“Bɩ y wilg Wẽnnaam yãmb sẽn dat bũmb ninsi”
“Bɩ y wilg Wẽnnaam yãmb sẽn dat bũmb ninsi”
“Bũmba fãa pʋga, pʋʋs-y Wẽnnaam n kose la y pʋʋs barka la y wilg Wẽnnaam bũmb nins yãmb sẽn datã.”—FILIP RÃMBA 4:6, Kãab-paalgã Koe-noogo.
1. Ne ãnd la d tar zu-noog n na n gome, la bõe yĩng tɩ rẽ sɩd yaa zu-noog tɛkẽ?
YÃMB sã n bõos n na n gom ne yãmb tẽngã naabã, bõe la b na n yeel-yã? Tõe tɩ y na n tõog n goma ne naabã nebã, la na n yɩɩ toog tɩ y tõog n gom ne naabã menga. La sã n yaa ne a Zeova sẽn yaa ãndũniyã fãa Naabã, pa woto ye. Tõnd tõe n goma ne-a zĩig fãa la wakat fãa. A kelgda pʋʋsg nins fãa sẽn tat a yamã. (Yelbũna 15:29) Ad woto sɩd yaa zu-noog tɛkẽ! Tõnd sẽn mi rẽ wã segd n kɩtame tɩ d pʋʋsd a soab ning sẽn “wʋmda pʋʋsgã” wakat fãa.—Yɩɩl Sõamyã 65:3.
2. D sã n dat tɩ Wẽnnaam kelg tõnd pʋʋsgã, bõe n yaa tɩlae?
2 La tõe tɩ d sok d mens n gese, ‘pʋʋsg bʋg buud la Wẽnnaam kɛlgda?’ Bũmb a ye n yaa tɩlae sẽn na yɩl tɩ Wẽnnaam kelg pʋʋsgo. Biiblã wilga rẽnda, a sẽn yeel tɩ: “Tẽeb sã n kaẽ, ned ka tõe n ta Wẽnnaam yam ye; tɩ bõe, ned ninga sẽn wat Wẽnnaam nengẽ, a tog n tẽeme tɩ bãmb beeme la tɩ bãmb yaa neb nins sẽn baood bãmba roanda.” (Hebre dãmba 11:6) Wala sõsg ning sẽn loogã sẽn wilgã, d sã n dat n kolg Wẽnnaam, yaa tɩlae tɩ d tall tẽebo. Wẽnnaam sakd n kelgda neb nins sẽn pʋʋsd-a wã, la rẽnda b pʋʋs-a ne tẽeb la ne pʋ-peelem, n maan tʋʋm sõma la b yɩ sũ-tɩrs rãmba.
3. a) Wala pĩnd wẽndẽ wẽn-sakdbã pʋʋsg sẽn wilgdã, bõe la d tõe n yeel d pʋʋsgã pʋgẽ? b) Pʋʋsgã yaa buk a wãna?
3 Tʋm-tʋmd a Poll sagla yẽ wakatẽ kiris-nebã woto: “Da maan-y yɩɩr ne bũmb baa fʋɩ ye. La bũmba fãa pʋga, pʋʋs-y Wẽnnaam n kose la y pʋʋs barka la y wilg Wẽnnaam bũmb nins yãmb sẽn datã.” (Filip rãmba 4:6, 7, Kãab-paalgã Koe-noogo) Biiblã pʋgẽ, kibay wʋsg n wilgd neb sẽn pʋʋs Wẽnnaam n gom yɛl sẽn da pak-b yelle. A Ana, a Eli, a Ezekɩas la a Daniɛll bee nin-kãens sʋka. (1 Sãmwɛll 2:1-10; 1 Rĩm dãmba 18:36, 37; 2 Rĩm dãmba 19:15-19; Daniɛll 9:3-21) D segd n tũu b mak-sõngã. A Poll goamã wilgdame me tɩ pʋʋsgã yaa buk toor-toore. A goma bark pʋʋsg yelle, sẽn dat n yeel tɩ pʋʋs-kãng pʋgẽ, d pʋʋsda Wẽnnaam bark bũmb nins a sẽn maan n kõ tõndã yĩnga. Pʋʋs-kãng pʋgẽ me, d tõe n pẽga Wẽnnaam. A yeelame me tɩ d pʋʋs n kose, sẽn dat n yeel tɩ pʋʋsgã pʋgẽ, d na n sika d meng n bõos Wẽnnaam ne d sũur fãa. D leb n tõe n pʋʋsame n wilg bũmb nins tõnd sẽn datã takɩ. (Luk 11:2, 3) Pʋʋsgã sẽn yaa buk ning fãa, Wẽnnaam sakd n kelgda tõndo.
4. Baa a Zeova sã n zoe n mi tõnd sẽn dat bũmb ningã, bõe yĩng tɩ d segd n wilg-a d sẽn dat bũmb ningã?
4 La neb kẽer tõe n soka b mens woto: ‘Rẽ yĩnga a Zeova pa zoe n mi tõnd sẽn datã la?’ Yaa sɩd t’a miime. (Matɩe 6:8, 32) La bõe yĩng t’a baas n dat tɩ d pʋʋs-a n wilg d sẽn dat bũmb ningã? D rɩk makre: Butik soab tõe n wa baoa kũun n na n kõ a raadense. La raadensã segd n kẽnga butikã soab nengẽ n tɩ wilg tɩ b rata kũunã. Raadens nins sẽn pa na n sak n maan dẽ wã wilgdame tɩ b pa rat kũunã ye. Woto me, tõnd sã n pa wilgd a Zeova tõnd sẽn dat bũmb ningã pʋʋsg pʋgẽ, rat n yeelame tɩ tõnd pa nand bũmb ning a sẽn maand n kõt tõndã ye. A Zezi yeelame tɩ: “Bɩ y kose, la yãmb na reege.” (Zã 16:24) D sã n maan woto, d wilgdame tɩ d teega Wẽnnaam.
Wãn to la d segd n pʋʋs Wẽnnaam?
5. Bõe yĩng tɩ d segd n pʋʋs ne a Zezi yʋʋre?
5 A Zeova pa kõ noy ka tɛk sẽn wilgd d sẽn segd n pʋʋs-a to-to ye. Baasg zãnga, d segd n zãmsa Biiblã n bãng d sẽn tõe n pʋʋs Wẽnnaam to-to tɩ ta a yam. Wala makre, a Zezi yeela a karen-biisã woto: ‘Bũmb ninga fãa yãmb sẽn na n kos m Ba ne mam yʋʋre, bãmb na kõ yãmba.’ (Zã 16:23) Dẽnd d segd n pʋʋsa ne a Zezi yʋʋre, n wilg tɩ d sak n deegame tɩ yaa a Zezi maasem yĩng bal la ãdem-biisã tõe n paam Wẽnnaam barkã.
6. Yaa tɩlae tɩ d tall manesem takɩ pʋʋsgã wɛɛngẽ bɩ?
6 Yaa tɩlae tɩ d yĩgimdi, n zĩnd bɩ n yals yĩngr n pʋʋs bɩ? Ayo. Biiblã pa yãk manesem takɩ pʋʋsgã wɛɛngẽ ye. (1 Rĩm dãmba 8:22; Nehemi 8:6; Mark 11:25; Luk 22:41) Bũmb ning sẽn tar yõodã yaa d pʋʋs Wẽnnaam ne pʋ-peelem la d tall sũ-tɩrga.—Zoɛll 2:12, 13.
7. a) “Amiina” wã võor yaa bõe? b) Bõe yĩng tɩ zems tɩ d yeel tɩ “Amiina” pʋʋsgã baasgẽ?
7 La tõnd sẽn nong n yet “amiina” wã rat n yeelame tɩ bõe? Biiblã wilgdame tɩ zemsame tɩ d yeel tɩ “Amiina” pʋʋsgã baasgẽ, sẽn tɩ yɩɩd fãa d sã n pʋʋsd zãma sʋka. (Yɩɩl Sõamyã 72:19; 89:53) Hebre gom-biig ning sẽn yaa ʼa·menʹ võor yaa “tɩ yɩ woto.” Sebr a yembr (McClintock and Strong’s Cyclopedia) wilgame tɩ d sã n yeel tɩ “Amiina” pʋʋsg baasgẽ, rat n yeelame “tɩ d sak n deegame tɩ goam nins d sẽn yeel pʋʋsgã pʋgẽ wã yaa sɩda, la tɩ d ratame tɩ sɩd yɩ woto.” Dẽnd ned sã n yeel a pʋʋsgã baasgẽ tɩ “Amiina,” a soab wilgdame t’a sɩd rata ne a sũur fãa t’a sẽn yeel bũmb ning pʋʋsgã pʋgẽ wã pidsi. Kiris-ned sã n pʋʋs tigingã fãa yʋʋr yĩng n baas ne “Amiina,” neb nins sẽn kelgd pʋʋsgã me tõe n yeelame tɩ “Amiina” b sũur pʋgẽ, ka rẽ bɩ b yeel tɩ yi, n wilg tɩ b sɩd saka bũmb ning fãa sẽn yeel pʋʋsgã pʋgẽ wã.—1 Korẽnt dãmba 14:16.
8. Wãn to la tõnd pʋʋsg kẽer tõe n yɩ wa a Zakoob la a Abrahaam pʋʋsgã buudu, la tõnd sã n pʋʋsd woto, wilgda bõe?
8 Wakat kẽere, Wẽnnaam tõe n basame tɩ d wilg d sã n sɩd rata d sẽn bõosd bũmb ningã ne d sũur fãa. Tõe tɩ wakat ninga, d na n maana wa a Zakoob sẽn mao ne malɛk yʋng tõr sẽn na yɩl n paam barkã. (Sɩngre 32:25-27) Yɛl kẽer me tõe n kɩtame tɩ d maan wa a Abrahaam sẽn bõos a Zeova naoor ka tɛk t’a fãag a Lote, la tɩ sã n mik tɩ nin-tɩrs a taab me n be Sodom bɩ a fãag-bã. (Sɩngre 18:22-33) Tõnd me tõe n pʋʋsa a Zeova n bõos bũmb nins sẽn tar yõod ne tõndã, n miẽ t’a tɩrlmã, a sõmblmã la a nimbãan-zoeerã yĩnga, a na n kelgame.
D tõe n pʋʋs n kosa bõe?
9. Tõnd sã n wa pʋʋsdẽ, bõe n segd n pak tõnd n yɩɩda?
9 D tẽeg t’a Poll yeelame tɩ ‘bũmba fãa pʋga, . . . wilg-y Wẽnnaam bũmb nins yãmb sẽn datã.’ (Filip rãmba 4:6, Kãab-paalgã Koe-noogo) Dẽnd tõnd sã n wa pʋʋsd d yembre, d tõe n kosa Wẽnnaam tõnd sẽn dat bũmb ninsã fãa. La yaa d tẽeg tɩ yaa a Zeova raabã n segd n pak tõnd n yɩɩda. A Daniɛll kõo mak-sõng rẽ wɛɛngẽ. Israɛll nebã sẽn da wa n namsd b yel-wẽnã yĩngã, a Daniɛll bõosa a Zeova t’a zoe b nimbãanega. A yeela a Zeova woto: “Maan-y y meng yĩng n da bas ye. Tɩ bõe, y tẽnga ne y neba tara y yʋʋre.” (Daniɛll 9:15-19) Rẽ yĩnga tõnd me pʋʋsgã wilgdame tɩ sẽn pak tõnd n yɩɩd yaa t’a Zeova yʋʋrã paam pẽgr la t’a raabã pids bɩ?
10. Wãn to la d mi tɩ pa wẽng tɩ d pʋʋs n kos bũmb nins tõnd sẽn datã?
10 La pa wẽng me tɩ d pʋʋs n kos bũmb nins tõnd sẽn datã ye. Wala makre, d tõe n pʋʋsa wa yɩɩl gʋlsdã, sẽn na yɩl n bãng Wẽnnaam daabã n paase. A pʋʋsa Wẽnnaam woto: “Bɩ y kõ maam bãngr tɩ m gũ yãmb tõogã n sak-a ne m sũur fãa.” (Yɩɩl Sõamyã 119:33, 34; Kolos rãmba 1:9, 10) A Zezi ‘kelmame n pʋʋs ne kosg la nintãm sẽn tõeyã n fãaga yẽ kũum pʋgẽ wã.’ (Hebre dãmba 5:7) A sẽn maan woto wã, a wilgame tɩ d sã n wa be zu-loees pʋsẽ, yaa sõma tɩ d pʋʋs n bõos sõngre. A Zezi sẽn wilg a karen-biisã b sẽn tõe n pʋʋs to-to wã, a wilg-b-la bũmb nins b sẽn tõe n pʋʋs n kose, wala makre, b yel-wẽnã sugri, la rɩɩbo.
11. Wãn to la pʋʋsgã tõe n sõng tõnd tɩ d ra lʋɩ kʋɩɩbg pʋgẽ?
11 A Zezi sẽn wa n wilgd a karen-biisã pʋʋsgã, a wilgame tɩ b tõe n yeela woto me: “Bɩ y ra bas tõnd tɩ d kẽ makr pʋgẽ ye, la bɩ y fãag tõnd wẽng soaba nugẽ.” (Matɩe 6:9-13) A sagla a karen-biisã me tɩ: “Bɩ yãmb gũ la y pʋʋse n da wa kẽ makr ye.” (Matɩe 26:41) Tõnd sã n wa be kʋɩɩbg taoore, pʋʋsgã tara yõodo. Lekollẽ wã bɩ tʋʋmã zĩigẽ, d tõe n wa rat n kɩɩsa Biiblã noyã. Neb sẽn pa a Zeova Kaset rãmb tõe n boola tõnd tɩ d wa naag-b n maan yɛl sẽn pa segd ne kiris-neba. B tõe n yeela tõnd tɩ d maan bũmb sẽn kɩɩsd Wẽnnaam noyã. Wakat kãngã, d segd n tũ a Zezi saglgã, n pʋʋs Wẽnnaam t’a sõng-d tɩ d ra wa kẽ makr pʋgẽ ye. D segd n pʋʋsa nand tɩ yellã wa, la d sã n wa be yellã taoor me.
12. Zu-loe-bʋs yĩng la tõnd tõe n pʋʋse, la d tõe n kɩsa sɩd t’a Zeova na n maana bõe?
12 Rũndã-rũndã, Wẽnnaam nin-buiidã paamda zu-loees buud fãa. Bũmb sẽn namsd bãmb sʋkã neb wʋsg yaa bãasã la yɩɩrã. Zabã la bi-beelmã kɩtame tɩ yɩɩrã paasdẽ. Bao-n-kõ-noorã me lebga toogo. La tõnd sẽn mi t’a Zeova kelgda a sõgen dãmb nins sẽn pʋʋsd-a n gomd yel-kãensã yellã, sɩd kẽngda d pɛlga! Yɩɩl Sõamyã 102:18 gomda a Zeova yell woto: “Bãmb geta namsdba kosgo, bãmb ka paoogd bãmb kosga ye.”
13. a) D tõe n pʋʋsa Wẽnnaam n gom bõe yelle? b) Togs-y pʋg-sad a ye makre.
13 Yaa vẽeneg tɩ d tõe n pʋʋsa a Zeova n wilg-a bũmb ning fãa sẽn tõe n sãam bɩ n maneg tõnd zoodã ne-a, la d moonegã tʋʋmde. (1 Zã 5:14) Tõnd sã n wa rat n kẽ kãadem, bɩ n bao tʋʋma, wall n paas d moonegã tʋʋmde, bɩ d bõos Wẽnnaam sõngr n da yɛɛs ye. Wala makre, Filipin tẽngẽ wã, pʋg-sad a ye n da rat n moond koe-noogã wakat fãa. La a ra pa tar tʋʋm sẽn na yɩl n ges a meng yell ye. A yeela woto: “Yɩɩ ne sibr daar la mam pʋʋs a Zeova n wilg-a tɩ m dat n moondã koe-noogã wakat fãa. Baraar me, m yɩɩ koe-noogã mooneg n seg bi-pʋgl n wilg-a sebre. M pa mi sẽn sɩng to-to tɩ bi-pʋglã yeel maam tɩ: ‘Tẽne wã yibeoog bɩ y reng n kẽng mam lekollẽ wã.’ Rẽ la m sok-a tɩ: ‘Bõe yĩnga?’ T’a wilg maam tɩ b baooda ned t’a wa tʋm bãmb lekollẽ wã tao-tao. M sɩd kẽngame tɩ b rɩk maam tʋʋmd zĩig pʋgẽ. Yɛlã kell n yɩɩ tao-tao bala.” Dũniyã gill zugu, a Zeova Kaset rãmb ka tɛk n yɩ wa pʋg-sad kãngã. Rẽ wã yĩnga, bɩ d pʋʋs Wẽnnaam n wilg-a bũmb nins tõnd sẽn dat ne d sũur fãa wã n da yɛɛs ye!
D sã n maan yel-wẽnde, wãn to la pʋʋsgã tõe n sõng-do?
14, 15. a) Bõe yĩng tɩ baa ned sã n maan yel-wẽnde, a pa segd n bas n pa ye pʋʋsdẽ? b) Ned ning sẽn maana yel-wẽndã meng pʋʋsg toor sẽn ka be, bõe me n tõe n sõng-a t’a maneg a zoodã ne Wẽnnaam?
14 Ned sã n maan yel-wẽnde, wãn to la pʋʋsgã tõe n sõng-a? Yãndã yĩng mii n kɩtame tɩ neb kẽer sẽn maan yel-wẽnd pa rat n le pʋʋs ye. La woto yaool n pa yam tʋʋmd ye. D rɩk makre: Neb nins sẽn wẽnd nasaar sɩlsã miime tɩ b sã n wa tudg sore, b tõe n goma ne neb kẽer sẽn tʋmd sɩlgã yir tɩ b sõng-ba. La sã n wa mik tɩ sẽn wẽnd-a sɩlgã getame tɩ yẽ sẽn tudg sorã yaa yãnd t’a pa rat n bool neb nins sẽn tʋmdb sɩlgã yirã, bõe n na n maane? Yaa vẽeneg tɩ rẽ tõe n waa ne yel-beedo! Woto me, ned sã n maan yel-wẽnd la a zoet yãnd n pa rat n pʋʋs Wẽnnaam, a tõe n paama yɛl a taab n paase. Yãndã pa segd n kɩt tɩ ned bas n pa le pʋʋsd a Zeova ye. Wẽnnaam meng yeta neb nins sẽn maan yel-wẽnã tɩ b pʋʋs-a. No-rɛɛs a Ezai sagla yẽ wakatẽ neb nins sẽn da maan yel-wẽnã tɩ b pʋʋs a Zeova, bala a ‘kõta sugr wʋsgo.’ (Ezai 55:6, 7) La yaa vẽeneg tɩ ned sã n dat t’a Zeova kõ-a sugri, a segd n deng n sika a mengã, n bas a yel-wẽnã, la a tek yam n kos sugri.—Yɩɩl Sõamyã 119:58; Daniɛll 9:13.
15 Ned sã n maan yel-wẽnde, pʋʋsgã leb n tara yõod bʋʋm a to yĩnga. Karen-biig a Zak wilga ned sẽn tõe n maan to-to t’a tẽebã leb n yɩ sõma. A gʋlsame tɩ: “Bɩ a bool Wẽnnaam tẽedba kãsem dãmba, . . . la bɩ bãmb . . . pʋʋs Wẽnnaam a yĩnga. . . . la Zusoaba na yik-a t’a paam laafɩ.” (Zak 5:14, 15) Dẽnd ned ning sẽn maan yel-wẽndã segd n vẽnega a yellã n togs Wẽnnaam, la a tõeeme me n bõos kãsem dãmbã tɩ b pʋʋs a yĩnga. Rẽ na n sõng-a lame t’a lebs n maneg a zoodã ne Wẽnnaam.
Wẽnnaam sẽn leokd pʋʋsg to-to
16, 17. a) Wãn to la a Zeova leokd pʋʋsgo? b) Kiba-bʋs n wilgd tɩ koe-noogã mooneg pʋgẽ, pʋʋsgã sõngda wʋsgo?
16 Wãn to la Wẽnnaam leokd pʋʋsgo? Wakat ninga, a leokda tao-tao la vẽenega. (2 Rĩm dãmba 20:1-6) La wakat kẽere, tõe n kaoosa bilf t’a yaool n leoke, la leokrã me tõeeme n pa yɩ vẽeneg ne tõnd ye. A Zezi sẽn wẽ yel-bũnd n bilg tɩ pʋg-kõor a ye n da kẽnd n pẽdgd bʋ-kaoodã, yaa sẽn na n wilg tɩ wakat ninga, yaa tɩlae tɩ d pʋʋs Wẽnnaam naoor ka tɛka. (Luk 18:1-8) La d mii vẽeneg tɩ tõnd sã n pʋʋsd Wẽnnaam tɩ tat a yam fãa, a pa na n tol n yeel tõnd tɩ: “Da nams maam ye.”—Luk 11:5-9.
17 Naoor wʋsgo, yaa vẽeneg ne a Zeova Kaset rãmbã tɩ Wẽnnaam leokda b pʋʋsgã. La nong n yaa koe-noogã mooneg wakat la rẽ yaa vẽenega. Wala makre, kiris-nin-pogs a yiib n da be Filipin tẽn-kɩreng a yembrẽ n pʋɩt nebã sɛba. B sẽn wa n kõ pag a yembr seb-vãoogo, pagã sũur yɩɩ noog wʋsg hal t’a yeel woto: “Yʋngẽ, mam pʋʋsa Wẽnnaam t’a tʋm ned t’a wa zãms-m Biiblã. Mam tẽedame tɩ Wẽnnaam leoka m pʋʋsgã.” Rẽ poor bilfu, pagã sɩngame n kẽnd a Zeova Kaset rãmbã tigissã. Aazi tẽng a to pʋgẽ me, kiris-ned sẽn yaa rao ra yɛɛsda ne tɩ moon zĩig nins sẽn yaa etaas bɛd tɩ b gũud zĩ-kãens wʋsg tɩ ned yaar pa tõe n kẽ wã. La a pʋʋsa a Zeova, tɩ rẽ kõ-a raood t’a tõog n dʋ etaasã. A wẽe roog a ye kʋɩleng tɩ pag pake. Saam-biigã sẽn wilg a waoongã võorã, pagã nintãm sɩnga rʋʋgre. A yeelame t’a ra sɩng n baooda a Zeova Kaset rãmbã, la t’a pʋʋsa Wẽnnaam t’a sõng-a t’a yã-ba. Saam-biigã sũur yɩɩ noogo, la a sõnga pagã t’a bãng a Zeova Kaset rãmb nins sẽn be zĩig ning yẽ sẽn vɩyã.
18. a) Wẽnnaam sã n leok d pʋʋsgã, bõe la d segd n maane? b) D sã n pʋʋsd wakat fãa, bõe la d na n paame?
18 Pʋʋsgã sɩd yaa zu-noog tɛkẽ! A Zeova sakdame n kelgdẽ la a leokd tõnd pʋʋsgã. (Ezai 30:18, 19) La rẽnda tõnd maag d yĩng n ges sẽn na yɩl n bãng a Zeova sẽn leokd tõnd pʋʋsgã to-to. Pa wakat fãa la a na n leok wa tõnd sẽn datã ye. La sẽn yaa a soab fãa, d sã n wa mik t’a leoka tõndo, bɩ d ra yĩm n pʋʋs-a bark la d pẽg-a ye. (1 Tesalonik rãmba 5:18) Sẽn paase, d tẽegd a Poll saglgã wakat fãa. A yeelame tɩ: “La bũmba fãa pʋga, pʋʋs-y Wẽnnaam n kose la y pʋʋs barka la y wilg Wẽnnaam bũmb nins yãmb sẽn datã.” Bɩ d pʋʋsd Wẽnnaam wakat fãa. D sã n maand woto, tõnd me na n paama bũmb ning a Poll sẽn yeel neb nins sẽn paamd tɩ Wẽnnaam leokd-b pʋʋsgã wɛɛngẽ wã. A yeelame tɩ: “Wẽnnaam laafɩ sẽn yɩɩd neba bãngr fãa na gũ yãmb sũyã la yãmb tagsgo.”—Filip rãmba 4:6, 7.
Y tõe n leokame bɩ?
• Pʋʋsgã yaa buk a wãna?
• Wãn to la d segd n pʋʋse?
• Bõe la d tõe n yeel d pʋʋsgã pʋgẽ?
• Ned sã n maan yel-wẽnde, wãn to la pʋʋsgã tõe n sõng-a?
[Zãmsgã sogsgã]
[Foto rãmba, seb-neng 29]
D sã n pʋʋsd ne d sũur fãa, sõng-d lame tɩ d ra lʋɩ kʋɩɩbg pʋgẽ ye
[Foto rãmba, seb-neng 31]
D tõe n pʋʋsa Wẽnnaam n wilg d yel-pakre, n bõos bũmbu, la d pʋʋs-a barka