A Zeova Gomdã vɩɩme

A Zoɛll sebrã ne a Amos sebrã tags-kãsemse

A ZOƐLL sẽn togs bũmb ning yẽ meng zug bal yaa tɩ yẽ yaa “a Petuɛll biig a Zoɛlle.” (Zoɛll 1:1) Yaa koɛɛg ning a sẽn taasã yell la a gomd n yɩɩd a sebrã pʋgẽ, tɩ rẽ kɩt meng tɩ b pa tõe n bãng a sẽn togs bãngr-gomdã wakat ning takɩ ye. B mamsdame bal tɩ yɩɩ yʋʋmd 820 sẽn deng a Zezi rogmã, a Ozias sẽn deeg naam Zida tɩ yʋʋm a 9. Bõe yĩng t’a Zoɛll pa gomd a meng yelle? Yaa a sẽn dat n gom Wẽnnaam koɛɛgã yell n yɩɩdã yĩnga.

A Ozias wakatẽ wã me, Wẽnnaam yãka a Amos sẽn yit Zida n yaa ‘pe-kɩɩm la a send kankamsã’ t’a na n yɩ a no-rɛɛsa. (Amos 7:14) Wẽnnaam yãka a Zoɛll t’a togs a bãngr-gomdã Zida, la a tʋma a Amos t’a tɩ togs a rẽndã Israɛll buud piigã pʋgẽ. Rẽ poore, no-rɛɛs a Amos leba Zida, n gʋls a sebrã n sa yʋʋmd 804 sẽnese. A gʋls-a lame t’a karengã yaa nana-nana la tar yamleoogo.

BÕE YĨNG TƖ “BARAAR NA N YƖ TOOGO”?

(Zoɛll 1:1–3:21)

Vẽnegr pʋgẽ, a Zoɛll yãa sʋ-kinkirsi, sʋ-warond la kalwaar sẽn sãamd tẽngã. B mak-b-la ne “bu-kãseng sẽn tar pãnga,” la “gãndaado.” (Zoɛll 1:4; 2:2-7) A Zoɛll yeela woto: “Zusoabã raar kolgdame. A na n waa ne sãoong sẽn yit Sẽn-tõeyã-fãa wã nengẽ. Baraar na n yɩɩ toogo.” (Zoɛll 1:15) A Zeova sagla Siõ nebã woto: “Bɩ y lebg n wa mam nengẽ ne y sũyã fãa masã.” B sã n sak n lebg n kẽng a Zeova nengẽ, a na n ‘zoee b nimbãaneg’ la a rig sẽn yit-b goabgã b sẽn mak ne sʋy sẽn wa n na n sãam tẽngã tɩ b zãage. Nand t’a Zeova ra-kãsengã ta, a na n pʋdga a vʋʋsem sõngã neb buud fãa zutu, la a kɩt tɩ ‘bãn zĩnd yĩngr la dũniyã zugu.’—Zoɛll 2:12, 18-20; 3:1-4.

B yeela tẽnsã woto: “Wʋk-y y wãgsã n kud sʋʋse, la y rɩk y goetã n kud kãna,” la y segl y mens zabr yĩnga. B kõ-b-la noor tɩ b kẽng “a Zozafat longa” pʋgẽ tɩ b tɩ kao b bʋʋd la b sãam-ba. “La neb n na n zĩnd Zida . . . wakat fãa.”—Zoɛll 4:10, 12, 20.

Sogsg b sẽn leoke:

1:15; 2:1, 11, 3:4; 4:14—“A Zeova daarã” yaa bõe? A Zeova daarã yaa wakat a sẽn yãk n na n kao a bɛɛbã bʋʋdo, n sãam-b la a fãag a balemdb hakɩkã. Wala makre, yʋʋmd 539 sẽn deng a Zezi rogmã,  ra-kãng buud zĩnda Babilon, Meed la Pɛrs sodaasã sẽn wa n sãam tẽngã sasa. (Ezai 13:1, 6) A Zeova daar a to me n kolge. Sasa kãnga, a na n sãama Babilon Kãsengã sẽn yaa ãndũni gill ziri tũudmã.—Wilgri 18:1-4, 21.

2:1-10, 3:1—Bãngr-gomdã sẽn yet tɩ bõn-yɩgdɩ n sãam tẽngã pidsa wãn to? Biiblã pʋgẽ, b pa gʋls n wilg tɩ bõn-yɩgdɩ n sãam Kanaã tẽngã wala b sẽn bilgd a Zoɛll sebrã pʋgẽ to-to wã ye. Dẽnd a Zoɛll sẽn gomd sãang ning yellã yaa bãngr-gomd sẽn paam pidsg yʋʋmd 33 a Zezi rogmã poore. Wakat kãnga, a Zeova sika a vʋʋsem sõngã a Zezi pipi karen-biisã zug tɩ b sɩng koɛɛgã mooneg tɩ sãam tũudmã taoor dãmb sũyã. (Tʋʋma 2:1, 14-21; 5:27-33) Tõnd me tara zu-noog n tʋmd tʋʋm-kãng buud rũndã-rũndã.

3:5—B sẽn yet ka tɩ “pʋʋs ne [a Zeova] yʋʋrã” võor yaa bõe? Ned sã n pʋʋsd ne Wẽnnaam yʋʋrã rat n yeelame t’a mii yʋ-kãngã, t’a waoogda yʋʋrã wʋsgo, la t’a kɩsa sɩd ne yʋʋrã soaba.—Rom dãmba 10:13, 14.

4:14—Bʋʋdã longã yaa bõe? Pa long sɩd-sɩd ye. A makda Wẽnnaam bʋ-kaoorã sẽn na n yɩ to-to. Zida rĩm a Zozafat yʋʋrã võor yaa “a Zeova yaa bʋ-kaooda.” Rĩm-kãngã wakatẽ wã, a Zeova fãaga Zida nebã n kɩt tɩ tẽns nins sẽn karg n gũbg Zida wã sodaas wẽneg n kʋ taaba. Yaa rẽ n so tɩ b ra boond zĩigã me t’a “Zozafat longo.” (Zoɛll 4:2, 12) Rũndã-rũndã, longã makda a Zeova sẽn na n sãam tẽnsã wa b sẽn wẽkd viyn biis vẽ wẽkr koglg pʋgẽ wã.—Wilgri 19:15.

Zãmsg tõnd yĩnga:

1:13, 14. Tek yam n kos sugr la sak n deeg t’a Zeova yaa sɩd Wẽnnaam tara yõod wʋsg sẽn na yɩl n paam fãagre.

2:12,13. Ned sã n na n tek yam n kos sugri, segd n yɩɩ ne a sũur fãa. Pa futã pãrsg n wilgd t’a soab teka yam n kos sugr ye. A segd n ‘maana sũ-sãoongo.’

3:1-5. Yaa neb nins sẽn na n pʋʋs ne a Zeova yʋʋrã bal n na n paam fãagr a Zeova ra-kãsengã sẽn tar dabeemã sasa. D tara mi-beoog ne a Zeova, a sẽn kõt a vʋʋsem sõngã neb buud fãa tɩ kamb la kãsemb n paas rap la pagb tõe n togs a koɛɛgã, sẽn dat n yeel tɩ n gom “Wẽnnaam tʋʋm-kãsemsã” yellã. (Tʋʋma 2:11) A Zeova daarã sẽn tar pẽnegrã yĩngã, d segd n modgame n yɩ neb “yel-manesem sẽn yaa sõma la sẽn sakd Wẽnnaam.”—2 Pɩɛɛr 3:10-12.

4:4-8, 19. A Zoɛll wilga a bãngr-gomdã pʋgẽ tɩ b na n sɩbga tẽns nins sẽn karg n gũbg Zida wã, b sẽn nams Wẽnnaam nin-buiidã yĩnga. Sɩd me, Babilon rĩm a Nebukadnezaar tɩ sãama Tɩɩr tẽn-kãsengã, tɩ rẽ pids bãngr gom-kãngã. Kaoosg poore, a Alɛgsãndr le Gãrã sẽn zab n deeg tẽngã babg ning sẽn be koomã sʋkã, a kʋʋ sodaas la nin-kãsems tusa, la a koos tẽngã neb sẽn ta 30000 yembdo. A Alɛgsãndr ne rĩm dãmb nins sẽn pʋgl yẽ wã namsa Filisti nebã me woto. Yʋʋmd 400 sẽn deng a Zezi rogmã tɩ Edom lebga ra-boogo. (Malaki 1:3) Bãngr-gom-kãensã sẽn pidsã kɩtdame tɩ d kɩs sɩd t’a Zeova pidsda bũmb nins fãa a sẽn pʋlmã. B leb n wilgda a Zeova manesem sẽn na n yɩ to-to ne neb nins sẽn namsd a nin-buiidã rũndã-rũndã wã.

4:16-21. A Zeova sẽn na n kao tẽnsã bʋʋdã, “saasã ne dũniyã na n digimdame.” La a Zeova na n yɩɩ zĩ-soalgdg a nin-buiidã yĩnga, n kɩt tɩ b vɩɩmd arzãnã pʋgẽ. D segd n modg n pẽnega a Zeova n paase, raar ning a sẽn yãk n na n kao dũni-wẽn-kãngã bʋʋdã sẽn tar kolgrã yĩngã.

 “Bɩ y segl n seg y Wẽnnaamã”

(Amos 1:1–9:15)

A Amos tara koɛɛg n na n wilg tẽns nins sẽn karg n gũbg Israɛllã, la Zida ne Israɛll tẽngã me. B na n sãama Siiri, Filisti, Tɩɩr, Edom, la Moaabe, b sẽn nams Wẽnnaam nin-buiidã yĩngã. B na n sãama Zida nebã me b sẽn bas a Zeova noyã tũubã yĩnga. (Amos 2:4) La Israɛll buud piigã rĩungã yẽ? Yel-wẽn nins a sẽn maana sʋka, b tõe n sõdga nin-talsã namsgo, yoobo, la Wẽnnaam no-rɛɛsdbã namsgo. A Amos keooga nebã t’a Zeova na n “sãama Betɛll tẽn-kugã” la a “lub sɩpaolg rotã ne sẽoog rotã.”—Amos 3:14, 15.

Baa b sẽn zoe n sɩbg Israɛll nebã naoor wʋsg b sẽn pʋʋsd bõn-naandsã yĩngã, b pa toeem ye. A Amos yeel-b-la woto: “Bɩ y segl n seg y Wẽnnaamã.” (Amos 4:12) Israɛll nebã nengẽ, a Zeova daarã na n yɩɩ wakat ning a Zeova sẽn na n bas tɩ b “kẽes-b yembd tẽng a to pʋgẽ sẽn zãr n yɩɩd Damasã,” sẽn dat n yell tɩ Asiiri tẽngã. (Amos 5:27) Betɛll maan-kʋʋd n nams a Amos la a Amos pa yɛɛs ye. A Zeova yeela a Amos woto: “Mam Israɛll nebã sɛɛb taame. Mam ka na n le bas-b taal ye.” (Amos 8:2) Kɩɩm-kulg la tãn-bɛd pa tõe n kogl-b t’a Zeova pa sãam-b ye. (Amos 9:2, 3) La baa ne woto fãa, a Zeova pʋlmame t’a na n lebg n manega tẽngã. A yeela woto: “Mam na n lebsa m Israɛll nebã tẽngã pʋgẽ tɩ b le me b zags tẽns nins sẽn sãamã pʋsẽ n zĩnd be. Bãmb na n sela viyn tɩɩs la b yũ b rãamã. Bãmb na n maana zẽed n dɩ b biisi.”—Amos 9:14.

Sogsg b sẽn leoke:

5:5—Bõe yĩng tɩ b yet tɩ Israɛll nebã ra kẽng Betɛlle? A Zeroboam maana sãnem nag-bil Betɛll tɩ b pʋʋsdẽ. Rẽ teka, Betɛll lebga ziri tũudum zĩiga. Gilgall ne Bɛɛr-seba me ra yaa ziiri tũudum zĩisi. Sẽn na yɩl n põs sãang ning yell a Amos sẽn gomã, Israɛll nebã pa segd n ye kẽng zĩ-kãensã n tɩ pʋʋs ye. B segdame n sɩng a Zeova baoobo.

7:1, Sebr Sõngo—Rĩmã ka-keerã makda bõe? Yaa lampo ning nebã sẽn da yaood rĩmã sẽn na yɩl t’a ges a wed-rʋʋdbã la a rũmsã yellã. B ra segd n yaoa lampo kãng “wakat ninga ki wã sẽn yi n lebg pogdã.” Rẽ poor masã, nebã ra tõe n kẽebame. La nebã pa yãt n kẽeb meng tɩ sʋyã wa sãam koodã la tɩɩsã ye.

8:1, 2—“Peoogã sẽn pid ne tɩ-biisã” makda bõe? Woto wilgdame t’a Zeova daarã ta n sãame. B wobda tɩ-biis nins sẽn be peoogã pʋgẽ wã kẽebgã sã n wa kolgd saabo. A Zeova sẽn kɩt t’a Amos yã “peoogã sẽn pid ne tɩ-bɩɩsã” rat n wilgame tɩ raar ning a sẽn yãk n na n sãam Israɛll nebã ta n saame. Woto yĩnga, a Zeova yeela a Amos yaa: “Mam Israɛll neba sɛɛb taame. Mam ka na n le bas b taal ye.”

Zãmsg tõnd yĩnga:

1:3, 6, 9, 11, 13; 2:1, 4, 6. Yaa a Zeova sũurã sẽn da puug ne Israɛlle, Zida, la tẽns a yoob nins sẽn karg n gũbg-bã yĩng la a sẽn yeel t’a ‘ka na n bas-b taalã.’ Ned pa tõe n solg t’a Zeova pa kao a bʋʋd ye.—Amos 9:2-5.

2:12. D pa sedg abada n sagl so-pakdbã, tigims sull la distrik yel-gɛtbã, misioneer dãmbã bɩ sẽn tʋʋmd-b Betɛllẽ wã tɩ b bas b Wẽnnaam tʋʋmdã la b vɩɩmd wa neb a taabã ye. D segd n kenga b raoodo, tɩ b ket n kẽngd taoor ne b tʋʋm-neerã.

3:8. Wala ned sẽn na n wʋm gɩgemd sẽn yãbd n yaeesã, a Amos me sẽn wʋm a Zeova sẽn yeel t’a ‘kẽng n tɩ togs Israɛll nebã a koɛɛgã,’ a ra yãgdame n dat n tɩ  togse. (Amos 7:15) D wẽn-zoeerã segd n kɩtame tɩ d moond Wẽnnaam Rĩungã koɛɛg ne yẽesem.

3:13-15; 5:11. Ne a Zeova sõngre, a Amos sẽn yaa rũm-kɩɩmã tõog n kõo kasetã nin-kãsems sẽn da pa rat n sak n kelge. A Zeova tõe n zãmsa tõnd me tɩ d wa tõog n moon koe-noogã baa ne d moonegã zĩig sẽn yaa to-to fãa.

4:6-11; 5:4, 6, 14. Baa ne Israɛll nebã sẽn tõdg naoor wʋsg tɩ b pa na n lebg n wa a Zeova nengẽ wã, b yeel-b lame tɩ b bao a Zeova n paam n vɩɩmde. Baa a Zeova sẽn bas dũni-wẽn-kãngã ta ket n kaoosd to-to fãa, d segd n modg n ket n sagenda nebã tɩ b bao n bãng a Zeova.

5:18, 19. Ned sã n “dat [t’a Zeova] daarã wa tao-tao” la a yaool n pa segl a meng sõma, yaa yalemdo. Ned sẽn maand woto wõnda gɩgemd sẽn digd ned ta zoe n tɩ seg ãbga, n lebg n zoe tɩ waaf tɩ kɛ-a. Yɩta sõma tɩ d segl d mens tẽebã wɛɛngẽ la d kell n pa gũub pʋgẽ.—Luk 21:36.

7:12-17. Wẽnnaam koɛɛgã mooneg wɛɛngẽ, d segd n talla raood la yẽesem.

9:7-10. Israɛll nebã yaab rãmb yɩɩ sakdba, la Wẽnnaam nin-buiid a sẽn fãag Ezipti. La baa ne rẽ fãa, Israɛll nebã sẽn da yaa tõtbã yĩnga, b pa ta a Zeova yam wa Etiopi nebã me sẽn pa ta a Zeova yamã. D sã n dat n ta Wẽnnaam sẽn pa tũusd nebã yam, pa be ne d yaab rãmb ye, bee ne d sẽn na n zoet-a la d maand tɩrga.—Tʋʋma 10:34, 35.

D sẽn segd n maan bũmb ninga

Daar ning Wẽnnaam sẽn yãk n na n sãam a Sʋɩtãan dũniyã kolgame. Wẽnnaam kõta a balemdbã a vʋʋsem sõngã tɩ sõngd-b tɩ b moond nebã n wilgdẽ tɩ Wẽnnaam daarã kolgame. D segd n modg n moona koɛɛgã wʋsg n sõng neb a taabã tɩ b bãng a Zeova la b ‘pʋʋs ne a yʋʋrã.’—Zoɛll 3:4, 5

A Amos sagla woto: “Bɩ y bas wẽng la y maan neere. La y kɩt tɩ b kao bʋʋd ne tɩrlem y bʋʋdã zĩisẽ.” (Amos 5:15) A Zeova daarã sẽn kolgdã, yaa yam tʋʋmd tɩ d modg n pẽneg Wẽnnaam la d lak d mens ne dũni wẽn-kãngã fasɩ. A Zoɛll sebrã ne a Amos sebrã tara sagls sẽn tõe n sõng-d tɩ d tõog n maan woto.—Hebre dãmba 4:12.

[Foto, seb-neng a 4]

A Zoɛll reng n togsame “t’a Zeova daarã kolgdame!”

[Foto rãmba, seb-neng a 7]

Wala a Amose, d segd n moona Wẽnnaam koɛɛgã ne raood la yẽesem