Yãmb tũnugda ne segb fãa n kɩt kasetã bɩ?

“RẼ YĨNGA sɩd b sẽn pa tõe n kɩɩs beeme bɩ?” B soka Poloyn tẽngã karen-biis sok-kãnga, n kõ-b weer tɩ b segl b mens n wa leok n bao kũuni. Sokrã tẽngre, b paasa woto: “Sɩd b sẽn pa tõe n kɩɩs bãngr pa tar yõod ye. A pa tar yõod ne ned baa a ye. Sɩd a woto buud pʋd n kae ye.” A Zeova Kaset soab a ye yʋʋr sẽn boond t’a Agata n tar yʋʋm 15 n be kolɛɛs yãka yam n na n tũnug ne sok-kãnga n kɩt tɩ nebã bãng a sẽn tẽed bũmb ninga.

A Agata reng n pʋʋsa a Zeova n kos a sõngre, n yaool n na n gẽes sɛb sẽn gomd rẽ yelle. A yãa sõsg yʋʋm 1995 sẽoog kiuug pipi daar Gũusg Gasgã pʋgẽ, n tik bũmb ning b sẽn yet beenẽ wã n leok sokrã. A lebs n tẽega sokr ning a Põns Pɩlat sẽn da sok a Zezi wã. A ra soka woto: “Sɩd yaa bõe?” (Zã 18:38) A Agata paasame t’a Pɩlat sẽn sok woto wã ra yaa paoogr buudu. Yaa wa a sẽn da na n sokẽ woto: ‘Sɩda? Yaa bõe la rẽ? Sɩd kae ye!’ A Agata yeelame t’a Pɩlat sokrã tẽeg-a-la sokr ning b sẽn sok bãmbã, la bũmb ning b sẽn paas sokrã tẽngrã.

Rẽ poore, a goma neb kẽer sẽn tagsd tɩ sɩdã bee ne ned kam fãa tagsgã yelle. Rat n yeel tɩ b sẽn tẽed tɩ ned tõe n yetame tɩ bũmb yaa sɩda, tɩ ned a to me yetẽ tɩ bõn-kãng pa sɩda, tɩ b yiibã fãa tõe n tar “bʋʋm.” Sẽn pʋgde, a soka sogs a wãna. Ad sokr a ye a sẽn soke: “Ãnd n da na n sak n kẽ sɩlga, sã n da mikẽ lame tɩ d pa kɩs sɩd tɩ bãngdbã sẽn wilgd sɩlg sẽn segd n yɩg to-to tɩ yell pa zĩndã yaa sɩda?” A sogsgã poore, a goma Biiblã yell n yeel woto: “Bũmb ning sẽn kɩt tɩ d tõe n bas yard ne Wẽnnaam Gomdã yaa t’a wilgda yɛl kẽer sẽn yaa sɩd b sẽn pa tõe n kɩɩse. A Agata wilgame t’a tẽedame tɩ ned sã n tʋll n bãng sɩd b sẽn pa tõe n kɩɩse, a soab segd n maaga a yĩng n bao.

A Agata paama dipolom sẽn pa wõnd a taabã rẽnda, a tʋʋmdã sẽn yɩ neer yĩnga. A karen-saam dãmbã kɩtame t’a karem-a n wilg a karen-bi-taasã. B kẽer sakame n na n zãms Biiblã ne-a. A Agata sũur yɩɩ noogo, a sẽn tõog n tũnug ne sokr ning b sẽn sokã n kɩt tɩ neb wʋsg bãng a sẽn tẽed bũmb ninsã. D sã n tũnugd ne segb d sẽn paam fãa n wilgd nebã d tẽebã, tõe n woma biisi. Segb bʋs la yãmb me tõe n tũnug n maan boto?