Karemdbã sogsgo

Bõe la a Zezi ra rat n wilgi, a sẽn wa n yeel a Nikodɛm tɩ ‘sã n ka Ninsaal Biigã sẽn yi saasẽ n sigã ned nan ka rʋ saasẽ’ wã?—Zã 3:13.

Yaa sɩd t’a Zezi sẽn wa n yet woto wã t’a ra nan pa leb saasẽ ye. A ra keta tẽngã zugu. Baasgo, d sẽn mi bũmb ning a Zezi zugã, la bũmb ning sẽn kɩt t’a wa yeel woto wã tõe n sõng-d lame tɩ d wʋm a gomdã võore.

A Zezi yii saasẽ n sigi. Sẽn deng t’a wa tẽngã zugã, a ra yaa malɛk n be saasẽ ne Wẽnnaam. Yaa wakat ning Wẽnnaam sẽn da yãk n na n tʋm-a tẽngã zugã sẽn wa n ta wã, la a rɩk a vɩɩmã n ning a Maari pʋgẽ wã t’a rog-a. (Luk 1:30-35; Galat dãmba 4:4; Hebre dãmba 2:9, 14, 17) A Zezi kũumã poore, a ra na n vʋʋgame n le yɩ malɛk n leb saasẽ. Yaa rẽ n kɩt t’a kũumã sẽn wa n kolgã, a yeel a pʋʋsg pʋgẽ woto: ‘M Ba, bɩ y waoog maam yãmb menga nengẽ ne waoogr ninga mam sẽn da tar yãmb nengẽ tɩ dũniyã nan ka naanã.’—Zã 17:5; Rom dãmba 6:4, 9; Hebre dãmba 9:24; 1 Pɩɛɛr 3:18.

A Zezi sẽn wa n gomd ne a Nikodɛm sẽn da yaa Fariziẽ la Israɛll tõog karensaambã, rẽ t’a ra nan pa leb saasẽ ye. Yaa vẽeneg tɩ rẽ wẽnd tɩ ned baa a ye sẽn ki me ra nan pa vʋʋg n kẽng saasẽ ye. A Zezi meng yeelame tɩ lisd a Zã yaa Wẽnnaam no-rɛɛs sẽn ka mak-n-taaga, la tɩ ne rẽ fãa ‘sẽn yaa-a yao-zʋʋg Wẽnnaam Rĩungã pʋgẽ wã yɩɩda yẽnda.’ (Matɩe 11:11) Tʋm-tʋmd a Pɩɛɛr wilgame tɩ baa nin-tɩrg a Davɩɩd sẽn ki wã pa kẽng saasẽ ye. A yeelame t’a keta a yaoogẽ wã. (Tʋʋma 2:29, 34) A Davɩɩd ne lisd a Zã la nin-tɩrs a taab me sẽn deng a Zezi n ki wã sẽn pa kẽng saasẽ wã tara võore. B kiimi t’a Zezi nan pa pak sor n kõ neb kẽer tɩ b tõe n paam n kẽng saasẽ b kũum poor ye. Tʋm-tʋmd a Poll gʋlsame tɩ yaa a Zezi n sɩd yɩ pipi n “pak vɩɩm so-paalg” ning sẽn dabd saasẽ wã.—Hebre dãmba 6:19, 20; 9:24; 10:19, 20.

Sẽn mik t’a Zezi sẽn wa n gomd ne a Nikodɛmmã t’a ra nan pa vʋʋg n dʋ saasẽ wã, bõe masã la a ra rat n wilgi, a sẽn yeel-a tɩ ‘sã n ka Ninsaal Biiga sẽn yi saasẽ n sigã ned nan ka rʋ saasẽ’ wã? (Zã 3:13) Bɩ d ges sẽn sɩng to-to t’a Zezi wa yet a Nikodɛm woto wã.

A Nikodɛm sẽn soos n wa a Zezi nengẽ ne yʋngã, a Zezi yeel-a-la woto: “Mam yeta yãmb sɩd-sɩda tɩ ned sã n ka paam dogem paalga, a ka tõe n yã Wẽnnaam soolem ye.” (Zã 3:3) T’a Nikodɛm sok tɩ ‘wãn-wãn la rẽ tõe n yɩ? Ned sẽn kʋʋl na n yɩɩ wãn n le roge?’ A Nikodɛm ra pa wʋmd yã bɩ zĩnd Wẽnnaam Rĩungã pʋgẽ wã sẽn dat n yɛɛlg ye. La rẽ yĩnga ned n da be n tõe n sõng-a t’a wʋm gom-bãmba sẽn yit Wẽnnaam nengẽ wã võor bɩ? Sɩd-sɩda, ned baa a ye sẽn da nan pa kẽng saasẽ wã yĩnga, ned ra kae n tõe n tik a meng bãngr n wilg a taabã zĩnd Wẽnnaam Rĩungã pʋgẽ sẽn dat n yɛɛlg ye. Sã n pa a Zezi bala. Yẽ bal n da tõe n sõng a Nikodɛm la neb a taabã tɩ b wʋm gomdã võore. Bala a Zezi ra yii saasẽ, la rẽ yĩng kɩtame t’a ra mi yɛl wʋsg Wẽnnaam Rĩungã zug n tõe n zãms nebã.

Sokr ning b sẽn sok verse kãngã zugã wilgda tõnd bõn-kãseng a ye Wẽnnaam Gomdã zãmsg wɛɛngẽ. Pa yam tʋʋmd tɩ d sã n yã verse võor wʋmb sẽn wõnd pa nana bɩ d yɩ tao-tao n bas tɩ d yam yo ne a sẽn yetã sã n sɩd yaa sɩd ye. Sẽn na yɩl n wʋm verse kẽer võore, d segdame n gẽes verse rãmb a taab sẽn na n sõng-d tɩ d wʋm b võorã n karme, bala Biiblã goam pa kɩɩsd taab ye. Sẽn paase, d sã n ges bũmb ning sẽn wa ne gomdã, ned ning sẽn gom gomdã, wakat ning la zĩig ning b sẽn gom gomdã, tõe n sõng-d lame tɩ d wʋm verse võor wʋmb sẽn wõnd yaa toogo.