Tẽeb la wẽn-zoeer kɩtdame tɩ ned tall raoodo
Tẽeb la wẽn-zoeer kɩtdame tɩ ned tall raoodo
“Nang pãng la f keng f sũuri . . . tɩ f Zusoab a Wẽnnaam bee ne foom”—ZOZUE 1:9.
1, 2. a) Ne ninsaal tagsgo, Israɛll nebã ra tõe n tõoga Kanaã nebã bɩ? b) Bõe la Wẽnnaam yeel a Zozue tɩ kɩt t’a gãneg a yam?
YƲƲMD 1473 sẽn deng a Zezi rogmã, Israɛll nin-buiidã ra segla b mens n sa n na n kẽ Kãabg Tẽngã. A Moiiz tagsa zu-loees nins b sẽn na n segã yell n yeel nebã woto: “Rũndã, yãmb na n dʋʋga Zʋrdẽ kʋɩlgã n tɩ tõog buud sẽn yɩɩd yãmba n deeg b tẽn-kãsemsa sẽn tar lal-bɛdã. Nin-bãmb yaa bɛda la wogdo. Yaa Anak neba. Yãmb bãnga bãmb sẽn yaa bũmb ninga tɩ b gomd b yell n yetẽ tɩ: Yaa ãnda n tõe n yals ne a Anak yagensã?” (Tõodo 9:1, 2) Nin-kãensã sẽn da yaa nin-wobd la zabr gãndaadã yʋy sɩd ra yii wʋsgo. Sẽn paase, Kanaã tẽns kẽer sodaas ra tara kut saar dãmb tɩ b naoã tar sʋʋse.—Bʋkaoodba 4:13.
2 La Israɛll nebã yẽ ra yɩɩ yembse. Sẽn paase, yaa b sẽn da nan yit we-raoogã pʋgẽ b sẽn zĩnd yʋʋm pis-naasã la woto. Rẽ kɩtame tɩ sã n yaa ne ninsaal tagsgo, b ra pa tõe n tõog zabrã ye. La ne rẽ fãa, a Moiiz ra tara tẽebo. Ra yaa wa a nee a Zeova sẽn be b taoor n yãagd-ba. (Hebre dãmba 11:27) A yeela nin-buiidã woto: “Zusoab a Wẽnnaam na n lʋɩɩ yãmb taoor . . . n menes-ba n kɩt tɩ y tõog-ba.” (Tõodo 9:3; Yɩɩl Sõamyã 33:16, 17) A Moiiz kũumã poore, a Zeova wilga a Zozue t’a ket n bee ne-ba, n yeel-a woto: “Yik n peeg nebã n dʋʋg kʋɩlgã n kẽng tẽng ninga mam sẽn da kõ Israɛll yagensã. Ned ka be sẽn na n tõog n yals fo taoor ye. Mam na n zĩnda ne foom wa mam sẽn da be ne a Moiizã, mam ka na n bas foom lɛ-lɛ ye.”—Zozue 1:2, 5.
3. Bõe n sõng a Zozue t’a tall tẽeb la raoodo?
3 A Zozue sã n da rat n paam tɩ Wẽnnaam a Zeova sõng-a la a wilg-a sore, a ra segd n karemda Wẽnnaam Tõogã la a tũud bũmb ning a sẽn karemdã. A Zeova yeel-a lame: “Yaa woto la f zug na n yɩ noog tɩ f tõog ne tʋʋmã. Mam ka yeel foom tɩ f nang pãng la f keng f sũuri, la f ra zoe rabeem la f ra yɛɛs tɩ f Zusoab a Wẽnnaam bee ne foom fo sẽn dabd zĩis ninsa fãa sɩda?” (Zozue 1:8, 9) A Zozue sẽn deeg Wẽnnaam goamã yĩnga, a talla pãng la raood n tõog a tʋʋmdã. La baasgo, a Zozue rog-taas wʋsg pa kelg Wẽnnaam ye. Rẽ kɩtame tɩ b ki we-raoogã pʋgẽ n pa kẽ Kãabg Tẽngẽ wã ye.
Nin-buiid sẽn pa tar tẽeb komsa raoodo
4, 5. a) Wãn to la neb piigã sẽn tũ n tɩ ges tẽngã tagsg yɩ toor ne a Zozue la a Kalɛɛb rẽndã? b) A Zeova yeela nin-buiidã sẽn pa tall tẽebã tɩ bõe?
4 Yʋʋm 40 sẽn looge, Israɛll nebã ra kolga Kanaã t’a Moiiz tʋm neb 12 tɩ b tɩ soos n ges tẽngã sẽn yaa to-to. La b sẽn lebg n wa wã, bãmb 10 n wilg tɩ b yaeesame. B yeelame: “Tõnd ka tõe n zab ne tẽn-kãng neba ye. Tɩ bõe, bãmb pãng yɩɩda tõndo.” La b paas tɩ bãmb ‘sẽn yã neb nins be wã yaa wogdo, la b yãa a Anak yagensã sẽn yaa nin-wobdã be. La b sẽn yã bãmbã, bãmb lebga wa sʋy b taoore.’ La rẽ yĩnga yaa Kanaã nebã fãa n da yaa nin-wogd bɩ ra yaa a Anak yagensã bala? Sɩd-sɩda, ra pa tẽngã neb fãa la nin-wogd ye. La rẽ yĩnga a Anak yagensã ra yaa nin-wobd nins sẽn zĩnd sẽn deng sãoong sa-kãsengã yagens bɩ? Ayo, rẽ me yaa ziri. La b sẽn yag ziri woto wã, kẽesa neb wʋsg rabeem tɩ kẽer meng da rat n leb Ezipti, tẽng ning b sẽn da yɩẽ yembsã.—Sõdbo 13:31–14:4.
5 La a Zozue ne a Kalɛɛb yẽ sẽn da tũ n tɩ ges Kãabg Tẽngã ra rata ne b sũy fãa n kẽ a pʋgẽ. B yeela woto: “[Kanaã nebã] na n yɩɩ tõnd dɩɩbo. Bãmb ka le tar maasem ye. Zusoaba bee ne tõndo, ra zoe-y rabeem ye.” (Sõdbo 14:9) Rẽ yĩnga a Zozue ne a Kalɛɛb sẽn da tẽed tɩ Israɛll na n tõoga Kanaã nebã, yaa yalemd bɩ? Ayo. Bala bãmb ne nin-buiida fãa ra yãa a Zeova sẽn tʋm tood piig Ezipt sẽn da yaa tẽng sẽn tar pãng wʋsgã zug n ning-a yãnde, n paoog a wẽnnaam dãmbã. Rẽ poore, b yãa a Zeova sẽn bõr a Faraõ ne a tãb-biis kʋʋngã Mog-miuugã pʋgẽ. (Yɩɩl Sõamyã 136:15) Vẽenega, neb piigã sẽn tũ n tɩ ges tẽngã sẽn yaeesã n paas neb nins fãa sẽn tẽ b goamã n maan dabeemã pa tar bʋʋm ye. A Zeova sũur sãama ne-b wʋsg hal tɩ kɩt t’a yeel woto: “Dabʋr la b na n tẽ maam, baa ne bõn-bãn nins mam sẽn maan b sʋkã?”—Sõdbo 14:11.
6. Bõe yĩng tɩ d tõe n yeel tɩ tẽeb la raood tũuda taaba, la wãn-wãn la d ne rẽ rũndã-rũndã?
6 A Zeova wilga yellã yẽgre. A yeelame tɩ nin-buiidã sẽn yaeesã wilgdame tɩ b pa tẽ yẽ ye. N-ye, tẽeb la raood sɩd tũuda taaba. Rẽ n so tɩ tʋm-tʋmd a Zã lɛtr ning pʋgẽ a sẽn gom kiris-neb tigingã la b tẽebã zabr yellã, a yeel woto: “Yaa tõnd tẽeb n tõogd dũniyã.” (1 Zã 5:4) Rũndã-rũndã, yaa a Zozue ne a Kalɛɛb tẽebã buud n kɩt t’a Zeova Kaset rãmbã sẽn yɩɩd bãmb milyõ a yoobã moond Rĩungã koe-noog dũniyã gill zugu. Kaset rãmb kãensã sʋka, kamb la kãsemba, sẽn tar-b keelem la sẽn pa tar-b keelem bee be. Bɛ baa a ye pa tõog n kɩt tɩ tãb-biis kʋʋng kãngã sẽn tar daoodã bas koɛɛgã mooneg ye.—Rom dãmba 8:31.
Da ‘targ-y’ n leb-y poorẽ ye
7. “Targ” rat n yeelame tɩ bõe?
7 Rũndã-rũndã, a Zeova sõgen dãmbã moonda koe-noogã ne raoodo, bala b tagsda wa tʋm-tʋmd a Polle, a sẽn gʋls woto wã: “Tõnd ka neb nins sẽn na n targ n sãamã ye, tõnd yaa neb nins sẽn tẽed n paamd sɩɩg fãagrã.” (Hebre dãmba 10:39) ‘Targr’ ning yell a Poll sẽn gomd ka wã pa rabeem f sẽn mi n maand wakat ningã bal ye. Bala, sasa kẽere, Wẽnnaam sõgen dãmb wʋsg sẽn sɩd yɩ sakdb me zoeya rabeem. (1 Sãmwɛll 21:13; 1 Rĩm dãmba 19:1-4) Biiblã gom-biis võor sebr a ye yeelame tɩ ‘targã’ rat n yeelame tɩ “bas sɩdã.” A paasame tɩ b tõe n maka ‘targrã’ ne batayo sẽn wat n dat n yals n boogd a kẽndã tʋʋlmã, tɩ rẽ rat n yeel tɩ maag Wẽnnaam tʋʋmdã pʋgẽ n wa bas fasɩ. Vẽenega, neb nins tẽeb sẽn tar pãngã pa basd tɩ bãaga, namsg b tẽebã yĩng wall yɛl a taab kɩt tɩ b targ bɩ n maag ye. B ket n kẽngda taoor ne a Zeova raabã maanego, n miẽ tɩ b yell pak-a lame, la t’a mii b pãn-tõogã sẽn tekẽ. (Yɩɩl Sõamyã 55:23; 103:14) Rẽ yĩnga yãmb tara tẽeb kãngã buud bɩ?
8, 9. a) Wãn-wãn la a Zeova keng pipi kiris-nebã tẽebo? b) Bõe la d tõe n maan n keng d tẽebã?
8 Wakat n da wa n zĩnd t’a Zezi tʋm-tʋmdbã yã tɩ b tẽebã paoodame, tɩ b yeel a Zezi woto: “Bɩ y paas tõnd tẽebo.” (Luk 17:5) Karen-biisã paama bũmb ning b sẽn kos ne pʋ-peelmã. Sẽn yɩɩd fãa, yʋʋmd 33 Pãntekotã raar b sẽn paam vʋʋsem sõngã b sẽn da pʋlem-bã, sõng-b lame tɩ b wʋm Wẽnnaam Gomdã la a raabã võor sõma. (Zã 14:26; Tʋʋma 2:1-4) Karen-biisã tẽeb pãng paasame tɩ b sɩng koɛɛgã moonego, la baa ne gɩdgrã fãa, b moona koe-noogã “dũniyã fãa.”—Kolos rãmba 1:23; Tʋʋma 1:8; 28:22.
9 Sẽn na yɩl n keng d tẽebã la d ket n nangd pãng ne koe-moonegã, tõnd fãa segd n karemda Wẽnnaam Gomdã la d bʋgsd a zugu, la d pʋʋsd Wẽnnaam n kot a vʋʋsem sõngã. Wala a Zozue, a Kalɛɛb la pipi kiris-nebã sẽn maanã, yaa d sẽn na n bas tɩ Wẽnnaam Gomdã kẽ d sũurã la d yamã sõma bala, la d na n tall tẽeb buud ning sẽn na n kɩt tɩ d paam daood n tõog d tẽebã zabrã pʋgẽ.—Rom dãmba 10:17.
Tẽ tɩ Wẽnnaam beeme bal pa sek ye
10. Tẽeb hakɩkã baoodame tɩ ned maan bõe?
10 Wala pĩnd wẽndẽ wẽn-sakdb kẽer kibay sẽn be Biiblã pʋgẽ sẽn wilgdã, tẽeb ning sẽn kɩtd tɩ ned tall raoodã pa tek tẽ tɩ Wẽnnaam beeme bal ye. (Zak 2:19) Tẽeb kãng buudã baoodame tɩ d bãng a Zeova mengã sõma la d kɩs-a sɩd ne d sũy fãa. (Yɩɩl Sõamyã 78:5-8; Yelbũna 3:5, 6) A baoodame tɩ d tẽ ne d sũur fãa tɩ Wẽnnaam noyã tũub sɩd nafda tõndo. (Ezai 48:17, 18) Tẽeb leb n baoodame tɩ f kɩs sɩd zãng-zãng t’a Zeova na n sɩd pidsa a kãabsã n lebg “neb nins sẽn baood [yẽ wã] roanda.”—Hebre dãmba 11:1, 6; Ezai 55:11.
11. Wãn-wãn la a Zozue ne a Kalɛɛb paam bark b sẽn tall tẽeb la raoodã yĩnga?
11 Tẽeb-kãng buudã bɩt n paasdame. D sã n tũud sɩdã n lemb a yõodã la d neẽ t’a Zeova leokda d pʋʋsgã, la t’a wilgd-d-la sor ne manesem toor-toore, d tẽebã bɩtame n paasdẽ. (Yɩɩl Sõamyã 34:9; 1 Zã 5:14, 15) D tõe n kɩsa sɩd t’a Zozue ne a Kalɛɛb sẽn da lemb Wẽnnaam sõmblmã, paasa b tẽebã pãnga. (Zozue 23:14) Wala makre, yʋʋm 40 b sẽn yeeb we-raoogã pʋgẽ wã, b yãame tɩ Wẽnnaam kell n kogl-b-la wa a sẽn da kãabã. (Sõdbo 14:27-30; 32:11, 12) B yiibã fãa lʋɩya taoor Kanaã tẽngã reegr zabr sẽn kaoos yʋʋm a yoobã pʋgẽ. Sẽn na n baase, b talla yĩns keelem, la b vɩɩmd sũ-noog pʋgẽ. Hal menga, b ned kam fãa paama tẽng tɩ yɩ a pʋɩɩre. Sɩd-sɩda, a Zeova ningda neb nins sẽn balemd-a ne tẽeb la raoodã bark wʋsgo.—Zozue 14:6, 9-14; 19:49, 50; 24:29.
12. Wãn-wãn la a Zeova ‘kɩtd t’a goamã yɩɩg a yʋʋrã’?
12 Wẽnnaam sẽn tall nonglem ning ne a Zozue la a Kalɛɛbã tẽegda tõnd yɩɩl-gʋlsdã goama. A yeela Wẽnnaam a yɩɩll a ye pʋgẽ woto: “Yãmb kɩtame tɩ y goamã yɩɩg y yʋʋrã.” (Yɩɩl Sõamyã 138:2) A Zeova sã n wẽen ne a yʋʋrã t’a na n maana bũmbu, a kɩtdame t’a sẽn yeelã ‘yɩɩg a yʋʋrã,’ bala a pidsd-a lame tɩ yɩɩg b sẽn da tẽedã menga. (Efɛɛz rãmba 3:20) N-ye, a Zeova zɩ n sãam neb nins sẽn ‘maand sũ-noog’ a yĩngã sũy ye.—Yɩɩl Sõamyã 37:3, 4.
Rao sẽn ta Wẽnnaam yam
13, 14. Bõe yĩng t’a Enok ra segd n tall tẽeb la raoodo?
13 Kaset soab a to me n zĩnd sẽn deng kiris-nebã zãmaan n kõ mak-sõng tẽeb la raood tallgã wɛɛngẽ. Yaa a Enoke. D sã n vaees a kibarã, d na n dɩka yam wʋsgo. Nand meng t’a Enok sɩng a bãngr-goamã taasgo, a ra zoe n miime t’a tẽebã la a raoodã na n paama makre. A maana wãn n bãng rẽ? Bala Wẽnnaam a Zeova ra yeela Edɛn tɩ beem n na n zĩnd sẽn be-b yẽ poorẽ wã la sẽn be-b a Sʋɩtãan poorẽ wã sʋka. (Sɩngre 3:15) A Enok leb n da miime tɩ tẽngã zugu, beem kãng sɩnga a Kayẽ sẽn kʋ a yao a Abɛllã tɛka. Sãmbg sẽn ka be, a Enok rogmã zugẽ, a Kayẽ ne a Abɛll ba a Ãdem kell n vɩɩmda yʋʋm 310 n yaool n ki.—Sɩngre 5:3-18.
14 Baa ne a Enok sẽn da mi yel-kãensã fãa wã, a kell n “tũu Wẽnnaam” ne raood n wilg nebã tɩ Wẽnnaam a Zeova na n wa kaoa b bʋʋdo, “pʋto-goam” nins fãa b sẽn gom Wẽnnaamã yĩnga. (Sɩngre 5:22; Ziid 14, 15) Wõnda wa a Enok sẽn teel tũudum hakɩkã ne raood woto wã, kɩtame t’a ra tar bɛɛb wʋsg sẽn dat n kʋ-a. Wakat kãnga, a Zeova kogla a no-rɛɛsã t’a pa bãng kũum toom ye. A Enok sẽn paam kaset t’a ‘taa Wẽnnaam yamã’ poore, a Zeova ‘zẽk-a lame’ bɩ a yiis-a-la nin-vɩɩs sʋka. Tõe t’a Zeova vẽnega a Enok t’a yã bark nins a sẽn na n wa paamã wa zãmsd pʋgẽ la a kell n kɩt t’a ki.—Hebre dãmba 11:5, 13; Sɩngre 5:24.
15. Mak-sõng bʋg la a Enok kõ a Zeova rũndã-rũndã sõgen dãmbã?
15 A Poll sẽn gom a Enok kũumã yellã poor bala, a wilga tẽebã yõod sẽn ta zĩig ninga, n yeel tɩ “tẽeb sã n kaẽ, ned ka tõe n ta Wẽnnaam yam ye.” (Hebre dãmba 11:6) N-ye, a Enok sẽn tall tẽebã yĩng kɩtame t’a tall raood n tũ a Zeova la a moon a wakatẽ wẽn-kɩɩsdbã a Zeova bʋ-kaoorã koɛɛga. A kõo tõnd mak-sõngo. Tõnd me tara bʋ-kaoor koɛɛg d sẽn segd n moon dũni sẽn yaa wẽng wʋsg la sẽn kis tũudum hakɩkã pʋgẽ.—Yɩɩl Sõamyã 92:8; Matɩe 24:14; Wilgri 12:17.
Wẽn-zoeer kɩtdame tɩ ned tall raoodo
16, 17. A Abdias ra yaa ãnda, la yel-bʋs pʋgẽ la a ra be?
16 Sẽn paas tẽebã, bũmb a to me sẽn tõe n kɩt tɩ ned tall raood yaa wẽn-zoeer hakɩkã. D ges wẽn-zoɛt a ye mak-sõngo. A vɩɩmda no-rɛɛs a Eli la rĩm a Akaab sẽn yɩ Israɛll sẽn yaa rɩtg rĩungã rĩmã zamaanẽ. A Akaab naamã wakate, rɩtg rĩungã soolmẽ, a Baal balengã ra paama pãng wʋsgo. Sɩd me, a Akaab pag a ‘Zezabɛll da rɩlgda’ a Baal no-rɛɛsdb 450, la ra-luk b sẽn da pees tɩ wõnd raoolem n balemdẽ wã no-rɛɛsdb 400.—1 Rĩm dãmba 16:30-33; 18:19.
17 A Zezabɛll sẽn da kis a Zeova wʋsgã yĩnga, a makame n na n menems tũudum hakɩkã tẽngã pʋgẽ. A kʋʋ a Zeova no-rɛɛsdb kẽere, la a mak meng n na n kʋ a Eli tɩ Wẽnnaam kɩt t’a zoe n dʋʋg Zʋrdẽ kʋɩlgã n tɩ solge. (1 Rĩm dãmba 17:1-3; 18:13) Tags-y n ges-y tũudum hakɩkã teelg sẽn da segd n yaa toog rɩtg rĩungã soolmẽ to-to. Sẽn da yaa yell meng n yɩɩd yaa f sẽn da na n tʋmd na-yirã. Wẽn-zoɛt a Abdias * sẽn da yaa rĩm a Akaab sõgen-kãsengã yaool n da tʋmda be.—1 Rĩm dãmba 18:3.
18. Bõe n wilgd t’a Abdias yɩɩ a Zeova balemd hakɩka?
18 Yaa vẽeneg t’a Abdias sẽn da balemd a Zeova wã, a ra segd n talla yam la a yɩ gũusda. La a kell n saka a Zeova bala. Sɩd me, 1 Rĩm dãmba 18:3 yeelame t’a ‘Abdias zoeta Zusoaba wʋsgo.’ N-ye, a Abdias sɩd yɩɩ wẽn-zoɛt hakɩka. A wẽn-zoeerã kɩtame t’a tall raoodo. Bũmb ning a sẽn maan a Zezabɛll sẽn wa n kʋ a Zeova no-rɛɛsdbã sɩd wilgda a raoodã.
19. Wãn-wãn la a Abdias wilg a raoodo?
19 Biiblã yeela woto: “Wakat ning a Zezabɛll sẽn kʋ Zusoaba no-rɛɛsdbã, a Abdias ra peega bãmb neb koabg n tɩ solg pis-nu-nu tãens bogd pʋsẽ n kẽnd n kõt-b koom ne rɩɩbo.” (1 Rĩm dãmba 18:4) Wala y sẽn mi wã, solg n dɩlg neb koabg yaa tʋʋm-toogo, la ra tõe n tũu ne a yõor me. A ra segd n gũusame tɩ rĩm a Akaab ne a Zezabɛll ra wa bãng n yõk-a, la tɩ ziri no-rɛɛsdb bãmb 850 wã fãa sẽn da wat na-yirã me ra bãng ye. Rẽ toor sẽn ka be, Israɛll neb nins fãa sẽn da pa balemd a Zeova wã sã n da bãng a Abdias sẽn maan bũmb ningã, b ra tõe n tɩ togsa rĩmã ne a pagã n bao lohorem. La baa ne nin-kãensã fãa sẽn da tõe n bãngã, ne raoodo, a Abdias kell n dɩlga a Zeova no-rɛɛsdbã. Ad wẽn-zoeer tõe n sɩd kõo ned raood wʋsgo!
20. A Abdias wẽn-zoeerã sõng-a lame t’a maan bõe, la wãn-wãn la a mak-sõngã sõngd yãmba?
20 A Abdias sẽn tall wẽn-zoeer n wilg raoodã yĩnga, yaa vẽeneg t’a Zeova kogl-a lame t’a bɛɛbã pa paam-a ye. Yelbũna 29:25 yeta woto: “Ninsaal zoees wata ne yelle. La sẽn teegd-a Zusoaba tara laafɩ.” A Abdias me ra yaa ned wa a taabã bala. A ra yaeesda b na n wa yõk-a n kʋ. Sã n da yaa tõnd me, d ra na n yaeesame. (1 Rĩm dãmba 18:7-9, 12) La baasgo, wẽn-zoeerã kɩtame t’a tall raood n pa zoe ninsaal ye. A Abdias kõo tõnd fãa mak-sõngo, sẽn yɩɩd fãa, neb nins sẽn balemd a Zeova, baa ne rẽ sẽn tõe n wa kɩt tɩ b kẽes-b bãens wall b kʋ-bã. (Matɩe 24:9) Bɩ tõnd fãa modg n zoe a Zeova la d sak-a ne rabeem.—Hebre dãmba 12:28.
21. Bõe la d na n yã sõsg ning sẽn pʋgdã pʋgẽ?
21 La pa tẽebã la wẽn-zoeerã bal n tõe n kõ ned raood ye. Nonglem me tõe n kɩtame tɩ ned tall raood wʋsgo. A Poll gʋlsa woto: “Wẽnnaam ka kõ tõnd dabeem sɩɩg ye, yaa sɩɩg sẽn wat ne pãnga la nonglem la yam.” (2 Tɩmote 1:7) Sõsg ning sẽn pʋgdã pʋgẽ, d na n yãa nonglmã sẽn tõe n sõng-d to-to tɩ d sak a Zeova ne raood wakat kãensã sẽn yaa toog wakatã pʋgẽ.—2 Tɩmote 3:1.
[Tẽngr note]
^ sull 17 Pa no-rɛɛs a Abdias ye.
Y tõe n leokame bɩ?
• Yaa bõe la sẽn kɩt t’a Zozue ne a Kalɛɛb tall raoodã?
• Tẽeb hakɩk naaga ne bõe?
• Bõe yĩng t’a Enok ra moond Wẽnnaam bʋ-kaoorã koɛɛg n pa yaeesdẽ?
• Wãn-wãn la wẽn-zoeer kɩtd tɩ ned tall raoodo?
[Zãmsgã sogsgã]
[Foto, seb-neng 15]
A Zeova yeela a Zozue yaa: “Nang pãng la f keng f sũuri”
[Foto rãmba, seb-neng 17]
A Enok taasa Wẽnnaam koɛɛgã ne raoodo