Yãmb yaa arzɛgs rãmb Wẽnnaam nifẽ bɩ?
Yãmb yaa arzɛgs rãmb Wẽnnaam nifẽ bɩ?
“Yaa woto ne ned ninga sẽn bĩngd paoong a meng yĩnga, n yaool n ka tar Wẽnnaam arzegs ye.”—LUK 12:21.
1, 2. a) Bõe poorẽ la neb sak n mong b mens wʋsgo? b) Bõe n yaa zu-loɛɛg meng-meng n kõ kiris-nebã?
ZAMAAN dãmbã fãa sẽn loogã pʋgẽ n tãag masã, neb wʋsg baoa ne b sũy n na n yɩ arzɛgs rãmba. Wala makre, yʋʋmd 1800 soabã n tɩ tãag yʋʋmd 1899 wã, neb wʋsg sẽn yit tẽn-zãrsẽ sak n basa b yiy la b buud n na n kẽng Ostrali, Afirikdisiidi, Kanada la Etazĩni n tɩ bao sãnem. B sak n kẽngã tẽn-kãens pʋsẽ, baa ne zĩis kẽer zĩndg sẽn da yaa toogã. Sɩd-sɩda, laogã raab yĩnga, neb wʋsg sakd n mongda b mens wʋsg la b gẽnegd b yõyã.
2 Rũndã-rũndã, baa neb wʋsg sã n pa tʋgd sãnem baoob me, sẽn na yɩl n paam n kõ b noorã b segd n tʋma hal wʋsgo. Dũni kãngã pʋgẽ, noorã rɩɩb baoob pa nana ye. Rɩkda sẽk wʋsg la wat ne yaamse. Yɩl n paam dɩɩbo, fut la ro-gãagã tõe n wa kɩtame tɩ ned wa pa le maand bũmb nins sẽn tar yõod n yɩɩdã, wall a pʋd n yĩm b yell menga. (Rom dãmba 14:17) A Zezi kõo kibar sẽn wilgd tɩ ãdem-biig sɩd tõe n wa maana woto. Kiba-kãng bee Luk 12:16-21 wã pʋgẽ.
3. Kʋms-y a Zezi kibar ning sẽn be Luk 12:16-21 pʋgẽ wã n wilgi.
3 Sõsg ning sẽn loogã pʋgẽ, d sõsa a Zezi sẽn sagl nebã tɩ b gũus b mens ne rat-wʋsgã zugu. Yɩɩ daar ning a sẽn sagl nebã woto wã la a kell n kõ kibarã. A sẽn yeel nebã tɩ b gũus b mens neer ne rat-wʋsgã poore, a togsa kibar sẽn gomd ra-kãagr yelle. Ra-kãagrã paama paoong wʋsg n paase, n yeel t’a na n wãa a bao sẽn da zoe n pidi, n lebs n me bao-bɛda. La a sẽn wa n nan yetẽ tɩ rẽ poore, a na n vʋʋsame n dɩ a sẽn paamã, n magd t’a vɩɩmã na n yɩɩ noogã, Wẽnnaam yeel-a lame t’a na n kii baraar bal tɩ ned a to soog a paoongã. A Zezi baasa kibarã ne gom-kãensã: “Yaa woto ne ned ninga sẽn bĩngd paoong a meng yĩnga, n yaool n ka tar Wẽnnaam arzegs ye.” (Luk 12:21) Sagl-bʋg la d tõe n paam kiba-kãngã pʋgẽ, la wãn to la d tõe n tũ sagl-kãnga?
Raoã ra pa mi a sẽn na n maaneg ye
4. D tõe n yeelame t’a Zezi kibarã pʋgẽ daoã yaa nin-bʋg buudu?
4 Neb wʋsg mii kibar ning a Zezi sẽn kõ wã. Kibarã sɩngrẽ, a Zezi yeelame bal tɩ “arzɛk soab a yembr pʋt n da sak sõama.” A pa yeel tɩ raoã maana zãmb n paam a paoongã ye. Dẽnd b pa yeel t’a yaa nin-wẽng ye. Sɩd me, a Zezi sẽn bilg raoã to-to wã, d tõe n tagsame meng t’a tʋma wʋsg n paam a paoongã. D tõe n yeelame tɩ yaa ned sẽn tags beoog yell n bao n na n bĩng n tõog n zã a zaka. Rẽnd nin-kãngã segd n yaa ned sẽn tʋmd wʋsgo, la ne a sũur fãa.
5. A Zezi kibarã pʋgẽ daoã ra tara zu-loe-bʋgo?
5 Baa sẽn yaa a soab me, a Zezi sẽn bool raoã tɩ arzɛk soabã, yaa vẽeneg tɩ yaa ned sẽn da zoe n tar paoongo. La a Zezi kibarã pʋgẽ, a wilgame tɩ yell n da pak ra-kãagrã t’a ra pa mi a sẽn na n maaneg ye. A pʋt n sak sõma n yɩɩg a sẽn da tẽedã, t’a pa tar zĩig n na n bĩng a koodã ye. Bõe la a ra segd n maane?
6. Rũndã-rũndã, zu-loe-bʋs la Wẽnnaam nin-buiidã wʋsg tõe n wa sege?
6 Rũndã-rũndã, a Zeova nin-buiidã wʋsg segda zu-loees sẽn wõnd woto. Kiris-neb hakɩkã maoodame n yaa pʋ-peen-neba, neb sẽn pa kʋɩɩmba, la sẽn tʋmd sõma. (Kolos rãmba 3:22, 23) Naoor wʋsgo, b sã n dɩk-b tʋʋm pa rẽ bɩ b sã n tʋmd b mense, b tʋmda hal sõma tɩ b mi n pẽgd-ba. La b sã n wa rat n paas-b naam b tʋʋmã zĩisẽ, wall yaa bãmb meng n paam soay n tõe n bao ligd n paase, b segd n yãka b sẽn na n maanega. Rẽ yĩnga b na n sakame tɩ b paas-b naam wall b tʋm wʋsg n bao ligd n paas bɩ? Kom-bɩɩs wʋsg sẽn yaa a Zeova Kaset rãmb me n tʋmd sõma b lekoll dãmbẽ. Rẽ kɩtame tɩ b tõe n wa rat n yao-b tɩ b kẽng inivɛrsite rãmbẽ n tɩ karem n zãage. Rẽ yĩnga b segd n sakame bɩ?
7. Wãn-wãn la a Zezi kibarã pʋgẽ daoã welg a yellã?
7 La a Zezi kibarã pʋgẽ, da-kãagrã pʋt sẽn sak sõma t’a pa tar zĩig n bĩngd a koodã, a maana wãna? A yãka yam n na n wã a baoã n lebs n me bao-bɛd n tigs a koodã. A tagsame t’a sẽn magd n na n maan bũmb ningã na n talla bark t’a paam sũ-noogo, hal tɩ kɩt t’a yeele: “La m yeel m meng yaa: ‘Mam tara paoong wʋsg sẽn bĩng sẽn sek yʋʋm wʋsgo. Vʋʋse n dɩ la f yũ, la f maan sũ-noogo.’”—Luk 12:19.
B sẽn bool-a tɩ “yalma” võore
8. A Zezi kibarã pʋgẽ daoã yĩma bõe yelle?
8 Wa a Zezi sẽn wilgã, raoã belga a meng a sẽn tẽ t’a paoongã na n kɩtame t’a vɩɩmã lebg noogã. Baa ne sẽn da wõnd a vɩɩmã na n sɩd yɩɩ noogã, a yĩma bũmb a ye yelle: Wẽnnaam daabã. A tagsa yẽ sẽn na n vʋʋs n dɩ la a yũ n noog a yõor to-to wã yell bala. A tẽeme t’a sẽn paam ‘paoong wʋsgã,’ a na n vɩɩmda ‘yʋʋm wʋsg’ me. La bʋko, pa yɩ wa a sẽn tẽ wã ye. Yɩɩ wa a Zezi sẽn yeel kibarã sɩngrẽ wã. A yeelame tɩ “ned ka tar vɩɩm a paoong sẽn yaa wʋsg yĩng ye.” (Luk 12:15) Raoã sẽn gom woto wã, yʋn-kãng bala, a bõna a paoongã a sẽn tʋm ne a sũur fãa n paamã. Bala Wẽnnaam yeel-a-la woto: “Yalma, yʋnga bala, b na n deega f yõore la fo sẽn bĩngã ãnna n na n sooge?”—Luk 12:20, Sebr Sõngo.
9. Bõe yĩng tɩ b bool kibarã pʋgẽ daoã tɩ yalmã?
9 Masã, bɩ d gom bũmb ning a Zezi sẽn da rat n wilg a kɛlgdbã ne kiba-kãngã wã yelle. Wẽnnaam boola raoã tɩ yalma. Biiblã gom-biis võor wilgr sebr a ye (Dictionnaire exégétique du Nouveau Testament) yeelame tɩ gɛrk gom-bil ning b sẽn lebg tɩ “yalem” ka wã rat n yeelame tɩ “zɩta.” Sã n yaa ne seb-kãngã, Wẽnnaam sẽn bool raoã tɩ zɩtã, yaa sẽn na yɩl n wilg tɩ “ra-kãagr pa mi t’a tõeeme n pa rɩ bũmb a sẽn magd n na n maan yõod ye.” Dẽnd b sẽn yeel tɩ yalem ka wã, pa ned sẽn ka yam baa bilf ye. Yaa “ned sẽn pa mi t’a segd n teega Wẽnnaam.” A Zezi sẽn gom da-kãagrã yell to-to wã tẽegda tõnd bũmb a sẽn da yeel pipi kiris-nebã wakate. A ra yeela Laodise tigingã sẽn da be Aazi Mineerã neb woto: “Yãmb yetame: ‘Tõnd tara arzɛgse, tõnd paoong lebga wʋsgo, tõnd ka kongd bũmb ba a yembr ye.’ A yaa tɩ yãmb ka mi tɩ yãmb namsdame, la y yaa nimbãan dãmba la naong rãmba la zõense la y yaa bɛɛl ye.”—Wilgri 3:17.
10. Bõe yĩng tɩ d sã n tar “paoong wʋsgo,” pa wilgd tɩlae tɩ d na n vɩɩmda “yʋʋm wʋsgo”?
10 D segd n tagsa kiba-kãngã sẽn kõt-d yam ningã zug neere. Rẽ yĩnga d tõe n yɩɩ wa ra-kãngã bɩ? D wɩsgda d mens n tʋmd n baood “paoong wʋsgo,” n yaool n pa maand bũmb nins d sẽn segd n maan n wa tõog n paam n vɩɩmd “yʋʋm wʋsgã” bɩ? (Zã 3:16; 17:3) Biiblã yetame tɩ “arzɛgs ka tõe n sõng ned sũ-puugr daare,” la a yetẽ me tɩ “ned sã n teegd a arzɛka, a na n lʋɩɩme.” (Yelbũna 11:4, 28) Yaa rẽ n so la a Zezi yeel a kibarã baasgẽ tɩ ‘yaa woto ne ned ninga sẽn bĩngd paoong a meng yĩnga, n yaool n ka tar Wẽnnaam arzɛgsã.’—Luk 12:21.
11. Bõe yĩng tɩ pa tar yõod tɩ ned teeg a paoong n tẽ tɩ na n kogl-a lame?
11 A Zezi sẽn yeel a goamã baasgẽ tɩ “yaa woto” wã, a rat n wilgame tɩ bũmb ning sẽn paam da-kãagrã na n paama neb nins sẽn dɩk b teegrã fãa n teeg b paoongã. “Bĩng paoong wʋsg f meng yĩng” pa tolg n yaa wẽng ye, yaa bas n pa bao “Wẽnnaam arzɛgsã” la yellã. Karen-biig a Zak ra kõo saglg sẽn wõnd woto n yeele: “Masã, yãmb yetame: ‘Dũnda wala beoogo tõnd na n kẽnga tẽng ninga n zĩnd be yʋʋmde n da la d leeb n paam yõodo.’ La yãmb yaool n ka mi beoog yell ye.” Bõe la b ra segd n yeele? A Zak paasa woto: “Yãmb tog n yeelame yaa: ‘Wẽnnaam sã n data, tõnd na n zĩndame n maan woto la woto.’” (Zak 4:13-15) Baa ned sẽn yaa ra-kãagr to-to bɩ a tarem sẽn zem to-to, a sã n pa tar Wẽnnaam arzɛgsã, rat n yet t’a sã n pa arzɛk soab Wẽnnaam nifẽ, a paoongã fãa pa tar yõod ye. La yɩ arzɛk soab Wẽnnaam nifẽ dat n yeelame tɩ bõe?
Yɩ arzɛk soab Wẽnnaam nifẽ wã võore
12. Bõe la d tõe n maan n yɩ arzɛgs rãmb Wẽnnaam nifẽ?
12 A Zezi sẽn yeelã wilgdame tɩ yɩ arzɛk soab Wẽnnaam nifẽ yaa toor ne yɩ arzɛk soab dũni kãngã nebã nifẽ. A Zezi yeelame tɩ pa bao n paam paoong wall maan d yam ne paoong ning d sẽn tarã n segd n pak tõnd n tɩ yɩɩd ye. D segd n dɩka d paoongã n tʋm tʋʋm sẽn tat Wẽnnaam daabo, n paas zood ning d sẽn tar ne a Zeova wã. Rẽ la d yɩt arzɛgs rãmb Wẽnnaam nifẽ. Bõe yĩnga? Bala Wẽnnaam na n ning-d-la bark wʋsgo. Biiblã yet-d-la woto: “Yaa a Zeova bark n kõt arzɛka, la a ka paasd toog ne rẽ ye.”—Yelbũna 10:22, NW.
13. Wãn to la a Zeova bark kɩtd tɩ ned yɩ arzɛk soaba?
13 Wakat fãa, a Zeova sã n na n ning a nin-buiidã barka, sɩd yaa bark tɛkẽ. (Zak 1:17) Wala makre, a Zeova sẽn wa n na n kõ Israɛll nebã tẽng tɩ b zĩndã, a kõ-b-la “tẽng sẽn tar bĩisim ne sɩɩd wʋsgo.” Baa ne b sẽn bilgd tɩ Ezipt me ra yaa woto wã, bũmb a ye n kɩt tɩ tẽng ning a Zeova sẽn da kõ Israɛll nebã ra yaa toor fasɩ. A Moiiz yeela nin-buiidã tɩ ‘yaa tẽng Zusoab a Wẽnnaam sẽn get a yelle.’ A ra rat n yeelame tɩ b sẽn maand fãa na n talla barka, a Zeova sẽn na n ges b yellã yĩngã. Nin-buiidã sã n da sakd a Zeova, a ningd-b-la bark wʋsg hal tɩ tẽn-yagsã neb neẽ tɩ b sɩd yaa sõma n yɩɩd bãmba. Woto wilgda vẽeneg tɩ yaa a Zeova bark n sɩd kõt ned arzɛka!—Sõdbo 16:13; Tõodo 4:5-8; 11:8-15.
14. Yaa nin-bʋs la Wẽnnaam boond tɩ arzɛgs rãmba?
14 Bũmb ning sẽn pak neb nins sẽn yaa arzɛgs rãmb dũni kãngã pʋgẽ wã n tɩ yɩɩd yaa b taabã na ges-ba. Naoor wʋsgo, b sẽn vɩ to-to wã wilgda rẽ. B ratame tɩ nebã bãng tɩ b tarame. Yaa rẽ la Biiblã sẽn boond tɩ ‘tɩtaam’ bɩ wilg-m-mengã. (1 Zã 2:16) La Wẽnnaam sẽn boond neb nins tɩ arzɛgs rãmbã yaa neb sẽn tat a yam, neb a sẽn teend la a nong hal wʋsgo, tɩ b ned kam fãa tar zood sõma ne-a. Vẽenega, woto fãa kɩtame tɩ nin-kãensã sũy yaa noogo, tɩ b pels me gãe bãane. La arzɛk pa tõe n kõ ned rẽ ye. (Ezai 40:11) La sokr n kete. Wãn to la ned tõe n maan n yɩ arzɛk soab Wẽnnaam nifẽ?
D sẽn tõe n yɩ arzɛk soab Wẽnnaam nifẽ to-to
15. D sã n dat n yɩ arzɛgs rãmb Wẽnnaam nifẽ, bõe la d segd n maane?
15 A Zezi kibarã pʋgẽ daoã tʋma sõma n bao paoong wʋsg a meng yĩng bala. Yaa rẽ n kɩt tɩ b bool-a tɩ yalmã. Woto yĩnga, d sã n dat n yɩ arzɛgs rãmb Wẽnnaam nifẽ, d segd n maood n tʋmda tʋʋm sẽn sɩd tar yõod Wẽnnaam nifẽ. A Zezi sẽn yeel tɩ b ‘kẽng n maan nebã buud fãa tɩ b yɩ a karen-biisã’ bee tʋʋm kãens sʋka. (Matɩe 28:19) D sã n pa baood d meng nafr bala, n dɩkd d sẽkã, d keelmã, d bãngrã la d tõogã n moond koe-noogã la d maand karen-biisã, b tõe n yeelame tɩ d bĩngda paoongo. Neb sẽn maan woto sɩd paama bark wʋsg tẽebã wɛɛngẽ tɩ d na n ges kẽer makre.—Yelbũna 19:17.
16, 17. Mak-bʋs la y tõe n dɩk n wilg ned sẽn tõe n maan to-to n yɩ arzɛk soab Wẽnnaam nifẽ?
16 Kelg-y rao a ye sẽn yaa kiris-ned n yit Aazi tẽng a ye pʋgẽ makre. A ra mii ordinatɛɛr dãmbã manegr la b tall-n-tʋm sõma tɩ kɩt t’a ra paamd ligd wʋsgo. La a tʋʋmdã ra rɩkda a sẽkã fãa la bala, t’a wa mik tɩ komsda a tẽebã. Woto, sẽn na yɩl n paam sẽk tɩ sek n ges a tẽebã la a tʋʋm a taab yelle, a basa ordinatɛɛr dãmbã tʋʋmdã n maand krɛm glase rãmb n koosd sorã noore. A tʋmd-n-ta-kʋdã ra yaand-a lame. La baasa wãna? Ad a sẽn yeele: “Sɩd-sɩda, mam sẽn da paamd ligd ra yɩɩda ordinatɛɛr dãmbã tʋʋmdã sẽn da kẽesd maam ligd ningã. Mam da tara sũ-noog n yɩɩda, bala yaams la sũ-sãams nins mam pipi tʋʋmdã sẽn da kõt-ma saame. Sẽn yɩɩd fãa, kɩtame tɩ m pẽneg a Zeova n paase.” Kiris-nin-kãngã sẽn toeem tʋʋmdã, a wa n tõog n lebga wakat fãa so-pakda, la rũndã-rũndã, a tʋmda a Zeova Kaset rãmbã biru a ye pʋgẽ. Ad sɩd yaa vẽeneg t’a Zeova bark wata ne arzɛka.
17 Ad pag a ye me makre. A roagdbã kɩtame t’a karem n zãage. A kẽnga Fãrense, Megsik la Sʋɩɩs inivɛrsite rãmbẽ n tɩ karem hal n paam dipolom bɛda. A yeela woto: “Mam tʋʋmdã pʋgẽ m da tara yʋʋr la naare. La ne rẽ fãa, m da getame tɩ bũmb n paoog-m tɩ ra sãamd m sũur wʋsgo.” A sẽn wa n bãng a Zeova wã poore, a yeela woto: “Mam sẽn kẽng taoor ne Biiblã zãmsgã, m wa n tʋll n nooga a Zeova sũur la m lebs-a bũmb ning a sẽn kõ-ma bilfu, tɩ rẽ kɩt tɩ m bãng tɩ m segd n yɩɩ wakat fãa so-pakdã.” Woto yĩnga, a basa a tʋʋmdã la pa yã n kaoos la a reeg lisg ye. Hal sẽn na maan yʋʋm 20 woto masã a yaa wakat fãa so-pakda, t’a sũur yaa noogo. Ad a sẽn yeele: “Neb kẽer yetame tɩ mam sãama bãngr ning m sẽn paam lekollẽ wã la m sẽkã, la b yaool n yetame tɩ mam tara sũ-noogo. Sẽn paase, b pẽgda m sẽn vɩ to-to wã. Daar fãa, mam pʋʋsda a Zeova n kotẽ t’a sõng-m tɩ m kell n yɩ sik-m-meng soab n ket n tat a yam.”
18. Bõe la d tõe n maan n yɩ arzɛgs rãmb Wẽnnaam nifẽ wa a Polle?
18 A Soll me sẽn wa n lebg tʋm-tʋmd tɩ b boond-a t’a Pollã ra tõe n yɩɩ nin-bedr a zamaanã neb sʋka. La kaoosg zugẽ a yeela woto: “Sɩda, mam geelgda bũmb fãa wa bõn-zaalse mam sẽn bãng Kirist Zezi mam Zusoaba sẽn yɩɩd bũmb fãa wã yĩnga.” (Filip rãmba 3:7, 8) Sã n yaa ne a Polle, Kiristã bãngr sẽn kɩt t’a paam arzɛgs ninsã pa tar mak-n-taar ye. Tõnd me sã n pa pʋg yɛl sẽn wilgd tɩ d baooda d meng nafr bala, n bao n yɩ wẽn-sakdba, d yɩta arzɛgs rãmb Wẽnnaam nifẽ. Wẽnnaam Gomdã wilgd-d-la bũmb ning sẽn kõt arzɛkã vẽeneg n yet woto: “Sik-m-meng ne Zusoaba zoees biis yaa arzɛk ne waoogre la vɩɩm.”—Yelbũna 22:4.
Y tõe n bilgame bɩ?
• Yel-bʋg n da pak a Zezi kibarã pʋgẽ daoã?
• Bõe yĩng tɩ b bool daoã tɩ yalma?
• Yɩ arzɛk soab Wẽnnaam nifẽ võor yaa bõe?
• Wãn to la d tõe n maan n yɩ arzɛgs rãmb Wẽnnaam nifẽ?
[Zãmsgã sogsgã]
[Foto, seb-neng 30, 31]
“Yaa a Zeova bark n kõt arzɛka”