Bõe yĩng tɩ d segd n togsd sɩda?

A MANFRED sẽn da wa n tar yʋʋm 18, a ra tɩ zãmsda tʋʋm sosiete a ye pʋgẽ. * Sosiete wã taoor dãmbã ra tɩ gʋlsa yẽ ne neb a taab inivɛrsite a ye pʋgẽ tɩ b segd n tɩ karem be rasem a yiib semen fãa. Daar a ye, b kẽnga karengã tɩ b tɩ bas-b pĩnda. Sosiete wã taoor dãmb yaool n da wilg-b lame tɩ karengã sã n yi pĩnd raare, b segd n lebg n wa tʋmã biruẽ wã. La baraare, yaa a Manfred bal n leb tʋʋmã zĩigẽ. A taabã fãa tuda b sẽn datẽ. Bʋko, sosiete wã ned ning sẽn get tʋʋmdã zãmsdbã yellã waa tʋʋmã zĩigẽ n yã a Manfred be n sok-a woto: “Bõe yĩng tɩ fo pa kẽng kareng rũndã? Fo taabã bee yɛ?” Woto wã, a Manfred segd n leokame tɩ bõe?

Yellã ra paka a Manfred. A segd n togsa sɩd bɩ, bɩ a segd n yaga ziri n sõng a karen-bi-taasã? A sã n togs sɩda, b na n maana a karen-bi-taasã bũmbu, la rẽ na n kɩtame tɩ b kisg-a. Rẽ yĩnga, d sã n wa be yell a woto pʋgẽ, d tõe n yaga ziri bɩ? Sã n da yaa yãmba, y maanda wãna? Nand tɩ d wilg a Manfred sẽn maan to-to, d reng n ges bũmb ning sẽn kɩt tɩ ziri yagb yaa yelle, tɩ sɩd togsg tar yõodã.

Ziri sẽn sɩng to-to

Wẽnnaam sẽn wa n naan pipi ninsaalbã tɩ ziri ra kae ye. Ra yaa sɩd bal n be. Ned ra pa gomd goam sẽn tudgd a to, bɩ n wẽnd yɛlã tɩ wõnd sɩd ye. Naand a Zeova yaa “Wẽnnaam sẽn so sɩda.” A Gomdã yaa sɩda, la a mengã pa tõe n yag ziri me ye. A leb n kisa ziri la zɩlem-be-neba.—Yɩɩl Sõamyã 31:6; Zã 17:17; Tɩt 1:2.

La maana a wãn tɩ ziri wa beẽ? A Zezi Kirist leoka sok-kãngã vẽenega, a sẽn wa n gomd ne a kɩɩsdbã sẽn da baood n na n kʋ-a wã. A yeel-b-la woto: “Sʋɩtãanã la yãmb ba, la yãmb dat n maana yãmb ba ratem. Yẽ yaa nin-kʋʋd hal sɩngrẽ, la yẽ ka paad sɩd pʋgẽ ye, sɩda sẽn ka be yẽ pʋgẽ wã yĩnga. Yẽ sẽn yagd ziri, yẽ gomda a meng sũur pʋgẽ dẽnda, tɩ bõe, yẽ yaa ziri yagda, la ziri ba.” (Zã 8:44) A Zezi ra gomda bũmb ning sẽn maan Edɛn zẽedẽ wã yelle. A ra gomda a Sʋɩtãan sẽn maan tɩ pipi raoã ne a pagã kɩɩs Wẽnnaam n kẽ yel-wẽnã la kũumã yembdẽ wã yelle.—Sɩngre 3:1-5; Rom dãmba 5:12.

A Zezi wilga vẽeneg tɩ yaa a Sʋɩtãan la ‘ziri wã ba,’ sẽn dat n yeel tɩ zɩlem-beed sɩnga ne  yẽ. A Sʋɩtãan ket n yaa ziri wã naaba. Sɩd me, a ‘belgda dũniyã fãa.’ Zɩlem-beedã sẽn piuug rũndã-rũndã n sãamd ãdem-biisã yaa a Sʋɩtãan yelle.—Wilgri 12:9.

Baa zɩlem-beedã sẽn sɩng ne a Sʋɩtãanã, rũndã-rũndã, zɩlem-beed ket n beeme. Neb buud toor-toor yagdame. Ned goam la a tʋʋm wilgda a sã n teenda sɩdã wall ziri wã. Neb nins sẽn be Wẽnnaam poorẽ wã tũuda Biiblã sẽn yaa a Gomdã noy b vɩɩmã pʋgẽ. Ned ning fãa sẽn pa maand woto, a soab mi t’a pa mi me, a be a Sʋɩtãan nugẽ, bala “dũniyã fãa bee wẽng soaba nugẽ.”—1 Zã 5:19; Matɩe 7:13, 14.

Bõe yĩng tɩ nebã mi n yagda?

“Dũniyã fãa” sẽn be a Sʋɩtãan nugẽ wã yĩng kɩtame tɩ d mi neb wʋsg sẽn yagdã võore. La tõe tɩ d tʋll n bãnga bũmb ning sẽn kɩt t’a Sʋɩtãan wa lebg “ziri ba” wã võore. A Sʋɩtãan da miime tɩ sẽn yaa a Zeova la Naandã yĩnga, yẽ bal n segd n yɩ ãndũniyã fãa Naaba. La a tʋlga ne a sũur n na n yɩ naab wa Wẽnde, tɩ woto yaool n pa segd ye. A sẽn da rat ziir tɩ loog nug woto wã yĩnga, a maana sɩlem n na n deeg a Zeova zĩiga. Sẽn na yɩl n tõog n paam a sẽn datã, a yaga ziri la a maan zãmbo.—1 Tɩmote 3:6.

Yaa woto me rũndã-rũndã. Sẽn yɩɩd fãa, nong n yaa ziirã baoob la rat-tɩ-loog-nugã n kɩtd tɩ neb wʋsg yagda. Laog-baoodbã, politikã rãmb la ziri tũudmã taoor dãmb fãa belgda nebã. B yagda ziri n wẽnd yɛlã tɩ wõnd sɩda la b zãmbd nebã. Bõe yĩnga? Yaa vẽeneg tɩ naoor wʋsgo, yaa nebã sẽn tʋll n paam arzɛgs tɩ loog nug wall b sẽn dat naam n kɩtd tɩ b yagdã. Pĩnd wẽndẽ Israɛllã rĩm a Salomo sẽn yɩ yam soabã keooga woto: “Sẽn dat n lebg-a arzɛk soab tao-tao ka na n põs toog ye.” (Yelbũna 28:20) Tʋm-tʋmd a Poll me gʋlsame tɩ “ligd datem yaa bõn-wẽns fãa yẽgre.” (1 Tɩmote 6:10) La d tõe n yeelame me tɩ ned sã n baood naam ne a sũur fãa, tõe n kɩtame t’a paam toogo, pa rẽ bɩ kɩt t’a maan wẽnga.

Bũmb a to me sẽn kɩtd tɩ nebã yagd yaa b sẽn zoet b sẽn na n togs sɩd tɩ bũmb wa paam-bã, pa rẽ bɩ nebã sẽn na n ges-b to-to wã. Yaa sɩd tɩ pa wẽng tɩ d tʋlg tɩ nebã nong-d ye. La rẽ n tõe n wa kɩtame tɩ f golem sɩd baa yaa bilf n bao n solg f kongre, wall sẽn na yɩl n lud yɛl kẽer sẽn tõe n kɩt tɩ b paoog fo, pa rẽ bɩ n bao tɩ b pẽg-fo. A Salomo sẽn gʋls bũmb ningã sɩd zemsame. A gʋlsa woto: “Ninsaal zoees wata ne yelle. La sẽn teegd-a Zusoabã tara laafɩ.”—Yelbũna 29:25.

D sak Wẽnnaam sẽn yaa sɩd soabã

A Manfred taoor soabã sẽn sok-a n na n bãng a taabã sẽn maanegã, a leokame tɩ bõe? A togsa sɩda. A Manfred leoka woto: “Karen-saambã basa tõnd tɩ d yi pĩnda. Rẽ n so tɩ mam lebg n wa n na n tʋme. La m pa bãng m taabã sẽn maaneg ye. Sã n pa y sok-ba.”

A Manfred ra tõe n maana sɩlem n belg b taoor soabã sẽn na yɩl t’a taabã wa pẽg-a. La a tara bʋʋm a sẽn togs sɩdã. A Manfred yaa a Zeova Kaset soaba. A sẽn togs sɩdã kɩtame t’a sũur pa ning-a taal ye. Leb n kɩtame t’a tʋʋmdã taoor soab maan-a yardo. B kɩtame meng t’a tɩ tʋm sosiete wã zĩig a yembrẽ b sẽn koosd nag-teed sẽn maan ne sãnem la wanzuri. La b yaool n da pa basd tɩ ned sẽn wa tʋʋmdã zãmsg tɩ tʋm zĩ-kãng ye. Yʋʋm 15 loogr poor b sẽn wa n kõ a Manfred taoor-sobend sosiete kãng pʋgẽ, tʋʋmdã zãmsdb taoor soabã bool-a-la telefõnnẽ n pẽg-a la a tẽeg-a a sẽn da sak n togs sɩdã.

Wẽnnaam a Zeova sẽn yaa sɩd soabã yĩnga, ned ning fãa sẽn dat a zood segd n ‘basa ziri yagb’ la a ‘togsd sɩda.’ Wẽnnaam ned segd n nonga sɩda. Yam soabã gʋlsame tɩ “sɩd soab  ka na n yag ziri ye.” La ziri pʋd n yaa bõe?—Efɛɛz rãmba 4:25; Yelbũna 14:5.

Ziri yaa bõe?

Ziri yaa gomd sẽn pa sɩda, la pa gomd buud fãa sẽn pa sɩd n yaa ziri ye. Bõe yĩng tɩ d yet woto? Gom-biis võor wʋmb sebr a ye wilgame tɩ ziri yaa “gomd f sẽn mi vẽeneg tɩ pa sɩd la f togsdẽ, f sẽn tʋll n tudg f kɛlgdbã yĩnga.” Dẽnd ned yagda ziri, a sã n gomd n dat n tudg a to. Woto yĩnga, ned sã n gom goam sẽn pa sɩd n pa bãnge, wala makre, a sã n togs kibar n tudgi, d pa tõe n yeel t’a yagame ye.

Sẽn paase, ned sã n sok-d bũmbu, d segd n bao n bãnga nin-kãng soab sã n tara sor n na n bãng a sẽn dat n bãngã fãa fasɩ. D rɩk makr wa sã n da yaẽ-la sosiete a to taoor soab n sok a Manfred sogs-kãensã wã. Rẽ yĩnga ra na yɩẽ tɩlae ne-a t’a leok wa a sẽn leok a taoor soabã to-to wã sɩda? Nin-kãng soab sẽn pa a taoor soabã yĩnga, yaa vẽeneg tɩ pa tɩlae t’a leok woto ye. La sẽn yaa a soab fãa, a pa segd n yag ye.

D ges makr ning a Zezi Kirist sẽn kõ-d yell a woto wɛɛngẽ. Daar a yembre, neb sẽn pa a karen-biis n da wa n sõsd ne-a n wa rat n bãng a sẽn da magd n na n kẽng zĩis ninsi. Nin-kãens sagl-a-la woto: “Yi ka n kẽng Zide.” La a Zezi leok-b-la wãn to? A yeel-b-lame: “Kẽng-y kibsã [Zerizalɛm]. Mam nan ka na n kẽng kibs kãngã ye; tɩ bõe, mam wakatã nan ka pid ye.” La a Zezi sẽn gom woto wã poor bilfu, a yaool n kẽnga kibsã Zerizalɛm. Bõe yĩng t’a ra yeel t’a nan pa na n kẽnge? A võorã yaa tɩ neb nins sẽn da sokd-a wã ra pa tar sor n na n bãng a sẽn na n maanegã fãa ye. Rẽ n so t’a Zezi pa leok-b wa b sẽn da ratã ye. La a pa yag me ye. Bala b sã n da bãnge, tõe tɩ b wa bao n maan yẽ ne a karen-biisã wẽnga. D miime t’a Zezi sẽn leok-b to-to wã, a pa yag ziri, bala tʋm-tʋmd a Pɩɛɛr wa n goma Kiristã yell n yeel woto: “Bãmb ka tol n maan yel-wẽn ye, la ziri goam ka tol n yi bãmb noorẽ ye.”—Zã 7:1-13, Kãab-paalgã Koe-noogo; 1 Pɩɛɛr 2:22.

La a Pɩɛɛr yẽ? A Zezi yõkrã daar yʋngo, a Pɩɛɛr yaga naoor a tãab t’a pa mi a Zezi ye. A zoeya nebã rabeem tɩ kɩt t’a yage. La zĩig pʋgẽ bala, a sũur sãama wʋsg hal t’a yãbe. La a teka yam tɩ b kõ-a sugri. Sẽn paase, a Pɩɛɛr sẽn kongã poore, a rɩka yam. Rasem a wãn zugẽ, a goma a Zezi yell zãma taoor Zerizalɛm. La baa ne b sẽn nams-a wã, a kell n tõdga fasɩ t’a kõn bas a Zezi yell goam ye. Vẽenega, a Pɩɛɛr sẽn beeg n yɩ tao-tao n toeem yamã, kengda d fãa raoodo. Bala yɛlã tõe n wa looga d me nug wakat ning tɩ d kong ne d no-goam wall ne d tʋʋma.—Matɩe 26:69-75; Tʋʋma 4:18-20; 5:27-32; Zak 3:2.

Sɩd paada wakat fãa

Yelbũna 12:19 yeelame tɩ “sɩd kaoosdame, [“paada wakat fãa,” NW] la ziri ka kaoosd ye.” Sɩd yaa vẽeneg tɩ gomd sẽn yaa sɩd paada wakat fãa. La nebã sã n tũud sɩd la b togsd sɩda, wata ne zems-n-taar wakat fãa, la kõt sũ-noogo. Hakɩka, sɩd togsg nafda neda. Kɩtdame tɩ ned sũur pa ningd-a taal ye. Leb n kɩtdame t’a tar yʋ-noogo, tɩ zems-n-taar zĩnd a kãadem pʋgẽ, yẽ ne a zo-rãmb sʋka, la yẽ ne a tʋmd-n-taas sʋk menga.

La ziri pa tõe n kaoos ye. A tõe n tudga nebã wakat bilf bala, la b wat n bãnga sɩdã. Sẽn paase, ka la bilfu, a Zeova sẽn yaa Wẽnnaam sẽn so sɩdã na n kɩtame tɩ ziri sa, la a menes neb nins sẽn yeelgd ziri wã. Biiblã wilgame t’a Zeova na n sãama ziri wã ba a Sʋɩtãan sẽn tudgd dũniyã fãa wã. Ka la bilfu, a Zeova na n kɩtame tɩ zɩlem-be-nebã ne b ziri wã fãa menem zãnga.—Wilgri 21:8.

Ad ziri sã n wa menem tɩ lebg sɩd bal n be, na yɩ yolsg tɛkẽ n kõ-do!

[Tẽngr note]

[Goam sẽn tar pãngã, seb-neng a 4]

Yaa ziirã baoob la rat-tɩ-loog-nugã n kɩtd tɩ neb wʋsg yagdã

[Goam sẽn tar pãnga, seb-neng a 5]

Ziri yaa gomd sẽn pa sɩda, la pa gomd buud fãa sẽn pa sɩd n yaa ziri ye