Roagdba, wub-y y kambã ne nonglem
Roagdba, wub-y y kambã ne nonglem
“Bũmb ninga fãa yãmb sẽn maanda, bɩ y maan ne nonglem.”—1 KORẼNT DÃMBA 16:14.
1. Biig rogem maanda a roagdbã bõe?
BIIG rogem daar yaa sũ-noog wakate. Roagdb wʋsg sɩd yeta woto. Ad pag a yembr yʋʋr sẽn boond t’a Aleah sẽn yeele: “Mam sẽn yã m bi-pɛɛlgã pipi m dogmã poorã, m sũur yɩɩ noog hal wʋsgo. Mam tagsame meng tɩ m zɩ n yã biig sẽn yaa neer woto ye.” La biig rogem tõe n waa ne yɩɩr me n kõ a roagdbã. Ad a Aleah sɩdã sẽn yeele: “Mam da sokda m meng m sã n na n tõog n wuba m bi-puglã sõma t’a wa tõog n mao ne vɩɩmã zu-loeese.” Woto sɩd yaa yɩɩr n kõ roagdb wʋsgo, la b leb n miime tɩ b segd n wuba b kambã ne nonglem. Baasgo, pa nana ne roagdb nins sẽn yaa kiris-nebã tɩ b tõog n wub b kambã woto ye. Bõe yĩnga?
2. Roagdbã maooda ne zu-loe-bʋs rũndã-rũndã?
2 Rũndã-rũndã d vɩɩ dũniyã yaoolem wakate, hal t’a saabã kolg wʋsgo. Wa b sẽn da pĩnd n togsã, zĩig fãa nebã wʋsg ye pa nong taab ye. Baa zagsã pʋsẽ menga, nonglem pa ye be ye, nebã lebga “zɩ-beoog rãmba, [neb toog sẽn ka be ne sõmblem, Kãab-paalgã Koe-noogo], . . . sẽn ka tar yõk-m-menga, pʋto-rãmba.” (2 Tɩmote 3:1-5) Kiris-nebã sẽn vɩ ne neb a woto buud daar fãa wã yĩnga, b tõe n wa lebga wa nin-kãensã b zagsã pʋsẽ ne taaba. Sẽn paase, roagdbã me sẽn yaa koangdbã yĩnga, b mi n pa tõogd n yõkd b mens ye. B leb n mi n wa tudg n goma goam b sẽn da pa segd n gome. Sasa ning me, b maanda bũmb tɩ b pa reng n tags tɩ sek ye.—Rom dãmba 3:23; Zak 3:2, 8, 9.
3. Wãn to la roagdbã tõe n wub b kambã tɩ b tall sũ-noogo?
3 La baa ne woto fãa sẽn kɩt tɩ pa nana wã, roagdbã ket n tõe n wuba b kambã sõma tɩ b tall sũ-noog la b yɩ neb sẽn nong Wẽnnaam. Wãn-wãn la b tõe n maan rẽ? Yaa b sẽn na n tũ Biiblã sagl-kãngã: “Bũmb ninga fãa yãmb sẽn maanda, bɩ y maan ne nonglem.” (1 Korẽnt dãmba 16:14) Nonglmã sɩd yaa “bũmb fãa loɛtg sɩd-sɩda.” (Kolos rãmba 3:14) Tʋm-tʋmd a Poll bilga nonglem sẽn yaa to-to wã a pipi lɛtr ning a sẽn tool Korẽnt kiris-nebã pʋgẽ. Bɩ d ges bũmb a tãab a sẽn wilg tɩ tõe n sõng roagdbã tɩ b wub b kambã ne nonglem.—1 Korẽnt dãmba 13:4-8.
Roagdbã segd n talla sũ-mare
4. Bõe yĩng tɩ roagdbã segd n tall sũ-mare?
4 A Poll yeelame tɩ “nonglem maanda sũ-mare.” (1 Korẽnt dãmba 13:4) Gɛrk gom-biig ning b sẽn lebg ka tɩ “sũ-marã” bilgda maag-m-menga, la sũur sẽn pa yikd tao-tao. Bõe yĩng tɩ roagdbã segd n tall sũ-mare? Sãmbg sẽn ka be, roagdbã tõe n sõdga bʋʋm wʋsgo. La d na n goma bãmb b wãn bal yelle. Wala makre, biig sã n dat bũmbu, a pa kot vugr bal ye. Baa a roagdbã sã n yeel vẽeneg tɩ b pa na n kõ–a a sẽn datã, a ket n pẽdgdame n tẽed tɩ b na n wa baas n kõ-a lame. Bi-bɩɩg me sã n wa rat n maan bũmb t’a roagdbã neẽ t’a na n bao yɛl n kõ-a meng tɩ kɩt tɩ b pa rat n sake, a nong n baooda bʋʋm n na n wilg tɩ b segd n kõ-a-la sor t’a maan a sẽn datã. (Yelbũna 22:15) Sẽn paase, wa tõnd fãa, kambã nong n yɩlemda b kongre.—Yɩɩl Sõamyã 130:3.
5. Bõe n tõe n sõng roagdbã tɩ b tall sũ-mare?
5 Bõe n tõe n sõng roagdbã tɩ b tall sũ-mar ne b kambã? Rĩm a Salomo yeelame tɩ “yam soab sũur ka yikd tao-tao ye.” (Yelbũna 19:11) Roagdbã sã n tags neere, b na n tẽegame tɩ bãmb me yãadmẽ b ra tagsdame la b gomd wa kamba, la na n kɩtame tɩ b wʋm b kambã yel-manesem võore. (1 Korẽnt dãmba 13:11) Roagdbã, rẽ yĩnga y tẽra bũmb yãmb me sẽn da kos y ba bɩ y ma ne pẽdgr bɩ? Y bi-bɩɩlmã wakate, y me ra pa tagsd tɩ y roagdbã pa wʋmd-y sɩda? Y sã n tẽeg woto fãa, y na n tõog n wʋma y kambã manesem võore. Y leb n na n bãnga bũmb ning sẽn kɩt tɩ y segd n ket n sikd y sũur n wilgd-b y sẽn datã wakat fãa n yɩlemdẽ wã. (Kolos rãmba 4:6) Pa zaalem la a Zeova sẽn da yeel Israɛll nebã tɩ b “zãms” b kambã a tõodã “neerã” ye. (Tõodo 6:6, 7) Hebre gom-bil ning b sẽn lebg ka tɩ “zãms neerã” võorã meng-meng yaa “togs n yɩlme,” “togs bũmb f sẽn da zoe n togs naoor wʋsgo,” “kɩt tɩ kẽ ned sũurẽ.” Woto rat n yeelame tɩ roagdbã segd n lebsd n wilgda b kambã Wẽnnaam Gomdã noy nins b sẽn da zoe n wilg-bã, hal tɩ b wa mi-b la b tũud-ba. Naoor wʋsgo, sẽn na yɩl n sõng kambã tɩ b bãng vɩɩmã yɛl a taab me, b segd n wilg-b lame n yɩlme.
6. Bõe yĩng tɩ d tõe n yeel tɩ roagd sẽn tar sũ-mar pa roagd sẽn sakd kɛgre?
6 La yɩ sũ-mar soabã pa rat n yeel tɩ f sak kɛgr ye. Wẽnnaam Gomdã keoogame tɩ b “sã n bas biig t’a maan a yam, a ningda a ma yãnde.” Sẽn na yɩl tɩ ra wa yɩ woto, verse wã paasame tɩ “sãbsg ne tãsg kõta yam.” (Yelbũna 29:15) Wakat ninga, kambã tagsdame tɩ b roagdbã pa tar sor n na n dems-b ye. La kiris-nebã zagsẽ, pa kambã n segd n wilg b roagdbã b sẽn dat tɩ b wub-b to-to ye. Yaa a Zeova sẽn yaa zakã lugundã n kõ roagdbã noor tɩ b wub b kambã la b kibl-b ne nonglem. (1 Korẽnt dãmba 11:3; Efɛɛz rãmba 3:15; 6:1-4) Sɩd me, bũmb a to me la a Poll yeel nonglmã wɛɛngẽ tɩ wilgdẽ tɩ kiblg la nonglem tũuda taaba.
Y sẽn tõe n kibl y kambã ne nonglem to-to
7. Bõe yĩng tɩ roagdb sẽn nong b kamb segd n kibind-ba, la kiblgã baooda bõe maanego?
7 A Poll yeelame tɩ “nonglem pida ne neerlem.” (1 Korẽnt dãmba 13:4) Roagdb sã n sɩd rat b kamb neere, b na n kibind-b-la wakat fãa. B sã n maand woto, b rɩkda a Zeova togs-n-taare. A Poll yeelame t’a ‘Zeova sɩbgda a sẽn nong a soaba.’ La d segd n bãngame tɩ sɩbgr ning yell b sẽn gomd Biiblã pʋgẽ wã pa tek ned sẽn na n beeg tɩ b sɩbg-a wã bal ye. Yaa wilgr la kiblg yell la b sẽn gomdã. Kibl-kãng yõod yaa bõe? A Poll paasame t’a “wata ne tɩrlem la laafɩ neb nins sẽn sakdã yĩnga.” (Hebre dãmba 12:6, 11) Roagdbã sã n wub b kambã ne nonglem wa Wẽnnaam sẽn datã, b wat n tõog n yɩɩ neb sẽn nong laafɩ la nin-tɩrse. Kambã sã n sak ‘a Zeova zãmsgã’ bɩ a kiblgã, b paamda bãngre, yam la yam-vẽenem. Bõn-kãensã yõod yɩɩda sãnem la wanzuri.—Yelbũna 3:11-18.
8. Naoor wʋsgo, roagdb sã n pa kibl b kamba, b yɩta wãn-wãna?
8 Roagdb sã n bas b kamb n pa kibind-ba, b pa maand-b neer ye. A Zeova ra vẽenega a Salomo t’a yeel woto: “Sẽn kisgda sãbsg maanda a biig pʋ-toogo. Ned sã n nong a biiga, a sagend-a lame.” (Yelbũna 13:24) Biig sã n pa yã kiblgu, a bɩʋʋng zugẽ, a toor wat n kae ne neda, la a pa talld sũ-noog me ye. B gũusame n mik tɩ kamb nins sẽn paamd wilgr la kiblg ne nonglem wakat fãa wã kareng yaa sõma lekoll dãmbẽ wã, b zĩid-n-taar bee yamleoogo, la b sũy wae n yaa noog me. Rẽnd yaa vẽeneg tɩ roagdb sã n kibind b kamba, b maand-b-la neere.
9. Bõe la roagdb nins sẽn yaa kiris-nebã zãmsd b kambã, la bõe me la kambã segd n bãnge?
9 La wãn to la roagdbã tõe n kibl b kambã n wilg tɩ b nong-b lame, la tɩ b rata b neere? Sẽn na yɩl n tõog n maan dẽ, b segd n yẽsda ne b kambã n wilgd-b b sẽn dat tɩ b maan bũmb ninsã vẽenega. Wala makre, kamb nins roagdb sẽn yaa kiris-nebã zãmsd-b-la Biiblã noyã tɩ b nan ket n paoodẽ. B wilgd-b lame me tɩ b segd n maana bũmb nins Wẽnd tũudum hakikã sẽn baood tɩ b maanã. (Yikri 20:12-17; Matɩe 22:37-40; 28:19; Hebre dãmba 10:24, 25) B tog n sõnga kambã me tɩ b bãng tɩ b pa tõe n yols noy-kãensã lae-lae ye.
10, 11. Bõe yĩng tɩ roagdbã tõe n deng n bao n bãng b kambã raab n yaool n gãnegd noy b zakã pʋgẽ?
10 Wakat ninga, roagdb sã n wa rat n gãneg noy zakã neb sẽn segd n tũ, b tõe n deng n bao n bãnga b kambã tagsgo. B sã n sɩd reng n yẽs ne kambã, noy nins b sẽn na n gãnegã tũub yɩta nana ne-b n yɩɩge. Makre, wala roagdbã sã n dat n yãk lɛɛr kambã fãa sẽn tog n kẽedẽ, b tõe n yãka lɛɛr takɩ sẽn pa segd n mik biig yɩng ye. B sã n dat me b tõe n basame tɩ kambã reng n wilg lɛɛr ning b sẽn datã, la b wilg b sẽn dat lɛɛr kãngã võore. Rẽ poore, roagdbã tõe n wilga lɛɛr ning bãmb sẽn date, la b togs bũmb ning sẽn kɩt tɩ rẽ zemsã. La b sã n pa wʋm taaba, roagdbã segd n maana wãna? Wakat ninga, kambã sẽn datã sã n pa kɩɩsd Biiblã noyã, roagdbã tõe n sakame. La rẽ yĩnga b sã n sake, wilgdame tɩ b basame tɩ b kambã soog-b bɩ?
11 Sẽn na yɩl n leok sok kãngã, bɩ d ges a Zeova sẽn yaa d Zusoabã manesem sẽn yɩ to-to ne a Lot la a zakã rãmba, a sẽn wa n dat n sãam Sodommã. Malɛgsã sẽn wa n yãagd a Lot ne a pagã la a kom-pugli wã n yit tẽngã, b yeel-b-la woto: ‘Zoe-y n ta-y tãngã, n da wa sãam ye!’ La a Lot kosame n na n kẽng zĩig a to. A yeel-a woto: “Ayo, m Zusoaba!” La a paas tɩ: “Ges-y-yã, tẽng kãngã pẽeme, la mam tõe n zoe n taa be. A yaa bilfu. Bɩ y bas tɩ m ta be n põse.” La a Zeova leok-a lame tɩ bõe? Ad a sẽn leok to-to: “Be neere, mam sakame.” (Sɩngre 19:17-22) Rẽ yĩnga woto wilgdame t’a Zeova basame t’a Lot soog-a bɩ? Abada! A mikame bal tɩ bũmb ning a Lot sẽn kosã pa wẽng tɩ kɩt t’a maan-a neer n sake. Y sã n yaa roagda, rẽ yĩnga y sã n wa gãnegd noy y zakã neb sẽn segd n tũ, wakat ning y tõe n mi n saka y kambã raab bɩ?
12. Bõe n tõe n sõng biig t’a bãng a sẽn tog n maane, la a sẽn pa segd n maane?
12 Roagdbã segd n wilga kambã noy nins b sẽn dat tɩ b tũ wã, la b leb n wilg-b sɩbgr ning b sẽn na n paame, b sã n kɩɩs no-kãense. B sã n wilg rẽ n sa, sẽn ket yaa tũubu. Kambã sã n kɩɩsd noor tɩ roagdbã yetẽ tɩ b na n sɩbg-b lame la b yaool n sĩnd n pa sɩbgd-ba, b pa maand-b neer ye. Biiblã yeela woto: “B ka yãgd n kao tʋʋm wẽns bʋʋd tao-tao ye. Yaa rẽ yĩng n kɩt tɩ ninsaalba keng b sũyã n maand wẽnga.” (Koɛɛg Soaba 8:11) Yaa sɩd tɩ biig sã n maan yell neb sʋk wall a sẽn wat n be ne a reed-n-taase, sẽn na yɩl n da ning-a yãnde, a roagd tõeeme n pa sɩbg-a zĩig pʋgẽ ye. La kambã sã n miẽ tɩ b ba wã wall b ma wã sã n yeel t’a na n sɩbg-b lame pa viigdi, b na n bãngame tɩ b “n-ye” sɩd yaa n-ye la b “ayo” me yaa ayo. Woto na n kɩtame tɩ b bãng b sẽn tog n maan la b sẽn pa segd n maanã vẽenega, la na n kɩtame tɩ b waoogd b roagdbã sõma-sõma la b nong-ba.—Matɩe 5:37.
13, 14. Wãn to la roagdbã tõe n dɩk a Zeova togs-n-taar n wub b kambã?
13 Sẽn na yɩl tɩ biig bãng tɩ b sẽn sɩbgd-a wã yaa b sẽn nong-a yĩnga, roagdbã segd n gũusame tɩ sɩbgrã zems ne-a. Pag a ye yʋʋr sẽn boond t’a Pam yeela woto: “Tõnd sẽn sɩbg d kamb a yiibã to-to wã pa a ye ye. Biig fãa tara sɩbgr sẽn sõmb ne-a.” Ad a Pam sɩd a Larry sẽn yeele: “Tõnd bi-pugl kãsengã ra pa reegd gomd tao-tao tɩ sã n pa b wɩng-a lame ye. La a yaoã yẽ tubr da wʋmda gomde. Baa gẽeneg meng sekda yẽ.” Roagdb sẽn nong b kamb sɩd segd n mao n bãnga kiblg buud ning sẽn sõmb ne biig fãa.
14 A Zeova kõo roagdbã mak-sõng rẽ wɛɛngẽ, bala a mi a nin-buiidã ned kam fãa tõog la a pãn-komsem. (Hebre dãmba 4:13) Sẽn paase, a Zeova sã n na n sɩbg neda, a pa sɩbgd-a tɩ loog nug wall a bas-a n pa sɩbg ye. Wakat buud fãa, a sɩbgda a nin-buiidã “ne tɩrlem.” (Zeremi 30:11) Roagdbã, rẽ yĩnga yãmb mi y kambã tõog la b pãn-komsem bɩ? Y mi y sẽn tõe n tũ rẽ to-to n wub-b bɩ? Y sã n miẽ la y maand woto, y wilgdame tɩ y nong-b lame.
Sõng-y-b tɩ b pelgd b pʋs n sõsd ne-yã
15, 16. Wãn-wãn la roagdbã tõe n maan n kɩt tɩ b kambã pelgd b pʋs n sõsd ne-ba, la wãn to la roagdb sẽn yaa kiris-nebã maand rẽ sõma?
15 A Poll yeelame me tɩ “nonglem ka maand sũ-noog ne wẽng ye, a maanda sũ-noog ne sɩda.” (1 Korẽnt dãmba 13:6) Wãn to la roagdbã tõe n wub b kambã tɩ b nong sẽn yaa sõma la tɩrga? B segd n sõng-b lame tɩ b pelgd b pʋs n sõsd ne-ba, baa sã n pa wakat fãa la b sẽn yetã noom-ba. Yaa sɩd tɩ sẽn noom roagdbã yaa b kambã tagsg la b goamã sẽn na n zemsd ne Wẽnnaam noyã. La sasa ninga, biig tõe n goma gomd tɩ yaa wẽnga. (Sɩngre 8:21) Roagdbã segd n maana wãn wakat kãnga? Tõe tɩ b na n dat n zaba biigã zĩig pʋgẽ. La b sã n maan woto, na n kɩtame t’a wa pa ye togsd a pʋg ye. A na n togsd-b-la goam sẽn noom-b bala. Yaa vẽeneg tɩ biig sã n gom gom-yoodo, b segd n dems-a-la zĩig pʋgẽ. La roagdbã segd n bãngame tɩ sõng biig t’a bãng yẽsgã pa rat n yeel t’a sẽn yeel bũmb ning fãa bɩ b rems-a ye.
16 Wãn to la roagdbã tõe n maan n sõng b kambã tɩ b pelgd b pʋs n yẽsd ne-ba? Pag ning yʋʋr sẽn boond t’a Aleah tɩ d ra zoe n gom a yellã yeela woto: “Tõnd kambã sã n togs bũmb tɩ pa noom-do, d modgda d mens n pa tãs-b ye. Woto kɩtame tɩ d zakã pʋga, d kambã pelgd b pʋs n yẽsd ne-do.” Roagd a ye yʋʋr sẽn boond t’a Tom me yeela woto: “Tõnd sõnga d bi-puglã t’a tõe n wilg-d a tagsgo, baa a sẽn tagsdã sã n yaa toor ne tõnd dẽndã. Sã n yaa ne tõndo, biigã sã n yet bũmb sẽn pa zems tɩ d nong n kʋʋgd-a n wilgd d sẽn tagsde, na n sãama a sũur n kɩt t’a wa pa le pelgd a pʋg ne-d ye. Sẽn paase, d sẽn kelgd-a wã yĩng kɩtame t’a me kelgd tõndo.” Yaa vẽeneg tɩ kambã segd n waoogda b roagdbã. (Yelbũna 6:20) La kambã sã n pelgd b pʋs n yẽsd ne b roagdbã, b tõogd n sõngd-b lame tɩ b tagsd neere. Roagd a ye me yʋʋr sẽn boond t’a Vincent n tar kamb a naas yeela woto: “Naoor wʋsgo, tõnd sã n yeel d kambã bũmbu, d sõngd-b lame tɩ b bãng d sẽn yetã yõodo, la rẽ kɩɩsg sẽn na n wa ne bi-wẽns ninsi, tɩ kɩtdẽ tɩ b mi b sẽn segd n maanega. Woto sõngd-b lame tɩ b tagsd neere.”—Yelbũna 1:1-4.
17. Roagdbã tõe n kɩsa sɩd ne bõe?
17 Yaa sɩd tɩ roagd kae n tõe n tũ Biiblã noy kɛpɩ n wub a kamb ye. La ne rẽ fãa, y tõe n kɩsa sɩd tɩ y kambã sũy na n yɩɩ noog wʋsgo, y sã n baood n na n wub-b ne sũ-mar la nonglem. Y sã n maand woto, a Zeova na n ning-y-la barka. (Yelbũna 3:33) Kiris-nebã sẽn modgd n tũud sagl-kãensã fãa wã yaa tɩ b ratame tɩ b kambã wa nong a Zeova wa bãmba. La wãn to la b tõe n sõng kambã tɩ b sɩd wa nong a Zeova? Sõsg ning sẽn pʋgdã na n wilga sagls kẽer b sẽn tõe n tũ tɩ sõng-ba.
Y tẽrame bɩ?
• Roagdbã sã n tags neere, wãn to la tõe n sõng-b tɩ b tall sũ-mar ne b kambã?
• Bõe yĩng tɩ d tõe n yeel tɩ ned sẽn nong a biig segd n kibind-a lame?
• Bõe yĩng tɩ tar yõod tɩ roagdbã ne b kambã yẽsd ne taab sõma-sõma?
[Zãmsgã sogsgã]
[Foto rãmba, seb-neng 25]
Roagdbã, y tẽra yɛl yãmb sẽn maan y yãadmẽ bɩ?
[Foto, seb-neng 26]
Yãmb sõngda y kambã tɩ b pelgd b pʋs n sõsd ne-y bɩ?