Kom-bɩɩse, yãk-y yam n tũ a Zeova
Kom-bɩɩse, yãk-y yam n tũ a Zeova
‘Bɩ y bao y sẽn na n tũ a soabã rũnda.’—ZOZUE 24:15.
1, 2. Soob bʋs buud sẽn pa zems la kiris-neb ne yʋʋr tũudmã rãmb kõta?
“BAS-Y tɩ kambã sã n wa tõe n bãng Kiristã bɩ b yaool n lebg kiris-neba.” Yaa gʋlsd a Tɛrtiliẽ n gʋls gom-kãensã yʋʋm kobs-yi a Zezi rogmã poore. A gʋlsa woto n na n wilg t’a pa sak tɩ b kõ kambã soob ye, bala yaa yẽ wakatã la kiris-neb ne yʋʋr tũudmã rãmb kɩt tɩ kambã soob lebg minungu. A Ogistẽ sẽn da yaa egiliiz taoor soab a yembrã pa sak a Tɛrtiliẽ la Biiblã sẽn yet bũmb ning kambã soob kũuna wɛɛngẽ wã ye. A yeelame tɩ soobã reegr yẽesda a Ãdem ne a Hawa sẽn bẽeg tõnd yel-wẽnd ningã, la tɩ biig sã n pa reeg soob n yaool n ki, a rebda bugum yiri. Yaa rẽ n kɩt tɩ b kõt kom-peelsã soob tao-tao b rogmã poore.
2 Kiris-neb ne yʋʋr tũudum wʋsg ket n kõta kom-peelsã soobo. Pĩnd wẽndẽ wã menga, nanambs la tũudum taoor dãmb sẽn da be tẽns sẽn yet tɩ b yaa kiris-neb pʋsẽ ra geta neb nins b sẽn zab n tõogã wa wẽn-zɩtbã. Rẽ n so tɩ b ra modgd nin-bãmbã tɩ b reegd lisgu. La Biiblã yaool n pa wilgd tɩ b segd n kõo kambã soobo, bɩ b modg kãsembã tɩ b reeg lisg ye.
Rũndã-rũndã, yaa ne yamleoog la f rɩkd f meng n kõ Wẽnnaam
3, 4. Bõe n tõe n sõng kamb nins sẽn tar roagdb sẽn yaa kiris-nebã tɩ b rɩk b mens n kõ Wẽnnaam ne yamleoogo?
3 Biiblã wilgdame tɩ baa yaa kambã roagd a ye n yaa kiris-ned hakɩka, a Zeova getame tɩ kom-kãens yaa sõma. (1 Korẽnt dãmba 7:14) La woto rat n yeelame tɩ kom-kãensã zoe n dɩka b mens n kõ a Zeova bɩ? Ayo. La kamb nins sẽn tar roagdb sẽn dɩk b mens n kõ a Zeova wã na n paama zãmsg sẽn na n sõng-b tɩ b wa rɩk b mens ne yamleoog n kõ-a. Rĩm a Salomo sẽn yɩ yam soabã yeela woto: “M biiga, sak f ba tõodo la ra bas f ma zãmsga ye. . . . Bãmb na n yãaga foom f kẽna wakate. Fo sã n gãande, b na n gũu foom. La fo sã n neke, b na n goma ne foom. Tɩ bõe, tõoda yaa wa fɩtla, la zãmsga yaa wa vẽenem. La b sã n tãs foom n sagl-fo, yaa vɩɩm sor la b wilg-fu.”—Yelbũna 6:20-23.
4 Roagdb nins sẽn yaa kiris-nebã wilgda b kambã sore. La rẽ na n sõnga kom-bɩɩsã, sã n mik tɩ b sakd n tũuda sor ning b sẽn wilgd-bã. A Salomo yeela woto me: “Biig sẽn tar yam kõta a ba sũ-noogo. La biig sẽn yaa yalem kõta a ma sũ-sãoongo.” “M biiga, kelg n yɩ yam soaba n tags f sẽn na n yɩ to-to.” (Yelbũna 10:1; 23:19) Vẽenega, sẽn na yɩl n dɩ y roagdbã sor-wilgr yõodo, yãmb a kom-bɩɩsã segd n saka saglg la kiblgu. Yãmb pa rog ne yam ye, la y tõe n lebga ‘yam dãmba’ la y yãk yam n tũ ‘vɩɩm sorã’ ne yamleoogo.
Zãmsg yaa bõe?
5. Saglg bʋg la a Poll kõ ba-rãmbã la kambã?
5 Tʋm-tʋmd a Poll gʋlsa woto: “Kamba, yãmb sẽn tũud Zusoabã bɩ y sak y ba rãmba ne y ma rãmba, tɩ bõe, bõn-kãnga yaa tɩrga. Yõ wã yaa pipi tõogo ne kãabg sẽn yaa: ‘Waoog f ba la f ma, tɩ fo tõe n zĩnd ne laafɩ, la tɩ fo tõe n kaoos dũniyã zugu.’ Ba rãmba, bɩ y ra maan bũmb sẽn yikd yãmb kamba sũy ye, la bɩ y wub bãmb ne Zusoaba saglg la a zãmsgo.”—Efɛɛz rãmba 6:1-4.
6, 7. Wub kambã ne a Zeova zãmsg baooda bõe, la bõe yĩng tɩ woto pa rat n yeel tɩ roagdbã modgda b kambã?
6 Rẽ yĩnga roagdb nins sẽn yaa kiris-nebã sã n wubd b kambã ne a Zeova “saglg la a zãmsgo,” b pa modgd-b tɩ b tũ b sorã sɩda? Ayo. Ãnd n tõe n yeel tɩ roagdb sã n zãmsd b kamb bũmb ning sẽn yaa tɩrg la sẽn na n naf-ba, b pa maand neere? Ãnd n yet wẽnd-kae rãmbã tɩ b sẽn zãmsd b kambã tɩ Wẽnd kae wã pa zemse? Katolik rãmbã tagsdame tɩ yaa tɩlae tɩ b kambã tũ b sorã, la nebã pa nong n yet tɩ b sẽn maand dẽ wã pa zems ye. Dẽnd ned baa a ye pa segd n yeel t’a Zeova Kaset rãmbã sẽn zãmsd b kambã sẽn na yɩl tɩ b bãng a Zeova la a no-tɩrsã, b modgd-b lame ye.
7 Sebr a yembr (Dictionnaire théologique du Nouveau Testament) wilgame tɩ gɛrk gom-biig ning b sẽn lebg Efɛɛz rãmb 6:4 pʋgẽ tɩ “zãmsgã,” rat n yeelame tɩ maan bũmb “sẽn na yɩl n dems ned tagsgo, n dems sẽn ka tɩrga, n maneg tagsg ning nedã sẽn tar Wẽnnaam zugã.” La bi-bɩɩg sã n wa pa rat n sak a roagdbã zãmsgo, a rog-taasã sẽn tusd-a t’a maan wa bãmbã, tɩ yẽ me sɩd rat n maan wa bãmbã yĩnga, wakat kãngã d tõe n yeelame tɩ yaa ãnd n modgd bi-bɩɩgã? A roagdbã bɩ, bɩ a rog-taasã? Rẽ yĩnga, bi-bɩɩgã rog-taas sã n pʋgd n wɩngd-a t’a yũ dorge, t’a yũ rãam tɩ loog bɩ a yo, t’a roagdbã modgd n na n sõng-a t’a bãng woto fãa sẽn tõe n wa ne yell nins n kõ-a wã, ned tõe n yeel t’a roagdbã pa maan neer sɩda?
8. Biiblã sẽn yet tɩ b kɩtame t’a Tɩmote “bãng tɩ yaa sɩdã” rat n yeelame tɩ bõe?
8 Tʋm-tʋmd a Poll gʋlsa a Tɩmote n yeel woto: “Kell n sak bũmb nins fo sẽn da zãms la f bãng tɩ yaa sɩdã, la fo mii sẽn da zãmsa foomã. Hal fo yãadem wakat tɩ ta masã fo bãnga Gʋlsg Sõamyã sẽn tõe n vẽneg foom tɩ f paam fãagre, fo sẽn tẽed Kirist Zezi wã yĩnga.” (2 Tɩmote 3:14, 15) Hal a Tɩmote yãadmẽ, a ma ne a yaab-poakã zãms-a-la Gʋlsg Sõamyã sẽn na yɩl t’a tẽebã ne Wẽnnaamã yɩ kãn-kãe. (Tʋʋma 16:1; 2 Tɩmote 1:5) A Tɩmote ma ne a yaab-poakã sẽn wa n lebg kiris-nebã, b pa modg-a t’a tũ b tũudmã ye, la b zãms-a-la Gʋlsg Sõamyã, n kɩt tɩ yẽ mengã tags n bãng tɩ yaa sɩda.
A Zeova ratame tɩ yãmb meng yãk y toor n tũ-a
9. a) Wãn to la a Zeova naan ninsaalbã, la bõe yĩnga? b) Bõe la Wẽnnaam bi-yendã yãk ne yamleoog n na n maane?
9 A Zeova ra tõe n naana ninsaalbã tɩ b tũud yẽ sẽn datã bal n pa tõe n maan b yam ye. La a naan-b lame tɩ b tõe n yãk n maan b sẽn data. Wẽnnaam datame tɩ sẽn sakd-b yẽ wã sak-a ne yamleoogo. Kãsembã la kambã sã n sakd-a b sẽn nong-a wã yĩnga, noogda a sũur hal wʋsgo. Sã n yaa ne sak Wẽnnaam f sẽn nong-a wã yĩngã, yaa Wẽnnaam bi-yendã n kõt mak-sõng n yɩɩda. Wẽnnaam a Zeova meng goma a biigã yell n yeel woto: “Ad-a yaa mam Bi-nongre, mam sẽn nong ne m sũur fãa zãnga.” (Matɩe 3:17) Tɩ Wẽnnaam pipi biigã me yeel a ba wã tɩ: “Mam Wẽnnaam, mam dat n maana yãmb daabo. La yãmb tõog bee mam sũur pʋgẽ.”—Yɩɩl Sõamyã 40:9; Hebre dãmba 10:9, 10.
10. D sã n dat n tũ a Zeova tɩ ta a yam, bõe n yaa tɩlae?
10 A Zeova ratame tɩ neb nins sẽn tũud a Biigã sor-wilgrã sak yẽ wa a Biigã sẽn sakd-a to-to wã. Yɩɩl gʋlsdã da reng n togsa woto: “Yãmb neba na n dɩka b mens n kõ yãmb ne yamleoog daar ninga yãmb kʋʋnga sẽn na n tigim tãn-sõamyã zutã. Yãmb kom-bɩɩs na n waa yãmb nengẽ wa meenem sẽn yit yibeoogo.” (Yɩɩl Sõamyã 110:3) A Zeova siglgã neb sẽn be saasẽ la tẽng zugã fãa sakda a noyã, b sẽn nong-a wã yĩnga.
11. Kom-bɩɩs nins sẽn tar roagdb sẽn dɩk b mens n kõ Wẽnnaamã segd n yãkã yam n maan bõe?
11 Rẽ n so tɩ yãmb a kom-bɩɩsã segd n bãng tɩ y roagdbã la tigingã kãsem dãmb pa na n tol n modg yãmb tɩ y reeg lisg ye. Yaa yãmb mengã n segd n yãk yam n maan a Zeova raabã. A Zozue ra yeela Israɛll nebã woto: ‘Bɩ y . . . sak [a Zeova] ne y sũur fãa la ne sɩda. . . . Bɩ y bao y sẽn na n tũ a soabã rũnda.’ (Zozue 24:14-22) Woto me, yaa yãmb mengã n segd n yãk yam n kõ-y mens a Zeova, la y maan a raabã y vɩɩmã tõre.
Bãng-y tɩ y na n tuka y meng zɩɩbo
12. a) Baa roagdbã sã n tõe n zãmsa b kambã Wẽnnaam daabã, bõe la b pa tõe n maan n kõ-ba? b) Wakat bʋg tɛk la b tõe n yeel tɩ Wẽnnaam na n soka bi-bɩɩg a sẽn maand bũmb ningã?
12 Wakat n wat n beẽ tɩ yãmb roagdbã tẽeb pa ye tõe n kɩt tɩ y yɩ sõma Wẽnnaam nifẽ ye. (1 Korẽnt dãmba 7:14) Karen-biig a Zak gʋlsa woto: “Ned sã n bãng tɩ maan neere n yaool n ka maandẽ, a maanda yel-wẽna.” (Zak 4:17) Roagdbã pa tõe n tũ Wẽnnaam n kõ b kambã, wa kambã me sẽn pa tõe n tũ Wẽnnaam n kõ b roagdbã. (Ezekɩɛll 18:20) Kom-bɩɩse, y zãms n bãnga a Zeova la a raabã bɩ? Y yʋʋmã seka y na tõog n wʋm y sẽn zãmsã võor la y lebg Wẽnnaam zo-rãmb bɩ? Sã n yaa woto, yãmb pa tagsd tɩ Wẽnnaam getame tɩ y tõe n yãka yam n maan a raabã masã sɩda?
13. Bõe la kom-bɩɩs nins sẽn nan pa reeg lisgã segd n sok b mense?
13 Yãmb yaa bi-bɩɩg sẽn tar roagdb sẽn tũud Wẽnnaam, y kẽnda tigissã, n moond Rĩungã koe-noog meng n yaool n nan pa reeg lisg bɩ? Sã n yaa woto, bɩ y sok-y meng sok-kãngã: ‘Bõe yĩng la mam sẽn kẽnd tigissã la m moond koe-noogã? Yaa m roagdbã sẽn dat tɩ m maan woto wã yĩng bɩ, bɩ yaa m sẽn dat n ta a Zeova yamã yĩnga?’ Rẽ yĩnga, yãmb mengã baoome n na n ‘bãng Wẽnnaam daabã sẽn yaa sõma, la sẽn tat a yam, la sẽn zems zãngã’ bɩ?—Rom dãmba 12:2.
Bõe yĩng tɩ y nan pa reeg lisgu?
14. Kiba-bʋs n be Biiblã pʋgẽ n wilgd tɩ d pa segd n bas tɩ kaoos tɩ d yaool n deeg lisgu?
14 “Bõe n gɩdg maam ne lisgu?” Yaa Etiopi rao a yembr n sok koe-moond a Filip woto. Rẽ tɩ yaa a sẽn da nan bãng t’a Zezi la Mesi wã paalem. La Etiopi nedã ra mii Gʋlsg Sõamyã tɩ sek a na bãng t’a ra pa segd n ye kaoos la a wilg vẽeneg tɩ wakat kãng tɛka, a na n naaga kiris-neb tigingã n balem a Zeova ye. Rẽ nooga a sũur hal wʋsgo. (Tʋʋma 8:26-39) Pag a ye me sẽn da boond t’a Lidi paamame t’a sũurã ‘pak t’a reeg a Poll sẽn togs bũmb ninsa fãa.’ Tao-tao bala, yẽ ne a zaka rãmb ‘paama lisgu.’ (Tʋʋma 16:14, 15) Sẽn na n paase, bi-bees roog naab ning sẽn da be Filip tẽngã kelga a Poll ne a Sɩlas sẽn ‘togs-a a Zeova koɛɛgã.’ “La tao-tao bala, yẽ ne a yir dãmba fãa paama koom lisgu.” (Tʋʋma 16:25-34) Dẽnd yãmb me sã n sɩd mi a Zeova la a raabã, n dat ne y sũur fãa n maan a sẽn datã, la y tar yʋ-noog tigingã neb sʋka, n kẽnd tigissã n pa vaande, la y moond Rĩungã koe-noogã, yaa bõe masã n gɩdgd yãmb tɩ y ket n nan pa reeg lisgu?—Matɩe 28:19, 20.
15, 16. a) Tags-bʋg sẽn yaa kɛgr la kom-bɩɩs kẽer tara, tɩ kɩt tɩ b pa reegd lisgu? b) Wãn to la rɩk f meng n kõ Wẽnnaamã la lisgã reegr tõe n sõng kom-bɩɩsã?
15 Rẽ yĩnga, yaa y sẽn yɛɛsd y na n wa reeg lisg tɩ rẽ poor bɩ y maan yel-wẽnd tɩ b bool-y n soka yĩng la y sẽn nan pa reeg lisgã bɩ? Sã n yaa woto bɩ y tags n gese: Yãmb na n yeelame tɩ y pa na n maan mobil pɛrmi, y sẽn yɛɛsd y na n wa maan agsɩdã wã yĩng bɩ? Yaa vẽeneg tɩ ayo. Sã n mikame tɩ y tõe n deega lisgu, bɩ y ra bas tɩ bũmb gɩdg-y ye. Bãng-y tɩ y sã n dɩk y meng n kõ a Zeova n na n maan a raabã, woto na n sõng-y-la wʋsg tɩ y maan y sẽn tõe fãa n da maan yel-wẽnd ye. (Filip rãmba 4:13) Kom-bɩɩse, ra wa n tags-y tɩ y sã n pa reeg lisgu, rẽ na n kɩtame t’a Zeova pa sok-y y sẽn maand bũmb ningã ye. Sã n mikame tɩ y yʋʋmã seka y na n bãng sõma ne wẽng n bake, y reeg lisg tɩ y pa reeg me, y sã n maan yel-wẽnde, bãng-y t’a Zeova na n sok-y lame.—Rom dãmba 14:11, 12.
16 Dũniyã gill zugu, a Zeova Kaset rãmb wʋsg mikame tɩ b sẽn yãk yam n deeg lisg tɩ b nan ket n paoodẽ wã sõng-b-la hal wʋsgo. Ges-y a Zeova Kaset soab a ye sẽn tar yʋʋm 23 n be Erop tẽng a yembr makre. A yeelame tɩ yẽ sẽn deeg lisg t’a tar yʋʋm 13 wã sõng-a lame t’a gũus a meng ne “yãadem datem wẽngã.” (2 Tɩmote 2:22) A sẽn da wa n ket n paoodẽ wã, a ra yetame t’a na n wa lebga so-pakda. Rũndã-rũndã, a tʋmda ne sũ-noog a Zeova Kaset rãmbã tʋʋmd will a yembrẽ. Kom-bɩɩs nins fãa sẽn yãkd n na n maan a Zeova raabã na n paama bark wʋsgo. Yãmb mengã tõe n paama bark kãensã.
17. Zĩ-bʋs wɛɛngẽ la yaa tɩlae tɩ d ‘bãng a Zeova yam?’
17 D sã n dɩk d meng n kõ a Zeova n deeg lisgu, rat n yeelame tɩ d pʋlmame tɩ rẽ tɛka, d na n maana a Zeova raabã bũmb nins fãa d sẽn maanda pʋgẽ. La sẽn na yɩl n pids d pʋlengã, yaa tɩlae tɩ d ‘bao sẽk’ me. La wãn to la d tõe n bao sɛkã? Yaa d sẽn na n dɩk sẽk ning tõnd sẽn da tar n maand yɛl a taabã n karemd Biiblã neere, n moond Rĩungã “koe-noog” wa d sẽn tõe tɛka. La d modg n kẽnd tigissã wakat fãa. (Efɛɛz rãmba 5:15-16, NW; Matɩe 24:14) D sẽn dɩk d meng n kõ a Zeova n na n maan a raabã na n nafa tõnd bũmb nins fãa d sẽn maanda pʋgẽ. Wala makre, d na n bãnga reem nins d sẽn segd n yãkã, d sẽn segd n dɩ la d yũ tɩ zems to-to, la d sẽn segd n kelg mizik ninsã. Bõe yĩng tɩ y pa na n yãk reem buud ning y sẽn na n wa tõog n deemd arzãnã pʋgẽ wakat fãa wã? Kom-bɩɩs wʋsg sẽn yaa a Zeova Kaset rãmb na n yeela yãmb tɩ reem wʋsg n bee n noogd b sũy wʋsgo, la tat a Zeova “yam” me.—Efɛɛz rãmba 5:17-19.
Tõnd dat ‘n tũu yãmba’
18. Kom-bɩɩsã segd n soka b mens bõe?
18 Yʋʋmd 1513 sẽn deng a Zezi rogmã n tɩ ta Pãntekotã yʋʋmd 33 a Zezi rogmã poore, a Zeova ra yãka Israɛll buudã neb n sigl-b sẽn na yɩl tɩ b yɩ a kaset rãmb la b maand a raabã. (Ezai 43:12) Israɛll kom-bɩɩsã ra rogda bu-kãng pʋgẽ. La Pãntekotã tɛkã, a Zeova tara bu-paalg tẽngã zugu. Bu-kãng yaa Israɛll sẽn yaa Wẽnnaam dẽnda, Wẽnnaam sẽn yãk a ‘meng yʋʋr yĩnga.’ (1 Pɩɛɛr 2:9, 10; Tʋʋma 15:14; Galat dãmba 6:16) Tʋm-tʋmd a Poll wilgame tɩ Kirista peka ‘neb tɩ lebg sõama, la b wɩngd ne tʋʋm sõama maanego.’ (Tɩt 2:14) Kom-bɩɩse, bãng-y tɩ yãmb tara sor n na n bao n bãng nin-kãensã sẽn beẽ. Rũndã-rũndã, yaa ãnd dãmb la buud ning sẽn deegd Wẽnnaam noorã, n tũud Biiblã noyã, n kõt kasetã a Zeova yʋʋrã yĩnga, la b moond tɩ yaa Wẽnnaam Rĩungã bal n tõe n yols ãdem-bɩɩsã? (Ezai 26:2-4, Sebr Sõngo) Yãmb wee n maag y yĩng n ges kiris-neb ne yʋʋr tũudmã la tũudum a taabã neb manesem, la y ges Biiblã sẽn wilgd Wẽn-tũud hakɩk sẽn segd n tall manesem ningã.
19. Dũniyã gill zugu, bõe la neb milyõ rãmb wa n sak n deege?
19 Dũniyã gill zugu, neb milyõ rãmb ne kom-bɩɩs wʋsg meng wa n sak n deegame tɩ yaa a Zeova Kaset rãmb nins sẽn paam vʋʋsem sõng zaeebã sẽn ket tẽng zugã la buud ning sẽn deegd Wẽnnaam noorã. B yeta nin-bãmbã sẽn yaa Wẽnnaam Israɛllã tɩ: ‘Bas-y tɩ d tũ yãmba, bala tõnd wʋmame tɩ Wẽnnaam bee ne yãmba.’ (Zakari 8:23) D bõosda Wẽnnaam t’a sõng yãmb a kom-bɩɩsã tɩ y yãk yam n lebg Wẽnnaam neba, n “yãk vɩɩm,” sẽn dat n yeel tɩ vɩɩm sẽn pa sat dũni paalg ning a Zeova sẽn na maana pʋgẽ.—Tõodo 30:15-20; 2 Pɩɛɛr 3:11-13.
D lebg n tẽege
• Wub kambã ne Zusoabã zãmsg baooda bõe?
• D sã n dat n tũ a Zeova tɩ ta a yam, bõe n yaa tɩlae?
• Kom-bɩɩs nins sẽn tar roagdb sẽn dɩk b mens n kõ Wẽnnaamã segd n yãkã yam n maan bõe?
• Bõe yĩng tɩ d pa segd n bas tɩ kaoos tɩ d yaool n deeg lisgu?
[Zãmsgã sogsgã]
[Foto rãmba, seb-neng 28]
Ãnd la yãmb na n kelge?
[Foto, seb-neng 30]
Wãn to la rɩk f meng n kõ Wẽnnaam la lisgã reegr tõe n sõng-yã?
[Foto, seb-neng 31]
Bõe n gɩdgd yãmb ne lisg reegre?