Ket-y n wilgd-y Wẽnnaam y mi-beoogo
Ket-y n wilgd-y Wẽnnaam y mi-beoogo
“Wẽnnaam, yãmb tagsg yaa kãsems wʋsg mam yĩnga. Bãmb sõor waoogame.”—YƖƖL SÕAMYÃ 139:17.
1, 2. Bõe yĩng tɩ d segd n nan Wẽnnaam Gomdã, la bõe la yɩɩl-gʋlsdã yeel n wilg t’a nand-a lame?
YƖƖ bõn-kãseng tɛkẽ la b yã-yã. B ra manegda a Zeova roogã sẽn be Zerizalɛmmã tɩ maan-kʋʋdbã kãsem a Hilkiza yã “Zusoaba tõogã sebr a Moiiz sẽn da kõ wã be.” Tõogã sebr ning a Moiiz meng sẽn da gʋls sẽn zems yʋʋmd 800 sẽn deng b wakatã! Tags-y n ges-y Rĩm a Zozɩas sẽn da yaa wẽn-zoɛtã sũur sẽn yɩ noog to-to b sẽn tall sebrã n wa kõ-a wã. A kɩtame meng t’a seb-gʋlsd a Safã zẽk a koɛɛg n sɩng-a karengo.—2 Kibaya 34:14-18.
2 Rũndã-rũndã, neb milyõ rãmb tõe n paama Wẽnnaam Gomdã tõr bɩ a babs n karme. La rẽ yĩnga, a sẽn wae woto masã wã yĩng kɩtame t’a yõodã pa le waoogẽ bɩ? A yõodã pa boog baa bilf ye. Bala yaa Sẽn-tõeyã-fãa wã meng tagsa n be Biiblã pʋgẽ tõnd nafr yĩnga. (2 Tɩmote 3:16) Yɩɩl-gʋlsd a Davɩɩd wilga a sẽn tagsd bũmb ning Wẽnnaam Gomdã wɛɛngẽ n yeel woto: “Wẽnnaam, yãmb tagsg yaa kãsems wʋsg mam yĩnga. Bãmb sõor waoogame.”—Yɩɩl Sõamyã 139:17.
3. Bõe n wilgd t’a Davɩɩd ra yaa ned sẽn nong Wẽnnaam wʋsgo?
3 A Davɩɩd kell n wilga wakat fãa t’a nonga a Zeova, a Gomdã la bũmb nins a sẽn maan sẽn na yɩl tɩ b tõog n balm-a tɩ ta a raabã. Yɩɩn-nood nins a Davɩɩd sẽn gʋlsã fãa wilgda rẽnda. Wala makre, Yɩɩl Sõamyã 27:4 soabã pʋgẽ, a yeela woto: “Mam kota Zusoaba bũmb a yembre, yaa yõ wã la mam baooda. A yaa tɩ mam tõe n zĩnd Zusoaba yir hal tɩ ta m yõor tɛka, la m ges Zusoaba neerlmã, la m bao bãmb bãngra bãmb dooga pʋgẽ.” Hebre gom-biig ning b sẽn lebg ka tɩ “bao” wã rat n yeelame tɩ rɩk sẽk n bʋgse, vaees neere, bao ne sũ-noogo. Yaa vẽeneg t’a Davɩɩd ra yaa ned sẽn nong Wẽnnaam wʋsgo. A sɩd ra nonga bũmb nins fãa a Zeova sẽn da sõngd-a t’a bãngdẽ tɩ paasd a tẽebã pãngã. Yɩta sõma tɩ d rɩk a togs-n-taare.—Yɩɩl Sõamyã 19:8-12.
D wilg d mi-beoog d sẽn paam n mi Biiblã sõma wã
4. Daar a yembre, bõe n maan tɩ vʋʋsem sõngã kõ a Zezi sũ-no-kãsenga?
4 Pa f sẽn karem n zãag bɩ f sẽn yaa bãngd nebã nifẽ n kɩtd tɩ f paam n wʋm Wẽnnaam Gomdã võor sõma ye. B sã n pʋd n getẽ tɩ ned yaa bãngda, tõe n kɩtame t’a wuk a menga. Yaool n yaa sik-m-mens la sũ-tɩrs rãmbã sẽn mi tɩ b tara tẽeb ratmã la a Zeova maand lohorem n kɩtdẽ tɩ b bãngd a Gomdã. (Matɩe 5:3; 1 Zã 5:20) Daar a yembre, a Zezi tagsa neb kẽer sẽn paam tɩ b gʋls b yʋy saasẽ baa b sẽn yaa pãn-komsem dãmbã yelle, tɩ kɩt tɩ vʋʋsem sõngã kõ-a sũ-no-kãseng t’a yeel woto: “M Ba sẽn yaa arzãn la dũniyã Zusoaba, mam pẽgda yãmba, yãmb sẽn solg bõn-kãens ne yam dãmba la yẽesem dãmbã n yaool n vẽneg bõn-kãens ne kom-bõonega yĩnga.”—Luk 10:17-21.
5. Bõe yĩng t’a Zezi karen-biisã ra pa segd n ges bũmb nins b sẽn bãng Wẽnnaam Rĩungã wɛɛngẽ wã wa bõn-zaalga?
5 A Zezi sẽn pʋʋs woto ne a sũur fãa n sa wã, a wẽnemdame n gom ne a karen-biisã n yeele: “Bark bee neb nins sẽn yãt bũmb nins yãmb sẽn yãta zutu. Tɩ bõe, mam yeta yãmba tɩ Wẽnnaam no-rɛɛsdb wʋsg ne dĩm dãmb da rat n yãa bũmb nins yãmb sẽn yãtã, la bãmb ka yã ye, la b ra rat n wʋma bũmb nins yãmb sẽn wʋmdã, la bãmb ka wʋm ye.” A Zezi sagla a karen-biisã tɩ b ra ges bũmb nins b sẽn bãng Wẽnnaam Rĩungã wɛɛngẽ wã wa bõn-zaalg ye. Wẽnnaam pa vẽneg bõn-kãens n wilg a sõgen dãmb nins sẽn deng bãmbã ye. La yaa vẽeneg t’a pa bas tɩ neb nins b sẽn da get wa “yam dãmb la yẽesem dãmbã” a Zezi wakatẽ wã me wʋm b võor ye.—Luk 10:23, 24.
6, 7. a) Bõe yĩng tɩ d segd n wilg d mi-beoog bũmb nins d sẽn paam n mi Wẽnnaam zugã yĩnga? b) Rũndã-rũndã, welg-bʋg n be sɩd tũudmã ne ziri tũudmã sʋka?
6 Rũndã-rũndã, tõnd n segd n wilg a Zeova d mi-beoog bũmb nins a sẽn sõng-d tɩ d bãngã yĩng n yɩɩda. Bala a tũnuga ne “tʋm-tʋmd sẽn tũud sɩd la sẽn tar yamã” n vẽneg a nin-buiidã tɩ b wʋm a Gomdã võor wʋsg n yɩɩd pĩnda. (Matɩe 24:45; Daniɛll 12:10) No-rɛɛs a Daniɛll da goma saabã wakat yell n yeel tɩ ‘neb wʋsg na n kẽnga ka la ka, la bãngrã na n paasa wʋsgo.’ (Daniɛll 12:4) Rẽ yĩnga d pa sak n deeg tɩ rũndã-rũndã, bãngr ning d sẽn tar a Zeova zugã yaa wʋsgo, la t’a nin-buiidã paamda rɩlgr tẽebã wɛɛngẽ hal sõma sɩda?
7 Ad d sɩd mii Wẽnnaam nin-buiidã ne Babilon kãsengã neb n welg vẽenega! D sẽn yaa Wẽnnaam nin-buiidã, d mi-a lame la d mi a raabã sõma, tɩ Babilon kãsengã neb be likẽ. Woto kɩtame tɩ neb wʋsg sũy sẽn sãam ziri tũudmã yĩng sakd n lebgd tũudum hakɩkã neba. Bãmb dãmb la sẽn ‘pa rat n lagem ne [Babilon kãsengã] a yel-wẽnã’ pʋgẽ bɩ n “paam a toodã.” A Zeova ne a nin-buiidã boond nin-kãens tɩ b wa kiris-neb hakɩkã sʋka.—Wilgri 18:2-4; 22:17.
Mi-beoog rãmbã kaoogd n wata Wẽnnaam nengẽ
8, 9. Wãn-wãn la Aze 2:7 goamã pidsd rũndã-rũndã?
8 A Zeova ra pĩnd n goma a wẽn-doog ning b sẽn pa tõe yã ne nifã yell n yeel woto: “M na n digimda buuda fãa soolem tɩ b bõn-neebã wa ka tɩ m dooga pid ne arzɛgse.” (Aze 2:7) Gom-kãensã sẽn noogd sũurã b sẽn da pĩnd n togsã pidsa a Aze wakatã, Wẽnnaam nin-buiidã kell sẽn wa n lebs n me a roogã Zerizalɛmmã. Rũndã-rũndã, a Zeova gom-kãensã a Aze sẽn da pĩnd n togsã ket n pidsdame.
9 Neb sõor na maan milyõ rãmb zoe n kaoog n waa wẽn-do-kãng pʋgẽ n balemd Wẽnnaam “ne vʋʋsem la ne sɩda.” Yʋʋmd fãa, “buuda fãa soolem bõn-neebã” tus-kẽema n ket n kaoogd n wat a pʋgẽ. (Zã 4:23, 24, NW) Wala makre, koɛɛgã d sẽn moon dũniyã gill zug rɩẽ wã rapoor wilgdame tɩ neb 248327 n deeg lisg n wilg ne rẽ tɩ b rɩka b mens n kõ a Zeova. Woto wilgdame tɩ yaa sẽn na ta neb 680 n deegd lisg daar fãa. Nin-kãensã sẽn nong sɩdã la b tʋll n yɩ a Zeova Rĩungã koe-moondbã, yaa kaset sẽn wilgd vẽeneg tɩ yaa Wẽnnaam n sɩd bool-ba.—Zã 6:44, 65.
10, 11. Togs-y kibar sẽn wilgd sẽn yɩ to-to tɩ neb wa nong Biiblã sẽn sɩd yet bũmb ningã.
10 Nin-kãensã sẽn yaa sũ-tɩrs rãmbã wʋsg saka sɩdã, bala b bãnga “nin-sõng ne nin-wẽng n bake, la ned sẽn sakd [Wẽnnaam] ne ned sẽn ka sakd [Wẽnnaam] n bake.” (Malaki 3:18) Kelg-y-yã a Wayne ne a pag a Virginie kibarã. B ra yaa portɛstã rãmba, la b ra tara sogsg wʋsg b sẽn da sokd b mens tũudmã wɛɛngẽ n da pa mi b leoor ye. B ra kisa zabã tɩ kɩt tɩ b sã n da yãt tũudmã taoor dãmb sẽn ningd sodaas la zab-teed barkã, sãamd b sũyã. Sẽn na maan yʋʋma, hat daar fãa, a Wayne pag a Virginie ra karemda b wẽn-doogã neb kamba. La baa ne rẽ, b sẽn wa n kʋʋlã, b ra neeme tɩ b wẽn-doogã neb ra pa ye nand-b ye. B yeela woto: “Wẽn-doogã taoor dãmb ned baa a ye ra pa le kaagd tõnd wall b wilgdẽ tɩ d tẽebã yell pak-b lame ye. B sẽn da rat yaa tõnd ligdã bala. Tõnd wa n da pa mi d sẽn maandg ye.” Bũmb sẽn wa n sãam b sũy n yɩɩg yaa wẽn-doogã taoor dãmb sẽn wa n sak tɩ rap tõe n kẽ ne rapã.
11 Yaa wakat kãng la a Wayne ne a Virginie bi-pugl biig sẽn yaa pʋg-sad lebg a Zeova Kaset soaba, t’a ma wã me pʋge. Baa rẽ sẽn pa yɩ a Wayne ne Virginie noog sɩngrẽ wã, b wa n toeema yam n sak n na n zãms Biiblã. A Wayne yeela woto: “Kiis a tãab bal pʋgẽ, tõnd sẽn bãng Biiblã to-to wã yɩɩga d sẽn zãms yʋʋm 70 pʋgẽ wã. Tõnd da zɩ n wʋm meng tɩ Wẽnnaam yʋʋr la a Zeova ye. D leb n da pa mi baa fʋɩ Rĩungã la tẽng zug arzãnã wɛɛngẽ me ye.” Sẽn pa yã n kaoose, a Wayne ne a pag a Virginie sɩnga tigissã kẽnd la b moond koɛɛgã. A Virginie yeela woto: “Tõnd tʋll n togsa nebã fãa sɩdã.” B yiibã fãa reega lisg yʋʋmd 2005 soabã pʋgẽ. B ned kam fãa ra looga yʋʋm 80 sasa kãnga. B yeela woto: “Masã, tõnd paam n bee kiris-neb hakɩk sẽn sɩd get taab yell sʋka.”
D wilg d mi-beoog b sẽn sõng-d tɩ d tõe n maan tʋʋm sõma fãa wã yĩnga
12. Bõe la a Zeova kõt a nin-buiidã wakat fãa, la bõe la d segd n maan n dɩ rẽ yõodo?
12 A Zeova sõngda a nin-buiidã wakat fãa tɩ b maand a raabã. Wala makre, a Nowe wakatẽ wã, a wilg-a-la a sẽn segd n ka koom koglgã to-to wã vẽenega. A Nowe sɩd tõog n kaa koglgã tɩ zems kɛpɩ. Bõe yĩnga? Bala “bũmb nins fãa Wẽnnaam sẽn yeel yẽ t’a maana, yẽ maaname.” (Sɩngre 6:14-22) Rũndã-rũndã me, a Zeova sõngda a nin-buiidã hal sõma sẽn na yɩl tɩ b tõog n maan a raabã. Tõnd pipi tʋʋmd yaa moon Wẽnnaam Rĩungã a sẽn luglã koe-noogo, la d sõng sũ-tɩrs rãmbã tɩ b lebg a Zezi Kirist karen-biisi. La tõnd me sã n dat n tõog d tʋʋmdã, d segd n yɩɩ sakdb wa a Nowe. D segd n sak n tũu noy nins a Zeova sẽn tũnugd ne a Gomdã la a siglgã n kõt-dã.—Matɩe 24:14; 28:19, 20.
13. A Zeova tũnugda ne bõe n zãmsd tõndo?
13 Sẽn na yɩl n tõog n pids tʋʋm kãngã, d segd n bãnga d sẽn na n tall Wẽnnaam Gomdã sẽn yaa d pipi tʋʋm-teoogã n tʋm to-to tɩ yɩ sõma. Bala “a bee bark zãmsg yĩnga, la tɩ wilg ned a kongre, la saglg yĩnga, la tɩ zãms tɩrlem tɩ Wẽnnaam ned tõe n bɩ la a maan tʋʋm sõma fãa.” (2 Tɩmote 2:15; 3:16, 17) A Zeova tũnugda ne tigingã n zãmsd-d yɛl wʋsg sẽn tar yõod wa a sẽn da maand to-to pipi kiris-nebã wakatẽ wã. Rũndã-rũndã, semen fãa, tigims 99770 wã sẽn be dũniyã gill zugã pʋsẽ, d paamda Wẽnnaam tʋʋmdã lekoll la tʋʋmdã tigisg tɩ sõngd-d koe-moonegã wɛɛngẽ. Rẽ yĩnga yãmb wilgda Wẽnnaam y mi-beoog tigiss kãensã sẽn tar yõodã yĩnga, n pa vaand b kẽnd la y tũud bũmb nins y sẽn zãmsd be wã bɩ?—Hebre dãmba 10:24, 25.
14. Wãn-wãn la a Zeova sõgen dãmbã wilgd-a b mi-beoog b sẽn paam n tʋmd a tʋʋmdã? (Y tõe n gesa seb-neng 27 n tɩ ta 30 wã me n leoke.)
14 Wẽnnaam nin-buiidã sõor na maan neb milyõ rãmbã sẽn be dũniyã gill zugã sẽn modgd ne koɛɛgã moonegã, b wilgda b mi-beoog zãmsg ning b sẽn paamdã yĩnga. Wala makre, rɩẽ, koe-moondb 6741444 wã rɩka lɛɛr 1333966199 n tʋm tʋʋmdã nens toɛy-toɛy pʋgẽ n zãms Biiblã ne neb 6286618. Woto yaa kibay kẽer sẽn be rapoorã sẽn wilgd koɛɛgã d sẽn moon dũniyã gill zug to-to wã pʋgẽ sẽn kõt-d sũ-noogo. D sagend-y lame tɩ y maag y yĩng n karem kiba-kãensã tɩ na n kenga y raood wa pipi kiris-nebã sẽn da wʋmd koe-moonegã kibay tɩ ra kengd b raoodã.—Tʋʋma 1:15; 2:5-11, 41, 47; 4:4; 6:7.
15. Bõe yĩng tɩ ned baa a ye pa segd n tags t’a sẽn maand bũmb ning ne a sũur fãa n kõt a Zeova wã paoodame?
15 Wẽnnaam a Zeova nin-buiidã sẽn lagemd b koees n pẽgd-a wʋsg woto yʋʋmd fãa wã, b wilgda ne b sũy fãa tɩ b sẽn paam n mi-a la b yaa a Kaset rãmbã yaa zu-no-kãsenga. (Ezai 43:10) Hakɩka, d tõe n yeelame tɩ pẽgr maand nins d saam-biis nins sẽn kʋʋlã, sẽn ka-b laafɩ wã la koms rãmbã sẽn kõt Wẽnnaamã yaa wa pʋg-kõorã kũunã. La d miime t’a Zeova ne a Biriblã sũy nooma ne neb nins fãa sẽn maand Wẽnnaam daabã ne b sũy fãa wa b sẽn tõe tɛkã.—Luk 21:1-4; Galat dãmba 6:4.
16. Seb-bʋs sẽn sõngd-d tɩ d zãmsd nebã Biiblã la Wẽnnaam kõ-d yʋʋm nins sẽn nan loogã pʋgẽ?
16 Zãmsg ning d sẽn paamd koe-moonegã wɛɛngẽ wã toor sẽn ka be, a Zeova tũnugda ne a siglgã n kõt-d sɛb sẽn sõngd-d tɩ d zãmsd nebã Biiblã sõma. Seb-kãens kẽer d sẽn paam yʋʋm nins sẽn nan loogã pʋgẽ wã sʋka, d tõe n sõdga bãmbã: La vérité qui conduit à la vie éternelle, Y Tõe n Vɩɩnda Wakat Sẽn-kõn-sa Tẽng zug Arzãnẽ, Bãngr sẽn tar n debd vɩɩm sẽn-kõn-saẽ wã la sẽn nan pa kaoose, Biiblã sɩd yetame tɩ bõe? Neb nins sẽn sɩd nand seb-kãensã wʋsgã tʋmda ne-b sõma koe-moonegã pʋgẽ.
D tall Biiblã yetame sebrã n tʋm sõma
17, 18. a) Biiblã yetame sebrã zĩ-bʋs zug la y nong n sõsd koe-moonegã pʋgẽ? b) Bõe la tigims sull yel-gɛt yeel sebrã zugu?
17 Biiblã yetame sebrã sags 19 wã ne a vẽnegrã zĩis toɛy-toɛyã fãa võor wʋmb sẽn yaa nana wã sõngd-d-la koe-moonegã pʋgẽ hal wʋsgo. Wala makre, a sak 12 soabã gom-zug yaa: “D maan sẽn tat Wẽnnaam yam.” Sag-kãngã pʋgẽ, b wilgda karen-biigã a sẽn tõe n maan to-to n lebg Wẽnnaam zoa. La neb wʋsg yaool n da zɩ n tags wall b tẽ meng tɩ ninsaal tõe n yɩɩ Wẽnnaam zoa ye. (Zak 2:23) Nebã manesem yaa wãn ne seb-kãngã b sẽn nan yiisã?
18 Ostrali tigims sull yel-gɛt a ye yeelame tɩ Biiblã yetame sebrã goam “nooma nebã wʋsgo, tɩ kɩtdẽ tɩ b sakd n sõsd ne-d a zug tao-tao.” A yeelame me tɩ sebrã tall n tʋm yaa nana hal n “kɩt tɩ koe-moondb wʋsg sũ-noog paas ne koe-moonegã.” Yel-gɛtã paasame tɩ “kẽer boonda seb-kãngã tɩ sãnem gilgu, la b bee bʋʋm.”
19-21. Togs-y neb kibay sẽn wilgd Biiblã yetame sebrã yõodo.
19 Gɩyann soolmẽ wã, pag a ye yeela so-pakd sẽn moon-a koɛɛgã woto: “Segd n yaa Wẽnnaam n tʋm foo.” Pagã sẽn da vɩ ne rao ningã ra loog n bas-a-la ne kom-kɩds a yiibu, tɩ ra nan pa kaoos ye. So-pakdã laka Biiblã yetame sebrã pipi sakã, n zẽk a koɛɛg n karem a sull 11 wã sẽn be gom-zu-bil ning sẽn sokd tɩ ‘Wẽnnaam tagsg yaa bõe ne wẽgbã?’ tẽngrã. So-pakdã yeela woto: “Pagã sẽn wʋm bũmb ning b sẽn wilg sullã pʋgẽ wã, kẽe-a-la wʋsgo, hal t’a yik n kẽng a butikã yaang n tɩ raag nintãm.” Pʋg-kãngã sak n sɩnga Biiblã zãmsg ne saam-bi-poak sẽn be b babgẽ wã hal tɩ kẽngd taoore.
20 A José sẽn yit Ɛspaynã pag maana agsɩdã tɩ tũ ne a yõore. A José rɩka dorg n na n bao yolsg a toogã pʋgẽ la a bao sõngr logtoɛɛmb nengẽ me. Baasg zãnga, a José sẽn da tʋll ne a sũur fãa n bãng bũmb ning sẽn kɩt tɩ Wẽnnaam bas t’a pagã ki wã, logtoɛɛmbã pa tõog n leok ye. Daar a yembre, a José sega a tʋʋmd-n-taag a Francesc t’a sagl-a t’a wa tɩ b sõs Biiblã yetame sebrã sak 11 wã zugu. A sag-kãng gom-zugã sokdame tɩ “bõe yĩng tɩ Wẽnnaam bas tɩ namsgã beẽ?” B sẽn wilg a José Biiblã sẽn leokd sok-kãngã to-to wã n paas b sẽn dɩk karen-saamb ne a karen-biig makrã, a wʋma neer hal tɩ kẽe a sũur wʋsgo. A saka ne a sũur fãa n na n zãms Biiblã. A tol n kẽnga rasem a yiib tigis-kãsenga, la rũndã-rũndã menga, a kẽnda tigissã Rĩungã Roogẽ.
21 A Roman sẽn yaa omdafɛɛr sẽn tar yʋʋm 40 n yit Poloynã ra nanda Wẽnnaam Gomdã a sẽn da zãmsdã. La a tʋʋmdã sẽn da rɩkd a sẽkã yĩnga, a ra pa paam n zãms n zãag zĩig ye. Baasg zãnga, a wa n kẽnga rasem a tãab tigis-kãseng tɩ b tɩ kõ-a Biiblã yetame sebrã. Dẽ poore, a toeema yam wʋsgo. A yeela woto: “Seb-kãngã pʋgẽ, Biiblã sẽn sɩd yet bũmb ninsã yaa vẽeneg fasɩ.” Rũndã-rũndã, a Roman zãmsda Biiblã hal tɩ kẽngd taoor sõma.
D ket n wilgd Wẽnnaam d mi-beoogo
22, 23. Wãn to la d tõe n ket n wilgdẽ tɩ d nanda d saagrã?
22 D rasem a tãab tigis-kãsengã gom-zug sẽn yɩ “D fãagrã ta n saame” wã wilgame tɩ kiris-neb hakɩkã rata ne b sũy fãa tɩ Wẽnnaam fãag-b wakat fãa yĩnga, wa a sẽn pʋlem-b a Zezi Kirist maoongã maasem yĩngã. D sã n dat n wilg tɩ d sɩd nanda d saagrã sẽn yaa kãsengã, d na n ket n lakda d mens ne tʋʋm-kɩɩmsã la d ‘sakd Wẽnnaam sẽn vɩ’ wã.—Hebre dãmba 9:12, 14.
23 Hakɩka, d sẽn ne tɩ sẽn yɩɩd koe-moondb milyõ a yoobã ket n maand Wẽnnaam daabã wakat fãa wã, yaa yel-solemd menga. Bala d neeme tɩ yɛl nins fãa sẽn be dũni kãngã pʋgẽ wã tusda nebã tɩ b sak b mensã ratem bala. Woto leb n wilgdame t’a Zeova nin-buiidã getame tɩ b sẽn paam n maand a raabã yaa zu-no-kãsenga, tɩ b nand rẽ hal wʋsgo. Bala b miime tɩ b “sẽn tʋmd Zusoaba tʋʋmda ka na n yɩ zaalem ye.” Bɩ d ket n wilgd Wẽnnaam d mi-beoog woto wakat fãa.—1 Korẽnt dãmba 15:58; Yɩɩl Sõamyã 110:3.
Y na n leokame tɩ bõe?
• Yɩɩl-gʋlsdã sẽn wilg Wẽnnaam a mi-beoog bũmb nins a sẽn da kõt-a tɩ paasd a tẽebã yĩnga wilgd-d-la bõe?
• Wãn to la Aze 2:7 goamã pidsd rũndã-rũndã?
• Wãn-wãn la a Zeova sõng a nin-buiidã sẽn na yɩl tɩ b maan a raabã sõma?
• Bõe la d tõe n maan n wilg a Zeova d mi-beoog a sõmblmã yĩnga?
[Zãmsgã sogsgã]
[Taablo, seb-neng 27-30]
A ZEOVA KASET RÃMBÃ TƲƲMD RAPOOR DŨNIYÃ GILL ZUGU, YƲƲMD 2006
(Ges-y volim relie wã pʋgẽ)
[Foto rãmba, seb-neng 31]
A Zeova sõngd-d-la hal sõma tɩ d maand a raabã