Sõng-y y kambã yɩ b nong a Zeova
Sõng-y y kambã yɩ b nong a Zeova
“Nina kom-dibli a sẽn dog a yãadem wakat yaa wa pɛɛm sẽn be gãndaoog nugẽ.”—YƖƖL SÕAMYÃ 127:4.
1, 2. Bõe yĩng tɩ b yetẽ tɩ kambã yaa wa “pɛɛm sẽn be gãndaoog nugẽ”?
TÃOOS sã n dat n tão bũmb ne tãpo, a bẽta a peemdã sõma nanda. Rẽ poore, a wɩsgda a meng n yãag tãpã hal tɩ seke. Baa tãpã yãagr sẽn zabd kamsã, a maagda a yĩng n tees bũmb ning a sẽn dat n tão wã sõma, n yaool n bas peemdã. La rẽ yĩnga peemdã na n yõga bũmbã bɩ? D pa tõe n leok tɩ ayo bɩ n-ye ye. Bala tãoosã sã n pa tar minim sõma, wall sebg sã n tiis peemdã, pa rẽ bɩ peemdã sã n pa sõma, tõeeme n pa yõg bũmbã ye.
2 Rĩm a Salomo yeelame tɩ kambã yaa wa “pɛɛm sẽn be gãndaoog nugẽ.” (Yɩɩl Sõamyã 127:4) Bɩ d ges mak-kãngã sẽn sɩd zems to-to. Tãoos sã n yã bũmb n dat n tão, a segd n maana tao-tao. Kambã me sẽn pa na n kaoos b roagdbã nugẽ wã yĩnga, b sã n dat tɩ b wa nong a Zeova ne b sũy fãa, b segd n sõng-b-la tao-tao. Bala pa na n kaoos la b bɩ n lugl b zags ye. (Matɩe 19:5) Rẽ yĩnga roagdbã na n tõogame tɩ baa b kambã sã n wa yi zakã pʋgẽ bɩ b ket n nong a Zeova la b maand a raabã bɩ? Wala tãoosã nengẽ wã, ka me, d pa tõe n leok tɩ ‘n-ye’ bɩ ‘ayo’ ye. Bala bee ne roagdbã minim sẽn yaa to-to kambã wubr wɛɛngẽ. Leb n bee ne zakã pʋgẽ vɩɩm sẽn yaa to-to wã, la kambã sẽn na n deeg wubrã to-to wã me. Bɩ d sõs yel-kãensã a tãabã zug ball-balle. Pipi, d na n gesa roagdb sẽn mi kamb wubr sõma sẽn maand to-to.
B kõta mak-sõngo
3. Bõe yĩng tɩ roagd segd n tũud bũmb nins a sẽn zãmsd a kambã?
3 A Zezi kõo roagdbã mak-sõngo, bala a ra tũuda bũmb nins a sẽn zãmsd nebã. (Zã 13:15) A ninga Fariziẽ rãmbã taal meng b sẽn da zãmsd nin-buiidã la b yaool n “ka maand” b sẽn yetã. (Matɩe 23:3) Roagdbã sã n dat n sõng b kambã tɩ b wa nong a Zeova, b me segd n tũuda bũmb nins b sẽn zãmsd-bã. Bala wa tãp sẽn pa tar wĩir sẽn pa tõe n tall n tão bũmbã, f sã n yet bũmb la f pa maandẽ, ned pa na n tũ f sẽn yetã ye.—1 Zã 3:18.
4. Sogs-bʋs la roagdbã segd n sok b mense, la bõe yĩnga?
4 Bõe yĩng tɩ makr ning roagdbã sẽn kõt b kambã tar yõodo? Wa kãsembã sẽn tõe n ges a Zezi mak-sõngã sẽn be Biiblã pʋgẽ tɩ sõng-b tɩ b nong Wẽnnaamã, kambã me sã n yã roagdbã mak-sõngo, tõe n sõng-b lame tɩ b nong a Zeova. Biig tũud-n-taas tõe n kɩtame t’a yɩ nin-sõngo, pa rẽ bɩ ‘sãam-a.’ (1 Korẽnt dãmba 15:33) La biig yãadem wakate, a nong n pẽe a roagdbã n yɩɩda. Rẽnd manesem ning b sẽn na n tall sasa kãngã tõe n kɩtame tɩ biigã wa yɩ nin-sõng wall nin-yoogo. Woto yĩnga, roagdbã segd n soka b mens sogs-kãensã: ‘Mak-bʋg la mam kõt m biigã? Rẽ yĩnga makr ning mam sẽn kõt-a wã na n kɩtame t’a wa tall minimd sẽn yaa sõma bɩ? Yɛl sẽn tar yõod wʋsg wala pʋʋsgã la Biiblã zãmsgã wɛɛngẽ, mak-bʋg la mam kõt m biigã?’
B pʋʋsda ne b kambã
5. Roagdbã tõe n sõnga b kambã tɩ b bãng bõe ne pʋʋsgã maasem?
5 Ne y pʋʋsgã maasem me, y tõe n sõnga y kambã tɩ b bãng a Zeova. Wala makre, y sã n pʋʋsd Wẽnnaam bark rɩɩbã sasa wall Biiblã zãmsg wakat tɩ b wʋmdẽ, bõe la b na n bãnge? Na n sõng-b lame tɩ b bãng tɩ yaa a Zeova n kõt tõnd d noorã rɩɩbo, tɩ d segd n pʋʋs-a bark rẽ yĩnga. B leb n na n bãngame tɩ yaa yẽ n sõngd tõnd tɩ d wʋmd Biiblã goam võore. Tara yõod tɩ d sõng kambã tɩ b bãng woto fãa.—Zak 1:17.
6. Wãn to la roagdbã tõe n sõng b kambã tɩ b bãng t’a Zeova geta b ned kam fãa yelle?
6 La y sã n pʋʋsd ne y zakã neb sasa a taab me n gomd zakã zu-loees la yɛl sẽn pak kambã yelle, na n sõng-b-la wʋsg me. Na n kɩtame tɩ y kambã bãng vẽeneg t’a Zeova nong-b-la wʋsgo, t’a kelgd-b lame, la t’a geta b ned kam fãa yelle. (Efɛɛz rãmba 6:18; 1 Pɩɛɛr 5:6, 7) Roagd a yembr yeela woto: “Hal tõnd bi-puglã peelmẽ n tãag a bɩʋʋngo, d ra pʋʋsda ne-a. A bi-bɩɩlmã wakate, d sã n da wa pʋʋsdẽ, d gomda bũmb sẽn pak-a yelle. Wala makre, d kota Wẽnnaam d pʋʋsgã pʋgẽ t’a sõng-a t’a bãng n yãk tũud-n-ta-sõmse. Daar ne a to fãa, tõnd ra pʋʋsda ne d biigã hal n tãag a sẽn wa n kẽ kãadem n yi zakẽ wã.” Rẽ yĩnga yãmb me tõe n pʋʋsda ne y kambã daar fãa bɩ? Y tõe n sõng-b lame tɩ b bãng t’a Zeova yaa b zoa, la t’a sẽn kõt-b rɩɩbo, fut la teed a taabã toor sẽn ka be, a geta b tẽebã yelle, la a rat tɩ b sũy yɩ noog bɩ?—Filip rãmba 4:6, 7.
7. Roagdbã sã n dat n gomd yɛl takɩ yell b pʋʋsgã pʋgẽ, bõe la b segd n maane?
7 Yaa vẽeneg tɩ y sã n dat n gom bũmb sẽn pak biig yell y pʋʋsg pʋgẽ, y segd n deng n mii bũmb ning sẽn pak-a wã. Ad kamb a yiib ba sẽn yeele: “Semen fãa baasgẽ, mam sokda m meng sogs-kãensã b yiibã: ‘Zu-loe-bʋg la mam kambã paam semennã pʋgẽ? Bõe me n yɩ-b noogo?’” Roagdbã, rẽ yĩnga y tõe n dengd n sogsda y mens sogs-kãensã buud n tõogd n gomd y kambã zu-loees kẽer yell y pʋʋsgã pʋgẽ bɩ? Y sã n maand woto, y zãmsda y kambã b sẽn segd n pʋʋs a Zeova sẽn wʋmd pʋʋsgã to-to. La pa rẽ bal ye, na n sõng-b lame tɩ b nong-a me.—Yɩɩl Sõamyã 65:3.
B sõngd-b lame tɩ b nong Biiblã zãmsgo
8. Bõe yĩng tɩ roagdbã segd n sõng b kambã tɩ b minim Wẽnnaam Gomdã zãmsgo?
8 Roagdbã sã n nong Biiblã zãmsgo, tõe n kɩtame tɩ b biigã zood ne a Zeova yɩ wãn-wãna? Zood buud fãa pʋgẽ, yaa sɩd tɩ neb a yiibã sã n dat tɩ b zems-n-taarã yɩ sõma la kaoose, b segd n yẽsda ne taaba, tɩ b ned kam fãa kelgd a to. La wãn to la d tõe n kelg a Zeova? Yaa d sã n zãmsd Biiblã ne ‘tʋm-tʋmd sẽn tũud sɩd la sẽn tar yamã’ sɛb maasem. (Matɩe 24:45-47; Yelbũna 4:1, 2) Woto yĩnga, roagdb sã n dat tɩ b kamb bao a Zeova zood la b kell n yɩɩ a zo-rãmba, b segd n sõng-b lame tɩ b minim Wẽnnaam Gomdã zãmsgo.
9. Wãn to la b tõe n sõng kambã tɩ b minim Biiblã zãmsgo?
9 Wãn to la b tõe n sõng kambã tɩ b minim Biiblã zãmsgo? Yaa mak-sõng ning roagdbã sẽn na n kõ-b rẽ wɛɛngẽ wã n na n sõng-b n yɩɩge. Rẽ yĩnga yãmb kambã nong n yãta y sẽn karemd Biiblã wall y zãmsd-a bɩ? Yaa sɩd tɩ tõe tɩ y tʋmda wʋsg sẽn na yɩl n tõog n ges y kambã yelle, tɩ yɩl n yã sẽk n karem wall zãms Biiblã mi n yaa toogo. La sã n yaa rẽ bɩ y sok y meng woto: ‘Mam kambã nong n yãta maam tɩ m get televiziõ wã bɩ? Sã n mik tɩ y tara sẽk n get televiziõ wã, y pa tõe n dɩkd sẽg-kãng bilf n zãmsd Biiblã, n paam n kõ y kambã mak-sõng sɩda?
10, 11. Bõe yĩng tɩ roagdbã segd n zãmsd b kambã Biiblã?
10 Bũmb a to me la roagdbã tõe n maan n sõng b kambã tɩ b zãms a Zeova kelgre. Yaa b sẽn na n zãmsd Biiblã ne b zakã rãmb n pa vaandẽ. (Ezai 30:21) Roagdbã sẽn talld b kambã n kẽnd tigissã yĩnga, kẽer tõeeme n pa wʋmd b sẽn segd n zãms-b Biiblã yirã võor ye. La b sẽn segd n maan dẽ wã tara võore. A Zeova kõo roagdbã noor tɩ b segd n zãmsa b kambã. (Yelbũna 1:8; Efɛɛz rãmba 6:4) B sã n zãmsd Biiblã ne b kambã yiri, sõngd-b lame tɩ b bãng tɩ Wẽnnaam tũudmã pa tek Rĩungã Roogẽ kẽnd bal ye. B na n bãngame tɩ zakã pʋgẽ me b segd n wilgdame tɩ b yaa wẽn-tũudba.—Tõodo 6:6-9.
11 Sẽn paase, roagdbã sã n zãmsd b kambã Biiblã neere, tõe n sõng-b lame tɩ b bãng b tagsg Wẽnnaam tũudmã la vɩɩmã yɛl a taab zugu. Wala makre, kambã sã n na wa paoodẽ, sɛb n be roagdbã sẽn tõe n tall n zãms-b Biiblã. Wala Écoute le Grand Enseignant * sebrã. Seb-kãng sagsã sulã fãa la bal pʋsẽ, b sokda kambã sogsg sẽn na yɩl tɩ b togs b tagsg bũmb ning yell b sẽn gomdã zugu. Roagdbã tõe n tũnuga ne Biiblã verse nins sẽn be sebrã pʋgẽ wã n sõng b kambã tɩ b bãng b sẽn tõe n tagsd neer to-to n bãngd ‘sõma ne wẽng n bakdẽ.’—Hebre dãmba 5:14.
12. Wãn to la roagdbã tõe n maan tɩ b zakã Biibl zãmsg zemsd ne b kambã zu-loeese, la wãn to la y maan rẽ tɩ yɩ sõma?
12 Y kambã sã n wa lebgd kãsemba, bɩ y modgdẽ tɩ bũmb nins y sẽn zãmsd-bã zemsd ne b zu-loeesã. Ges-y rao a ye ne a pag sẽn sõng b kom-bɩɩs to-to tɩ b bãng b sã n tõe n kẽnga saoog b lekoll sẽn sigli. Ad kambã ba sẽn yeele: “Tõnd yeela d kom-pugli wã tɩ d na n yãka wakat bilf zakã Biibl zãmsg sẽn wat semen kãng pʋgẽ wã pʋgẽ, tɩ b ledg tõnd zĩigẽ n yɩ roagdbã, tɩ tõnd yɩ wa b kamba. B nin-yend na n yɩɩ wa ba t’a to wã yɩ ma, tɩ b naag taab n vaees sɛbã pʋsẽ n bao sagls b sẽn kõt saoog nins lekoll dãmbã sẽn sigindã wɛɛngẽ.” Baasa wãna? Ad kambã ba sẽn yeele: “Tõnd kambã sẽn ledg tõnd n tik Biiblã zug n kõ sagls ninsã ling-d-la hal wʋsgo! B wilga tõnd bũmb ning sẽn kɩt tɩ sao-kãens kẽngr pa sõma wã neere. Sẽn ling tõnd n yɩɩd yaa tɩ b pʋd n wilga reem a taab b sẽn tõe n viig saoogã kẽngr n deeme. Woto fãa kɩtame tɩ d bãng b tagsg la b sẽn tʋll bũmb ninsã me sõma wʋsgo.” Yaa sɩd tɩ yɩl n tõog n zãmsd Biiblã ne f zakã rãmb tɩ zemsd ne b zu-loeesã wakat fãa yaa toogo. Bala baooda modgr la yam. La a nafa wã yɩɩda a yaamsã wʋsgo.—Yelbũna 23:15.
B kɩtdame tɩ laafɩ be b zakã pʋgẽ
13, 14. a) Wãn-wãn la roagdb tõe n kɩt tɩ laafɩ zĩnd b zakã pʋgẽ? b) Roagd sã n sak n deeg a kongre, bõe n na n maane?
13 Sebg sã n pa tiis tãos peemde, tõe n yõga bũmb ning a sẽn tees n tão wã. Woto me, roagdbã sã n modg tɩ zakã neb vɩ ne taab laafɩ tɩ tiisg kaẽ, b na n tõog n sõnga b kambã tɩ b nong a Zeova. A Zak gʋlsame tɩ “neb nins sẽn baood laafɩ wã bʋta tɩrlem biis ne laafɩ.” (Zak 3:18) Wãn to la roagdb tõe n kɩt tɩ b zakã neb vɩ ne taab laafɩ? Raoã ne a pagã segd n mao n wʋmda taab sõma. Bãmb b yiibã sã n nong taab la b waoogd taaba, b na n tõog n sõnga b kambã tɩ b nong taab la b waoogd taaba, la b nong a Zeova me. (Galat dãmba 6:7; Efɛɛz rãmba 5:33) Nonglem la waoogr sẽn beẽ fãa, laafɩ bee be. Woto yĩnga, zak pʋgẽ, raoã ne a pagã sã n wʋmd taab sõma-sõma, b na n tõogd n welgda zakã zu-loeese.
14 Rũndã-rũndã, yikãadem sẽn pa tar zu-loees sẽn kaeyã yĩnga, yaa vẽeneg tɩ zak me kae n ka zu-loees ye. Wakat ninga, roagdbã manesem ne b kambã pʋgẽ, b tõe n wa tudg n maana bũmb tɩ pa zems ne vʋʋsem sõngã biis ye. (Galat dãmba 5:22, 23) La roagdbã sã n tudgi, b segd n maana wãna? Rẽ yĩnga b sã n sak n deeg tɩ b kongame, na n kɩtame tɩ b biigã pa waoogd-b wa pĩndã bɩ? Bɩ d ges tʋm-tʋmd a Poll makrã. A sẽn sõng neb wʋsg tɩ b lebg tẽedbã yĩnga, a ra yaa wa b ba. (1 Korẽnt dãmba 4:15) La a Poll pelg a pʋg n sak n deeg t’a kongdame. (Rom dãmba 7:21-25) La ne rẽ fãa, a sik-m-mengã la a pʋ-peelmã yĩng kɩtame tɩ d maneg n nong-a la d waoogd-a. Baa ne a Poll sẽn da yaa pãn-komsem soabã, a gʋlsa Korẽnt tigingã nebã n yeel-b woto: “Bɩ yãmb yɩ mam togs-n-taas wa mam me sẽn yaa Kirist togs-n-taagã.” (1 Korẽnt dãmba 11:1) Yãmb me sã n sakd n deegd y kongre, na n kɩtame tɩ y kambã bãng tɩ yãmb me yaa koangd wa bãmba, la rẽ pa na n kɩt tɩ b paoog-y ye.
15, 16. Bõe yĩng tɩ roagdbã segd n sõng b kambã tɩ b nong tigingã neba, la wãn to la b tõe n maan dẽ?
15 Bõe la roagdbã leb n tõe n maan zakã pʋgẽ n tõog n sõng b kambã tɩ b nong a Zeova? Tʋm-tʋmd a Zã yeela woto: “Ned sã n yetẽ t’a nonga Wẽnnaam n yaool n kis a ba-biiga, yẽ yaa ziri-yagda. Tɩ bõe, ned sã n ka nong a ba-biiga a sẽn yãta, a na n yɩɩ wãn n nong Wẽnnaam a sẽn ka yãtã?” (1 Zã 4:20, 21) Woto yĩnga, y sã n sõngd y kambã tɩ b nong b tẽed-n-taasã, y wilgd-b lame tɩ Wẽnnaam nonglem baoodame me tɩ b nong b taabã. Rẽnd yɩta sõma tɩ roagdbã sok b mens woto: ‘Rẽ yĩnga mam goama pʋgẽ, m nong n pẽgda tigingã neb bɩ, bɩ m wae n wɩt-b lame?’ Wãn to la y tõe n bãng y sokrã leoore? Kelgd-y y kambã sẽn gomd tigissã la tigingã neb yell to-to wã. Tõe tɩ y wa wʋm b sẽn gomd goam sẽn yi yãmb mengã noorẽ.
16 Wãn-wãn la roagdbã tõe n maan n sõng b kambã tɩ b nong b tẽed-n-taasã? A Pɩɛɛr sẽn yaa kom-bɩɩs a yiib ba wã yeela woto: “Hal tõnd kom-dibli wã sẽn wa n nan paoodẽ, tõnd da nong n boonda saam-biis kẽer tẽeb sẽn bɩ tɩ b wat n dɩt ne-d yiri, la d sõsd ne taaba, tɩ woto fãa ra noom-d wʋsgo. Tõnd kom-dibli wã bɩɩ neb sẽn nong a Zeova sʋka, tɩ kɩt tɩ rũndã-rũndã, b miẽ tɩ Wẽnnaam daabã maaneg kõta ned sũ-noogo.” A Dennis me sẽn yaa kom-pugli a nu ba wã yeela woto: “Tõnd da sõnga d kom-pugli wã tɩ b yõg zood ne tigingã so-pakdb nins sẽn kaoos so-pakrã pʋgẽ wã. D sã n da mi n tõe me, d ra nong n deegda kaagr yel-gɛtbã ne b pagbã sãando.” Rẽ yĩnga, yãmb me tõe n tagsame n ges y sẽn tõe n maan to-to n sõng y kambã tɩ b nong tigingã neb wa y zakã neb bɩ?—Mark 10:29, 30.
Bee ne biigã me
17. Bõe la kambã segd n wa yãke?
17 D lebg n tẽeg makr ning d sẽn da rɩk ne tãoosã. Baa tãoosã sã n mi tãp tãoog sõma, bũmb sã n tiis peemdã wall peemdã sã n golme, a tõeeme n pa yõg bũmbã ye. Biigã sã n tar tags-kɛga, a yaa wa peemd sẽn golme. La roagdbã sɩd na n maana b sẽn tõe fãa n dems-a. La rẽ fãa poore, yaa biigã n na n wa yãk a sã n na n basame tɩ dũniyã kɩt t’a yɩ wa peemd sẽn golme, wall a sã n na n sakame t’a Zeova ‘rems a sorã’ tɩ yɩ tɩrga.—Yelbũna 3:5, 6; Rom dãmba 12:2.
18. Bõe la biig yam-yãkr tõe n maane?
18 Yaa sɩd tɩ roagdbã segd n modg n wuba b kambã ‘ne Zusoaba sagls la a zãmsgo,’ la biig fãa sẽn na n wa baas n yɩ ned ning buud a bɩʋʋng zugẽ wã be ne-a. (Efɛɛz rãmba 6:4) Woto yĩng bɩ kambã sok b mens woto: ‘Rẽ yĩnga mam na n saka m doagdbã sõngrã bɩ?’ Y sã n sake, y vɩɩmã sɩd na n yɩɩ sõma. Y na n nooga y roagdbã sũur hal wʋsgo. La sẽn yɩɩd fãa, y na n nooga a Zeova sũuri.—Yelbũna 27:11.
[Tẽngr note]
^ sull 11 Yaa a Zeova Kaset rãmbã n yiis seb-kãngã.
Y tẽrame bɩ?
• Wãn to la roagdbã tõe n kõ b kambã mak-sõng pʋʋsgã la Biiblã zãmsgã wɛɛngẽ?
• Wãn to la roagdbã tõe n kɩt tɩ laafɩ zĩnd b zakã pʋgẽ?
• Bõe la kambã segd n wa yãke, la bõe la rẽ tõe n maane?
[Zãmsgã sogsgã]
[Foto, seb-neng 30]
Yãmb zãmsda Biiblã wakat fãa n kõt y kambã mak-sõng bɩ?
[Foto, seb-neng 31]
Zak neb sã n noom ne taaba, sũ-noog zĩndedame