D sẽn tõe n paam bãngr hakɩkã to-to

YƖƖ YƲƲMD 1810, yʋʋm-sar kiuugã rasem 18 daare, zĩ-sobd wakate. Scotland sẽn yaa Gãrãnd Bertayn tẽng a ye wã mogr zugu, seb-kẽeng n da rãmbde. Sasa kãng tɩ Ãngeletɛɛr batayo ning b sẽn boond tɩ Palesã ra pa ye mi a sẽn teesd zĩig ning ye. Zĩigã sẽn da sobgd n paasdẽ tɩ sa-lamdã bɩ neezã tar sigbã, kɩtame tɩ ra lebg toog ne batayo wã taoor dãmb tɩ b yã bug-bãng ning sẽn da segd n wilg b sor tɩ b ta ne laafɩ wã. Tags-y n ges-y b sũ-noogã, b sẽn wa n baas n yã bugum n wẽnemd b batayo wã n tees zĩ-kãngã wã! La zu-bʋko, pa bug-sõngã la b sẽn yã wã ye. Yaa tʋm-tʋmdb sẽn da tʋmd mogrã noor bugum la b sẽn yã wã. Batayo wã tɩ fãoo kug-kẽeng n kell n sãam zãnga, t’a tʋm-tʋmd piig la a ye ki koomã pʋgẽ. Ad sɩd yɩɩ yel-beed tɛkẽ!

Yaa tudgr n wa ne yel-beed ning sẽn paam batayo kãngã wã. La sebr a ye (Paul-Émile Littré, Dictionnaire de la langue française) wilgame tɩ wakat ninga, neb nins sẽn tʋmd batayo rãmbã pʋsẽ wã segda yɛl wẽnem sẽn yɩɩd woto. Bi-bees n nong n widgd bug-yood mogrã noor zĩ-bãnẽ n tudgd batayo rãmbã tɩ b fãood kug-bɛd n sãamdẽ, sẽn na yɩl n paam n zu batayo wã teedo.

‘Gʋlsg Sõamyã tõe n vẽneg-y lame tɩ y paam fãagre’

Vẽenemã baoob pʋgẽ, y segda zu-loees sẽn wõnd batayo wã tʋm-tʋmdb sẽn segã. Kibay sẽn pa sɩd tõe n tudg-y lame, wall neb tõe n belg-y-la ne pʋ-toogo. Soay a taab tũub me tõe n kẽes-y-la weoogo. La bõe la y tõe n maan n gil zu-loe-kãensã? Modg-y n bãng-y bũmb ninga sẽn vẽnegd-y-yã sã n yaa sõmã n zems ne bas-yardo. Sẽn yɩɩd yʋʋm 125 masã, Gũusg Gãsgã wilgdame tɩ yaa Biiblã sẽn yaa Wẽnnaam Gomdã pʋgẽ bal la d tõe n paam vẽnegre, bala a tara ‘gʋlsg Sõamyã  sẽn tõe n vẽneg tõnd tɩ d paam fãagre.’—2 Tɩmote 3:15-17.

La yaa sɩd tɩ sẽn na yɩl n tõog n kɩs-sɩd tɩ Biiblã sẽn kõt vẽenem ningã zemsa ne bas-yardo, y segd n bao n bãnga a sã n sɩd yaa Wẽnnaam Gomde. (Yɩɩl Sõamyã 119:105; Yelbũna 14:15) Y sã n dat bɩ y gʋls a Zeova Kaset rãmbã n paam kibay sẽn sõng neb milyõ rãmb tɩ b sak n deeg tɩ Biiblã sɩd yaa Wẽnnaam Gomde. Wala makre, karm-y Un livre pour tous * seb-bilã. Seb-kãngã tara kibay sẽn wilgd tɩ Biiblã sẽn yetã yaa sɩda, la t’a yaa Wẽnnaam Gomde.

Biiblã zãms-yẽg kẽere

La zãms-yẽg bʋs la “gʋlsg sõamyã” tara? Bɩ d ges bãmb kẽere.

Wẽnnaam a ye sẽn ka to bal n be n yaa bũmb fãa Naanda. (Sɩngre 1:1) Yaa Wẽnnaam sẽn “naan bũmb fãa” la a naan tõndã n kɩt tɩ d beẽ. (Wilgri 4:11) Yaa rẽ n so tɩ yaa yẽ bal la d segd n balme. Yaa Naandã n yaa vẽenem fãa yẽgre. (Yɩɩl Sõamyã 36:10; Ezai 30:20, 21; 48:17, 18) A tara yʋ-peell n dat tɩ b boond-a. (Yikri 3:15, NW) B gʋlsa yʋ-kãng hebre buudã goam pʋgẽ tɩ b lebgd-a ne buud goam a taab woto: YHWH. D yãta yʋ-kãngã Biiblã pʋgẽ sẽn na ta naoor 7000. B boonda yʋ-kãng ne Moor tɩ “Zeova.”—Yɩɩl Sõamyã 83:18, NW.

A Zeova naana ãdem-biisã sẽn na yɩl tɩ b vɩɩmd wakat fãa arzãn pʋgẽ tẽng zug ka. A naana ninsaalbã tɩ b tar zʋg sẽn wõnd yẽ rẽndã. A kõ-b-la minim la tõogo, sẽn na yɩl tɩ b tõog n vɩɩmd ne sũ-noog wakat sẽn kõn sa tẽngã zugu. (Sɩngre 1:26-28) A pa naan tẽngã sẽn na yɩl t’a yɩ zĩig b sẽn na n mak nebã n bãng b sã n tõe n kẽnga saasẽ, wa sã n pa beenẽ ned pa tõe n paam zood ne Wẽnnaam ye.

Wẽnnaam da naana ninsaalbã tɩ b pa tol n tar zang ye. Yaa ninsaalbã la malɛgs kẽer sẽn wa n yãk yam n kɩɩs Wẽnnaamã la wẽngã sɩng-yã. (Tõodo 32:5) Tõnd yaab a Ãdem ne a Hawa yãka yam n na n bãng sẽn yaa sõma la sẽn yaa wẽng b toore. (Sɩngre 2:17; 3:1-5) Yaa rẽ n kɩt tɩ ninsaal kiidẽ. (Sɩngre 3:19; Rom dãmba 5:12) Sẽn na yɩl n welg yɛl nins kɩɩsgã sẽn wa ne wã, a Zeova basame tɩ wẽnemã na n zĩnd wakat bilfu. La a raabã ne tẽngã la ninsaalbã pa toeem ye. (Ezai 45:18) Ninsaalbã na n wa vɩɩmda wakat fãa tẽngã sẽn na n lebg arzãna zugu.—Matɩe 6:10; Wilgri 21:1-5.

A Zezi Kirist yaa Wẽnnaam Biribla, a pa Wẽnnaam sẽn ka to wã ye. A Zezi Kirist meng zãmsa a karen-biisã tɩ b pʋʋs Wẽnnaam woto: ‘Tõnd Ba sẽn be saasẽ, bɩ yãmb yʋʋr yɩ ne waoogre.’ (Matɩe 6:9) A zɩ n yeel t’a zema Wẽnnaam ye. A pʋd n yeela woto: “Mam Ba yɩɩda maam.”—Zã 14:28.

 A Zezi tara tʋʋm kãseng a Zeova raabã pidsg pʋgẽ. Wẽnnaam tʋm-a lame t’a wa “yɩ dũniyã vẽenem; tɩ ned ninga fãa sẽn tẽed [yẽ] kõn pa lik pʋgẽ ye.” (Zã 12:46) Tʋm-tʋmd a Pɩɛɛr yeelame tɩ “fãagr ka be ne ned a to ye.” (Tʋʋma 4:12) Woto yaa sɩda, bala yaa a Zezi zɩɩmã bal n kɩt tɩ tõnd tõe n paam fãagre. (1 Pɩɛɛr 1:18, 19) A Zezi Kirist kõ a vɩɩmã tɩ yɩ rond n fãag ninsaalbã ne yel-wẽnd ning a Ãdem ne a Hawa sẽn bẽeg-bã. (Matɩe 20:28; 1 Tɩmote 2:6) Sẽn na n paase, Wẽnnaam kɩtame t’a Zezi wilg nebã a raabã.—Zã 8:12, 32, 46, 47; 14:6; Tʋʋma 26:23.

Wẽnnaam lugla Rĩung bɩ goosneemã saasẽ t’a Zezi ne neb nins Wẽnnaam sẽn yãk tẽngã zugã yaa goosneem kãng neba. B gomda Wẽnnaam Rĩungã yell wʋsg Biiblã pʋgẽ. Rĩungã tʋʋmd yaa a kɩt tɩ Wẽnnaam daabã maan tẽng zug wa a sẽn maand saasẽ wã. (Matɩe 6:10) Sɩngrẽ wã, Wẽnnaam da pa tʋll tɩ ninsaal baa ye wa kẽng saasẽ ye. Ninsaal zĩig ra yaa tẽng zugu. Yaa ninsaal kɩɩsgã poor bal la Wẽnnaam yãk yam n na n maan yel-paalse. A kɩtame tɩ buud toor-toor neb sẽn gomd goam toor-toore, la sẽn yit soolem toɛy-toɛy pʋsẽ na n wa “yɩ rĩm dãmb” ne Kiristã saasẽ. (Wilgri 5:9, 10) Ka la bilfu, Wẽnnaam Rĩungã na n wãa ninsaalbã goosneema rãmbã fãa tɩ b meneme, b sẽn wat ne toog la namsg ãdem-biisã zugã yĩngã.—Daniɛll 2:44.

Bũmb pa be ninsaal yĩngã pʋgẽ n pa kiidẽ ye. Biiblã zãms-yẽg kãngã kɩtdame tɩ d bãng ninsaal halhaalã la d bãng saagr nins a sẽn tar vɩɩmã wɛɛngẽ. A leb n kɩtame tɩ nebã tõe n sɩd bãng bũmb ning sẽn be kũum poore.

Biiblã pʋgẽ, Koɛɛg Soab 9:5, 10 yeta woto: “Nin-vɩɩs miime tɩ b na n kiime. La kũum ka mi bũmb ye. . . . Tʋʋmd ne tagsg la yam ne bãngr ka be kɩɩm-kulg fo sẽn dabd zĩig ninga ye.” Yãmb wʋmda gom-kãensã voor bɩ? Bũmb pa be ninsaal yĩngẽ wã n ket n vɩ a kũum poorẽ ye. Ned sã n ki, a ‘lebgda tẽng tom yɛsa.’—Sɩngre 3:19.

Sẽn ki-bã tõe n vʋʋgame. Wakat ning Wẽnnaam sẽn yãk n na n bas wẽngã tɩ zĩndã sã n wa sa, neb nins “fãa sẽn be yaad pʋsẽ wã na n wʋma [a Zezi] koɛɛg n yi. Neb nins sẽn da maan neera na n vʋʋg n paama vɩɩm, la neb nins sẽn da maan wẽnga na n vʋʋg n paama bʋʋdo.” (Zã 5:28, 29; Tʋʋma 24:15) Ne vʋʋgrã maasem, nebã na n tõog n vɩɩmda  arzãn pʋgẽ tẽngã zugu, tɩ b vɩɩmã yɩ wa Wẽnnaam sẽn da rat t’a yɩ to-to hal sɩngrẽ wã.

D vaeesd Gʋlsg Sõamyã neer daar fãa

Yãmb pa ne tɩ zãms-yẽg kãensã bãngr sɩd tõe n sõng-y lame sɩda? Tõnd wakatã sẽn yaa toog wakatã yĩngã, bãngr a woto buud sõngda tõnd tɩ d ra wa bas tɩ “gom-yaalsã” a Sʋɩtãan sẽn yelgd zĩig fãa wã belg-d ye. A Sʋɩtãan maanda a meng wa “vẽenem malɛka,” t’a tʋm-tʋmdbã maand b mens wa “tɩrlem tʋm-tʋmdba.” (1 Tɩmote 6:20; 2 Korẽnt dãmba 11:13-15) B yetame tɩ filozofi wã yaa bãngr sẽn yit “yẽesem dãmb la yam dãmb” sẽn ‘kɩɩs a Zeova goama’ nengẽ. La Biiblã sẽn kõt bãngr hakɩk ningã tõe n sõng-d lame tɩ rẽ ra wa belg-d ye.—Matɩe 11:25; Zeremi 8:9.

Zãmsg wʋsg sẽn da be pipi kiris-nebã wakatẽ n tudgd nebã yĩnga, tʋm-tʋmd a Zã ra keooga kiris-nebã woto: “Maan-y gũusg ne neb kẽere, bãng-y b yama sã n sɩd yaa Vʋʋsem Sõng rẽnda.” (1 Zã 4:1, Sebr Sõngo) Tags-y n gese. B sã n taas yãmb koɛɛg t’a tõe n toeem yãmb vɩɩmã wʋsgo, rẽ yĩnga, yãmb na n sak-a lame a sẽn wõnd sõma wã yĩng bal bɩ? Vẽenega, y na n maaga y yĩng n deng n bao n bãng a sẽn yit zĩig ninga, la y ges a sẽn yetã sã n yaa sɩd n yaool n tũ-a.

Wẽnnaam sẽn kɩt tɩ b gʋls Biiblã t’a tar zãms-yẽgã, yaa sẽn na yɩl tɩ d tõog n bãng vẽenem ning tõnd sẽn pʋgdã sã n sɩd yaa vẽenem hakɩkã. (1 Tesalonik rãmba 5:21) Pipi kiris-nebã wakate, b pẽgã neb sẽn da tar yam sõngo, bala b ra ‘baooda Gʋlsg Sõamyã pʋgẽ daar fãa’ n na n bãng bũmb nins b sẽn yet bãmbã sã n yaa sɩda. (Tʋʋma 17:11) Yãmb me tõe n maana woto. Bas-y tɩ Biiblã sẽn wõnd “fɩtl sẽn yãgd lik zĩigẽ” wã wilg-y sore. (2 Pɩɛɛr 1:19-21) Y sã n maan woto, y na n ‘yãa Wẽnnaam bãngrã’ sẽn kõt vẽenem hakɩkã.—Yelbũna 2:5.

[Tẽngr note]

[Foto, seb-neng a 4]

Wẽnnaam Gomdã wõnda fɩtla

[Foto, seb-neng a 5]

Wẽnnaam yʋʋr la bõe?

[Foto, seb-neng a 5]

Ãdem-biisã beoog daarã na n yɩ wãn to?

[Foto, seb-neng a 6]

A Zezi yaa Wẽnnaam sẽn ka to wã bɩ?

[Foto, seb-neng a 6]

Sẽn ki-bã bee yɛ?

[Foto, seb-neng a 7]

Kũum vʋʋgrã bee Biiblã zãms-yẽg sʋka