“Yaas-y n ges-y a Zeova Sẽn na n fãag yãmb to-to”
“Yaas-y n ges-y a Zeova Sẽn na n fãag yãmb to-to”
“[A Zeova] bee ne maam, dabeem ka tar maam ye. Ninsaalba tõe n maana maam bõe?”—YƖƖL SÕAMYÃ 118:6.
1. Bõe n na n paam ninsaalbã ka la bilfu?
KA LA BILFU, ninsaalbã na n paama yel-tood b sẽn nan zɩ n yã. A Zezi goma tõnd wakatã yell ne a karen-biisã n yeel woto: “Wakat kãnga to-kãseng na n zĩndame, toog sẽn yaa woto nan ka zĩnd dũniyã zug ye, la a kõn leb n zĩnd yõwã zugẽ abada ye. La ra-kãensã sã n ka booge, ned ba a ye kõn põs ye, la nin-tũusdsã yĩnga ra-kãens na n boogame.”—Matɩe 24:21, 22.
2. Yaa bõe n kɩt tɩ to-kãsengã pa sɩngd masã?
2 Nananda, malɛgs n gɩdg to-kãsengã t’a ra sɩng masã ye. Tʋm-tʋmd a Zã kʋʋlmã wakate, a Zezi vẽneg-a lame t’a bãng bũmb ning sẽn kɩt tɩ malɛgsã gɩdg to-kãsengã waoong masã wã. Ad tʋm-tʋmd a Zã sẽn yeel bũmb ninga: “Dẽ poore, mam yãa malɛk rãmb a naas sẽn yas dũniyã kɩrems a naase, la bãmb yõka dũniyã sobd a naasã. . . . La mam yãa malɛk a to sẽn yit yaang n zẽkdẽ, la yẽ tara Wẽnnaam sẽn vɩ bõn-gʋlsdga, la a zẽka a koɛɛg n gom ne malɛk rãmb a naasã . . . n yeel bãmb yaa: ‘Bɩ y ra maan dũniyã ne ko-kãsenga la tɩɩsa bũmb ye, bas-y hal tɩ d ning bãnd tõnd Wẽnnaam nonglem yembsa rĩyã.’”—Wilgri 7:1-3.
3. To-kãsengã na n sɩnga ne bõe?
3 Ka la bilfu, “Wẽnnaam nonglem yembsã” rĩy bãnd ningr tɛkem-tɛkem na n saame. Malɛgs a naasã seglame n sa n na n bas sebd a naasã tɩ to-kãsengã sɩnge. La b sã n wa base, bõe n na n deng n maane? Malɛk a ye yeela woto: “Yaa woto la b na n sãam Babilon sẽn yaa tẽn-kãsenga ne pãnga, la a kõn le zĩnd abada.” (Wilgri 18:21) Babilon kãsengã sẽn yaa ziri tũudmã fãa gillã sã n wa sãame, sũ-no-kãseng n na n zĩnd saasẽ.—Wilgri 19:1, 2.
4. Bõe n na n maan ka la bilfu?
4 Rẽ poore, goosneemã rãmbã fãa na n naaga taab n zab ne a Zeova nin-buiidã sẽn yaa kiris-neb hakɩkã. La b na n tõog n menems-b lame bɩ? Na n yɩɩ wa b na n tõogame, la wakat kãng bala, malɛgs wʋsg na n naaga a Zezi Kirist n sãam goosneemã rãmbã fãa. (Wilgri 19:19-21) Rẽ fãa poor masã, b na n loba a Sʋɩtãan ne a malɛgsã bog-zulung pʋgẽ tɩ b pa le tõe n maan baa fʋɩ ye. B na n paa be yʋʋm tusr n pa le tõe n tudg ninsaalbã ye. Ad woto sɩd na n yolsa kʋʋn-kãsengã sẽn na n põs to-kãsengã!—Wilgri 7:9, 10, 14; 20:1-3.
5. Bõe la neb nins sẽn na n kell n sak a Zeova wã na n paame?
5 Ka la bilfu, d na n yãa yel-kãensã sẽn yaa kãsemsã pidsgu. B fãa na n wilgame t’a Zeova bal n yaa yĩngr la tẽng naaba, la tɩ yẽ bal n segd ne rẽ. Tags-y bilf n gese: Tõnd sã n kell n sak a Zeova la d wilg tɩ d bee a naam sẽn ka to wã poorẽ, tõnd me na n tõog n naag n kɩtame t’a yʋʋrã paam waoogre, t’a raabã me pidsi. Ad sɩd na n yɩɩ sũ-noog tɛkẽ!
6. Yɛl nins sẽn wat ka la bilfã yĩnga, kiba-bʋg yell la d na n gome?
6 Tõnd zoe n segla d mens n sa n gũud yel-kãensã bɩ? Tõnd tara bas-m-yam t’a Zeova tara pãng n na n fãag-d bɩ? D kɩsa sɩd t’a mii a sẽn na n sõng tõnd to-to, la wakat ning bɩ? D sã n wa bʋgsd sogs-kãensã zutu, bɩ d tẽeg bũmb ning a Poll sẽn yeel Rom kiris-nebã. A yeela woto: “La bũmb fãa sẽn gʋls pĩndã gʋlsa tõnd zãmsg yĩnga, tɩ tõnd tõe n gũ tõnd tẽeb pidsg ne sũ-mare la ne Gʋlsg Sõamyã belsgo.” (Rom dãmba 15:4) Bũmb nins sẽn gʋls pĩnd tõnd zãmsg la d belsg yĩngã sʋka, d tõe n sõdga kibar ning sẽn wilgd a Zeova sẽn fãag Israɛll nebã sẽn da namsd Ezipt nebã nugẽ wã. Tõnd sẽn gũud to-kãsengã sẽn na n sɩng ka la bilfã, d sã n tags a Zeova sẽn maan to-to n fãag Israɛll nebã yelle, na n kenga d raood wʋsgo.
A Zeova fãaga a nin-buiidã
7. Yʋʋmd 1513 sẽn deng a Zezi rogmã, yel-bʋg n zĩnd Ezipti?
7 Yʋʋmd 1513 sẽn deng a Zezi rogmã, a Zeova reng n kɩtame tɩ yel-beed a wɛ paam Ezipt nebã. Yel-beed a wɛ soabã poore, a Faraõ riga a Moiizi. A yeel-a-la woto: “Yi n menem ka! Gũus f meng la f ra le wa mam nengẽ yɛs ye. Tɩ bõe, mam sã n le yã foom ka, fo na n kiimi.” La a Moiiz yeelame: “Be neere, yaa yãmb n yeel la. Mam kõn le wa yãmb nengẽ yɛs ye.”—Yikri 10:28, 29.
8. No-bʋs la b kõ Israɛll nebã sẽn na yɩl tɩ b paam n põse, la baasa wãn to?
8 La a Zeova wilga a Moiiz t’a na n kɩtame tɩ yel-beed a to sẽn na n yɩ yaoolem soab paam a Faraõ la Ezipt nebã fãa. Rẽ n so tɩ Abib kiuug (bɩ Nizã) rasem 14, a Zeova kɩt tɩ Ezipt nebã kom-dẽemsã la b rũmsã me kom-dẽemsã fãa ki. La Israɛll neb nins sẽn sak n tũ noy nins fãa Wẽnnaam sẽn kõ a Moiizã, yel-beedã pa paam-b ye. B ra segdame n yãk pe-bil zɩɩm n bol b rotã lug a yiibã la b rignoyã me, la b pa b rotẽ wã. La bõe n maan baraar yʋngo? Ad a Moiiz sẽn yeele: “Yʋn-sʋka Zusoaba wẽe kom-dẽems nins fãa sẽn da be Ezipt soolmã pʋgẽ wã.” Tao-tao bala, a Faraõ kɩtame tɩ b bool a Moiiz ne a Aarõ t’a yeel-b yaa: “Yik-y n yi-y mam neba sʋka. . . . Kẽng-y n tɩ waoog-y [a Zeova] wa yãmb sẽn da yeelã.” Israɛll nebã sɩd yika baraar yʋngã bal n yi Ezipti. B tagsdame tɩ sẽn yi-bã yɩɩ Israɛll neb sẽn yɩɩd milyõ a tãabo, n paas “buud wʋsg” neb sẽn da pa Israɛll neba.—Yikri 12:1-7, 29, 31, 37, 38.
9. Wẽnnaam kɩtame tɩ Israɛll nebã tũ so-bʋgo, la bõe yĩnga?
9 So-koɛɛg ning Israɛll nebã Yikri 13:17, 18, Sebr Sõngo.
sẽn da tõe n tũ n ta Kãabg Tẽngã, yaa b sẽn da na n yɛg Mediterane mogrã n tɩ pɩʋʋg Filisti nebã soolmẽ. La Filisti nebã ra yaa Israɛll nebã bɛɛba. La tõe t’a Zeova sẽn da pa rat t’a nin-buiidã zabã yĩnga, a kɩtame tɩ b na n tũ weoogã sor sẽn debd Mog-miuugã. Baa nebã sõorã sẽn da yaa milyõ rãmbã, Biiblã yeelame tɩ “Israɛll kambã sẽn yi Eziptã da pa kẽnd yaar ye, b tonga wa tãb-biis sẽn dabd zabre.”—Ges-y a Zeova sẽn na n fãag yãmb to-to
10. Bõe yĩng tɩ Wẽnnaam yeel Israɛll nebã tɩ b sig Pihahirot taoore?
10 D ges yɛlã sẽn na n dɩk neng ning masã. A Zeova yeela a Moiiz yaa: “Yeel Israɛll neba tɩ b leb poorẽ n sig Pihahirot taoore Midgall ne mogra sʋka, zĩig sẽn teesd Baal-Zefõ.” B sẽn sɩd maan dẽ wã, b wa n tɩ bee tãensã ne Mog-miuugã sʋka. Ra wõnda b pa tar b sẽn na n kẽngẽ yas ye. La a Zeova ra mii a sẽn maand bũmb ninga. A yeela a Moiiz yaa: “Mam na n kenga a Faraõ sũur t’a babs bãmba. La mam na n paama waoogr Faraõ ne a tãb-biisa fãa yĩnga, la Ezipt rãmba na bãng tɩ mam yaa [a Zeova].”—Yikri 14:1-4.
11. a) A Faraõ maana bõe, la Israɛll nebã manesem yɩɩ wãna? b) Israɛll nebã sẽn wa n yẽgemdẽ wã, a Moiiz yeel-b lame tɩ bõe?
11 A Faraõ wa n maanda a bãngẽ a sẽn bas Israɛll nebã tɩ b loogã. Rẽ n so t’a kɩt t’a sodaasã na n bob zab-teed n babs Israɛll nebã. Yaa saar dãmb 600 la b zomb n na n babs Israɛll nebã. Israɛll nebã sẽn wẽneg n yã t’a Faraõ ne a sodaasã watame wã, rabeemã yõk-b-la wʋsg tɩ b yeel a Moiiz yaa: “Yaa yaad zĩig n ka be Ezipt tẽng tɩ yãmb tall tõnd n wa tɩ d ki weoogẽ ka bɩ?” La a Moiiz ra kɩsa sɩd t’a Zeova na n fãag-b lame. Rẽ n so t’a yeel-b yaa: “Da zoe-y rabeem ye. Yaas-y n ges-y [a Zeova] sẽn na n fãag yãmb dũndã. . . . [A Zeova] na n zab n kõo yãmba. La bɩ yãmb sĩnd sɩɩ.”—Yikri 14:5-14.
12. Wãn to la a Zeova fãag a nin-buiidã?
12 A Moiiz sẽn yeel t’a Zeova na n zab n fãaga Israɛll nebã yɩɩ sɩda. A Zeova kɩtame t’a malɛkã na n kɩt tɩ sawad-taok ning sẽn da be taoor n wilgd Israɛll nebã sorã leb poorẽ masã. Sawadgã kɩtame tɩ Ezipt nebã sẽn beẽ wã yaa lika, tɩ Israɛll nebã zĩigẽ wã yaool n da tar vẽenem. (Yikri 13:21, 22; 14:19, 20) Rẽ poore, Wẽnnaam yeela a Moiiz t’a tẽeg a nugã. A Moiiz tẽega a nugã n tees mogrã, “la yʋngã tɛka, [a Zeova] kɩtame tɩ sob-kãseng yi yaang n pãrg koomã. . . . La Israɛll nebã kẽna tẽn-koɛɛng zug mogra pʋga. La koomã lebga wa lalg bãmb dɩtg la b goabga.” Ezipt nebã me kẽe mogrã pʋgẽ n na n bʋʋg-b n yõge, la a Zeova ra sõngda a nin-buiidã. A kɩtame tɩ zũnd-zãnd zĩnd Ezipt nebã sʋka, la a yaool n yeel a Moiiz yaa: “Tẽeg f nug mogra zug tɩ koomã leb n lim Ezipt rãmbã ne b saar dãmba la b wed-rʋʋdbã.” A Faraõ sodaag baa a ye ka põs ye. B fãa kiime.—Yikri 14:21-28; Yɩɩl Sõamyã 136:15.
Israɛll fãagrã sẽn zãmsd tõnd bũmb ninga
13. Israɛll nebã fãagr poore, b maana bõe?
13 Wẽnnaam sẽn maan yel-solemd n fãag a nin-buiidã, b maana bõe? Zĩig pʋgẽ bala, a Moiiz ne Israɛll neb a taabã pʋda Yikri 15:1, 18) Dẽnd b sẽn maan bũmb ning pipi yaa Wẽnnaam pẽgre. A Zeova sẽn maan yɛlã to-to wã me wilgame tɩ yaa yẽ bal n yaa yĩngr la tẽng naaba.
yɩɩl n na n pẽg a Zeova. B yɩɩla woto: ‘Mam na n yɩɩlame n waoog a Zeova. A na n dɩɩ naam wakat sẽn ka sɛta.’ (14. a) Israɛll nebã kibarã zãmsda tõnd bõe a Zeova zugu? b) Yʋʋmd 2008 wã verse yaa bʋgo?
14 Yel-kãensã zãmsda tõnd bõe, la wãn to la b tõe n keng d raoodo? Yel-kãensã wilgdame t’a Zeova tõe n sõnga a nin-buiidã yell buud fãa pʋgẽ. Sẽn yaa yell ning fãa pʋgẽ la b be, a tõe n yiis-b lame. Mog-miuugã ra pa tõe n gɩdg Israɛll nebã kẽnde, bala a Zeova kɩtame tɩ seb-kẽeng fug tɩ koomã welg n leb goabg la rɩtg n bas sore. A kɩtame me tɩ Mog-miuugã rɩ a Faraõ sodaasã. D sã n tags rẽ fãa zug neere, d na n yeela wa yɩɩl-gʋlsdã t’a Zeova “bee ne maam, dabeem ka tar maam ye. Ninsaalba tõe n maana maam bõe?” (Yɩɩl Sõamyã 118:6) A Poll sẽn yeel goam nins tɩ be Rom dãmb 8:31 pʋgẽ wã me tõe n kenga d raoodo. A yeelame yaa: “Wẽnnaam sã n be ne tõndo ãnda n tõe n tõog-do?” Gom-kãensã fãa sɩd kõta bas-m-yam, bala b yiisda rabeem la sãmb-sãmb buud fãa. Dẽnd yʋʋmd 2008 wã verse sɩd zemsame. A yeta woto: ‘Yaas-y n ges-y a Zeova sẽn na n fãag yãmb to-to.’—Yikri 14:13.
15. Sakrã nafa Israɛll nebã wãn to, la wãn to la sakrã na n sõng tõnd me rũndã-rũnda?
15 Bõe me la Israɛll nebã kibar zãmsd tõndo? Tɩ d segd n maana a Zeova sẽn yet tɩ d maanã fãa. Israɛll nebã sak n tũu noy nins b sẽn da kõ-b Pakã maaneg wɛɛngẽ wã zãnga. B sakame n pa b rotẽ wã Nizã rasem 14 yʋngo. B sẽn wa n yi Ezipt n loogdẽ wã me, b sak n “tonga wa tãb-biis sẽn dabd zabre.” (Yikri 13:18, Sebr Sõngo) Rũndã-rũndã me, d segd n tũu sor ning Wẽnnaam sẽn wilgd tõnd ne “tʋm-tʋmd sẽn tũud sɩd la sẽn tar yamã” maasmã. (Matɩe 24:45) D segd n kelga Wẽnnaam koɛɛgã neere. Biiblã yeta woto: “Yãmb sã n dat n kẽng rɩtg walla goabga, yãmb tʋba na n wʋma gomd sẽn gomd yãmb poorẽ wã n yetẽ: ‘Ad sore, bɩ y kẽne.’” (Ezai 30:21) To-kãsengã sɩngr sẽn kolgd wʋsgã yĩnga, tõe tɩ d na n wa paama noy a taab sẽn wilgd d sẽn segd n maan bũmb ning takɩ. Tõnd sã n dat n põse, rẽnda d kell n zĩnd a Zeova nin-buiidã sʋk la d tũ a noyã.
16. Wẽnnaam sẽn fãag Israɛll nebã to-to wã zãmsda tõnd bõe?
16 D tẽeg me t’a Zeova sẽn yeel Israɛll nebã tɩ b tũ sor ningã ra kɩtame tɩ b wa be tãensã la Mog-miuugã sʋka, tɩ wõnd b pa tar b sẽn kẽedẽ ye. La a Zeova ra mii a sẽn na n maan to-to, la a sẽn maan bũmb ningã me kɩtame t’a yʋʋrã paam pẽgre, t’a nin-buiidã me paam fãagre. Rũndã-rũndã me, tõnd tõeeme n pa wʋmd b sẽn sigl yɛl kẽer to-to siglgã pʋgẽ wã võor sõma ye. La d tõe n talla bas-m-yam t’a Zeova wilgd-d-la sor ne a tʋm-tʋmd sẽn tũud sɩd la sẽn tar yamã maasem. Wakat n tõe n wa zĩnd tɩ wõnd d bɛɛbã tõog-d lame. D sẽn yaa ninsaalbã yĩnga, tõe tɩ d pa na n tõog n wʋm bũmb ning sẽn kɩt tɩ yaa woto wã võor zãng ye. La a Zeova tõeeme n wa maneg yellã n sõng tõnd wakat ning a sẽn tagsd tɩ rẽ zemsame wã, wa a sẽn da maan pĩnd n sõng Israɛll nebã to-to wã.—D teeg a Zeova
17. Bõe yĩng tɩ d tõe n tall bas-m-yam tɩ Wẽnnaam sõngda tõndo?
17 Yaa vẽeneg tɩ Israɛll nebã sẽn wa n lebg n tagsd sawad-taokã sẽn da be b taoor wĩntoog n wilgd-b sore, la a be b taoor yʋng n wit bugum n kõt-b vẽenemã yellã, b kɩsa sɩd tɩ yaa “Wẽnnaam malɛkã” n da yãagd-ba. (Yikri 13:21, 22; 14:19) Rũndã-rũndã, tõnd me tõe n talla bas-m-yam t’a Zeova wilgda a nin-buiidã sore, n kogend-b la a fãagd-ba. D kɩsa sɩd ne gom-kãensã: “[A Zeova] ka basd neb nins sẽn nong bãmba ye. Bãmb gũuda bãmb wakat sẽn ka sɛta.” (Yɩɩl Sõamyã 37:28) Bɩ d ra tol n yĩm tɩ malɛgsã sõngda Wẽnnaam nin-buiidã rũndã-rũndã ye. Ne malɛgsã sõngre, d tõe n yalsame n ges a Zeova sẽn na n fãag tõnd to-to.—Yikri 14:13.
18. Bõe yĩng tɩ d segd n ‘bob Wẽnnaam zab-teedã fãa’?
18 La bõe n na n sõng-d tɩ d tõog n yals kãe-kãn sɩdã pʋgẽ? D bob Wẽnnaam zab-teed nins yell tʋm-tʋmd a Poll sẽn gomd Efɛɛz rãmb sebrã pʋgẽ wã. D tẽeg t’a yeelame tɩ d ‘bob Wẽnnaam zab-teedã fãa.’ Rẽ yĩnga tõnd sɩd maana woto bɩ? Yʋʋmd 2008 wã pʋgẽ, yɩta sõma tɩ tõnd ned kam fãa tags n ges a sã n sɩd boba Wẽnnaam zab-teedã fãa sõma. Tõnd bɛ a Sʋɩtãan mii tõnd pãn-komsmã tiiri, t’a rat n tũnug ne rẽ n kʋɩɩb-do. Tõnd zabda ne malɛg-wẽnsã. La ne a Zeova sõngre, d na n tõogame!—Efɛɛz rãmba 6:11-18; Yelbũna 27:11.
19. Tõnd sã n kell n tõog toogo, tõe tɩ d wa paam zu-no-bʋgo?
19 A Zezi yeela a karen-biisã woto: “Ne sũ-mare yãmb na n fãaga y mense.” (Luk 21:19) Bɩ d modg n kell n tõog toog buud fãa, t’a Zeova nimbãan-zoeerã yĩng bɩ d wa paam zu-noog n tõog n yaas n ges a sẽn na n fãag tõnd to-to.
Wãn to la y na n leoke?
• Yɛl-bʋs n na n zĩnd ka la bilfu?
• Yʋʋmd 1513 sẽn deng a Zezi rogmã, wãn to la a Zeova wilg t’a tara pãng n tõe n fãag a nebã?
• Bõe la yãmb na n modg n kell n maane?
[Zãmsgã sogsgã]
[Goam sẽn tar pãngã, seb-neng 22]
Yʋʋmd 2008 wã verse yaa: “Yaas-y n ges-y a Zeova sẽn na n fãag yãmb to-to.”—Yikri 14:13.
[Foto, seb-neng 19]
‘Bũmb nins fãa sẽn gʋls pĩndã gʋlsa tõnd zãmsg yĩnga’
[Foto, seb-neng 20]
A Faraõ kɩɩsgã kɩtame tɩ yel-beed paam Ezipti
[Foto, seb-neng 21]
Israɛll nebã maana a Zeova sẽn yeelã fãa, n paam n põse