1-2. a) A Zeova sã n get neb milyõ-rãmb sẽn tigimd taab dũniyã gill zug n maand a Zeezi kũumã tẽegrã, bõe n noom-a? (Ges-y sebrã pipi neng fotã.) b) Bõe yell la d na n gom sõs-kãnga pʋgẽ?

YƲƲMD fãa, neb milyõ-rãmb n tigimd taab dũniyã gill zug n maand Kiristã kũumã tẽegre. La tags-y n ges-y-yã! B sã n tigim taab woto t’a Zeova getẽ, pa neb kʋʋng bal la a ne ye. A nee b ned kam fãa yembr-yembre. Wala makre, a mii sẽn wat-b yʋʋmd ne a to fãa wã. Tõe tɩ kẽer meng yãta nams-toaag tũudmã yĩnga, la b baas n watẽ. Sãnda me pa wat d tigissã fãa, la sã n yaa Kiristã kũumã tẽegrã, b getame tɩ rẽnda b modg n wa. Sã n yaa pipi la ned wa Kiristã kũumã tẽegr me, a Zeova miime, baa yaa nif-na-yã yĩng la a wa-yã.

² Hakɩɩka, a Zeova sũur nooma wʋsgo, a sã n ne neb kʋʋng woto sẽn tigimd taab a Zeezi kũumã tẽegr yĩngã. (Luk 22:19) La pa nebã sõorã n noom-a n tɩ yɩɩd ye. Yaa bũmb ning sẽn kɩt tɩ ned kam fãa yãk yam n na n wa wã n noom-a n yɩɩda. Rẽ n tar yõod a nifẽ n yɩɩda. Sõs-kãnga pʋgẽ, d na n leoka sokr sẽn tar yõod wʋsgo: Bõe yĩng la d sẽn kẽnd Kiristã kũumã tẽegr yʋʋmd fãa, la d kẽnd tigiss a taabã semen fãa me wã?

3-4. a) Bõe yĩng la d sẽn kẽnd d tigissã? b) D sẽn modgd n kẽnd tigissã wilgda bõe tõnd mengã zugu? d) Bõe la 1 Korẽnt-rãmb 11:23-26 yeta, tɩ wilgdẽ tɩ d pa segd n vaal Kiristã kũumã tẽegre?

³ Bõe yĩng la d sẽn kẽnd d tigissã? Sẽn tɩ yɩɩd fãa, yaa tɩ tigissã kẽnd naaga bũmb nins d sẽn maand n waoogd a Zeova wã. Sẽn paase, d tigissã sasa, d paamdame t’a Zeova zãmsd-d bũmb wʋsgo. Neb nins sẽn yaa wuk-m-mens rãmbã pa get tɩ yaa tɩlɛ tɩ b sak tɩ b wilg-b bũmb ye. (3 Zã 9) La tõnd yẽ rata  ne d sũur fãa t’a Zeova tũnug ne a siglgã n zãms-d a raabã.—Eza. 30:20; Zã 6:45.

⁴ Tõnd sẽn kẽnd tigissã, yaa kaset tɩ d yaa sik-m-mens rãmba, n sakd ne yamleoog t’a Zeova wilgd tõnd a raabã. A Zeezi kũumã tẽegr tigsgã yõod ka to ye. D sẽn kẽnd tigs-kãnga wã, pa sẽn yaa tɩlɛ wã yĩng bal ye. Yaa d sẽn dat n sik d meng n sak noor ning a Zeezi sẽn kõ wã. Ad a sẽn yeelã: “Maand-y woto n tẽegd mam yelle.” (Karm-y 1 Korẽnt-rãmb 11:23-26.) Yaa tigsg sẽn kengd tõnd raoodo, tɩ d maneg n neẽ tɩ beoog na n yɩɩ neere. Leb n tẽegda tõnd a Zeova sẽn nong tõnd hal n ta zĩig ningã. La a Zeova miime tɩ sã n yaa vugr bal la d paamd raood kengr woto yʋʋmd pʋgẽ, pa sek ye. Rẽ n so t’a maan tɩ semen fãa bɩ d tar tigissi, la a sagend-d tɩ d modg n kẽnd n pa vaandẽ ye. Sik-m-mengã kɩtame tɩ d maand wa a sẽn yetã. Tigissã seglg la b kẽnd rɩkda sẽka, la d modgdame n yãt sẽk rẽ yĩng semen fãa.

5. Bõe n kɩt tɩ sik-m-mens rãmbã sakd a Zeova sẽn yet tɩ d wa t’a zãms-d bũmb wʋsgã?

⁵ Yʋʋmd fãa, neb milyõ-rãmb sẽn yaa sik-m-mens rãmb n sakd a Zeova sẽn yet tɩ d wa t’a zãms-d bũmb wʋsgã. (Eza. 50:4) B sakda ne yamleoog n wa Kiristã kũumã tẽegrã, tɩ rẽ tɛk bɩ b kell n wat tigiss a taabã me. (Zaka. 8:20-23) D fãa naagda taaba, t’a Zeova sẽn yaa d ‘sõangda, la d fãagdã’ zãmsd tõnd la a wilgd-d sore, hal tɩ d sũur noomẽ. (Yɩɩn. 40:18) Sɩd-sɩdã, bõe n be n tar yõodo, wall n tõe n noog ned sũur n ta a sẽn na n sak t’a Zeova ne a Biig a Zeezi a sẽn nong wʋsgã zãms-a b raabã?—Mat. 17:5; 18:20; 28:20.

6. Wãn to la sik-m-meng sõng rao a ye t’a sak n kẽng Kiristã kũumã tẽegre?

⁶ D maanda modgr yʋʋmd fãa, n boond neb wʋsg tɩ b wa naag n maan a Zeezi kũumã tẽegre. Neb wʋsg sak n waame, hal tɩ naf-ba. Ad kibar a ye. Na maan yʋʋm a wãn woto, rao la b kõ seb-vãoog d sẽn da pʋɩt n boond nebã tɩ b wa Kiristã kũumã tẽegre, t’a yeel saam-biig ning sẽn kõ-a seb-vãoogã t’a pa na n tõog n wa ye. La daarã sẽn ta wã, saam-biigã wa n nee raoã sẽn kẽed Rĩungã roogẽ, hal tɩ ling-a. B sẽn deeg-a sõma to-to wã yɩ-a-la noog wʋsgo, t’a sɩng tigissã kẽnde. Rẽ tɛka, maana yʋʋmd tɩ yaa tigiss a tãab bal la raoã pa tõog n kẽnge. Bõe n kɩt t’a yãk yam n na n kẽnd tigissã fãa? Yaa a sik-m-mengã yĩng la a sẽn sak n toeem a tagsgã. Saam-biig ning sẽn da kõ-a seb-vãoogã yeelame: “Yaa ned sẽn tolg n yaa sik-m-meng soaba.” A reega lisgu, n lebg a Zeova Kaset soaba. Sãmbg kae tɩ yaa a Zeova n tak nin-kãngã n wa tũudum hakɩɩkã pʋgẽ.—2 Sãm. 22:28; Zã 6:44.

7. Wãn to la bũmb nins d sẽn wʋmd tigissã sasa wã, la d sẽn karemd Biiblã pʋgẽ wã tõe n sõng-d tɩ d yɩ sik-m-mens rãmba?

⁷ Bũmb nins d sẽn wʋmd tigissã sasa wã, la d sẽn karemd Biiblã pʋgẽ wã tõe n sõnga tõnd tɩ d yɩ sik-m-mens rãmba. Kiristã kũumã tẽegr sã n wa ket tɩ semen a wãna, d tigissã sasa d wae n gomda a mak-sõngã yelle, la a sẽn sik a meng n sak n ki tɩ yɩ maoong tõnd yĩngã. Sã n wa ket tɩ rasem a wãna, b sagenda tõnd tɩ d modg n karem Biiblã zĩis nins sẽn togsd bũmb nins sẽn maan nand tɩ b kʋ-a wã, n tãag a vʋʋgrã poor bilfã. D sẽn kelgd bũmb nins tigissã sasa wã, la d sẽn bãngd bũmb nins Biiblã kiba-kãensã pʋgẽ wã kɩtdame tɩ d maneg n dat n pʋʋs Wẽnnaam bark a Zeezi maoongã yĩnga. Leb n kɩtdame tɩ d rat n modg n yɩ sik-m-mens rãmb wa a Zeezi, la d mao n maan a Zeova raabã, baa sã n wa yaa toogo.—Luk 22:41, 42.

8. Bõe la a Zeezi maan tɩ wilgd t’a yaa raood soaba?

⁸ D modgdame me n dɩkd a Zeezi togs-n- taar raoodã wɛɛngẽ. Tags-y n ges-y raood ning a sẽn tall a kũumã ket tɩ rasem a wãnã. A ra miime tɩ ka ne rasem a wãn bala, a bɛɛbã na n yaal-a lame, la b pãb-a, la b kʋ-a. (Mat. 20:17-19) Ne rẽ fãa, a sakame. A yõkrã sẽn wa n kolgdẽ wã, a yeela a tʋm-tʋmdb nins sẽn da be ne-a Gɛtsemane wã yaa: “Yik-y tɩ d kẽnge. Sẽn zãmb-a maamã kolgdame.” (Mat. 26:36, 46) Nebã sẽn sũ taab n wa ne zab-teed n na n yõk-a wã, a kolgame, n yeel tɩ yẽ la woto, la a yeel sodaasã tɩ b bas a tʋm-tʋmdbã tɩ b looge. (Zã 18:3-8) Ad sɩd yaa raood tɛkẽ! Rũndã-rũndã, kiris-neb nins sẽn paam vʋʋsem sõngã zaeebã, la a Zeezi piis a taabã maanda b sẽn tõe fãa n dɩkd a togs-n-taare, n wilgd raoodo. Wãn to?

9. a) Bõe yĩng tɩ yɩl n kẽnd tigissã n pa vaandẽ mi n baood raoodo? b) Wãn to la tõnd mak-sõngã nafd d tẽed-n-taas nins sẽn be bãens roogẽ tũudmã yĩngã?

⁹ Yel-pakr wall zu-loees sasa, yaa tɩlɛ tɩ d tall raood sẽn na yɩl n ket n kẽnd tigissã. Tõnd tẽed-n-taas n be sũ-sãang pʋgẽ b ned kaalem yĩnga, tɩ kẽer yaa b raood n komse, wall bãag n namsd-ba. La baa ne rẽ, b kẽnda tigissã. Sãnda me tara raood n wat tigissã, baa ne b sẽn paamd namsg b zakã neb nugẽ, wall tẽngã taoor dãmb nugẽ wã. Tags-y n ges-y tõnd mak-sõngã sẽn nafd d tẽed-n-taas nins sẽn be bãens roogẽ b tũudmã yĩngã to-to. (Ebre. 13:3) B sã n wʋmdẽ tɩ tõnd ket n wɩngda ne a Zeova tũub baa ne yɛlã, kengda b pɛlga, tɩ b rat n kell n tall tẽeb kãn-kãe, n tall raood la b maan sɩda. A buud paama tʋm-tʋmd a Poll. A sẽn wa n be bãens roog Rommã, a sã n da wʋm fãa t’a tẽed-n-taasã wɩngda ne Wẽnnaam tũubã, noogda a sũuri. (Fili. 1:3-5, 12-14) A wa n gʋlsa lɛtr n tool kiris-neb nins sẽn yaa ebre-rãmbã. Tõe tɩ yaa a yiibã sẽn wa n kolgã, pa rẽ bɩ a yiibã poor bilfu. Lɛtrã pʋgẽ, a yeela kiris-nin-kãensã sẽn maand sɩdã tɩ b kell n ‘wɩng ne ba-biir nonglem,’ la b ra tol n bas taab tiging ye.—Ebre. 10:24, 25; 13:1.

10-11. a) Ãnd dãmb la d segd n bool tɩ b wa Kiristã kũumã tẽegre, la bõe yĩnga? b) Bõe la Efɛɛs-rãmb 1:7 wã yeta, tɩ wilgd tɩ d segd n sɩd maana woto?

¹⁰ D sã n bool d roagdba, d tʋmd-n-taas la d yags tɩ b wa a Zeezi kũumã tẽegre, rẽ me wilgdame tɩ d tara raoodo. Bõe yĩng tɩ d boond-ba? D sũur nooma ne a Zeova la a Zeezi, b sẽn maan bũmb ning tõnd yĩngã, hal tɩ d rat n bool d taabã tɩ b wa naag-d n maan Kiristã kũumã tẽegre. D ratame tɩ bãmb me bãng b sẽn tõe n maanega, n paam “Wẽnnaam barkã,” a Zeezi maoongã maasem yĩnga.—Karm-y Efɛɛs-rãmb 1:7; Vẽn. 22:17.

¹¹ D sẽn tar raood n tigimd taabã wilgdame tɩ d tara zʋg-sõng a to. Yaa zʋg-sõng a Zeova ne a Biigã fãa sẽn tar hal sõma.

12. a) Wãn to la d tigissã kɩtd tɩ d maneg n nong a Zeova ne a Zeezi? b) Bõe la 2 Korẽnt-rãmb 5:14, 15 wã sagend tõnd tɩ d maane, n dɩk a Zeezi togs-n-taare?

¹² D sẽn nong a Zeova ne a Zeezi wã  kɩtame tɩ d kẽnd tigissã. D sẽn wʋmd bũmb nins tigissã sasa wã kɩtdame me tɩ d maneg n nong a Zeova ne a Biigã. Tigissã zĩigẽ, d wae n wʋmda goam sẽn tẽegd tõnd bũmb ning b yiibã sẽn maan n kõ tõndã. (Rom. 5:8) Sẽn yɩɩd fãa, Kiristã kũumã tẽegr sõngda tõnd tɩ d tẽeg t’a Zeova ne a Biigã nonga tõnd hal wʋsgo, la b nong baa neb nins sẽn nan pa mi a Zeezi maoongã yõod sẽn ta zĩig ningã. D sẽn dat n pʋʋs-b barkã yĩnga, d maoodame n na n dɩk a Zeezi togs-n-taar d sẽn vɩ to-to wã pʋgẽ, daar ne a to fãa. (Karm-y 2 Korẽnt-rãmb 5:14, 15.) Sẽn paase, d rata ne d sũur fãa n pẽg a Zeova, a sẽn kɩt t’a Biigã wa ki tõnd yĩngã. Bũmb a ye d sẽn tõe n maan n pẽg-a, yaa d sẽn na n naagd n leokd tigissã sasa.

13. Bõe la d tõe n maan tɩ wilg tɩ d nonga a Zeova la a Biigã ne d sũur fãa? Wilg-y y leoorã võore.

¹³ D sã n dat n wilg tɩ d nonga a Zeova la a Zeezi ne d sũur fãa, d segd n sakd n mongda d meng baa sẽn wa n yaa bũmb ninga, sẽn na yɩl n maan b raabã. Naoor wʋsgo, d maanda woto sẽn na yɩl n kẽng tigissã. D tigsg a ye n yaa sibr bɩ hato. Wakat kãng tɩ neb a taabã vʋʋsdame. D maanda tigsg daar a to me. Nong n yaa zaabre, tʋʋmã sigb poore, hal tɩ yaa yaamse. D sẽn modgd n kẽnd tigissã baa ne yaamsã, a Zeova neeme bɩ? Yaa vẽeneg t’a neeme. D modgrã sã n yaa wʋsgo, a Zeova sũur me maneg n nooma ne-do, bala wilgdame tɩ d nong-a lame.—Mark 12:41-44.

14. Wãn to la a Zeezi wilg nonglem sẽn pa baood a meng nafre, tɩ d segd n dɩk a togs-n-taare?

¹⁴ A Zeezi wilga nonglem sẽn pa baood a meng nafre, tɩ d segd n dɩk a togs-n-taare. A sak n kii a karen-biisã yĩnga. La pa rẽ bal ye. A sẽn da vɩ to-to wã wilgdame me t’a karen-biisã neer la a baood n yɩɩda. Wala makre, nand tɩ b wa yõk-a wã, a sõsa ne a karen-biisã n sagl-ba, baa a sẽn da yɛ wʋsgo, tɩ sũ-sãan-kãseng me ra tar-a wã. (Luk 22:39-46) Pa nebã sẽn da tõe n maan n sõng-a wã n da pak-a ye. Yaa yẽ mengã sẽn da tõe n maan n sõng-bã n da pak-a n yɩɩda. (Mat. 20:28) Tõnd me sã n nong a Zeova la d tẽed-n-taasã ne d sũur fãa woto, d na n maana d sẽn tõe fãa n kẽnd Kiristã kũumã tẽegre, la tigiss a taabã fãa.

15. Ãnd dãmb la d rat n sõng n yɩɩda?

 ¹⁵ Tõnd paam n bee kiris-neb hakɩɩkã tiging pʋgẽ, tɩ tõnd ne d tẽed-n-taasã yaa wa zak a ye rãmba. D zems-n-taarã buud kae ye. Rẽ n so tɩ d kẽesd d sẽkã koɛɛgã mooneg pʋgẽ n boond d taabã, n dat tɩ b wa naag-do. La yaa neb nins sẽn yaa tõnd ‘tẽeb pʋgẽ ba-biisi,’ n pa le wat tigissã, la b pa le yit koɛɛgã moonegã la d rat n sõng n yɩɩda. (Gal. 6:10) D sã n maood n na n sõng-b tɩ b le sɩng tigissã waoongo, wilgdame tɩ d nong-b lame. Sẽn yɩɩd fãa, d sã n sõng tɩ b wa Kiristã kũumã tẽegre. Ned a woto sã n lebg n wa a Zeova sẽn yaa d Ba la d Pe-kɩɩmã nengẽ, d sũur nooma wʋsg wa a Zeova ne a Zeezi.—Mat. 18:14.

16. a) Bõe la d tõe n maan n keng taab raoodo, la wãn to la d tigissã na n sõng-do? b) Yʋʋmdã sasa kãnga, zemsame tɩ d tẽeg a Zeezi goam nins sẽn be Zã 3:16. Bõe yĩnga?

¹⁶ Semen nins sẽn watã bɩ d maan d sẽn tõe fãa n bool neb wʋsg tɩ b wa naag-d n maan Kiristã kũumã tẽegre, tʋʋl-nif kiuug rasem 19 sẽn yaa arzũm daarã. (Ges-y zĩ-gũbrã.) Bɩ d maan d sẽn tõe fãa n kẽnd tigissã n pa vaandẽ, tɩ kengda d taabã raoodo. Dũniyã sɛɛb sẽn tar kolgrã, yaa tɩlɛ tɩ d kẽnd tigissã sẽn na yɩl n kell n tall sik-m-menga, raood la nonglem. (1 Tes. 5:8-11) D wilg tɩ d nonga a Zeova la a Biigã ne d sũur fãa, b sẽn nong tõnd wʋsgã yĩnga.—Karm-y Zã 3:16.