D lagem taab n pẽg a Zeova yʋʋrã

‘D lagem n pẽg [a Zeova] la d zẽk a yʋʋre.’—YƖƖL SÕAMYÃ 34:4.

1. A Zezi sẽn wa n be tẽngã zugã, mak-sõng bʋg la a kõ-yã?

YƲƲMD 33 Nizã rasem 14 yʋngo, a Zezi ne a tʋm-tʋmdbã tigma taab Zerizalɛm yĩngr doog pʋgẽ n yɩɩll n pẽg a Zeova. (Matɩe 26:30) Ra yaa a yaoolem yʋng a sẽn da na n yɩɩll n pẽg a Zeova ne a tʋm-tʋmdbã. La b sẽn yɩɩll b tigisgã baasgẽ n pẽg a Zeova wã sɩd zemsame. A Zezi tʋʋmã sɩngrẽ n tãag baasgẽ wã, a pẽga a Ba wã la a modg tɩ nebã bãng a yʋʋrã. (Matɩe 4:10; 6:9; 22:37, 38; Zã 12:28; 17:6) Sɩda, a sak n maana bũmb ning yɩɩl-gʋlsdã sẽn yet nebã fãa tɩ b maanã. Yɩɩl-gʋlsdã yeela woto: “D lagem n pẽg Zusoabã la d zẽk bãmb yʋʋre.” (Yɩɩl Sõamyã 34:4) Ad woto sɩd yaa mak-sõng tõnd sẽn segd n tũ!

2, 3. a) Wãn to la d mi tɩ Yɩɩl Sõamyã 34 soabã ra wilgda bũmb sẽn da segd n wa pids kaoosg zugẽ? b) Bõe yell la d na n gom sõs-kãngã la sẽn pʋgdã pʋgẽ?

² Tʋm-tʋmd a Zã me naaga a Zezi n yɩɩll n pẽg a Zeova yĩngr doogẽ wã. La wakat a wãn poore, a Zã maana kaset ne bũmb a to sẽn yaa toor fasɩ ne bãmb sẽn da naag taab n yɩɩllã. A yãa b sẽn ka a Zusoabã ne nin-wẽns a yiib ra-lugds zut n na n kʋ. Rom sodaasã kaoa nin-wẽns a yiibã kars sẽn na yɩl tɩ b ki tao-tao. La a Zã wilgame tɩ b pa kao a Zezi karsã ye.  Sodaasã sẽn wa n ta a Zezi zĩigẽ wã, b mikame t’a ra zoe n kiime. A Zã sebrã pʋgẽ, a wilgame tɩ rẽ pidsa Yɩɩl Sõamyã 34 verse ning sẽn yet t’a Zezi ‘kõabã baa a yembr kõn tol n kaoogã.’—Zã 19:32-36; Yɩɩl Sõamyã 34:21)

³ Yɩɩl Sõamyã 34 soabã zĩis a taab me n tar yõod ne kiris-nebã. Rẽ n so tɩ sõs-kãngã la sẽn pʋgda wã pʋgẽ, d na n lebg n gesa a Davɩɩd sẽn gʋls yɩɩll kãngã sasa ninga, la d ges yɩɩllã fãa sẽn daood-d to-to.

A Davɩɩd zoeeme n põs a Sayull

4. a) Bõe yĩng tɩ b zae a Davɩɩd t’a na n wa lebg Israɛll rĩma? b) Bõe yĩng t’a Sayull sũur da noom wʋsg ne a Davɩɩde?

⁴ A Davɩɩd sẽn wa n yaa bi-biigã, rẽ t’a Sayull ra yaa Israɛll rĩma. La a Sayull wa n lebga kɩɩsda, t’a Zeova pa le nong-a ye. Yaa rẽ n so tɩ no-rɛɛs a Sãmwɛll yeel-a woto: “Dũnda, Zusoaba na n sãama yãmb naamã, la b na n dɩka y naama n kõ ned a to sẽn são yãmba.” (1 Sãmwɛll 15:28) Rẽ poore, a Zeova tʋma a Sãmwɛll t’a tɩ zae a Zese kom-dibli wã yao zʋʋg a Davɩɩd t’a na n wa lebg Israɛll rĩma. Wakat kãng me, a Sayull sẽn da pa le tar Wẽnnaam vʋʋsem sõngã yĩng kɩtame t’a sũurã ra pa noom ye. A Davɩɩd ra yaa ned sẽn mi kʋnd wẽeb sõma. B tall-a lame n kẽng Gibeya t’a tɩ tʋmd rĩmã nengẽ. A Davɩɩd sẽn da wẽed kʋndã ra nooma a Sayull hal t’a ‘sũur yɩ noog wʋsg ne-a.’—1 Sãmwɛll 16:11, 13, 21, 23.

5. Bõe yĩng t’a Sayull toeem a manesmã ne a Davɩɩde, la bõe la a Davɩɩd wa n kong n maane?

⁵ Tarẽ-tarẽ, a Zeova wilgame t’a bee ne a Davɩɩde. A sõng-a lame t’a tõog Filisti nin-wobg a Goliate, la a kell n ning-a bark tɩ Israɛll nebã pẽg-a, a sẽn mi zabrã yĩnga. La a Zeova sẽn da ningd a Davɩɩd barkã yĩng kɩtame t’a Sayull maand sũ-kiiri, hal n wa kisgd a Davɩɩd menga. Rĩm a Sayull maka naoor a yiib fãa n na n tão a Davɩɩd ne kãnde, a sẽn da wa n wẽed kʋnd a Sayull taoorã sasa. La naoor a yiibã fãa, a Davɩɩd lakame tɩ kãndã pa ta-a ye. A Sayull sẽn wa n mak naoor a tãab-n-soab n na n kʋ-a wã, a Davɩɩd bãngame t’a segd n zoe n põsame. A Sayull sẽn da ket n maand a sẽn tõe fãa n na n yõk a Davɩɩd n kʋ wã yĩnga, a Davɩɩd wa n kong n yii Israɛll tẽngẽ wã n na n tɩ bao zĩig n soonde.—1 Sãmwɛll 18:11; 19:9, 10.

6. Bõe yĩng t’a Sayull kɩt tɩ b kʋ Noob tẽngã neba?

⁶ A Davɩɩd sẽn da wa n zoet n yit Israɛllã, a tek n yalsa Noob tẽngẽ wã. Yaa beenẽ la a Zeova sɛk-roogã ra be. Wõnda kom-bɩɩs a taab me n tũ a Davɩɩd n yi Israɛlle, t’a bõos rɩɩb ne koom yẽ ne nin-bãmba yĩng Noob tẽngẽ wã. La a Sayull wʋmame tɩ maan-kʋʋdbã kãsem kõ a Davɩɩd ne a nebã rɩɩbo, la a kõ-b a Goliat sʋʋgã, a Davɩɩd sẽn da rɩk a Goliat kũumẽ wã. A Sayull sũurã yika wʋsg t’a kɩt tɩ b kʋ Noob tẽngã nebã fãa n naag maan-kʋʋdb 85.—1 Sãmwɛll 21:2, 3; 22:12, 13, 17-19; Matɩe 12:3, 4.

A leb n zoe n põsame

7. Bõe yĩng tɩ Gat ra pa a Davɩɩd soondg zĩiga?

⁷ A Davɩɩd sẽn yi Noob tẽngẽ wã, a zoee kilo 40 n kẽng Gat sẽn yaa Filisti rãmbã tẽng a yembrẽ, n tɩ bõos rĩm a Akɩs n na n soond be. Yaa Gat tẽngã pʋgẽ la a Goliat ra yita. Tõe t’a Davɩɩd ra pa tagsd t’a Sayull na n bʋʋg-a-la hal Gat ye. La pa yã n kaoos la Gat rĩmã sõgen dãmb bãng a Davɩɩd ye. A Davɩɩd sẽn wʋm tɩ nebã bãng-a lame wã, a ‘zoea Gat naab a Akɩs wʋsgo.’—1 Sãmwɛll 21:11-13.

8. a) Bõe la Yɩɩl Sõamyã 56 wilgd tõnd tɩ d bãng bũmb ning sẽn paam a Davɩɩd Gat tẽngẽ wã? b) A Davɩɩd maana bõe n paam n põse?

⁸ Rẽ poore, Filisti nebã yõka a Davɩɩde. Tõe tɩ yaa wakat kãng la a Davɩɩd sẽn gʋls yɩɩll ning a sẽn yɩɩnd n bõosd a Zeova ne a sũur fãa woto wã: “Sui-y mam nintãma y ko-waoog pʋgẽ.” (Yɩɩl Sõamyã 56:1, 9 ) Dẽnd a wilgame t’a kɩsa sɩd t’a Zeova mi a zu-loeesã, la t’a na n gesa a yell la a kogl-a ne nonglem. A Davɩɩd maana yam me n na n belg Filisti rĩmã. A maana wa a yaa gãeenga. Rĩm a Akɩs  sẽn yã rẽ wã, a zaba a sõgen dãmbã tɩ bõe yĩng tɩ b talld gãeeng n wat yẽ nengẽ. Yaa vẽeneg t’a Zeova sõnga a Davɩɩd yel-kãngã pʋgẽ. B riga a Davɩɩd n yiis tẽngã pʋgẽ, t’a paam n põs yɛsa.—1 Sãmwɛll 21:14-16.

9, 10. Bõe yĩng t’a Davɩɩd gʋls Yɩɩl Sõamyã 34 soabã, la tõe t’a ra tagsda ãnd dãmb me yell yɩɩllã gʋlsg wakate?

⁹ Biiblã pa vẽnegd tɩ d bãng a Davɩɩd poorẽ dãmbã sã n tũ-a lame n kẽng Gat tẽngã, bɩ b sã n kell n paa tẽn-bi sẽn pẽ ne Israɛll tẽngã n na n kogl-a ye. La sẽn yaa a soab fãa, a Davɩɩd sẽn tigim a nebã n na n togs a Zeova sẽn da leb n fãag-a to-to wã, b sũyã segd n yɩɩ noogo. Yaa yel-kãngã n kɩt t’a gʋls Yɩɩl Sõamyã 34 soabã, wa yɩɩllã sɩngr goamã sẽn wilgdã. Yɩɩl Sõamyã 34 verse a 2 n tãag a 8 wã pʋsẽ, a Davɩɩd pʋʋsda a Zeova bark a sẽn fãag-a wã yĩnga, la a boond a poorẽ dãmbã tɩ b wa naag-a n pẽg a Zeova, bala yẽ la a nin-buiidã Fãagd sẽn yaa Kãsengã.—Yɩɩl Sõamyã 34:4, 5, 8.

¹⁰ A Davɩɩd ne a nebã tɩ soonda Adulam tãn-bokẽ wã sẽn be Israɛllã, sẽn zems kilo 15 ne Gat tẽngã. Israɛll neb nins sũy sẽn da pa noom ne rĩm a Sayull sẽn dɩt a naamã to-to wã bʋʋga a Davɩɩd beene. (1 Sãmwɛll 22:1, 2) Tõe tɩ yaa nin-bãmbã yell la a Davɩɩd sẽn da gomd Yɩɩl Sõamyã 34:9-23 pʋsẽ wã. Verse kãensã sẽn yet bũmb ningã tara yõod ne tõnd me rũndã-rũndã, la yaa vẽeneg tɩ d sã n sõs yɩɩllã verse rãmb fãa zut n paase, na n naf-d lame.

Sẽn da pak a Davɩɩd n yɩɩdã n pak yãmb me bɩ?

11, 12. Bʋʋm bʋs yĩng n kɩt tɩ d segd n pẽgd a Zeova wakat fãa?

¹¹ “Mam na n waooga Zusoaba daar fãa. Mam noor pẽgda bãmba n ka basdẽ ye.” (Yɩɩl Sõamyã 34:2) A Davɩɩd sẽn da zoet n soondẽ wã yĩnga, ra pa segd n yaa nana ne-a t’a paam rɩɩb la bũmb a taab ye. La a sẽn yeel bũmb ning yɩɩllã pʋgẽ wã wilgdame t’a pa bas tɩ zu-loe-kãngã gɩdg-a t’a pa pẽg a Zeova ye. Ad woto sɩd yaa mak-sõng d sẽn segd n tũ  zu-loees wakate! D sẽn wa n be zĩig ning fãa, yaa lekollẽ wã, d tʋʋmã zĩigẽ, yaa ne d saam-biisã bɩ koe-moonegã wakat me, bũmb ning sẽn segd n pak tõnd n yɩɩd yaa d pẽg a Zeova. D tara bʋʋm wʋsg n na n maan dẽ. Wala makre, d pa tõe n bãng bõn-neeb nins a Zeova sẽn naan tɩ kõt-d sũ-noogã fãa n sa ye. D we n ges a sẽn tũnug ne a siglgã babg ning sẽn be tẽngã zugã n maan bũmb ninsã! Rũndã-rũndã, a Zeova kɩtame tɩ nin-sakdb tʋm a tʋʋmdã wʋsgo, baa nin-kãensã sẽn pa zems zãngã. Yaa vẽeneg tɩ dũniyã nin-kãsemsã sẽn tõog n maan bũmb ninsã pa tõe n dɩk n mak ne Wẽnnaam sẽn maan bũmb ninsã ye. A Davɩɩd ra gʋlsa woto me: “Zusoaba, ba a yembr ka be wẽnnaam dãmba sʋk n wẽnd yãmb ye, la sẽn zem yãmb tʋʋma ka be ye.” (Yɩɩl Sõamyã 86:8) Rẽ yĩnga, yãmb pa tagsd tɩ gom-kãensã yaa sɩd sɩda?

¹² A Zeova tʋʋm kãsemsã yĩngã, tõnd me rat n pẽg-a-la wa a Davɩɩde. D sũyã me nooma wʋsgo, d sẽn mi tɩ yaa a Davɩɩd yageng a Zezi Kirist n yaa Wẽnnaam Rĩungã Rĩma. (Wilgri 11:15) Woto wilgdame tɩ dũni kãngã saab kolgame. Yaa sẽn na ta neb milyaar a yoob n tõe n kong vɩɩm sẽn ka sɛtã. Rẽ n so tɩ yaa masã la d segd n wilg nebã Wẽnnaam Rĩungã sẽn yaa a soaba, n togs-b Rĩungã sẽn na n wa maan bũmb nins ka la bilfu, la d sõng-b tɩ b naag tõnd n pẽg a Zeova. Vẽenega, bũmb ning sẽn segd n pak tõnd n yɩɩd yaa d maan d sẽn tõe fãa n sõng nebã tɩ b sak ‘koe-noogã’ masã tɩ nan ket n tõeyã.—Matɩe 24:14.

13. a) Ãnd la a Davɩɩd ra pẽgda, la nin-bʋs buud me n maan wa yẽ? b) Bõe n kɩtd tɩ sik-m-mens rãmbã wat n naagd kiris-nebã rũndã-rũndã?

¹³ “Mam sũur nooma ne Zusoabã. Naong rãmb na n wʋm n paama sũ-noogo.” (Yɩɩl Sõamyã 34:3) Gom-kãensã pa rat n wilg t’a Davɩɩd ra wukda a meng a sẽn tõog n maan bũmb ninsã yĩng ye. Wala makre, a pa gom a sẽn tõog n maan to-to n belg Gat rĩmã yell n wuk a meng ye. A ra miime t’a sẽn wa n be Gat tẽngẽ wã, yaa a Zeova n kogl-a, la tɩ yaa ne a Zeova sõngr la a sẽn tõog n põsã. (Yelbũna 21:1) Dẽnd a Davɩɩd ra pa pẽgd a meng ye, yaa a Zeova la a ra pẽgda. A sẽn maan woto wã kɩtame tɩ naong rãmbã, rat n yeel tɩ sik-m-mens rãmbã lebg a Zeova zo-rãmba. A Zezi me pẽga a Zeova yʋʋrã, tɩ kɩt tɩ sik-m-mens rãmbã sẽn sakd n deegd zãmsgã lebg a Zeova zo-rãmba. Rũndã-rũndã, sik-m-mens rãmbã wat n naagda kiris-neb nins sẽn paam vʋʋsem sõng zaeebã, tɩ b Zusoab yaa a Zezi wã. (Kolos rãmba 1:18) Sik-m-mens rãmbã sã n wʋmd Wẽnnaam balemdbã sẽn pẽgd a yʋʋrã, la b wʋmd koɛɛg ning sẽn be Biiblã pʋgẽ wã võor ne Wẽnnaam vʋʋsem sõngã maasem, kẽeda b sũyã tɩ b rat n naag kiris-nebã n pẽg Wẽnnaam.—Zã 6:44; Tʋʋma 16:14.

Tigissã kengda d tẽebã

14. a) A Davɩɩd da rat n pẽgda a Zeova yẽ a yembr bal bɩ? b) Mak-sõng bʋg la a Zezi kõ tõnd tigissã kẽnd wɛɛngẽ?

¹⁴ “D lagem n pẽg Zusoabã la d zẽk bãmb yʋʋre.” (Yɩɩl Sõamyã 34:4) A Davɩɩd ra pa rat n pẽgd a Zeova yẽ a yembr bal ye. A boola a tũud-n-taasã tɩ b wa naag-a n pẽg Wẽnnaam yʋʋrã. A Zezi Kirist sẽn yaa Davɩɩd Kãsengã me ra nong n pẽgda a Zeova nebã sʋka. Wala makre, a ra pẽgd-a-la karen-dotẽ wã, Zerizalɛm wẽn-doogẽ wã kibs rãmbã sasa, la a sẽn wat n be ne a karen-biisã sasa. (Luk 2:49; 4:16-19; 10:21; Zã 18:20) Tõnd me tõe n maana wa a Zezi n naagd d tẽed-n-taasã n pẽgd a Zeova wakat buud fãa, sẽn tɩ yɩɩd fãa d sẽn ‘mi tɩ daarã kolgdame wã yĩnga.’—Hebre dãmba 10:24, 25.

15. a) Wẽnnaam sẽn sõng a Davɩɩdã, wãn to la rẽ naf a Davɩɩd tũud-n-taasã? b) Wãn to la tigissã kẽnd nafd tõndo?

¹⁵ “Mam baooda Zusoabã la bãmb leokda maam n yolsd maam ne m dabeema fãa.” (Yɩɩl Sõamyã 34:5) A Zeova sẽn sõng a Davɩɩdã ra yaa bũmb sẽn tar yõod wʋsg a Davɩɩd nifẽ. Rẽ n so t’a yeel tɩ “naong soab  boolame, la Zusoaba wʋmame la b fãaga yẽnda ne a tooda fãa.” (Yɩɩl Sõamyã 34:7) Tõnd sã n tigimd ne d tẽed-n-taasã, d tõe n togs-b-la kibay sẽn wilgd a Zeova sẽn sõng tõnd zu-loees pʋsẽ to-to. Rẽ na n kenga b tẽebã, wala a Davɩɩd goamã me sẽn keng neb nins sẽn da be a poorẽ wã tẽebã. A Davɩɩd tũud-n-taasã ra geta a Zeova, tɩ b nensã pɩnd tɩ yãnd ka tar-b ye. (Yɩɩl Sõamyã 34:6) Baa b sẽn da zoet n soond a Sayull yĩngã, b pa zoe yãnd ye. B sẽn da kɩs sɩd tɩ Wẽnnaam bee ne a Davɩɩdã, b nensã ra pɩndame. Woto me, neb nins sẽn nan bãng Wẽnnaam paalmã, n paas neb nins sẽn yaa kiris-neb hakɩk hal sẽn kaoosã fãa teega a Zeova. B mensã sẽn yãt a Zeova sẽn sõngd-b to-to wã kɩtame tɩ b nensã pɩnda, tɩ wilgdẽ tɩ b rat n kell n yɩ sakdba.

D tall naneb ne malɛgsã sõngre

16. Wãn to la a Zeova kɩtd t’a malɛgsã sõngd tõndo?

¹⁶ “Zusoaba malɛk rãmb gũbgda neb nins sẽn zoet bãmbã n fãagd bãmba.” (Yɩɩl Sõamyã 34:8) A Davɩɩd ra pa tagsd tɩ yaa yẽ bal la a Zeova sõngd ye. Yaa sɩd t’a Zeova ra yãk-a lame t’a na n wa lebg Israɛll rĩma. La a ra miime t’a Zeova kɩtdame t’a malɛgsã gũud a sõgen dãmb nins fãa sẽn yaa sakdbã, b yaa nin-kãsems tɩ b pa nin-kãsems me. Rũndã-rũndã, Wẽnnaam balemdb hakɩkã me paamdame t’a Zeova kogend-ba. Alemayn, Ãngola, Malawi la Mozãmbik n paas tẽns a taab pʋsẽ, goosneema rãmbã baoome n na n menes a Zeova Kaset rãmbã. La b pa tõog ye. Tẽn-kãensã pʋsẽ menga, a Zeova Kaset rãmbã sõor tara paasgo, tɩ b naagd taab n pẽgd Wẽnnaam yʋʋrã. La bõe yĩng tɩ yaa woto? Bala a Zeova kɩtdame t’a malɛgsã kogend a nin-buiidã la b wilgd-b sore.—Hebre dãmba 1:14.

17. Wãn to la Wẽnnaam malɛgsã sõngd tõndo?

¹⁷ Sẽn paas me, a Zeova malɛgsã tõe n kɩtame tɩ b yiis ned ning fãa sẽn be a Zeova nin-buiidã sʋk n yaool n dat n sãam a taabã tẽebo. (Matɩe 13:41; 18:6, 10) La baa wakat ninga tõnd sã n pa mi, d bãng tɩ malɛgsã menesda bũmb nins fãa sẽn tõe n gɩdg tõnd tɩ d ra tʋm Wẽnnaam tʋʋmdã, la b kogend-d tɩ bũmb ra wa sãam d zems-n-taarã ne a Zeova ye. Sẽn tɩ yɩɩd fãa, b sõngd-d lame tɩ d moond “koe-noog sẽn ka sɛta” neb buud fãa, baa zĩis nins moonegã sẽn paẽ nana wã menga. (Wilgri 14:6) Sɛb nins a Zeova Kaset rãmbã sẽn yiisdã pʋsẽ, b nong n wilgda kibay sẽn kõt kaset tɩ malɛgsã sõngd-d lame tɩ d moondẽ. * Kiba-kãensã sẽn yaa wʋsgã yĩnga, ned pa tõe n kɩɩs tɩ malɛgsã pa kẽesd b toog ye.

18. a) Tõnd sã n dat tɩ malɛgsã sõng-do, bõe la d segd n maane? b) Bõe yell la d na n gom sõsg ning sẽn pʋgdã pʋgẽ?

¹⁸ Sẽn na yɩl n paam tɩ malɛgsã kell n kogl-d la b wilg-d sore, d segd n ket n pẽgda a Zeova yʋʋrã, baa nebã sã n namsd tõnd rẽ yĩnga. D ra yĩm tɩ Wẽnnaam malɛgsã gũbgda “neb nins sẽn zoet [a Zeova]” wã bal ye. La woto rat n yeelame tɩ bõe? Wẽn-zoeer yaa bõe, la wãn to la d tõe n yɩ wẽn-zoɛtba? Bõe yĩng tɩ Wẽnnaam sẽn yaa nonglem dat tɩ d zoe-a? Sõsg ning sẽn pʋgdã na n sõng-d lame tɩ d bãng sogs-kãensã leoore.

[Tẽngr note]

Wãn to la y na n leoke?

• A Davɩɩd sẽn wa n yaa bi-bɩɩgã, zu-loe-bʋs la a paam-yã?

• Wala a Davɩɩde, bõe n pak tõnd n yɩɩda?

• Tigissã yõod ne tõnd yaa bõe?

• Wãn to la a Zeova kɩtd t’a malɛgsã sõngd tõndo?

[Zãmsgã sogsgã]

[Kart, seb-neng 25]

(Yaa sebrã meng pʋgẽ la y tõe n yã fãa)

Rama

Gat

Ziklag

Gibeya

Zerizalɛm

Adulam

Keila

Hebrõ

Zɩf

Horɛs

Maõ

Noob

Betlehɛm

En-gedi

Karmɛl

Yamsem Mogrã

[Kartã sẽn yitẽ]

Map: Based on maps copyrighted by Pictorial Archive (Near Eastern History) Est. and Survey of Israel

[Foto, seb-neng 25]

Baa a Davɩɩd sẽn da zoet n soondẽ wã, a pẽga a Zeova yʋʋrã