A Zeova Gomdã vɩɩme

A Ezekɩɛll sebrã tags-kãsems babg a yiib-n-soaba

D BEE yʋʋmd 609 sẽn deng a Zezi rogmã, yʋʋm-sar kiuugu. Babilon rĩmã yikame masã n na n deeg Zerizalɛm. Hal n tãag masã, yaa Zerizalɛm sẽn yaa tẽng b sẽn da nong wʋsgã sãang yell la a Ezekɩɛll ra togsd Israɛll nebã sẽn da yaa yembs n be Babilonnã. La masã, a Ezekɩɛll bãngr-gomdã gom-zug toeemame. A gomda bõn-naands pʋʋsdbã tẽns me sãang yelle, b sẽn na n kɩdem yel-beedã sẽn na n paam Wẽnnaam nebã yĩngã. Kiis 18 loogr poor b sẽn sãam Zerizalɛmmã, a Ezekɩɛll toeema a bãngr-gomdã gom-zug yɛsa. Lebga tũudum hakɩkã luglg yell la a gomda.

Ezekɩɛll 25:1–48:35 tara bãngr-goam sẽn gomd tẽns nins sẽn karg n gũbg Israɛllã yelle, la Wẽnnaam nin-buiidã fãagr yelle. * Sã n dok Ezekɩɛll 29:17-20 wã, a Ezekɩɛll gʋlsa bab-kãngã tɩ yʋʋmã, rayã, la gom-zutã pʋgd taaba. A Ezekɩɛll sebrã sẽn be sɛb nins Wẽnnaam sẽn vẽneg tɩ b gʋlsã sʋkã yĩngã, a koɛɛgã ‘vɩɩme la tara pãnga.’—Hebre dãmba 4:12.

‘TẼN-KÃNG NA N LEBGA WA EDƐN ZĨ-SÕNGÃ’

(Ezekɩɛll 25:1–39:29)

A Zeova sẽn mi Amon, Moaab, Edom, Filisti Tɩɩr, la Sɩdõ sẽn na n wa maan bũmb nins Zerizalɛm lʋɩɩsã yĩnga, a kɩtame t’a Ezekɩɛll togs t’a na n sãam-b lame. Babilon nebã na n zaeya Ezipt teedã. B maka Ezipt rĩm a Faraõ ne a nin-buiidã ne sɛɛdr tɩɩg b sẽn na n kɛ n lub ne “Babilon rĩmã sʋʋga.”—Ezekɩɛll 31:2, 3, 12; 32:11, 12.

Yʋʋmd 607 sẽn deng a Zezi rogmã b sẽn sãam Zerizalɛmmã kiis a yoob loogr poore, rao a ye n põs n yi be n wa togs a Ezekɩɛll tɩ “b reega Zerizalɛm,” n sãam-a. Wakat kãngã no-rɛɛsã mugdã saame t’a tõe n gom ne yembsã. (Ezekɩɛll 33:21, 22) A tara bãngr-goam sẽn wilgd tɩ b na n lebg n manega tẽngã la b lugl tũudum hakɩkã n na n togse. A Zeova “na n kõo bãmb [yẽ] tʋm-tʋmd a Davɩɩd t’a yɩ b pe-kɩɩm yende.” (Ezekɩɛll 34:23) B na n sãama Edom, la Zida sẽn yaa a yakã na n lebga “wa Edɛn zĩ-sõngã.” (Ezekɩɛll 36:35) A Zeova kãabame t’a na n kogla a nin-buiidã sẽn na n lebg n wa b ba-yirã t’a Goog ra sãam-b ye.—Ezekɩɛll 38:2.

Sogsg b sẽn leoke:

29:8-12—Wakat bʋg la b sãam Ezipt tɩ kaoos yʋʋm 40? B sẽn sãam Zerizalɛm yʋʋmd 607 sẽn deng a Zezi rogmã, neb nins sẽn da kell Zida wã zoe n kẽnga Ezipti, baa ne no-rɛɛs a Zeremi sẽn da keoog-b tɩ b ra kẽngã. (Zeremi 24:1, 8-10; 42:7-22) La rẽ pa kɩt tɩ b paam n põs ye, bala a Nebukadnezaar kẽng n tɩ zaba ne Ezipt n tõoge. Tõe tɩ yaa wakat kãng poor la Ezipt sãam n kaoos sẽn na maan yʋʋm 40. Baa ne kʋdemd yɛl mitbã sẽn pa tar kaset sẽn wilgd tɩ b sãamã Eziptã, d tõe n talla bas-yard tɩ b sɩd sãama tẽngã, bala a Zeova kɩtdame tɩ goam nins a sẽn deng n togsã pidsdẽ.—Ezai 55:11.

29:18—Bõe n kɩt tɩ b fãa lebg zu-kõodo, la tɩ b bãgdã fʋgse? Babilon sodaasã sẽn na n zab n deeg Tɩɩr tẽngã, yɩɩ toog wʋsgo. Sẽn na yɩl n me gasdã la zĩis b sẽn tõe n kogl b mense, a Nebukadnezaar sodaasã ra tʋkda meebã teed tɩ kɩt tɩ b kut-pugli wã kõ b zutã.  La b sẽn da palgd zɩɩbã me kɩtame tɩ b bãgdã fʋgse.—Ezekɩɛll 26:7-12.

Zãmsg tõnd yĩnga:

29:19, 20. Tɩɩr nebã sẽn paam n zoe ne b arzɛgsã wʋsg n kẽng b tẽng ning sẽn be koom sʋkã yĩnga, rĩm a Nebukadnezaar pa paam teed wʋsg ye. Baa a Nebukadnezaar sẽn da yaa wuk-m-meng soab la a pʋʋsd bõn-naandsã, a Zeova kõ-a-la Ezipt tɩ “yɩ a tãb-biisã yaoodo,” b tʋʋmdã yĩngã. D segd n dɩka sɩd Wẽnnaamã togs-n-taar n yaood goosneemã d lampo rãmbã b sẽn tʋmd d yĩngã. D pa segd n bas tɩ tẽngã taoor dãmb manesem bɩ b sẽn dɩkd ligdã n maand bũmb ninsã gɩdg-d tɩ d pa yao d lampo rãmbã ye.—Rom dãmba 13:4-7.

33:7-9. Rũndã-rũndã gũudã sullã, rat n yet tɩ neb nins sẽn paam vʋʋsem sõng zaeebã sẽn ket tẽng zugã, la b tũud-n-taasã pa segd n bas Rĩungã koe-noogã mooneg la b sẽn keoogd nebã tɩ to-kãsengã watame wã ye.—Matɩe 24:21.

33:10-20. Tõnd fãagrã bee ne d sẽn na n bas sẽn yaa wẽng maaneg la d sak n maan Wẽnnaam daabã. A Zeova sẽn maandã fãa zemsame.

36:20, 21. Israɛll nebã sẽn da pa maand bũmb nins sẽn wilg tɩ b yaa a Zeova nebã yĩngã, b sãama a Zeova yʋʋrã tẽn-zẽmsã sʋka. D pa segd n lebg neb sẽn balemd a Zeova ne yʋʋr bal ye.

36:25, 37, 38. Yaa neb sẽn yaa yɩlem n be tẽeb arzãnã pʋgẽ rũndã-rũndã. Woto yĩnga, d segd n modgame t’a ket n yaa yɩlemde.

38:1-23. Ad d sɩd tara bas-yard d sẽn mi t’a Zeova na n fãaga a nin-buiidã sasa ning a Goog sẽn yit Magoogã sẽn na n tʋlg n wa sãam-bã wakate. Goog yaa yʋʋr ning b sẽn kõ “dũniyã naab” a Sʋɩtãana, b sẽn dig-a saasẽ wã poore. B riga a Sʋɩtãan ne a zĩn-dãmbã saasẽ tɩ b sig n wa tẽngã sẽnese, n be zĩig b sẽn boond tɩ Magoog.—Zã 12:31; Wilgri 12:7-12.

“TAGS BŨMB NINS FÃA MAM SẼN NA N WILG FOOMA YELLE”

(Ezekɩɛll 40:1–48:35)

Yaa Zerizalɛm sãangã loogr poor yʋʋm 14 la woto. (Ezekɩɛll 40:1) Nin-buiidã segd n kell n zĩnda yembd yʋʋm 56. (Zeremi 29:10) A Ezekɩɛll kolga yʋʋm 50 masã. Vẽnegr pʋgẽ, Wẽnnaam talla a Ezekɩɛll n kẽng ne Israɛll n yeel-a woto: “Ninsaal biiga, ges neer la f kelg la f tags bũmb nins fãa mam sẽn na n wilg foomã yelle.” (Ezekɩɛll 40:2-4) A Ezekɩɛll sũur segd n da yaa noogo, a sẽn paam n na n yã wẽnd-do-paalgã vẽnegrã pʋgẽ wã.

Wẽnd-doog ning sẽn tar ziirã a Ezekɩɛll sẽn yã wã tara noy a 6, ro-pʋʋs 30 sẽn yaa rɩɩb zĩisi, Zĩ-sõngã, Zĩ-sõng sẽn yɩɩdã, tẽn-kugr sẽn maan ne raado, la tẽn-kugr sẽn tar n yõogd maoongo. Koom n da zoet n yit wẽnd-doogã pʋgẽ, n wa lebg ko-sor sẽn pid ne koom. (Ezekɩɛll 47:1) A Ezekɩɛll ye paama vẽnegr n yã b sẽn pʋɩ tẽngã n kõ buud fãa a zĩiga. Pʋɩɩr fãa sɩngda ne yaang n tɩ baas wĩndg sẽn lʋɩtẽ. Zidã pʋɩɩrã ne Bẽnzame pʋɩɩrã sʋka, b basa zĩ-vɩʋʋgo. A Zeova roogã, ne ‘tẽng ning’ b sẽn boond tɩ ‘Zusoabã meng bee be’ wã ra bee zĩ-kãng pʋgẽ.—Ezekɩɛll 48:9, 10, 15, 35.

Sogsg b sẽn leoke:

40:3–47:12—Vẽnegrã pʋgẽ wẽnd-doogã makda bõe? B zɩ n me wẽnd-doog sẽn yaa bed-kẽeng woto wa a Ezekɩɛll sẽn yã vẽnegrã pʋgẽ wã buud ye. A makda wẽnd-doog ning sẽn pa tõe n yã ne nifã sẽn yaa segl nins Wẽnnaam sẽn dɩk rũndã-rũndã baleng hakɩkã yĩnga. (Ezekɩɛll 40:2; Miise 4:1; Hebre dãmba 8:2; 9:23, 24) Vẽneg-kãngã pidsda “yaoolem wakatã,” sasa ning b sẽn yɩlg maan-kʋʋdbã sullã. (2 Tɩmote 3:1; Ezekɩɛll 44:10-16; Malaki 3:1-3) La a na n pidsa zãng-zãng arzãnã pʋgẽ. Vẽnegrã wilga Zʋɩf rãmb nins sẽn da be yembdã tɩ  Wẽnnaam na n kɩtame tɩ b lebs n lugl tũudum hakɩkã, la tɩ zak fãa na n paama zĩig tẽngã pʋgẽ.

40:3–43:17—B sẽn mag wẽnd-doogã wilgda bõe? Wẽnd-doogã magbã wilgda vẽeneg t’a Zeova sẽn dat tɩ b lebs n lugl tũudum hakɩkã na n pidsame.

43:2-4, 7, 9—“B rĩm dãmb kũumã” b sẽn segd n yiis wẽnd-doogã pʋgẽ wã makda bõe? Kũ-rãmbã makda bõn-naandse. Zerizalɛm taoor dãmbã ne a nin-buiidã pidsa Wẽnnaam doogã ne bõn-naands n sɩd kɩt tɩ bõn-naands kãens lebg b rĩm dãmba.

43:13-20—Tẽn-kugr ning a Ezekɩɛll sẽn yã vẽnegrã pʋgẽ wã makda bõe? A makda Wẽnnaam daabã sẽn tɩ loe ne a Zezi maoongã sẽn yaa rondã. Rondã yĩnga, neb nins sẽn paam vʋʋsem sõng zaeebã yaa tɩrse, tɩ neb nins sẽn be kʋʋn-kãsengã pʋgẽ wã me yaa yɩlem Wẽnnaam nifẽ. (Wilgri 7:9-14; Rom dãmba 5:1, 2) Tõe tɩ yaa rẽ yĩng la vẽnegrã pʋgẽ a Ezekɩɛll sẽn pa yã zũud mogr ning sẽn da be a Salomo wẽnd-doogã pʋgẽ wã, rat n yet tɩ zĩig ning maan-kʋʋdbã sẽn da yɩlgd b mensã.—1 Rĩm dãmba 7:23-26.

44:10-16—Maan-kʋʋdbã sullã makda ãnd dãmba? Maan-kʋʋdbã sullã makda neb nins sẽn paam vʋʋsem sõng zaeebã sull rũndã-rũndã. Wala “ned sẽn ning wanzuri boaag pʋgẽ” n yɩlge, a Zeova yɩlg-b-la wẽnd-doog sẽn pa tõe n yã ne nifã pʋgẽ yʋʋmd 1918. (Malaki 3:1-5) Neb nins sẽn yaa yɩlmã bɩ neb nins sẽn sak n kos b yel-wẽnã sugr la b toeem b manesmã tõe n kell n tʋma Wẽnnaam tʋʋmdã. Rẽ poore, b segd n maana modgr wʋsg n lak b mens ne dũniyã rẽgdã, n yɩ mak-sõng n kõ buud nins sẽn pa maan-kʋʋdbã, sẽn makd kʋʋn-kãsengã.—Zak 1:27; Wilgri 7:9, 10.

45:1; 47:13–48:29—Tẽngã ne a pʋɩɩbã makda bõe? Tẽngã makda Wẽnnaam nin-buiidã sẽn tʋmd zĩig ning fãa. A Zeova Kaset soab sẽn beẽ zĩig ning fãa, a sã n ket n tũud tũudum hakɩkã, a soab bee tẽng ning b sẽn manegã pʋgẽ. Bãngr-gomd ning sẽn gomd tẽngã pʋɩɩbã yellã na n pidsa zãng-zãng dũni paalgã pʋgẽ wakat ning nin-tɩrsã fãa sẽn na n paam b toorẽ n zĩisã.—Ezai 65:17, 21.

45:7, 16—Nin-buiidã sẽn kõt maan-kʋʋdbã la rĩmã kũunã makda bõe? Wẽnd-doog ning b sẽn pa tõe n yã ne nifã pʋgẽ, kũunã makda sõngr ning nebã sẽn sõngd kiris-neb nins sẽn paam vʋʋsem sõng zaeebã la b teend-b b tʋʋmdã pʋgẽ wã.

47:1-5—Koomã sẽn be a Ezekɩɛll vẽnegrã pʋgẽ wã makda bõe? Ko-kãng makda bũmb nins fãa a Zeova sẽn maan sẽn na yɩl tɩ nebã paam vɩɩmã. A Zezi maoongã sẽn yɩ rondã la bãngr hakɩkã sẽn be Biiblã pʋgẽ wã naaga be. (Zeremi 2:13; Zã 4:7-26; Efɛɛz rãmba 5:25-27) Kʋɩlgã zulugda bilf bilf n paasdẽ neb wʋsg sẽn sakd tũudum hakɩkã yĩnga. (Ezai 60:22) Kirist yʋʋm tusr naamã sasa, kʋɩlgã na n pida ne vɩɩm koomã. Koomã sẽn be kʋɩlgã pʋgẽ wã makda nebã sẽn na n paam n wʋm yɛlã võore, b sã n wa pak seb-pindmã.—Wilgri 20:12; 22:1, 2.

 47:12—Tɩɩs sẽn womd biisã makda bõe? B makda segls nins Wẽnnaam sẽn na n dɩk n kɩt tɩ ninsaalbã zems zãngã.

48:15-19, 30-35—A Ezekɩɛll sẽn yã tẽng ning vẽnegrã pʋgẽ wã makda bõe? “Tẽngã” sẽn be zĩig ningã pa maan-kʋʋdbã soolem ye. Woto wilgdame tɩ yaa tẽng zug yɛla. Wõnda wa tẽngã makda yɛlã b sẽn sigl tẽng zug nin-tɩrsã nafr yĩngã. (2 Pɩɛɛr 3:13) A sẽn tar kʋɩlens zĩig fãa wã wilgdame t’a kõom yaa nana. Wẽnnaam nin-buiidã sʋk yel-gɛtbã kolgr segd n yɩɩ nana.

Zãmsg tõnd yĩnga:

40:14, 16, 22, 26. B sẽn nags wẽnd-doogã noyã ne koms raadã wilgdame tɩ yaa neb nins manesem sẽn yaa tɩrgã bal n na n paam sor n kẽ a pʋgẽ. (Yɩɩl Sõamyã 92:13) Woto wilgda tõnd tɩ yaa d sẽn na n yaa tɩrg bal la d balengã tat Wẽnnaam yam.

44:23. Ad d sɩd tara mi-beoog ne rũndã-rũndã maan-kʋʋdbã sull sẽn tʋmd d yĩngã. “Tʋm-tʋmd sẽn tũud sɩd la sẽn tar yamã” kõta tõnd tẽebã rɩɩb wakat sẽn zemse, tɩ sõngd-d tɩ d tõe n bãng bũmb sẽn yaa rẽgd ne sẽn yaa yɩlemd Wẽnnaam nifẽ n welge.—Matɩe 24:45.

47:9, 11. Bãngrã b sẽn mak ne koom sẽn kõt vɩɩmã zoe n kɩtdame tɩ neb paamd laafɩ tẽebã wɛɛngẽ rũndã-rũndã. Sẽn yaa tẽng ning fãa la ned be n paam bãng-kãngã, kɩtdame t’a soab vʋʋg tẽebã wɛɛngẽ. (Zã 17:3) La neb nins sẽn pa sakd n deeg koom ning sẽn kõt vɩɩmã, b na n “kell n yɩɩ yamsem,” rat n yet tɩ b na n sãam-b-la wakat sẽn-kõn-sa yĩnga. Ad sɩd tara yõod tɩ d ‘maand d sẽn tõe fãa n togsd sɩd koɛɛgã tɩrg bala.’—2 Tɩmote 2:15.

Mam na n sõmsa m yʋ-kãsengã

Wẽnnaam sẽn kɩt tɩ b lub a Davɩɩd na-roogã yaoolem rĩmã poore, a basame tɩ kaoos wʋsg la a yaool n kɩt tɩ ned ning sẽn tara sor n na n dɩ naamã wa. La Wẽnnaam pa yĩm kaool ning a sẽn da maan ne a Davɩɩdã ye. (Ezekɩɛll 21:27; 2 Sãmwɛll 7:11-16) A Ezekɩɛll bãngr-gomdã gomda Wẽnnaam “tʋm-tʋmd a Davɩɩd” sẽn na n lebg “pe-kɩɩm” la “rĩm” yelle. (Ezekɩɛll 34:23, 24; 37:22, 24, 25) Nin-kãng pa ned a to n zʋʋg a Zezi Kirist sẽn dɩt naam Wẽnnaam Rĩungã pʋgẽ wã ye. (Wilgri 11:15) A Zeova na n tũnuga ne Mesi Rĩungã n ‘kɩt tɩ nebã bãng t’a yʋ-kãsengã yaa sõngo.’—Ezekɩɛll 36:23.

Ka la bilfu, b na n sãama neb nins fãa sẽn sãamd Wẽnnaam yʋʋrã sẽn yaa sõngã. La neb nins sẽn tũud a Zeova n maand a raabã tɩ sõmsd a yʋʋrã na n paama vɩɩm sẽn-kõn-sa. Bɩ d modg n yũ vɩɩm koomã sẽn yaa wʋsg rũndã-rũndã wã, la d kɩt tɩ tũudum hakɩkã yɩ bũmb sẽn pak-d n yɩɩda.

[Tẽngr note]

[Foto, seb-neng 22]

A Ezekɩɛll vẽnegrã pʋgẽ vɩɩm kʋɩlgã makda bõe?

[Fotã sẽn yitẽ]

Pictorial Archive (Near Eastern History) Est.

[Foto, seb-neng 23]

A Ezekɩɛll vẽnegrã pʋgẽ wẽnd-doog sẽn tar ziirã