Rao sẽn kẽ bãong n yaa rao hakɩk bɩ?

TẼNS wʋsg pʋsẽ, b kẽesda kom-dibli wã bãong b peelmẽ sẽn na yɩl n kogl-b ne bãase. La tẽns a taab pʋsẽ, bi-ribl pa segd n kẽ bãong lae-lae ye. La ne neb kẽere, wala makre Zʋɩf rãmbã la moeembã, b sẽn kẽesd b kom-dibli wã bãongã pa sẽn na yɩl n kogl-b ne bãas bal ye, yaa tũudum yell me.

Soolem a taab pʋsẽ me, yaa kom-dibli wã bɩʋʋng zugẽ la b talld-b n tɩ kẽes bãongo. B tallda kambã n tɩ kõ neb sẽn segd n kẽes-b bãongã tɩ b kẽes-b la b zãms-b kʋdemdã yɛla. Kambã paada be n maan semen dãmb hal tɩ nodrã wa maage. Semen kãens fãa pʋgẽ, rog-n-migs toor-toor la b zãmsd kambã, n wilgd-b rao sẽn segd n yɩ to-to. Rẽ yĩnga, yaa woto maaneg n kɩtd tɩ bi-ribl lebg rao hakɩk bɩ? Bɩ d ges Biiblã pʋgẽ n bãng Wẽnnaam tagsg yel-kãngã zugu.—Yelbũna 3:5, 6.

Wẽnnaam tagsg bãongã zugu

Pĩnd wẽndẽ wã, neb kẽer wala Ezipt nebã ra kẽesda b kom-dibli wã bãongo. Sẽn dat n yeel tɩ b ra wõrsda b yo-gãndã. La a Abrahaam buudã neb ra pa kẽed bãong ye. Sɩd me, kaoosa yʋʋm wʋsg t’a Abrahaam yaool n na n kẽ bãongo. La baa a sẽn da wa n nan pa kẽ bãongã, a ra zoe n yaa gãndaoogo. Rĩm dãmb a naas ne b tab-biis n da wa n yõk a Abrahaam yageng a Lote. A Abrahaam wʋmame n peeg neb bilf bal n babs-b n tɩ zab ne-b n tõoge. (Sɩngre 14:8-16) Yʋʋm 14 rẽ loogr poore, Wẽnnaam yeela a Abrahaam t’a kẽ bãong la a kẽes a zakã rãmb fãa bãongo. Bõe yĩng tɩ Wẽnnaam yeel-a t’a maan woto?

Ra pa sẽn na yɩl n wilg t’a Abrahaam lebga rao ye. Bõe yĩng tɩ d yet woto? Bala sasa kãng t’a ra zoe n tara yʋʋm 99. (Sɩngre 17:1, 26, 27) Wẽnnaam wilga a sẽn yeel-a t’a kẽ bãongã võor n yeel woto: “Bɩ y kẽ bãongo, tɩ yɩ bãnd sẽn wilgd kãabg ninga sẽn be maam ne yãmb sʋkã.” (Sɩngre 17:11) Wẽnnaam sẽn da yeel a Abrahaam tɩ na n tũu ne yẽ tɩ ‘dũniyã buud fãa paam barkã’ ra naaga kãabg bɩ kaool kãng pʋgẽ. (Sɩngre 12:2, 3) Dẽnd Wẽnnaam nifẽ, bãongã kõom da pa sẽn na yɩl n wilg tɩ bi-ribl lebga rao hakɩk ye. A sẽn da kɩt tɩ Israɛll nebã kẽed bãongã yaa sẽn na yɩl n wilg tɩ b naaga a Abrahaam roogã neb sẽn da tar zu-no-kãsengã. Bala yaa bãmb bal la Wẽnnaam da kõt a goamã.—Rom dãmba 3:1, 2.

La kaoosg zugẽ, Israɛll buudã sẽn tõdg a Abrahaam yagengã sẽn yaa a Zezi Kiristã yĩnga, Wẽnnaam wa n pa le kõt-b a goamã ye. Woto yĩnga, Wẽnnaam bas-b lame tɩ b sẽn kẽed bãongã pa le tar võor a nifẽ ye. La pipi kiris-nebã wakatẽ wã, kiris-neb kẽer da yetame tɩ bãongã kõom ket n yaa tɩlae Wẽnnaam nifẽ. (Tʋʋma 11:2, 3; 15:5) Woto kɩtame tɩ tʋm-tʋmd a Poll tʋm a Tɩt tigims toɛy-toɛy pʋsẽ t’a tɩ “maneg yɛlã.” A Poll gʋlsa a Tɩt n wilg-a yell a ye a sẽn tog n manege. A yeel-a-la woto: “Nin-kɩɩsdb ne gom-yaals rãmb la belgr dãmb wʋsg n be, la sẽn yɩɩda [sẽn yet-b tɩ bãongã kõom yaa tɩlae wã, NW]. Yaa tɩlae tɩ f kɩt tɩ bãmb sĩndi. Bãmb lubda neb ne b yir dãmb fãa, bãmb zãmsda neb sẽn ka zemse, n baood ligdi.”—Tɩt 1:5, 10, 11.

 A Poll saglgã ket n tara yõod wʋsgo. Pa segd tɩ kiris-ned hakɩk yeel ned tɩ yaa tɩlae t’a kẽes a biig bãong ye. Woto pa zems ne Biiblã sẽn yetã ye. Kiris-ned pa segd n “kẽed neb a taab yɛlẽ ye,” a segd n basame tɩ roagdbã yãk b sẽn dat n maanega. (1 Pɩɛɛr 4:15, NW) Sẽn paase, Wẽnnaam vẽnega a Poll t’a gom bãongã a Moiiz Tõogã sẽn da kõ noor tɩ b kẽ wã yell n yeel woto: “Ned sã n da yaa zũng a boolg wakate, bɩ a kell n yɩ zũnga. La ned sã n da yaa moaag a boolg wakate, bɩ a ra kẽ bãong ye. Bãong yaa zaalem la moonem me yaa zaalem, la yaa Wẽnnaam tõog sakre n tar yõodo. Ned kam fãa sẽn da yaa bũmb ning a boolg wakate, bɩ a kell n zĩnd woto.”—1 Korẽnt dãmba 7:18-20.

La tɩ kẽes kambã bãong la b zãms-b kʋdemdã yɛlã yẽ?

Kiris-neb sã n yãk yam n na n kẽes b bi-ribl bãongo, rẽ yĩnga ne Biiblã, zemsame tɩ b tall-a n kẽng zĩis nins b sẽn kẽesdẽ kambã bãong la b zãmsd-b tẽn-kʋdem yɛlã bɩ? Pa bãongã bal la b kẽesd kambã be ye. Yaa semen dãmb wʋsg pʋgẽ la biigã na n tɩ zĩnd be ne kom-dibli la karen-saam dãmb sẽn pa a Zeova Kaset rãmba. Be, bũmb wʋsg b sẽn zãmsd kambã kɩɩsda Biiblã noyã. Biiblã keoogda woto: “Tũud-n-ta-wẽns sãamda nin-sõamyã.”—1 Korẽnt dãmba 15:33.

Naoor wʋsgo, kambã paamda zu-loees a taab zĩ-kãensã. Yʋʋmd 2003 soabã pʋgẽ, Afirikdisiid zʋrnall a ye (South African Medical Journal) sẽn gomd laafɩ wã yell yeela woto: “Rõndã yʋʋmdã yɛsa, b kẽesa kamb bãong kẽes-beed tɩ tũ ne kẽer yõyã, tɩ b wilg sãmpoagã la kũ-rãmbã zʋrnall dãmb yʋy sẽn yi pʋsẽ dũniyã gill zugu. . . . Koɛɛg-koɛɛga, zĩis wʋsgo, b sẽn kẽesd kambã rog-n-mik bãongã to-to wã pa sõma, la kʋʋd kẽer menga.”

Sẽn paase, pa b sẽn pa kẽesd bãongã sõma tɩ tõe n koms kambã bal n yaa yell ye. Sẽn yaa wẽng n yɩɩdã, yaa tɩ kambã sã n kẽng zĩ-kãensã, zems-n-taar ning b sẽn tar ne a Zeova wã tõe n sãamame. B sẽn zãmsd kambã bũmb ninsã la b sẽn maand bũmb nins be wã tara loees ne tɩt maaneg la yaab rãmbã sẽn ki wã balengo. Wala makre, sãmpogr sã n zĩnd bɩ yõor sã n yãke, b pa sakd n deeg tɩ yaa rẽgdã la b sẽn pa maand gũusgã n wa ne rẽ ye. Neb wʋsg tẽedame tɩ yaa sõodo, pa rẽ bɩ b tẽed tɩ b maana bũmb tɩ pa ta yaab rãmbã yam ye. Biiblã sagend-d lame tɩ d ra naag tũudum a taabã neb n sak b sẽn tẽed bũmb ninsã ye. B yet-d-la woto: “Bɩ y ra lagem ne neb nins sẽn ka tẽeba ye. Tɩ bõe, bõe lageng n be tɩrlem ne wẽng sʋka? Walla bõe lageng n be vẽenem ne lik sʋka? . . . Zusoaba yetame yaa: ‘Bɩ y yi bãmb sʋka la y welg ne bãmba. Da sak-y tɩ yãmb sũyã rẽgem ye, la mam na reeg yãmba.’” (2 Korẽnt dãmba 6:14-17) Woto yĩnga, pa sõma tɩ roagdb sẽn yaa kiris-neb tall b kamb n tɩ naag kamb a taab tɩ b kẽes-b bãong la b zãms b kʋdemdã yɛl ye.

Bõe n wilgd tɩ kiris-ned yaa rao hakɩka?

Kiris-ned sẽn yaa rao kẽe bãong t’a pa kẽ bãong me, pa rẽ n wilgd a sã n yaa rao hakɩk ye. Sẽn tar yõod ne kiris-ned hakɩk n yɩɩd yaa a sẽn na n tat a Zeova yam lakae pa a sẽn na n kẽ bãong tɩ nebã getẽ tɩ rẽ la sõma wã ye.—Galat dãmba 6:12.

Sẽn na yɩl n ta Wẽnnaam yam, kiris-ned ‘segd n kẽesa a sũurã bãongo.’ (Tõodo 10:16; 30:6, NW; Matɩe 5:8) Woto pa rat n yeel t’a segd n wãaga a sũurã ne sʋʋg ye. Rat n yeelame bal t’a segd n zãaga a meng ne tʋls-wẽns la wuk-m-menga. Wala makre, a pa segd n tagsdẽ tɩ bãong kõom kɩtdame tɩ ned yɩɩd a taab ye. Kiris-ned sã n namsdẽ la a baas n tõogd toog n ‘yalsd kãn-kãe tẽebã pʋgẽ,’ baa a pa kẽ bãongo a wilgdame t’a yaa rao hakɩka.—1 Korẽnt dãmba 16:13; Zak 1:12.