Bɩ tigingã pẽg a Zeova

“Mam na n wilga mam ba-biisa yãmb yʋʋre. La mam na n yɩɩlame n pẽg yãmb tẽedbã [tiging, NW] sʋka.”—HEBRE DÃMBA 2:12.

1, 2. Bõe yĩng tɩ kiris-neb tigingã neb sũy noome, la sẽn yɩɩd fãa, b lugla tigingã bõe yĩnga?

HAL ãdem-biisã sẽn be tẽng zug tɛka, nebã miime tɩ zak a ye rãmb yaa neb sull sẽn nong taab la b sõngd taaba. La Biiblã gomda sull a to sẽn be rũndã-rũndã n wõnd woto yelle. A nebã yaa kʋʋng sẽn yit dũniyã ween-vɩɩs a naasã, n nong taab la b sõngd taab wʋsgo, tɩ bãan be b sʋk hal sõma. Sul-kãng yaa kiris-neb tigingã. * Y sã n zĩnda zak neb sẽn nong taab la b sõngd taab pʋgẽ tɩ pa woto me, y sũur segd n nooma Wẽnnaam sẽn kɩt tɩ tiging a woto beẽ wã yĩnga. Y sã n zoe n yaa a Zeova Kaset rãmbã tiging neda, yaa vẽeneg tɩ y tõe n kɩsa kaset t’a nebã sɩd nonga taab la b sõngd taab tɩ laafɩ be b sʋka.

² Kiris-neb tigingã pa neb sẽn tigim taab woto bal ye. Leb n pa buud bɩ zĩig a yembr neb sẽn tigim taab wall neb sẽn nong ɛspoor bɩ reem a to sẽn tigim taab ye. Sẽn yɩɩd fãa, yaa Wẽnnaam a Zeova pẽgr yĩng la b sẽn lugl tigingã. Yɩɩl Sõamyã sebr wilgdame tɩ ra sɩng n yaa woto hal pĩnd wẽndẽ menga. Wala makre, Yɩɩl Sõamyã 35:18 wã pʋgẽ, b yeta woto: “Mam na n pẽga yãmb tiging kãseng pʋgẽ. Mam na n zẽka yãmb yʋʋr kʋʋng kãseng sʋka.” Yɩɩl Sõamyã 107:31, 32 wã pʋgẽ me, b yet-d-la woto: “Bɩ [nebã] pʋʋs Zusoaba bark b nonglmã ne b tʋʋm kãsemsã b sẽn maan n kõ ninsaalbã yĩnga. La bɩ b kõ bãmb waoogr nebã tiging pʋgẽ.”

3. A Poll yeelame tɩ tigingã belem yõod a to la bʋgo?

³ Tʋm-tʋmd a Poll wilga tigingã belem yõod a to me. A yeelame tɩ tigingã yaa ‘Wẽnnaam sẽn vɩ tẽedba, sẽn yaa sɩdã ra-luk la a yẽbgre.’ (1 Tɩmote 3:15) Yaa tiging bʋg yell la a Poll sẽn da gomdã? Biiblã pʋgẽ, b sã n gomd tiging yelle b gomda bõe yelle? La wãn to la rẽ bãngr tõe n naf tõnd rũndã-rũndã, la wakat sẽn wate? Sẽn na yɩl n leok sogs-kãensã, bɩ d reng n bao n bãng gom-bil ning b sẽn lebg tɩ “tiging” Biiblã pʋgẽ wã võor toɛy-toɛya.

4. Biiblã babg ning b sẽn gʋls ne hebre wã pʋgẽ, b sã n gomd “tiging” yelle, nong n yaa ãnd dãmb yell la b gomda?

⁴ Hebre gom-bil ning b sẽn nong n lebgdẽ tɩ “tigingã” yita gom-bil võor sẽn yaa “bool neb n tigim” bɩ “tigim” pʋgẽ. (Tõodo 4:10; 9:10) Yɩɩl-gʋlsda boola malɛgsã sẽn be saasẽ wã tɩ “tiging” la a bool tʋʋm wẽns maandb sull me tɩ “tiginga.” (Yɩɩl Sõamyã 26:5; 89:6-8) La Biiblã babg ning b sẽn gʋls ne hebre wã pʋgẽ, b sã n gomd tiging yelle, nong n yaa Israɛll nebã yell la b gomda. Wẽnnaam da wilgame t’a Zakoob “na n lebga buud wʋsg” bɩ tiging ba, la sɩd yɩɩ woto. (Sɩngre 28:3; 35:11; 48:4) B ra yãka Israɛll nin-buiidã fãa n boondẽ t’a Zeova “neb” bɩ a tiginga, Wẽnnaam sɩd-sɩdã neb tiginga.—Sõdbo 20:4; Nehemi 13:1, NW; Zozue 8:35; 1 Sãmwɛll 17:47; Miise 2:5.

5. Gɛrk gom-bi-bʋg la b sẽn nong n lebgdẽ tɩ “tigingã,” la a võor tõe n yɩɩ bõe?

⁵ Gɛrk gom-bil ning b sẽn lebg tɩ “tigingã” yaa ekklêsia. A yita gom-biis a yiib pʋgẽ. A ye võor yaa “yɩnga,” t’a to wã rat n yeel tɩ “boole.” B tõe n boola neb sẽn tigim taab woto bal tɩ ‘tiginga,’ baa b sã n pa tigim taab tũudum yĩnga. Wala makre, a Demetrius ra boola neb n tigim tɩ b kɩɩs a Poll Efɛɛze. (Tʋʋma 19:32, 39, 41) La Biiblã babg ning b sẽn gʋls ne gɛrkã pʋgẽ, b nong n boonda kiris-nebã fãa sẽn naag taab tɩ tiginga. Biibl kẽer  pʋsẽ, b lebga gom-bilã tɩ “wẽnd-doogo,” la Biiblã gom-biis võor wilgr sebr a yembr (The Imperial Bible-Dictionary) yeelame tɩ gom-bi-kãngã “pa gomd roog ning kiris-nebã sẽn tigimdẽ taab n pʋʋsdẽ wã yell lae-lae ye.” Biiblã babg ning b sẽn gʋls ne gɛrkã pʋgẽ, gom-bilã tara võor toɛy-toɛy sẽn na ta a naase.

Sẽn paam-b Wẽnnaam vʋʋsem sõngã zaeebã tiginga

6. Bõe la a Davɩɩd ne a Zezi maan tiging neb sʋka?

⁶ Tʋm-tʋmd a Poll wilgame tɩ goam nins sẽn be Yɩɩl Sõamyã 22:23 pʋgẽ wã pidsa a Zezi zugu. A gʋlsa woto: “Mam na n wilga mam ba-biisa yãmb yʋʋre. La mam na n yɩɩlame n pẽg yãmb tẽedbã [tiging] sʋka.” Sẽn na yɩl n tõog n maan rẽ, yɩɩ tɩlae t’a Zezi lebg wa a “ba-biisã ne bũmb fãa, la a yɩ maan-kʋʋdb kãsem sẽn yaa nimbãan-zoɛt la sẽn maand Wẽnnaam tʋʋmd ne sɩda.” (Hebre dãmba 2:12, 17) A Davɩɩd pẽga Wẽnnaam pĩnd wẽndẽ Israɛll tigingã neb sʋka. (Yɩɩl Sõamyã 40:10) La bõe la a Poll da rat n yeele, a sẽn yeel t’a Zezi pẽga Wẽnnaam “tẽedbã” bɩ tigingã sʋka? Yaa tiging bʋg yell la a sẽn gomdã?

7. Biiblã babg ning b sẽn gʋls ne gɛrkã pʋgẽ, b sã n gomd “tiging” yelle, sẽn yɩɩd fãa yaa bõe yell la b gomda?

⁷ Hebre rãmb 2:12, 17 wã sẽn yet bũmb ningã võor tagmame. Rat n yeelame t’a Zezi ra yaa tiging ning a sẽn da moondẽ Wẽnnaam yʋʋr a ba-biisã sʋkã ned a ye. A ba-biis kãens yaa ãnd dãmba? Yaa neb nins b sẽn boond t’a “Abrahaam yagensã,” sẽn dat n yeel tɩ neb nins sẽn paam vʋʋsem sõngã zaeeb bɩ sẽn paam saasẽ boolgã. (Hebre dãmba 2:16–3:1; Matɩe 25:40) Dẽnd vẽenega, Biiblã babg ning b sẽn gʋls ne gɛrkã pʋgẽ, b sã n gomd “tiging” yelle, sẽn yɩɩd fãa mi n yaa kiris-neb nins sẽn paam vʋʋsem sõngã zaeebã sull yell la b gomda. Nin-kãens sõor sẽn yaa neb 144000 sẽn paam vʋʋsem sõngã zaeebã yaa tiging bɩ tẽedb b sẽn bool tɩ kom-dẽemse, tɩ b yʋyã gʋls saasẽ.—Hebre dãmba 12:23.

8. Wãn-wãn la a Zezi pĩnd n gom kiris-neb tigingã luglg yelle?

⁸ A Zezi pĩnd n wilgame tɩ b ra na n wa lugla “tiging” kãnga. Sẽn wa n ket yʋʋmd t’a ki wã, a yeela tʋm-tʋmd a Pɩɛɛr woto: “Ade, mam yet-f lame tɩ f yaa a Pɩɛɛre, la kug kãngã zug la m na n me m tigingã, la hadɛs kõn tõog-a ye.” (Matɩe 16:18, NW) A Pɩɛɛr ne a Poll fãa ra mii vẽeneg tɩ yaa a Zezi la kugr ning yell a sẽn gomã. A Pɩɛɛr gʋlsame tɩ b mee wẽnd-doog ning b sẽn pa tõe n yã ne nifã ne “kug-vɩɩs” Kiristã sẽn yaa “roogã pãng kugrã” zugu. A paasame tɩ kug-vɩ-kãens yaa nin-tũusdsi, sẽn ‘na n wilg sẽn bool-a bãmb tɩ b yi lik pʋgẽ n kẽ a vẽenem kãsengã pʋgẽ wã bõn-sõma wã fãa.’—1 Pɩɛɛr 2:4-9; Yɩɩl Sõamyã 118:22; Ezai 8:14; 1 Korẽnt dãmba 10:1-4.

9. Wakat bʋg la b sɩng Wẽnnaam tigingã luglgu?

⁹ Wakat bʋg la b lugl kiris-nin-kãensã b sẽn bool tɩ “nin-tũusdsã” tigingã? Yɩɩ yʋʋmd 33 Pãntekotã raare, Wẽnnaam sẽn wa n kõ a Zezi karen-biisã sẽn da tigim taab Zerizalɛm a vʋʋsem sõngã. Rẽ poor bilf bala, a Pɩɛɛr sõsa ne Zʋɩf rãmb la neb nins sẽn tuub n sakd Zʋɩf rãmbã tũudmã, hal t’a sõsgã kẽ b sũy wʋsgo. Neb wʋsg sẽn bãng t’a Zezi ki b yĩngã, b teka yam n kos sugr la b reeg lisgu. Kibarã wilgdame tɩ neb tus a tã n deeg lisg b sẽn kelg sõsgã poore, n naag Wẽnnaam tigingã sẽn nan lugl paalmã neba. (Tʋʋma 2:1-4, 14, 37-47) Tigingã neb  sõor da paasdame, bala Zʋɩf rãmbã ne neb nins sẽn da tuub n sakd Zʋɩf rãmbã tũudmã wʋsg bãngame tɩ Wẽnnaam sɩd basa pĩnd Israɛllã neb tɩ b pa le yaa a tiging ye. Rẽ tɛka, yaa kiris-neb nins sẽn paam vʋʋsem sõngã zaeeb tɩ b boond-b tɩ “Wẽnnaam Israyɛllã” n lebg a Zeova “tẽedb” bɩ a tiging hakɩka.—Galat dãmba 6:16, Kãab-paalgã Koe-noogo; Tʋʋma 20:28.

10. Zems-n-taar bʋg n bee a Zezi ne Wẽnnaam tigingã neb sʋka?

¹⁰ Naoor wʋsgo, Biiblã wilgdame tɩ welgr n be a Zezi ne sẽn paam-b vʋʋsem sõngã zaeebã b sẽn boond tɩ tigingã sʋka. Wala makre, zĩig a ye, b yeelame tɩ b “gomda Kirist ne bãmb tẽedbã [bɩ tigingã] yelle.” A Zezi yaa kiris-neb nins sẽn paam vʋʋsem sõngã zaeebã tiging zug bɩ a Zusoaba. A Poll gʋlsame tɩ “Wẽnnaam ninga bũmb fãa a Zezi naoã tẽngre, n kõ bãmb tɩ b yɩ bãmb nebã [bɩ b tigingã] zug ne bũmb fãa. Bãmb nebã yaa bãmb yĩnga.” (Efɛɛz rãmba 1:22, 23; 5:23, 32; Kolos rãmba 1:18, 24) Rũndã-rũndã, tiging kãng nebã sẽn paam vʋʋsem sõngã zaeebã sẽn ket tẽngã zug sõor paoodame. La baa ne rẽ, d tõe n kɩsa sɩd t’a Zezi Kirist sẽn yaa b Zusoabã nong-b lame. Efɛɛz rãmb 5:25 yeta woto rẽ wɛɛngẽ: ‘Kirist nonga bãmb tẽedbã n kõ b meng bãmb yĩnga.’ A nong-b lame, bala b modgdame n kõt Wẽnnaam “maand daar fãa sẽn yaa pẽgre,” sẽn dat n yeel tɩ b kɩta “kaset ne noor goam [Wẽnnaam] yʋʋrã yĩnga,” wa a Zezi me sẽn da maand to-to a sẽn da wa n be tẽng zugã.—Hebre dãmba 13:15.

Gom-bil ning b sẽn lebg tɩ “tigingã” võor a taaba

11. Biiblã babg ning b sẽn gʋls ne gɛrkã pʋgẽ, b sã n gomd “tiging” yelle, tõe n yaa bõe yell me la b gomda?

¹¹ Biiblã pʋgẽ, wakat ninga, b tõe n goma “tiging” yell tɩ pa neb 144000 sẽn paam vʋʋsem sõngã zaeeb tɩ boond-b tɩ Wẽnnaam tigingã yell la b gomd ye. Wala makre, a Poll gʋlsa kiris-neb sull n yeel-b woto: “Da yɩ-y kug-lakdg sẽn ka-b Zʋɩf-rãmbã yĩnga, wall Zʋɩf-rãmbã yĩng wall Wẽnnaam nin-tũusdsã [bɩ a tigingã] yĩng ye.” (1 Korẽnt dãmba 10:32, Kãab-paalgã Koe-noogo) Yaa sɩd tɩ pĩnd wẽndẽ Korẽntã kiris-ned sã n da maan bũmb sẽn pa segde, tõe n sãama neb kẽer tẽebo. La rẽ yĩnga manesem kãng tõe n sãama Gɛrk rãmbã, Zʋɩf rãmbã la neb nins sẽn da paam vʋʋsem sõngã zaeebã sasa kãngã n tãag rũndã-rũndã rãmbã  fãa tẽeb bɩ? Yaa vẽeneg tɩ pa tõe ye. Dẽnd verse kãngã pʋgẽ, b sẽn yeel tɩ “Wẽnnaam nin-tũusds” bɩ a tigingã, yaa wakat kãng kiris-nebã fãa yell la b gomda. Woto me, ned tõe n yeelame tɩ Wẽnnaam teela tigingã bɩ t’a ninga tigingã barka, tɩ yaa zãmaan-yɛng kiris-neb fãa yell la a gomda. Pa rẽ bɩ b tõe n yeel tɩ laafɩ la bãan bee Wẽnnaam tigingã pʋgẽ rũndã-rũndã, tɩ yaa kiris-nebã fãa sẽn be dũniyã gill zugã yell la b gomda.

12. Biiblã pʋgẽ, gom-bil ning b sẽn lebg tɩ ‘tigingã’ võor a tãab-n-soab la bʋgo?

¹² Ad gom-bilã võor a tãab-n-soaba: B boonda kiris-neb sẽn be babg a yembr me tɩ “tiginga.” Tʋʋma 9:31 wã, d karemda woto: “A Zezi tẽedba [bɩ a tigingã] sẽn be Zide la Galile la Samari wã fãa paama laafɩ.” Ra pa kiris-neb sull a ye bal n da be soolem kãng sẽn da yalmã pʋgẽ ye. La b lagma sul nins sẽn da be Zide, Galile la Samari wã fãa n bool tɩ “tigingã.” Neb wʋsg sẽn deeg lisg yʋʋmd 33 Pãntekotã raar la rẽ poor bilfã yĩnga, tõeeme tɩ ra pa tiging a ye bal n da be Zerizalɛm ye. (Tʋʋma 2:41, 46, 47; 4:4; 6:1, 7) A Herood Agripa pipi soabã rɩɩ naam Zide n tãag yʋʋmd 44 soabã sẽn yɩ a kũumã yʋʋmdã. La pipi Tesalonik rãmb 2:14 goamã wilgda vẽeneg tɩ yʋʋmd 50 soabã sasa tɩ Zide tigimsã sõor da waoogame. Woto yĩnga, b sẽn yeel t’a Herood da namsda a Zezi tigingã neb kẽerã, pa segd n da yaa tiging a ye neb bal ye. Yaa tigims toɛy-toɛy sẽn da be Zerizalɛm neb yell la b sẽn gomdã.—Tʋʋma 12:1.

13. Gom-bil ning b sẽn lebgd tɩ “tigingã” võor a naas-n-soab la bʋgo?

¹³ Gom-bil ning b sẽn lebgd tɩ “tigingã” võor a naas-n-soaba la woto: B boonda kiris-neb sẽn tigimd taab zĩ-yend tɩ tiginga. Wala makre, zak pʋgẽ. A Poll goma Galasi tẽedb bɩ a tigims yelle. Pa tiging a ye bal n da be Rom tẽn-kãngã sẽn yalmã pʋgẽ ye. Naoor a yiib a Poll sẽn gom Galasi tẽedbã yellã, a yeelame tɩ tigimsi, tɩ tigims kãens sʋka, d tõe n sõdg Ãntios, Dɛrbe, Listr la Ikoniom tigimsã. B ra tika Gʋlsg Sõamyã noy n yãk kãsem dãmb bɩ yel-gɛtb tigims kãens pʋsẽ. (1 Korẽnt dãmba 16:1, NW; Galat dãmba 1:2; Tʋʋma 14:19-23) La Biiblã pʋgẽ, b boola b fãa tɩ “Wẽnnaam tẽedba, [bɩ a tigimsi].”—1 Korẽnt dãmba 11:16; 2 Tesalonik rãmba 1:4.

14. Wala Biiblã verse rãmb kẽer sẽn wilgdã, bõe me la d tõe n bool tɩ “tiginga”?

¹⁴ Kiris-nebã ra tara sul-bõoneg sẽn tõe n tigim taab zak pʋgẽ menga. La baa ne rẽ, b ra boonda sul-bõoneg kãens sãnda me tɩ “tigimsi.” B kẽer d sẽn mi yaa b rãmb nins sẽn da tigimd a Akila ne a Priska zakẽ wã n paas a Nimfa la a Filemo zagsẽ wã. (Rom dãmba 16:3-5; Kolos rãmba 4:15; Filemo 2) Woto segd n kenga rũndã-rũndã tigims nins sẽn yaa bõonegã neb raoodo, sẽn tõe n mik tɩ b maanda b tigissã fãa ned zakẽ wã. Pipi kiris-nebã wakatẽ, a Zeova wilgame t’a nanda tigims kãens buudã me, la d tõe n kɩsa sɩd t’a nanda rũndã-rũndã tigims nins sẽn yaa bõonegã, n ningd-b bark ne a vʋʋsem sõngã maasem.

Tigimsã pẽgda a Zeova

15. Pipi kiris-nebã tigims pʋsẽ, neb kẽer sẽn paam vʋʋsem sõngã da tõe n maan bõe?

¹⁵ Wala d sẽn zoe n wilgã, Yɩɩl Sõamyã 22:23 paama pidsg a Zezi zugu. A pẽga Wẽnnaam tigingã neb sʋkã. (Hebre dãmba 2:12) A karen-biisã me ra segd n pẽga Wẽnnaam tigingã neb sʋka. Pipi kiris-nebã wakatẽ, b sẽn wa n paam vʋʋsem sõngã zaeeb n lebg Wẽnnaam kom-dibli la Kiristã ba-biisã, bãmb kẽer paama tõog toor-toor n paase. Tõog kãens kɩtame tɩ sãnda ra tõe n gom yam la bãngr goama. Kẽer da tõe n maaga bãase, wall b togs bãngr-goama, pa rẽ bɩ b tõe n gom gom-zẽn b sẽn ka wʋmd b võor menga.—1 Korẽnt dãmba 12:4-11.

16. Yaa bõe yĩng me la Wẽnnaam sẽn da kõ kiris-nebã kẽer tõog toɛy-toɛyã?

¹⁶ Gom-zẽnã goam wɛɛngẽ, tʋm-tʋmd a Poll yeela woto: “M na n maana pʋʋsgo, la m na n bao-la a võore. M bark pʋʋsgã yɩɩl na n yɩɩ yɩɩll m sẽn wʋmd a võore.” (1 Korẽnt dãmba 14:15, Sebr Sõngo) A Poll sẽn yeel bũmb ningã wilgdame t’a ra miime tɩ tara yõod t’a tẽed-n-taasã tõog n wʋm a goamã võor n paam n bãng  bũmb ning a sẽn zãmsd-bã. A Poll sẽn da rat yaa pẽg a Zeova tigingã pʋgẽ. A sagla a taabã sẽn da paam tõog toɛy-toɛyã me woto: “Bɩ yɩ a Zezi tẽedbã sõngr yĩng la yãmb baood n na n paam wʋsgo,” sẽn dat n yeel tɩ b ra segd n kenga tigims nins pʋsẽ b sẽn da be wã neb tẽebo. (1 Korẽnt dãmba 14:4, 5, 12, 23) Yaa vẽeneg t’a Poll da ratame tɩ b sõng b tẽed-n-taasã b tigimsã pʋsẽ ne b tõodã, bala a ra miime tɩ b ned kam fãa na n paam n pẽga Wẽnnaam ne a tõodo.

17. D tõe n kɩsa sɩd ne bõe rũndã-rũndã tigimsã fãa wɛɛngẽ?

¹⁷ A Zeova ket n sõngda a tigingã la a tũnugd ne-a n pidsd a raabã. Rũndã-rũndã me, a ningda kiris-neb nins sẽn paam vʋʋsem sõngã zaeebã sull sẽn ket tẽng zugã barka. D nee rẽ vẽeneg a sẽn kõt a nin-buiidã vẽenem to-to Biiblã zug ne sɛb toor-toor maasmã. (Luk 12:42) D Naandã ningda a nin-buiidã fãa sẽn be dũniyã gill zugã barka. A ningda tigims toɛy-toɛy nins pʋsẽ d sẽn pẽgd-a ne d tʋʋm la ne d goam n kengd taab tẽebã me barka. D paamda zãmsg la sagls sẽn sõngd-d tɩ d tõe n pẽg Wẽnnaam d sẽn beẽ fãa, baa d sẽn wat n pa be ne d tigimsã nebã.

18, 19. Tiging fãa kiris-neb segd n tʋlg n maana bõe?

¹⁸ D tẽeg tɩ tʋm-tʋmd a Poll sagla Filip ne Masedoan tigimsã neb n yeel-b woto: “Mam pʋʋsdame tɩ yãmb pid ne tɩrlem biisi, sẽn yit a Zezi Kirist nengẽ Wẽnnaam waoogr la b pẽgr yĩnga.” Woto wilgdame tɩ b sã n sõsd b tẽebã sẽn tik a Zezi zugã la b saagrã sẽn yaa kãsengã zug ne neb sẽn pa tigingã neb me, b pẽgda Wẽnnaam. (Filip rãmba 1:9-11; 3:8-11) Yaa rẽ n so t’a Poll sagl a tẽed-n-taasã woto: “Bãmb [a Zezi] maasem yĩnga, bɩ tõnd kõ Wẽnnaam maand daar fãa sẽn yaa pẽgre, sẽn dat n togs tɩ d kɩs kaset ne noor goama bãmb yʋʋrã yĩnga.”—Hebre dãmba 13:15.

¹⁹ Rẽ yĩnga, y sũur nooma y sẽn pẽgd Wẽnnaam “tigingã neb sʋk” wa a Zezi wã bɩ? Y sũur nooma y sẽn pẽgd a Zeova ne y no-goam neb nins sẽn nan pa mi Wẽnnaam la sẽn pa pẽgd-a wã taoorã bɩ? (Hebre dãmba 2:12; Rom dãmba 15:9-11) Tõe tɩ tõnd ned kam fãa sẽn na n leok sogs-kãensã to-to wã bee ne d sẽn ne yõod ning d tigingã sẽn tar Wẽnnaam daabã pidsg pʋgã. Sõsg ning sẽn pʋgdã pʋgẽ, d na n bao n bãnga a Zeova sẽn get a tigimsã yell to-to, a sẽn tũnugd ne-b n maand bũmb ningã, la rẽ bãngr sẽn tõe n naf tõnd to-to rũndã-rũndã.

[Tẽngr note]

Y ket n tẽrame bɩ?

• Wãn-wãn la b lugl kiris-neb nins sẽn paam vʋʋsem sõngã zaeebã tiginga, b sẽn bool tɩ “Wẽnnaam tigingã”?

• Biiblã pʋgẽ, gom-bil ning b sẽn lebg tɩ “tigingã” võor a taab me la bʋse?

• Bõe la a Davɩɩde, a Zezi la pipi kiris-nebã tʋlg n maan tigingã neb sʋka, la rẽ segd n kɩtame tɩ tõnd me tʋlg n maan bõe?

[Zãmsgã sogsgã]

[Foto, seb-neng a 9]

A Zezi yaa tiging bʋg yẽbgr kugri?

[Foto, seb-neng 10]

Kiris-nebã sul-bõonegã me yaa “Wẽnnaam tigimsi”

[Foto, seb-neng 12]

Wala Benẽ kiris-nebã, tõnd me tõe n pẽga a Zeova tigingã neb sʋka