Wãn to la y tõe n paam zood hakɩk ne Wẽnnaam?

“YĨNGÃ ratem sakr wata ne kũum, la Sɩɩg Sõng ratem sakr wata ne vɩɩm la laafɩ.” (Rom dãmba 8:6) Tʋm-tʋmd a Poll yeela gom-kãensã n na n wilg tɩ tara yõod wʋsg tɩ d tũ Wẽnnaam noyã, la d ra vɩɩmd wa d sẽn dat to-to ye, bala yaa yõor yelle. Wãn to la ned sẽn tũud Wẽnnaam noyã tõe n paam “vɩɩm la laafɩ”? Wala Biiblã sẽn wilgã, nin-kãng paamda laafɩ la zems-n-taar ne Wẽnnaam masã menga. La a na n wa paama vɩɩm sẽn kõn sa beoog daar me. (Rom dãmba 6:23; Filip rãmba 4:7) Dẽnd a Zezi ra bee bʋʋm a sẽn yeel tɩ “sũ-noog rãmb la neb nins sẽn mi tɩ tẽeb kom n tar-bã”!—Matɩe 5:3, NW.

Yãmb sẽn karemd seb-kãngã wã wilgdame tɩ y sɩd rat n paama zood ne Wẽnnaam, la rẽ yaa yam tʋʋmde. Nebã sẽn tagsd to-to Wẽnnaam zoodã wɛɛngẽ wã pa yembr ye. Woto yĩnga, tõe tɩ y sokda y meng woto: ‘Wãn to la ned tõe n paam zood hakɩk ne Wẽnnaam?’

Kiristã sẽn tagsd to-to

A Poll wilga Wẽnnaam noyã tũub yõod la a leb n wilg Wẽnnaam zoa sẽn yaa ned ninga. A gʋlsa kiris-neb nins sẽn da be Korẽntã n wilg welgr ning sẽn be ned sẽn sakd yĩngã ratem la ned sẽn tũud Wẽnnaam noyã sʋka. A gʋlsa woto: “La ned [sẽn sakd yĩngã ratem] ka reegd Wẽnnaam Sɩɩg Sõng bũmb ye.” La a wilgame tɩ Wẽnnaam zoa yaa ned sẽn tagsd wa Kiristã.—1 Korẽnt dãmba 2:14-16.

Tall Kiristã tagsg buud rat n yeelame tɩ f “paam yam ning a Zezi Kirist sẽn da tarã.” (Rom dãmba 15:5; Filip rãmba 2:5) Dẽnd Wẽnnaam zoa yaa ned sẽn tagsd wa a Zezi sẽn tagsd to-to wã, la a rɩkd Kiristã naoã. (1 Pɩɛɛr 2:21; 4:1) Ned sã n modgd n tagsd wa Kiristã sẽn tagsd to-to wã, a zoodã ne Wẽnnaam lebgda sõma n paasdẽ, la a tõe n wa paama “vɩɩm la laafɩ.”—Rom dãmba 13:14.

D sẽn tõe n bãng Kiristã tagsg to-to

Sẽn na yɩl n paam Kiristã tagsgã buudu, d segd n deng n bãnga a tagsgã sẽn yaa a soaba. Dẽnd sẽn na yɩl n paam zood ne Wẽnnaam, pipi, d segd n bao n bãnga a Zezi sẽn tagsd to-to. La d maanda wãn n tõog n bãng ned sẽn da vɩɩmd tẽngã zug sẽn na maan yʋʋm 2000 sẽn tagsd to-to? Wala makre, y maana wãn n tõog n bãng y tẽngã nin-kãsems sẽn da yaa b rãmba? Yaa vẽeneg tɩ y karma sɛb sẽn gomd nin-kãens yelle. Woto me y sã n karem sɛb sẽn gomd a Zezi yelle, na n sõng-y-la wʋsg tɩ y tõog n bãng Kiristã sẽn tagsd to-to.—Zã 17:3.

Sɛb a naas n be Biiblã pʋgẽ n gomd a Zezi yell vẽenega. B boonda seb-kãens tɩ Evãnzill dãmba. Yaa a Matɩe, a Mark, a Luk n paas a Zã n gʋls seb-kãense. Y sã n karemd Evãnzill dãmbã sõma, na n sõng-y lame tɩ y bãng a Zezi tagsg la a manesem sẽn yaa a soaba, la bũmb ning sẽn kɩt t’a ra maand woto wã. Y sã n maag y yĩng n karem kibay nins sẽn gomd a Zezi yellã la y bʋgsd kiba-kãensã zutu, y na n tõog n mamsa y yamẽ wã n bãng a sẽn da yaa ned ning vẽenega. Baa tɩ y sã n zoe n tagsdame tɩ y tũuda Kiristã, y sã n maand woto, na n sõng-y lame tɩ y ‘bɩ la y paam yam vẽnegr tõnd Zusoaba la d Fãagd a Zezi Kirist barkã pʋgẽ.’—2 Pɩɛɛr 3:18.

Woto yĩng bɩ d ges verse rãmb kẽer Evãnzill dãmbã pʋsẽ n bãng bũmb ning sẽn kɩt t’a Zezi tar zood ne Wẽnnaamã. Rẽ poor bɩ y  tags n ges y sẽn tõe n dɩk a togs-n-taar to-to.—Zã 13:15.

Wẽnnaam zoa pukda ‘vʋʋsem sõngã biisi’

A Luk sẽn yaa Evãnzill a ye gʋlsdã wilgame t’a Zezi lisgã reegr sasa, a paama Wẽnnaam vʋʋsem sõngã, la t’a ra ‘pida ne vʋʋsem sõngo.’ (Luk 3:21, 22; 4:1) A Zezi me kɩtame t’a karen-biisã bãng tɩ tara yõod tɩ b sak Wẽnnaam vʋʋsem sõngã sẽn yaa a pãngã. (Sɩngre 1:2; Luk 11:9-13) Bõe yĩng tɩ vʋʋsem sõngã sakr tar yõodo? Bala tõe n toeema ned yam n kɩt t’a paam Kiristã yam buudu. (Rom dãmba 12:1, 2) Vʋʋsem sõngã kɩtdame tɩ ned paam zʋg-sõma wala “nonglem la sũ-noogo la laafɩ la sũ-mare la maan-neere la sũ-maasem la tẽebo la sũ-bʋgsem la yõk-m-menga.” Yaa zʋg-sõma kãensã la Biiblã sẽn boond tɩ ‘vʋʋsem sõngã biisã,’ la b kɩtdame tɩ d tõe n bãng ned ning sẽn sɩd yaa Wẽnnaam zoa. (Galat dãmba 5:22, 23) Dẽnd Wẽnnaam zoa yaa ned sẽn sakd Wẽnnaam vʋʋsem sõngã.

A Zezi puka vʋʋsem sõngã biis a koe-noogã mooneg pʋgẽ. A sẽn da sõngd neb nins b sẽn da get wa naong rãmbã wilgda vẽeneg t’a nong-b lame, la a rata nin-kãensã neere. (Matɩe 9:36) Wala makre, d ges kibar a ye tʋm-tʋmd a Zã sẽn togse. A yeela woto: “A Zezi sẽn loogda, b yãa dao a ye sẽn dog ne zõndo.” A Zezi karen-biisã me yãa ra-kãng n tẽed t’a yaa yel-wẽn-maanda. B soka woto: “Ãnda n maan yel-wẽna, dao kãng bɩ, bɩ a ba ne a ma?” Raoã yags me yã-a lame n yeel t’a yaa bõaasa. B yeela woto: “Ka ned ningã sẽn da zĩ n bõosdẽ wã la woto wɛ?” La a Zezi sẽn yã ra-kãngã sẽn yaa zoangã, a ges-a-la wa ned sẽn dat sõngre. A goma ne raoã la a sãoog-a.—Zã 9:1-8.

Kiba-kãngã wilgda tõnd bõe Kiristã tagsgã wɛɛngẽ? Pipi, a ra nanda naong rãmbã la a nong-b hal wʋsgo. Yiib-n-soaba, a ra yɩta tao-tao n sõngd neb a taabã. Rẽ yĩnga yãmb me maanda wa a Zezi sẽn maanã bɩ? Yãmb geta nebã wa a Zezi sẽn da get-b to-to wã, n sõngd-b sẽn na yɩl tɩ b vɩɩmã yɩ sõma la b paam saagr bɩ? Bɩ yãmb nong n sõngda nin-kãsemsã n basd neb nins sẽn pa nin-kãsemsã? Dẽnd y sã n get nebã wa a Zezi sẽn get-b to-to wã, y rɩkda a togs-n-taare.—Yɩɩl Sõamyã 72:12-14.

Wẽnnaam zoa pʋʋsdame

Evãnzill dãmbã pʋsẽ, b wilgame t’a Zezi ra nong n pʋʋsda Wẽnnaam. (Mark 1:35; Luk 5:16; 22:41) A sẽn wa n be tẽngã zugã, a ra nong n dɩkda sẽk n pʋʋsdẽ. Tʋm-tʋmd a Matɩe gʋlsa woto: “La bãmb sẽn kuils nebã, bãmb dʋʋ tãng zug neb sẽn ka be n pʋʋse.” (Matɩe 14:23) A Zezi sẽn da baood zĩig neb sẽn ka beẽ n pʋʋsd a saasẽ Ba wã, kɩtame t’a paam pãnga. (Matɩe 26:36-44) Rũndã-rũndã me, neb nins sẽn tar zood ne Wẽnnaamã baooda soy buud fãa n pʋʋsd-a, n miẽ tɩ rẽ na n kɩtame tɩ b zoodã ne Naandã yɩ sõma n paase, la sõng-b tɩ b tõog n paamd Kiristã tagsgã buud n paasdẽ.

A Zezi ra nong n dɩkda sẽk wʋsg n pʋʋsd Wẽnnaam. (Zã 17:1-26) Wala makre, nand t’a yãk rap 12 nins sẽn lebg a tʋm-tʋmdbã, a ‘kẽnga tãng zug n na n tɩ pʋʋse, la a paa be yʋngã tõr n pʋʋs Wẽnnaam.’ (Luk 6:12) Neb nins sẽn sɩd tar zood ne Wẽnnaamã tuuda a Zezi mak-sõngã, baa tɩ pa yʋng tõr la b rɩkd n pʋʋsd Wẽnnaam. Nand tɩ nin-kãens yãk yam n maan bũmbu, b rɩkda sẽk wʋsg n pʋʋs Wẽnnaam n kot a vʋʋsem sõngã sõngre, sẽn na yɩl tɩ b sẽn na n yãk yam n maan bũmb ningã maneg b zoodã ne Wẽnnaam n paase.

A Zezi pʋʋsa Wẽnnaam ne a sũur fãa tɩ d segd n dɩk a togs-n-taare. Ges-y a Luk sẽn gʋls n wilg a Zezi sẽn pʋʋs to-to, yʋng ning sẽn deng a kũumã. A gʋlsa woto: ‘La b sẽn paam sũ-sãoong hal wʋsgã, bãmb pʋʋsa ne pãng n yɩɩd pĩndã, la b tʋʋlg yɩɩ wa zɩɩm n tosd bɛd-bɛd n lʋɩt tẽnga.’ (Luk 22:44) A Zezi  ra sɩng n pʋʋsda ne a sũur fãa, la a sẽn da be yell ning pʋgẽ wã toom sẽn da yɩɩd yɛl nins a sẽn da zoe n paamã yĩngã, a pʋʋsa ne a sũur fãa n yɩɩd pĩndã, la Wẽnnaam leok-a lame. (Hebre dãmba 5:7) Neb nins sẽn tar zood ne Wẽnnaamã me maanda woto. B sã n wa be makr sẽn yaa toog pʋgẽ, b pʋʋsda Wẽnnaam ne b sũy fãa n yɩɩd pĩndã n kotẽ t’a kõ-b vʋʋsem sõngã, t’a wilg b sor la a teel-ba.

A Zezi sẽn da nong n pʋʋsdẽ wã yĩnga, pa lingr la a karen-biisã me sẽn da rat n dɩk a togs-n-taarã ye. Rẽ n so tɩ b yeel a Zezi woto: “Zusoaba, bɩ y zãms tõnd pʋʋsgo.” (Luk 11:1) Rũndã-rũndã me, neb nins sẽn nong Wẽnnaam la b rat t’a vʋʋsem sõngã wilg-b sorã pʋʋsda wa a Zezi sẽn pʋʋs to-to wã. Wẽnnaam zoodã ne pʋʋsgã tũuda taaba.

Wẽnnaam zoa moonda koe-noogã

A Mark Evãnzillã pʋgẽ, zĩig n be tɩ b wilg tɩ daar a yembre, a Zezi sãoogã baad dãmb wʋsgo hal n tãag yʋn-sʋka. A sãda vẽkembeoogã yibeoog pĩnd n pʋʋsd a yembr t’a tʋm-tʋmdbã wa togs-a tɩ neb wʋsg n baood-a. Tõe tɩ nin-kãensã ra baooda sãoogre. La a Zezi yeel-b-la woto: ‘Wa-y tɩ d kẽng tẽng kɩrems tɩ m tɩ moon koɛɛgã beene me.’ Rẽ poore a wilga bũmb ning sẽn kɩt t’a yet woto wã. A yeela woto: “Yaa rẽ yĩng la mam wa-yã.” (Mark 1:32-38; Luk 4:43) Yaa sɩd tɩ nebã sãoogr ra tara yõod ne a Zezi, la sẽn yɩɩd fãa, a waa tẽngã zug Wẽnnaam Rĩungã koe-noog mooneg yĩnga.—Mark 1:14, 15.

Rũndã-rũnda, Wẽnnaam Rĩungã mooneg kɩtdame tɩ b mi neb nins sẽn tar Kiristã  tagsgã buudu. A Zezi yeta neb nins fãa sẽn dat n lebg a karen-biisã woto: “Bɩ y kẽng n maan neba buud fãa tɩ b yɩ mam karen-biisi. . . . La y zãms bãmb tɩ b sak bũmb nins fãa mam sẽn da togs yãmbã.” (Matɩe 28:19, 20) Sẽn paase, a ra pĩnd n togsame tɩ “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” (Matɩe 24:14) Wẽnnaam Gomdã sẽn wilgd tɩ yaa ne vʋʋsem sõngã pãng la koe-noogã sẽn moondã yĩnga, y sã n kẽesd-y toog zãng-zãng koɛɛgã moonegẽ, wilgdame tɩ y sɩd yaa Wẽnnaam zoa.—Tʋʋma 1:8.

Sẽn na yɩl n tõog n moon neb nins sẽn be dũniyã gill zugã, segdame tɩ yɩ neb milyõ rãmb n naagd taab n maan dẽ. (Zã 17:20, 21) Neb nins sẽn moond Rĩungã koe-noogã segd n yɩɩ neb sẽn nong Wẽnnaam, n paas me b segd n sigla sõma. Rẽ yĩnga yãmb mii neb nins sẽn dɩkd Kiristã togs-n-taar n moond Rĩungã koe-noogã dũniyã zugã bɩ?

Yãmb maanda bũmb ning sẽn na n kɩt tɩ y paam zood ne Wẽnnaamã bɩ?

Bũmb a taab n be n wilgd Wẽnnaam zoa sẽn yaa ned ninga, la rẽ yĩnga yãmb maanda bũmb nins d sẽn zoe n yã wã bɩ? Sẽn na yɩl n bãng rẽ, sok-y y meng woto: ‘Rẽ yĩnga mam karemda Wẽnnaam Gomdã wakat fãa la m bʋgsd m sẽn karmã zug bɩ? Mam pukda vʋʋsem sõngã biis m vɩɩmã pʋgẽ bɩ? Mam yaa ned sẽn nong n pʋʋsdẽ bɩ? Rẽ yĩnga mam baoodame n na n zĩnd neb nins sẽn moond Wẽnnaam Rĩungã koe-noogã dũniyã gill zugã sʋk bɩ?’

Y sã n sɩd fees y meng ne pʋ-peelem, tõe n sõng-y lame tɩ y bãng y zoodã ne Wẽnnaam sẽn ta zĩig ningã. D sagend-y lame tɩ y maan y sẽn tõe fãa masã, sẽn na yɩl n wa paam “vɩɩm la laafɩ.”—Rom dãmba 8:6; Matɩe 7:13, 14; 2 Pɩɛɛr 1:5-11.

[Zĩ-gũbri/Foto rãmba, seb-​neng a 5]

WẼNNAAM ZOA:

◆ A nonga Wẽnnaam Gomdã

◆ A pukda vʋʋsem sõngã biisi

◆ A pʋʋsda Wẽnnaam wakat fãa la ne a sũur fãa

◆ A moonda nebã Rĩungã koe-noogã