Karemdbã sogsgo
Karemdbã sogsgo
Bõe n kɩt tɩ d miẽ tɩ b sẽn bilg yamã to-to Yelbũn 8:22-31 pʋgẽ wã gomda a Zezi Kirist nand t’a yɩ ninsaalã yelle?
Yelbũn sebrã Wẽnnaam sẽn vẽneg tɩ b gʋlsã bilgda yamã n yet woto: “Hal kʋdemd wakate, Zusoaba reng n naana maam n yaool n naan bũmba fãa. . . . Mam dogame tɩ b nan ka ning tãensa ne kunkuba b zĩisẽ ye . . . Bãmb sẽn wa n na n ning saaga a zĩigẽ . . . tɩ mam beeme. . . . Tɩ mam bee bãmb sɛɛgẽ wa tʋʋm mit n kõt bãmb sũ-noog raar fãa. La . . . ninsaalb kõo maam sũ-noogo.”
Verse kãngã pa gomd Wẽnnaam yamã bɩ ninsaalbã yam yell ye. Bõe yĩng tɩ d yet woto? Bala b yeelame t’a Zeova ‘naana’ yam ning yell b sẽn gomd ka wã a naanegã sɩngrẽ. A Zeova yaa Wẽnnaam sẽn ka sɩngr la sẽn ka saabo, la wakat fãa, a talla yam. (Yɩɩl Sõamyã 90:1, 2) A yamã pa tall sɩngr ye. B pa naan-a, b pa rog-a me. Sẽn paase, b yeelame tɩ yamã gomdame la a tʋmdẽ, tɩ woto wilgdẽ tɩ yaa ned yell la b sẽn gomdã.—Yelbũna 8:1.
Yelbũnã sebr yetame tɩ hal sẽn kaoose, yamã ra bee ne a Zeova sẽn yaa naandã n yaa ‘tʋʋm mita.’ Sɩd-sɩda, yaa a Zezi yell la b sẽn gomd ka wã. Sẽn kaoos wʋsg t’a nan pa wa tẽng zugu, a Zezi tʋma ne a Zeova sõma hali n kɩt tɩ Wẽnnaam Gomdã yetẽ: “Bãmb denga bũmb fãa, la yaa bãmb [maasem] yĩng la bũmb fãa yalsd b zĩigẽ.”—Kolos rãmba 1:17; Wilgri 3:14.
B sẽn bilg Wẽnnaam Biriblã n yeel t’a yaa yamã zemsame, bala yaa Yẽ n wilg nebã a Zeova raabã a sẽn yãk ne yamã la a no-tɩrsã a sẽn lugl ne yamã me. Sẽn deng t’a Zezi yɩ ninsaala, a ra yaa Wẽnnaam Gomd bɩ a Koe-taasda. (Zã 1:1) B bilg-a lame n yeel t’a “yaa Wẽnnaam pãnga la Wẽnnaam yam.” (1 Korẽnt dãmba 1:24, 30) Sɩd yaa Wẽnnaam Biriblã sẽn nong ãdem-biisã n dɩk a vɩɩmã n kõ tɩ yɩ rondã la b sẽn bilgd kaanẽ wã. Ad woto sɩd yaa bilgr sẽn be rasãnde!—Zã 3:16.