‘Maan dũniyã zug wa sẽn maand saasẽ’ wã

“Katolik rãmbã tẽedame tɩ yɛl a naas n gũud ãdem-biisã: Kũum, bʋ-kaoore, bugum-yir la saasẽ.”—Le Catholicisme, a George Brantl sẽn yiisi.

YÃMB sã n gũus n gese, yɛl a naasã b sẽn sõdg tɩ gũud ãdem-biisã sʋka, b pa gom tẽngã yell ye. B sẽn maan woto wã pa lingr ye, bala Katolik Egiliizã neb wala tũudum a taab neb tẽedame tɩ daar n wat tɩ b na n wa sãam tẽngã. Tũudum sebr a yembre (Dictionnaire de Théologie Catholique), wilgda rẽ vẽeneg a gom-zug ning sẽn yet tɩ “Dũniyã saabã” pʋgẽ woto: “Katolik Egiliizã tẽedame la a zãmsd nebã tɩ dũni kãngã Wẽnnaam sẽn naan-a t’a yaa to-to wã pa na n kaoos wakat sẽn pa sat ye.” Katesism zãmsg sẽn pa kaoos pʋgẽ, b yeela woto: “Tõnd dũniyã . . . na n wa sãamame.” La tõnd tẽngã sã n na n sɩd sãamame, wãn to la Biiblã sẽn kãab tɩ tẽngã na n lebga arzãnã na n pidsi?

Biiblã yeta vẽeneg tɩ tẽngã na n wa lebga arzãna. Wala makre no-rɛɛs a Ezai bilga  tẽngã ne a nebã n yeel woto: “B na n mee zags n zĩnd b pʋsẽ. Bãmb na n sela tɩɩse n dɩ b biisã. Bãmb ka na n me yir tɩ ned a to reeg n kẽ ye. Bãmb ka na n sel tɩɩs tɩ ned a to reeg n wob ye. Tɩ bõe, mam neba na n kaoosa wa tɩɩse. La neb nins mam sẽn yãka na n paama b tʋʋma nafre.” (Ezai 65:21, 22) Zʋɩf rãmb nins Wẽnnaam sẽn kãab bõn-kãensã wã ra kɩsa sɩd tɩ b soolmã la tẽngã gill me da na n wa yɩɩ arzãn tɩ ãdem-biisã vɩɩmd a zug wakat sẽn pa sate.

Yɩɩl Sõamyã 37 soabã wilgdame tɩ saag-kãng sɩd yaa sɩda. A yetame: “Sũ-maasem dãmba na n sooga dũniyã.” (Yɩɩl Sõamyã 37:11) Verse kãngã pa gomd Israɛll neb nins sẽn da lebg n wa Kãabg Tẽngã n na n vɩɩmd wakat bilf pʋgẽ wã yell bal ye. Yɩɩn-kãng togsa woto: “Nin-tɩrs na n sooga dũniyã la bãmb na n zĩnda a zug wakat sẽn ka sɛta.” (Yɩɩl Sõamyã 37:29) Ges-y tɩ yɩɩn-kãngã yetame tɩ vɩɩm sẽn pa satã tẽng zug yaa keoor b sẽn na n kõ “sũ-maasem dãmbã.” B wilga verse kãngã võor n yeel tɩ gom-biig ning sẽn yaa “sũ-maasem dãmbã” “võor tagmame n yɩɩd a sẽn pukd to-to Biibl dãmbã b sẽn lebgã pʋsẽ wã. A gomda nimbãan dãmbã b sẽn namsd a Yahweh [a Zeova] yʋʋrã yĩnga, sik-m-mens rãmbã sẽn sakd Wẽndã yell me.”

Tẽng zug bɩ saasẽ?

A Zezi Tãng zug Zãmsgã pʋgẽ, a maana kãabg sẽn tẽegd tõnd goam nins sẽn be verse nins d sẽn sõdg yĩngrã pʋgẽ wã. A yeelame tɩ: “Bark bee sũ-maasem dãmba zutu, tɩ bõe, bãmb na soog dũniyã.” (Matɩe 5:5) Ka me, tẽngã yaa keoor sẽn kaoosd wakat fãa yĩng b sẽn kõ wẽn-zoɛtbã. La a Zezi ra wilga a tʋm-tʋmdbã vẽeneg t’a na n tɩ segla zĩig b yĩng a “Ba yiri,” la tɩ b na n wa zĩnda ne yẽ saasẽ. (Zã 14:1, 2; Luk 12:32; 1 Pɩɛɛr 1:3, 4) Sã n yaa woto, bark nins sẽn na n zĩnd tẽngã zugã võor yaa bõe masã? Rẽ yĩnga bark kãens tara yõod rũndã-rũndã bɩ, la yaa ãnd dãmb n na n paam-ba?

Biibl mitb wʋsg yetame tɩ “dũniyã” bɩ tẽngã yell b sẽn gom a Zezi Tãng zug zãmsgẽ wã ne Yɩɩl Sõamyã 37 soabã pʋgẽ wã me yaa makr bala. Biibl a yembr (Bible de Glaire) pʋgẽ, a Vigouroux yeelame tɩ verse kãensã gomda yɛl sẽn “makd saasã la Egiliizã yelle.” Sã n yaa ne Fãrens ned a Lagrange sẽn yaa Biibl mitã, bark kãngã “pa kãabg sẽn dat n yeel tɩ sũ-maasem dãmbã na n soogã tẽngã b sẽn vɩ a zugã, zãmaan-kʋdr kãngã bɩ zãmaan paalg sẽn zems zãng sẽn wat pʋgẽ ye, la a võorã yaa saasẽ rĩungã, baa zĩ-kãng sẽn beẽ zĩig ning fãa.” Sã n yaa ne Biiblã mit a to, “yaa tẽng zug yɛlã la b rɩk n mak ne saasẽ yɛla.” La ne neb a taab me, “b rɩka Kana sẽn yaa kãabg tẽngã, n mak ne Wẽnnaam saasẽ rĩungã b sẽn na n wa kõ sũ-maasem dãmbã. Makr ning sẽn be Yɩɩl Sõamyã 37 pʋgẽ wã la zĩis a taabã me võor yaa woto.” La d segd n yɩɩ tao-tao n tags tɩ Wẽnnaam pa kãab tɩ tẽngã na n lebga arzãn bɩ?

Raab sẽn pa sat tẽngã yĩngã

Sɩngrẽ wã, Wẽnnaam daabã ne ninsaalbã ra tara loees ne tẽngã. “Saasẽ yaa Zusoabã n so, la b kõo ninsaalba dũniyã.” (Yɩɩl Sõamyã 115:16) Woto, Wẽnnaam pipi raabã ne ãdem-biisã ra yaa tɩ b vɩɩmd tẽngã zutu, la pa saasẽ ye. A Zeova kõo pipi raoã ne a pagã tʋʋmde, n yeel-b tɩ b yalg Edɛn zẽedã tẽngã gill zugu. (Sɩngre 1:28) Ra pa na n yɩ woto wakat a wãn bal ye, bala a Zeova togsa a Gomdã pʋgẽ tɩ tẽngã na n paa wakat sẽn pa sate. A yeela woto: “Zamaan a yembr loogdame tɩ zamaan a to wa, la dũniyã ket n paada wakat fãa.”—Koɛɛg Soaba 1:4; 1 Kibaya 16:30; Ezai 45:18.

 Wẽnnaam kãabsã zɩ n vaal pidsg ye, bala yaa yẽ n yaa Sẽn ka to soabã, la a kɩtdame t’a kãabsã sɩd pidsdẽ. Biiblã rɩka makr ne koomã sẽn gilgd n wat to-to wã, n wilg tɩ Wẽnnaam kãabsã pidsg yaa waaziba, n yeele: “Tɩ bõe, wa saag sẽn niid la sapɩlem sẽn yit yĩngr n sigd n ka lebd be t’a ka zãgs tẽnga ne koom n kɩt t’a bõn-biis bul n yi, . . . woto me, gomd ninga sẽn yit mam noorẽ wã [Wẽnnaam gomdã pʋgẽ] ka na n le wa mam nengẽ zaalem ye. A na n maana bũmb ninga mam sẽn datã. La a na n tõoga bũmb ninga mam sẽn tʋm-a t’a tɩ maanã.” (Ezai 55:10, 11) Wẽnnaam kãabda ninsaalbã bũmbu. Tõe n kaoosame tɩ kãab-kãens yaool n wa pidsi, la b zɩ n vaal pidsg ye. Bũmb nins fãa a sẽn kãabda pidsdame.

A Zeova sũur yɩɩ noog a sẽn naan tẽngã ãdem-biisã yĩngã. Naanegã rasem a yoob-n-soabã baasgẽ, a yeelame tɩ bũmb ning fãa a sẽn naanã yaa “sõama wʋsgo.” (Sɩngre 1:31) Tẽngã sẽn na n wa lebg arzãn wakat sẽn pa satã naaga Wẽnnaam kãabs nins sẽn nan pa pidsã sʋka. Baasg zãnga, Wẽnnaam kãabsã ‘ka na n le wa a nengẽ zaalem ye.’ Kãabs nins fãa sẽn yet tɩ nebã na n paama vɩɩm sẽn zems zãng tẽng zugu, tɩ ninsaalbã na n vɩɩmd wakat sẽn pa sat a zug ne laafɩ la bãanã na n pidsame.—Yɩɩl Sõamyã 135:6; Ezai 46:10.

Wẽnnaam daabã pidsg pa be sãmbg ye

Tõnd pipi yaab rãmb a Ãdem ne a Hawa yel-wẽndã kɩtame tɩ Wẽnnaam sẽn yãk yam n na n kɩt tɩ tẽngã lebg arzãnã pa pids zĩig pʋgẽ ye. B kɩɩsgã poore, Wẽnnaam rig-b lame n yiis arzãnẽ wã. Rẽ n so tɩ b kong zu-noog ning b sẽn da tar n na n naag n pids Wẽnnaam daabã sẽn yaa a kɩt tɩ ninsaalb sẽn zems zãng vɩɩmd tẽng zug arzãn pʋgẽ wã. La Wẽnnaam dɩka segls sẽn na yɩl n pids a raabã. Wãn to?—Sɩngre 3:17-19, 23.

Yell ning sẽn maan Edɛnnã wõnda ned sẽn sɩng roog meeb zĩig sẽn yaa sõma zugu. A sẽn yẽbg roogã bal la ned a to sẽn wa n sãam yẽbgrã. La roogã soab pa raag a meebã n bas ye. A rɩka segls n na n kɩt tɩ roogã me n baase. Baa rẽ sã n na n kɩtame t’a yiis ligd n paase, a pa na n bas a roogã meeb ye.

Woto me, Wẽnnaam maana fãa sẽn na yɩl t’a raabã sɩd pidsi. Tõnd pipi roagdbã sẽn maan yel-wẽndã poor bala, a togsame tɩ saagr n be bãmb kambã ne b yagensã yĩnga. Yaa “yageng” n da na n wa kɩt tɩ wẽngã b sẽn maanã biis sa, tɩ rẽ wa ne yolsgo. Bãngr-gom-kãng pidsgã pʋgẽ, yagengã reng n yaa Wẽnnaam Biribl a Zezi sẽn wa tẽng zug la a rɩk a vɩɩmã n kõ tɩ yɩ maoong n da ãdem-biisã. (Galat dãmba 3:16; Matɩe 20:28) A Zezi sẽn vʋʋg n leb saasẽ wã poore, a wa n lebga Wẽnnaam Rĩungã Rĩma. Yaa yẽ n yɩ pipi sũ-maasem soab ning sẽn na n soog tẽngã. Wẽn-sakdb nins b sẽn tũus tɩ b na n vʋʋg n tɩ rɩ naam saasẽ ne yẽ Rĩung kãng pʋgẽ wã me na n sooga tẽngã. (Yɩɩl Sõamyã 2:6-9) Wakat n da na n wa zĩnd tɩ goosneema kãng na n ges tẽng zug yɛlã yelle, sẽn na yɩl n pids Wẽnnaam pipi raabã la a kɩt tɩ tẽngã lebg arzãna. Sũ-maasem dãmb ka tɛk n soogd “dũniyã” bɩ tẽngã, b sẽn dɩt a Zezi Kirist ne a na-rɩt-n-taasã naamã nafa yĩnga.—Sɩngre 3:15; Daniɛll 2:44; Tʋʋma 2:32, 33; Wilgri 20:5, 6.

‘Dũniyã zug wa sẽn maand saasẽ’

Fãagr kãngã sẽn tar bugs a yiibã, sẽn dat n yeel tɩ saasẽ vɩɩmã la tẽng zug vɩɩmã, yaa bũmb tʋm-tʋmd a Zã sẽn yã vẽnegr Wẽnnaam sẽn kõ-a pʋgẽ. A yãa rĩm dãmb sẽn zao naam gɛy saasẽ. Yaa rĩm dãmb  b sẽn tũus Kirist karen-bi-sakdbã sʋka. Biiblã togsda vẽeneg tɩ Kirist na-rɩt-n-taas kãensã “na n dɩɩ naam dũniyã zugu.” (Wilgri 5:9, 10) Ges-y Wẽnnaam sẽn na n pids a raabã sẽn tar nens a yiibã to-to. A na n kɩtame tɩ tẽngã lebg arzãnã, ne saasẽ Rĩungã sẽn yaa a Zezi Kirist ne a na-rɩt-n-taasã naam maasem. Segl-kãensã fãa Wẽnnaam sẽn dɩkã na n kɩtame tɩ tẽngã gill lebg Arzãna, tɩ zems ne Wẽnnaam pipi raabã ne tẽngã.

Pʋʋsg ning a Zezi sẽn zãms a karen-biisã pʋgẽ, a yeela a karen-biisã tɩ b pʋʋs tɩ Wẽnnaam daabã ‘maan dũniyã zug wa a sẽn maand saasẽ’ wã. (Matɩe 6:9, 10) Tẽngã sã n na n sãam bɩ a sã n da makd saasã bala, Biiblã gom-kãensã ra na n talla võor bɩ? Woto me, nin-tɩrsã fãa sã n na n kẽnga saasẽ, gom-kãensã ra na n talla võor bɩ? D sã n karem Gʋlsg Sõamyã, d neeme tɩ Wẽnnaam daabã ne tẽngã yaa vẽenega, sẽn sɩng ne naanegã kibar n tɩ ta Wilgr sebrã sẽn yaa yɛl pukr sebrã. Tẽngã na n wa yɩɩ arzãn wa Wẽnnaam sẽn da rat t’a yɩ to-to wã. Yaa woto la Wẽnnaam kãab t’a na n maane. Wẽn-sakdb nins sẽn be tẽng zugã pʋʋsdame tɩ raab kãng pidsi.

Wẽnnaam sẽn yaa Naandã la a ‘pa tekdã’ ra sɩng n datame tɩ nebã vɩɩmd wakat sẽn pa sat tẽngã zugu. (Malaki 3:6; Zã 17:3; Zak 1:17) Sẽn yɩɩd yʋʋm koabga, zʋrnall kãngã, sẽn dat n yeel tɩ Gũusg Gasgã wilga Wẽnnaam daabã pidsg nen-kãensã a yiibã võore. Rẽ sõngda tõnd tɩ d bãng b sẽn yet Gʋlsg Sõamyã pʋgẽ tɩ tẽngã na n wa lebga arzãnã võore. Sẽn na yɩl n bãng yel-kãngã n paase, bɩ y sõs ne a Zeova Kaset rãmbã, wall y gʋls zʋrnall kãngã yiisdbã.

[Foto, seb-neng a 4]

Biiblã yeta vẽeneg tɩ tẽngã na n wa lebga arzãna

[Foto, seb-neng a 7]

Tẽngã sã n na n sãamame, pʋʋsg ning a Zezi sẽn zãms a karen-biisã tara võor sɩda?