Zab-teoog baa a ye sẽn zabd ne foo kõn tõog ye
Zab-teoog baa a ye sẽn zabd ne foo kõn tõog ye
“Zab-teed nins fãa neb sẽn maand n na n zab ne foomã ka na n tõog ye.”—EZAI 54:17.
1, 2. Bõe n paam a Zeova Kaset rãmb nins sẽn be Albani wã tɩ wilgdẽ tɩ goam nins sẽn be Ezai 54:17 pʋgẽ wã yaa sɩda?
YƲƲMD 1945 n tãag yʋʋmd 1990 wã sasa, Erop yaang tẽng a ye b sẽn boond tɩ Albani wã pʋgẽ, goosneemã sẽn da pa nong wẽn-tũudbã yĩnga, b makame n na n menems kiris-neb hakɩkã. Baa ne b sẽn nams-b wʋsg la b modg-b tɩ b tʋm tʋʋm-kegems tɩ kiba-kɩtbã me sãam b yʋʋrã, b ka tõog n menems-b ye. Baa ne b sẽn da yaa bilfã, b ra pa zoet rabeem ye. La kiris-nin-kãensã yaa ãnd dãmba? Yaa a Zeova Kaset rãmbã. Baa ne sẽn da pa nana tɩ b tõog n tigimd taab la b moond koɛɛgã, b sẽn kell n modg yʋʋm wʋsg pʋgẽ wã kɩtame tɩ nebã bãng kiris-neb hakɩkã, t’a Zeova yʋʋrã me paam pẽgre. Yʋʋmd 2006, b sẽn wa n na n pak filiyall a ye beenẽ, a Zeova Kaset soab sẽn kell n sak a Zeova yʋʋm wʋsg pʋgẽ tẽn-kãngã yeela woto: “Baa ne a Sʋɩtãan sẽn modg to-to wã fãa, a pa tol n tõog ye. Yaa a Zeova n tõog wakat fãa!”
2 Woto fãa wilgda vẽeneg tɩ Wẽnnaam sẽn yeel a nin-buiidã bũmb ning tɩ be Ezai 54:17 pʋgẽ wã yaa sɩda. A yeela woto: ‘Zab-teed nins fãa neb sẽn maand n na n zab ne yãmbã ka na n tõog ye. Yãmb na n sãama zɛlma nins fãa sẽn dõt yãmbã.’ Yɛl nins sẽn zĩnd hal pĩnd n tãag masã wã sɩd wilgdame tɩ baa a Sʋɩtãan dũniyã sẽn maanega, bũmb pa tõe t’a Zeova nin-buiidã bas n pa le tũud-a ye.
A Sʋɩtãan modgrã pa tõog ye
3, 4. a) Bõe ne bõe n be a Sʋɩtãan zab-teedã sʋka? b) Bõe n wilgd t’a Sʋɩtãan zab-teedã pa tõogde?
3 A Sʋɩtãan zab-teedã sʋka, d tõe n sõdga b sẽn yiisd noy n gɩdgd a Zeova Kaset rãmbã, kʋʋngã sẽn mi n kaoog n pãbd-bã, b sẽn kẽesd-b bãensã, la b sẽn mi n yiisd noy bɩ ‘tõog sẽn yaa toog’ a Zeova Kaset rãmbã yĩngã. (Yɩɩl Sõamyã 94:20) Bãng-y tɩ tõnd sẽn be ka n karemd Gũusg Gasg kãngã wã sasa menga, tẽns kẽer pʋsẽ, a Zeova Kaset rãmb n paamd makr b wẽn-sakrã yĩnga.—Wilgri 2:10.
4 Wala makre, a Zeova Kaset rãmb filiyall a ye wilgame tɩ yʋʋmd a ye bal pʋgẽ, yaa naoor 32 la b pãb Wẽnnaam nin-buiidã, b sẽn wa n moond koɛɛgã sasa. Sẽn paase, naoor 59 la polɩɩs rãmbã yõg a Zeova Kaset rãmbã pagb la rap la kamba, b sẽn wa n moond koɛɛgã sasa. B yõga kẽer foto, n kɩt tɩ b tik b nus sɛb zutu, la b pag-b bãens wa bi-beese. B yeela kẽer tɩ b sã n pa gũusi, b na n pãb-b lame n pogle. Tẽng a to pʋgẽ, sɛb 1100 n be bʋ-kaoodbã zĩigẽ n wilgdẽ tɩ b yõga a Zeova Kaset rãmb kẽere, n kɩt tɩ kẽer yao amande, la b pãb sãnda. Sɛb 1100 sʋka, sẽn yɩɩd sɛb 200 n wilgd tɩ yaa b sẽn wa n tigim taab n na n maan a Zezi kũumã tẽegrã sasa la b paam zu-loe-kãensã. Baasg zãnga, tẽn-kãensã la zĩis a taab pʋsẽ, a Zeova vʋʋsem sõngã kõo a nin-buiidã pãng tɩ b tõog zu-loeesã sẽn da yɩɩd b pãngã. (Zakari 4:6) Bɛɛbã wẽnemã pa na n tõog n kɩt t’a Zeova Kaset rãmbã bas a Zeova pẽgr abada. Tõnd kɩsa sɩd tɩ zab-teoog baa a ye pa tõe n gɩdg Wẽnnaam daabã t’a pa pids ye.
Zɩlem-beedã pa na n tõog ye
5. Pipi kiris-nebã wakate, wãn to la b rõd a Zeova nin-buiidã?
5 A Ezai ra pĩnd n togsame tɩ Wẽnnaam nin-buiidã na n sãama zɩlma nins fãa sẽn dõt bãmbã. B ra nong n dõta pipi kiris-nebã tɩ b yaa nin-wẽnse. Goam nins sẽn be Tʋʋm 16:20, 21 pʋgẽ wã wilgda rẽ vẽenega. Be b yeta woto: ‘Ra-kãensã rãmbda tõnd tẽngã. Bãmb zãmsda neba minund nins tõnd sẽn yaa Rom nebã sẽn ka tõe n deeg walla sak ye.’ Daar a ye menga, tũudmã taoor dãmb makame n na n kɩt tɩ tẽngã taoor dãmb nams kiris-nebã. B yeelame yaa: “Neb nins sẽn dãmbd dũniyã waa ka. Bãmb fãa kɩɩsda Sezaar tõogo.” (Tʋʋma 17:6, 7) B yeelame meng tɩ tʋm-tʋmd a Poll “yaa yell soaba,” sẽn lʋɩ tũudum a ye taoor n maand welgr zĩig fãa “dũniyã zugu.”—Tʋʋma 24:2-5.
6, 7. Wãn to la kiris-neb hakɩkã kɩtd tɩ neb nins sẽn dõt-bã ziri pukdẽ?
6 Dẽnd pa ling tõndo, nebã sã n dõt kiris-neb hakɩkã rũndã-rũndã la b sãamd b yʋʋr ye. La wãn to la tõnd kɩtd tɩ b ziri wã pukdẽ?—Ezai 54:17.
7 Naoor wʋsgo, yaa a Zeova Kaset rãmbã manesem sõngã n wilgd tɩ b sẽn mi n yet bũmb ning b zugã yaa rõdg bala. (1 Pɩɛɛr 2:12) B sẽn tũud tẽngã laloa la b wilgd b manesmã pʋgẽ tɩ nebã yell sɩd pak-b lame wã yĩnga, lebgda vẽeneg ne nebã tɩ b sẽn gomd bũmb ning b zugã yaa ziri. Dẽnd tõnd manesem sõngã kõta kaset tɩ d yaa nin-sõmse. Neb nins sẽn get tõndã sã n yã tõnd sẽn modgd n tʋmd tʋʋm sõma wã, naoor wʋsgo b pẽgda tõnd saasẽ Ba wã la b sakd n deegdẽ t’a nin-buiidã manesem yaa sõma wʋsg n yɩɩd neb a taabã.—Ezai 60:14; Matɩe 5:14-16.
8. a) Wakat ninga, yaa tɩlae tɩ d maan bõe? b) Wala Kiristã, wãn to la d pukd sẽn dõt-b tõndã ziri wã?
8 Wakat ning me, yaa tɩlae tɩ d gom ne raood n wilg bũmb ning sẽn kɩt tɩ d tũud noy nins sẽn be Biiblã pʋgẽ wã. Wakat ninga, yaa tɩlae tɩ d kẽng goosneema la bʋ-kaoodb taoor n bao sõngre. (Ɛstɛɛr 8:3; Tʋʋma 22:25-29; 25:10-12) A Zezi sẽn wa n be tẽng zugã, wakat ninga, a ra leokda neb nins sẽn da rõt-a wã n pukd b ziri wã. (Matɩe 12:34-37; 15:1-11) Wala a Zezi, tõnd me sã n paam sore, d wilgda nebã vẽeneg tɩ b bãng tõnd sẽn tẽed bũmb nins ne d sũy fãa wã. (1 Pɩɛɛr 3:15) Bɩ d ra tol n bas tɩ tõnd karen-bi-taasã, d tʋmd-n-taasã bɩ d roagdb nins sẽn pa a Zeova Kaset rãmbã sẽn yaand tõndã wa kɩt tɩ d bas n pa togs sɩdã sẽn be Wẽnnaam Gomdã pʋgẽ wã ye.—2 Pɩɛɛr 3:3, 4.
Zerizalɛm yaa “kugr sẽn yaa zɩsgo”
9. Yaa Zerizalɛm bʋg la b sẽn mak ne “kugr sẽn yaa zɩsg” Zakari 12:3 pʋgẽ wã, la a makda ãnd dãmb tẽngã zugu?
9 A Zakari bãngr-gomdã wilgda bũmb ning sẽn kɩt tɩ nebã kis kiris-neb hakɩkã. Ges-y Zakari 12:3 sẽn yet bũmb ninga: “Mam na n kɩtame tɩ Zerizalɛm lebg wa kugr sẽn yaa zɩsg ne buuda fãa.” Yaa Zerizalɛm bʋg yell la b sẽn gomd ka wã? Yaa “Zerizalɛm sẽn be [saasẽ]” wã, bɩ saasẽ Rĩung ning pʋgẽ kiris-neb nins sẽn paam vʋʋsem sõngã zaeebã sẽn na n tɩ rɩ naamã. (Hebre dãmba 12:22) Kiris-nin-kãensã sõor bilf bal n ket tẽngã zugu. Bãmb ne b tũud-n-taasã sẽn yaa “piis a taabã” sagenda nebã tɩ b sak Wẽnnaam Rĩungã tɩ nan ket n tõeyã. (Zã 10:16; Wilgri 11:15) La nebã manesem yaa wãn to? Wãn to la a Zeova teend a nin-buiidã rũndã-rũndã? Bɩ d bao Zakari sak 12 wã võor n paas tɩ d na bãnge. Rẽ na n kõ-d-la bas-m-yam tɩ ‘zab-teoog baa a ye’ ka na n tõog Wẽnnaam neb nins sẽn paam vʋʋsem sõng zaeebã la b tũud-n-taasã ye.
10. a) Bõe yĩng tɩ nebã zabd ne Wẽnnaam nin-buiidã? b) Bõe n paam neb nins sẽn mak n na n serg ‘kugr sẽn yaa zɩsgã’?
10 Zakari 12:3 yetame tɩ dũniyã neb ‘paamda toogo.’ Wãn to? Wẽnnaam yeelame tɩ Rĩungã koe-noog segd n mooname, la a Zeova Kaset rãmbã sɩd maanda rẽ ne b sũy fãa. La b sẽn moond tɩ Rĩungã bal la ãdem-biisã zu-loeesã tɩɩmã wõnda “kugr sẽn zɩs” nebã taoore. B makame n na n dɩk-a n serge, b sẽn bao n na n sãam koe-moondbã tʋʋmdã. La b pogla b mens wʋsgo, hal n “paam toogo.” B sẽn pa tõogã kɩtame tɩ b yʋʋrã meng sãam tɩ b paam yãnde. Yaa vẽeneg tɩ b pa tõe tɩ kiris-neb hakɩkã sĩnd n pa togs Wẽnnaam Rĩungã “koe-noog sẽn ka sɛtã,” bala b sɩd nanda zu-noog ning b sẽn tar n tõe n moon koe-noogã tɩ dũni-kãngã saab yaool n ta wã. (Wilgri 14:6) Afirik tẽng a ye pʋgẽ, bãens gũud a ye sẽn yã b sẽn namsd a Zeova Kaset rãmbã to-to wã, a yeelame: ‘Yãmb namsda y mens zaalem. Nin-kãensã ka na n bas b Wẽnnaamã tũub ye. B sõorã tara fɩɩgr meng n paasdẽ.’
11. Wãn to la Wẽnnaam sɩd pids a sẽn kãab bũmb ning sẽn be Zakari 12:4 pʋgẽ wã?
11 Karm-y Zakari 12:4. A Zeova yeelame t’a na n kɩtame tɩ neb nins sẽn zabd ne a Rĩungã koe-moondb sẽn tar yẽesmã lebg wa zoense, la b “yɛɛse.” A sɩd maana woto. Wala makre, b ra gɩdga a Zeova Kaset rãmbã tẽng a yembr pʋgẽ, la b pa tõog n kɩt tɩ b pa paam b sɛbã ye. Wẽnnaam sẽn kãab a nin-buiidã bũmb ningã yɩɩ sɩda. A yeela woto: “Mam na n gũu Zida buudã, la m na n kɩtame tɩ buud a taaba wiid lebg zoense.” Bɛɛbã sẽn lebg wa zoens tɩ b sũyã puugã, b pa mi b sẽn maand ye. Vẽenega, d kɩsa sɩd t’a Zeova na n kell n kogla a nin-buiidã la a ges b yelle.—2 Rĩm dãmba 6:15-19.
12. a) A Zezi sẽn wa n be tẽng zugã, bõe yĩng tɩ d tõe n yeel t’a widga bugum? b) Bõe yĩng tɩ d tõe n yeel tɩ kiris-neb nins sẽn paam vʋʋsem sõng zaeebã sẽn ket tẽng zugã widga bugum, la rẽ waa ne bõe?
12 Karm-y Zakari 12:5, 6. Ka wã, “Zida nebã” yaa neb nins sẽn lʋɩt taoor n get Wẽnnaam nin-buiidã yellã. A Zeova kõ-b-la raood tɩ b tʋmd a Rĩungã tʋʋmd ne yẽesem. Daar a yembre, a Zezi yeela a karen-biisã yaa: “Mam waame n na n lob bugum dũniyã zugu.” (Luk 12:49) Sɩd me, a maana bũmb sẽn wõnd bugum widgri. A Zezi koe-moonegã wakate, yaa Wẽnnaam Rĩungã yell la a ra gomd ne yẽesem n yɩɩda. Rẽ kɩtame tɩ Zʋɩf rãmbã ra kɩɩsd taab Wẽnnaam Rĩungã poorẽ. (Matɩe 4:17, 25; 10:5-7, 17-20) Rũndã-rũndã me, kiris-neb hakɩkã yaa wa “bugum sẽn be tɩɩs sʋk la bug-vɩlens sẽn be ki sẽn bɩ pʋgẽ,” bala b maana bũmb sẽn wõnd bugum widgri. Sebr ning sẽn yi yʋʋmd 1917 tɩ b boond tɩ Le mystère de Dieu accompli wã * puka kiris-neb ne yʋʋrã ziri wã vẽenega. Rẽ kɩtame tɩ b taoor dãmbã sũy puugi. Sẽn pa kaoos me, Rĩungã kibay No 37 wã gom-zug sẽn yet tɩ “Ziri tũudmã saab kolgame” wã kɩtame tɩ neb wʋsg wilg b sã n sakda Wẽnnaam Rĩungã bɩ b sã n pa sakdẽ.
Zida neb sẽn be fu-rotẽ wã paama fãagre
13. ‘Zida neb sẽn be fu-rotẽ wã’ makda ãnd dãmba, la bõe yĩng t’a Zeova na n fãag-ba?
13 Karm-y Zakari 12:7, 8 Sebr Sõng pʋgẽ. Be b yeta woto: “Yaa Zɩɩda neba [sẽn be fu-rotẽ wã, NW] la Soaala na n deng n fãage, la woto a Davɩɩd yagense la Zerizalɛɛm kẽedba, kõn saag n tags tɩ bãmb n yɩɩd Zɩɩda neb a taaba ye. Badaare Naaba-Wẽnd na n gũ sẽn kẽeda Zerizalɛɛm tẽngã; ned ninga sẽn kɩlla lʋɩɩsã bãmb sʋka, na n paama a Davɩɩd meng pãngã, t’a Davɩɩd yagensa na n lʋɩ bãmba taoor n kẽnd wa Wẽnde, n kẽnd wa Soaala malɛka.” Pĩnd wẽndẽ wã, Israɛll tẽngã ra pida ne fu-roto, la yaa rũm-kɩɩmbã la ka-koaadbã n da nong n vɩ fu-rotã pʋsẽ. Dẽnd bɛɛb sã n da wat n na n zab ne Zerizalɛm, yaa rũm-kɩɩmbã la ka-koaadbã n da rat koglg n yɩɩda, bala bɛɛbã rengd n taa bãmb n yaool n kẽ tẽngã. Rũndã-rũndã, ‘Zida neb sẽn be fu-rotẽ wã’ makda sẽn paam-b vʋʋsem sõng zaeebã sẽn ket tẽng zugã. B wõnda neb sẽn vɩ kɩreng fu-rot pʋsẽ, n pa be tẽng sẽn tar lal-bɛd sẽn na n kogl-bã pʋgẽ ye. La baa ne rẽ, b wilgda ne raood tɩ b bee Mesi Rĩungã poorẽ. Dẽnd a Zeova na n deng n fãaga nin-kãensã sẽn wõnd neb sẽn be fu-rot pʋsẽ wã, bala bãmb la a Sʋɩtãan zabd ne n yɩɩda.
14. Wãn to la a Zeova sõngd ‘Zida neb sẽn be fu-rotẽ wã’ la a kɩtdẽ tɩ b pa lʋɩtẽ?
14 Hal pĩnd n tãag masã, a Zeova sɩd sõngda sẽn paam-b vʋʋsem sõngã zaeebã sẽn yaa Rĩungã kug-zĩidb sẽn ket tẽng zugu, tɩ wõnd neb sẽn be fu-rot pʋsẽ balã. * A sõngd-b lame tɩ b pa lʋɩtẽ, n kõt-b pãng la raood tɩ b lebgd wa rĩm a Davɩɩd sẽn da tõe zabrã.
15. Bõe yĩng t’a Zeova rat n ‘sãam buudã fãa,’ la wakat bʋg la a na n maan dẽ?
15 Karm-y Zakari 12:9. Bõe yĩng t’a Zeova rat n ‘sãam buudã fãa’? Bala b modgdame bal n kɩɩsd Mesi wã Rĩungã. B sẽn namsd Wẽnnaam nin-buiidã yĩnga, b na n paama sɩbgre. Ka la bilfu, neb nins sẽn be a Sʋɩtãan poorẽ wã na n yikame n zab ne Wẽnnaam nin-buiidã n dat n menems-b zãnga, la rẽ na n baasa ne Biiblã sẽn boond tɩ Armagedõ wã. (Wilgri 16:13-16) Wẽnnaam a Zeova sẽn yaa Bʋ-kaood kãsengã na n sõnga a nin-buiidã, la a kɩt t’a yʋʋrã paam waoogr ninsaalbã fãa nifẽ.—Ezekɩɛll 38:14-18, 22, 23.
16, 17. a) A Zeova “tʋm-tʋmdba pʋɩɩr” yaa bõe? b) Tõnd sẽn tõogd tood nins sẽn yit a Sʋɩtãan nengẽ wã wilgda bõe?
16 A Sʋɩtãan zab-teoog baa a ye pa tõe n sãam Wẽnnaam nin-buiidã tẽebo, bɩ n boog b yẽesmã ye. Tõnd sẽn mi t’a Zeova sõngda tõndã kõt-d-la bãane, la bãan kãng yaa a Zeova “tʋm-tʋmdba pʋɩɩre.” (Ezai 54:17) Ned baa a ye pa tõe n deeg bãanã la bark a taab nins fãa Wẽnnaam sẽn kõ tõndã ye. (Yɩɩl Sõamyã 118:6) A Sʋɩtãan na n ket n maandame tɩ nebã zabd ne tõnd la a kɩtdẽ tɩ b namsd tõndo. La tõnd sẽn ket n sakd Wẽnnaam baa ne b sẽn dõt tõndã yaa kaset sẽn wilgd tɩ d tara Wẽnnaam vʋʋsem sõngã. (1 Pɩɛɛr 4:14) Rũndã-rũndã, d moonda a Zeova Rĩungã sẽn luglã koe-noog dũniyã gill zugu. B zaba ne a Zeova nin-buiidã hal wʋsgo, wa b sẽn lobd ned “kug” n pa satẽ ye. La ne a Zeova pãngã, kug-kãensã pa sãamd b tʋʋmdã ye. (Zakari 9:15) Bũmb pa na n kɩt tɩ sẽn paam-b vʋʋsem sõngã zaeeb n ket tẽng zugã ne b tũud-n-taasã yals b koe-moonegã ye!
17 Tõnd gũuda wakat ning Wẽnnaam sẽn na n fãag-d zãng-zãng ne Sʋɩtãanã. Tõnd pa yɛɛsd ye. Bala d kɩsa sɩd tɩ ‘zab-teed nins fãa nebã sẽn maand n na n zab ne tõndã ka na n tõoge, la tɩ d na n sãama zɩlma nins fãa sẽn dõt tõndã.’
[Tẽngr not rãmbã]
^ sull 12 A Zeova Kaset rãmbã n da yiisd seb-kãngã la b ka le yiisd-a ye.
^ sull 14 Sẽn na yɩl n paam kibay a taab n paase, bɩ y ges Les Témoins de Jéhovah : Prédicateurs du Royaume de Dieu sebrã pʋgẽ, neng 675-6. A Zeova Kaset rãmbã n yiis seb-kãngã.
Wãn to la y na n leoke?
• Bõe n wilgd t’a Sʋɩtãan zab-teedã pa tõogde?
• Wãn to la Zerizalɛm ning sẽn be saasẽ wã lebg wa ‘kugr sẽn yaa zɩsgo’?
• Wãn to la a Zeova sõngd ‘Zida neb sẽn be fu-rotẽ wã’?
• Armagedõ sẽn kolgdã, tõnd kɩsa sɩd ne bõe?
[Zãmsgã sogsgã]
[Foto, seb-neng 23]
Albani, a Zeova Kaset rãmbã kell n yɩɩ sakdba, baa ne a Sʋɩtãan sẽn zab ne-bã
[Foto, seb-neng 25]
A Zezi ra pukda a rõtbã ziri wã
[Foto, seb-neng 26]
Neb nins fãa sẽn zabd ne koe-moondbã pa na n tõog ye