A Daniɛll ne a tigis-kãsengã badzã

MAAN-KƲƲDBÃ kãsem dãmb ne gʋlsdbã sẽn da pẽgd b mens tɩ loogã sẽn da wa n yã kom-bõoneg sẽn zẽḱ b koees n pẽgd Wẽnnaam, b sũy sãamame. La a Zezi zab-b lame. A sok-b-la woto: “Yãmb nan pa karem gom-kãensa la? B gʋlsame: ‘Yãmb paama pẽgr sẽn yit kom-bõoneg la kamb sẽn ket n yẽsemdẽ noyẽ.’”—Matɩe 21:15, 16, NW.

A Daniɛll sẽn yaa yʋʋm a 6 biig n yit Alemayn wã me wilgame tɩ hal baa masã kamb n ket n pẽgd a Zeova. A Daniɛll tigingã pʋgẽ, b gomda Risi buud gomde. Yẽ ne a kẽem-bipugl n paas b ma n tũ taab n kẽng a Zeova Kaset rãmbã tigis-kãsengẽ tẽng a yembrẽ b sẽn boond tɩ Duisburg. Yɩɩ b sẽn kẽng tigis-kãseng a woto buud pipi la woto. B ra zɩ n yã hotɛll ning b sẽn sigẽ wã buud ye. Sẽn paase, tigisgã neb sõor la a sẽn kaoos hal dasem a tãabã ne lisgã reegr fãa b ra zɩ n yã, tɩ pa sokd darmã ye. A Daniɛll manesem yɩɩ wãna? A zĩnda sɩɩ n kelge.

Tigisgã sẽn sa tɩ b lebg n kulã, a Daniɛll sẽn yik a vẽk-n-beoogã yi-beoog pĩnd n na n kẽng lekolle, a le rɩka a fuugã sẽn ket n tar tigis-kãsengã badzã n yeelge. La a ma yeel-a-la woto: “Tigis-kãsengã sẽn sa wã, rũndã f tõe n yãka f badzã.” La a Daniɛll leoke: “M datame tɩ nebã fãa yã n bãng m sẽn da kẽng zĩig ningã, la m sẽn tɩ zãms bũmb ningã.” Rẽ n so tɩ daarã tõre, a kell n ninga fuug ning sẽn tar a badzã hal t’a sũur noome. A karen-saambã sẽn yã n sok-a wã, a togs-a-la bũmb ning sẽn zĩnd tigis-kãsengẽ wã.

A Daniɛll sẽn pẽg a Zeova zãma sʋk woto wã, a maana wa kamb tusa sẽn sɩng n maand hal yʋʋm wʋsg sẽn loog n tãag masã.