Zoe-y a Zeova n paam sũ-noogo
Zoe-y a Zeova n paam sũ-noogo
“Sũ-noog soab la ned ning sẽn zoet a Zeova.”—YƖƖL SÕAMYÃ 112:1, NW.
1, 2. Bark bʋs la a Zeova zoees tõe n wa ne?
SŨ-NOOG pa paamd nana-nana ye. Sũ-noog hakɩkã bee ne f sẽn na n maand yam yãkr sẽn yaa sõma, ne f sẽn na n maand tɩrga, la ne f sẽn na n zãagd f meng ne wẽnga. Tõnd Naand a Zeova kõo tõnd a Gomdã sẽn yaa Biiblã, sẽn na yɩl n zãms tõnd tɩ d bãng vɩɩm manesem ning sẽn yaa sõma n yɩɩdã. D sã n modgd n bãngd a Zeova noyã la d tũud-ba, rẽ, d wilgdame tɩ d zoeta Wẽnnaam, la rẽ na n kõ-d-la sũ-noog hakɩka.—Yɩɩl Sõamyã 23:1; Yelbũna 14:26.
2 Sõs-kãngã pʋgẽ, d na n yãa neb sẽn zĩnd makr b sẽn gʋls Biiblã pʋgẽ la makr a taab sẽn be tõnd wakatã. Mak-kãens wilgda Wẽnnaam zoees hakɩkã sẽn sõngd ned to-to t’a tõog n zãgs wẽng la a paam daood n maan sẽn yaa tɩrga. D na n yãame tɩ Wẽnnaam zoees tõe n kõo tõnd sũ-noogo, a sẽn na n kɩt tɩ d rems manesem wẽng wala rĩm a Davɩɩd sẽn da maana. D na n yãame me t’a Zeova zoeesã sɩd yaa bũmb sẽn tar yõod wʋsg roagdbã sẽn tõe n taas b kambã. Wẽnnaam Gomdã sɩd yetame: “Sũ-noog soab la ned ning sẽn zoet a Zeova.”—Yɩɩl Sõamyã 112:1, NW.
F sẽn na n le paam sũ-noog ning f sẽn da tarã to-to
3. Bõe n sõng a Davɩɩd tɩ yel-wẽnã pa sãam a zoodã ne Wẽnnaam?
3 Wala d sẽn yã sõsg ning sẽn loogã pʋgẽ wã, naoor a tãabo, a Davɩɩd basame t’a wẽn-zoeerã booge, t’a maan yel-wẽna. La a sẽn tall manesem ning ne kiblg ning a Zeova sẽn kibl-a wã wilgame tɩ baa ne a yel-wẽnã, a ra yaa wẽn-zoɛta. A waoogrã ne Wẽnnaamã tus-a lame t’a sak n deeg a taalã, n dems a manesmã, la a le paam zood ne a Zeova. Baa ne a kongrã sẽn wa ne namsg wʋsg n kõ yẽ la neb a taabã, a sẽn sɩd tek yam n kos sugrã kɩtame t’a paam a Zeova teelg la a barka. A Davɩɩd makrã sɩd tõe n kõo kiris-nebã raood rũndã-rũndã, b sã n wa beeg beeg-kãsenga.
4. Wãn to la Wẽnnaam zoees tõe n sõng ned t’a le paam sũ-noogo?
4 D ges a Sonya makrã. * Baa ne a sẽn da yaa wakat fãa so-pakdã, a talla tũud-n-ta-wẽnse, n tall manesem sẽn pa tog ne kiris-ned tɩ b yiis-a kiris-neb tigingã pʋgẽ. A Sonya yamã sẽn wa n wa, a maana bũmb nins sẽn yaa tɩlaeyã sẽn na yɩl n le paam zems-n-taar ne a Zeova, tɩ b wa sak n deeg-a tigingã pʋgẽ yɛsa. Yel-kãensã fãa pʋgẽ, a Sonya ra ket n tʋll n maana a Zeova raabã. Sẽn wa n beẽ-beẽ, a le lebga wakat fãa so-pakda. Rẽ poore, a wa n kẽe kãadem ne kiris-neb kãsem soab a yembre, la masã yẽ ne a sɩdã naagda taab n balemd Wẽnnaam ne sũ-noogo. Baa ne a Sonyã sẽn maand a bãngẽ ne a sẽn bʋdg n bas Kiristã sor wakat bilf pʋgẽ wã, a sũur yaa noogo, a wẽn-zoeerã sẽn sõng-a t’a lebg n wa so-tɩrgã zugã.
Namsgã n são Wẽnd beegre
5, 6. Wãn to la a Davɩɩd paam segb naoor a yiib fãa n na n kʋ a Sayulli, la bõe yĩng t’a pa maan woto?
5 Yaa vẽeneg tɩ sẽn são yaa wẽn-zoeerã sẽn na n sõng ned t’a pa beeg Wẽnde. A Davɩɩd sẽn maanã wilgda woto. Vugri, a Sayull da rigda a Davɩɩd ne sodaas tus a tãabo, n tɩ kẽ tãng bokẽ, mik a Davɩɩd ne a sodaasã ra solga be. A Davɩɩd sodaasã yeel-a lame t’a kʋ a Sayulli. B yeelame tɩ yaa a Zeova n dɩk a Davɩɩd bɛ wã n ning a nugẽ. A Davɩɩd vũnuma sɩɩ n kolg a Sayull n wõrg a fuugã noore. A Davɩɩd sẽn da zoet Wẽnnaamã yĩnga, fuugã wõrgr meng namsa a sũur-kasetã. A kɩtame t’a sodaasã looge, la a yeele: “Bɩ Zusoaba ra sak tɩ m maan woto n sɩɩs rĩmã ye, tɩ bõe, yaa Zusoabã n yãk bãmba.” *—1 Sãmwɛll 24:2-8.
6 Daar a to, a Sayull ne a nebã ra gãee b sikã zĩigẽ yʋngo, la a Zeova “kɩtame tɩ gõeem kãseng yõk bãmb” fãa. A Davɩɩd ne a ba-biig biig a Abisai sẽn tar daoodã soos n kẽe b tãp-sikã sʋk n tɩ yaas zĩig ning a Sayull sẽn da gãẽ wã menga. A Abisai ra rat n kʋ a Sayulli, la a Davɩɩd gɩdg-a lame n yeele: “Ned sã n sɩɩs Zusoaba sẽn yãk a soaba, b ka na n kõ-a bʋʋm ye.”—1 Sãmwɛll 26:9, 12.
7. Yaa bõe n gɩdg a Davɩɩd t’a pa maan yel-wẽnde?
7 Bõe yĩng t’a Davɩɩd pa kʋ a Sayulli, baa ne a sẽn paam segb naoor a yiib n da tõe n kʋ-a wã? Yaa a sẽn da zoet a Zeova n yɩɩd a Sayullã yĩnga. A Davɩɩd sẽn da zoet Wẽnnaamã yĩnga, a ra getame tɩ yẽ sẽn na n nams n são a sẽn na n beeg Wẽnde. (Hebre dãmba 11:25) A ra kɩsa sɩd zãng t’a Zeova na n gesa a nin-buiidã la yẽ mengã yelle. A Davɩɩd ra miime tɩ Wẽnnaam sakr la a teegr da na n kõ-a-la sũ-noog la bark wʋsgo, la tɩ Wẽnnaam kɩɩsg ra na n kɩtame t’a kong a lohorem. (Yɩɩl Sõamyã 65:5) A Davɩɩd ra leb n miime tɩ wakat ning Wẽnnaam sẽn yãkã sã n da ta, a ra na n pidsa a kãabgã n kɩt t’a yɩ rĩm la a sik a Sayulli.—1 Sãmwɛll 26:10.
Wẽnnaam zoees wata ne sũ-noogo
8. Wãn to la a Davɩɩd sẽn tall manesem ning a zu-loeesã pʋgẽ wã yaa mak-sõng n kõ tõndo?
8 D sẽn yaa kiris-nebã, bɩ d bãng tɩ nebã tõe n wa yaal-d lame, n nams tõnd d tẽebã yĩnga, pa rẽ bɩ d paam makr a taaba. (Matɩe 24:9; 2 Pɩɛɛr 3:3) Wakat-wakate, d tõe n paama mo-yõsr ne d tẽed-n-taasã menga. La d miime t’a Zeova nee bũmb fãa, t’a wʋmda d pʋʋsgã, la tɩ wakat sẽn zemse, a na n demsa yɛlã tɩ zems ne a raabã. (Rom dãmba 12:17-21; Hebre dãmba 4:16) Woto yĩnga, wall tɩ d zoe rabeem d bɛɛbã yĩnga, yaa Wẽnnaam la d zoeta, la yaa yẽ sõngr la d baood sẽn na yɩl t’a fãag-do. Wala a Davɩɩde, tõnd pa rokd d sũya, d leb n pa kɩɩsd Wẽnnaam noya sẽn na yɩl n põs namsg d tẽebã yĩng ye. D sẽn maand woto wã, na n wa baas n kõ-d-la sũ-noogo. Wãn to?
9. Rɩk-y makr n wilg tɩ wẽn-zoeerã tõe n kɩtame tɩ ned paam sũ-noogo, baa a sã n namsd a tẽebã yĩnga.
9 Saam-biig sẽn kaoos misioneer tʋʋmdẽ wã Afirik yeela woto: “Mam tagsda pag a yembr ne a bipugl sẽn tall manesem ningã yelle. B sẽn yaa kiris-neb n pa kẽesd b toog dũniyã yɛlẽ wã yĩnga, b zãgsame tɩ b kõn da parti politikã sebr ye. Kʋʋngã pãb-b-la sõma n yaool n yeel-b tɩ b menem n kul yiri. B sẽn da wa n kuusẽ wã, bipuglã sẽn da pa wʋmd yɛlã võorã ra yãbdame, t’a ma wã ra belsd-a. Yaa sɩd tɩ zĩig pʋgẽ b sũyã ra pa noom ye, la b ra tara sũur-kaset sẽn yaa sõma. B sũyã wa n baas n yɩɩ noogo, b sẽn sak Wẽnnaamã yĩnga. B sã n da raẽ parti politikã sebre, kʋʋngã sũur da na n yɩɩ noog wʋsgo. Nebã ra na n kõ-b-la bõn-maasg tɩ b yũ sõma la b sao n gilg-b hali n ta b yirã. La bipuglã ne a ma wã sã n da maanẽ woto, b sẽn mi tɩ b kɩɩsa Wẽnd noorã yĩnga, b sũ-sãoongã ra pa na n tall to ye.” B wẽn-zoeerã sõng-b lame tɩ b pa maan woto ye.
10, 11. Bark bʋs la pag a yembr sẽn da zoet Wẽnnaam paam-yã?
10 Bũmb sã n wa rat n tus tõnd tɩ d ra waoog vɩɩmã sẽn yaa bõn-kãseng Wẽnnaam nifẽ wã, wẽn-zoeerã na n kɩtame tɩ d ra wa lʋɩ bẽd-kãngã pʋgẽ, tɩ rẽ na n kõ-d sũ-noog me. A Maari sẽn da wa n tar a biig a tãab-n-soab pʋgã, logtorã sagl-lame t’a yiis pʋgã, n yeele: “Fo rogmã yellã yaa kãn-kãe wʋsgo. A tõe n wa yik n kengame hal tɩ wa tũ ne f yõor ka la beoog sʋkã menga. Rẽ na n kɩtame tɩ bi-pɛɛlgã meng ki. Sẽn yaa to-to fãa, bũmb pa wilgd tɩ biigã pa na n yɩ bõn-bãnd ye.” Rẽ t’a Maari ra zãmsda Biiblã ne a Zeova Kaset rãmbã la a ra nan pa reeg lisg ye. A yeelame: “Mam yãka yam n na n maan a Zeova raab la m sak-a m yõor tɛka, baa sẽn na n yɩ to-to fãa.”—Yikri 21:22, 23.
11 A Maari tʋdbã wakate, a ra rɩkda sẽk wʋsg n zãmsd Biiblã la a get a zakã neb yelle. A wa n baas n dogame. A Maari yeela woto: “Rogmã yɩɩ toog bilf n yɩɩd pipi soabã la yiib-n-soabã, la yel-gĩtim kãseng pa zĩnd ye.” Yaa Wẽnnaam zoeesã n sõng a Maari t’a kell n tall sũur-kaset sẽn yaa sõma, la pa kaoos la a reeg lisg ye. Bi-pɛɛlgã sẽn wa n bɩ wã, yẽ me zãmsa wẽn-zoeere, la masã a tʋmda a Zeova Kaset rãmbã tʋʋmd will a yembrẽ.
‘D teeg a Zeova n paam daoodo’
12. Wãn to la Wẽnnaam zoeesã sõng a Davɩɩde?
12 A Davɩɩd sẽn da zoet a Zeova wã pa kɩt t’a pa maan wẽng bal ye. Rẽ sõng-a lame me t’a tall raood la yam yel-tood pʋsẽ. Sẽn na maan yʋʋmd la kiis a naase, a Davɩɩd ne a sodaasã zoe n tɩ soonda Ziklag sẽn be Filisti nebã soolmẽ wã, a Sayull yĩnga. (1 Sãmwɛll 27:5-7) La vugri a Davɩɩd ne a sodaasã sẽn da wa n ka be, pigdb sẽn yaa Amalɛk buudã neb n wa n yõog galʋ-tẽngã bugum, n yõg pagbã ne kambã la rũmsã fãa n looge. A Davɩɩd ne a sodaasã sẽn wa n lebg n tɩ yã yellã, b yãbame. Tao-tao bala, sodaasã sũ-sãang lebga sũ-kẽk hali tɩ b ra rat n lob a Davɩɩd kuga. Baa ne a Davɩɩd sẽn da be yɩɩr pʋgẽ wã, a pa koms raood ye. (Yelbũna 24:10) A wẽn-zoeerã tus-a lame t’a bao a Zeova sõngre, n ‘teeg-a n paam daoodo.’ Ne Wẽnd sõngre, a Davɩɩd ne a sodaasã tõoga Amalɛk nebã n lebs n deeg b nebã la laogã fãa.—1 Sãmwɛll 30:1-20.
13, 14. Wãn to la Wẽnnaam zoees sõng kiris-ned a yembr t’a maan yam-yãkr sẽn yaa sõma?
13 Rũndã-rũndã, Wẽnnaam sõgen dãmbã me segda yɛl sẽn baood tɩ b teeg a Zeova la b tall raoodo. D ges a Kristina makrã. A sẽn da wa n nan yaa biiga, a zãmsa Biiblã ne a Zeova Kaset rãmbã. La a ra rat n yɩɩ b sẽn boond tɩ piano wã reem-dɛɛmda, la a sɩd tõog n zãmsa reem-kãng n bãng sõma. Sẽn paasde, a ra zoeta koe-noogã moonego, tɩ rẽ kɩt t’a ra yɛɛsd zɩɩb nins lisgã sẽn na n wa ne wã. A Kristina sẽn da ket n zãmsd Biiblã yĩnga, a sɩngame n neẽ tɩ Wẽnnaam goamã tara pãnga. A ra zãmsd n na n bãnga a sẽn segd n zoe a Zeova to-to, la a bãngame t’a Zeova ratame t’a sõgen dãmbã nong-a ne b sũyã fãa, ne b yamã, b sɩɩgã la b pãngã fãa. (Mark 12:30) Rẽ tus-a lame t’a rɩk a mengã n kõ a Zeova n deeg lisgu.
14 A Kristina pʋʋsame n kos a Zeova t’a sõng-a t’a kẽng taoor tẽebã wɛɛngẽ. A yeelame: “Mam da miime tɩ piano reem-dɛɛmd vɩɩm yaa so-toak woo so-toaka, la yʋʋmd fãa, kõntra rãmbã f sẽn na n maana na n kɩtame tɩ f reem sẽn na ta naoor 400.” A paasame: “Rẽ kɩtame tɩ m yãk yam n na n yɩ reemã karen-saamb n paam m noor dɩɩb la m yɩ wakat fãa so-pakda.” La ra yaa rẽ wẽnd la a Kristina ra segd n maan a pipi kõnsɛɛr a tẽngã reem do-kãsengã pʋgẽ. A yeelame: “Mam pipi kõnsɛɛrã wẽneg n yɩɩ m yaoolem kõnsɛɛre.” Rẽ poore, a Kristina kẽe kãadem ne kiris-neb kãsem soab a yembre. Bãmb b yiibã tʋmda a Zeova Kaset rãmbã tʋʋmd will a yembrẽ masã. A sũur yaa noogo, a Zeova sẽn sõng-a t’a maan yam-yãkr sẽn yaa sõma, n tõe n dɩk a sẽkã la a pãngã masã n kẽes a tʋʋmdã pʋgẽ wã.
Zãms kambã wẽn-zoeerã tara yõod wʋsgo
15. Bõe la a Davɩɩd ra rat n zãms a kambã, la wãn to la a maan dẽ?
15 A Davɩɩd gʋlsa woto: “Mam kamba, wa-y-yã! Kelg-y maam. La mam na zãms yãmb Zusoaba zoeese.” (Yɩɩl Sõamyã 34:12) A Davɩɩd sẽn da tar kambã, a ra tʋllame n zãms a kambã bũmb ning sẽn tar yõodo, sẽn yaa a Zeova zoees hakɩkã. Ne a no-goam la a tʋʋmã, a Davɩɩd ra wilgda a Zeova sẽn yaa a soaba. A ra pa bilgd-a wa Wẽnnaam sẽn baood tɩ b tũ noy ka tɛka, bɩ wala Wẽnnaam sẽn kẽesd nebã rabeem ye. Sẽn paase, a pa bilg-a wa ned sẽn gẽesd kongr buud fãa b sẽn maan n kɩɩs a noyã ye. La a bilgd-a-la wa Ba sẽn tar nonglem, sẽn get a kamb yell la a sẽn kõt a tẽng zug kambã sugri. “Ãnda n mi a tudgri?” A Davɩɩd sẽn sok woto wã wilgdame t’a kɩsa sɩd t’a Zeova pa tar-a feesg wakat fãa n baood n na n yã a kongrã ye. A paasa woto: “Bɩ y yiis wẽng sẽn solg ne maam.” A Davɩɩd ra kɩsa sɩd t’a sã n modg wa a pãng sẽn tõe tɛka, a goamã la a tagsa wã ra tõe n taa a Zeova yam.—Yɩɩl Sõamyã 19:13, 15.
16, 17. Wãn to la roagdbã tõe n zãms b kambã tɩ b zoe a Zeova?
16 A Davɩɩd yaa mak-sõng n kõ roagdbã rũndã-rũndã. A Ralf ne a yao wã sẽn tʋmd a Zeova Kaset rãmbã tʋʋmd will a yembrẽ wãyeela woto: “Tõnd roagdbã sẽn wub tõnd to-to wã kɩtame tɩ d tar sũ-noog d sẽn be sɩdã pʋgẽ wã yĩnga. Tõnd sẽn da wa n yaa kom-bɩɩse, b sã n da sõsd tigingã tʋʋm zugu, b ra kẽesda tõnd b sõsgã pʋgẽ, la d wa n nonga sɩdã wa bãmba. B kɩtame tɩ d bãng tɩ d tõe n maana bũmb n sõng ne a Zeova tʋʋmdã. Sɩda, sẽn na maan yʋʋmã, tõnd zakã vɩɩmda tẽng a yembrẽ Rĩungã koe-moondb raab sẽn da yaẽ wʋsgã, n sõngd n lugund tigims paalse.
17 “Bũmb ning sẽn sõng tõnd tɩ d pa so-tɩrgã zugã pa noy ka tɛk sẽn pa vigsd ye. Yaa tõnd roagdbã sẽn wilg tɩ b ra getame t’a Zeova sɩd beeme la a tara sõmblem wʋsgã yĩnga. B ra rat n bãnga a Zeova sõma n paas la b ta a yam. B sẽn da sɩd zoet a Zeova la b nong-a wã kɩtame tɩ tõnd me da rat n maan wa bãmba. Baa tõnd sã n da maan kɛgre, tõnd roagdbã ra pa kɩtd tɩ tõnd tags t’a Zeova pa le nong-d ye. B ra pa yikd b sũy n gɩdg tõnd zaalem tɩ d ra maan yɛl kẽer ye. Naoor wʋsgo, b ra maagda b yĩns n zĩnd ne tõnd n gom ne-do. Wakat ninga, ne nintãm, d ma ra modgdame n na n gom tɩ kẽ tõnd sũyã. La a sɩd ra tõogd n maanda woto. Ne tõnd roagdbã no-goam la b tʋʋmã, tõnd zãmsame n bãng t’a Zeova zoees yaa bõn-sõngo, la tɩ f sã n yaa a Kaset soaba, yaa sũ-noog bũmb lakae pa zɩɩb ye.”—1 Zã 5:3.
18. D sã n zoet sɩd Wẽnnaamã, nafa bʋs la d na n paame?
18 “A Davɩɩd yaoolem goamã” pʋgẽ, a yeela woto: “Ned sã n soog ninsaalb ne tɩrlem la Wẽnnaam zoeese, yaa wa saag sẽn ni n yoog tɩ sõor puk n wẽed mood dũni zugu.” (2 Sãmwɛll 23:1, 3, 4) A Davɩɩd biribl a Salomo wʋma gom-kãngã võore, bala a kosa a Zeova t’a kõ-a “sũ-tɩrga,” la yam “t’a bãng sẽn yaa neer la wẽnga, n bake.” (1 Rĩm dãmba 3:9, Sebr Sõngo) A Salomo sak n deegame t’a Zeova zoees yaa bũmb sẽn kõt yam la sũ-noogo. Kaoosg poore, a kʋmsa Koɛɛg Soab sebrã ne gom-kãensã: “Kelg koɛɛg baasgo. D wʋma fãa. Zoe Wẽnnaam la f sak bãmb tõodo. Tɩ bõe, ninsaal fãa tog n maana woto. Tɩ bõe, Wẽnnaam na n bʋʋ tʋʋma fãa bʋʋdo, la yɛl nins fãa sẽn da solgã, yell sõama ne yell wẽnse.” (Koɛɛg Soaba 12:13, 14) D sã n tũ sagl-kãngã, d na n sɩd yãame tɩ “sik-m-meng ne Zusoaba zoees biis” pa yam la sũ-noog bal ye, a leb n “yaa arzɛk ne waoogre la vɩɩm.”—Yelbũna 22:4.
19. Bõe n na n sõng tõnd tɩ d wʋm a Zeova zoees võore?
19 Kibay sẽn be Biiblã pʋgẽ la yɛl sẽn zĩnd rũndã-rũndã me wilga tõnd tɩ Wẽnnaam zoees tara yõod wʋsg a Zeova sõgen dãmb hakɩkã vɩɩm pʋgẽ. Wẽn-zoeer kãng pa kɩtd tɩ d pa maan bũmb sẽn sãamd tõnd saasẽ Ba wã sũur bal ye. A leb n kõta tõnd raood tɩ d yals kãn-kãe d bɛɛbã taoore, la a sõngd-d tɩ d tall sũ-mar makrã la yel-toodã pʋsẽ. Woto yĩnga, bɩ tõnd fãa, kom-bɩɩs la kãsemba, d modg n zãms Wẽnnaam Gomdã neere, n bʋgs d sẽn zãmsdã zugu, n pʋʋsd a Zeova wakat fãa la ne d sũy fãa. D sã n maan woto, pa Wẽnnaam bãngrã la d na n paam bal ye, d na n wʋma a Zeova zoees võor me.—Yelbũna 2:1-5.
[Tẽngr not rãmbã]
^ sull 4 Pa a yʋʋrã meng la woto ye.
^ sull 5 Tõe tɩ rẽ naaga bũmb nins sẽn kɩt t’a Davɩɩd gʋls Yɩɩl Sõamyã 57 la 142 soabã pʋgẽ.
Y tõe n wilga a võor bɩ?
Wãn to la Wẽnnaam zoees
• tõe n sõng ned t’a beeg kãseng ra sãam a zoodã ne Wẽnde?
• kõt sũ-noog makr la namsg f tẽebã yĩng taoore?
• sõngd ned t’a maan Wẽnnaam daabã?
• tõe n sõng d kambã wʋsgo?
[Zãmsgã sogsgã]
[Foto, seb-neng 28]
A Zeova zoees sõnga a Davɩɩd t’a pa kʋ rĩm a Sayull ye
[Foto rãmba, seb-neng 31]
Wẽn-zoeerã yaa bũmb sẽn tar yõod wʋsg roagdbã sẽn tõe n zãms b kambã