Yɩɩl Sõamyã sebrã babg a yiib-n-soabã tags-kãsemse
A Zeova Gomdã vɩɩme
Yɩɩl Sõamyã sebrã babg a yiib-n-soabã tags-kãsemse
D SẼN yaa a Zeova sõgen dãmbã, d miime tɩ d na n paama zu-loees la makre. Tʋm-tʋmda a Poll gʋlsa woto: “Neb nins fãa sẽn dat n tũ Kirist Zezi ne pʋ-peelma na n paama namsgo.” (2 Tɩmote 3:12) Bõe n tõe n sõng-d tɩ d tõog zu-loees la namsg d tẽebã yĩnga, la d ket n wilgdẽ tɩ d tara burkĩnd Wẽnnaam taoore?
Yɩɩl Sõamyã sebrã babg a yiib-n-soabã kõt-d-la sõng-kãngã. Yɩɩl Sõamyã 42 soabã n tɩ tãag 72 soabã wilgdame tɩ d sã n dat n tõog zu-loeesã sõma, d segd n teega a Zeova zãng-zãng la d bãng n gẽeg a fãagrã. Ad woto sɩd yaa zãmsg sẽn tar yõod ne-do! Baa rũndã-rũndã, wa Wẽnnaam Gomdã babs a taabã, koɛɛg ning sẽn be Yɩɩl Sõamyã sebrã babg a yiib-n-soabã pʋgẽ wã sɩd “vɩɩme la a tara pãnga.”—Hebre dãmba 4:12.
‘WẼNNAAM YAA ZĨ-SOALGDG LA PÃNG TÕND YĨNGA’
Levi ned sẽn be yembd weoogo. A sũur sãama a sẽn pa tõe n kẽng a Zeova roogẽ wã n tɩ balm-a wã yĩnga, t’a belsd a meng n yet woto: “Mam sũuri, yaa bõe tɩ mam gɩmbe la m sidgdẽ. Ges Wẽnnaam.” (Yɩɩl Sõamyã 42:6, 12; 43:5) Verse kãngã goamã lebgd n wata Yɩɩl Sõamyã 42 soabã la 43 soabã zĩis a tãabã goam sẽn be rasãndã pʋgẽ. Yɩɩl Sõamyã 44 soabã yaa kosg b sẽn kos Wẽnnaam Zida yĩnga. Rẽ tɩ Zida ra bee zu-loees pʋgẽ. Tõe tɩ ra yaa rĩm a Ezekɩas wakatẽ wã, Asiiri rĩmã sẽn da wa n dat n zab ne-bã.
Yɩɩl Sõamyã 45 soabã sẽn gomd rĩm kãadem yellã, yaa bãngr-gomd sẽn da na n wa pids Rĩm ning sẽn yaa Mesi wã zugu. Yɩɩl Sõamyã a tãabã sẽn pʋgd bãmba wã wilgdame t’a Zeova yaa “zĩ-soalgdga la pãng tõnd yĩnga,” t’a yaa “Rĩm kãseng dũniyã tɛk fãa,” la t’a yaa ‘zĩ-zãonglg põsg yĩnga.’ (Yɩɩl Sõamyã 46:2; 47:3; 48:4) Yɩɩl Sõamyã 49 soabã wilgdame tɩ ned pa ‘tõe n fãag a to, la t’a pa tõe n deeg a to Wẽnd nugẽ ne ligd ye.’ Ad gom-kãensã sɩd be yamleoogo! (Yɩɩl Sõamyã 49:8, Sebr Sõngo) B yeelame tɩ yaa a Koore kambã n gʋls bab-kãngã rẽenem yɩɩl a nii wã. Yɩɩl Sõamyã 50 soabã sẽn tɩ zems ne yɩɩl sull a 9 soabã yaa a Azaf n gʋlse.
Sogsg sẽn tik verse rãmb zut n paam leokre:
44:20—‘Kata bogdã zĩig’ ra yaa bõe? Tõe tɩ yɩɩl-gʋlsdã ra gomda zabr zĩig yelle, tɩ neb nins b sẽn kʋ zĩ-kãng pʋgẽ wã yɩ kata rɩɩbo.
45:14, 15a—Yaa ãnda la “rĩmã bipugl” b sẽn ‘na n kuils rĩmã yirã’? Bipugl-kãng yaa Wẽnnaam a Zeova sẽn yaa wakat fãa Rĩmã bipugla. (Wilgri 15:3) A makda kiris-neb tigingã neb 144000 a Zeova sẽn sak n deeg wa a kamb n zae-b ne a vʋʋsem sõngã, tɩ b na n wa vʋʋg n keng saasẽ wã. (Rom dãmba 8:16) B segla a Zeova bipugl-kãng “wa pʋg-paal sẽn segl n na n seg a sɩda,” n na n tall-a n tɩ kõ a sɩdã sẽn yaa Rĩmã sẽn yaa Mesi wã.—Wilgri 21:2.
45:15b, 16—‘Pʋgsad-taasã’ makda ãnd dãmba? B makda ‘kʋʋn-kãsengã’ sẽn yaa Wẽnnaam balemdb hakɩkã sẽn naag kiris-neb nins sẽn paam vʋʋsem sõng zaeebã n teend-bã. B sẽn “yi to-kãsengã pʋgẽ” vɩɩsã yĩnga, b na n zĩnda tẽngã zugu, wakat ning Rĩmã sẽn yaa Mesi wã kãadem sẽn wat n sa fasɩ saasẽ wã. (Wilgri 7: 9, 13, 14) Wakat kãnga b na n maana ‘sũ-noogo la b kɩdme.’
45:17—B sẽn yet tɩ komdibli na n leda rĩmã ba rãmbã võor yaa bõe? B sẽn wa n dog a Zezi tẽng zugã, a ra tara yaab rãmba. B na n lebga a Zezi kamba, a sã n wa vʋʋg-b a Yʋʋmd tusr Naamã rɩɩb sasa. Bãmb kẽer na n zĩnda b sẽn yãk-b rãmb tɩ b na n yɩ “nanambs dũniyã soolem tɛk fãa” wã sʋka.
50:2—Bõe yĩng tɩ b yet tɩ Zerizalɛm tara “dasãnd sẽn zems zãnga”? Pa Zerizalɛm sẽn da yaa neer nif gesgẽ wã yĩng ye. Yaa a Zeova sẽn da yãk-a n ning a balengã roog be la a ning-a bark n kɩt t’a ra yaa a rĩm dãmbã a sẽn yãkã na-tẽngã yĩng la sẽn kɩt tɩ Zerizalɛm da be rasãnd wʋsgã.
Zãmsg tõnd yĩnga:
42:2-4. Wala walg sẽn be rasempʋɩ-koɛɛngẽ n sesd n dat koom n yũ, Levi nedã me ra rata a Zeova ne sũur fãa. A sũurã ra sãama wʋsgo, a sẽn pa tõe n balem a Zeova a wẽn-doogã pʋgẽ wã, hal t’a ‘nintãm lebg a rɩɩb wĩntoog ne yʋngo.’ Rẽ kɩtame t’a yam yi rɩɩbo. Woto segd n kɩtame tɩ tõnd me rat ne d sũur fãa n lagem d tẽed-n-taasã n balem a Zeova.
42:5, 6, 12; 43:3-5. Bũmb sẽn yɩɩd tõnd pãng sã n kɩt tɩ d zãag ne kiris-neb tigingã wakat bilfu, d sã n tẽeg sũ-noog ning d sẽn da tar ne d tẽed-n-taasã d sẽn da wa n be ne-bã, tõe n sõng-d lame tɩ d yals kãn-kãe. La sɩngrẽ wã d sẽn yaa d yembrã yĩnga d sũur tõe n sãama wʋsgo, rẽ tẽegr me segd n kɩtame tɩ d bãng tɩ Wẽnnaam yaa d fãagda, la tɩ d segd n gẽeg-a lame t’a wa yiis-d d sẽn beẽ zĩig ningã.
46:2-4. Baa d sabaaba sẽn wa n yaa soab fãa, d segd n kɩsa sɩd zãng-zãng t’a Zeova ‘yaa zĩ-soalgdg la pãng tõnd yĩnga.’
50:17, 20. Ned ning sẽn yagd ziri la a tʋmd tʋʋm wẽns pa tar sor n na n gom Wẽnnaam yʋʋr yĩng ye.
50:20. D pa segd n gom d taabã pãn-komsem yell zãma sʋk ye, d segd n lud-b lame.—Kolos rãmba 3:13.
“MAM SŨURI, BƖ F BAS F YELL WẼNNAAM NUGẼ BALA”
(Yɩɩl Sõamyã 51:3-71–71:24)
Yɩɩl Sõamyã sul-kãngã sɩngda ne pʋʋsg a Davɩɩd sẽn pʋʋs ne a sũur fãa yel-wẽndã a sẽn maan ne a Batseba wã poore. Yɩɩl Sõamyã 52 soabã n tɩ tãag 57 soabã wilgdame t’a Zeova na n fãaga neb nins sẽn dɩkd b zɩɩbã n bobend-a la b gẽegd a fãagrã. A Davɩɩd zu-loeesã fãa pʋgẽ, a maana a Zeova a zĩ-soalgdg wa b sẽn wilgd Yɩɩl Sõamyã 58 soab n tɩ tãag 64 soabã pʋgẽ wã. A yɩɩlame: “Mam sũuri, bɩ f bas f yell Wẽnnaam nugẽ bala. Mam tẽeb yita bãmb nengẽ.”—Yɩɩl Sõamyã 62:6.
D sã n tar zood sõma-sõma ne d fãagdã, na n kɩtame tɩ d yɩɩl “bãmb yʋʋra waoogr yĩngã.” (Yɩɩl Sõamyã 66:2) Yɩɩl Sõamyã 65 soabã pʋgẽ, b pẽgda a Zeova t’a yaa kõt sẽn ka to, tɩ Yɩɩl Sõamyã 67 ne 68 soabã pʋgẽ, b pẽgd-a t’a yaa Wẽnnaam sẽn tʋmd fãagr tʋʋmã. La Yɩɩl Sõamyã 70 ne 71 wã pʋgẽ, b pẽgd-a-la a sẽn yaa fãagdã yĩnga.
Sogsg sẽn tik verse rãmb zut n paam leokre:
51:14—Yaa ne ãnd “yam sõma” la a Davɩɩd sẽn kot teelgã? Ka wã b pa gomd Wẽnnaam a Zeova sẽn dat n sõng a Davɩɩdã yelle, bɩ a vʋʋsem sõngã yell ye. Yaa Davɩɩd mengã yam bɩ a tʋlsem yell la b gomda. A Davɩɩd kota Wẽnnaam t’a kõ-a yam bɩ tʋlsem sẽn yaa sõma t’a maan sẽn yaa tɩrga.
53:2—Bõe yĩng tɩ b yetẽ tɩ ned ning sẽn yet-a tɩ wẽnnaam kaeyã yaa zɩt bɩ yalma? Zɩɩlmã bɩ yalemdã ka wã pa rat n yeel t’a soabã zug pa vɩ ye. Nin-kãngã soab yaa zɩta, a sẽn maand tʋm wẽnsã yĩnga. B bilgda rẽ Yɩɩl Sõamyã 53:2-5 wã pʋgẽ.
58:4-6—B sẽn yet tɩ nin-wẽns wõnda waafã võor yaa bõe? Ziri wã nin-wẽnsã sẽn yagd neb a taabã zutã wõnda waaf zẽnem. B sãamda b sẽn yagd-b rãmbã yʋ-ya. ‘Wa boofr sẽn yaa wʋng n yẽd a tʋbã,’ nin-wẽnsã pa kelgd saglg bɩ wilgr ye.
58:8—B sẽn yet tɩ ‘nin-wẽng menemda wa koomã’ võor yaa bõe? Tõe t’a Davɩɩd ra tagsda gorgond sẽn da be Kãabg Tẽngã pʋgẽ koom yelle. Koom wʋsg ra tõe n wa pida gorgon-kãens tao-tao n leb n loog tao-tao me. Dẽnd ka wã, a Davɩɩd ra pʋʋsdame tɩ nin-wẽnsã loog tao-tao.
68:14—B sẽn da yet tɩ ‘wallã pɩgs bolga ne wanzũri la b kõbd pɩnda wa sãnem kẽega’ võor yaa bõe? Wal sãnda yaa bʋla-bʋla tɩ b kõbd kẽer pɩnda. Wĩndgã sã n tʋrs b kõbdã, b lebgda wa kuiig n pɩnd wa sãnem. Tõe t’a Davɩɩd ra gomda Israɛll sodaasã sẽn tɩ zab n tõog n lebg n watẽ yelle n mak-b ne wal sẽn yɩk n kul yĩngr n pɩnda. Wala Biibl mitb kẽer sẽn wilgã, mak-kãngã leb n tõe n bilgda zabr tõogr keoor b sẽn paame. Sẽn yaa to-to fãa, a Davɩɩd ra gomda zab nins a Zeova sẽn sõng a nin-buiidã tɩ b zab n tõog b bɛɛbã yelle.
68:19—B sẽn ‘deeg-b rãmb tɩ yɩ kũun sẽn yaa raopã’ ra yaa ãnd dãmba? Yaa neb b sẽn da yõg b sẽn wa n na n zab n deeg Kãabg tẽngã, n maan yembse. Kaoosg poore, nin-kãens lebga Levi nebã sõngdba.—Ɛsdras 8:20.
68:31—B sẽn kos tɩ b ‘tãs we-rũng sẽn be tãn-wĩis zĩigẽ wã’ võor yaa bõe? Ka wã, a Davɩɩd makda a Zeova bɛɛbã ne we-rũmsi, n kot-a t’a tãs-b bɩ a gɩdg-b tɩ b ra tõog n maan wẽng ye.
69:24—B sẽn yet tɩ bɛɛbã ‘kars rigdame’ wã võor yaa bõe? Karsã gĩin tara yõod wʋsg d sã n dat n tʋm tʋʋm kɛgeng wala zɩɩb zẽkr bɩ a tʋkre. Kars sẽn digdã bilgda pãng kaalem. A Davɩɩd ra pʋʋsdame n kotẽ t’a bɛɛbã ra paam pãng ye.
Zãmsg tõnd yĩnga:
51:3-6, 19. Yel-wẽnd d sẽn maan pa sãamd tõnd ne Wẽnnaam a Zeova zoodã tɩlae ye. D sã n tek yam n kos sugri, d tog n talla bas-m-yam t’a na n maan-d-la nimbãan-zoeere.
51:7,9-12. D sã n wa maan yel-wẽnde, d tõe n kosa a Zeova t’a maan-d sugri, d sẽn dog ne yel-wẽnã yĩnga. D segd n pʋʋsame n kos-a t’a yɩlg-do, la a kõ-d pãng sẽn na n sõng-d tɩ d yiis yel-wẽna tʋlsem sẽn be d sũurẽ wã la a kõ-d yam sẽn pa yuusdi.
51:20. A Davɩɩd yel-wẽnã ra na n sãama buudã fãa yɩ-neere. Rẽ n so t’a pʋʋs Wẽnnaam n kos-a t’a maan Siõ neere. D sã n maan yel-wẽn-kãsenga, naoor wʋsgo, sãamda a Zeova la tigingã yʋʋre. D segd n pʋʋsa Wẽnnaam n kos-a t’a maneg wẽng ning tõnd sẽn maanã.
52:10. D sã n sakd a Zeova la d reegd a kiblgã ne yamleoogo, d tõe n yɩɩ ‘wa oliiv tɩ-pẽbr sẽn be Wẽnnaam doogã pʋgẽ’ n tar zood sõma ne-a la d womd biis a tʋʋmdã pʋgẽ.—Hebre dãmba 12:5, 6.
55:5, 6, 13-15, 17-19. A Davɩɩd meng bi-roak a Absalom sẽn zãmb-a n dat n deeg a naamã la a sagend a Ahitofɛll a sẽn da kɩs-sɩd ne wã sẽn zãmb-a wã sãama a sũur wʋsgo. La rẽ pa boog kɩs-sɩd ning a Davɩɩd sẽn da tar ne a Zeova wã ye. Tõnd me pa segd n bas tɩ sũ-sãang boog kɩs-sɩd ning d sẽn tar ne a Zeova wã ye.
55:23. Wãn to la d rɩkd d yell n bas ne a Zeova? D maanda rẽ 1) d sã n pʋʋsd a Zeova d yell buud fãa yĩnga, 2) d sã n baood a Gomdã la a siglgã teelg ne b sor-wilgri, 3) la d maand d pãng sẽn tõe tɛk n welgd d yellã.—Yelbũna 3:5, 6; 11:14; 15:22; Filip rãmba 4:6, 7.
56:9. A Zeova mii tõnd yɛlã tiiri, la su-sãang ning rẽ sẽn kõt tõndã.
62:12. Wẽnnaam pa teeg bũmb baa a ye pãng ye, yaa yẽ la pãng buud fãa yẽgre. “Pãng yaa Wẽnnaam n so.”
63:4. Wẽnnaam “nonglem yaa sõma n yɩɩd vɩɩm,” bala nonglem kãng sã n kaẽ, vɩɩmã pa tar võor la yõod ye. Yaa yam tʋʋmd tɩ d bao a Zeova zoodo.
63:7. Yʋngo, wakat ning tiisg la bʋrg sẽn kaeyã, yaa sasa sẽn zems ne bʋgsgo.
64:3-5. Gom-to ned sẽn wɩt neb tõe n sãama nin-tɩrg yʋʋre. D pa segd n kelg nin-kãng soab goama, bɩ n yelg-b ye.
69:5. Sẽn na yɩl tɩ laafɩ zĩnd tõnd ne taab sʋka, wakat ninga, yaa sõma tɩ d sak n ‘lebs-d sẽn pa zuki,’ sẽn dat n yeel tɩ d kos sugri, baa d sã n tẽed tɩ d tara bʋʋm.
70:2-6. A Zeova wʋmda d sẽn pʋʋsd-a n yãgd n dat a sõngrã. (1 Tesalonik rãmba 5:17; Zak 1:13; 2 Pɩɛɛr 2:9) Wẽnnaam tõe n basa makr t’a ket n beẽ, la a na n kõ-d-la yam tɩ d welg yellã, la pãng tɩ d tõog toogã. A pa na n sak tɩ d paam makr sẽn yɩɩd d pãng ye.—1 Korẽnt dãmba 10:13; Hebre dãmba 10:36; Zak 1:5-8.
71:5, 17. A Davɩɩd sẽn da kɩs sɩd ne a Zeova hal a yãadmẽ wã, a paama raood la pãngã. A maana rẽ sẽn deng meng t’a zab ne Filisti nin-wobg a Goliate. (1 Sãmwɛll 17:34-37) Kambã me segd n teega a Zeova b sẽn maand bũmb ninsã fãa pʋgẽ.
“Bɩ dũniyã fãa pid ne bãmb ziiri”
Yɩɩl Sõamyã sebrã babg a yiib-n-soab baasg yɩɩllã, Yɩɩl Sõamyã 72 soabã gomda a Salomo naamã yelle, tɩ rẽ makd vɩɩmã sẽn na n yɩ to-to Mesi wã naam wakatã. Ad sɩd yaa bark kãseng la b sẽn bilg ka wã! Laafɩ na n zĩnda wʋsgo, weoogrã la nen-kɛglmã na n saame, kood wʋsg na n zĩnda tẽngã zugu. Rẽ yĩnga tõnd na n zĩnda neb nins sẽn na n paam bark kãensã Rĩunga sẽn na n wa ne wã sʋk bɩ? D tõe n wa paam n zĩnda b sʋka, d sã n maan wa yɩɩl-gʋlsdã n ket n gẽegd Wẽnnaam ne sũ-noog la d maan-a d zĩ-soalgdg la d pãng zĩiga.
A Davɩɩd baasda a pʋʋsgã ne koe-kãngã: “Bark Zusoab a Wẽnnaam sẽn yaa Israɛll Wẽnnaam sẽn maand bõn-bãna. Bãmb yʋʋr ziir bee bark wakat sẽn ka sɛta. Bɩ dũniyã fãa pid ne bãmb ziiri. Amina. Amina!” (Yɩɩl Sõamyã 72:18-20) Bɩ tõnd me waoog a Zeova la d pẽg a yʋʋrã sẽn be ziirã ne d sũur fãa.
[Foto, seb-neng a 9]
Yãmb mii “rĩmã bipugl” sẽn makd neb nins bɩ?
[Foto, seb-neng 10]
Bõe yĩng la b sẽn yet tɩ Zerizalɛm tara “dasãnd sẽn zems zãngã”?