D sik d mens n sak d pe-kɩɩmbã sẽn nong-dã
D sik d mens n sak d pe-kɩɩmbã sẽn nong-dã
“Bɩ y sak yãmb taoor dãmbã la y reeg bãmb goama.”—HEBRE DÃMBA 13:17.
1, 2. Biiblã verse bʋs n wilgd t’a Zeova ne a Zezi yaa wa Pe-kɩɩmb sẽn nong b piisi?
A ZEOVA ne a Bi-ribl a Zezi Kirist yaa wa Pe-kɩɩmb sẽn nong b piisi. No-rɛɛs a Ezai ra pĩnd n togsa woto: “Gese, Zusoab a Wẽnnaam wata ne pãnga. Bãmb soogda soolmã ne b [kang, NW] pãnga. . . . Bãmb dɩlgda b nebã wa rũm-kɩɩm sẽn wãbend a rũmsi. Yẽ zãada a pe-bi wã ne a nusi, n mobg bãmb a yãoogẽ la a tɛt b ma rãmbã.”—Ezai 40:10, 11.
2 Bãngr-gom-kãngã paama a pipi pidsg yʋʋmd 537 sẽn deng a Zezi rogmã, Zʋɩf rãmbã kell sẽn lebg n leb Zida wã. (2 Kibaya 36:22, 23) A leb n pidsa yʋʋmd 1919 wã pʋgẽ, Sirus Kãseng a Zezi Kirist sẽn wa n fãag sẽn paam-b vʋʋsem sõngã zaeebã kell “Babilon kãsenga” nugẽ wã. (Wilgri 18:2; Ezai 44:28) A Zezi yaa wa a Zeova “kang” n tigimd a piisã n so-ba, n get b yell ne nonglem. A Zezi meng yeela woto: “Mam yaa pe-kɩɩm sõngo. Mam mii mam piisi, la bãmb mii maam.”—Zã 10:14.
3. Wãn-wãn la a Zeova wilgẽ t’a ratame tɩ b ges a nin-buiidã yell ne nonglem?
3 Bãngr-gomd ning sẽn be Ezai 40:10, 11 wã wilgda a Zeova sẽn get a nin-buiidã yell ne nonglem to-to wã. (Yɩɩl Sõamyã 23:1-6) A Zezi tẽng zug koe-moonegã sasa, a me wilgame t’a nonga a karen-biisã la neb a taabã fãa. (Matɩe 11:28-30; Mark 6:34) A Zeova ne a Zezi sũy sãama wʋsg ne Zʋɩf rãmbã taoor dãmba, bala b ra miime tɩ b segd n gesa nin-buiidã yell wa pe-kɩɩm-sõma, la b pa maan woto ye. B ra pa get nin-buiidã yelle, la sẽn paase, b ra wẽgd-b lame. (Ezekɩɛll 34:2-10; Matɩe 23:3, 4, 15) Rẽ kɩtame t’a Zeova pʋlem woto: “Mam na n fãaga m piisã, m ka na n bas tɩ b le maan b pãng ye. Mam na n bʋʋ pesg ne a to bʋʋdo. La mam na n kõo bãmb m tʋm-tʋmd a Davɩɩd t’a yi b pe-kɩɩm yende. Yaa yẽ n na n gʋʋl-ba.” (Ezekɩɛll 34:22, 23) Yaoolem wakat kãensã pʋgẽ, Davɩɩd Kãseng a Zezi Kirist n yaa “pe-kɩɩm yend” ning a Zeova sẽn yãk t’a segd n ges a nin-buiidã fãa yellã. Nin-kãens yaa kiris-neb nins sẽn paam vʋʋsem sõngã zaeebã la “piis a taabã.”—Zã 10:16.
Kũun a Zeova ne a Zezi sẽn kõ tigingã
4, 5. a) Kũun bʋg sẽn yaa kãseng la a Zeova kõ a nin-buiidã? b) Kũun bʋg la a Zezi me kõ a tigingã?
4 A Zeova sẽn yãk a Zezi Kirist t’a yaa a nin-buiidã fãa “pe-kɩɩm yendã,” yaa kũun kãseng la a sẽn kõ tigingã. B ra pĩnd n goma kũun kãng sẽn yaa taoor soab sẽn na n zĩnd saasẽ wã yell Ezai 55:4 pʋgẽ. Be b yeela woto: “Gese, mam kõo yẽ t’a yɩ kaset soaba la buuda fãa naaba la b soaala.” Sɩd me, kiris-neb nins sẽn paam vʋʋsem sõngã zaeebã la kʋʋn-kãsengã neb b sẽn tigimdã yaa neb sẽn yit buud la soolem toɛy-toɛy pʋgẽ, la sẽn gomd goam toor-toore. (Wilgri 5:9, 10; 7:9) B fãa wõnda bãgr a ye piisi, n sakd a Zezi Kirist sẽn yaa b pe-kɩɩm yɛngã.
5 A Zezi me kõo a tigingã kũun sẽn yaa kãsenga. A yãka pe-kɩɩmb sẽn dɩkd a Zeova ne yẽ togs-n-taar n get piisã yell ne nonglem wakat fãa. Tʋm-tʋmd a Poll goma kũun kãseng kãng yell a lɛtr ning a sẽn tool Efɛɛz kiris-nebã pʋgẽ. A gʋlsa woto: “‘Bãmb sẽn zẽk wakatã bãmb wʋka yembse, la b kõo [kũun sẽn yaa neba, NW].’ . . . Bãmb kõo kẽer tɩ yɩ tʋm-tʋmdba, la kẽer bãmb no-rɛɛsdba, la kẽer koe-moondba, la kẽer pe-kɩɩmba, la kẽer karen-saam dãmba, Wẽnnaam neba bɩɩb yĩnga, la Wẽnnaam tʋʋmda yĩnga, la Kirist yĩnga sõngr yĩnga.”—Efɛɛz rãmba 4:8, 11, 12.
6. Wilgri 1:16, 20 wã pʋgẽ, b maka kãsem dãmb nins sẽn paam vʋʋsem sõngã zaeebã ne bõe, la bõe me la d tõe n yeel kãsem dãmb nins b sẽn yãk piis a taabã sʋkã me wɛɛngẽ?
6 Kũun kãensã sẽn yaa nebã yaa yel-gɛtb bɩ kãsem dãmb a Zeova ne a Bi-riblã sẽn yãk ne vʋʋsem sõngã maasem, tɩ b get b piisã yell ne nonglem. (Tʋʋma 20:28, 29) Sɩngrẽ wã, yel-gɛtb kãensã fãa ra yaa kiris-neb sẽn paam vʋʋsem sõngã zaeebo. Wilgri 1:16, 20, NW pʋgẽ wã, b maka b taoor lʋɩtbã ne “ãds” bɩ “malɛgs” sẽn be Kiristã nug-rɩtgo, tɩ woto rat n yeel tɩ yaa yẽ n so-ba. La yaoolem wakat kãensã pʋgẽ, sẽn paam-b vʋʋsem sõngã zaeeb n ket tẽng zugã sõor sẽn tar boogrã yĩnga, tigimsã pʋsẽ, kãsem dãmbã wʋsg yaa neb b sẽn yãk piis a taabã sʋka. La sẽn yaa ne vʋʋsem sõngã maasem la Siglgã taoor lʋɩtb Sull yãk-bã yĩnga, d tõe n yeelame tɩ bãmb me bee Pe-kɩɩm-sõng a Zezi Kirist nug-rɩtgo, bɩ tɩ yaa yẽ n so bãmb me. (Ezai 61:5, 6) D tigimsã kãsem dãmb sẽn sakd Kiristã sẽn yaa tigingã Zusoabã yĩnga, d segd n sakame la d tũ bũmb nins fãa b sẽn wilgdã.—Kolos rãmba 1:18.
D sak la d tũ d pe-kɩɩmbã
7. Tʋm-tʋmd a Poll wilgame tɩ d manesem segd n yɩɩ wãn-wãn ne d yel-gɛtbã?
7 Wẽnnaam a Zeova la a Zezi Kirist sẽn yaa d Pe-kɩɩmb sẽn be saasẽ wã baoodame tɩ d sak la d tũ pe-kɩɩmb nins b sẽn yãk tɩ b lʋɩt taoor tigimsã pʋsẽ wã. (1 Pɩɛɛr 5:5) Vʋʋsem sõngã vẽnega tʋm-tʋmd a Poll t’a gʋls woto: “Bɩ y tẽeg yãmb taoor dãmbã sẽn wilg yãmb Wẽnnaam goama yelle. La bɩ y tags bãmb baoosg sẽn yɩ bũmb ninga, la maan togs-n-taar ne bãmb tẽebo. Bɩ y sak yãmb taoor dãmbã la y reeg bãmb goama, tɩ bõe, bãmb gũuda yãmb sɩɩse, bãmb sẽn na n wilg yɛlã fãa Wẽnnaam taoorã yĩnga. Bɩ a yɩ woto tɩ b maan ne sũ-noogo, la ka ne sũ-sãoong sẽn ka na n yɩ yãmb nafr ye.”—Hebre dãmba 13:7, 17.
8. Bõe la tʋm-tʋmd a Poll sagl-d tɩ d maane, la bõe la rẽ rat n yeele?
8 D yãame t’a Poll sagl-d lame tɩ d “tags” bɩ tɩ d gũus n ges d kãsem dãmbã tẽeb sẽn yaa to-to wã la d tũ b mak-sõngã. Sẽn paase, a sagl-d lame tɩ d sak la d tũ nin-kãens b sẽn yãkã sẽn wilgd-d bũmb ningã. Biibl mit a Richard T. France yeelame tɩ gɛrk gom-bil ning b sẽn lebg ka tɩ “sakã” võor meng yɩɩda sak bala. A yeelame tɩ rat n yeelame tɩ f “kɩs sɩd tɩ b sẽn yetã yaa sɩda,” la f tũ ne yamleoogo. D sẽn sakd tigingã kãsem dãmbã, pa Wẽnnaam Gomdã sẽn yet tɩ d segd n sak-b lame wã yĩng bal ye, yaa d sẽn kɩs sɩd tɩ b ratame tɩ Rĩungã tʋʋm kẽng taoore, la b rat tõnd neer ne b sũy fãa wã yĩng me. D sã n sakd n tũud b goamã ne yamleoogo, yaa vẽeneg tɩ d sũy na n yɩɩ noogo.
9. Sakrã toor sẽn ka be, bõe yĩng me tɩ d segd n sik d mense?
9 La kãsem dãmbã sã n wa yeel tɩ d maan bũmb tɩ d yaool n kɩs sɩd tɩ pa b sẽn yet tɩ d maan to-to wã la sõma n yɩɩda, bõe la d segd n maane? Yaa wakat kãng la d segd n sak n yɩɩda. Yaa sɩd tɩ d sã n wʋmd yɛlã võore, b sakr yaa nana ne-do, la yaa d sã n pa wʋmd b võor n yaool n sikd d mens n sakdẽ la d wilgd tɩ d sɩd yaa sakda. Nand meng t’a Pɩɛɛr lebg tʋm-tʋmda, a ra saka noor a sẽn da pa wʋmd a võore.—Luk 5:4, 5.
Bʋʋm a naas sẽn kɩt tɩ d segd n sak yel-gɛtbã ne yamleoogo
10, 11. Pipi kiris-nebã wakatẽ la rũndã-rũndã, wãn-wãn la yel-gɛtbã ‘togs b tẽed-n-taasã Wẽnnaam goamã’?
10 Hebre rãmb 13:7, 17 wã d sẽn sõdg zugẽ wã pʋgẽ, tʋm-tʋmd a Poll wilga bʋʋm a naas sẽn kɩt tɩ d segd n sak la d tũ d yel-gɛtbã goamã. Pipi, yaa tɩ b wilga tõnd “Wẽnnaam goamã.” D tẽeg t’a Zezi sẽn kõ tigingã “kũun sẽn yaa nebã” yaa sẽn na yɩl tɩ b rems ‘Wẽnnaam nebã b bɩɩb yĩnga.’ (Efɛɛz rãmba 4:11, 12) Pipi kiris-nebã wakatẽ, a Zezi tũnuga ne pe-kɩɩmb a sẽn yãk n dems a nebã yel-manesem la b tagsgo, tɩ vʋʋsem sõngã vẽneg bãmb kẽer tɩ b gʋls lɛta n taas tigimsã. A ra tũnuga ne yel-gɛtb kãensã sẽn paam vʋʋsem sõngã zaeebã n wilgd pipi kiris-nebã bũmb nins b sẽn da segd n maanã, la a keng b tẽebã.—1 Korẽnt dãmba 16:15-18; 2 Tɩmote 2:2; Tɩt 1:5.
11 Rũndã-rũndã, a Zezi tũnugda ne “tʋm-tʋmd sẽn tũud sɩd la sẽn tar yamã” taoor lʋɩtbã la kãsem dãmbã n wilgd tõnd sore. (Matɩe 24:45) Yaa vẽeneg tɩ d sẽn waoogd “pe-kɩɩm kãseng” a Zezi Kiristã yĩnga, d tũuda a Poll saglga. A sagl-d-la woto: “Tõnd kota yãmb tɩ y waoog neb nins sẽn tʋmd yãmb sʋkã sẽn so yãmb Zusoabã tũudum pʋgẽ la sẽn sagend yãmbã.”—1 Pɩɛɛr 5:4; 1 Tesalonik rãmba 5:12; 1 Tɩmote 5:17.
12. Wãn-wãn la yel-gɛtbã “gũud [tõnd] sɩɩse”?
12 Bʋʋm a yiib-n-soab sẽn kɩt tɩ d segd n sak yel-gɛtbã, yaa tɩ b “gũuda [tõnd] sɩɩse.” B sã n yã tɩ d maand bũmb wall d tar yel-manesem sẽn tõe n sãam d tẽebã, b yɩta tao-tao n kõ-d saglg sẽn na yɩl n dems-do. (Galat dãmba 6:1) Gɛrk gom-bil ning b sẽn lebg tɩ “gũudẽ” wã rat n yeelame tɩ “ra gũs ye.” Biibl mit a yembr yeelame tɩ ka wã, b “gomda pe-kɩɩmb sẽn gũud b piis yʋng n pa gõe yelle.” Kãsem dãmbã sẽn gũusd wakat fãa sẽn na yɩl tɩ bũmb da wa saam tõnd tẽebã toor sẽn ka be, sẽn na yɩl n welg tigingã yell ninga, b mi n sɩd pa gõe ye. Woto yĩnga, d segd n saka pe-kɩɩmb kãensã sẽn nong-dã ne yamleoogo, bala b maanda b sẽn tõe fãa n dɩkd “pe-kɩɩm kãseng” a Zezi sẽn get a piisã yell ne nonglmã togs-n-taare.—Hebre dãmba 13:20.
13. Ãnd taoor la kãsem dãmbã la kiris-nebã fãa na n wa wilg b yɛlã, la bõe yĩnga?
13 Bʋʋm a tãab-n-soab sẽn kɩt tɩ d segd n sak yel-gɛtbã ne yamleoogã yaa “bãmb sẽn na n [wa] wilg yɛlã fãa Wẽnnaam taoorã yĩnga.” Yel-gɛtbã miime tɩ b yaa pe-kɩɩmb Wẽnnaam a Zeova ne a Zezi Kirist sẽn yaa Pe-kɩɩmb sẽn be saasẽ wã sẽn yãke. (Ezekɩɛll 34:22-24) A Zeova n so piisã fãa a sẽn da ne a Bi-riblã zɩɩmã, la a na n soka kãsem dãmbã a sẽn yãkã b sẽn ges piisã yell to-to wã wɛɛngẽ, bala b segd n gesa b yell ne nonglem. (Tʋʋma 20:28, 29, Kãab-paalgã Koe-noogo) La a Zeova na n soka tõnd fãa me d sẽn sakd a sẽn sigl yɛlã to-to wã wɛɛngẽ. (Rom dãmba 14:10-12) D sã n sakd kãsem dãmbã, d wilgda vẽeneg me tɩ d sakda Kiristã sẽn yaa tigingã Zusoabã.—Kolos rãmba 2:19.
14. Bõe n tõe n kɩt tɩ yel-gɛtbã tʋm b tʋʋmdã ne “sũ-sãoongo,” la rẽ na n maan-d-la bõe?
14 A Poll wilga bʋʋm a naas-n-soab me sẽn kɩt tɩ d segd n sik d mens n sak yel-gɛtbã. A gʋlsa woto: “Bɩ a yɩ woto tɩ b maan ne sũ-noogo la ka ne sũ-sãoong sẽn ka na n yɩ yãmb nafr ye.” (Hebre dãmba 13:17) Yel-gɛtbã tʋʋm waoogame. B segd n zãmsa tigingã neba, n ges b yelle, n lʋɩ koe-moonegã taoore, n ges b zagsã rãmb yell la tigingã yɛl yelle. (2 Korẽnt dãmba 11:28, 29) D sã n pa sak n tũ b sẽn yetã, b tʋʋmdã na n yɩɩ toog n paase, la na n kɩtame tɩ b tʋm ne sũ-sãoongo. D sã n pa sak la d tũ, na n sãama a Zeova sũuri, la na n yɩɩ wẽng ne-do. La d sã n waoogd kãsem dãmbã la d sakd-ba, b na n tõog n tʋma b tʋʋmdã ne sũ-noogo, la zems-n-taar na n zĩnda d sʋka, tɩ d moon Rĩungã koe-noog ne sũ-noogo.—Rom dãmba 15:5, 6.
D sẽn tõe n wilg to-to tɩ d yaa sakdba
15. Wãn-wãn la d tõe n wilg tɩ d sɩd yaa sakdba?
15 Bũmb toɛy-toɛy n be d sẽn tõe n maan n wilg tɩ d sakdame la d tũud yel-gɛtbã sẽn yetã. Wala makre, kãsem dãmbã sã n toeem koe-mooneg yiib wakat sẽn na yɩl tɩ zems ne moonegã zĩig neb yɛl sẽn yaa to-to wã, d segd n modg n manega d sẽkã n tõog n tũ toeengã. D sã n maan woto d na n paama bark wʋsgo. Sẽn paase, tʋʋmdã yel-gɛt sã n wa na n kaag tõnd sebrã zãmsg sulli, d tõe n maana modgr n moon koɛɛgã wʋsg semen kãnga. B sã n kõ-d sõsg Wẽnnaam tʋʋmdã lekollẽ me, d segd n segl-a-la sõma la d modg n kẽnge. D sebrã zãmsg sull yel-gɛtã sã n moon tɩ tõnd sullã n so Rĩungã Roog pɩɩsgo, d sã n kɛɛmẽ, d segd n maana d sẽn tõe fãa n sõng n pɩɩse. D maanda bõn-kãensã la a taab me n wilgdẽ tɩ d sakda neb nins a Zeova ne a Bi-riblã sẽn yãk tɩ b get bãgrã yellã.
16. Bõe yĩng tɩ baa kãsem soab sã n maan bũmb tɩ pa zems wa b sẽn wilgi, d pa segd n kɩɩs-a?
16 Wakat ninga, kãsem soab tõe n maana bũmb tɩ pa zems ne noy tʋm-tʋmd sẽn tũud sɩdã taoor lʋɩtbã sẽn wilg ye. A sã n ket n maand woto, a Zeova sẽn yaa “[tõnd] sɩɩs Pekɩɩm la [d] sɩɩs Gũudã” na n wa sok-a lame. (1 Pɩɛɛr 2:25) La kãsem dãmbã kẽer sẽn tudg yĩng pa segd n kɩt tɩ d pa sak la d tũ b goamã ye. A Zeova pa ningd kɩɩsd la tõt bark ye.—Sõdbo 12:1, 2, 9-11.
D sã n sakd ne yamleoogo, a Zeova ningd-d-la barka
17. D yel-manesem ne d yel-gɛtbã segd n yɩɩ wãn-wãna?
17 A Zeova miime tɩ yel-gɛtbã a sẽn yãkã yaa pãn-komsem dãmba. La ne rẽ fãa, ne a vʋʋsem sõngã maasem, a tũnugda ne nin-kãensã n get a nin-buiidã yelle. Sẽn paase, kãsem dãmbã ne tõnd fãa me mii vẽeneg tɩ pãn-kãseng ning d sẽn tarã yita Wẽnnaam nengẽ, la pa tõnd mens pãng ye. (2 Korẽnt dãmba 4:7) Woto yĩnga, d segd n pʋʋsa a Zeova bark a sẽn tũnugd ne d yel-gɛtbã n pidsd tʋʋm ninsã yĩnga, la d segd n sak-b lame la d tũ b noyã ne yamleoogo.
18. D sã n sakd d yel-gɛtbã, bõe la d wilgda?
18 Yaoolem wakat kãensã pʋgẽ, yel-gɛtbã maanda b sẽn tõe fãa n na n ges a Zeova bãgrã yell tɩ zems ne Zeremi 3:15 sẽn bilgd a Zeova sẽn get a piisã yell to-to wã. Be, a Zeova yeela woto: “Mam na n kõo yãmb nanambs sẽn ta m yam tɩ b soog yãmb ne yam la bãngre.” Yaa vẽeneg tɩ kãsem dãmbã tʋmda tʋʋm neere, b sẽn zãmsd a Zeova nin-buiidã la b kogend-bã. Bɩ d ket n wilgd-b d mi-beoog b tʋʋm toogã yĩnga, n sikd d mens n sakd n tũud b sẽn yetã ne yamleoogo. D sã n maand woto, d wilgda Wẽnnaam a Zeova ne a Zezi Kirist sẽn yaa d saasẽ Pe-kɩɩmbã d mi-beoogo.
D lebg n tẽege
• Wãn-wãn la a Zeova ne a Zezi Kirist wilgẽ tɩ b yaa wa Pe-kɩɩmb sẽn nong b piisi?
• Bõe yĩng tɩ d segd n sak la d tũ?
• Bõe la d tõe n maan n wilg tɩ d yaa sakdba?
[Zãmsgã sogsgã]
[Foto, seb-neng 29]
Kãsem dãmbã sakda Kiristã zu-sobendo
[Foto rãmba, seb-neng 31]
Bũmb toɛy-toɛy la d tõe n maan n wilg tɩ d sakda a Zeova pe-kɩɩmbã