Yãmb teenda a Zeova naamã bɩ?
Yãmb teenda a Zeova naamã bɩ?
“Bɩ y yeel bu-zẽmsa sʋk tɩ Zusoaba rɩta naam.”—YƖƖL SÕAMYÃ 96:10.
1, 2. a) Yʋʋmd 29 soabã zĩ-likr kiuugã pʋgẽ, yel-bʋg sẽn yɩ kãseng n zĩndi? b) Rẽ ra wilgdame t’a Zezi segd n maana bõe?
YƲƲMD 29 soabã zĩ-likr kiuugã pʋgẽ, yel-kãseng sẽn da nan zɩ n zĩnd n maane. Evãnzill gʋlsd a Matɩe goma rẽ yell n yeel woto: “A Zezi sẽn paam lisgu, b yii koomẽ wã, la gese, yĩngr pakame, la [a Zãmbatiis] yãa Wẽnnaam sɩɩg sẽn wẽnd walle, sẽn sigd [a Zezi] zugu. La gese, koɛɛg yii yĩngr n yeele: ‘Ad-a yaa mam Bi-nongre, mam sẽn nong ne m sũur fãa zãnga.’” Evãnzillã gʋlsdb a naasã fãa goma yel-kãngã yell b Evãnzill dãmbã pʋsẽ.—Matɩe 3:16, 17; Mark 1:9-11; Luk 3:21, 22; Zã 1:32-34.
2 Wẽnnaam sẽn kɩt tɩ vʋʋsem sõngã sig a Zezi zug vẽeneg woto wã wilgame tɩ yaa yẽ la a sẽn zae-a soabã, sẽn dat n yet tɩ Mesi wã bɩ Kiristã. (Zã 1:33) Baraare, b bãngame tɩ yaa yẽ la “yageng” ning b sẽn da sɩng n gũud hal daar zãrã. Yẽ la b sẽn yeel t’a Sʋɩtãan na n pogla a na-kãsenkãare, t’a pogl a Sʋɩtãan sẽn yaa a Zeova naamã bɛ-kãsengã zugã. (Sɩngre 3:15) Yagen-kãng la sẽn da yas a Zãmbatiis taoorã. Baraar tɛka, a Zezi bãnga vẽeneg t’a segd n mao n maana bũmb ning b sẽn tʋm-a t’a wa maan n wilg tɩ yaa a Zeova n segd ne naamã, la a maan bũmb nins a sẽn segd n maan Rĩungã luglg wɛɛngẽ wã.
3. Wãn to la a Zezi segl a meng sẽn na yɩl n tõog n pids tʋʋmd ning a sẽn da segd n tʋm n teel a Zeova naamã?
3 A Zezi reng n maana bũmb n na n segl a meng sõma n tõog n pids a tʋʋmdã. Biiblã yeta woto: “A Zezi sẽn pid ne sɩɩg sõngo, a yii Zʋrdẽ kʋɩlgã” pʋgẽ, “la sɩɩg sõng talla bãmb tɩ b kẽng weoogẽ.” (Luk 4:1; Mark 1:12) A Zezi tɩ rɩka rasem 40 tõr n bʋgs gomd ning a Sʋɩtãan sẽn wa ne Wẽnnaam naamã wɛɛngẽ wã zug sõma. A leb n bʋgsame n bao a sẽn na n maaneg n tõog n wilg t’a Zeova n sɩd tar sor n na n yɩ yĩngr la tẽng Naaba. Yel-kãnga a Sʋɩtãan sẽn wa ne wã paka malɛgsã la ãdem-biisã fãa. Woto yĩnga, yɩta sõma tɩ d maag d yĩng n ges a Zezi sẽn tõog n maan dẽ to-to wã, n bãng d me sẽn tõe n maaneg n wilg tɩ d teenda a Zeova naamã.—Zoob 1:6-12; 2:2-6.
A Sʋɩtãan kɩɩsgã lebga vẽenega
4. Bõe la a Sʋɩtãan maanẽ tɩ wilg vẽeneg tɩ yaa naamã poorẽ la a sẽn kɩɩsã?
4 Hakɩka, bũmb nins fãa sẽn maan a Zezi lisgã raarã baa a ye pa ling a Sʋɩtãan ye. Tao-tao bala, a sɩnga zabr ne Wẽnnaam “pagã” ‘yagen-kãsengã.’ (Sɩngre 3:15) A Sʋɩtãan maka naoor a tãab n na n kɩt t’a Zezi tõdg a Ba wã sẽn dat t’a maan bũmb ningã, la a bao a meng nafre. A sẽn mak a Zezi ne bũmb ning naoor a tãab-n-soabã wilga vẽeneg tɩ sɩd yaa naamã poorẽ la a sẽn kɩɩsã. A teesa a Zezi “dũniyã soolem fãa ne b naam” n yeel-a yaa: “Yãmb sã n na sak n wõgemd n waoog maam, mam na kõ yãmb bõn-kãensa fãa.” A Zezi sẽn da mi t’a Sʋɩtãan n sɩd so “dũniyã soolem fãa” wã yĩnga, a wilga naab ning yẽ sẽn teendã vẽenega. A yeel-a-la woto: “Sʋɩtãana, looge, tɩ bõe, a gʋlsame: ‘Waoog Zusoaba fo Wẽnnaam, la f sak bãmb bala.’”—Matɩe 4:8-10.
5. Tʋʋm bʋg sẽn pa nana la a Zezi ra segd n pidsi?
5 A Zezi wilga a vɩɩmã fãa pʋgẽ tɩ yaa a Zeova naamã teelg n pak-a n yɩɩda. A ra mii fasɩ tɩ sẽn na yɩl n wilg tɩ Wẽnnaam bal n segd n yɩ yĩngr la tẽng Naaba, a segd n kell n saka Wẽnnaam hal t’a Sʋɩtãan wa kʋ-a. A kũumã ra na n yɩɩ pagã “yagengã” na-kãsenkãar poglgo, wa bãngr-gomdã sẽn wilgã. (Matɩe 16:21; 17:12) A Zezi ra segd n kõo kaset me n wilg tɩ yaa ne Rĩungã maasem la a Zeova na n sãam a Sʋɩtãan la a kɩt tɩ laafɩ la bãan lebs n zĩnd yĩngr la tẽng pʋgẽ. (Matɩe 6:9, 10) Bõe la a Zezi maan n pids tʋʋm kãngã sẽn pa nana wã?
“Wẽnnaam soolem kolgame”
6. Wãn to la a Zezi wilgẽ tɩ yaa ne Rĩungã maasem la Wẽnnaam na n sãam Sʋɩtãanã tʋʋma?
6 A Zezi sẽn na n sɩng a tʋʋmdã, “a kẽnga Galile, n moond Wẽnnaam koe-noogo, n yetẽ: ‘Wakat taame, la Wẽnnaam soolem kolgame.’” (Mark 1:14, 15) A sɩd ra yeela woto: “Yaa tɩlae tɩ mam moon Wẽnnaam soolem koe-noog tẽns a taab me; tɩ bõe, b tʋma maam bõn-kãng yĩnga.” (Luk 4:18-21, 43) A Zezi saaga tẽnsã fãa ‘n moon Wẽnnaam soolmã koe-noogo.’ (Luk 8:1) Sẽn paase, a maana yel-soalem wʋsgo. Wala makre, a rɩlga neb kʋʋng ne yel-solemde. A tãsa seb-kãseng sẽn da rãmbd mogr tɩ sĩndi. A sãooga bãad rãmb la a vʋʋg kũ-rãmba. A Zezi wilga ne yel-solem-kãensã tɩ Wẽnnaam tõe n kɩtame tɩ wẽng la namsg ning fãa kɩɩsgã sẽn zĩnd Edɛnnã sẽn wa ne wã sa, “n sãam Sʋɩtãanã tʋʋma.”—1 Zã 3:8.
7. Tʋʋm bʋg la a Zezi zãms a karen-biisã, la b tʋʋmdã woma bi-bʋse?
7 Sẽn na yɩl tɩ Rĩungã koe-noog ta dũniyã tɛk fãa, a Zezi tigma a karen-biisã kẽer n zãms-b koɛɛgã sẽn moond to-to. Pipi, yɩ a tʋm-tʋmdb 12 wã la a tʋm “tɩ b tɩ moon Wẽnnaam soolem koɛɛgã.” (Luk 9:1, 2) Dẽ poore, a tʋma karen-biis 70 me tɩ b tɩ moon n yeel nebã woto: “Wẽnnaam soolem kolga yãmba.” (Luk 10:1, 8, 9) Karen-bi-kãens sẽn lebg n wa yeel a Zezi bãmb sẽn moon Rĩungã koɛɛg tɩ wom biis ninsã, a yeel-b lame yaa: “Mam yãa Sʋɩtãanã sẽn yi yĩngr n lʋɩ wa sa-yãgbo.”—Luk 10:17, 18.
8. Bõe la a Zezi wilg a vɩɩmã fãa pʋgẽ?
8 A Zezi moona koɛɛgã ne a sũur fãa n pa bas segb baa a ye tɩ loog t’a pa kõ kaset Rĩungã zug ye. A tʋma wĩntoog ne yʋngo, hal n sak n mong a meng yɛl kẽer sẽn yaa tɩlae. A yeela woto: “Waas tara bogdo la liuuli tara tʋgdo, la Ninsaal Biiga ka tar zĩig sẽn na n gãneg b zug ye.” (Luk 9:58; Mark 6:31; Zã 4:31-34) Bilf sẽn deng a Zezi kũumã, a yeela a Põns Pɩlat ne raood woto: “Yaa bõn-kãng yĩng la mam wa dũniyã n na n kɩs sɩd kaseto.” (Zã 18:37) A Zezi pa wa n na n wilg t’a yaa karen-saam-kãsenga, bɩ n na n maan yel-soalem wall a sak n ki n fãag ãdem-biisã bal ye. A wilga a vɩɩmã fãa pʋgẽ t’a waame n na n teel a Zeova raabã la a kõ kaset n wilg tɩ Wẽnnaam sɩd tõe n pidsa a raab kãng ne Rĩungã maasem.—Zã 14:6.
“Fãa pidsame!”
9. Wãn-wãn la a Sʋɩtãan maan n tõog n pogl Wẽnnaam pagã “yageng” na-kãsenkãare?
9 Bũmb nins fãa a Zezi sẽn maan Rĩungã yĩngã pa tol n yɩ a Sʋɩtãan sẽn yaa bɛ wã noog ye. Naoor wʋsgo, a tũnuga ne nanambsã la tũudmã taoor dãmb sẽn naag taab n yaa a tẽng zug “yagengã,” n tʋlg n na n kʋ Wẽnnaam pagã “yagengã.” A Zezi rogma tɛka, a Sʋɩtãan ne a poorẽ dãmbã pa tol n bas-a laafɩ ye. Yʋʋmd 33 soabã tʋʋlg ne tʋʋl-nif kiisã sʋka, ninsaal Biigã bɛ wa n tõog n yõk-a lame n pogl a na-kãsenkãare. (Matɩe 20:18, 19; Luk 18:31-33) Kiba-kãng sẽn be Evãnzill dãmbã pʋsẽ wã wilgda a Sʋɩtãan sẽn maan to-to n tõog n kɩt tɩ nebã pids a raabã vẽenega. A sɩnga ne a Zida Iskariote, la a kɩt tɩ maan-kʋʋdbã kãsma, gʋlsdbã, Fariziẽ rãmbã la Rom nebã ning a Zezi taale, la b nams-a t’a ki kũ-toaaga, kũum da-luk zugu.—Tʋʋma 2:22, 23.
10. A Zezi sẽn ki kũum da-lukã zugã wilga bõe n tɩ yɩɩda?
10 Y sã n tags a Zezi sẽn sak n nams kũum da-lukã zug to-to hal n tɩ ki wã yelle, bõe n wat y yamẽ? Tõe tɩ tẽegd-y-la a kũumã sẽn yɩ maoong n dol ãdem-biisã yel-wẽnã. (Matɩe 20:28; Zã 15:13) Wall tõe tɩ tẽegd-y-la a Zeova nonglem ne ãdem-biisã sẽn ta zĩig ninga, tɩ kɩt t’a sak n kõ maoong kãngã wã. (Zã 3:16) Tõe me tɩ y yeel wa Rom sodaas naabã sẽn yeelã. A sẽn yã yɛl nins sẽn maan a Zezi kũumã poorã, a yeela woto: “Hakɩka, dao kãngã sɩd yaa Wẽnnaam Biiga.” (Matɩe 27:54) Woto fãa zemsame. La d pa segd n yĩm a Zezi yaoolem goamã ye. Nand t’a ki kũum da-lukã zugã, a yeela woto: “Fãa pidsame.” (Zã 19:30, Sebr Sõngo) Bõe fãa n pidsi? Yaa sɩd t’a Zezi vɩɩmã sẽn yɩ to-to wã ne a kũumã pidsa yɛl wʋsgo. La sẽn yɩɩd fãa, pidsa tʋʋm-kãseng ning yĩng a sẽn wa tẽngã zugã. A tõog n wilgame t’a Zeova bal n tar sor n na n yɩ yĩngr la tẽng Naaba. D tẽeg me tɩ b ra pĩnd n togsame tɩ “yagengã” ra na n tõoga toog wʋsg a Sʋɩtãan nugẽ tɩ kɩt t’a Zeova yʋʋrã paam waoogre. (Ezai 53:3-7) Woto fãa yaa tʋʋm kãsems a Zezi sẽn da segd n pidsi, la a sɩd pidsa b fãa kɛpɩ. Tõogr tek woto!
11. Bõe la a Zezi na n maan n pids bãngr-gomd ning b sẽn togs Edɛnnã zãng-zãnga?
11 A Zezi sẽn kell n sak Wẽnnaam ne a sũur fãa n pa tol n kɩɩsã, Wẽnnaam vʋʋg-a lame. A pa vʋʋg-a ne ninsaal yĩng ye, a vʋʋg-a lame t’a yaa “sɩɩg sẽn kõt vɩɩm.” (1 Korẽnt dãmba 15:45; 1 Pɩɛɛr 3:18) A Zeova ra pʋlmame t’a Bi-riblã vʋʋgr poore, a na n kɩtame t’a ‘zĩnd a rɩtg hal t’a wa kɩt t’a tab a bɛɛbã.’ (Yɩɩl Sõamyã 110:1) Bɛ-kãensã yaa neb nins fãa sẽn kɩɩsd Wẽnnaam tɩ b boond-b t’a Sʋɩtãan “yagengã,” n paas a Sʋɩtãan mengã sẽn yaa b naabã. A Zezi sẽn yaa a Zeova Mesi Rĩungã Rĩma na n wa lʋɩɩ taoore, tɩ yẽ ne a poorẽ dãmbã menes b fãa fasɩ. (Wilgri 12:7-9; 19:11-16; 20:1-3, 10) Rẽ la goam nins sẽn be Sɩngr 3:15 pʋgẽ wã ne pʋʋsg ning a Zezi sẽn zãms a karen-biisã tɩ b pʋʋsã na n pids zãng-zãnga. A yeel-b lame tɩ b pʋʋs tɩ Wẽnnaam “soolem” bɩ a Rĩungã wa, ‘t’a raabã maan dũniyã zug wa sẽn maand saasẽ’ wã.—Matɩe 6:10; Filip rãmba 2:8-11.
Mak-sõng d sẽn segd n tũ
12, 13. a) Bõe n wilgd tɩ Rĩungã koe-noog mooneg womda biisi? b) D sẽn tũud a Zezi naoã, bõe la d segd n sok d mense?
12 Rũndã-rũndã, b moonda Rĩungã koe-noog tẽns wʋsg pʋgẽ wa a Zezi sẽn da pĩnd n togsã. (Matɩe 24:14) Woto kɩtame tɩ neb milyõ rãmb rɩkd b mens n kõt Wẽnnaam. Bark nins Rĩungã sẽn na n wa ne wã nooma nin-kãensã hal wʋsgo. B gũudame n na n wa vɩɩmd wakat sẽn kõn sa tẽngã sẽn na n lebg arzãnã zugu, laafɩ la bãan pʋgẽ. Rẽ n so tɩ b sũy noomẽ tɩ b togsd neb a taabã b sẽn gũud bũmb ningã. (Yɩɩl Sõamyã 37:11; 2 Pɩɛɛr 3:13) Yãmb naaga nin-kãensã n moond Rĩungã bɩ? Sã n yaa woto, y segda ne pẽgre. La bũmb a to yell me la tõnd ned kam fãa segd n tagse.
13 Tʋm-tʋmd a Pɩɛɛr yeela woto: “Kirist me namsa yãmb yĩng n bas mamsg ne yãmb tɩ y tũ bãmb naoã.” (1 Pɩɛɛr 2:21) Ges-y tɩ ka wã, a Pɩɛɛr pa gom a Zezi sẽn moon koɛɛgã ne yẽesmã bɩ a sẽn zãms nebã neerã yell ye. A goma a namsgã yelle. A Pɩɛɛr bãnga a Zezi sẽn da sakd namsg to-to n wilgdẽ t’a teenda a Zeova naamã, la t’a Sʋɩtãan yagda ziri wã. Wãn to la tõnd me tõe n dɩk a Zezi togs-n-taar dẽ wɛɛngẽ? D segd n soka d mens woto: ‘Hal sẽn ta zĩ-bʋg la m sakd namsg a Zeova naamã waoogr yĩnga? Mam wilgda m vɩɩmã fãa pʋgẽ la ne m koe-moonegã maasem tɩ m sɩd tʋlla ne m sũur fãa n teel a Zeova naamã bɩ?’—Kolos rãmba 3:17.
14, 15. a) B sã n da kõ a Zezi sagl-kɛgr wall b ra kãab-a kũun kẽere, a manesem da yaa wãna, la bõe yĩnga? b) Bõe yell la d segd n tẽegd wakat fãa? (Y tõe n gesa zĩ-gũbrã pʋgẽ me.)
14 Daar fãa, d segd n maoa ne makr toɛy-toɛya, la d segd n yãk yam me n maan yɛl toor-toore, yel-bɛd la yel-bõonego. Bõe n tõe n sõng-d tɩ d tõog n maan woto fãa tɩ zemse? Wala makre, bũmb sã n wa rat n sãam zood ning d sẽn tar ne a Zeova wã, d maanda wãna? A Pɩɛɛr sẽn yeel a Zezi t’a ra tags tɩ wẽng na n paam-a lame wã, a Zezi maana wãna? A tãsa a Pɩɛɛr woto: “Leb mam poorẽ Sʋɩtãana.” “Fo tagsg ka Wẽnnaam dẽnd ye, yaa ninsaal dẽnda.” (Matɩe 16:21-23) Rẽ yĩnga d sã n wa paam soay d sẽn tõe n tũ n paam ligd wall naam d tʋʋmã zĩigẽ tɩ d miẽ tɩ na n sãama d tẽebã, d maanda wa a Zezi bɩ? A Zezi sẽn da bãng tɩ kʋʋngã sẽn yã a sẽn maand yel-soalmã, b ‘na n wa modg-a lame t’a yɩ b rĩma,’ a zoeya tao-tao n looge.—Zã 6:15.
15 Bõe yĩng tɩ naoor a yiib fãa, a Zezi tõdg ne a sũur fãa wa sasa a taabã? Yaa t’a ra mii vẽeneg tɩ yell n da be tẽngre, t’a welgrã yõod yɩɩd a yõorã wall a mengã nafre. Baa sẽn da na n yɩla, a ra tʋll n maana a Zeova sẽn yaa a Ba wã raabo, la a teel a naamã. (Matɩe 26:50-54) Woto yĩnga, tõnd sã n pa tẽegd wakat fãa wa a Zezi tɩ d segd n teela a Zeova naamã, d tõe n wa sak n kɩɩsame. Bõe yĩnga? Bala a Sʋɩtãan sẽn yaa sɩlem soabã tõe n kɩtame tɩ bõn-wẽng wõneg bõn-sõngo, n paam-d nana-nana. Yaa boto la a sẽn maan n belg a Hawa wã.—2 Korẽnt dãmba 11:14; 1 Tɩmote 2:14.
16. Sẽn yɩɩd fãa, bõe la d segd n sõng nebã tɩ b bãnge?
16 D koe-moonegã pʋgẽ, d maoodame n sõsd ne nebã yɛl nins sẽn pak-bã zut la d wilgd-b Biiblã sẽn yet bũmb nins rẽ wɛɛngẽ. D sẽn maand woto wã, d sɩd tõogd n kɩtdame tɩ b tʋll n zãms Biiblã. La tõnd tʋʋmdã pa tek sõng nebã tɩ b bãng Biiblã sẽn yetã wall bark nins Wẽnnaam Rĩungã sẽn na n wa ne wã bal ye. D segd n sõng-b lame me tɩ b wʋm la b bãng tɩ b segd n teela a Zeova naamã. Rẽ yĩnga nin-kãensã ned kam fãa maoodame n dat n lebg kiris-ned hakɩk n sak n dɩk a ‘kũum da-luka,’ rat n yeel tɩ n nams Rĩungã poorẽ bɩ? (Mark 8:34) B na n sak n wa naaga neb nins sẽn zoe n teend a Zeova naamã, n wilg t’a Sʋɩtãan yaa zɩlem-be-ned la tẽn-kãn-ned bɩ? (Yelbũna 27:11) Yaa waoogr la zu-zẽkr n kõ-do, d sẽn paam n teend a Zeova naamã la d sõngd neb a taabã me sẽn na yɩl tɩ b teel-a wã.—1 Tɩmote 4:16.
Wẽnnaam sã n wa lebg “fãa ne fãa”
17, 18. D sã n wilgdẽ tɩ d teenda a Zeova naamã, wakat bʋg sẽn na n tall bark sẽn ka to la d tõe n gẽege?
17 D sẽn modgd ne d yel-manesmã la d koe-moonegã maasem n sõngd nebã sẽn na yɩl n wilg tɩ d teenda a Zeova naamã yĩnga, d tõe n kell n saagame tɩ d na n wa paam n vɩɩmda wakat ning a Zezi Kirist sẽn na n lebs Rĩungã a “Ba a Wẽnnaam nugẽ” wã. Rẽ na n yɩɩ wakat bʋgo? Tʋm-tʋmd a Poll wilga sẽn na n yɩ wakat ningã, n yeel woto: “Kirist sã n tõog pãn-soaadba fãa la noyã fãa la pãens fãa, bãmb na n yaool n lebsa soolma bãmb Ba a Wẽnnaam nugẽ. . . . Tɩ bõe, yaa tɩlae tɩ Kirist dɩ naam hal tɩ b ning b bɛɛbã fãa bãmb naoã tẽngre. . . . Dẽ, Biiga meng na sak sẽn kɩt-a tɩ bũmb fãa sak bãmbã, tɩ Wẽnnaam yɩ fãa ne fãa.”—1 Korẽnt dãmba 15:24, 25, 28.
18 Ad wakat ninga Wẽnnaam sẽn na n lebg “fãa ne fãa” wã sɩd na n yɩɩ bark wakat sẽn pa na n tall to! Rẽ wẽnd tɩ Rĩungã pidsa a tʋʋmdã zãnga. Wakat kãng t’a Zeova naamã bɛɛbã fãa menema zãnga, tɩ laafɩ la bãan lebs n zĩnd yĩngr la tẽng pʋgẽ. Wa yɩɩl-gʋlsdã sẽn yeelã, malɛgsã la ãdem-biisã fãa na n yɩɩla woto: “Bɩ y kõ Zusoaba waoogr sẽn zemsd ziir sẽn yaa bãmb yʋʋr dẽnda. . . . Bɩ y yeel bu-zẽmsa sʋk tɩ Zusoaba rɩta naam.”—Yɩɩl Sõamyã 96:8, 10.
Wãn to la y na n leoke?
• Sẽn yɩɩd fãa, bõe la a Zezi maan n wilg t’a teenda Wẽnnaam naamã?
• Bõe la a Zezi koe-moonegã la a kũumã pids n tɩ yɩɩda?
• Wãn-wãn la d tõe n wilg wa a Zezi tɩ d teenda a Zeova naamã?
[Zãmsgã sogsgã]
[Zĩ-gũbri/Foto, seb-neng 11]
TEEL-Y-YÃ A ZEOVA NAAMÃ
Wa Koore tẽngã la tẽns a taab saam-biis kẽer sẽn maanã, kiris-ned sã n wa be nams-toaag pʋgẽ, a sã n tẽeg bʋʋm ning sẽn kɩt tɩ b namsd-a wã, na n sõng-a lame t’a tõog toogo.
A Zeova Kaset soab a yembr b sẽn kẽes bãens roog Inyõ Sovietik na-toosã wẽndẽ yeela woto: “Bũmb sẽn sõng maam tɩ m tõog toog yaa tɩ m wʋma gomd ning sẽn zĩnd Edɛn zẽedã pʋgẽ wã võor sõma. Be, b kɩɩsame tɩ Wẽnnaam pa segd n yɩ yĩngr la tẽng Naab ye. . . . Tõnd ra miime tɩ d namsgã ra kõt-d-la sor tɩ d tõe n wilg tɩ d teenda a Zeova naamã. . . . Woto kõ-d-la raood tɩ d tõog n kell n sak Wẽnnaam.”
Kaset soab a ye me yeela woto: “A Zeova teela tõndo. Baa ne b sẽn da weoog tõnd wʋsg hal tɩ ra yaa toog ne-dã, d tõog n kell n kogla zems-n-taar ning d sẽn tar ne Wẽndã. Tõnd ra kengda taab raood daar fãa, n tẽegd taab tɩ yaa a Zeova naamã la d teenda.”
[Foto, seb-neng a 8]
A Sʋɩtãan sẽn mak a Zezi wã, bõe la a Zezi maan n wilg t’a teenda a Zeova naamã?
[Foto, seb-neng 10]
Bõe la a Zezi kũumã wilg n yɩɩda?