‘Y Ba wã yaa nimbãan-zoɛta’
‘Y Ba wã yaa nimbãan-zoɛta’
“Yɩ-y nimbãan-zoetba, wala Ba wã sẽn ya nimbãan-zoetã.”—LUK 6:36, Sebr Sõngo.
1, 2. Wãn to la bũmb ning a Zezi sẽn yeel Fariziẽ rãmbã ne a karen-biisã wilgd tɩ nimbãan-zoeerã yaa sõma hal wʋsgo?
TÕOG ning Wẽnnaam sẽn da kɩt t’a Moiiz taas Israɛll nebã ra tara noy toor-toor sõor sẽn kolg 600. Baa nin-buiidã sẽn da tog n tũ Tõogã noy fãa wã, Wẽnnaam da baoodame me tɩ b yɩ nimbãan-zoɛtba. Bũmb ning a Zezi sẽn yeel Fariziẽ rãmbã sẽn da pa zoet nebã nimbãanegã wilgda rẽ vẽenega. Naoor a yiib fãa, a zab-b lame n yeel-b tɩ Wẽnnaam wilgame t’a “sũur nooma ne nimbãan-zoeere, la ka ne maand ye.” (Matɩe 9:10-13; 12:1-7; Oze 6:6) A Zezi tẽng zug tʋʋmdã baasg sẽnes me, a yeela woto: “Gʋlsdbã ne Fariziẽ rãmbã, zãmb dãmbã, yãmb na paam toogo. Tɩ bõe, yãmb yãkda piig pʋɩɩr ne ment la ne anet la ne cumin, la yãmb basda bũmb nins sẽn yaa neer n yɩɩd tõogã pʋgẽ sẽn yaa tɩrlem la nimbãan-zoeere, la sɩda.”—Matɩe 23:23.
2 A Zezi wilga vẽeneg tɩ d segd n modg n yɩɩ nimbãan-zoɛtba. A yeela a karen-biisã woto: “Yɩ-y nimbãan-zoɛtba, wala Ba wã sẽn ya nimbãan-zoetã.” (Luk 6:36, Sebr Sõngo) La sẽn na yɩl n yɩ nimbãan-zoɛtb wa Wẽnnaam, d segd n deng n bao n bãnga nimbãan-zoeer hakɩkã sẽn yaa a soaba. (Efɛɛz rãmba 5:1) Sẽn paase, d sã n bãng bũmb ning sẽn kɩt tɩ d segd n yɩ nimbãan-zoɛtbã, na n sõng-d lame tɩ d modg n yɩ nimbãan-zoɛtb hakɩka.
D zoe sẽn dat-b sõngrã nimbãanega
3. Bõe yĩng tɩ yaa a Zeova n tõe n sõng-d tɩ d bãng nimbãan-zoeer hakɩkã sẽn yaa a soaba?
3 Yɩɩl gʋlsdã yɩɩla woto: “Zusoabã yaa nimbãan-zoɛta, la sũ-bʋgsem soaba. Bãmb sũur ka puugd tao-tao ye, la b tara nonglem wʋsgo. Zusoaba maanda fãa neere la bãmb nimbãan-zoeera tata bãmb tʋʋma fãa.” (Yɩɩl Sõamyã 145:8, 9) A Zeova yaa “nimbãan-zoeer Ba la belsg fãa Wẽnnaam.” (2 Korẽnt dãmba 1:3) Nimbãan-zoɛt yaa ned sẽn kʋmd sẽn dat-b sõngrã. Wẽnnaam yaa nimbãan-zoɛt meng-menga. A mak-sõngã la sagls nins a sẽn kõ-d nimbãan-zoeerã wɛɛngẽ wã tõe n sõng-d lame tɩ d bãng nimbãan-zoeer hakɩkã sẽn yaa a soaba.
4. Bõe la Ezai 49:15 wã wilgd tõnd nimbãan-zoeerã wɛɛngẽ?
4 Wala makre, Ezai 49:15 pʋgẽ wã, a Zeova yeela woto: “Pag tõe n yĩma biig ninga yẽ sẽn yẽsemdã yell bɩ? A tõeeme n ka zoe biig ninga yẽ sẽn doga nimbãaneg bɩ?” A Zeova zoeta nebã nimbãaneg wa bi-pɛɛlg ma sẽn zoet a biigã nimbãaneg to-to n pa tol n dat tɩ bũmb maan-a wã. Wala kom bɩ bũmb a to sã n tar bi-pɛɛlga, a nimbãaneg yõkda a ma wã tɩ kɩt t’a ges a yelle. A Zeova me yaa woto. Nebã nimbãaneg sẽn tar-a wã yĩng kɩtame t’a sõngd-ba.
5. Wãn to la a Zeova wilg Israɛll nebã t’a ‘nimbãan-zoeerã yaa wʋsgo’?
5 Yaa sɩd tɩ f sã n yã ned sẽn dat sõngr t’a nimbãaneg yõk-fo, yaa sõma, la yaa f sã n maan bũmb n sõng-a la sõma n yɩɩda. Ges-y-yã a Zeova manesem sẽn yɩ to-to, a nin-buiidã sẽn da wa n yaa yembs Ezipt sẽn na maan yʋʋm 3500 sẽn loog masã wã. A yeela a Moiiz woto: “Mam yãa m neba sẽn be Ezipta namsgo. La mam wʋma bãmb kelemse tʋʋm soaadba sẽn namsd bãmbã. N-ye, mam mii bãmb toogã. La mam waame n na n fãag bãmb Ezipt neba nusẽ la m yiis bãmb soolem kãng pʋgẽ n tall bãmb n kẽng tẽn-sõng sẽn yaa bedr pʋgẽ. Yaa tẽng sẽn tar bĩisim ne sɩɩd wʋsgo.” (Yikri 3:7, 8) A Zeova sẽn yiis Israɛll nebã Eziptã, yʋʋm 500 dẽ loogr poore, a kɩtame tɩ b tẽeg-b a sẽn maan bũmb ningã. B yeel-b-la woto: “Zusoab a Wẽnnaam yeelame tɩ bãmb yiisa Israɛll neba Ezipte. La bãmb fãaga yãmb ne Ezipt nebã la ne buud a taabã fãa sẽn da namsd yãmbã.” (1 Sãmwɛll 10:18) Israɛll nebã sẽn da kɩɩsd Wẽnnaam noyã yĩnga, b ra nong n namsda wʋsgo. La naoor wʋsgo, a Zeova zoeya b nimbãaneg n sõng-ba. (Bʋkaoodba 2:11-16; 2 Kibaya 36:15) Woto wilgd-d-la Wẽnnaam sẽn sõngd neb nins sẽn be raab pʋgẽ pa rẽ bɩ toog pʋgẽ wall sẽn tar-b zu-loeesã to-to. A Zeova ‘nimbãan-zoeerã yaa wʋsgo.’—Efɛɛz rãmba 2:4.
6. Wãn to la a Zezi wilgẽ t’a yaa nimbãan-zoɛt wa a Ba wã?
6 A Zezi sẽn da wa n be tẽng zugã, a wilgame t’a yaa nimbãan-zoɛt wa a Ba wã bal kɛpɩ. Daar a yembre, zoens a yiib n bõos-a woto: “Zusoaba sẽn yaa a Davɩɩd Biiga, zoe-y tõnd nimbãanega!” B ra kotame t’a maan yel-solemd n puk b ninã. A Zezi manesem yɩɩ wãna? A maana b sẽn kos-a bũmb ningã. La a pa maan dẽ tɩ bala a tara tõog ye. Biiblã wilga a sẽn sakã võor n yeel woto: “A Zezi zoee bãmb nimbãanega, n sɩɩs bãmb nini. La tao-tao bala bãmb nina pukame.” (Matɩe 20:30-34) Nimbãan-zoeer yĩng kɩtame t’a Zezi sãoog zoense, neb zĩn dãmb sẽn da tare, la wãooba. A leb n sãooga kamb sẽn da bẽed hal wʋsgo, tɩ noog b roagdb sũyã.—Matɩe 9:27; 15:22; 17:15; Mark 5:18, 19; Luk 17:12, 13.
7. A Zeova ne a Bi-riblã sõnga tõnd tɩ d bãng bõe nimbãan-zoeerã wɛɛngẽ?
7 A Zeova ne a Zezi sõng-d lame tɩ d bãng tɩ sẽn na yɩl n maan ned nimbãan-zoeere, a soabã nimbãaneg tog n deng n yõk-d lame, tɩ rẽ kɩt tɩ d maan bũmb me n sõng-a. Biiblã pʋgẽ, naoor wʋsgo, b sã n yet tɩ b maana neb nimbãan-zoeere, yaa neb sẽn be raab pʋgẽ tɩ b sõng b rãmb yell la b gomda. La sã n yaa bʋʋd zĩigẽ, wãn to la b tõe n kʋm ned sẽn beeg nimbãanega? Rẽ yĩnga, b tõe n basa wẽng ning bɛɛgdã sẽn maana taal n pa sɩbg-a bɩ?
A Zeova zoeta koangdbã nimbãanega
8, 9. A Davɩɩd ne a Batseba sẽn yo wã, wãn to la Wẽnnaam zoe-b nimbãanega?
8 Pĩnd wẽndẽ Israɛll rĩm a Davɩɩd sẽn da wa n yo ne a Batseba wã, no-rɛɛs a Natã kẽngame n tɩ sagl-a. Kelg-y bũmb ning sẽn maan dẽ poorã. A Davɩɩd teka yam a yel-wẽndã poorẽ n pʋʋs Wẽnnaam woto: “Mam Wẽnnaam, bɩ y zoe mam nimbãanega, yãmb nonglmã yĩnga. A wa sẽn zems yãmb nimbãan-zoeer sẽn yaa kãsengã, bɩ y yẽes mam kɩɩsgã. Pek-y maam n yiis m yel-wẽnda zãnga. Yiis-y mam kongra tɩ m yɩ yɩlemde. Tɩ bõe, mam mii m kɩɩsgã, la mam kongrã bee m taoor wakat fãa. Mam konga ne yãmba, yaa yãmb bala. La mam maana bũmb sẽn yaa wẽng y nifẽ.”—Yɩɩl Sõamyã 51:3-6.
9 A Davɩɩd sũur da sãama wʋsgo. A Zeova kõ-a-la sugr n pa sɩbg yẽ ne a Batseba wa a Moiiz Tõogã sẽn da wilgã ye. Sẽn zems ne Tõogã, a Davɩɩd ne a Batseba fãa ra segda ne kũum. (Tõodo 22:22) Yaa sɩd tɩ b pa põs b yel-wẽndã bi-wẽnsã ye. La b pa kʋ-b ye. (2 Sãmwɛll 12:13) Wẽnnaam nimbãan-zoeerã yĩnga, a kõta yel-wẽn-maand sugri. La baasgo, a pa basd koangd n pa sɩbg-a wa sẽn zems ye.
10. Baa a Zeova sẽn maand koangdbã nimbãan-zoeerã, bõe la d pa segd n maane?
10 “Rao a yembr [a Ãdem] n wa ne yel-wẽnã dũniyã,” la “yel-wẽnã yaood yaa kũum.” Woto yĩnga, ãdem-biisã fãa segda ne kũum. (Rom dãmba 5:12; 6:23) La baa ne rẽ, d sũy yaa noogo, d sẽn mi t’a Zeova sã n na n kao d bʋʋdo, a maand-d-la nimbãan-zoeerã! Baasg zãnga, d pa segd n tags t’a Zeova sẽn yaa nimbãan-zoɛtã yĩnga, d tõe n maana d sẽn dat fãa ye. Tõod 32:4 yeelame t’a “[Zeova] soayã fãa yaa tɩrse.” Baa a Zeova sã n maand nebã nimbãan-zoeere, rẽ pa kɩtd t’a maan sẽn pa tɩrg ye.
11. Wãn to la a Zeova sẽn welg a Davɩɩd ne a Batseba yellã to-to wã wilgẽ t’a sɩd yaa tɩrga?
11 Yaa sugr bal n da tõe n kɩt tɩ b pa kʋ a Davɩɩd ne a Batseba ye. La a Zeova ra pa kõ Israɛll bʋ-kaoodbã sor tɩ b kõ sugr beegr a woto buud poorẽ ye. Sã n da yaa bãmb n da na n welg yellã, ra yaa tɩlae tɩ b tũ Tõogã sẽn wilgã n kʋ koangdbã. La a Zeova sẽn da maan kaool ne a Davɩɩdã yĩnga, a reng n bao n na n gesa a sã n tõe n kõ-a-la a yel-wẽndã sugri. (2 Sãmwɛll 7:12-16) Rẽ n so tɩ Wẽnnaam a Zeova sẽn yaa “dũniyã fãa bʋ-kaooda,” n “feesd nebã sũyã” tʋlg n na n welg yel-kãngã a toore. (Sɩngre 18:25; 1 Kibaya 29:17) Wẽnnaam bal n da tõe n fees a Davɩɩd sũurã sõma n bãng a sã n sɩd ra teka yam n kot sugri, n tõog n yaaf-a.
12 Wãn to la ãdem-biisã sẽn dog ne yel-wẽnã tõe n dɩ Wẽnnaam nimbãan-zoeerã yõodo?
12 A Zeova sẽn zoe tõnd nimbãaneg n maan bũmb ning n na n fãag-d ne kũumã la yel-wẽnã yembdã me wilgdame t’a yaa tɩrlem soaba. Sẽn na yɩl n tõog n kõ ãdem-biisã b yel-wẽnã sugr n pa bars a tɩrlmã, a Zeova rɩka a Bi-ribl a Zezi Kirist n kõ maoong n dole. Ad yaa nimbãan-zoeer sẽn zɩ n tall to la a sẽn maan-dã. (Matɩe 20:28; Rom dãmba 6:22, 23) Sẽn na yɩl n dɩ Wẽnnaam nimbãan-zoeerã yõod n da ki d yel-wẽnã yĩnga, d segd n ‘tẽe Biigã.’—Zã 3:16, 36.
Wẽnnaam yaa nimbãan-zoɛt la tɩrlem soaba
13, 14. Rẽ yĩnga Wẽnnaam nimbãan-zoeerã boogda a tɩrlmã bɩ? Wilg-y võore.
13 Wa d sẽn zoe n wilgã, rẽ yĩnga a Zeova nimbãan-zoeerã kɩtdame t’a maand sẽn pa tɩrg bɩ? A nimbãan-zoeerã boogda a tɩrlmã bɩ? Abada.
14 Ne no-rɛɛs a Oze maasem, a Zeova ra yeela Israɛll nebã woto: “Mam na n yɩɩ fo sɩd wakat fãa. Mam na n yɩɩ fo halaal ne f pʋ-peelem sɩda. La mam na n nonga foom n zoe f nimbãanega.” (Oze 2:21) Gom-kãensã wilgda vẽeneg t’a Zeova sẽn maand ãdem-biisã nimbãan-zoeer to-to wã yaa ne pʋ-peelem tɩ wẽng kaẽ ye. Dẽnd zemsda ne a tɩrlmã la a zʋgd a taabã sẽn yaa sõma wã wakat fãa. A Zeova yaa ‘Wẽnnaam sẽn yaa nimbãan-zoɛt la bark kõata, . . . n kõt neb sugr b yel-wẽnã ne b kɩɩsgã la b kongrã fãa yĩnga. La baasgo, [a] ka na n bas yãmb taal y yel-wẽna yĩng ye.’ (Yikri 34:6, 7) A Zeova yaa Wẽnnaam sẽn yaa nimbãan-zoɛt la tɩrlem soaba. Biiblã gomda a yell n yet woto: “Bãmb yaa kugri. Bãmb tʋʋma zemsa zãnga. Bãmb soya fãa yaa tɩrse.” (Tõodo 32:4) Wẽnnaam sẽn wilgd a tɩrlmã ne a nimbãan-zoeerã to-to wã zemsda kɛpɩ. B baa a ye pa yɩɩgd a to, la b baa a ye pa boogd a to me ye. B lokda taaba.
15, 16. a) Bõe yĩng tɩ d tõe n yeel tɩ Wẽnnaam sẽn kaood bʋʋd to-to wã zemsda wakat fãa? b) Neb nins sẽn maand a Zeova raabã tõe n kɩsa sɩd t’a sã n wa na n sãam dũni wẽn-kãngã, bõe n na n maane?
15 A Zeova sẽn kaood bʋʋd to-to wã zemsda wakat fãa. Naoor wʋsgo, b sã n gomd bʋʋd yelle, noy la b gãnegẽ tɩ b segd n tũ, tɩ sẽn kɩɩs-a no-kãens soab segd ne sɩbgre. La Wẽnnaam sã n na n kao bʋʋdo, a pa sɩbgd kɩɩsdbã bal ye. A tɩrlmã yĩng kɩtdame t’a fãagd neb nins sẽn segd ne fãagrã me. Wala makre, a sẽn da wa n na n sãam Sodom la Gomoor nebã sẽn da yaa nin-wẽnsã, a fãaga a Lot ne a kom-pugli a yiibã.—Sɩngre 19:12-26.
16 D tõe n kɩsa sɩd t’a Zeova sã n wa na n sãam dũni wẽn-kãngã, “kʋʋn-kãseng” sẽn yaa wẽn-tũudb hakɩk n na n põse. Nin-kãens “peka b fut tɩ lebg peels ne Pebilã zɩɩm.” B sẽn na n põsã yĩng n kɩt tɩ b yetẽ tɩ b “yaa neb sẽn yi to-kãsengã pʋgẽ” wã.—Wilgri 7:9-14.
Bõe yĩng tɩ d segd n yɩ nimbãan-zoɛtba?
17. Sẽn yɩɩd fãa, bõe n kɩt tɩ d segd n yɩ nimbãan-zoɛtba?
17 A Zeova ne a Zezi Kirist sɩd sõng-d lame tɩ d bãng nimbãan-zoeer hakɩkã sẽn yaa a soaba. Sẽn na yɩl n wilg tõnd bũmb ning sẽn kɩt tɩ d segd n yɩ nimbãan-zoɛtbã, Yelbũn 19:17 pʋgẽ wã, b yeela woto: “Ned sã n sõng naong rãmba, a bĩngda Zusoaba nengẽ. Yaa bãmb n na n yao a tʋʋm sõma wã fãa.” Tõnd sã n dɩkd a Zeova ne a Bi-riblã togs-n-taar n yaa nimbãan-zoɛtba, nooma a Zeova wʋsgo. (1 Korẽnt dãmba 11:1) Sẽn paase, d sã n kʋmd d taabã nimbãanega, sõngda bãmb me tɩ b tõe n kʋm-do.—Luk 6:38.
18. Bõe yĩng tɩ d segd n mao n yɩ nimbãan-zoɛtba?
18 Ned sã n yaa nimbãan-zoɛta, a soab waoogda neba, a nonga neba, la a maand nebã neere. Yaa rẽ fãa n kɩtd t’a sõngd neb nins sẽn dat sõngrã. A Zeova nimbãan-zoeerã pa boogd a tɩrlmã ye. Kɩtdame t’a sũur pa yikd tao-tao, t’a maand sũ-mar ne nin-wẽnsã n kõt-b weer sẽn na yɩl tɩ b tek yam n kos sugri. (2 Pɩɛɛr 3:9, 10) Dẽnd nimbãan-zoeer ne sũ-mar tũuda taaba. Sẽn mik tɩ yaa zʋg-sõma toor-toor n kɩtd tɩ ned yɩ nimbãan-zoɛta, la tɩ zʋg-sõmã kãens wʋsg yaa vʋʋsem sõngã biisã yĩnga, d tõe n yeelame tɩ ned sã n baood n na n yɩ nimbãan-zoɛta, sõngd-a lame t’a paam zʋg-sõma a taab n paase. (Galat dãmba 5:22, 23) Ad sɩd tara yõod tɩ d mao n yɩ nimbãan-zoɛtba!
“Bark bee nimbãan-zoɛtbã zutu”
19, 20. Bõe yĩng tɩ b yetẽ tɩ nimbãan-zoeer tõogda bʋʋdo?
19 Karen-biig a Zak wilg-d-la bũmb ning sẽn kɩt tɩ d segd n yɩ nimbãan-zoɛtbã. A yeelame tɩ “nimbãan-zoeer tõogda bʋʋdo.” (Zak 2:13b) Yaa ned sẽn tũud a Zeova sẽn kʋmd a taabã nimbãaneg to-to wã yell la a Zak sẽn da gomdã. Nimbãan-zoeer sɩd tõogda bʋʋdo, bala ned sã n wa na n togs a meng yell Wẽnnaam taoor tɩ b kao a bʋʋdo, Wẽnnaam geta a soab sã n yɩɩ nimbãan-zoɛta, n yaool n kõ-a sugr a Zezi maoongã maasem yĩnga. (Rom dãmba 14:12) Yaa vẽeneg tɩ bũmb me sẽn kɩt tɩ Wẽnnaam zoe a Davɩɩd nimbãaneg a sẽn yo ne a Batseba wã yaa t’a Davɩɩd mengã ra yaa nimbãan-zoɛta. (1 Sãmwɛll 24:5-8) La ‘ned sẽn ka maand nimbãan-zoeer ka paamd nimbãan-zoeer a bʋʋd’ pʋgẽ ye. (Zak 2:13a) Sɩd pa lingr tɩ Wẽnnaam wilgdẽ tɩ ‘sũ-kɛgems rãmbã’ me na n paama sãoong ye!—Rom dãmba 1:31, 32.
20 A Zezi sẽn da wa n sõsd ne nebã tãngã zugã, a yeela woto: “Bark bee nimbãan-zoɛtbã zutu, tɩ bõe, bãmb na paam nimbãan-zoeere.” (Matɩe 5:7) Gom-kãensã sɩd wilgda vẽeneg tɩ sẽn dat-b tɩ Wẽnnaam zoe b nimbãanegã me segd n yɩɩ nimbãan-zoɛtba. Sõsg ning sẽn pʋgdã na n sõng-d lame tɩ d bãng d sẽn tõe n yɩ nimbãan-zoɛtb to-to.
Bõe la y bãng-yã?
• Nimbãan-zoeer yaa bõe?
• Wãn-wãn la ned wilgd t’a yaa nimbãan-zoɛta?
• Bõe yĩng tɩ b yetẽ t’a Zeova yaa Wẽnnaam sẽn yaa nimbãan-zoɛt la tɩrlem soaba?
• Bõe yĩng tɩ d segd n yɩ nimbãan-zoɛtba?
[Zãmsgã sogsgã]
[Foto, seb-neng a 4]
A Zeova zoeta nebã nimbãaneg wa bi-pɛɛlg ma sẽn zoet a biigã nimbãanegã
[Foto, seb-neng a 6]
A Zezi yel-soalmã kɩtame tɩ d bãng bõe nimbãan-zoeerã wɛɛngẽ?
[Foto, seb-neng a 7]
Rẽ yĩnga a Zeova barsa a tɩrlmã a sẽn zoe a Davɩɩd nimbãanegã bɩ?
[Foto, seb-neng a 8]
Wẽnnaam sẽn zoet yel-wẽn-maandbã nimbãaneg to-to wã zemsda ne a tɩrlmã