Bũmb nins sẽn yaa sõng a Zeova nifẽ wã yaa sõng yãmb me nifẽ bɩ?
Bũmb nins sẽn yaa sõng a Zeova nifẽ wã yaa sõng yãmb me nifẽ bɩ?
“Bɩ y gũus neere, . . . tɩ nin-yoodre walla ned sẽn ka sõama ra zĩnd yãmb sʋk [ye].”—HEBRE DÃMBA 12:15, 16.
1. Manesem bʋg la dũniyã neb tar t’a Zeova Kaset rãmbã yaool n pa tare?
NEBÃ pa le nand bũmb nins sẽn yaa sõng Wẽnnaam nifẽ wã wala pĩndã ye. Bãngd a Edgar Morin sẽn yit Fãrens tẽngã wilgame tɩ nebã pa le tũud noy nins b sẽn gãneg sõma ne wẽngã zugã fãa ye. B yãkda b sẽn dat-b rãmb bal n tũudẽ. Woto kell n wilgda dũniyã rãmb yam, bɩ ‘yam ninga sẽn tʋmd zãgsdbã fãa pʋsẽ wã.’ (1 Korẽnt dãmba 2:12; Efɛɛz rãmba 2:2) La neb nins sẽn dɩk b mens n kõ a Zeova la b sakd a naam sẽn ka to wã pa tar yam kãng buud ye. (Rom dãmba 12:1, 2) Wẽnnaam sõgen dãmbã miime tɩ b sã n dat tɩ b balengã ta Wẽnnaam yam, yaa tɩlae tɩ b nand bũmb ning fãa sẽn yaa sõng a nifẽ. La bõe ne bõe n yaa sõng Wẽnnaam nifẽ tɩ segd n yɩ sõng tõnd me nifẽ? Sõs-kãngã pʋgẽ, d na n yãa yɛl a nu sẽn yaa sõng Wẽnnaam nin-buiidã fãa nifẽ. Sõsg ning sẽn pʋgda na n wilgame tɩ tõnd tigissã yaa bõn-kãsems bɩ sõng Wẽnnaam nifẽ. La sõng meng rat n yeelame tɩ bõe?
2, 3. a) Wãn to la Biiblã wilgd t’a Zeova yaa sõngo? b) Wãn to la d wilgd tɩ d getame t’a Zeova yʋʋrã yaa sõngo?
2 Biiblã pʋgẽ, hebre gom-biig ning b sẽn lebg tɩ “sõngã” võor yaa bũmb b sẽn welg toore. Wẽnnaam balengã pʋgẽ, bũmb sã n yaa sõngo, a yaa toor fasɩ ne a taabã, bɩ a yaa kãseng Wẽnnaam nifẽ. Yaa a Zeova bal n yaa sõng sẽn ka to. Yaa yẽ la b boond tɩ “Sõng-soabã.” (Yelbũna 9:10; 30:3) Pĩnd Israɛllẽ wã, maan-kʋʋdb kãsmã ra fõgenda zug-peend sẽn tar rĩ-tɛɛg sẽn maan ne sãnem tɩ b gʋls a zug tɩ: “Welga Zusoaba yĩnga.” (Yikri 28:36, 37) Biiblã pʋgẽ, b bilgame tɩ seribẽ la serafẽ rãmbã yasa a Zeova geerã taoor n yetẽ tɩ: “Sõngo! Sõngo! Saasẽ pãng soaba yaa sõngo.” (Ezai 6:2, 3; Wilgri 4:6-8) B sẽn yet naoor a tãab fãa tɩ sõngã wilgdame t’a Zeova yaa sõng sẽn ka to. Yaa yẽ la sõng fãa yẽgre.
3 A Zeova yʋʋrã yaa sõngo. Yɩɩl-gʋlsdã yeela woto: “Bɩ b pẽg yãmb yʋʋr sẽn yaa kãsenga t’a seka zoeese. Bãmb yaa sõngo.” (Yɩɩl Sõamyã 99:3) A Zezi zãmsa tõnd tɩ d pʋʋs woto: “Tõnd Ba sẽn be [saasẽ], tɩ yãmb yʋʋr yɩ ne waoogre.” (Matɩe 6:9) A Zezi ma a Maari me yeelame tɩ: “Mam pẽgda Zusoaba ne m sũur fãa. . . . Wẽnnaam Sẽn-tõeyã fãa maana bõn-kãsems mam yĩnga. Bãmb yʋʋr yaa sõngo.” (Luk 1:46, 49) Tõnd sẽn yaa a Zeova sõgen dãmbã yĩngã, tõnd getame t’a yʋʋrã yaa sõngo, la d pa maand bũmb sẽn na n sãam yʋ-kãngã sẽn yaa sõngã ye. Sẽn paas me, bũmb nins sẽn yaa sõng a Zeova nifẽ wã yaa sõng tõnd me nifẽ.—Amos 5:14, 15.
Bũmb ning sẽn kɩt tɩ d waoogd a Zezi wʋsgã
4. Bõe yĩng tɩ Biiblã boond a Zezi tɩ “Wẽnnaam Sõng Soaba”?
4 A Zezi yaa Wẽnnaam a Zeova sẽn yaa sõngã ‘biig sẽn ka to.’ A Zeova naan-a lame t’a yaa sõngo. (Zã 1:14; Kolos rãmba 1:15; Hebre dãmba 1:1-3) B boond-a lame tɩ “Wẽnnaam Sõng Soaba.” (Zã 6:69) Baa a Zezi sẽn wa n be tẽngã zugã a kell n yɩɩ sõngo, bala yaa ne Wẽnnaam vʋʋsem sõngã maasem la a Maari rog a Zezi. Malɛk n yeel a Maari woto: “Sɩɩg Sõng na n waa fo zugu, . . . bi-sõng ninga fo sẽn na n dogã, b na n boonda yẽ tɩ Wẽnnaam Biiga.” (Luk 1:35) Kiris-neb nins sẽn da be Zerizalɛmmã pʋʋsa a Zeova n gom Wẽnnaam biigã yell naoor a yiib n yeel tɩ: “Yãmb tʋm-tʋmd sõngã.”—Tʋʋma 4:27, 30.
5. Tʋʋm-sõng bʋg la a Zezi tʋm tẽngã zugu, la bõe yĩng t’a zɩɩmã tar yõod wʋsg tõnd nifẽ?
5 A Zezi sẽn da wa n be tẽngã zugã, a ra tara tʋʋm-sõng n na n tʋme. A sẽn wa n deeg lisg yʋʋmd 29 wã, a lebga a Zeova ro-kãseng sẽn pa tõe n yã ne nifã Maan-kʋʋdb kãsma. (Luk 3:21, 22; Hebre dãmba 7:26; 8:1, 2) Sẽn paase, a ra segd n kõ a vɩɩmã tɩ yɩɩ maoongo. Yaa a zɩɩmã raagr n da na n yɩ rondã n fãag ninsaalbã sẽn yaa yel-wẽn-maandbã. (Matɩe 20:28; Hebre dãmba 9:14) Yaa rẽ n so t’a Zezi zɩɩmã yaa bũmb sẽn yaa sõng la tar yõod wʋsg tõnd nifẽ wã.—1 Pɩɛɛr 1:19.
6. D manesem segd n yɩɩ wãn ne a Zezi Kiristã, la bõe yĩnga?
6 Sẽn na yɩl n wilg tɩ d waoogda d Rĩmã la d Maan-kʋʋdb kãsem a Zezi Kiristã, tʋm-tʋmd a Poll yeelame tɩ: “Wẽnnaam waooga [a biigã] ne waoogr sẽn yaa kãsenga n kõ bãmb yʋʋr sẽn yɩɩd yʋya fãa, hal tɩ ne a Zezi yʋʋre dũma fãa sẽn be yĩngri ne sẽn be tẽnga zugu la sẽn be tẽngã pʋgẽ wã na n yĩgimdame, la tɩ zɛlma fãa na n kɩsa kaset t’a Zezi Kirist yaa Zusoaba, tɩ yɩ tõnd Ba a Wẽnnaam waoogre.” (Filip rãmba 2:9-11) Tõnd sã n sulg d meng n sak a Zezi Kirist sẽn yaa tõnd rĩm la kiris-neb tigingã taoor soabã ne yamleoogo, d wilgdame tɩ bũmb nins sẽn yaa sõng a Zeova nifẽ wã yaa sõng tõnd me nifẽ.—Matɩe 23:10; Kolos rãmba 1:18.
7. Wãn to la d wilgd tɩ d sakda Kiristã?
7 Kiristã sakr baoodame tɩ d waoogd neb nins a sẽn yãk tɩ b get tʋʋmd ning yẽ meng sẽn yaa taoor soabã yellã. D segd n kɩsa sɩd tɩ tʋʋmd ning neb nins sẽn paam vʋʋsem sõng zaeeb n yaa Siglgã Taoor lʋɩtb Sullã sẽn tʋmdã, la neb nins b sẽn yãk tɩ b get biru rãmbã la tigimsã yellã tʋʋm me yaa sõngo. Woto yĩnga, bɩ d sak-b la d waoog-b wʋsgo.—Hebre dãmba 13:7, 17.
Nin-buiid sẽn yaa sõng Wẽnnaam nifẽ
8, 9. a) Bõe n da kɩt tɩ Israɛll nebã ra yaa nin-buiid sẽn yaa sõngo? b) Bõe la a Zeova maan n kɩt tɩ Israɛll nebã bãng bũmb nins sẽn da yaa sõng yẽ nifẽ wã?
8 A Zeova ra maana kaool ne Israɛll nin-buiidã. Rẽ kɩtame tɩ b ra tar zu-noog sẽn yaa kãsenga. B ra welga toore. A Zeova meng yeel-b-la woto: “Bɩ y yɩ neb sẽn welg toor mam yĩnga. Tɩ bõe, mam sẽn yaa Zusoabã, mam yaa toore. La mam welga yãmb ne buud a taabã, tɩ yãmb yɩ mam dẽnda.”—Maankʋʋre 19:2; 20:26.
9 Yaa Israɛll buudã sɩngrẽ meng la a Zeova kɩt tɩ Israɛll nebã bãng bũmb nins sẽn yaa sõng a nifẽ wã. B ra pa segd n sɩɩs tãng ning a Moiiz sẽn dʋ n deeg Tõod Piigã ye, sã n pa rẽ b ra na n kiime. Wakat kãng tɩ Sinayi Tãngã ra yaa sõng Wẽnnaam nifẽ. (Yikri 19:12, 23) Maan-kʋʋrã, sɛk-roogã la teed nins sẽn da be a pʋgẽ wã me ra segd n yɩɩ sõng Israɛll nebã nifẽ. (Yikri 30:26-30) La yaa wãn to yẽ ne kiris-neb nins sẽn paam-b vʋʋsem sõng zaeebã?
10, 11. Bõe yĩng tɩ d tõe n yeel tɩ kiris-neb nins sẽn paam-b zaeebã yaa nin-sõamyã Wẽnnaam nifẽ, la rẽ kɩtame tɩ “piis a taabã” maand bõe?
10 Kiris-neb nins sẽn paam-b vʋʋsem sõng zaeebã yaa nin-sõamyã a Zeova nifẽ. (1 Korẽnt dãmba 1:2) Yaa sɩd tɩ kiris-neb nins fãa sẽn paam-b zaeeb n ket tẽngã zugã pa a Zeova ro-kãseng ning sẽn pa tõe n yã ne nifã ye. La b mak-b-la ne wẽnd-doog sẽn yaa sõngo. A Zeova vʋʋsem sõngã sẽn be a ro-kãng pʋgẽ wã kɩtame tɩ d tõe n yeel t’a Zeova meng bee be. Tʋm-tʋmd a Poll gʋlsa woto: “[A Zezi Kirist] maasem yĩnga rooga bũmb fãa sẽn tongd taab sõama ne meeba lebgda ro-sõngo Zusoaba maasem yĩnga. Bãmb maasem yĩnga yãmb me meeme tɩ yɩ Wẽnnaam Sɩɩg roogo.”—Efɛɛz rãmba 2:21, 22; 1 Pɩɛɛr 2:5, 9.
11 A Poll leb n gʋlsa kiris-neb sẽn paam vʋʋsem sõng zaeeb n yeel-b woto: “Y ka mi tɩ y yaa Wẽnnaam doogo, t’a Vʋʋsem Sõng be y pʋsẽ laa? . . . Wẽnnaam dooga yaa bõn-sõngo la yaool n yaa yãmb la ro-kãnga.” (1 Korẽnt dãmba 3:16, 17, Sebr Sõngo) Ne a vʋʋsem sõngã maasem, a Zeova bee ne kiris-neb nins a sẽn zaeyã, la a ‘kẽnd b sʋka.’ (2 Korẽnt dãmba 6:16) A wilgda a “tʋm-tʋmd” sẽn tũud sɩdã sor wakat fãa. (Matɩe 24:45-47) “Piis a taabã” nanda zu-noog ning b sẽn paam n tʋmd ne kiris-neb nins sẽn zae-bã.—Zã 10:16; Matɩe 25:37-40.
Bũmb nins sẽn yaa sõng kiris-nebã vɩɩmã pʋgẽ
12. Yɛl-bʋs n yaa sõng d vɩɩmã pʋgẽ, la bõe yĩnga?
12 Bũmb wʋsg n be n yaa sõng kiris-neb nins sẽn paam zaeebã la b tũud-n-taasã vɩɩm pʋgẽ. Tõnd zems-n-taarã ne a Zeova wã yaa sõngo. (1 Kibaya 28:9; Yɩɩl Sõamyã 36:8) Zems-n-taar kãng sẽn tar yõod wʋsg ne tõndã yĩng kɩtame tɩ d pa basd tɩ ned bɩ bũmb sãam-a ye. (2 Kibaya 15:2; Zak 4:7, 8) Pʋʋsgã sõngda tõnd wʋsg tɩ d kell n tall d zems-n-taarã ne a Zeova. Pʋʋsgã ra yaa sõng no-rɛɛs a Daniɛll nifẽ, hal tɩ kɩt tɩ baa a sẽn da mi tɩ b ra tõe n kʋ-a la pʋʋsgã yĩngã, a ra ket n pʋʋsda a Zeova. (Daniɛll 6:8-12) B maka “Wẽnnaam nebã” bɩ sẽn zae-bã pʋʋsg ne wisd b sẽn yõogd wẽnd-doogẽ wã. (Wilgri 5:8; 8:3, 4; Maankʋʋre 16:12, 13) Woto wilgdame tɩ pʋʋsgã sɩd yaa sõngo. Ad yaa zu-noog tɛkẽ meng la d sẽn paam n tõe n gomd ne ãndũniyã Naab sẽn ka to wã! Rẽ n so tɩ pʋʋsgã yaa bũmb sẽn yaa sõng d vɩɩmã pʋgẽ.
13. Pãng bʋg n yaa sõngo, la wãn-wãn la d tõe n paam-a?
13 Vʋʋsem sõngã yaa pãng sẽn yaa sõng kiris-neb nins sẽn paam zaeebã la b tũud-n-taasã nifẽ. Pãn-kãngã yaa a Zeova pãngã, la sẽn mik t’a tʋʋmã zemsda wakat fãa ne Wẽnnaam sẽn yaa Sõngã raabã, rẽ n so tɩ b boond-a tɩ “vʋʋsem sõngã.” (Zã 14:26, Sebr Sõngo; Rom dãmba 1:4) A Zeova kõta a sõgen dãmbã vʋʋsem sõngã sẽn na n yɩl n sõng-b tɩ b moon koe-noogã. (Tʋʋma 1:8; 4:31) A Zeova kõta neb nins sẽn sakd-a wã a vʋʋsem sõngã. A leb n kõt-a-la neb nins ‘kẽnd sẽn zemsd’ ne vʋʋsem sõngã, sẽn pa sakd-b yĩngã ratmã. (Tʋʋma 5:32; Galat dãmba 5:16, 25; Rom dãmba 8:5-8) Pãn-kãng kɩtdame tɩ kiris-nebã tõe n paam “vʋʋsem sõngã biis” sẽn yaa zʋg-sõma wã, la b yɩ ‘neb sẽn tar yel-manesem sẽn yaa sõama la sẽn sakd Wẽnnaam.’ (Galat dãmba 5:22, 23; 2 Pɩɛɛr 3:11) Vʋʋsem sõngã sã n yaa sõng tõnd nifẽ, d pa na n maan bũmb sẽn na n beeg-a, bɩ sẽn na n gɩdg-a t’a pa sõng-d ye.—Efɛɛz rãmba 4:30.
14. Tʋʋm-bʋg n yaa sõng sẽn zae-bã nifẽ, la bõe la piis a taabã me maanda?
14 Tõnd sẽn zãad Wẽnnaam a Zeova sẽn yaa sõngã yʋʋrã, la d yaa a Kaset rãmbã me yaa bũmb sẽn yaa sõng d nifẽ. (Ezai 43:10-12, 15) A Zeova yãka kiris-neb nins sẽn paam-b zaeebã tɩ b yaa “kãab paalga” tʋm-tʋmdba. (2 Korẽnt dãmba 3:5, 6) Rẽ n so, tɩ b segd n moon “Wẽnnaam soolem koe-noog kãngã” la b ‘maan neba buud fãa tɩ b yɩ karen-biisi.’ (Matɩe 24:14; 28:19, 20) B tʋmda tʋʋm-kãngã ne b sũur fãa, tɩ rẽ kɩt tɩ neb milyõ rãmb sakd koɛɛgã. Sẽn sakd-b koɛɛgã yeta sẽn zae-bã tɩ: “Bas-y tɩ d tũ yãmb n kẽnge; bala, tõnd wʋmame tɩ Wẽnnaam bee ne yãmba.” (Zakari 8:23) B sakda ne sũ-noog n sõngd “Wẽnnaam tʋm-tʋmdba” sẽn paam vʋʋsem sõng zaeebã, tɩ rẽ kɩt tɩ Wẽnnaam get-b wa neb sẽn ‘kood pʋt la b manegd tɩɩs n kõt sẽn zae-bã.’ Woto rat n yeelame tɩ piis a taabã sõngda sẽn zae-bã wʋsg b moonegã tʋʋmd sẽn tʋmd dũniyã gill zugã pʋgẽ.—Ezai 61:5, 6.
15. Tʋʋm-bʋg la tʋm-tʋmd a Poll ra get tɩ yaa sõngo, la bõe yĩng tɩ tõnd me tagsd woto?
15 Tʋm-tʋmd a Poll ra getame t’a moonegã tʋʋmd yaa sõngo. A yeelame tɩ yẽ yaa “Kirist Zezi tʋm-tʋmd sẽn maand Wẽnnaam Koe-noog tʋʋmd [sẽn yaa sõngã] bu-zẽms sʋka.” (Rom dãmba 15:16) A Poll gʋlsa kiris-neb nins sẽn da be Korẽntã n wilg t’a tʋʋmdã yaa ‘paoongo.’ (2 Korẽnt dãmba 4:1, 7) Tõnd sã n moond koɛɛgã, d kɩtdame tɩ nebã bãngd ‘Wẽnnaam goamã.’ (1 Pɩɛɛr 4:11) Rẽ n so tɩ tõnd yaa kiris-ned sẽn paam zaeeb tɩ d yaa piis a taabã ned me, d getame tɩ koɛɛgã mooneg yaa tʋʋmd sẽn yaa sõng wʋsgo.
‘D bɩ sõmblem pʋgẽ n paase, d sẽn zoet Wẽnnaamã yĩnga’
16. Bõe n na n sõng tõnd tɩ d ra yɩ neb sẽn pa nand bũmb nins sẽn yaa sõng Wẽnnaam nifẽ wã?
16 Tʋm-tʋmd a Poll keooga a kiris-nin-taasã tɩ b ra wa lebg neb sẽn pa nand bũmb nins sẽn yaa sõng Wẽnnaam nifẽ wã ye. A sagl-b lame tɩ b ‘bao sõmblem la b gũus tɩ yẽgend toaag ra wa tob b sʋk n wa ne sãoong sẽn na n mad’ neb wʋsg ye. (Hebre dãmba 12:14-16, Sebr Sõngo) B sẽn gomd “yẽgend toaag” bɩ yẽgr sẽn yaa toaag yell ka wã, yaa kiris-neb kẽer sẽn yet tɩ yɛla sẽn maand to-to tigingã pʋgẽ wã pa zemsã yell la b gomda. Wala makre, tõe tɩ b pa get tɩ kãadmã yaa bũmb sẽn yaa sõng wa a Zeova sẽn tagsd to-to wã, bɩ tõe tɩ b pa tagsd tɩ yaa tɩlae tɩ b tall manesem sõng ye. (1 Tesalonik rãmba 4:3-7; Hebre dãmba 13:4) Tõeeme me tɩ b naagda neb a taab sẽn ‘bas sɩdã,’ n gomd gom-yood n kɩɩsd sɩdã.—2 Tɩmote 2:16-18.
17. Bõe yĩng tɩ sẽn zae-bã segd n modg wakat fãa tɩ b yel-manesmã wilg tɩ bũmb nins sẽn yaa sõng a Zeova nifẽ wã yaa sõng bãmb me nifẽ?
17 A Poll yeela a kiris-nin-taas nins sẽn paam zaeebã woto: “M zo-nongdse, . . . bɩ d lak ne bũmb fãa sẽn yaa rẽgdo, yĩnga rẽnda la sũur dẽnda. La bɩ tõnd bɩ sõmblem pʋgẽ n paase, tõnd sẽn zoet Wẽnnaama yĩnga.” (2 Korẽnt dãmba 7:1) A Poll gom-kãensã wilgdame tɩ kiris-neb nins sẽn paam-b zaeeb n na n tɩ vɩɩmd saasẽ wã segd n modga wakat fãa, tɩ b yel-manesmã wilgd tɩ bũmb nins sẽn yaa sõng a Zeova nifẽ wã yaa sõng bãmb me nifẽ. (Hebre dãmba 3:1) Tʋm-tʋmd a Pɩɛɛr me sagla a kiris-nin-taasã woto: “Wa kamb sẽn mi sakre, lak-y y yam ne pĩnd tʋls wẽns sẽn da be y sũurẽ, y sẽn waa n da ket likẽ. La wala sẽn bool-a yãmbã sẽn yaa Sõmblem naaba, y me yɩ sõma, y manesem fãa pʋgẽ.”—1 Pɩɛɛr 1:14, 15, Sebr Sõngo.
18, 19. a) Wãn to la ‘kʋʋng kãsengã’ neb wilgd tɩ bũmb nins sẽn yaa sõng a Zeova nifẽ wã yaa sõng bãmb me nifẽ? b) Bõe yell la d na n gom sõsg ning sẽn pʋgda pʋgẽ?
18 La yaa wãn to yẽ ne ‘kʋʋng kãsengã’ sẽn yaa neb nins sẽn na n põs ‘to-kãsengã’? Bãmb me segd n wilgame tɩ bũmb nins sẽn yaa sõng a Zeova nifẽ wã yaa sõng bãmb me nifẽ. Wilgr sebrã pʋgẽ, b bilgame tɩ b bee wẽnd-doog sẽn pa tõe n yã ne nifã samandẽ n tʋmd a Zeova tʋʋmã. B tẽeda Kiristã maoong sẽn yaa rondã, ‘n pekd b fut tɩ lebgd peels ne Pebila zɩɩm.’ (Wilgri 7:9, 14, 15) Woto kɩtame tɩ b yaa yɩlem a Zeova taoore, la kɩtdẽ tɩ yaa tɩlae tɩ b ‘lak [b mens] ne bũmb fãa sẽn yaa rẽgdo, yĩnga rẽnda la sũur dẽnda, la b bɩ sõmblem pʋgẽ n paase, b sẽn zoet Wẽnnaama yĩnga.’
19 Bũmb nins sẽn tar yõod kiris-neb nins sẽn paam zaeebã la b tũud-n-taasã nifẽ wã sʋka, d tõe n sõdga tigissã b sẽn kẽnd wakat fãa n balemd a Zeova wã, la Biiblã zãmsgo. A Zeova getame t’a nin-buiidã tigissã yaa bõn-kãsems bɩ sõngo. Wãn to la d segd n wilg tɩ tigissã sẽn yaa sõng a Zeova nifẽ wã yaa sõng tõnd me nifẽ, la bõe yĩnga? Sõsg ning sẽn pʋgda pʋgẽ, d na n goma rẽ yelle.
D lebg n tẽege
• Manesem bʋg la dũniyã neb tar t’a Zeova Kaset rãmbã yaool n pa tare?
• Bõe yĩng tɩ yaa a Zeova n yaa sõng fãa yẽgre?
• Wãn to la d wilgd tɩ d sak n deegame tɩ Kiristã yaa sõngo?
• Bõe ne bõe n segd n yɩ sõng kiris-nebã vɩɩmã pʋgẽ?
[Zãmsgã sogsgã]
[Foto, seb-neng 23]
Pĩnd Israɛllẽ wã, maan-kʋʋrã, sɛk-roogã la teed nins sẽn da be a pʋgẽ wã ra yaa sõngo
[Foto, seb-neng 24]
Kiris-neb nins sẽn paam zaeeb n ket tẽngã zugã yaa wẽnd-do-sõngo
[Foto rãmba, seb-neng 25]
Pʋʋsgã la koe-noogã mooneg fãa yaa sõngo