“B yaa buud toɛy-toɛya, la b nonga taaba”

Fãagre! Nebã sẽn sɩng n baood tɩ b fãag-b ne zu-loeesã la yɩɩrã daar zãra. Wãn to la d tõe n mao ne zu-loeesã? Rẽ yĩnga d na n wa paama fãagr bɩ? Sã n yaa n-yẽe, wãn to?

YƲƲMD 2006 pʋgẽ, sẽn sɩng ne sig-noy kiuugã, a Zeova Kaset rãmbã talla rasem a tãab tigis-kãsems sẽn gom n tadg sogs-kãensã zutu. A gom-zugã yɩɩ “D fãagrã ta n saame!”

Tẽns kẽer pʋsẽ, b reega sãamb sẽn yi tẽns toɛy-toɛy n wa tigis-kãsen-kãnga. Yɩɩ zĩis a wɛ la b maan woto yʋʋmd 2006 sẽoog la sa-sik kiisã sasa. Yɩɩ Praag sẽn yaa Repiblik Tsɛk na-tẽngẽ wã, Bratislava sẽn yaa Slovaki na-tẽngẽ wã, Korzõ la Poznan sẽn be Poloyn * wã, n paas Dortmund, Frãnkfor, Hamburg, Leipzig, la Munik sẽn yaa Alemayn tẽnsã pʋsẽ. Tigis-kãsen-kãensã fãa nebã sõor sẽn naag taab yɩɩga neb 313000.

Nebã manesem yɩɩ wãn to tigis-kãsengã sasa? Bõe la nebã yeel tigisgã wɛɛngẽ? La tigis-kãsengã sẽn wa n sa wã, sẽn wa-bã manesem yɩɩ wãn to?

Tigis-kãsengã seglgo

Sãambã la tẽngã rãmb ra gũuda tigis-kãsengã ne b sũy fãa, bala b ra miime tɩ na n sɩd yɩɩ tigisg b sẽn pa na n yĩm. Sẽn na yɩl n paam ro-gãas n kõ sãambã, yɩɩ tʋʋm tɛkẽ. Wala makre, Korzõ wã, Poloyn sãam-biisã sak n deega sãamb sẽn na maan 13000 sẽn yit Erope Yaang n wa tigis-kãsengã b zagsẽ. B yii Armeni, Belarus, Ɛstoni, Zorzi, Kazakstã, Kirgɩzɩstã, Letoni, Lituani, Moldavi, Risi, Tadzikɩstã, Turkmenistã, Ukrɛn, Etazĩni, la Uzbekɩstã.

Sãamb wʋsg sɩnga tigis-kãsengã seglg tɩ ket kiisi. A Tatiana yaa koe-moond sẽn dɩkd sẽk wʋsg kiuug fãa n moond koe-noogã n be Kamchatka sẽn be Risi tẽngã rɩtg babgã pʋgẽ wã. A sɩnga a ligdã tigisg tigis-kãsengã yĩng tɩ nan ket yʋʋmde. A ra segd n toga sor sẽn na ta kɩlometr 10500. A reng n kẽe sɩlg n maan lɛɛr a 5. Rẽ poore a kẽe tẽrẽ n maam rasem a 3, la sẽn na n baase, a kẽe mobil n maan lɛɛr 30 n yaool n na n ta Korzõ.

Neb tusa saka ne yamleoog n sõng n pɩɩs ɛstaad dãmbã sẽn na yɩl tɩ zĩigã yɩ yɩlemde, tɩ b tõog n balem Wẽnnaam be. (Tõodo 23:15,) Wala makre, a Zeova Kaset rãmb nins sẽn yit Leipzigã modgame n pɩɩs ɛstaadã,  la b wilg ɛstaadã taoor dãmb tɩ tigisgã poore, b na n le pɩɩsame. Woto kɩtame tɩ ɛstaadã taoor dãmb yeel tɩ b bas ligd ning b sẽn da segd n yao tɩ bãmb meng pɩɩs ɛstaadã.

Nebã boolgo

Dũniyã gill zugu, b pʋɩɩ seb-vãad n bool nebã tɩ b wa “D fãagrã ta n saame!” tigis-kãsengã. Neb nins fãa sẽn da rebd tigisgã kẽesa b toog nebã boolg pʋgẽ ne yẽesem. B kell n moona tigis-kãsengã hal n tɩ tãag a ket tɩ beoogã yʋngo. Rẽ yĩnga b sẽn maan woto wã woma biis bɩ?

A Zeova Kaset soab a ye sẽn yit Poloyn yʋʋr sẽn boond t’a Bogdan sega nin-kẽem sẽn baood n na n kẽng tigisgã, n yaool n pa tar ligd sẽn sek a na tog sor kɩlometr 120 n kẽng Korzow ye. La mikame tɩ vɩʋʋg n da ket mobill ning a Bogdan tigingã rãmb sẽn da na n kẽ n kẽng tigis-kãsengã pʋgẽ. A Bogdan yeela woto: “Tõnd yeela raoã t’a tõe n wa tũu tõnd n pa yao baa fʋɩ, a sã n tõog tɩ yibeoog wakat a 5 sẽn loog minit 30 wã bɩ a be sɛkã zĩigẽ.” Raoã sɩd sak n maana woto, n paam n tũ n kẽng tigis-kãsengã. Kaoosg poore, a gʋlsa saam-biisã lɛtr n yeel woto: “Mam sẽn tɩ kelg tigis-kãseng kãngã wã, kɩtame tɩ mam yãk yam n na n toeeme.”

Praage, rao n da be lotɛll a ye pʋg ne saam-biis sẽn yi Ãngeletɛɛr n wa tigis-kãsengã. Tigis-kãsengã raar a ye zaabre, raoã yeela saam-biisã tɩ yẽ me zĩnda tigis-kãsengẽ wã. Bõe n kɩt t’a kẽng tigis-kãsengã? A yeelame tɩ sẽn yɩ hal koe-moondb piig n kõ yẽ boollã sebrã yĩnga, ra segdame t’a kẽnge! A sũur yɩɩ noog wʋsgo, t’a rat n zãms n paase.—1 Tɩmote 2:3, 4.

Zãmsgã b sẽn paamã yɩɩ sõma wʋsgo

Tigis-kãsengã wilga d sẽn na n maan to-to n tõog n mao ne zu-loeesã. B talla Biiblã n wilg nebã b sẽn na n maan to-to n tõog n welg zu-loeesã, bɩ n tõog n mao ne-ba.

Sẽn kʋʋl-bã, sẽn ka-b laafɩ wã, b rãmb nins neb sẽn maan kaalmã, la sẽn tar-b zu-loees a taabã fãa paama sagls sẽn yit Biiblã pʋgẽ, sẽn na n sõng-b tɩ b gãneg b yam. (Yɩɩl Sõamyã 72:12-14) Pagbã ne b sɩdbã paama sagls sẽn yit Biiblã pʋgẽ sẽn na n sõng-b tɩ b zakã pʋgẽ vɩɩm tall sũ-noogo. Roagdbã me paama sagls sẽn na n sõng-b tɩ b tõog n wub b kambã sõma. (Koɛɛg Soaba 4:12; Efɛɛz rãmba 5:22, 25; Kolos rãmba 3:21) Yaa sɩd tɩ kom-bɩɩsã paamda sagl-sõma yir la tigingã pʋgẽ. La sẽn mik tɩ b lekollẽ wã, b karen-bi-taasã weoogd-b lame n dat tɩ b naag-b n maan sẽn pa sõma wã yĩnga, b paama sagls sẽn na n sõng-b tɩ b karen-bi-taasã ra tõog-ba, la b tõog n “lak ne yãadem datem wẽngã.”—2 Tɩmote 2:22.

Sɩd yaa saam-biis sẽn yit dũniyã gill zugu

A Zeova Kaset rãmbã tigissã sasa b paamda sagl-sõma sẽn yit Biiblã pʋgẽ. (2 Tɩmote 3:16) La bũmb ning sẽn kɩt tɩ tigis-kãsengã yɩ toor  fasɩ wã yaa nebã sẽn yit tẽns toor-toor pʋsẽ la b gomd buud goam toɛy-toɛyã. Zĩig fãa, nebã sẽn wʋm bũmb ning tigis-kãsengẽ wã yɩɩ bũmb a yembre, yaa buud goamã bal n da yaa toɛy-toɛya. Rasem a tãabã fãa, a Zeova Kaset rãmbã Siglgã taoor lʋɩtb Sull neb n wɛgs sõss kẽere. Tẽns a taab kibay me la b togs-yã, tɩ keng nebã raoodo. B lebga sõs-kãensã la kibayã ne buud goam toɛy-toɛya, sẽn na yɩl tɩ nebã fãa wʋme.

Sãambã ra yãgda ne b sũy fãa n dat n yã saam-biis a taabã. Saam-biig a ye yeela woto: “Baa ne nebã buud goamã sẽn da yaa toɛy-toɛyã, rẽ pa yɩ yell ye. Kɩtame tɩ tigisgã tall yamleoog meng n paase. Yaa sɩd tɩ nebã yii tẽns la buud toɛy-toɛy pʋsẽ, la b fãa tẽebã sẽn yaa a ye wã kɩtame tɩ welgr ka b sʋk ye.” Sẽn zĩnd-b Munik tigis-kãsengẽ wã yeela woto: “B yaa buud toɛy-toɛya, la b nonga taaba.” Baa ne b sẽn pa yi tẽng a ye pʋgẽ la b pa buud a ye nebã, b bãngame tɩ b bee ne b tẽed-n-taas sẽn yaa zo-rãmb hakɩka.—Zakari 8:23.

B wilgame tɩ b sũur yaa noogo

Poloyn, saagã sẽn da niid wakat fãa tɩ yaa waood wʋsgã namsa sãambã. Saam-biig sẽn yit Etazĩni yeela woto: “Mam zɩ n yã tigis-kãsengẽ saag sẽn ni tɩ zĩig maag n ta woto ye. Sẽn paase, buud gomdã yĩnga, m pa tõog n wʋm bũmb wʋsg ye. La saam-biisã sẽn yi zĩis toɛy-toɛy la b nong taab to-to wã, n paas b sẽn deeg tõnd to-to wã kɩtame tɩ mam pa le tags d naongã yell ye. Mam pa na n tol n yĩm tigis-kãseng kãngã yell ye!”

Bũmb a yembr Poloyn saam-biisã sẽn kõn tol n yĩm yaa b sẽn yiis Étude perspicace des Écritures sɛb a yiibã ne b buudã gomdã. Woto yaa bark b sẽn paame, b sẽn tõog n zĩnd baa ne saagã la waoodã. Neb nins fãa sẽn zĩnd “D fãagrã ta n saame!” tigis-kãsengẽ wã sũy yɩɩ noog wʋsg me, b sẽn yiis sebr ning gomd zug sẽn yaa Vivez en gardant à l’esprit le jour de Jéhovah wã.

Bũmb a taab me n na n kɩt tɩ neb wʋsg tẽeg tigis-kãsengã yelle. Repiblik Sɛk saam-bi-poak a Kristina saka ne yamleoog n yãag sãambã. A yeela woto: “B loogrã sasa, saam-bi-poak a ye n bool maam kɛɛng n mobg maam n yeel woto: ‘Y sɩd gesa d yell sõma! Y bʋʋga tõnd d zĩisẽ wã meng n kõ-d rɩɩb la koom. D pʋʋsd-y-la bark wʋsg ne y sẽn wilg tɩ y nonga tõndã.’” Yaa midi wã rɩɩb yell la pagã sẽn gomã. Saam-biig a ye yeela woto: “Nebã rɩlgr wĩndg fãa wã yɩɩ tʋʋmd tõnd sẽn zɩ n tʋme. Yɩɩ neb 6500 la d ra segd n dɩlg daar fãa. La neb wʋsgo, baa kambã meng sẽn sak ne yamleoog n sõngã kõ-d-la sũ-noog wʋsgo.”

Saam-bi-poak a ye sẽn yi Ukrɛn n kẽng Korzõ tigis-kãsengã yeela woto: “D sũur yaa noog wʋsgo, d tẽed-n-taasã sẽn ges d yelle, n maan-d neer la b wilg tɩ b nong-d lame wã. Sã n yaa sɩda d pa tar noor n pʋʋsd-b bark ye.” A Anika yaa yʋʋm a 8 bi-pugl sẽn yit Fẽnlãnde. A gʋlsa a Zeova Kaset rãmbã biru sẽn be Poloyn wã lɛtr n yeel woto: “Tigis-kãsengã yɩɩ sõma hal wʋsgo. A Zeova siglgã pʋgẽ zĩndg yaa sõma hal wʋsgo, bala f sã n be siglgã pʋgẽ, f tara zo-rãmb dũniyã gill zugu!”—Yɩɩl Sõamyã 133:1.

Neb sẽn pa a Zeova Kaset rãmb sẽn yeele

Nand tɩ tigis-kãsemsã sɩnge, b talla sãambã tɩ b gilg n ges tẽnsã. Bavɩɛɛr tẽngã kɩrengã,  sãambã ra tekd n yalsd n geta Rĩung Roto, tɩ zĩ-kãens saam-biisã reeg-b sõma. Pag a ye sẽn pa a Zeova Kaset soab sẽn da yãagd sãambã n gilgdẽ sũur yɩɩ noog wʋsg ne saam-biisã sẽn wilg tɩ b nonga taabã. Saam-biig a ye yeela woto: “Tõnd sẽn wa n be mobillã pʋgẽ n lebd d lotɛllẽ wã, sẽn da yãagd-a tõndã yeelame tɩ tõnd yaa toor fasɩ ne neb a taabã. A yeelame tɩ tõnd manega d mens sõma, tɩ d sakda neb nins sẽn lʋɩt taoorã noyã, tɩ d pa gomd gom põosa, d pa maand yaar me. Ling-a-la wʋsgo, a sẽn yã tɩ nebã yaa tẽns toɛy-toɛy neb la b baas n yaa zo-rãmb hakɩk woto wã.”

Saam-biig sẽn da tʋmd Praag tigis-kãsengã kibayã zĩigẽ yeela woto: “Hatã yibeoogo, polɩɩs rãmb nins sẽn da gũud tigis-kãsengã taoor soab n wa n kaag tõndo. A mikame tɩ yell kae, t’a yeel tɩ yẽ waoongã pa tar yõod ye. A leb n yeelame tɩ yagsã kẽer sokame n dat n bãng bũmb ning b sẽn maand ɛstaadẽ wã. La a sã n yeel tɩ yaa a Zeova Kaset rãmbã, b yetame tɩ pa sɩd ye! La a yet-b lame tɩ ‘nebã fãa sã n da maand a Zeova Kaset rãmbã sẽn maandã pʋɩ-sʋk menga, polɩɩs ra pa na n le tall yõod ye.’”

Neb wʋsg zoe n paama fãagre

Wẽnnaam Gomdã kɩtame tɩ welgr pa le be, tɩ kɩt tɩ zems-n-taar be kiris-nebã ne taab sʋka. (Rom dãmba 14:19; Efɛɛz rãmba 4:22-24; Filip rãmba 4:7) “D fãagrã ta n saame!” tigis-kãsengã wilga rẽ vẽenega. A Zeova Kaset rãmbã zoe n paama fãagr ne zu-loees wʋsgo. Bu-welsgã la nams-taabã pa le be b sʋk ye. La b gũuda wakat ning zu-loees buud fãa sẽn na n wa menem fasɩ dũniyã gill zugã.

Bũmb ning sẽn yɩ neb nins sẽn zĩnd tigis-kãsengẽ wã noog n yɩɩdã yaa zems-n-taarã la nonglmã sẽn be saam-biisã sʋkã. Sẽn yɩɩd fãa, yɩɩ tigis-kãsengã baasgẽ la tolg n yɩ vẽeneg tɩ saam-biisã sɩd nonga taaba. Nebã fãa ra wẽeda nu-pogse, n mobgd taab la b yõgd b yaoolem foto rãmba. (1 Korẽnt dãmba 1:10; 1 Pɩɛɛr 2:17) Sãambã sẽn wa n kuisẽ wã tɩ b sũy yaa noog wʋsgo, la sẽn paase b ra miime tɩ ka la bilfu, Wẽnnaam na n fãag-d-la ne yɩɩr la zu-loees buud fãa. B leba b tẽnsẽ la b tigimsẽ. Tigis-kãsengã kɩtame tɩ b tʋll ne b sũy fãa n kell n tũ Wẽnnaam Gomdã sẽn yaa “vɩɩm koɛɛgã” wakat fãa.—Filip rãmba 2:15, 16.

[Tẽngr note]

[Zĩ-gũbri/Foto, seb-​neng 10]

B togsa bõn-yɛng ne buud goam pisi la a yoobe

Tigis-kãsems a wɛ wã fãa yɩɩ tẽngã rãmb buud goam pʋsẽ. Alemayn tigis-kãsemsã sasa, b wɛgsa sõssã ne alema la ne buud goam 18 a taab me. Dortmund tigis-kãsengẽ wã, b wɛgsa sõssã ne alema, araab, farsɩ, portigɛ, ɛspayõll, la ris. Frãnkfor tigis-kãsengẽ wã yɩɩ ãngilindi, farende, la sɛrbo-korwat. Hamburg tigis-kãsengẽ wã yɩɩ danowã, neerlãndɛ, suedwa, la tamulli. Leipzig tigis-kãsengẽ wã yɩɩ sɩnowãamdo, polonẽ, la tirk. Munik tigis-kãsengẽ wã me yɩɩ gɛrk, italiyẽ, la ne alema mugsã goama. Praag tigis-kãsengã sõssã fãa yɩɩ ne sɛke, ãngilindi, la ris. Bratislava tigis-kãsengã yɩɩ ne hõngrowa, ãngilindi, solovake, la solovak mugsã goama. Korzõ, sõssã yɩɩ ne polonẽ, ris, ukrɛniyẽ, la ne poloyn mugsã goama. La Poznan, yɩɩ ne fɩnowã la polonẽ.

Fãa yɩɩ buud goam 26! Yaa sɩd tɩ nebã yɩɩ buud toɛy-toɛy neba, la b nonga taaba

[Foto, seb-neng a 9]

Korwat saam-biis nins sẽn kẽng Frãnkfor tigis-kãsengã sũy yɩɩ noog wʋsgo, b sẽn paam Biiblã ne b buudã gomdã