Pʋg-sɩdba, rɩk-y Kirist zu-sobendã togs-n-taare
Pʋg-sɩdba, rɩk-y Kirist zu-sobendã togs-n-taare
“Rao tara zu-soaba, yaa Krista.”—1 KORẼNT DÃMBA 11:3, Sebr Sõngo.
1, 2. a) Bõe la d tõe n tik n yeel tɩ pʋg-sɩd yaa sɩd-sõngo? b) Bõe yĩng tɩ tar yõod tɩ d sak n deeg tɩ Wẽnnaam la kãadmã lugunda?
BÕE la yãmb tõe n tik n yeel tɩ pʋg-sɩd yaa sɩd-sõngo? A bãngr bɩ? A yãoog pãng bɩ? A arzɛk bɩ? Bɩ a sẽn nong a pagã la a kambã to-to wã? Sã n yaa rẽ yẽ, sɩdb wʋsg nengẽ, b pa tõe n yeel tɩ b yaa sɩdb-sõms ye. Bala yaa dũniyã yam n so-ba, tɩ b tũud ninsaalb noy n zãad b zagsã. Bõe yĩnga? Naoor wʋsgo, yaa b sẽn pa sakd n deeg tɩ Wẽnnaam la kãadmã lugunda, la b pa tũud a noyã. Yaool n yaa Wẽnnaam n yãk raoã sĩif kõbr “n maan pag n tall-a n wa raoã nengẽ.”—Sɩngre 2:21-24.
2 A Zezi Kirist sẽn da leok Fariziẽ rãmbã to-to wã, a wilgame tɩ Biiblã kiba-kãngã yaa sɩda. A leok-b-la woto: ‘Yãmb nan ka karem tɩ Naandã naana bãmb dao la pag hal sɩngrẽ la tɩ bãmb yeelame: A yaa woto yĩnga, dao na bas a ba ne a ma n zĩnd ne a paga, la bãmb b yiibã fãa na n yɩɩ yĩng a yembr bɩ? Woto yĩnga, bãmb ka leb n ya a yiib yɛs ye, b yaa yĩng a yembre. Dẽ yĩnga, bɩ ned da welg bũmb nins Wẽnnaam sẽn lagem ne taab [kãadem pʋgẽ] ye.’ (Matɩe 19:4-6) Woto wilgdame tɩ d sã n dat tɩ d kãadem yɩ sõma d segd n sak n deegame tɩ Wẽnnaam la kãadmã lugunda, la d tũ sagls nins sẽn be a Gomdã sẽn yaa Biiblã pʋgã.
Sẽn tõe n sõng pʋg-sɩd t’a yɩ sɩd-sõngo
3, 4. a) Bõe n kɩt t’a Zezi mi kãadmã yɛl sõma? b) Yaa ãnd la b sẽn boond t’a Zezi pagã, la wãn to la pʋg-sɩdbã segd n zã b pagba?
3 Pʋg-sɩd sã n dat n yɩ sɩd-sõngo, a segd n bao n bãnga bũmb nins a Zezi sẽn wilg kãadmã wɛɛngẽ wã la a tũ-ba. A Zezi mii kãadmã yɛl sõma, bala a zĩnda pipi raoã ne a pagã naanegẽ la b kãadmã kõomẽ. Wẽnnaam a Zeova ra yeel-a-la woto: ‘Tɩ d naan ninsaal t’a yɩ wa tõndo n wẽneg tõndo.’ (Sɩngre 1:26) Ka wã, Wẽnnaam da gomda ne a soab ning a sẽn deng n naan n yaool n na n naan sẽn ketã fãa wã, a soab ning sẽn da be ‘a sɛɛgẽ wa tʋʋm-mitã.’ (Yelbũna 8:22-30) Yaa yẽ la b sẽn boond tɩ “Bi-kãseng sẽn yɩɩd bõn-naandsã fãa” wã. Sẽn deng ãndũni wã meng naanego, yaa yẽ la ‘Wẽnnaam naan pipi.’—Kolos rãmba 1:15; Wilgri 3:14, NW.
4 B boola a Zezi tɩ “Wẽnnaam Pebila,” la b leb n mak-a-la ne pʋg-sɩd me. Malɛk a yembr da yeela woto: “Wa ka tɩ m wilg foo pʋg-paala sẽn yaa Pebila pagã.” (Zã 1:29; Wilgri 21:9) La “Pebilã pagã” yaa ãnda? Yaa Kiristã karen-biis nins sẽn paam vʋʋsem sõngã zaeebã fãa sẽn naag taaba, sẽn na n tɩ rɩ naam ne-a saasẽ wã. (Wilgri 14:1, 3) Woto yĩnga, a Zezi sẽn zã a karen-biisã to-to a sẽn da wa n be ne-b tẽng zugã yaa mak-sõng sẽn wilgd pʋg-sɩdbã b sẽn segd n zã b pagbã to-to.
5. A Zezi basa mak-sõng n kõ ãnd dãmba?
5 Yaa sɩd tɩ b wilga Biiblã pʋgẽ t’a Zezi basa mak-sõng n kõ a karen-biisã fãa, bala d karemda woto: “Kirist me namsa yãmb yĩnga, n bas mamsg ne yãmb tɩ y tũ bãmb naoã.” (1 Pɩɛɛr 2:21) La sẽn yɩɩda, yaa rapã la a kõ mak-sõngo. Biiblã yeta woto: “Rao tara zu-soaba, yaa Krista; la pag me zu-soab la raoa, tɩ Krista Zu-soaba yaa Wẽnnaam.” (1 Korẽnt dãmba 11:3, Sebr Sõngo) Kirist sẽn yaa rapa zu-soabã yĩnga, rapã segd n dɩka a togs-n-taare. Rẽ n so tɩ b segd n sak no-kãngã Wẽnnaam sẽn gãneg zu-sobendã wɛɛngẽ wã, b sã n dat tɩ b zagsã tall sũ-noogo. Sẽn na yɩl tɩ sũ-noog zĩnd b zagsã pʋsẽ, b segd n zãa b pagbã ne nonglem wa a Zezi sẽn zã a karen-biis nins sẽn paam vʋʋsem sõngã zaeebã sull b sẽn bool t’a paga to-to wã.
Sɩdbã sẽn tõe n mao ne kãadmã pʋgẽ zu-loeesã to-to
6. Wãn-wãn la sɩdbã segd n zĩnd ne b pagbã?
6 Rũndã-rũndã dũniyã sẽn pid ne zu-loeesã pʋgẽ, pʋg-sɩdbã segd n dɩka a Zezi togs-n-taar n yɩɩda. B segd n talla sũ-mare, nonglem, la b tũud Wẽnnaam noyã ne b sũy fãa wa a Zezi. (2 Tɩmote 3:1-5) Makr ning a Zezi sẽn kõ pʋg-sɩdbã wɛɛngẽ, Biiblã yeela woto: “Rapa, bɩ yãmb me zĩnd ne y pagbã tɩ zems ne y sẽn mi-bã.” (1 Pɩɛɛr 3:7, NW) Sɩdbã segdame n mao ne kãadmã pʋgẽ zu-loeesã wa a Zezi sẽn da mao ne tood nins a sẽn paamã to-to wã. A Zezi namsame n yɩɩg ãdem-biisã fãa, la a ra miime tɩ yaa a Sʋɩtãan ne a zĩn dãmbã n paas a dũni wẽngã la sẽn da kɩt t’a namsdẽ wã. (Zã 14:30; Efɛɛz rãmba 6:12) A sẽn da maood ne zu-loees ninsã fãa ra pa ling-a ye. Woto me, pʋg-sɩdbã ne b pagbã sã n wa tar zu-loeese, pa segd n ling-b ye. Bala, Biiblã pĩnd n wilgame tɩ b na n paama zu-loeese.—1 Korẽnt dãmba 7:28.
7, 8. a) Zĩnd ne pag tɩ zems ne f sẽn mi-a baoodame tɩ f maan bõe? b) Bõe yĩng tɩ sɩdbã segd n waoog b pagbã?
7 Biiblã yeela sɩdbã tɩ y segd n zĩnda ne y pagbã “tɩ zems ne y sẽn mi-bã, n waoogd-b n miẽ tɩ pag yaa wa laag sẽn ka pãnga.” (1 Pɩɛɛr 3:7, NW) Yaa sɩd tɩ Biiblã ra pĩnd n togsame tɩ rap wʋsg na n weoogda b pagbã. La pʋg-sɩd sẽn tat Wẽnnaam yam pa na n maan woto ye. A na n waoogda a pagã. (Sɩngre 3:16) A na n zã-a-la hal sõma. A pa na n maand-a pãng a sẽn tõe-a wã yĩng ye. Ayo. A na n baood n bãngda a tagsgo, la a waoogd-a wakat fãa.
8 Bõe yĩng tɩ sɩdbã segd n waoog b pagbã? Biiblã leokda woto: “Yãmb ne bãmb yaa vɩɩmã sẽn yaa lohorem y sẽn pa segd ne wã pʋɩt-n-taase, tɩ bũmb ra gɩdg yãmb pʋʋsg ye.” (1 Pɩɛɛr 3:7, NW) Pʋg-sɩdbã segd n bãngame t’a Zeova pa get tɩ pag ne rao sẽn maand a raabã sʋka, raoã n yɩɩd ye. Wẽnnaam na n kõo vɩɩm sẽn-kõn-sa wã rap la pagb nins fãa sẽn maand a raabã. Wʋsg meng na n paam n tɩ vɩɩmda saasẽ. La be, “ka le be tɩ m yaa rao bɩ pag ye.” (Galat dãmba 3:28) Woto yĩnga, segdame tɩ pʋg-sɩdbã tẽeg tɩ yaa f sẽn sakd Wẽnnaam to-to wã bal n kɩtd tɩ f tar yõod a nifẽ. Pa f sẽn yaa raoa, pag bɩ biig yĩng ye.—1 Korẽnt dãmba 4:2.
9. a) Sã n yaa ne a Pɩɛɛr goamã, bõe yĩng tɩ pʋg-sɩdbã segd n waoog b pagbã? b) Wãn-wãn la a Zezi ra waoogd pagbã?
9 Tʋm-tʋmd a Pɩɛɛr sẽn baas a saglgã ne goam ninsã wilgda bũmb ning sẽn kɩt tɩ sɩdbã segd n waoog b pagbã. A yeelame tɩ yaa sẽn na yɩl “tɩ bũmb ra gɩdg yãmb pʋʋsg ye.” Ad bũmb sã n gɩdg f pʋʋsgo, sɩd yaa yelle! Pʋg-sɩd sã n pa waoogd a paga, Wẽnnaam tõe n gɩdga a pʋʋsg wa a sẽn da gɩdg a pĩnd wẽndẽ nin-buiid kẽer pʋʋsgo, b sẽn da maand a raabã ne yam-kaalgã. (Wiisgu 3:43, 44) Yɩta sõma ne kiris-neb nins sẽn tar-b pagbã ne sẽn nan dat n kẽ-b kãadmã fãa tɩ b ges a Zezi manesem ne pagbã sẽn da yaa to-to wã n dɩk a togs-n-taare. Wala makre, a Zezi ra sakdame tɩ pagb yãagd-a a koe-moonegã pʋgẽ. A leb n da waoogda pagbã. Sẽn paase, a yɩɩ sũ-bʋgsem soab ne-ba. Daar a ye menga, bũmb sẽn yaa kãseng la a Zezi reng n wilg pagb n yaool n tʋm-b tɩ b tɩ togs rapa.—Matɩe 28:1, 8-10; Luk 8:1-3.
Mak-sõng a Zezi sẽn kõ sɩdbã
10, 11. a) Bõe yĩng tɩ sɩdbã segd n bao n bãng mak-sõng ning a Zezi sẽn kõ wã? b) Wãn-wãn la sɩdbã segd n nong b pagbã?
10 Wala d sẽn wilg zugẽ wã, Biiblã wilgame tɩ sɩdbã segd n zãa b pagbã wa a Zezi sẽn zã kiris-neb nins sẽn paam vʋʋsem sõngã zaeebã sull b sẽn bool t’a pagã to-to wã. Biiblã yeelame tɩ “sɩd yaa pag zu-soab wa Kirist sẽn yaa bãmb nebã zu-soabã.” (Efɛɛz rãmba 5:23) Gom-kãens segd n kɩtame tɩ sɩdbã bao n bãng a Zezi sẽn yɩ a karen-biisã zu-soab to-to wã sõma. Yaa rẽ n na n sõng-b tɩ b tõog n dɩk a togs-n-taar n zã b pagbã ne nonglem wa a Zezi sẽn zã a tigingã to-to wã.
11 Biiblã yeta kiris-nebã woto: “Rapa, bɩ y nong y pagbã wa Kirist sẽn nong bãmb tẽedbã n kõ bãmb meng bãmb yĩngã.” (Efɛɛz rãmba 5:25) Efɛɛz rãmb sak a 4 pʋgẽ wã, b bool-a tigingã tɩ “Kirist yĩnga.” Yĩn-kãng yaool n yaa rap la pagb sẽn naag taab n tʋmd sõma. La yaa vẽeneg tɩ yaa a Zezi la “yĩngã zugu,” tɩ yĩngã yaa tigingã.—Efɛɛz rãmba 4:12; Kolos rãmba 1:18; 1 Korẽnt dãmba 12:12, 13, 27.
12. Wãn-wãn la a Zezi wilg t’a nonga tigingã b sẽn bool t’a yĩngã?
12 A Zezi wilgame t’a nonga a “tigingã” b sẽn bool t’a yĩngã. Sẽn yɩɩd fãa, a maana rẽ ne a sẽn ges neb nins sẽn lebg tiging kãng nebã yell to-to wã. Wala makre, daar a yembr a karen-biisã sẽn da wa n ya, a yeel-b-la woto: “Bɩ y wa yi n kẽng we-kɛɛng neb sẽn ka beẽ n tɩ vʋʋs bilfu.” (Mark 6:31) A Zezi tʋm-tʋmd a ye gʋls n goma bũmb a sẽn maan wakat a wãn sẽn deng a kũumã yell n yeel woto: “A Zezi sẽn nong a meng nebã [b sẽn bool t’a yĩngã] . . . , a kell n nong-b lame hal n tãag a tɛka.” (Zã 13:1, NW) A Zezi sẽn maan woto wã, a sɩd wilga pʋg-sɩdbã b sẽn segd n ges b pagbã yell to-to!
13. B sagla sɩdbã tɩ b nong b pagbã wãn-wãna?
13 Tʋm-tʋmd a Poll tika makr ning a Zezi sẽn kõ pʋg-sɩdbã n sagl-b woto: “Rapa tog n nonga b pagb wa bãmb mens yĩnsi. Ned ninga sẽn nong a paga, a nonga a menga. Tɩ bõe, ned nan ka kisg a meng yĩng abada. La a rɩlgd-a lame la a get a meng yell wa Kirist sẽn maand bãmb nebã.” A Poll paasa woto: “Bɩ yãmb ned kam fãa nong a pag wa a menga.” (Efɛɛz rãmba 5:28, 29, 33)
14. Bõe la pʋg-sɩd pa sakd n maan a menga, la rẽ wilgdame tɩ bõe la a pa segd n maan a pagã?
14 D tags a Poll goamã zugu. Rẽ yĩnga ned sẽn tar laafɩ na sak n maan a meng wẽng sɩda? Wala makre, ned sã n lak a naoore, a na n pãba naoorã t’a kɩtame tɩ yẽ lak bɩ? Yaa vẽeneg t’a kõn maan woto ye! La rẽ yĩnga pʋg-sɩd sã n be ne a zo-rãmba, a sakd n paoogda a meng wall a togsd-b a pãn-komsem sɩda? Abada! Bõe yĩng masã t’a na n paoogd a pagã ne a no-goam wall a pãbd-a a sã n konge? Pʋg-sɩdbã pa segd n ges b mens yell bal ye, b segd n gesa b pagbã me yelle.—1 Korẽnt dãmba 10:24; 13:5.
15. a) A Zezi karen-biisã sẽn da wa n ya wã, bõe la a maan-yã? b) Yam-bʋg la pʋg-sɩdbã segd n dɩk rẽ pʋgẽ?
15 Bɩ d ges a Zezi sẽn ges a karen-biisã yell to-to, yʋng ning sẽn deng a kũumã, yaams sẽn da wa n tar-bã. Yɩɩ Gɛtsemane zẽedã pʋgẽ. A Zezi sagl-b lame n yɩlem tɩ b pʋʋse, la naoor a tãab fãa b gũsame. Zĩig pʋgẽ, neb n wa n gũbg-b ne zab-teedo. La a Zezi sok-b-la woto: “Yãmb baooda ãnda?” Tɩ b leok tɩ bãmb baooda “Nazarɛt dao a Zezi.” T’a Zezi yeel-b tɩ “yaa maam.” A sẽn da mi t’a kũumã wakat taame wã, a yeela nebã woto: ‘Yãmb sã n baooda maam, bɩ y bas nin-kãensã tɩ b looge.’ Wakat fãa, a Zezi baoa a karen-bi-kãensã sẽn be sull ning b sẽn bool t’a pagã sʋkã yɩ-neere. A sõng-b lame tɩ b põse. Pʋg-sɩdbã sã n bao n bãng a Zezi sẽn zã a karen-biisã to-to wã, b na n yãa sagls wʋsg sẽn tõe n sõng-b tɩ b bãng n zã b pagbã.—Zã 18:1-9; Mark 14:34-37, 41.
A Zezi nonglmã yaa nonglem hakɩka
16. Baa ne a Zezi sẽn da nong a Martã, wãn to la a sagl-a?
16 Biiblã yeelame t’a Zezi ra “nonga a Mart ne a yaoã la a Lazaare,” sẽn da nong n deegd-a sãandã. (Zã 11:5) La baa ne rẽ, a Mart sẽn da wa n bas tɩ rɩɩb seglg yell pak-a tɩ loog t’a pa tar sẽk n kelgd a Zezi sẽn da sõsd tẽebã yɛl zugã, a Zezi pa sĩnd n pa sagl-a ye. A yeel-a-la woto: “Mart, Mart, fo maanda yɩɩr n sidgd ne bũmb wʋsgo. Bũmb a yembr n yaa tɩlae.” (Luk 10:41, 42) Sãmbg sẽn ka be, a Zezi sẽn da nong a Martã, kɩtame tɩ yɩ nana ne a Mart t’a reeg a saglgã. Sɩdbã me sã n na n sagl b pagbã, b segd n maana rẽ ne bʋgsem la nonglem. La b sã n wa segd n dems kɛgre, b segd n togsa yɛlã vẽeneg wa a Zezi sẽn da maand to-to wã.
17, 18. a) Wãn-wãn la a Pɩɛɛr leng a Zezi, la bõe yĩng t’a Pɩɛɛr da segd ne remsgo? b) Bõe la pʋg-sɩdbã me mi n segd n maane?
17 Daar a ye me, a Zezi ra wa n wilga a tʋm-tʋmdbã t’a segd n kẽnga Zerizalɛm la tɩ be, b na n ning-a-la ‘kãsem dãmbã la maan-kʋʋdbã kãsem dãmb ne gʋlsdbã nusẽ, tɩ b kʋ-a, la tɩ rasem a tãab raare a na n vʋʋgame.’ La a sẽn yeel-b woto wã, a Pɩɛɛr bool-a-la kɛɛng n zab-a. A yeel-a-la woto: “Zusoaba, Wẽnnaam ka na n sak t’a yɩ woto ye! Bõn-kãng ka na n paam yãmb ye.” Vẽenega, a Pɩɛɛr sẽn da nong a Zezi to-to wã kɩtame t’a wa pa ye ne yɛlã vẽeneg ye. Yɩɩ tɩlae t’a Zezi rems a Pɩɛɛr tagsgã. Rẽ n so t’a yeel-a woto: “Leb mam poorẽ Sʋɩtãana. Fo rat n gɩdga mam sore, tɩ bõe, fo tagsg ka Wẽnnaam dẽnd ye, yaa ninsaal dẽnda.”—Matɩe 16:21-23.
18 A Zezi sẽn wilg a karen-biisã tɩ b na n nams-a-la ne manesem toor-toor la b kʋ-a wã ra yaa Wẽnnaam daabo. (Yɩɩl Sõamyã 16:10; Ezai 53:12) Dẽnd a Pɩɛɛr da pa segd n zab a Zezi ye. A Pɩɛɛr da segda ne remsg vẽeneg wa sẽn mi n yɩ to-to ne tõnd me wakat ningã. Pʋg-sɩd sẽn yaa zak zu-soabã yĩnga, a segd n mi n demsa a zakã neb fãa. Baa a pagã menga. Wakat ninga tõe n yɩɩ tɩlae t’a togs yell vẽenega, la a segd n maana rẽ ne bʋgsem la nonglem. A Zezi sõnga a Pɩɛɛr t’a bãng sẽn segde. Sɩdbã me segd n mi n sõnga b pagbã woto. Wala makre, tõe tɩ pʋg-sɩd segd n wilga a pag ne nonglem t’a fuugu, a nag-teed wall makɩaas pa ye zemsd ne Gʋlsg Sõamyã sagls ye.—1 Pɩɛɛr 3:3-5.
Pʋg-sɩdbã segd n talla sũ-mare
19, 20. a) Yel-bʋg n zĩnd a Zezi tʋm-tʋmdbã ne taab sʋka, la a Zezi manesem yɩɩ wãna? b) Ne a Zezi sẽn sagl-b to-to wã fãa, bõe n maane?
19 Pa wakat fãa la sɩdbã segd n tẽ tɩ kɛgr b sẽn modg n dems pa na n ye yɩlem ye. A Zezi meng rɩka sẽk wʋsg sẽn na yɩl n dems a tʋm-tʋmdbã tags-kɛga. Wala makre, a koe-moonegã sẽn wa n kolg saabã wẽnde, a tʋm-tʋmdbã leb n wẽe no-koɛɛm ne taab n dat n bãng sẽn yaa-a kãseng n yɩɩd bãmb sʋka. (Mark 9:33-37; 10:35-45) B sẽn maan woto naoor a yiib-n-soab poor bilfu, a Zezi seglame n na n dɩ a yaoolem pakã ne-ba. La baraare, b ned baa a ye pa sak n na n sik a meng n waas a taabã nao sẽn da puk ne wubsgã wa b sẽn da mi n maand bãmb tẽngẽ wã ye. A Zezi yikame n waas b naoã. Rẽ poore, a yeel-b-la woto: ‘Mam kõo yãmb mamsgo.’—Zã 13:2-15.
20 Pʋg-sɩd sẽn sikd a meng wa a Zezi paamdame t’a pag yɩ wʋmd la a sõng-a. La pʋg-sɩd segd n talla sũ-mar me. A Zezi sẽn sagl a tʋm-tʋmdbã pakã raar yʋngã, rẽ poor bilf bala, b ye yika no-koeemd n dat n bãng sẽn yaa-a kãsenga. (Luk 22:24) Dẽnd naoor wʋsgo, yaa bilf-bilf la ned toeemd a zʋgo. La f sã n wa paam tɩ f pag toeem a zʋg wa a Zezi tʋm-tʋmdbã me sẽn wa n toeemã, f sũur sɩd yɩta noogo!
21. Kãadmã pʋgẽ zu-loeesã sẽn lebg wʋsg rũndã-rũndã wã, b sagenda sɩdbã tɩ b tẽeg bõe, la b maan bõe me?
21 Rũndã-rũndã, kãadmã pʋgẽ zu-loeesã lebga wʋsg n yɩɩd pĩndã. Neb wʋsg ye pa pidsd bũmb nins b sẽn pʋlem b kãadmã sasa wã ye. Woto yĩnga, sɩdba, tags-y kãadem sẽn sɩng to-to wã yell neere. Tẽeg-y tɩ yaa Wẽnnaam a Zeova sẽn nong tõndã n lugl-a. A tʋma a Bi-ribl a Zezi t’a wa ki tɩ yɩ rond d yĩng n fãag-do, la a kõ pʋg-sɩdbã me mak-sõngo.—Matɩe 20:28; Zã 3:29; 1 Pɩɛɛr 2:21.
Wãn-wãn la y na n leoke?
• Bõe yĩng tɩ tar yõod tɩ d bãng kãadmã lugund sẽn yaa a soaba?
• B sagenda sɩdbã tɩ b nong b pagbã wãn-wãna?
• Wãn-wãn la a Zezi sẽn zã a karen-biisã to-to wã wilgd pʋg-sɩdbã b sẽn segd n zã b pagbã to-to?
[Zãmsgã sogsgã]
[Foto, seb-neng 11]
A Zezi karen-biisã sã n da wa ya, a getame tɩ b paam n vʋʋse
[Foto, seb-neng 12]
Sɩdbã segd n sagla b pagbã ne bʋgsem la ne nonglem