“Biribl sẽn tar yʋʋm a wɛ yĩnga”

A WIESLAWA yaa pag a ye sẽn vɩ Poloyn tẽng a ye pʋgẽ. A Zeova Kaset rãmbã sã n da wa wẽ a zakã noor n na n sõs ne-a fãa, a yit n pʋʋs-b-la bark la a yeel-b t’a pa rat n kelg-b ye. La raar a ye, yʋʋm a wɛ biribl yʋʋr sẽn boond t’a Sãmwɛll n wa n wẽ a kʋɩlengã. Biigã ma ra tũud-a lame. So-kãngã wã, a Wieslawa sakame n na n kelg koɛɛgã, la a reega zʋrnall sẽn gomd tẽng zug arzãn yelle.

A Zezi kũumã tẽegr sẽn da kolga yĩnga, a Sãmwɛll yeelame t’a na n tɩ boola a Wieslawa t’a wa kelg tigisg-kãngã sẽn pa wõnd a taabã. A kɩtame t’a ma le yãag-a t’a kẽng paga nengẽ ne boolg sebre. A Wieslawa sẽn yi n mik tɩ biigã maneg n ninga fu-sõma wã, a yeelame t’a bõos tɩ b yals bilf t’a kẽ la a wa. A kẽ n ninga fu-sõma. A sẽn lebg n yi wã, a kelga a Sãmwɛll goamã, n deeg boolgã sebr la a yeel t’a na n waame. A sokame me tɩ: “M segd n waa m ye bɩ, bɩ ne m sɩdã?” La a paas tɩ: “Baa m sɩdã sã n ka na n wa, mam na n waame. Fo yĩnga m na n waame, Sãmwɛlle.” A Wieslawa sɩd waa tigisgã, t’a Sãmwɛll sũurã yɩ noogo.

Sõsgã sasa, a Sãmwɛll zĩnda a Wieslawa sɛɛgẽ, n lakd Biiblã verse rãmb nins b sẽn da sõdgdã n wilgd-a t’a tũudẽ. Rẽ ling-a lame, bala a ra pa tẽed tɩ biigã ra mi woto fãa ye. A sũurã yɩ noog ne tigisgã, la a pẽga b sẽn wilg yɛlã nana-nana t’a tõog n wʋm b võorã. Tigingã nebã sẽn deeg-a to-to wã me yɩ-a-la noogo. Rẽ tɛka, a wilgame t’a rat n bãnga Wẽnnaam n paase, la a sɩngame n wat a Zeova kaset rãmba tigissã wakat fãa. Ad a mengã sẽn yeel sẽn nan pa kaoose: “Yãnd n tar maam masã, m sẽn da pa sakd n kelgd-y pĩndã. Togs sɩda, yaa yʋʋm a wɛ biig yĩng bal la mam sẽn kelg yãmb koɛɛgã. Yaa a Sãmwɛll yĩnga.”

Kom-bɩɩs wʋsg sẽn yaa a Zeova Kaset rãmb pẽgda Wẽnnaam ne b noor goam la ne b manesem wa a Sãmwɛlle. Yãmb sã n yaa bi-biiga, bɩ y bãng tɩ yãmb me tõe n sõnga sẽn sɩd rat-bã tɩ b bao n bãng Wẽnnaam.