D sẽn tõe n maan to-to tɩ d sũur kasetã sagls yɩ sõma
D sẽn tõe n maan to-to tɩ d sũur kasetã sagls yɩ sõma
“Bũmb fãa yaa sõama ne neb nins sẽn yaa sõama wã; la bũmb ka be sẽn yaa sõama ne neb nins sẽn sãam ne yel-wẽnã la sẽn ka tẽebã ye.”—TƖT 1:15.
1. Bõe la a Poll maan n sõng Kɛrɛt tigimsã?
TƲM-TƲMD a Poll misioneeremdã so-toak a tãab-n-soab poore, b yõk-a lame n tɩ kẽes roog Rom yʋʋm a yiibu. La b sẽn wa n yiis-a wã, bõe la a maan-yã? Yẽ ne a Tɩt wa n kẽnga Kɛrɛt sẽn yaa tẽng sẽn be koom sʋkã. Yɩɩ rẽ poor la a sẽn gʋls a Tɩt woto wã: “Mam basa foo Kɛrɛt tɩ f maneg yɛlã fãa sẽn ketã wa mam sẽn da yeel foomã, la f yãk kãsem dãmb tẽng-tẽnga.” (Tɩt 1:5) A Tɩt ra segd n bao n bãnga neb nins sũur kaset sẽn yaa sõma wã la neb nins rẽnd sẽn pa sõma wã n tõog n tʋm a tʋʋmdã.
2. Yel-bʋg la a Tɩt ra segd n welg Kɛrɛte?
2 A Poll wilga a Tɩt neb nins buud a sẽn tog n yãk tigimsã pʋsẽ tɩ b yɩ kãsem dãmbã. Rẽ poore, a yeelame tɩ ‘nin-kɩɩsdb ne gom-yaals rãmb la belgr dãmb wʋsg n be’ tigims kãens pʋsẽ. Nin-kãens ra ‘lubda neb ne b yiy rãmb fãa, n zãmsd nebã sẽn ka zemse.’ A Tɩt ra segd n dems-b lame. (Tɩt 1:10-14; 1 Tɩmote 4:7) A Poll yeelame tɩ b yamã ne b sũur kasetã “sãama” ne yel-wẽna. Gom-bil ning b sẽn lebg ka tɩ ‘sãamã’ võor yaa “rẽgme,” wa fu-peell sẽn kẽ rẽgdo. (Tɩt 1:15) Nin-kãens kẽer tog n da yaa Zʋɩf rãmba, bala b ra yetame tɩ bãongã kõom yaa tɩlae. Yaa sɩd tɩ rũndã-rũndã tigimsã pʋsẽ, neb kae n yetẽ tɩ kiris-ned fãa segd n kẽe bãong tɩlae ye. La baasgo, d tõe n dɩka yam wʋsg sagls nins a Poll sẽn kõ a Tɩt sũur kasetã wɛɛngẽ wã pʋgẽ.
Neb nins sũur kaset sẽn sãama
3. Bõe la a Poll gʋls a Tɩt n yeel sũur kasetã wɛɛngẽ?
3 D bao n bãng bũmb ning sẽn kɩt t’a Poll wa gomd sũur kaset yellã. A yeela woto: “Bũmb fãa yaa sõama ne neb nins sẽn yaa sõama wã; la bũmb ka be sẽn yaa sõama ne neb nins sẽn sãam ne yel-wẽnã la sẽn ka tẽebã ye, bãmb yam ne b sũur kaset sãama ne yel-wẽna. B yetame tɩ b mii Wẽnnaam, la ne bãmb tʋʋmã bãmb kɩɩsda Wẽnnaam.” Gom-kãensã wilgda vẽeneg tɩ neb kẽer n da segd n mao n dems b tagsg la b yel-manesem tɩ wilg tɩ b tara “tẽeb sẽn yaa sɩda.” (Tɩt 1:13, 15, 16) B ra pa mi bũmb sẽn yaa sõma bɩ yɩlemde, ne bũmb sẽn pa yɩlemd n bak ye. La woto yaa sũur kaset yelle.
4, 5. Yel-bʋg n da be ne tigimsã neb kẽere, la rẽ kɩtame tɩ b manesmã ra yaa wãn-wãna?
4 Sẽn yɩɩd yʋʋm piig sẽn deng wakat kãnga, kiris-nebã siglgã taoor lʋɩtb sull da zoe n vaeesa Gʋlsg Sõamyã n wilg vẽeneg tɩ bãongã kõom ye pa tɩlae ne sẽn dat-a n lebg tũudum hakɩkã ned ye. Rẽ poore b kɩtame tɩ b taas tigimsã koe-kãnga. (Tʋʋma 15:1, 2, 19-29) La Kɛrɛt tigimsã pʋsẽ, neb n da ket n yetẽ tɩ bãongã yaa tɩlae. Nin-kãens ra kɩɩsda siglgã taoor lʋɩtb sull vẽeneg-vẽeneg n ‘zãmsd nebã sẽn ka zemse.’ (Tɩt 1:10, 11) Tõe tɩ b ra ket n tũuda a Moiiz tõogã noy rɩɩbã la yel-maandɩ kẽer wɛɛngẽ, n geendẽ tɩ yaa tɩlae. Tõe meng tɩ b ra maanda wa kɩɩsdb a taab sẽn maan a Zezi sẽn da wa n be tẽng zugã, n zẽnd tõogã goam la b zãmsd nebã Zʋɩf rãmbã soalem la ninsaalb noya, n dat tɩ b tũ.—Mark 7:2, 3, 5, 15; 1 Tɩmote 4:3.
5 Tags-kɛg a woto sãama b sũur kasetã tɩ kɩt tɩ b ra pa ye mi sẽn segd la sẽn pa segd n bak ye. A Poll gʋlsa woto: “Bũmb ka be sẽn yaa sõma ne neb nins sẽn sãam ne yel-wẽna la sẽn ka tẽeba ye.” B sũur kasetã sãama wʋsgo, n ye pa tõe n wilg-b b manesmã sã n yaa sõma bɩ pa sõma ye. Sẽn paase, b tẽed-n-taag sã n da maan yam-yãkr sẽn yaa toor ne bãmb rẽndã, b ra kaooda a bʋʋdo. La kiris-ned yam-yãkr yaool n tõe n yɩɩ toor ne a to rẽnd yel-yɛng zug tɩ yell kaẽ ye. Nin-kãensã sẽn da be Kɛrɛt tẽedbã sʋkã ra getame tɩ b taabã maanda yɛl sẽn pa sõma, tɩ yaool n da pa sɩd ye. (Rom dãmba 14:17; Kolos rãmba 2:16) La baa b sẽn da yet tɩ b mii Wẽndã, b tʋʋmã ra wilgdame tɩ b pa mi Wẽnd ye.—Tɩt 1:16.
“Bũmb fãa yaa sõma ne neb nins sẽn yaa sõma wã”
6. A Poll goma neb sul a yiib bʋs yelle?
6 Yam bʋg la d tõe n dɩk goam nins a Poll sẽn gʋls a Tɩtã pʋgẽ? Kelg-y-yã a sẽn yeelã neere. A yeelame tɩ “bũmb fãa yaa sõama ne neb nins sẽn yaa sõama wã; la bũmb ka be sẽn yaa sõama ne neb nins sẽn sãam ne yel-wẽna la sẽn ka tẽebã ye, bãmb yam ne b sũur kaset sãama ne yel-wẽna.” (Tɩt 1:15) Yaa vẽeneg t’a Poll pa rat n yeel tɩ kiris-ned tagsg la a manesem sã n yaa sõma, bũmba fãa yaa sõma ne-a t’a tõe n maan a sẽn dat fãa tɩ gɩdgr kaẽ ye. D tõe n kɩsa sɩd tɩ pa woto la a Poll da rat n yeele, bala a lɛtr a to pʋgẽ, a wilga vẽeneg tɩ yoaadba, bõn-naands pʋʋsdba, tɩ-rɩtb la neb sẽn maand yel-wẽn a taab ‘ka na n paam Wẽnnaam soolmã ye.’ (Galat dãmba 5:19-21) Rẽnd d tõe n yeelame tɩ yaa neb sull a yiib manesem sẽn yaa toor-toor yell la a Poll sẽn gomdã. Yaa neb nins sẽn tũud Wẽnnaam noyã sõma wã, la sẽn pa tũud-bã.
7. Hebre rãmb 13:4 soabã tara no-bʋgo, la sok-bʋg n be?
7 Kiris-ned hakɩk sẽn pa segd n maand bũmb ninsã pa tek Biiblã sẽn gɩdg-b rãmb vẽeneg-vẽenegã ye. D rɩk makr ne noor a ye Biiblã sẽn kõ vẽenega. B yeela woto: “Bɩ kãadem zĩnd waoogr ne nebã fãa, la y ra sak tɩ gãag sãam ne wẽng ye. Tɩ bõe, Wẽnnaam na n kaoa raglem dãmbã ne nin-yoaadbã bʋʋdo.” (Hebre dãmba 13:4) Baa sẽn pa-b kiris-nebã la sẽn pʋd n pa mi-b Biiblã baa bilfã sã n wʋm no-kãngã, b na n bãngame tɩ rat n yeelame tɩ kãadem pʋgẽ yoob gɩdgame. Biiblã gom-kãensã ne a goam a taab wilgda vẽeneg tɩ Wẽnnaam kisa pag bɩ rao sẽn kẽ kãadem sẽn lagemd ne ned a to tɩ pa a sẽn kẽ kãadem ne a soabã. La pag ne rao sẽn pa kẽ kãadem ne taab sã n mogsd taab taoa? Rẽ yĩnga verse kãngã sẽn yeelã gɩdga rẽ bɩ? Kom-bɩɩs kẽer yetame tɩ woto maaneg sẽn pa f to wã lageng vẽeneg-vẽenegã, pa wẽng ye. La kiris-ned tagsg segd n yɩɩ wãn yel-kãngã zugu?
8. Bõe la kiris-nebã tagsd f to taoor mogsgã wɛɛngẽ tɩ yaa toor ne dũniyã neb tagsgo?
8 Hebre rãmb 13:4 la 1 Korẽnt dãmb 6:9 wã wilgda vẽeneg tɩ Wẽnnaam kisa ned sẽn kẽ kãadem wall sẽn pa kẽ kãadem sẽn yooda. Bala yaa yoob buud fãa la b sẽn boond ne gɛrk tɩ porneya wã. La gom-bi-kãngã bilgda bõe takɩ? Yaa tall f poglmã bɩ f raoolmã n tʋm sẽn pa segd bɩ sẽn pa zemse. Gom-biigã sẽn bilgdã yaa lageng buud fãa sẽn maand tɩ pa kãadem pʋgẽ, rat n yeel tɩ kãadem sẽn kẽ tɩ zems ne Biiblã noyã. Rẽnd baa b sẽn wilg kom-bɩɩs kẽere, pa rẽ bɩ b wʋsg sẽn tẽed tɩ f to taoor mogsg pa wẽngã, vẽenega, rẽ me yaa yoobo. Kiris-neb hakɩkã pa sakd tɩ b tagsgã la b yel-manesmã wõneg “gom-yaals rãmbã la belgr dãmbã” rẽnd ye. (Tɩt 1:10) B tũuda Gʋlsg Sõamyã noyã la a saglsã sẽn yaa sõma hal wʋsgã. B pa kõt b mens bʋʋm lae-lae n tẽ tɩ f to taoor mogsg pa yoob ye. B miime tɩ ne Biiblã, woto me yaa yoobo, tɩ kɩt tɩ b pa sakd n maan bũmb a woto ye. *—Tʋʋma 21:25; 1 Korẽnt dãmba 6:18; Efɛɛz rãmba 5:3.
Ned kam fãa tara a sũur kaset la a yam-yãkre
9. Wãn to la d sũur kasetã sõngd tõnd yɛl nins zut Biiblã sẽn pa kõ noy takɩ wã wɛɛngẽ?
9 La a Poll sẽn yeel tɩ “bũmb fãa yaa sõama ne neb nins sẽn yaa sõama wã” rat n yeelame tɩ bõe? Yaa kiris-neb nins sẽn maneg b tagsg la b sũur kaset tɩ zemsd ne Wẽnnaam noyã sẽn be a Gomdã pʋgẽ wã yell la a sẽn gomdã. Bãmb dãmbã sak n deegame tɩ yɛl wʋsg Wẽnnaam sẽn pa gɩdg vẽeneg wɛɛngẽ, kiris-ned fãa yam-yãkr tõe n yɩɩ toore. B tẽed-n-taag sã n wa maan yam-yãkr sẽn yaa toor ne b yam-yãkr bõn-yɛng zugu, b sẽn mi t’a pa maan bũmb Wẽnnaam sẽn gɩdgã yĩnga, b pa wɩt-a ye. B getame t’a yãkrã yaa sõma. Yɛl nins zut Biiblã sẽn pa kõ noy takɩ wã, b pa baood tɩ b taabã tall tagsg a ye ne bãmb tɩlae ye. D ges makr a wãna.
10. Wãn to la kãadem wall kʋʋr tõe n wa ne zu-loɛɛga?
10 Zags wʋsg pʋsẽ, yaa pagã wall sɩdã bal n lebg kiris-neda. (1 Pɩɛɛr 3:1; 4:3) Woto kɩtame tɩ yɛl kẽer wala b ned kãadmẽ pa rẽ bɩ b ned kaalem sasa, b yam-yãkr tõe n yɩ toog ne-ba. Tags-y n ges-y wa pag sẽn na n yaa a Zeova Kaset soaba, t’a sɩdã pa a Zeova Kaset soaba, tɩ raoã ned wa rat n maan a kãadem wẽnd-doogẽ n bool-ba. Pa rẽ bɩ a ned n maan kaalem tɩ b rat n tall kũumã n tɩ pʋʋs wẽnd-doogẽ tɩ raoã rat t’a pagã yãag-a. A tagsg yɩta wãn ne yel-kãngã? A maanda wãna? Tags-y n ges-y wa kiris-ned hakɩk sẽn na n wa be yell a woto buud taoore.
11. Bilg-y pag sẽn yaa kiris-ned sẽn tõe n tags to-to n bãng a sã n segd n kẽnga kãadem tigr wẽnd-doogẽ.
11 Pag a ye yʋʋr sẽn boond t’a Loyiis paama zu-loe-kãngã buudu. A bʋgsa Biiblã sẽn yeel tɩ d ‘yi Babilon kãsengã’ sẽn yaa dũni gill ziri tũudmã pʋgẽ wã zugu, n bãng a sẽn segd n maanega. (Wilgri 18:2, 4) Kãadem la b ra lugund wẽnd-doog ning a Loyiis sẽn bas n lebg a Zeova Kaset soabã pʋgẽ, t’a sɩdã ra rat t’a yãag-a. La a Loyiis sẽn mi tɩ b kãadem tigr sasa, b wat n kosa nebã fãa tɩ b naag n yɩɩl wall b pʋʋse, pa rẽ bɩ b maan yɛl a taabã yĩnga, a pa rat n kẽng n wa tɩ maan bõn-kãens n kɩɩs Wẽnnaam ye. A Loyiis waoogda a sɩdã sõma wa Biiblã sẽn datã, bala pag zu-soab yaa a sɩda. La a pa rat n kɩɩs Biiblã noy ye. (Tʋʋma 5:29) Woto yĩnga, a maaga a yĩng n wilg a sɩdã t’a sã n na n kẽngame, yẽnda yẽ pa na n tõog ye. Tõe t’a yeela a sɩdã t’a pa rat n kẽng n wa tɩ pa sak n maan yɛl kẽer tɩ ning a sɩdã yãnde, la tɩ rẽ yĩngã, a sẽn paad n são. A sẽn yãk yam n pa kẽngã, a sũur kasetã pa ning-a taal ye.
12. B sã n bool kiris-ned t’a wa kãadem tigr sẽn maand wẽnd-doogẽ, a tõe n tagsa wãn tɩ kɩt t’a maan bõe?
12 Pag a to yʋʋr sẽn boond t’a Rut me talla zu-loe-kãngã. A Rut waoogda a sɩdã, la a rat n kell n sak Wẽnnaam ne a sũur fãa n tũud a sũur kasetã sẽn zemsd ne Biiblã noyã. A tagsa yɛl nins yell a Loyiis sẽn tagsã kẽer zut me la a pʋʋse. Rẽ poore, a karma yʋʋmd 2002 sig-noy kiuug rasem 15 Gũusg Gasgã zĩig ning b sẽn gʋls tɩ “Karemdbã sogsgã.” A tẽegame tɩ b sẽn da bool kom-bɩɩs a tãab sẽn yaa Hebre rãmb bõn-naandg pʋʋsg zĩigẽ wã b kẽngame, la b kell n saka Wẽnnaam n pa naag n pʋʋs bõn-naandgã ye. (Daniɛll 3:15-18) Woto yĩnga, a gesame tɩ yẽ sũur kasetã kõt-a-la sor t’a yãag a sɩdã, la t’a pa na n tɩ naag n pʋʋs bɩ n yɩɩl wall a maan bũmb a to ye. A maaga a yĩng n wilg a sɩdã bũmb nins a sũur kasetã sẽn kõt-a sor t’a maane, la a sẽn pa segd n maane. A tagsame tɩ woto na n sõnga a sɩdã t’a bãng tũudum hakɩkã n welge.—Tʋʋma 24:16.
13. Bõe yĩng tɩ pa wẽng tɩ kiris-neb a yiib tall tagsg toor-toor yel-yɛng zugu?
13 Yaa sɩd tɩ kiris-neb a yiib tõe n talla yam-yãkr toɛy-toɛy yel-yɛng zugu. La rẽ yĩnga rat n yeelame tɩ b sẽn maan a soab fãa yaa sõma bɩ, bɩ wilgdame tɩ b nin-yend sũur kaset n pa sõma? Ayo. A Loyiis nengẽ wã, tõe t’a tẽega a pĩnd tũudmã yɩɩl la a yel-maandɩ wã sẽn tõe n kɩt t’a wa maan bũmb ninga, n bãng t’a sã n kẽnge, pa na n yɩ sõma ne-a ye. Sẽn paase, tõe t’a tagsa a sẽn da zoe n sõs ne a sɩdã yɛl nins zut tũudmã wɛɛngẽ wã yell me, n mik t’a sã n kẽnge, a sũur kasetã na n ning-a-la taale. Woto fãa kɩtame t’a kɩs sɩd t’a sẽn yak yam ningã yaa sõma.
14. Yɛl nins pʋsẽ kiris-ned fãa sẽn tõe n tall a yam-yãkrã wɛɛngẽ, bõe la d pa segd n yĩm?
14 La a Rut yam-yãkrã yẽ yaa wẽng bɩ? Ned baa a ye pa segd n kao a bʋʋd ye. B pa segd n ning-a taal a sẽn yãk yam n na n kẽng wẽnd-doogẽ wã la a pa na n tɩ naag n maan tũudmã yɛlã ye. Tẽeg-y a Poll sẽn kõ saglg ning sãnda sẽn dɩt rɩɩb kẽer tɩ sãnda pa rɩtã wɛɛngẽ wã. A yeela woto: “Ned ninga sẽn dɩta, bɩ a ra paoog sẽn ka rɩt-a wã ye. La bɩ sẽn ka rɩt-a wã me ra kao sẽn dɩt-a wã bʋʋd ye . . . A sã n yalsdẽ walla a sã n lʋɩ, yãoã bee ne a zu-soabã. La yẽ na n yalsame; tɩ bõe, Zusoabã tõe n kɩtame t’a yalse.” (Rom dãmba 14:3, 4) La yaa vẽeneg tɩ kiris-ned hakɩk baa a ye pa na n dat n kɩt t’a to ra kelg a meng sũur kaset ye. Bala a sã n maan woto, yaa wa a sẽn gɩdg-a t’a ra kelg koɛɛga, tɩ koe-kãng yaool n da tõe n fãag a yõore.
15. Bõe yĩng tɩ tar yõod wʋsg tɩ d tagsd d yel-manesmã sẽn tõe n maan d taabã bũmb ningã yelle?
15 D sã n na n leb pʋg-kãensã b yiibã kibarã pʋgẽ, d tõe n paasame tɩ b ned kam fãa segd n bao n bãnga yam ning a sẽn yãkã sẽn tõe n maan a taabã bũmb ninga. A Poll sagl-d-la woto: ‘Bɩ y paam yam kãngã, la y ra kɩt tɩ y ba-biig lʋɩ wall y maan bũmb sẽn wat ne a lʋɩɩs ye.’ (Rom dãmba 14:13) Tõe t’a Loyiis zoe n yãa yell a woto buud sẽn sãam a tigingã neb wall a zakã neb sũyã, la a leb n mi a yam-yãkrã sẽn tõe n maan a kambã bũmb ninga. A Rut nengẽ wã, tõe t’a ra miime tɩ yam ning a sẽn yãkã buud zɩ n wa ne yell a tigingã pʋgẽ wall a sakã pʋgẽ ye. La pʋg-kãensã ne tõnd fãa segd n sak n deegame tɩ d sũur kasetã sã n yaa sõma, d sõmb n mii d yel-manesmã sẽn tõe n maan d taabã bũmb ning me. A Zezi yeela woto: ‘Ned sã n maan kom-bõoneg kãensã sẽn tẽed maamã ned a yembr t’a lʋɩ, a yaa sõma tɩ b loe yẽ soab kokor ne pĩig kugr n lob-a ko-kãsengã pʋgẽ.’ (Matɩe 18:6) Ned sã n pa sak n deeg t’a yel-manesem tõe n yɩɩ sabab t’a to lʋɩ, nin-kãng soab sũur kaset wat n sãama wa Kɛrɛt kiris-neb kẽer dẽndã.
16. Sã n beẽ-beẽ, toeen-bʋs la kiris-ned fãa wat n maane?
16 Zood ning kiris-ned sẽn tar ne Wẽndã sã n paasdẽ, a sũur kasetã sagls me tara manegre, t’a tõogd n tũud-ba. D rɩk makr ne kiris-ned d sẽn na n bool t’a Marke. A reega lisg sẽn nan pa kaoose. Bũmb nins a sẽn bãngã kɩtame t’a sũur kasetã sagend-a t’a segd n laka a meng fasɩ ne yɛl kẽer a sẽn da maand tɩ kɩɩsd Biiblã noyã. Tõe t’a ra pʋʋsda bõn-naandse, la a ra getẽ me tɩ zɩɩmã tall n tɩpã wall a rɩɩbã pa wẽng ye. (Tʋʋma 21:25) Masã, baa yɛl kẽer sẽn wõnd gɩdgame tɩ yaool n pa gɩdge, a Mark pa sakd n maan ye. La a geta televiziõ wã filim dãmb kẽer tɩ kiris-neb a taab yaool n pa sakd n ges filim kãense, t’a pa wʋmd võor ye.
17. Rɩk-y makr n wilg kiris-ned sũur kaset sẽn toeemd to-to a bãngrã sã n paasdẽ.
17 La sẽn beẽ-beẽ, a Mark bãngrã talla paasgo, t’a pẽnegd Wẽnnaam n paasdẽ. (Kolos rãmba 1:9, 10) Rẽ waa ne bõe? Paasa a sũur kasetã sõmblem. Rũndã-rũndã, a Mark kelgda a sũur kasetã n tũud Biiblã noy neere. A bãngame tɩ “yɛl kẽer” a sẽn da gind n tẽed tɩ kɩɩsda Wẽnnaam noyã pa gɩdg ye. Sẽn paase, a bãngame tɩ televiziõ wã filim dãmb kẽer a sẽn da ket n getẽ pa sõma ye. A Mark sũur kasetã sõmblem sɩd paasame.—Yɩɩl Sõamyã 37:31.
18. Bõe n kɩt tɩ d sũy yaa noogo?
18 Tigimsã fãa pʋsẽ la bala, kiris-nebã tẽeb bɩʋʋng pa a yembr ye. B kẽer lebga kiris-neb sẽn nan pa kaoose. Woto yĩnga, bãmb dãmbã ned kam fãa sũur kaset tõeeme n pa keoogd-a yɛl kẽer taoore, n yaool n keoogd-a yɛl a taab taoore. Tõe tɩ yaa bilf-bilfu, la ne neb a taabã sõngr la b na n wa bãng a Zeova noyã neere, n paam sũur kaset sẽn sagend-b sõma. (Efɛɛz rãmba 4:14, 15) Zu-noogo, tigims kãens pʋsẽ me, d saam-biis wʋsg mii Biiblã noy hal sõma, la b mi b sẽn tõe n tũ-b to-to wã me neere. Sẽn paase, b ned kam fãa sũur kaset sagls zemsda ne Wẽnnaam noyã. Ad nin-kãensã “sẽn yaa sõma,” la sẽn mi tɩ bũmb nins sẽn tat Zusoabã yam fãa yaa “sõma” wã sʋk zĩndg sɩd nooma wʋsgo! (Efɛɛz rãmba 5:10) Woto yĩnga, bɩ d fãa modg n bao sũur kaset sẽn yaa sõma n sagend-d tɩ zemsd ne sɩdã tɩ d sakd Wẽnnaam, la d modg t’a kell n yɩ sõma wakat fãa.—Tɩt 1:1.
[Tẽngr note]
^ sull 8 Yʋʋmd 1983 sigr kiuug rasem 15 Gũusg Gasgã neng 30-1 wã pʋgẽ, b wilga yɛl kẽer sẽn kẽ-b kãadmã sẽn segd n tags b zug sõma.
Wãn to la y na n leoke?
• Bõe yĩng tɩ Kɛrɛt kiris-neb kẽer sũur kaset ra pa sõma?
• Bõe yĩng tɩ kiris-neb a yiib sũur kaset sẽn yaa sõma yam-yãkr tõe n yɩ toor-toore?
• Sã n beẽ-beẽ, tõnd ned kam fãa sũur kaset segd n wa yɩɩ wãna?
[Zãmsgã sogsgã]
[Kart, seb-neng 18]
(Yaa sebrã meng pʋgẽ la y tõe n yã fãa)
Sisill
GƐRƐS
Kɛrɛt
AAZIMINEER
Sɩpr
MEDITERANE MOGRÃ
[Foto, seb-neng 20]
Yel-yɛng taoore, kiris-neb a yiib yam-yãkr tõe n yɩɩ toor-toore