Bõe yĩng tɩ d baood n bãng Kirist kɩɩsdã?

Hal sẽn kaoose, Wẽnnaam vẽnega tʋm-tʋmd a ye t’a gʋls woto: “Yãmb sẽn da wʋm tɩ Kirist kɩɩsdã na n waame wã.” (1 Zã 2:18) Yaa bõe la gom-kãensã rat n yeele? Nebã sẽn sɩng n baood gom-kãensã võor pa rũndã ye. La ãnd soab la Kirist kɩɩsdã? Wakat bʋg la a wata? La a sã n wa, bõe la a na n maane?

HAL n tãag masã, neb wʋsg la b rõd tɩ b yaa Kirist kɩɩsdba. Pĩnd wẽndẽ wã, b sẽn da get-b rãmb wa ‘Kirist kɩɩsdbã’ sʋka, Zʋɩf rãmb la katolik Pap rãmb ra naagame, n paas Rom nanambs kẽer me. Wala makre, Ãmperɛɛr a Frederick II (1194-1250) sẽn wa n yeel t’a pa na n sõng n zab a tũudmã yĩngã, Pap Gregory IX yeelame t’a yaa Kirist kɩɩsda, n yiis-a katolik tigingã pʋgẽ. A Innocent IV sẽn yaa ned ning sẽn deeg a Pap Gregory IX zĩigã me sẽn wa wã, a le yiisa a Frederick II katolik tigingã pʋgẽ yɛsa. La a Frederick wẽneg n yeelame tɩ yaa Innocent IV la Kirist kɩɩsdã.

Biiblã gʋlsdbã sʋka, yaa tʋm-tʋmd a Zã bal n gom “Kirist kɩɩsdã” yelle. D sã n naag a Zã dẽenem lɛtrã ne a yiib-n-soabã taaba, yaa naoor a nu fãa la a Zã gomd Kirist kɩɩsdã yelle. Verse rãmb nins pʋgẽ d sẽn yãt gom-biig ning sẽn yaa Kirist kɩɩsdã bee zĩig ning b sẽn gũbg tɩ be seb neng ning sẽn pʋgda pʋgẽ wã. Verse kãens pʋgẽ, d neeme tɩ Kirist kɩɩsdã yaa ziri-yagda, la zãmb soaba, t’a tʋʋmd yaa a sãam ned zems-n-tar ne a Zeova la ne a Zezi. Sẽn paas me, d neeme tɩ tõe n yɩɩ neb wʋsg bɩ nin-yende. Rẽ n so tɩ tʋm-tʋmdã keoog a kiris-nin-taasã tɩ b ra tẽ bãngdbã fãa ye, tɩ b mak b goamã n bãng sã n yaa Wẽnnaam dẽnda, “tɩ bõe, zãmb bãngdb wʋsg waa dũniyã pʋgẽ.”—1 Zã 4:1.

A Zezi me keooga tõnd tɩ d gũus ne zãmb bãngdbã. A yeelame tɩ: “Bãmb wata yãmb sʋk wa piisi, la bãmb sũyã pʋsẽ, bãmb yaa wa rigdinyĩids kom sẽn tara. Yãmb na bãng bãmb ne b biisi [bɩ ne b tʋʋmã].” (Matɩe 7:15, 16) A Zezi sẽn yeel woto wã, rẽ yĩnga a ra keoogda a karen-biisã tɩ b gũus ne Kirist kɩɩsdã bɩ? D ges d sẽn na n maan to-to n bãng Kirist kɩɩsdã sẽn yaa wẽnem soab la zãmb soabã.