a sẽn mi tõnd kongrã tiirã, Biiblã yetame: “Zusoaba, mam soaala, yãmb sã n tẽeg yel-wẽnã n ka base, ãnda n na n yalse?” (Yɩɩl Sõamyã 130:3) N-ye, a Zeova basda tõnd kongrã, n get sẽn be tõnd sũurẽ wã. Wãn-to la tõnd mi rẽ?

Rĩm a Davɩɩd meng mii kongr la pa zems zãng sẽn dat n yɛɛlga, la Wẽnnaam kɩtame t’a gʋls goam nins sẽn be Yɩɩl Sõamyã 139:1-3 wã: “Zusoaba, yãmb feesda maam n mi maam. Yãmb mii  wakat ninga mam sẽn zĩndeda la wakat ninga mam sẽn yikda, yãmb bãnga mam tagsga yɩɩga. Yãmb feesda mam kẽnd ne m sẽn gãe n vʋʋsdẽ, la yãmb mii mam manesem fãa.” Ka wã, “feesã” võor meng-meng yaa go bɩ bale, wala pag sẽn band ki n welgd widgã ne ka-bɛɛlã to-to wã. A Zeova vẽnega a Davɩɩd t’a gʋls n kõ tõnd bas-m-yam tɩ yẽ a Zeova tõeeme n bas tõnd kongrã taale, la a kell n tall d tʋʋm sõma wã a yamẽ.

Tõnd Ba sẽn be saasẽ wã sẽn yaa nimbãan-zoeer soabã sũur nooma ne tõnd tʋʋm sõma wã, la d sã n ket n sakd-a fãa a tẽra b yelle. Biiblã yeelame tɩ Wẽnnaam meng getame t’a sã n yĩm tõnd tʋʋm sõma wã la d sẽn wilg tɩ d nonga a yʋʋrã, yaa bũmb sẽn pa zemse.—Hebre dãmba 6:10.

“Dẽenem bũmb fãa loogame”

Biiblã wilgdame tɩ Wẽnnaam da pa rat tɩ ninsaalbã kʋʋl ye. Yaa tõnd yaab a Adem ne a Hawa sẽn kɩɩs b Naandã poor bal la kʋʋlmã ne zu-loees nins a sẽn wat ne wã paamd ninsaalbã. (Sɩngre 3:17-19;  Rom dãmba 5:12) La pa na n kell n yɩ woto wakat fãa ye.

Wa d sẽn zoe n togs tɩ loogã, zu-loees nins sẽn paamd tõnd rũndã-rũndã wã wʋsgo, n paas b sẽn namsd sẽn kʋʋl-bã yaa kaset sẽn wilgd tɩ tõnd vɩɩ dũni kãngã “yaoolem wakate.” (2 Tɩmote 3:1) Wẽnnaam na n yiisa yel-wẽnã sẽn wa ne yel-beed ninsã, n paas ne kʋʋlmã la kũumã. Biiblã yetame: “[Wẽnnaam] na n yẽesa nintãmã fãa t’a ra le zĩnd bãmb ninẽ ye, la kũum ka na n le zĩnd ye, la sũ-sãoong bɩ yãbre walla toog kõn le zĩnd yɛs ye, tɩ bõe, dẽenem bũmb fãa loogame.”—Wilgri 21:4.

Wẽnnaam dũni paalgã pʋgẽ, kʋʋlmã sẽn wat ne tood ninsã na n lebga yɛl sẽn looge. Na n yɩɩ woto me ne sẽn kʋʋl-bã namsgã. (Miise 4:4) Baa neb nins sẽn ki tɩ Wẽnnaam tẽr b yellã na n vʋʋgame, n wa paam n vɩɩmd wakat sẽn pa sat tẽng zug arzãnã pʋgẽ. (Zã 5:28, 29) Sasa kãngã, na n yɩɩ vẽeneg n yɩɩd tɩ Wẽnnaam a Zeova geta sẽn kʋʋl-bã yelle, la t’a geta neb nins fãa sẽn sakd-a wã me yelle.

[Tẽngr not rãmbã]

[Zĩ-gũbri/Foto, seb-​neng a 6]

B wilgda b nonglmã vẽeneg ne tʋʋma

A Zeova Kaset rãmbã tigimsã pʋsẽ, kãsem dãmbã lʋɩta taoor n get sẽn kʋʋl-bã yelle. B sɩd tũuda tʋm-tʋmd a Pɩɛɛr saglgã ne b sũur fãa. A yeel-b lame: “Bɩ y rɩlg Wẽnnaam piisã sẽn be yãmb nusẽ wã.” (1 Pɩɛɛr 5:2) Rɩlg Wẽnnaam piisã rat n yeelame me tɩ b maan bũmb vẽeneg n sõng sẽn kʋʋl-bã. Bõe la b tõe n maane?

Sẽn na yɩl n tõog n bãng sẽn kʋʋl-bã raab hakɩka, baoodame tɩ f tall maag-m-menga, bala tõe tɩ f tog n tɩ kaag-b-la naoor wʋsgo, n sõs ne-b sõma. Tõe tɩ nina ratame tɩ b tɩ ra teed n kõ-a, tɩ b sõng-a n pɩɩs a roogã, n dɩk-a n kẽng tigissã, la b karem Biiblã ne tõnd sɛbã t’a kelge, la b maan yɛl wʋsg a taab n kõ-a. Zĩis nins sẽn sakdã, b segd n sigla sõngrã la b sɩd modg n maane. *

La tigingã pʋgẽ, tõnd saam-biig bɩ d saam-bi-poak sẽn kʋʋl sã n wa be far meng-meng pʋgẽ n dat sõngr ligdã wɛɛngẽ d maanda wãna? Pipi, yɩta sõma tɩ d reng n ges a sã n tara kamb bɩ a neb sẽn tõe n sõng-a. Woto zemsa ne b sẽn yeel 1 Tɩmote 5:4 pʋgẽ wã: “La a sã n yaa pʋg-kõor sẽn tar kamb bɩ yagense, sẽn yɩɩda, bɩ kamba maan b yir dãmba wa neb sẽn sakd Wẽnnaam n lebs bãmb ba rãmba ne b ma rãmba b sẽn da dɩlg bãmb bũmb ninsã; tɩ bõe, yõwã tata Wẽnnaam yam.”

Tõe tɩ nin-kẽemã bɩ pʋg-yãangã ratame tɩ ned tɩ ges a sã n tõe n paama sõngr ning goosneemã sẽn kõt sẽn kʋʋl-bã. Tõe tɩ neb kẽer sẽn be tigingã pʋgẽ tõe n maana rẽ n kõ-a. Sõngr woto buud sã n ka be, kãsem dãmbã segd n gesa nedã sã n zemsa ne tigingã sõngre. Sasa kẽere b maana woto pipi kiris-nebã tiging pʋgẽ, bala tʋm-tʋmd a Poll gʋlsa a tʋm-n-taag a Tɩmote tɩ: “Da gʋls pʋg-kõor pʋg-kõap sebr pʋgẽ t’a yʋʋm nan ka ta pis-yoob ye, la bãng t’a ra yɩɩ rao a ye bal paga. La a tog n paama kaset sõama a sẽn da maan tʋʋm-sõma n wub kamba la a sik sãamba la a waas Wẽnnaam neba nao wã, la a sõng nimbãan dãmba, la a maan tʋʋm sõama buud fãa.”—1 Tɩmote 5:9, 10.

[Tẽngr note]

[Foto, seb-​neng a 5]

A Dorkas gesa pʋg-kõap sẽn yaa talsã yelle.—Tʋʋma 9:36-39