D sẽn tõe n vɩɩmd Wẽnnaam yĩng to-to rũndã-rũndã
D sẽn tõe n vɩɩmd Wẽnnaam yĩng to-to rũndã-rũndã
“[Kirist] kii nebã fãa yĩnga, tɩ neb nins sẽn vɩ wã kõn vɩ b mens yĩng yɛs ye.”—2 KORẼNT DÃMBA 5:15.
1. Togs-y bũmb misioneer sẽn vɩɩmd a tʋʋmdã pʋgẽ.
AFIRIK tẽng a ye misioneer yeela woto: “Afirik tẽn-kãng rãmb ne taab zabrã poore, tõnd mobillã n yɩ pipi mobill sẽn pa sodaas mobilli, n kẽ a tẽn-bil a ye sẽn zãr ne galʋ-tẽngã. Tiging sẽn paood n da be beenẽ tɩ d ra segd n ges saam-biisã yelle, la d ra pa ye tõe n paam b kibar ye. Tõnd zãa rɩɩbo, fut la sɛb n na n tɩ kõ-ba, la d zãa Les Témoins de Jéhovah—Un nom, une organisation * video wã me. D yiis-a-la zãn-kãseng tẽngre. Yaa tẽngã rãmb deem zĩiga. Neb nins sẽn nong koɛɛgã waa wʋsg n na n ges filmã, tɩ yɩ tɩlae tɩ d yiis-a naoor a yiibu. Naoor a yiibã fãa, d paama neb wʋsg sẽn sak n na n zãms Biiblã. Vẽenega, modgr ning d sẽn maana talla barka.”
2. a) Bõe yĩng tɩ kiris-nebã rat n maan Wẽnnaam daabã b vɩɩmã tõre? b) Sogs-bʋs la d na n leoke?
2 Bõe yĩng tɩ misioneer kãngã ne a tũud-n-taasã sak n tog b sorã sẽn yɩ toogã? Yaa sẽn na yɩl n wilg Wẽnnaam b mi-beoogo, a sẽn sak n kõ a Zezi Kirist tɩ yɩ rondã yĩnga. Rẽ kɩtame tɩ b rɩk b mens n kõ Wẽnde, n pʋlem tɩ b na n maan a raabã. Wa bãmba, neb nins fãa sẽn dɩk b mens n kõ Wẽnnaam n lebg kiris-nebã pa ye rat n ‘vɩɩmd b mens yĩng yɛs ye.’ B tʋll n maana b sẽn tõe fãa “koe-noogã yĩnga.” (2 Korẽnt dãmba 5:15; 1 Korẽnt dãmba 9:23) B miime tɩ dũni kãngã saab poore, ligd la yʋʋr pa na n ye tall yõod ye. Rẽ n so tɩ b rat n dɩk b keelmã n maan Wẽnnaam daabã b vɩɩmã tõre. (Koɛɛg Soaba 12:1) Wãn to la d tõe n dɩk d keelmã n maan Wẽnnaam daabã b vɩɩmã tõre? Yɛ la d tõe n paam sagls la raood n tõog n maan boto? La tʋʋm bʋs n be d sẽn tõe n tʋme?
D sɩngda bilf-bilfu
3. Sẽn na yɩl n wilg tɩ d rat n maana Wẽnnaam daabã, d sɩngda wãn-wãna?
3 Kiris-neb hakɩkã miime tɩ yaa b vɩɩmã tõr la b segd n maan Wẽnnaam daabã. Sẽn na yɩl n tõog n maan dẽ, b rengd n kẽe Wẽnnaam tʋʋmdã lekoll la b karemd Biiblã daar fãa. Sẽn pʋgde, b wat n sɩnga koɛɛgã moonego, tɩ rẽ poor bɩ b reeg lisgu. D sã n wa maood n na n maan woto fãa, d tagsda bũmb tʋm-tʋmd a Poll sẽn yeel yelle. A yeela woto: “Wɩng ne bõn-kãense, la f maan ne f sũur fãa, tɩ nebã fãa yã tɩ fo bɩtame.” (1 Tɩmote 4:15) D sẽn tʋll n kẽng taoorã yaa tɩ d rat n maana Wẽnnaam daabã ne d sũur fãa. Pa sẽn na yɩl n bao yʋʋr ye. D sã n maood n maand boto, yaa kaset sẽn wilgd tɩ d basdame tɩ Wẽnnaam wilgd-d sore, la yaa yẽ bal n sɩd tõe n wilg tõnd sor sõma n yɩɩda.—Yɩɩl Sõamyã 32:8.
4. Wãn to la d tõe n tõog d rabeemã?
4 La d yam sã n yooda, pa rẽ bɩ d mengã yell sã n pak-d tɩ looge, tõe n gɩdga d bɩʋʋngo. (Koɛɛg Soaba 11:4) Woto yĩnga, d sã n dat n tʋm Wẽnnaam tʋʋmdã n sõng nebã tɩ d sũur yɩ noogo, d segd n deng n basa rabeem la sãmbse. Ges-y saam-biig a ye makre. A ra rat n tɩ sõnga bu-zẽng neb tiginga. La a yam da yoodame t’a ra sokd a meng woto: “Rẽ yĩnga m na n tõog n zĩnda ne-ba? D zĩid-n-taarã na n yɩ-m-la noog sɩda? Rẽ yĩnga b na n nong-m lame?” Saam-biigã paasa woto: “Mam wa n bãngame tɩ m segd n basa m mengã yell tagsg la m tags saam-biisã yelle. Mam yãka yam n bas m sãmbsã la m bao m sẽn tõe n maan bũmb ning n sõng-ba. M pʋʋsa rẽ yĩng la m kẽnge. Rũndã-rũndã, m sũur nooma hal wʋsg ne m tʋʋmdã.” (Rom dãmba 4:20) D sã n modgd n tʋmd Wẽnnaam tʋʋmdã n sõngd d taabã n pa baood d meng nafre, d sũur sɩd na n yɩɩ noog wʋsgo.
5. Bõe yĩng tɩ d sã n dat n maan Wẽnnaam daabã neere, d segd n deng n segl d menga? Rɩk-y makre.
5 Sẽn na yɩl n tõog n tʋm Wẽnnaam tʋʋmdã neere, d segd n deng n segla d meng sõma me. D gũusdame n pa rɩt sam sẽn tõe n wa kɩt tɩ lebg tɩlae tɩ d rɩk d sẽkã fãa n tʋm n paam n yao ye. Sã n pa rẽ d wat n pa ye so d meng n tõe n tʋm Wẽnnaam tʋʋmdã wa d sẽn da ratã ye. Biiblã tẽegd-d lame tɩ f “sã n peng bũmb ned nengẽ, fo lebga a yamba.” (Yelbũna 22:7) D sã n teeg a Zeova zãng-zãng n lʋɩɩs a raabã taoore, na n sõng-d lame. Kelg-y saam-biig a ye makre. A vɩɩ ne a ma n paas a kẽem ne a yao sẽn yaa kom-pugli. Tẽng ning b sẽn beẽ wã, rotã luaas ligd yaa toogo, tɩ tʋʋm-tɩrg paoong me pa nana ye. La baa ne sẽn pa b fãa n tʋmdã, b sẽn kẽgsd b ligdã sõma la b naagd taab n maand zakã depãens rãmbã, bũmb pa paoogd-b ye. Ad saam-biigã sẽn yeele: “Sasa ninga, pa-d fãa n paamd yaood ye. La tõnd fãa ket n yaa so-pakdba. Sẽn paase, d tõogd n geta d ma wã yell neere. D pʋʋsd-a-la bark wʋsgo, a sẽn pa rat tɩ d bas so-pakrã la tʋʋm nins d sẽn tar tigingã pʋgẽ n bao tʋʋm-bɛd n tõog n ges-a yell tɩ yɩɩg woto wã.”—2 Korẽnt dãmba 12:14; Hebre dãmba 13:5.
6. Mak-bʋg n wilgd d sẽn tõe n maan to-to n tõog n lʋɩɩs Wẽnnaam daabã pidsg taoore?
6 Y sã n dɩkda y sẽkã fãa n baood ligd wall y maand yɛl a taaba, sẽn na yɩl n lʋɩɩs Wẽnnaam daabã taoore, yaa tɩlae tɩ y toeem y yɛlã kẽere. La naoor wʋsgo, y pa na n tõog n toeem-b zĩig pʋgẽ ye. Sẽn paase, y sã n mak vugr n pa tõoge, y pa segd n tags tɩ y pa na n tol n tõog ye. Ad saam-biig a ye makre. Ze-video rãmbã reem n da yaa a zu-loɛɛga, hal tɩ sɩd ra rɩkd a sẽkã wʋsgo. Yaa a bi-bɩɩlem wẽnd la a zãms Biiblã, la a wa n basame tɩ ze-video rãmbã reem soog-a. Daar a yembre, a zĩnd n tagsame n sok a meng woto: ‘Yaa bõe n tar maam? Mam yasa ne yʋʋm 30 ne zaka, la m pa tol n maand bũmb sẽn tar yõod m vɩɩmã pʋgẽ ye!’ Rẽ poore, a lebg n sɩnga Biiblã zãmsgo, la a sak t’a tigingã kãsem dãmb sõng-a. Baa ne sẽn yɩ bilf-bilf la a tõog n toeemã, a kell n maoome. A pʋʋsa wʋsg la a paam saam-biis a taabã sõngre, tɩ kɩt t’a wa tõog n bas ze-video rãmbã fasɩ. (Luk 11:9) Rũndã-rũndã, a yaa kãsemb sõngd hali t’a sũur noome.
D sak n deeg tɩ d pãngã tara koaka
7. Bõe yĩng tɩ d segd n tʋmd Wẽnnaam tʋʋmã n zemsd d pãnga?
7 Yaa sɩd tɩ d segd n tʋma Wẽnnaam tʋʋmdã ne d sũy fãa, n da maan laas-laas wall ne kʋɩɩng ye. (Hebre dãmba 6:11, 12) La baasg zãnga, a Zeova pa tol n dat tɩ d tʋm a tʋʋmdã n koms ye. D sã n sak n deeg tɩ d pa tõe n teeg d pãng n tʋm tʋʋm kãense, waoogda Wẽnnaam la wilgdẽ me tɩ d miime tɩ d tõogã tara koaka. (1 Pɩɛɛr 4:11) A Zeova pʋlmame t’a na n kõ-d-la pãng ning d sẽn datã tɩ d maan a raabã, la d pa segd n maan tɩ yɩɩgd d sẽn tõeyã, rat n yet tɩ d pa segd n bao n maan tɩ zʋʋg bũmb nins Wẽnnaam sẽn kosã ye. (2 Korẽnt dãmba 4:7) Sẽn na yɩl tɩ Wẽnnaam daabã maaneg kell n tall yamleoog ne-do, yɩta sõma tɩ d bao n bãng d tõogã tɛka.
8. Bõe n paam saam-bi-poak sẽn bao n na n tʋm a nug-tʋʋmd ne a Zeova tʋʋmdã fãa wʋsgo, la wãn to la a toeem a yɛlã tɩ sõng-a?
8 Ges-y saam-bi-poak sẽn vɩ Aazi soolmẽ wã makre. A ra tara nug-tʋʋmd sẽn kõt-a yaams wʋsgo, la a yaa so-pakd me. A maana woto yʋʋm a yiibu. Ad a sẽn yeele: “Mam da tʋll n tʋma m nug-tʋʋmdã wʋsg la m tʋm a Zeova tʋʋmdã me sõma. Rẽ kɩtame tɩ yʋng fãa, m da gõe lɛɛr a nu bala. La m yam wa n yii a Zeova tʋʋmdã, t’a raabã maaneg pa ye noom-m ye.” Pʋg-kãngã sẽn da rat n kell n maan a Zeova raabã ‘ne a sũur fãa, a sɩɩgã fãa, a yamã fãa la ne a pãngã fãa’ wã, a baoa tʋʋmd a to sẽn pa yaad-a wʋsgo. (Mark 12:30) Ad a sẽn yeel rẽ poore: “Baa ne m doagdbã sẽn tall-m pẽdgr n dat tɩ m bao tʋʋmd sẽn yaood wʋsgã, mam maoome n lʋɩɩs Wẽnnaam daabã taoore. Mam ket n paamda ligd sẽn sekd bũmb nins sẽn yaa tɩlae ne-ma paoongo, wala fut la teed a taaba. Sẽn paase, m sẽn paamd n vʋʋsdẽ tɩ sekd-ma, m sũ-noogã paasame. M tara sũ-noog Wẽnnaam tʋʋmdã pʋgẽ la m zoodã me ne-a paasame. La woto fãa, yaa m sẽn pa ye rɩkd sẽk wʋsg n tʋmd ne dũniyã nebã yĩnga.”—Koɛɛg Soaba 4:6; Matɩe 6:24, 28-30.
9. Tõnd sẽn modgd ne koɛɛgã moonegã tõe n kɩtame tɩ nebã maan bõe?
9 Pa nebã fãa n tõe n yɩ so-pakdb ye. Y sã n kʋʋlame bɩ y sã n ka laafɩ, wall yɛl a taab sã n kɩt tɩ y pa tõe n tʋm wʋsgo, bɩ y tẽeg t’a Zeova nanda y kɩs-sɩdã la y sẽn maand y sẽn tõe tɛk a yʋʋrã yĩnga hal wʋsgo. (Luk 21:2, 3) Koe-moonegã wɛɛngẽ, d bãng tɩ d pa segd n tags tɩ modgr nins d sẽn maandã yõod pa waoog ye. Bala baa d pa tõog tɩ yɩ wa d sẽn da ratã, tõe n maana nebã bũmbu. D rɩk makr wa d sẽn na n moon zags a wãn n pa tol n yã ned t’a kelg-do, wall neb kẽer pʋd n pa sak tɩ d kẽ b zagsẽ meng ye. D loogrã poore, nin-kãens tõe n yõd n sõs n goma d yelle. Tõnd miime tɩ pa neb nins fãa d sẽn moondã n na n sak koɛɛgã ye. La kẽer na n sakame. (Matɩe 13:19-23) Sãnda nengẽ, tõe tɩ yaa yel-zẽng sã n wa maan dũniyã zug wall b mensã yɛl sã n wa toeem la b na n sake. La sẽn yaa a soab fãa, d sã n moond koɛɛgã wa d sẽn tõe tɛka, yaa Wẽnnaam tʋʋmd la d tʋmda. D yaa Wẽnnaam “tʋmd-n-taase.”—1 Korẽnt dãmba 3:9.
10. Tʋʋm bʋs la tigingã neb fãa tõe n tʋme?
10 Sẽn paase, d fãa tõe n sõnga d zagsã neb la d tẽed-n-taasã. (Galat dãmba 6:10) Mak-sõng ning d sẽn kõt d taabã tõe n naf-b-la wʋsgo. (Koɛɛg Soaba 11:1, 6) Tigimsã kãsem dãmb la kãsemb sõngdbã sã n tʋmd b tʋʋmã neere, kɩtdame tɩ zood ning saam-biisã sẽn tar ne Wẽndã pãng paasdẽ, tɩ Wẽnnaam tʋʋmdã me kẽngd taoore. B tẽegd-d-la Biiblã pʋgẽ tɩ d sã n ‘maand Zusoabã tʋʋmd wʋsgo,’ d modgrã “ka na n yɩ zaalem ye.”—1 Korẽnt dãmba 15:58.
D yãk tʋʋmd Wẽnnaam tʋʋmã sʋk n tʋm d vɩɩmã tõre
11. Y tigimsã pʋsẽ tʋʋmã toor sẽn ka be, tʋʋm bʋs me la y tõe n tʋme?
11 Tõnd sẽn yaa kiris-nebã, d nonga vɩɩmã, la d rat n waoogd Wẽnnaam bũmb nins d sẽn maandã fãa pʋgẽ me. (1 Korẽnt dãmba 10:31) D sã n moond koɛɛgã sõma la d zãmsd nebã sẽn na yɩl tɩ b sak bũmb nins a Zezi sẽn togsã, d na n yãa tʋʋm a taab me sẽn kõt sũ-noog d sẽn tõe n tʋm Wẽnnaam daabã pidsg yĩnga. (Matɩe 24:14; 28:19, 20) Wala makre, tʋʋm nins d sẽn tõe n tʋm d tigimsã pʋsẽ wã toor sẽn ka be, d tõe n paam n tɩ sõnga tigims a taab d tẽngẽ wã wall d kẽng tẽn-zẽng menga. Kãsem dãmb la kãsemb sõngdb nins sẽn yaa ra-kõapã tõe n paam n kẽnga Wẽnnaam tʋʋmdã zãmsg lekolle. Rẽ poore, b tõe n tʋm-b lame tɩ b tɩ sõng b tẽnsã pʋsẽ wall tẽn-zẽms tigims sẽn dat sõngre. Sẽn kẽ-b kãadmã me tõe n bao n kẽnga Gileaad lekollã n lebg misioneer dãmb n kẽng tẽn-zẽmse. Sẽn paase, b ket n data yamleoog tʋm-tʋmdb wʋsg Betɛll dãmbẽ wã, la neb sẽn na n sõngd n metẽ la b get Rĩungã Rot la filiyall dãmbã manesg yelle.
12, 13. a) Wãn to la y tõe n bãng n yãk tʋʋmd y sẽn dat n tʋme? b) Rɩk-y makr n wilg bãngr ning y sẽn na n paamã sẽn tõe n naf-y zĩis a taab to-to.
12 Yãmb yaa a Zeova Kaset soab la y pa mi tʋʋmd ning y sẽn na n yãk a tʋʋmã sʋk n tʋm bɩ? Sã n yaa woto bɩ y pʋʋs-a n kos a sõngr la y tũ a siglgã saglse. A Zeova na n sõng-y-la ne a vʋʋsem sõngã tɩ y bãng y sẽn tog n maanega. (Nehemi 9:20) Naoor wʋsgo, sẽn yaa tʋʋmd ning fãa la d yãk-yã, tõe n yɩɩ sabab tɩ b wa bobl-d tʋʋmd a to. Sẽn paase, bãngr la minim ning d sẽn paamã tõe n wa naf-d-la zĩis a taab me.
13 Wala makre, seb-kãseng ning b sẽn boond tɩ katrina wã sẽn fug n sãam dot wʋsg Etazĩni wã poore, saam-biig ne a pag sẽn tʋmd ne Rĩungã Rot metb sull sak n tɩ sõnga neb nins sẽn dat sõngrã. Ad saam-biigã sẽn yeele: “Tõnd sẽn dɩk bãngr ning d sẽn tʋm ne Rĩungã Rot metb sull n paamã n sõng d saam-biisã, kõ-d-la sũ-noog wʋsgo. Sẽn paam-b sõngrã sẽn pʋʋs tõnd bark to-to wã yɩ-d-la noog la keng d raoodo. Sul-zẽms wʋsg sẽn wa be n na n sõng n me rot pa tõog n tʋm sõma wa tõnd ye. A Zeova Kaset rãmbã sẽn maneg la b lebs n me zags sõor yika sẽn yɩɩd bãmb 5300. Rĩungã Rot wʋsg me la b manegẽ la b lebs n me kẽere. Nebã yãta tõnd tʋʋmã n pẽgd hal wʋsgo, tɩ kɩt tɩ b sakd n kelgd Rĩungã koɛɛg neer masã.”
14. Y sã n tʋll n yɩ so-pakda, bõe la y tõe n maane?
14 Y tõe n bao n yɩɩ so-pakd y vɩɩmã tõr bɩ? Y sã n maan boto, bark na sek-yã. Y yɛlã sã n kɩt tɩ y pa tõe, y sã n toeem-ba, tõe tɩ y tõoge. A Nehemi sẽn wa n dat n tog sor n tɩ tʋm tʋʋm-kãsengã, a pʋʋsa Wẽnnaam woto: “M Zusoaba, . . . kõ-y y tʋm-tʋmdã tõogre.” (Nehemi 1:11) Yãmb me pʋʋse. Rẽ poor bɩ y teeg sẽn ‘wʋmd-a pʋʋsgã’ n maan bũmb sẽn wilgd tɩ y sɩd tʋlla y sẽn kosã. (Yɩɩl Sõamyã 65:3) Y sã n dat t’a Zeova sõng-y tɩ y tõog n tʋm a tʋʋmde, y segd n yãka tʋʋmdã, la y modgd n dat n tʋm-a. Y sã n yãka yam n na n tʋm wakat fãa so-pakrã, bɩ y baood minim la bãngr ning sẽn na n sõng-yã. Woto, y wat n paama tʋʋmdã minim sõma hal tɩ kõ-y sũ-noog wʋsgo.
Vɩɩm sẽn sɩd tar barka
15. a) D sã n sõsd ne sẽn kaoos-b Wẽnnaam tʋʋmdã pʋgẽ wã la d karemd b kẽer kibaya, wãn to la na n naf-do? b) Wilg-y tẽed-n-taag vɩɩm kibar y sẽn karem tɩ keng y raoodo.
15 Y sã n yãk tʋʋmd Wẽnnaam tʋʋmã sʋk n na n tʋme, bark bʋs la y na n paame? Sõs-y ne saam-biis nins sẽn kaoos a Zeova tʋʋmdã pʋgẽ wã, sẽn yɩɩd fãa, sẽn yɩ-b so-pakdb n kaoos yʋʋmã tɩ y na bãnge. Nin-kãensã sɩd paamda bark wʋsg b vɩɩmã pʋgẽ! (Yelbũna 10:22) B na n yeel-y lame t’a Zeova ning-b-la bark tɩ yɩɩg b sẽn da tẽedã, la tɩ baa toog wakat menga, a pa tol n bas-b ye. (Filip rãmba 4:11-13) Yʋʋmd 1955 soabã tɛk n tɩ ta yʋʋmd 1961 wã, Gũusg Gasgã talla sõss sẽn pʋg taab tɩ b gom-zugã yaa: “Comment je poursuis le but de ma vie.” Sõs-kãens gomda so-pakdbã vɩɩm yelle. Rẽ tɛka, b buud sõor sẽn waoog la b kell n yiis d sɛbã pʋsẽ. B fãa wilgda yẽesem la sũ-noog ning so-pakdbã sẽn tarã, hal tɩ d sã n karemd-b bɩ d tagsd Tʋʋm sebrã sẽn be Biiblã pʋgẽ wã kibay kẽer yelle. D sã n karemd saam-bi-kãensã kibayã sẽn kengd raoodã, d na n tʋlg n dɩka b togs-n-taare.
16. Bõe n kɩtd tɩ kiris-ned vɩɩm tall yõod la kõ-a sũ-noogo?
16 Ad misioneer ning yell d sẽn gom sõsgã sɩngrẽ wã sẽn yeele: “Mam sẽn da wa n be Afirikã, m da mi n segda kom-bɩɩs sẽn gilgd tẽngã n baood tʋʋm sẽn na kɩt tɩ b vɩɩmã tall yõodo. La b wʋsg pa tol n yã ye. Tõnd me ra bee tẽn-kãng pʋgẽ, la d sẽn da moond Rĩungã koe-noog n maand Wẽnnaam daabã wakat fãa wã, kɩtame tɩ d vɩɩmã ra tar yõodo, tɩ d sũy noome. D bãnga vẽeneg tɩ kũun sɩd kõta sũ-noog n yɩɩd reegre.”—Tʋʋma 20:35.
17. Bõe yĩng tɩ d segd n maand Wẽnnaam daabã?
17 Bõe la yãmb yẽ maanda? Y sã n pa yãk tʋʋmd Wẽnnaam tʋʋmã sʋk n na n tʋme, tʋʋm a taab n na n dɩ y sẽkã fãa. Ra pʋg-y bũmb nins a Sʋɩtãan dũniyã sẽn tar n belgd nebã n sãam y vɩɩmã zaalem ye. Ka la bilfu, ‘to-kãsengã’ sã n sɩnge, d arzɛk bɩ d naam pa na n tall yõod ye. Yaa zood ning d sẽn tar ne a Zeova wã bal n na n fãag-do. Ad wakat kãnga, d sũy sɩd na n yɩɩ noogo, d sẽn tʋm Wẽnnaam tʋʋmdã wʋsg n sõng nebã!—Matɩe 24:21; Wilgri 7:14, 15.
[Tẽngr note]
^ sull 1 Yaa a Zeova Kaset rãmbã n yiis video kãngã.
Y tõe n leokame bɩ?
• Wãn to la a Zeova get d sẽn tʋmd a tʋʋmdã to-to wã?
• D sã n tʋmdẽ tɩ zemsd d pãngã, wãn to la tõe n sõng-d tɩ d tʋm Wẽnnaam tʋʋmdã n sõng nebã?
• Wẽnnaam tʋʋm bʋs la d tõe n tʋme?
• Bõe n tõe n kɩt tɩ d vɩɩmã sɩd tall yõod wʋsgo?
[Zãmsgã sogsgã]
[Foto rãmba, seb-neng 25]
Sẽn na yɩl t’a Zeova tʋʋmdã kell n tall yamleoogo, d segd n maanda bũmbã fãa n zemsd d tõogo
[Foto rãmba, seb-neng 26]
Wẽnnaam tʋʋmdã bugs waoogame