Namsg buud fãa sẽn na n sa ka la bilfã võore
Namsg buud fãa sẽn na n sa ka la bilfã võore
“Bãmb yaa kugri. Bãmb tʋʋma zemsa zãnga.”—TÕODO 32:4.
1, 2. a) Bõe yĩng tɩ y rat ne y sũur fãa n vɩɩmd wakat sẽn kõn sa? b) Bõe yĩng tɩ neb wʋsg pa rat n tẽ tɩ Wẽnnaam ning sẽn pʋlem tɩ d na n paama bõn-sõma beoog daarã sɩd beeme?
YÃMB nong n tagsda vɩɩmã sẽn na n yɩ to-to arzãnã pʋgẽ wã yell bɩ? Tõe tɩ y sã n mi n tagsd rẽ yelle, y zoe n ne y sẽn be be n gilgd n get bõn-vɩɩlɩ wã sõor ka tɛkã. Pa rẽ bɩ tõe tɩ y tagsda sũ-noog ning y sẽn na n paam y sẽn na n wa naag neb a taab n maneg tẽngã tõr t’a lebg zĩ-neerã. Leb n tõe tɩ y tagsda bũmb nins fãa y sẽn na n wa tõog n maan arzãnã pʋgẽ wã yelle. Wala makre, te-neeba, ro-neeba, mizik wall bũmb a taab y sẽn pa tõe n yã sẽk n maan dũni kãngã pʋgẽ. Sẽn yaa a soab fãa, y rata vɩɩm ning buud b sẽn boond Biiblã pʋgẽ tɩ ‘vɩɩm hakɩkã’ ne y sũur fãa. Yaa woto la a Zeova ra sɩng n dat tɩ d vɩɩmd wakat sẽn kõn sa.—1 Tɩmote 6:19, Kãab-paalgã Koe-noogo.
2 Hakɩka, moon koe-kãngã sẽn be Biiblã pʋgẽ wã neb a taabã nooma tõndo, la a yaa zu-noog meng n kõ-do. La baasgo, neb wʋsg pa rat n tẽ koɛɛgã ye. B tagsdame tɩ yaa belgre, la tɩ yaa sẽn pa tar-a yam soab n tõe n tẽ tɩ vɩɩm a woto buud na n wa zĩndame. Tõe n yaa toog ne-b tɩ b tẽ meng tɩ Wẽnnaam ning sẽn pʋlem bõn-kãngã wã sɩd beeme. Bõe yĩnga? Kẽer tagsdame tɩ dũniyã sẽn pid ne wẽnemã wilgdame tɩ Wẽnnaam kae ye. Sã n yaa ne bãmba, Wẽnnaam sã n be n sɩd nong ãdem-biisã la a yaa pãng soaba, dũniyã ra pa segd n pid ne wẽnem la namsg woto ye. B yetame tɩ Wẽnnaam sã n beẽ tɩ baas n yaa woto, sã n pa pãng n paoog-a, yaa tõnd yell n pa pak-a. La ne sãnda, sã n pa woto, b pa wʋmd yel-kãngã võor ye. Ad wã sɩd wilgdame t’a Sʋɩtãan luda ãdem-biisã yam.—2 Korẽnt dãmba 4:4.
3. Sok-bʋg sẽn yaa toog leoor la tõnd tõe n sõng nebã tɩ b paame, la bõe yĩng tɩ yaa tõnd bal n tõe n sõng-ba?
3 Yaa tõnd a Zeova Kaset rãmbã bal n tõe n sõng neb nins a Sʋɩtãan la dũni kãngã yam dãmb sẽn tudgã tɩ b wʋm yel-kãngã võore. (1 Korẽnt dãmba 1:20; 3:19) Tõnd mii bũmb ning sẽn kɩt tɩ neb wʋsg pa tẽed Biiblã sẽn kãab bũmb ninsã. B pa mi a Zeova ye. Tõe tɩ b pa mi a yʋʋrã la a yʋʋrã sẽn dat n yɛɛlga. Sẽn paase, b pa mi a sẽn sɩd yaa Wẽnnaam ninga, la b pa mi me t’a pidsda a pʋlemsã wakat fãa ye. Yaa tõnd sẽn yaa a kaset rãmbã bal n mi rẽ. Woto yĩnga, yɩta sõma tɩ d mi n lebg n ges d sẽn tõe n sõng neb nins yam sẽn pa likã to-to, tɩ b bãng bũmb ning sẽn kɩt tɩ Wẽnnaam bas tɩ namsgã la wẽnemã beẽ wã, bala yaa sok-kãngã n namsd-b n yɩɩda. (Efɛɛz rãmba 4:18) Pipi, d na n gesa d sẽn tõe n leok sok-kãngã to-to tɩ zemse. Rẽ poore, d na n wilga a Zeova sẽn maan bũmb ning n na n kɩt tɩ wẽnemã sa wã sẽn sõngd-d tɩ d bãng a sẽn yaa Wẽnnaam ninga.
D sẽn na n leok sokrã to-to
4, 5. Ned sã n sok-d bũmb ning sẽn kɩt tɩ Wẽnnaam bas tɩ wẽnema beẽ wã, nand tɩ d leok a soaba, yɩta sõma tɩ d reng n maan bõe? Bilg-yã.
4 Ned sã n sok-d n na n bãng bũmb ning sẽn kɩt tɩ Wẽnnaam bas tɩ namsgã beẽ wã, wãn-wãn la d na n leoke? Tõe tɩ d na n yɩɩ tao-tao n sɩng bũmb ning sẽn maan Edɛn zẽedã zĩigẽ wã yell goama, n dat n wilg a soab yɛlã ball-balle. Wakat ninga, woto tõe n yɩɩ sõma. La d segd n maana gũusgu. Yɩta sõma tɩ d sõng a soabã t’a reng n wʋm yɛl kẽer võor n yaool n leok-a. (Yelbũna 25:11; Kolos rãmba 4:6) D ges yɛl a tãab d sẽn tõe n deng n wilg nanda.
5 Pipi, sã n yaa dũniyã sẽn pid ne wẽnemã n sãamd a soab sũuri, tõeeme tɩ yel-beed n zoe n paam yẽ mengã, wall a neba. Sã n yaa woto, yɩta sõma tɩ d reng n kʋm-a. Tʋm-tʋmd a Poll sagla kiris-nebã tɩ b “yãb ne neb nins sẽn yãbdã.” (Rom dãmba 12:15) D sã n wilg ned tɩ d ‘kʋmd-a lame,’ na n yɩ a soab noogo. (1 Pɩɛɛr 3:8, Sebr Sõngo) A sã n bãng tɩ bũmb ning sẽn namsd-a wã reeg n pak-d lame, tõe n kɩtame t’a sak n deeg d goamã.
6, 7. Bõe yĩng tɩ ned sã n sok sokr sẽn namsd-a sẽn tik Biiblã zug bɩ d segd n deng n pẽg-a?
6 Yiib-n-soaba, d segd n pẽga d kɛlgdã, a sẽn sok woto wã yĩnga. Bala neb kẽer tagsdame tɩ b sã n sokd woto, wilgdame tɩ b pa tar tẽebo, la tɩ b pa waoogd Wẽnnaam ye. Tõe tɩ b tũudum taoor dãmb meng zoe n yeel-b-la woto. La ned sã n sokd sok-kãensã, pa wilgd tɩlae t’a soab pa tar tẽeb ye. Sɩd me, Biiblã gʋlsg wakate, wẽn-zoɛtb soka sogs-kãensã buudu. Wala makre, yɩɩl-gʋlsd a Davɩɩd ra soka woto: “Zusoaba, yaa bõe tɩ yãmb yaasd yɩɩg n solgd y meng namsg wakate?” (Yɩɩl Sõamyã 10:1) No-rɛɛs a Habakuk me ra soka woto: “Zusoaba, yaa wakat a wãn la m na n bool yãmb tɩ y wa sõng-m tɩ y ka wʋm? Mam kelmame n bool yãmb wẽnga yĩnga, la yãmb ka fãag tõnd ye. Yaa bõe yĩng tɩ yãmb kɩt tɩ m yã wẽng la m ges toogo? Sãoong ne wẽng bee mam taoore. Zabr ne no-koeemd yikame.”—Habakuk 1:2, 3.
7 Nin-kãensã yɩɩ wẽn-zoɛtb sẽn da waoogd Wẽnnaam. Rẽ yĩnga, b sẽn sok sogs-kãensã sẽn da namsd-bã, Wẽnnaam zab-b lame bɩ? Ayo. A Zeova pʋd n kɩtame tɩ b gʋls rẽ a Gomdã pʋgẽ. Rũndã-rũndã me, ned sã n baood n bãng wẽnemã sẽn piuugã võore, tõe n yaa tẽeb kom n tar-a. Sẽn dat n yeel t’a tʋlla ne a sũur fãa n bãng Biiblã sẽn yet rẽ wɛɛngẽ. D tẽeg t’a Zezi yeelame tɩ sũ-noog rãmb la neb nins sẽn mi “tɩ tẽeb kom n tar-ba,” bɩ sẽn mi tɩ b segd n bao n bãnga Wẽndã. (Matɩe 5:3, NW) Ad sɩd yaa zu-no-kãseng n kõ tõndo, d sẽn sõngd nin-kãensã tɩ b tõe n paam sũ-noog ning a Zezi sẽn pʋlmã!
8. Zãms-bʋs sẽn yaa kɛg n kɩt tɩ nebã tẽed tɩ wẽnemã la namsgã sẽn be wã yaa Wẽnnaam yelle, la wãn-wãn la d tõe n sõng-ba?
8 Tãab-n-soaba, tõe tɩ na n yɩɩ tɩlae tɩ d reng n sõng a soabã t’a bãng tɩ wẽnemã sẽn piuug woto wã pa Wẽnnaam yell ye. B wilga neb wʋsg tɩ yaa Wẽnnaam n dɩt naam dũni kãngã zugu. B zãms-b lame me t’a pĩnd n pʋlma yɛl nins sẽn paamd-dã, la tɩ ned pa tol n tõe n wʋm a sẽn kɩt tɩ ãdem-biisã namsd woto wã võor ye. La yaa ziri. Zãms-kãensã paoogda Wẽnnaam n kɩtdẽ tɩ nebã tẽed tɩ wẽnemã la namsgã sẽn be wã yaa a yelle. Woto yĩnga, d segd n talla Wẽnnaam Gomdã n sõng nebã tɩ b wʋm yɛlã võor tɩrga. (2 Tɩmote 3:16) A Zeova pa dũni wẽn-kãngã naab ye. Yaa a Sʋɩtãan la a naaba. (1 Zã 5:19) A Zeova pa pʋlem malɛgsã la ninsaalbã me ye. A maana b fãa tɩ b tõe n yãk yam n maan sõma wall wẽnga. (Tõodo 30:19) Sẽn paase, a Zeova zɩ n maan wẽng lae-lae ye. A pʋd n kisa wẽnga, la neb nins sẽn namsdã yell pak-a lame.—Zoob 34:10; Yelbũna 6:16-19; 1 Pɩɛɛr 5:7.
9. Seb-bʋs la “tʋm-tʋmd sẽn tũud sɩd la sẽn tar yamã” yiis sẽn na yɩl tɩ d sõng nebã tɩ b bãng bũmb ning sẽn kɩt tɩ Wẽnnaam a Zeova bas tɩ wẽnemã beẽ wã?
9 D sã n deng n sõng d kɛlgdã t’a bãng woto, na n kɩtame t’a tʋlg n kelg bũmb ning sẽn kɩt tɩ Wẽnnaam bas tɩ namsgã beẽ wã neere. Sẽn na yɩl n sõng-do, “tʋm-tʋmd sẽn tũud sɩd la sẽn tar yamã” yiisa sɛb toɛy-toɛya. (Matɩe 24:45-47) Wala makre, yʋʋmd 2005 rasem a tãab tigis-kãsengã gom-zug sẽn yɩ ‘Wẽnnaam sakrã’ sasa, d paama seb-vãoog t’a gom-zugã yaa: Namsg buud fãa na n saa ka la bilfu! D sagenda y fãa tɩ y modg n karm-a sõma n bãng a sẽn yet bũmb ningã. Biiblã sɩd yetame tɩ bõe? sebrã me tara sak a yembr tõr sẽn wilgd bũmb ning sẽn kɩt tɩ Wẽnnaam bas tɩ namsgã beẽ wã. Rũndã-rũndã, seb-kãngã bee ne buud goam 157. D sagend-y lame tɩ y wilgd nebã seb-kãensã sẽn yaa sõma wã wa y sẽn tõe fãa. B wɛgsda Biiblã sẽn wilg sẽn sɩng to-to Edɛn zẽedã zĩigẽ tɩ b wa kɩɩs t’a Zeova pa segd n yɩ ãndũniyã fãa naabã. B leb n wilgda bũmb ning sẽn kɩt t’a Zeova welg yellã wa a sẽn maan to-to wã. Ning-y y yamẽ me tɩ y sã n wa sõsd yel-kãng zug ne neda, y sõngd-a-la sẽn na yɩl t’a paam bãngr ning sẽn tar yõod n yɩɩdã. A na n bãnga a Zeova sẽn sɩd yaa a soaba, la a sõmblmã sẽn ta zĩig ninga.
Kɩt-y tɩ b bãng a Zeova sẽn sɩd yaa a soabã
10. Bõe yĩng tɩ neb wʋsg pa wʋmd Wẽnnaam sẽn bas tɩ wẽnemã beẽ wã võore, la bõe n tõe n sõng-b tɩ b wʋm a võore?
10 D sã n dat n sõng ned t’a wʋm bũmb ning sẽn kɩt t’a Zeova kõ ãdem-biisã sor tɩ b soog b mens t’a Sʋɩtãan yɩ b naabã võore, d segd n modg n kɩtame t’a bãng a Zeova sõmblmã sẽn ta zĩig ningã. Neb wʋsg miime tɩ Wẽnnaam yaa pãng soaba, bala b mi n wʋmda b sẽn yet t’a tõeyã bũmb fãa. La baasgo, tõe n yaa toog ne-b tɩ b wʋm a sẽn pa kɩtd tɩ kɛgã la namsgã sa wã võore. Tõe tɩ baa b sã n miẽ t’a Zeova yaa sõng la tɩrlem soab n leb n yaa nonglem la yam soaba, b pa wʋmd rẽ fãa võor ye. A Zeova sẽn maand bũmb ning fãa zemsda kɛpɩ n wilgdẽ t’a yaa nonglem, sõngo, tɩrga, la yam soaba. Yaa rẽ n so tɩ Biiblã yetẽ t’a “tʋʋmã zemsa zãnga.” (Tõodo 32:4) Nebã sã n sok sokr yell ning sẽn zĩnd Edɛnnã zugu, wãn-wãn la d tõe n sõng-b tɩ b bãng tɩ Wẽnnaam tʋʋmã sɩd zemsa zãnga? Bɩ d ges makr a wãna.
11, 12. a) Bõe yĩng t’a Ãdem ne a Hawa kongrã tɩɩm da pa sugri? b) Bõe yĩng t’a Zeova pa na n bas tɩ yel-wẽnã kell n zĩnd wakat fãa?
11 Rẽ yĩnga, a Zeova ra tõe n kõ a Ãdem ne a Hawa sugr bal tɩ sa bɩ? Ayo. Ra pa sugr yell ye. Bala a Ãdem ne a Hawa sẽn wa n yãkd yam n na n tõdg a Zeova la b sak a Sʋɩtãanã b ra yaa ninsaalb sẽn zẽms zãnga. B ra mi b sẽn maandã. Pa zaalem tɩ kɩɩsdbã baa a ye pa bao n na n kos sugr ye. La nebã sã n mi n baood n bãng b sẽn pa kõ-b sugrã võore, tõe tɩ b tʋll n bãnga bũmb ning sẽn kɩt t’a Zeova pa bas a sẽn da rat sɩngrẽ wã tɩ lʋɩ la a sak tɩ ãdem-biisã kell n yɩ yel-wẽn-maandb la kɩɩsdbã. Sẽn na yɩl n wʋm dẽ võore, rẽndame tɩ b reng n bãng bũmb a ye a Zeova zugu: A yaa sõngo.—Yikri 28:36; 39:30, NW.
12 Biiblã pʋgẽ, b wilgdame n yɩlemdẽ t’a Zeova yaa sõngo. Bʋko, dũni wẽn-kãngã pʋgẽ, neb wʋsg pa wʋmd woto võor ye. A Zeova yaa yɩlemd n zãr ne wẽng buud fãa. (Ezai 6:3; 59:2) A rɩka segls sẽn na yɩl n yẽes d yel-wẽnã, la a pa na n bas tɩ yel-wẽnã kell n zĩnd wakat fãa ye. A Zeova sã n da sak rẽ, d ra pa na n tall saagr ye. (Yelbũna 14:12) Wakat ning a sẽn yãkã sã n ta, a na n menesa yel-wẽndã tɩ d fãa ye lebg sõma wala Ãdem ne a Hawa sẽn da yaa to-to sɩngrẽ wã. Sẽn yaa Wẽnnaam sẽn yaa sõng soabã raabã la rẽ wã, d tõe n kɩsa sɩd tɩ na n pidsame.
13, 14. Bõe yĩng t’a Zeova pa sãam Edɛn kɩɩsdbã?
13 Yellã tɩɩm yaa a Zeova sẽn da na n kell n sãam kɩɩsdbã n lebs n maan b taab bɩ? Yaa sɩd t’a Zeova tara pãng n da tõe n maan rẽ, ka la bilfu, a na n talla pãn-kãng n sãam nin-wẽnsã fãa. Neb kẽer tõe n dat n bãnga bũmb ning sẽn kɩt t’a pa sãam bɛɛgdb a tãabã sɩngrẽ wã. B tõe n tagsdame t’a sã n da sãam-ba, nimbãaneg ning ãdem-biisã sẽn yãt rũndã-rũndã wã ra pa na n zĩndẽ ye. La bõe yĩng t’a Zeova pa sãam kɩɩsdbã? Tõod 32:4 yeta woto: “Bãmb soayã fãa yaa tɩrse.” A Zeova tɩrlmã yɩɩda ãdem-biisã hal zĩig sẽn zãre. Sɩd me a Zeova “nonga tɩrlem.” (Yɩɩl Sõamyã 37:28) Yaa a sẽn nong tɩrlmã yĩng n kɩt t’a pa sãam kɩɩsdbã Edɛn tɩ sa wã. Bõe yĩng tɩ d yet woto?
14 A Sʋɩtãan kɩɩsame tɩ Wẽnnaam pa segd n yɩ ãndũniyã fãa naab ye. A Zeova tɩrlmã yĩnga, a segd n welga gomdã tɩ tũ tɩrga. Baa ne a sẽn da tar bʋʋm n tõe n sãam kɩɩsdbã zĩig pʋgẽ wã, a sã n da maan boto, a pa welg yellã tɩ zems ye. Bala rẽ ra na n wilgame bal t’a tara pãnga. La a Sʋɩtãan pa kɩɩs t’a pa tar pãng wɛ. Sẽn paase, a Zeova ra paam n wilga a Ãdem ne a Hawa t’a ratame tɩ b rog kamb n pids dũniyã la b soog-a ne bũmb nins fãa sẽn be a zugã. (Sɩngre 1:28) A sã n da sãam-ba, a gomdã ra pa na n pids ye. A tɩrlmã yĩnga, a yaool n pa tõe n yeel bũmb n pa pids ye. A gomd pidsda wakat fãa.—Ezai 55:10, 11.
15, 16. Nebã sã n togsd bãmb sẽn da na n welgẽ yell ning sẽn zĩnd Edɛnnã to-to, wãn-wãn la d tõe n sõng-ba?
15 Rẽ yĩnga ned bee ãndũniyã zug n da tõe n welg yel-kãngã ne yam n yɩɩg a Zeova bɩ? Neb kẽer tõe n yetame tɩ sã n da yaa bãmba, b ra pa na n welgẽ yell ning sẽn zĩnd Edɛnnã wa Wẽnnaam sẽn welg-a to-to wã ye. La b sã n yet woto, rẽ yĩnga b rãmb pa rat n wilg tɩ bãmb da tõe n welga yellã sõma n yɩɩg sɩda? Tõe tɩ b pa yet woto n dat n paoog Wẽnnaam ye, yaa b sẽn pa mi a Zeova la b pa mi a yamã sẽn ta zĩig ningã. Tʋm-tʋmd a Poll lɛtr ning a sẽn gʋls Rom kiris-nebã pʋgẽ, a goma Wẽnnaam a Zeova yamã yell wʋsgo. A wilga a sẽn maan to-to n na n fãag sakdbã la a sõms a yʋʋrã sẽn yaa sõngã ne Mesi Rĩungã maasmã, n yeel tɩ bõn-kãngã yaa sãmbg sẽn yaa sõngo. Tʋm-tʋmd a Poll sẽn bãng Wẽnnaam sẽn segl yɛlã woto wã, a tagsg yɩɩ wãn a yamã wɛɛngẽ? A lɛtrã baasgẽ, a yeela woto: ‘Bɩ Wẽnnaam sẽn yaa yam soab n ka to wã paam waoogr a Zezi Kirist maasem yĩng wakat sẽn ka sɛta. Amina!’—Rom dãmba 11:25; 16:25-27.
16 A Poll da miime t’a Zeova a ye bal la “yam soaba,” sẽn dat n yeel tɩ ãndũniyã gill zugu, ned kae t’a yam ta-a ye. Ãdem-biisã fãa sẽn yaa pãn-komsem dãmbã yĩnga, yel-bʋg la b tõe n welg tɩ tũ tɩrg tɩ b sokd a Sʋɩtãan sẽn wa ne yell ningã? Dẽnd d segd n sõnga nebã tɩ b bãng Wẽnnaam sẽn “so yam la pãngã” sẽn yaa a soabã, la b waoog-a wa tõndo. (Zoob 9:4) D sã n bãngd a Zeova yamã sẽn yaa to-to wã n paasdẽ, na n kɩtame tɩ d kɩs sɩd wakat fãa t’a sẽn welgd yɛlã to-to wã la sõma n yɩɩda.—Yelbũna 3:5, 6.
A nonglmã yĩnga
17. Neb nins sũy sẽn sãamd Wẽnnaam sẽn bas tɩ namsgã beẽ wã yĩngã sã n bãng a nonglmã sẽn ta zĩig ninga, wãn-wãn la tõe n sõng-ba?
17 “Wẽnnaam yaa nonglem.” (1 Zã 4:8) Yaa ne gom-kãensã sẽn tagmã la Biiblã sõngd tõnd tɩ d bãng t’a Zeova nonglmã yaa kãseng n yɩɩd sẽn ketã fãa. B sẽn yet tɩ Wẽnnaam yaa nonglmã noom-d-la wʋsgo. Neb nins fãa sũy sẽn sãamd wẽnemã sẽn piuugã yĩngã sã n bãng t’a nong-b lame, belsd-b-la hal kẽengo. Bũmb nins fãa a Zeova sẽn maan n na n welg zu-loees nins fãa yel-wẽndã sẽn wa ne wã pʋgẽ, a wilga a nonglmã. A Zeova nonglmã yĩng kɩtame t’a maan bũmb a Ãdem ne a Hawa yagensã sõngr yĩnga. (Sɩngre 3:15) A kɩtame tɩ b tõe n pʋʋs-a, la b tõe n lebs n paam zems-n-taar ne-a. Wẽnnaam nonglmã yĩng me, a kõo rond n na n kɩt tɩ ãdem-biisã tõog n paam b yel-wẽnã sugr zãng-zãng n lebg wa a Ãdem ne a Hawa sẽn da yaa to-to sɩngrẽ wã, n tõog n vɩɩmd wakat sẽn kõn sa. (Zã 3:16) Yaa a Zeova nonglmã yĩng n kɩt t’a nan pa sãam ãdem-biisã n kõ b ned kam fãa sor t’a yãk yam n tõdg a Sʋɩtãanã, la a sak yẽ wã.—2 Pɩɛɛr 3:9.
18. Tõnd paama zu-noog n mi bõe, la bõe yell la d na n gom d sõsg ning sẽn pʋgdã pʋgẽ?
18 Daar a ye, pastɛɛr sẽn da wa n sõsd ne zãma sẽn tigim taab n na n tẽeg teerorist rãmb sẽn da maan yel-beedo, a yeela zãma wã woto: “Tõnd pa mi bũmb ning sẽn kɩt tɩ Wẽnnaam bas tɩ wẽnemã la namsgã beẽ wã ye.” Ad sɩd yaa kaeto! Tõnd yẽ sũy nooma wʋsg d sẽn paam n mi rẽ võorã. (Tõodo 29:28) Sẽn paase, d miime t’a Zeova yamã, a tɩrlmã la a nonglmã yĩnga, ka la bilfu, a na n kɩtame tɩ namsg buuda fãa sa. Sɩd me, a kãabame t’a na n maana woto. (Wilgri 21:3, 4) La rẽ yĩnga saagr bee neb nins fãa sẽn ki hal pĩnd n tãag rũndã-rũndã wã yĩng bɩ? A Zeova sẽn welg gomd ning sẽn zĩnd Edɛnnã to-to wã pʋgẽ, a yĩma nin-kãensã bɩ? Ayo. A nonglmã yĩnga, a pʋlmame t’a na n vʋʋga sẽn ki-bã. D sõsg ning sẽn pʋgdã pʋgẽ, d na n goma rẽ yelle.
Y na n leokame tɩ bõe?
• Wãn-wãn la d tõe n leok ned sẽn baood n na n bãng bũmb ning sẽn kɩt tɩ Wẽnnaam bas tɩ namsg beẽ wã?
• A Zeova sẽn welgd yell ning sẽn zĩnd Edɛnnã to-to wã pʋgẽ, wãn-wãn la a wilgẽ t’a yaa tɩrg la sõngo?
• Bõe yĩng tɩ d segd n sõng nebã tɩ b bãng t’a Zeova sɩd nong-b-la wʋsgo?
[Zãmsgã sogsgã]
[Foto, seb-neng 15]
Sõng-y neb nins sũy sẽn sãamd dũniyã sẽn pid ne namsgã yĩngã
[Foto rãmba, seb-neng 17]
Wẽn-zoɛtb a Davɩɩd ne a Habakuk soka Wẽnnaam sogsgo