Yãmb kengda neb a taabã raood bɩ?

TÃNG ning b sẽn boond tɩ Hɛrmo wã zãntlem taa metr 2814. A zug-tẽn-sʋkã pida ne sa-lamd bɩ neez yʋʋmdã fãa pʋgẽ la bala, tɩ kɩtdẽ tɩ walmã sẽn mi n wat yʋngã wẽed tãngã sa-lamdã tɩ lebgd meenem n sigd tɩɩsã buud fãa sẽn be tãngã pendã zutu. Israɛll sɩpaolgã sẽn kaoosdã wakat sã n da ta, yaa meenem kãngã sẽn yit tãngã zugã bal n da sõngd tɩ moodã la tɩɩsã pa kʋɩtẽ ye.

Yɩɩl Sõamyã sebrã pʋgẽ, b maka a Zeova nebã lagem-n-taarã ne “Hɛrmo tãngã meenem sẽn sigd tɩ ta Sɩõ tãens zutu.” (Yɩɩl Sõamyã 133:1, 3) Wala Hɛrmo tãngã meenemã sẽn sõngd tɩɩsã tɩ b pa kʋɩtẽ wã, tõnd me tõe n sõnga neb a taabã. Wãn to la d tõe n sõng-ba?

A Zezi mak-sõngã

A Zezi Kirist ra kengda neb a taabã raoodo, tɩ baa f sã n zĩnd ne-a bilf bal la f sũur sẽn yɩt noogo. Wala makre, Evãnzill gʋlsd a Mark yeelame t’a Zezi ‘talla kambã a nugẽ n tik bãmb ne a nus n ning b zut barka.’ (Mark 10:16) Tags-y n ges kom-kãensã sũy sẽn da yɩ noog to-to!

Yʋng ning sẽn deng a Zezi kũumã, a waasa a karen-biisã naoã. A sik-m-mengã ra tog n zãms-b-la bũmb wʋsgo. Rẽ poore a yeel-b-la woto: “Mam kõo yãmb mamsg tɩ y maan wa mam me sẽn maan yãmbã.” (Zã 13:1-17) N-yẽe, bãmb me ra segd n yɩɩ sik-m-mens rãmba. La baa ne b sẽn da pa wʋm a Zezi gomdã võor sõma n yik yʋn-kãng bal n wẽed no-koɛɛm ne taab n dat n bãng bãmb sʋkã ned ning sẽn yaa kãseng n yɩɩdã, a Zezi sũurã pa yik ye. A maaga a meng n sõng-b tɩ b tags yellã zug neere. (Luk 22:24-27) Baa “nebã sẽn gom [a Zezi] wẽnga, bãmb ka lebs wẽng ye.” La b “sẽn maan bãmb wẽnga, bãmb ka zab ne bãmb ye, la bãmb basa bãmb yɛlã fãa sẽn kaood-a bʋʋd tɩrga nugẽ.” D segd n tũu a Zezi mak-sõngã.—1 Pɩɛɛr 2:21, 23.

A Zezi yeela woto: “Bɩ y rɩk mam nao wã n zãms bũmb nins mam sẽn na n wilg yãmbã. Tɩ bõe, mam yaa sũ-mar soaba la m yaa nin-nana la yãmb na paam vʋʋsgo.” (Matɩe 11:29) Tags-y n ges-y d sẽn na n paam t’a Zezi meng zãms tõndo! A Zezi ba-yirã neb sẽn wʋm a sẽn zãmsd nebã b karen-doogẽ wã, b yɛɛsame n sok tɩ: “Bãmb paama yam kãngã ne bõn-bãn-kãensã yɛ?” (Matɩe 13:54) D sã n karemd kibay nins sẽn gomd a Zezi vɩɩmã la a koe-moonegã yelle, tõe n sõnga tõnd tɩ d bãng d sẽn na n kengd neb a taabã raood to-to. D ges a Zezi sẽn tũnug ne gom-nood la manesem n sõng nebã to-to tɩ yaa mak-sõng n kõ tõndo.

D tall goam sẽn kengd raoodo

Roog siigr yaa nana n yɩɩd a meebo. Siigrã la meebã yell b sẽn gomd ka wã gomda tõnd no-goamã me yelle. D sẽn pa zems zãngã yĩngã, d fãa kongdame. Rĩm a Salomo yeelame tɩ “nin-tɩrg ka be dũniyã zug n maand tɩrg n ka kongdẽ ye.” (Koɛɛg Soaba 7:20) Ned sã n beege, pa yãt n kaoos tɩ d bãng a kongrã n gom-a põaas ye. (Yɩɩl  Sõamyã 64:3-5) La keng nebã raood ne d no-goam baooda modgre.

A Zezi kenga nebã raood ne a no-goamã. A moona nebã Wẽnnaam Rĩungã koe-noogã tɩ b sũy yɩ noogo. (Luk 8:1) Neb nins sẽn lebg a karen-biisã, a wilg-b-la a saasẽ Ba wã sẽn yaa a soab vẽenega, tɩ keng b raoodo. (Matɩe 11:25-27) Pa lingr tɩ nebã ra nong a Zezi zĩigẽ ye!

Gʋlsdbã la Fariziẽ rãmbã yẽ, nebã yell ra pa pak-b ye. A Zezi yeela woto: “Bãmb nonga naam zĩndg zĩis kibsa zĩisẽ la karen-dot pʋsẽ.” (Matɩe 23:6) Sãmbg sẽn ka be, b ra paoogda naong rãmbã, hal n yet woto: “Kʋʋng kãngã ka mi tõog ye, b yaa zu-beed rãmba.” (Zã 7:49) B manesem kãngã ra pa kengd raood baa bilf ye!

Nong n yaa d no-goamã n wilgd tõnd mengã sẽn yaa ned ninga, la d sẽn get neb a taabã to-to. A Zezi yeela woto: “Nin-sõng sũur sẽn pid ne sõmblmã, a yiisda bõn-sõama. La nin-wẽng sũur sẽn pid ne wẽngã, a yiisda bõn-wẽnse. Tɩ bõe, sũur sẽn pid ne bũmb ninga, noor gomda bõn-kãense.” (Luk 6:45) Bõe la d tõe n maan n tõog n keng neb a taabã raood ne d no-goamã?

Bũmb a ye sẽn be yaa tõnd sẽn na n tags la d yaool n gome. Yelbũn 15:28 yeelame tɩ “nin-sõng tagsdame n yaool n leokdẽ.” B sẽn yeel tɩ tagsã pa bũmb sẽn segd n dɩk sẽk ye. D sã n tags bilf bala, d na n bãnga d sẽn na n leok to-to tɩ keng raoodo. D tõe n soka d mens woto: ‘M sẽn dat n yeel bũmb ningã yaa gom-noog bɩ? Gomdã yaa sɩd bɩ yaa munaafɩglem? Yaa “gomd sẽn zems a wakat bɩ?” Na n kenga m sõsd-n-taasã raood bɩ?’ (Yelbũna 15:23) D sã n bãng tɩ d sẽn dat n yeel bũmb ningã pa kengd raoodo, wall pa a togsg wakate, bɩ d modg n da sak t’a yi d noorẽ ye. D tõeeme meng n bao gomd sẽn kengd raood la sẽn zems togsg n togse. D sã n gomd n pa gũusdẽ, “zabda wa sʋʋg sẽn wãag neda,” la sã n yaa gom-noodo “wata ne laafɩ.”—Yelbũna 12:18.

Bũmb a to me sẽn tõe n sõng tõnd yaa d sẽn na n tags bũmb ning sẽn kɩt tɩ d tẽed-n-taasã tar yõod a Zeova nifẽ wã zugu. A Zezi yeela woto: “Ned ka tõe n wa mam nengẽ tɩ ka m Ba sẽn tʋm-a maamã n bool-a ye.” (Zã 6:44) A Zeova geta neb nins sẽn tũud yẽ ne b sũy fãa wã zʋg-sõma, baa neb nins tõnd sẽn tagsd tɩ b pẽnegr pa nana wã. D sã n modg n get b zʋg-sõma wã, na n sõnga tõnd tɩ d ra gom-b wẽng ye.

D sõng neb a taabã

Neb nins sẽn da namsdã nimbãaneg ra tara a Zezi. Sɩd-sɩda, a “sẽn yã kʋʋngã, b nimbãaneg yõka [yẽnda], tɩ bõe, bãmb sũyã sãama wʋsgo la bãmb pãnga fãa sɛɛme. Bãmb yaa wa piis sẽn ka tar kɩɩm ye.” (Matɩe 9:36) La a Zezi pa kʋm b nimbãaneg bal ye, a sõng-b lame. A yeela woto: “Bɩ y wa mam nengẽ, yãmb fãa sẽn yɛ la sẽn tʋkd zɩɩb sẽn yaa zɩsgo, la mam na kõ yãmb vʋʋsgo. Tɩ bõe, mam yɛla yaa naana, la mam zɩɩb yaa faasga.”—Matɩe 11:28, 30.

Rũndã-rũndã, d vɩya wakat sẽn yaa toog wʋsg  sasa. (2 Tɩmote 3:1) Neb wʋsg tara “yɩɩr ne dũniyã yɛla.” (Matɩe 13:22) Kẽer me tara zu-loees bɩ yɛl a taab sẽn namsd-b tɩ yaa bãmb bal n mi. (1 Tesalonik rãmba 5:14) La bõe la d tõe n maan n sõng sẽn dat-b sõngrã? Wala Kiristã sẽn maan to-to wã, tõnd me tõe n sõng-b lame tɩ b yɩɩrã booge.

Neb sãnda nong n gomda b zu-loeesã yelle ne neb a taabã sẽn na yɩl n paam sõngre. Neb nins sũy sẽn sãamã sã n wa tõnd nengẽ n dat sõngre, rẽ yĩnga d maagda d yĩng n kelgd-b sõma bɩ? Sẽn na yɩl n yɩ neb sẽn kelgd sõma, yaa tɩlae tɩ d kibl d menga. La woto baoodame tɩ d yok d tʋb n kelg a soabã sẽn yet bũmb ningã, la d ra yãg n zoe n tagsd d sẽn na n leok to-to, bɩ d sẽn na n gãneg yellã neng ning ye. D sã n kelgd sõma woto, d wilgdame tɩ b yell pak-d lame.

Kiris-neb tigingã pʋgẽ, yɛl wʋsg n be d sẽn tõe n maan tɩ keng d tẽed-n-taasã raoodo. Wala makre, d tõe n baoa tigingã neb nins sẽn ka laafɩ sõma wã n dɩk minit a wãn bal n sõs ne-b n keng b raoodo, nand tɩ tigisgã sɩnge bɩ a sẽn wat n sɛ. D sebrã zãmsg sullẽ wã me, d segd n gũusdame n get neb nins sẽn pa watã. D tõe n wẽe bãng n sok b yell bɩ n bao n bãng d sẽn tõe n sõng-b to-to.—Filip rãmba 2:4.

Tigingã kãsem dãmbã tara tʋʋm wʋsg tigingã pʋgẽ. La d sã n tũud b noyã la d sikd d mens n sakd n tʋmd tʋʋm nins b sẽn kõt-dã, d sõngd-b lame tɩ b tʋʋmã lebgd nana. Wẽnnaam Gomdã yeta woto: “Bɩ y sak yãmb taoor dãmba la y reeg bãmb goama, tɩ bõe, bãmb gũuda yãmb sɩɩse, bãmb sẽn na n wilg yɛla fãa Wẽnnaam taoora yĩnga. Bɩ a yɩ woto tɩ b maan ne sũ-noogo la ka ne sũ-sãoong sẽn ka na n yɩ yãmb nafr ye.” (Hebre dãmba 13:17) D sã n sakd ne yamleoogo, d na n tõog n kenga neb nins ‘sẽn tʋmd b tʋʋmd neerã’ raoodo.—1 Tɩmote 5:17.

D gomd gom-nood la d sõngd neb a taabã

Yaa walem bɩ wulg ninsaal nif sẽn pa tõe n yã la sẽn wat n tigimd taab bilf-bilf n lebg meenem n sigd tɩ zĩigã maagdẽ wã. Sẽn na yɩl n sõng neb a taabã me, pa tʋʋmd a ye bal la tõnd segd n maan ye. Yaa d sẽn na n tũ Kiristã mak-sõngã n gomd gom-nood la d tʋmd tʋʋm sõma wakat fãa.

Tʋm-tʋmd a Poll gʋlsa woto: “Bɩ y nong taab wʋsg ne ba-biis nonglem,” la “y waoog taaba.” (Rom dãmba 12:10) Bɩ d tũ a Poll saglgã n sɩd keng neb a taabã raoodo, ne d no-goam la ne d manesem.

[Foto, seb-neng 31]

Ned sẽn kelgd sõma kengda neb a taabã raoodo

[Foto rãmba, seb-neng 32]

Hɛrmo tãngã meenem sõngdame tɩ tɩɩsã la moodã pa kʋɩtẽ ye