Yãmb seglame n sa n gũud a Zeova daarã bɩ?
Yãmb seglame n sa n gũud a Zeova daarã bɩ?
“[A Zeova] ra-kãsengã kolgame, a wata tao-tao wʋsgo.”—SOFONI 1:14.
1-3. a) Bõe la Biiblã yet a Zeova daarã wɛɛngẽ? b) A Zeova ra-bʋg n wate?
A ZEOVA ra-kãsengã pa daar a yembr yell ye. Yaa sasa ning a sẽn yãk n na n sãam nin-wẽnsã, la sasa kãng me pa wakat a wãn bal ye. Wẽn-kɩɩsdbã tara bʋʋm n na n zoe ra-kãngã, bala na n yɩɩ lik daare, sũ-puugr ne sũ-yikr daare, la toog ne yel-pakr daare. (Ezai 13:9; Amos 5:18-20; Sofoni 1:15) A Zoɛll bãngr-gomdã yeta woto: “Zusoaba raar kolgdame. A na n waa ne sãoong sẽn yit Sẽn-tõeyã-fãa wã nengẽ. Baraar na n yɩɩ toogo.” (Zoɛll 1:15) La sasa kãng me, Wẽnnaam na n fãaga nin-tɩrsã.—Yɩɩl Sõamyã 7:11.
2 B sã n gomd a Zeova daar yelle, pa sasa ning a sẽn na n wa kao dũni-wẽn-kãngã bʋʋdã yell bal la b gomd ye. Yaa sasa nins a sẽn kao nin-wẽns bʋʋd tɩ loogã me. Wala makre yʋʋmd 607 sẽn deng a Zezi rogmã, ra-kãng buud zĩnda Zerizalɛm, a Zeova sẽn kɩt tɩ Babilon nebã wa sãam tẽngã sasa. (Sofoni 1:4-7) Yʋʋmd 70 a Zezi rogmã poor me, Wẽnnaam kɩtame tɩ Rom sodaasã wa sãam Zʋɩf rãmbã tẽngã, b sẽn da zãgs yẽ Bi-riblã. (Daniɛll 9:24-27; Zã 19:15) Biiblã leb n wilgame t’a Zeova daar n wate, la tɩ sasa kãngã a na n ‘zaba ne buudã’ fãa. (Zakari 14:1-3) Wẽnnaam vẽnega tʋm-tʋmd a Poll t’a gom ra-kãng yell la a gom Kirist naamã rɩɩb sẽn sɩng yʋʋmd 1914 me yelle. (2 Tesalonik rãmba 2:1, 2) Yʋʋmd 2007 wã, a Zeova Kaset rãmbã yãka Sofoni 1:14 tɩ yɩ yʋʋmdã verse. Verse wã yeta woto: ‘A Zeova ra-kãsengã kolgame.’ A Zeova daarã sẽn sɩd kolgd wʋsgã yĩnga, verse kãngã ra zemsame.
3 Sẽn mik tɩ Wẽnnaam ra-kãsengã kolgdame wã, yaa masã la d segd n segl d mens sõma n gũ. La wãn to la y tõe n segl y mens n gũ ra-kãngã? Yãmb nee bũmb y sẽn segd n maan n paas bɩ?
Segl-y y mens sõma n gũ
4. A Zezi segla a meng n gũ bõe?
4 A Zezi Kirist sẽn wa n gomd dũni-kãngã saab yellã, a yeela a karen-biisã tɩ b segl b mens n gũ. (Matɩe 24:44) A Zezi sẽn wa n yet woto wã tɩ yẽ mengã ra seglame n sa n na n sak kũum. (Matɩe 20:28) A Zezi sẽn segl a meng to-to wã zãmsda tõnd bõe?
5, 6. a) Wãn to la tõnd sẽn nong Wẽnnaam la nebã tõe n sõng-d tɩ d segl d mens n gũ a Zeova daarã? b) Nonglmã wɛɛngẽ, mak-sõng bʋg la a Zezi kõ tõndo?
5 A Zezi ra nonga a Zeova ne a sũur fãa la a nong a noyã me. Hebre dãmb 1:9 wã gomda a Zezi yell woto: “Fo nonga tɩrlem la f kisa wẽnga. . . . Yaa woto yĩng la fo Wẽnnaam tik fo zug ne sũ-noog kaam n yɩɩd fo tũud-n-taasa fãa.” A Zezi sẽn da nong a saasẽ Ba wã yĩnga, a kell n sak-a-la wakat fãa. Tõnd me sã n nong Wẽnnaam la d tũud a noyã, a na n fãag-d lame. (Yɩɩl Sõamyã 31:24) Leb n yaa nonglem kãng buudu, n paas tõnd sakrã n na n sõng-d tɩ d segl d mens n gũ a Zeova ra-kãsengã.
6 A Zezi ra nonga nebã hal wʋsgo. ‘B nimbãanegã yõk-a lame, tɩ bõe, bãmb sũyã sãama wʋsgo la bãmb pãnga fãa sɛɛme. Bãmb yaa wa piis sẽn ka tar kɩɩm ye.’ (Matɩe 9:36) Rẽ n so t’a Zezi moon nebã koe-noogã. Nonglmã me n kɩt tɩ tõnd moond Rĩungã koe-noogo. Tõnd sẽn nong Wẽnnaam la d nong nebã kɩtame tɩ d moond koɛɛgã ne yẽesem, tɩ rẽ me sõngd tõnd tɩ d segend d mens n gũud a Zeova ra-kãsengã.—Matɩe 22:37-39.
7. Tõnd sẽn gũud a Zeova daarã, bõe yĩng tɩ d tõe n paam sũ-noogo?
7 A Zezi ra nonga a Zeova raabã maanego. (Yɩɩl Sõamyã 40:98, NW) Tõnd me sã n nong a Zeova raabã maanego, d na n tʋma a tʋʋmdã ne yamleoogo. Wa a Zezi, tõnd me na n yɩɩ kõtba, tɩ rẽ kõ-d sũ-noog hakɩka. (Tʋʋma 20:35) Vẽenega, ‘sũ-noog ning a Zeova sẽn kõt tõndã na n yɩɩ tõnd pãnga.’ Sũ-no-kãng na n sõng-d lame tɩ d segl d mens sõma n gũ Wẽnnaam ra-kãsengã.—Nehemi 8:10.
8. Bõe yĩng tɩ d segd n pʋʋsd a Zeova wakat fãa?
8 A Zezi sẽn da nong n pʋʋsd Wẽnnaam ne a sũur fãa wã yĩnga, sõng-a lame t’a segl a meng n tõog n tall a tẽebã kãn-kãe makr taoore. A Zã sẽn wa n lisd-a wã sasa, a pʋʋsa Wẽnnaam. A leb n pʋʋsa yʋng tõr n yaool n na n yãk a tʋm-tʋmdb 12 wã. (Luk 6:12-16) Yʋng ning sẽn deng a kũumã me, a pʋʋsa Wẽnnaam ne a sũur fãa. Ned kae sẽn na n karem Biiblã zĩig ning sẽn gomd rẽ yellã t’a yĩng pa sidg ye. (Mark 14:32-42; Zã 17:1-26) Yãmb me nong n pʋʋsda Wẽnnaam wa a Zezi bɩ? Pʋʋs-y a Zeova wakat fãa la ne y sũur fãa, n kos-a t’a kɩt tɩ vʋʋsem sõngã wilg-y sore. A sã n wa leok y pʋʋsgã n wilg-y sor bɩ y sak n tũ. Wẽnnaam ra-kãsengã sẽn kolgd wʋsgã yĩnga, yaa tɩlae tɩ tõnd ne yẽ zoodã yɩ sõma. Bɩ d ket n pʋʋsd a Zeova wakat fãa n da bas ye.—Zak 4:8.
9. A Zeova yʋʋrã waoogr sã n pak tõndo, wãn to la rẽ na n sõng-do?
9 A Zeova yʋʋrã waoogr me sẽn da pak a Zezi wã yĩnga, sõng-a lame t’a segl a meng n tõog yɛl nins a sẽn paamã. A wilga a karen-biisã meng tɩ b sã n wa pʋʋsd Wẽnnaam bɩ b kos me t’a ‘yʋʋrã yɩ ne waoogre.’ (Matɩe 6:9) Tõnd me sã n dat ne d sũur fãa t’a Zeova yʋʋrã paam waoogre, d na n maana d sẽn tõe fãa n da wa maan bũmb sẽn na n sãam a yʋʋrã ye. D sã n maan woto, na n sõng-d lame tɩ d segl d mens sõma n gũ a Zeova ra-kãsengã.
Bõe la d tõe n maan n paase?
10. Bõe yĩng tɩ d segd n fees d mense?
10 A Zeova daarã sã n wa beoogo, rẽ yĩnga na n mikame tɩ d seglame n sa bɩ? Tõnd ned kam fãa segd n feesa a meng n ges zĩis kẽer sã n bee a yel-manesmã pʋgẽ t’a segd n manege. Kũumã sẽn tõe n dɩk-d wakat buud fãa wã yĩnga, tõnd ned kam fãa segd n modgame n maneg a zoodã ne Wẽnnaam daar fãa. (Koɛɛg Soaba 9:11, 12; Zak 4:13-15) Bɩ d ges yɛl kẽer sẽn tõe n sõng-d rẽ wɛɛngẽ.
11. Bõe la yãmb tõe n maan Biiblã kareng wɛɛngẽ?
11 Bũmb a yembr sẽn tar yõod yaa d tũ “tʋm-tʋmd sẽn tũud sɩdã” sẽn sagend tõnd tɩ d karem Biiblã daar fãa wã. (Matɩe 24:45) Y tõe n yãka yam tɩ yʋʋmd fãa, y na n karma Biiblã tõr la y bʋgs y sẽn karemdã zugu. Yãmb sã n karemd sak a naas daar fãa, y na n tõog n karma Biiblã sags 1189 wã fãa yʋʋmd a ye. Israɛll rĩm fãa ra segd n karma a Zeova Tõogã “daar fãa a yõor tɛka.” D tõe n yeelame t’a Zozue me maana woto. (Tõodo 17:14-20; Zozue 1:7, 8) Yaa vẽeneg tɩ tara yõod tɩ tigingã kãsem dãmb karem Biiblã daar fãa, bala rẽ n na n sõng-b tɩ b tõog n zãms nebã “bũmb nins sẽn zems sɩd koɛɛgã.”—Tɩt 2:1.
12. A Zeova daarã sẽn kolgdã segd n kɩtame tɩ d maan bõe?
12 A Zeova daarã sẽn kolgdã yĩnga, d segd n kẽndã tigissã wakat fãa, la d sã n ta me bɩ d modg n kõ leoore. (Hebre dãmba 10:24, 25) Woto na n sõng-d lame tɩ d tõog n moon koɛɛgã sõma n paase, n tõog n sõng neb nins sẽn dat vɩɩm sẽn-kõn-sa wã. (Tʋʋma 13:48) Bũmb a taab me la y tõe n maan tigingã pʋgẽ, wala makre y tõe n sõnga sẽn kʋʋl-bã la y sõng kom-biisã tɩ b tʋm Wẽnnaam tʋʋmdã n paase. Y sã n maand woto, y tõe n paama sũ-noog wʋsgo.
Yãmb sẽn tar manesem ning ne neb a taabã
13. Nin-paalgã yeelgr wɛɛngẽ, sok-bʋs la d segd n sok d mense?
13 A Zeova daarã sẽn ta n sa wã yĩnga, d segd n modg n ‘yeelga nin-paalgã Wẽnnaam sẽn naan wa a meng wẽnegã, ne tɩrlem la pʋ-peelem sẽn wat ne sɩdã.’ (Efɛɛz rãmba 4:20-24) Y sã n modg n tall zʋg-sõma, nebã na n yãame tɩ y ‘kẽnda wa sẽn zems Wẽnnaam vʋʋsem sõngã,’ la tɩ y tara a biisã. (Galat dãmba 5:16, 22-25) Yãmb ne y zakã rãmb tara bũmb takɩ y sẽn maand tɩ wilgdẽ tɩ y yeelga nin-paalgã bɩ? (Kolos rãmba 3:9, 10) Wala makre, yãmb maanda nebã neer tɩ y tẽed-n-taasã la neb a taabã neẽ bɩ? (Galat dãmba 6:10) Tõnd sã n zãmsd Biiblã wakat fãa, na n sõng-d lame tɩ d tall zʋg-sõma, n tõog n segl d mens n gũ a Zeova daarã.
14. Ned sã n dat n paam yok-m-menga, bõe yĩng t’a segd n pʋʋs n kos vʋʋsem sõngã?
14 La sã n mik tɩ yãmb sũurã yikda tao-tao tɩ y rat yõk-m-menga? Wẽnnaam vʋʋsem sõngã tõe n sõnga tõnd tɩ d paam yõk-m-menga. Woto yĩnga, bɩ d pʋʋs n kos vʋʋsem sõngã, wa a Zezi sẽn yeelã. A yeela woto: “Bɩ y kos tɩ b na kõ-yã, bɩ y bao tɩ y na yã, bɩ y wẽ kʋɩleng tɩ b na pak n kõ-yã. . . . A sã n yaa woto tɩ yãmb a nin-wẽnsa bãng tɩ kõ yãmb kamba kũun sẽn yaa sõama; dẽ, sẽn yɩɩda yãmb [saasẽ] Ba kõn kõ neb nins sẽn kot bãmba Sɩɩg Sõng bɩ?”—Luk 11:9-13.
15. Yãmb ne y tẽed-n-taag moor sã n yõs taaba, bõe la y segd n maane?
15 La sã n mik tɩ yãmb ne y tẽed-n-taag moor n yõs taaba. Modg-y n maneg-y yellã, tɩ laafɩ la zems-n-taar zĩnd tigingã pʋgẽ. (Yɩɩl Sõamyã 133:1-3) Tũ-y a Zezi sẽn sagl bũmb ning tɩ be Matɩe 5:23, 24, bɩ Matɩe 18:15-17 pʋgẽ wã. Yãmb sã n basame tɩ wĩndgã lʋɩ tɩ y sũurã ket n pa sigi, bɩ y modg n maneg yellã tao-tao. Naoor wʋsgo, yãmb sã n sak n kõ sugr bala yellã manegdame. A Poll gʋlsa woto: ‘Bɩ yãmb maan taab neere, la y paam sũ-bʋgsem, la y kõ taab sugr wa Wẽnnaam sẽn kõ yãmb sugr Kirist yĩngã.’—Efɛɛz rãmba 4:25, 26, 32.
16. Kãadmã pʋgẽ, wakat bʋg la nonglem la bʋgsem yaa tɩlae?
16 Kãadmã pʋgẽ me, raoã ne pagã segd n nonga taab wʋsg la b kõt taab sugri. Sã n mikame tɩ y segd n paasa y nonglmã ne y pagã bɩ y sɩdã, bɩ y modg n maan dẽ, ne Wẽnnaam la a Gomdã sõngre. Rẽ yĩnga yãmb neeme tɩ yãmb mengã segd n maana bũmb sẽn na yɩl n tũ sagl ning sẽn be 1 Korẽnt dãmb 7:1-5 wã pʋgẽ, sẽn na yɩl n paas y zems-n-taarã la kɩt tɩ yãmb nin-yend ra wa yo bɩ? Yaa vẽeneg tɩ zĩ-kãngã wɛɛngẽ wã, raoã bɩ pagã segd n zãmsa nonglem la bʋgsem.
17. Ned sã n maan yel-wẽn-kãsenga, bõe ne bõe la a segd n maane?
17 La sã n mikame tɩ yãmb maana yel-wẽn-kãsenga? Modg-y n maneg-y yellã tao-tao. Bao-y tigingã kãsem dãmb sõngre. B pʋʋsgã n paas sagls nins b sẽn na n kõ yãmbã na n sõng-y lame tɩ y lebg n maneg y zems-n-taarã ne Wẽnnaam. (Zak 5:13-16) Pʋʋs-y a Zeova n kos sugri. Sã n pa rẽ, y na n wa ningda y meng taale, tɩ y yamã me pa gãe bãan ye. A buud paama a Davɩɩde, la a sẽn wa n vẽneg a yellã n togs a Zeova wã, a paama a menga. A mengã gʋlsa woto: “Bark bee ned ninga zugu sẽn paam a yel-wẽna yiisgu, la sẽn paam sugr a kongra yĩnga. Bark bee ned ninga zugu Zusoaba sẽn ka geelgd a yel-wẽna ye, la zãmb sẽn ka be a sũur pʋgẽ ye.” (Yɩɩl Sõamyã 32:1-5) A Zeova kõta yel-wẽn-maandb sẽn tek yam n kos sugrã sugri.—Yɩɩl Sõamyã 103:8-14; Yelbũna 28:13.
D ra yɩ dũniyã rẽnd ye
18. Tõnd manesem segd n yɩɩ wãn to ne dũni-wẽn-kãngã?
18 Yaa vẽeneg tɩ tõnd fãa gũuda dũni paalg ning tõnd saasẽ Ba wã sẽn pʋlem tõndã ne yãgbo. La tõnd manesem segd n yɩɩ wãn to ne dũni-wẽn-kãngã sẽn zãr ne Wẽnnaamã? A Sʋɩtãan sẽn yaa “dũniyã naabã” pa tõog a Zezi Kirist ye. (Zã 12:31; 14:30) Tõnd me pa rat t’a Sʋɩtãan ne a dũniyã tõog-d ye. Rẽ n so tɩ d segd n tũ tʋm-tʋmd a Zã saglgã. A yeela woto: “Bɩ y ra nong dũniyã walla bũmb nins sẽn be dũniyã pʋgẽ wã me ye.” Sagl-kãngã yaa sõma, bala “dũniyã ne a ratem wẽnga me loogdame, la ned ninga sẽn maand Wẽnnaam daab paada wakat sẽn ka sɛta.”—1 Zã 2:15-17.
19. B sagenda kom-biisã tɩ b maan bõe?
19 Yãmb sõngda y kambã tɩ b ‘gũusd b mens ne dũni-kãngã’ bɩ? (Zak 1:27) A Sʋɩtãan dat n yõga yãmb kambã wa ned sẽn yõgd zĩm to-to wã. Sigls wʋsg n be n dat n kɩt tɩ kom-bɩɩsã lebg a Sʋɩtãan dũniyã neba. La a Zeova Kaset rãmbã zoe n bee sigl ning sẽn na n põs-a dũni-wẽn-kãngã sãangã pʋgẽ. Dẽnd roagdbã segd n sagla b kambã tɩ b “maan Zusoaba tʋʋmd wʋsgo.” (1 Korẽnt dãmba 15:58) Wẽn-zoɛtbã segd n sõnga b kambã tɩ b bao n maan bũmb nins sẽn na n wa kõ-b sũ-noog la noog Wẽnnaam me sũurã, la sõng-b me tɩ b segl b mens n gũ a Zeova daarã.
Tags-y bũmb nins sẽn na n zĩnd a Zeova ra-kãsengã poorã yelle
20. Bõe yĩng tɩ d segd n tagsd vɩɩm sẽn-kõn-sa wã yelle?
20 Tõnd sã n tagsd vɩɩm sẽn-kõn-sa wã yelle, d na n tõog n gũu a Zeova daarã ne bas-m-yam. (Ziid 20, 21) Tõnd gũuda vɩɩm sẽn-kõn-sa wã arzãnã pʋgẽ, wakat ning d sẽn na n leb n paam keelem ning tõnd sẽn da tar d bi-bɩɩlem wakatã, la d paam sẽk wʋsg me n tõog n maan bõn-sõma la d bao n bãng a Zeova n paasã. Tõnd na n bãngd-a lame n paasd wakat fãa, bala tõnd sẽn mi bũmb ning a zug rũndã-rũndã wã yaa “bilf bala.” (Zoob 26:14) Ad sɩd na n yɩɩ sũ-noog wakate!
21, 22. Tõe tɩ tõnd na n zãmsa sẽn vʋʋg-bã bõe, la bõe la bãmb me na n zãms tõndo?
21 Arzãnã pʋgẽ, sẽn vʋʋg-bã na n togsa tõnd yɛl nins sẽn zĩnd pĩnd tɩ tõnd pa miẽ wã. A Enok na n togsa yẽ sẽn maan to-to n paam raood n tõog n togs nin-wẽnsã a Zeova koɛɛgã. (Ziid 14, 15) A Nowe na n togsa tõnd koglgã kaab sẽn yɩ to-to. La a Abrahaam ne a Saara na n togsa tõnd bãmb tagsg sẽn yɩ to-to, Wẽnnaam sẽn wa n yeel-b tɩ b bas b naar vɩɩmã Uur n tɩ vɩɩmd fu-rotẽ wã. D na n paamame me t’a Ɛstɛɛr togs a sẽn maan to-to n sõng a buudã neba, la a kɩt t’a Haman pa tõog n kʋ-bã. (Ɛstɛɛr 7:1-6) D tags n ges d sẽn na n wa zĩ n kelgd a Zonas t’a togsd a sẽn zĩnd zĩnfã pʋgẽ rasem a tãabã, bɩ n kelgd a Zã t’a togsd sũ-noog ning yẽ sẽn da tar a sẽn wa n lisd a Zezi wã. (Luk 3:21, 22; 7:28) Ad d na n bãnga yɛl wʋsgo!
22 Kiristã yʋʋm tusr naamã sasa, tõe tɩ d na n paama zu-noog n sõng sẽn vʋʋg-bã tɩ b bãng Wẽnnaam. (Yelbũna 2:1-6) Rũndã-rũndã, tõnd sã n zãms ned t’a bãng a Zeova la a sak n tũud-a, d sũyã noomame. La bɩ y tags masã n ges sũ-noog ning d sẽn na n paame, a Zeova sã n wa ning d modgrã bark tɩ d tõog n sõng pĩnd wẽndẽ dãmbã tɩ b bãng-a la b sak-a ne b sũy fãa!
23. Bõe la d segd n modg n maane?
23 Tõnd sẽn yaa a Zeova Kaset rãmbã, bark nins d sẽn paamd masã wã meng pa tõe n bãng n bilg ye. (Yɩɩl Sõamyã 40:6) Sẽn tɩ yɩɩd fãa, d tara mi-beoog ne bũmb nins a Zeova sẽn kõ tõndã, wala makre Biiblã, sɛb nins tʋm-tʋmd sẽn tũud sɩdã sẽn yiisdã, n paas vʋʋsem sõngã. (Ezai 48:17, 18) Baa tõnd yɛlã sẽn yaa to-to fãa, bɩ d modg n tʋm a Zeova tʋʋmdã ne d sũy fãa, n gũud a ra-kãsengã.
Y na n leokame tɩ bõe?
• A Zeova daarã yaa bõe?
• Wãn to la d tõe n segl d mens n gũ a Zeova daarã?
• Wẽnnaam da-kãsengã sẽn kolg wʋsgã yĩnga, bõe ne bõe la d tõe n maan n paase?
• Bõe la tõnd gũud a Zeova daarã loogr poore?
[Zãmsgã sogsgã]
[Foto, seb-neng 14]
A Zezi segla a meng n gũ namsgo
[Foto, seb-neng 17]
D na n wa paama zu-noog n sõng sẽn na n vʋʋg-bã tɩ b bãng a Zeova