D modg n zãms nebã Biiblã neere
D modg n zãms nebã Biiblã neere
“Moon Wẽnnaam koɛɛgã, . . . wilg nebã b kongre, la f lenge, la f sagl ne sũ-maasem wʋsgo, la f zãms nebã.”—2 TƖM. 4:2.
1. No-bʋg la a Zezi kõ a karen-biisã, la mak-sõng bʋg la yẽ meng kõ-yã?
A ZEZI sẽn da wa n be tẽng zugã, a maana yel-soalem la a sãoog bãad dãmba. La nebã ra pa mi-a rẽ yĩng bal ye. B ra mi-a-la a sẽn zãmsd nebã yĩng n yɩɩda. (Mark 12:19; 13:1) Yaa Wẽnnaam Rĩungã koe-noog mooneg n da pak a Zezi n yɩɩda, la yaa woto me ne a karen-biisã rũndã-rũndã. Kiris-nebã segd n kell n maana karen-biisi, n zãms nebã tɩ b sak n tũ bũmb nins fãa a Zezi sẽn togsã.—Mat. 28:19, 20.
2. Sẽn na yɩl n tõog n maan karen-biisi, bõe la d segd n maane?
2 Sẽn na yɩl n tõog n maan karen-biisi, d modgda wakat fãa tɩ d sẽn zãmsd nebã to-to wã lebgd sõma n paasdẽ. Tʋm-tʋmd a Poll gʋlsa a tʋmd-n-taag a Tɩmote n wilg rẽ yõod sẽn ta zĩig ninga. A yeela woto: “Gũus f meng ne koɛɛg ninga fo sẽn zãmsd nebã, la ges bõn-kãens n da bas ye, tɩ bõe, yaa woto la fo na n fãag f menga, la neb nins sẽn kelgd foomã.” (1 Tɩm. 4:16) A Poll sẽn yeel ka t’a Tɩmote zãms nebã, a ra pa rat n yeel t’a kɩt tɩ nebã paam bãngr bal ye. Kiris-neb nins sẽn moond koɛɛgã tɩ womd biisã modgdame n kɩtdẽ tɩ koɛɛgã kẽed nebã sũyã, tɩ kɩtdẽ tɩ b toeemd b manesmã. Woto baooda minim. La wãn to la d tõe n zãms nebã neere, tõnd sã n wa moond Wẽnnaam Rĩungã koe-noogo?—2 Tɩm. 4:2.
D maneg d zãmsgã tɩ yɩ sõma n paase
3, 4. a) Wãn to la d tõe n zãms nebã sõma? b) Wãn to la Wẽnnaam tʋʋmdã lekoll sõngd tõnd tɩ d zãmsd nebã sõma?
3 Sẽn na yɩl n tõog n zãms nebã sõma, tõnd mengã segd n deng n zãmsa d mense, la d get neb nins sẽn tar minimã sẽn maand to-to wã, n maand wa bãmba. Tõnd sã n dat n wʋm tõnd sẽn zãmsd nebã bũmb ningã võore, d segd n pʋʋsa Wẽnnaam la d zãms d meng nanda. (Karm-y Yɩɩl Sõamyã 119:27, 34.) D sã n get koe-moondb nins sẽn tar minimã sẽn zãmsd nebã to-to wã, na n sõng-d lame tɩ d bãng tõnd me sẽn tõe n maan to-to. D sã n modgd wakat fãa n maand wa bãmb me sẽn maand to-to wã, na n sõng-d lame tɩ d maneg d zãmsgã tɩ yɩ sõma n paase.—Luk 6:40; 1 Tɩm. 4:13-15.
4 A Zeova yaa tõnd Karen-saam Kãsenga. A tũnugda ne a siglgã babg ning sẽn be tẽng zugã n wilgd a nin-buiidã b sẽn segd n moon koɛɛgã to-to. (Ezai 30:20, 21) Rẽ n so tɩ tigimsã fãa maand Wẽnnaam tʋʋmdã lekoll semen fãa, sẽn na yɩl n sõng koe-moondbã tɩ b tõog n moon Wẽnnaam Rĩungã koe-noog sõma n paase. Sebr ning b sẽn zãmsd lekoll kãngã sasa wã n yɩɩd yaa Biiblã. A Zeova Gomdã wilgda tõnd sẽn segd n zãms nebã bũmb ninga, la d sẽn segd n zams-b to-to me tɩ yɩ sõma. Wẽnnaam tʋʋmdã lekoll sasa, b tẽegda tõnd wakat fãa tɩ d sã n dat n zãms nebã sõma, d segd n kɩtame tɩ zãmsgã tik Wẽnnaam Gomdã zugu, d segd soka sogsg sẽn zemse, d segd n kɩtame tɩ zãmsgã võor wʋmb yɩ nana, la d wilg tɩ d sɩd nonga nebã. Bɩ d ges zĩ-kãensã a naasã bal-balle. Rẽ poore, d na n gesa d sẽn tõe n maan to-to tɩ zãmsgã kẽ karen-biig sũuri.
D zãmsgã segd n tika Wẽnnaam Gomdã zugu
5. Tõnd zãmsgã segd n tika bõe zugu, la bõe yĩnga?
5 Ninsaalbã fãa sʋka, yaa a Zezi n yaa karen-saam kãsenga, la a zãmsgã fãa ra tika Wẽnnaam Gomdã zugu. (Mat. 21:13; Zã 6:45; 8:17) A ra pa togsd a meng goam ye. Yaa sẽn tʋm-a yẽ wã goam la a togs-yã. (Zã 7:16-18) Yẽ togs-n-taar la tõnd me sẽn dɩkdã. Dẽnd tõnd sã n wa moond zak-zaka, bɩ d sã n wa zãmsd nebã Biiblã, d sẽn yetã fãa segd n tika Wẽnnaam Gomdã zugu. (2 Tɩm. 3:16, 17) Baa tõnd yamã sẽn zem to-to fãa, d pa tõe n kɩt tɩ zãmsgã kẽ nebã sõma n ta Gʋlsg Sõamyã sẽn tõe n maan to-to wã ye. Biiblã tara pãnga. Tõnd sã n wa rat n sõng karen-biig t’a bãng bũmb võore, bɩ d kɩt t’a mengã karem Biiblã pʋgẽ n bãng a võorã, tɩ rẽ n yaa sõma n yɩɩda.—Karm-y Hebre dãmba 4:12.
6. Wãn to la d tõe n bãng tɩ karen-biigã wʋma zãmsgã võore?
6 La woto pa rat n yeel tɩ d pa segd n deng n segl d meng n yaool n tɩ zãms karen-biigã ye. D segd n maaga d yĩng n deng n tags sõma n ges Biiblã verse bʋs la tõnd mengã bɩ karen-biigã na n wa karem zãmsgã sasa. Naoor wʋsgo, yaa sõma tɩ d karem verse nins sẽn wilgd bũmb nins tõnd sẽn tẽedã. D segdame me n sõng karen-biigã t’a wʋm verse nins a sẽn karemdã fãa võore.—1 Kor. 14:8, 9.
D sok sogsg sẽn zemse
7. Bõe yĩng tɩ sogsgã tar yõod zãmsgã pʋgẽ?
7 Tõnd sã n sokd sogsg sẽn zems zãmsgã sasa, na n sõnga karen-biigã t’a tags sõma, la sõng tõnd me tɩ d bãng sẽn be karen-biigã sũurẽ. Dẽnd yɩta sõma tɩ d ra zoe n wilg karen-biigã verse rãmbã võor ye. D reng n kɩt tɩ yẽ mengã wilg b võorã nanda. Wakat ninga, sẽn na yɩl tɩ karen-biigã bãng zãmsgã võor sõma, tõe tɩ na n yɩɩ tɩlae tɩ d sok sokr a to bɩ sogsg a taab meng n paase. Tõnd sã n sokd karen-biigã sogsgo, d sõngd-a lame t’a bãngd yɛl kẽer võore, la sẽn tɩ yɩɩd fãa, d sõngdame tɩ yẽ mengã kɩs sɩd ne a sẽn zãmsd bũmb ningã.—Mat. 17:24-26; Luk 10:36, 37.
8. Wãn to la d tõe n bãng bũmb ning sẽn be karen-biig sũurẽ?
8 Tõnd sɛb wʋsg pʋsẽ, sull fãa tara sokre, tɩ d segd n bao leoorã sulã pʋsẽ. Yaa woto la zãmsgã maanda. Naoor wʋsgo, tõnd sẽn zãmsd Biiblã ne neb ninsã tõe n baoa leoorã sulã pʋsẽ n yã tao-tao. La tõnd sã n dat tɩ zãmsgã kẽ nedã sũurẽ, d na n maana bũmb a to n paase. Wala makre, tõe tɩ karen-biigã na n tõog n wilga Biiblã sẽn yet bũmb ning yoobã zugu. (1 Kor. 6:18) La tõnd sã n maan yam ne yam n sok-a t’a togs yẽ mengã sẽn tagsd bũmb ninga, d na n bãnga karen-biigã sẽn sɩd tagsd to-to bũmb ning a sẽn zãmsdã zugu. Tõnd tõeeme n sok-a woto: “Bõe yĩng tɩ Biiblã gɩdg yoobo? Bõe la fo mengã tagsd Wẽnnaam no-kãngã zugu? Rẽ yĩnga fo tagsdame tɩ tõnd sã n tũud noy nins Wẽnnaam sẽn kõ tõndã, na n naf-d lame bɩ?” Karen-biigã sẽn na n leok to-to wã na n kɩtame tɩ d bãng bũmb ning sẽn be a sũurẽ wã.—Karm-y Matɩe 16:13-17.
D kɩt tɩ zãmsgã võor wʋmb yɩ nana
9. D sã n wa rat n wilg karen-biig verse võore, bõe yell la d pa segd n yĩm?
9 Naoor wʋsgo, zãmsg nins sẽn be Wẽnnaam Gomdã pʋgẽ wã võor wʋmb yaa nana. La tõe tɩ tõnd sẽn zãmsd Biiblã ne neb ninsã yam yuusdame, b sẽn da zãms bũmb nins ziri tũudmã pʋgẽ wã yĩnga. D sẽn yaa karen-saam dãmbã, yaa tõnd n segd n kɩt masã tɩ b wʋm Biiblã võor nana-nana. Koe-moondb nins sẽn zãmsd nebã sõma wã kɩtdame tɩ b zãmsgã võor wʋmb yaa nana, t’a yaa vẽeneg nebã yamẽ, la a yaa sɩd me. Tõnd sã n maand woto, d pa na n kɩt tɩ sɩdã võor wʋmb yɩ toog ye. Ra bao-y n na n wilg yel-bõonesã fãa võor ye. D sã n karem verse, pa tɩlae tɩ d wɛgs-a wʋsg ye. D wilg zĩig ning sẽn na n kɩt tɩ karen-biigã wʋm zãmsgã võorã bala. Zãmsgã sã n kell n kẽng taoore, karen-biigã na n wa wʋma Biiblã zĩis nins sẽn tagmã võor bilf-bilfu.—Heb. 5:13, 14.
10. Bõe n na n sõng-d tɩ d bãng sula sõor nins d sẽn segd n vaeesã?
10 Sul a wãn la d segd n vaees zãmsg fãa sasa? Rẽnd d tall yam sẽn na yɩl n bãng rẽ. Karen-saamb ne a to minim la a yɛl pa yembre, karen-biig me ne a to rẽnd pa yembre. La d segd n ninga d yamẽ wakat fãa tɩ d sẽn datã yaa d sõng karen-biigã t’a paam tẽeb sẽn yaa kãn-kãe. Rẽ n so tɩ d basdẽ t’a rɩkd sẽk n karemd bũmb ning sẽn be Wẽnnaam Gomdã pʋgẽ wã, n wʋmd a võor la a sakd n deege. Sã n mik t’a soabã pa wʋmd yɛlã võor tao-tao, d pa segd n zãms sul wʋsg ye. D segd n zãmsdame n zemsd a soabã sẽn tõe n wʋme. La a sã n wa wʋm tõnd sẽn zãmsd zĩig ningã võore, d tõeeme masã n kẽng taoore.—Kol. 2:6, 7.
11. Nebã zãmsg wɛɛngẽ, bõe la tʋm-tʋmd a Poll mak-sõngã zãmsd tõndo?
11 Tʋm-tʋmd a Poll ra togsda koe-noogã tɩ nin-paalsã tõe n wʋm a võor nana-nana. Baa ne a sẽn da karem n zãagã, a pa tol n gom goam võor wʋmb sẽn yaa toog ye. (Karm-y 1 Korẽnt dãmba 2:1, 2.) Wẽnnaam goamã sẽn be Biiblã pʋgẽ wã võor wʋmb sẽn yaa nana wã yĩnga, nooma pʋ-peelem dãmbã tɩ b rat n sɩd bao n bãnge. Pa tɩlae tɩ f karem lekoll n zãag n yaool n tõog n wʋm Biiblã võor ye.—Mat. 11:25; Tʋʋ. 4:13; 1 Kor. 1:26, 27.
D sõng karen-biisã tɩ b tall naneb ne zãmsgã
12, 13. Bõe n tõe n kɩt tɩ karen-biig tũ a sẽn zãmsd bũmb ningã? Rɩk-y makre.
12 Sẽn na yɩl tɩ d zãmsgã wom biisi, d segd n modgame t’a kẽ karen-biigã sũurã. Karen-biigã segd n bãnga bũmb ning a sẽn zãmsdã sẽn pak-a to-to, sẽn nafd-a to-to, la Biiblã noy tũub me sẽn tõe n maneg a vɩɩmã to-to.—Ezai 48:17, 18.
13 Wala makre, tõe tɩ d karma Hebre dãmb 10:24, 25 wã sẽn sagend kiris-nebã tɩ b tigimd tãab n kelgd Wẽnnaam Gomdã tɩ keng b raoodã, la b wilg taab b nonglmã. Sã n mik tɩ karen-biigã nan pa kẽnd tigissã, d tõe n wilg-a-la koɛɛg-koɛɛg bal t’a bãng tigissã sẽn maand to-to, la d togs-a bũmb ning yell b sẽn na n gom tigisg ning sẽn watã. D tõe n yeel-a lame tɩ tigissã naagã bũmb nins tõnd sẽn maand n wilgdẽ tɩ d tũuda Wẽnnaamã sʋka, la d wilg-a tɩ b nafda tõnd mengã. Rẽ poor masã, d tõe n bool-a lame t’a wa tigisgã. A sã n sak n tũ Biiblã noyã, segd n yɩɩ a sẽn dat n sak a Zeova wã yĩnga, la pa a sẽn dat n noog ned ning sẽn zãmsd-a wã sũur yĩng ye.—Gal. 6:4, 5.
14, 15. a) Bõe la Biibl karen-biig tõe n bãng a Zeova zugu? b) Biibl karen-biig sã n bãng a Zeova sõma, wãn to la rẽ tõe n naf-a?
14 Karen-biig sã n zãmsd Biiblã la a tũud a noyã, nafr sẽn yaa kãseng la a na n paame: A na n wa bãnga a Zeova hal sõma la a nong-a. (Ezai 42:8) A Zeova yaa Ba sẽn nong a kamba, la yĩngr la tẽng Naanda. A leb n kɩtame tɩ neb nins sẽn nong-a la b tũud-a wã tõe n bãng a sẽn yaa a soab vẽenega. (Karm-y Yikri 34:6, 7.) Nand t’a Moiiz tɩ yiis Israɛll nebã yembdẽ wã Eziptã, a Zeova yeel-a–lame yaa: “Mam na n yɩɩ mam sẽn na n yɩ a soaba.” (Yik. 3:13-15, NW ) Gom-kãensã rat n wilgame tɩ sã n wa yaa tɩlae, a Zeova tõe n lebga a sẽn dat n yɩ a soab fãa, sẽn na yɩl n pids a sẽn dat bũmb ning a nin-buiidã yĩngã. Sɩd me, Israɛll nebã bãngame t’a Zeova yaa Fãagda, zabr Gãndaoogo, Kõta, Wẽnnaam sẽn pidsd a kãabse, la sẽn tõe n maan bũmb a taab me n sõng-ba.—Yik. 15:2, 3; 16:2-5; Zoz. 23:14.
15 Yaa vẽeneg tɩ tõnd karen-biisã pa na n paam tɩ Wẽnnaam maan yel-soalem n sõng-b wa a sẽn da maan n sõng a Moiizã ye. La tõnd karen-biisã tẽeb sã n wa bɩt n paasdẽ, tɩ b nong b sẽn zãmsd bũmb ningã n paasdẽ la b tũudẽ, yaa vẽeneg tɩ b na n bãngame tɩ tara yõod tɩ b teeg a Zeova n paam raoodo, yam la sor-wilgri. B sã n maan woto, tarẽ-n-tarẽ, bãmb me na n wa bãngame t’a Zeova yaa Sagenda, Kogenda, la Kõt sẽn kõt-b bũmb nins fãa sẽn yaa tɩlae ne-bã.—Yɩɩl 55:23; 63:8; Yel. 3:5, 6.
D wilg tɩ d sɩd nonga d karen-biisã
16. Sẽn na yɩl n zãms ned neere, bõe yĩng tɩ pa minimã bal n tar yõodo?
16 Yãmb sã n wa tagsdẽ tɩ y pa tar minim wʋsg n tõe n zãms nebã sõma wa y sẽn datã, bɩ y ra koms raood ye. Yaa a Zeova ne a Zezi n get tʋʋmd ning sẽn yaa zãms nebã dũniyã gill zug rũndã-rũndã wã yelle. (Tʋʋ. 1:7, 8; Wil. 14:6) Tõnd sã n modge, b tõe n sõnga tõnd tɩ d goamã tõog n kẽ neb nins sẽn sɩd rat n zãmsã sũyã. (Zã 6:44) Baa tõnd minimã sã n paoodẽ, d sã n nong d karen-biigã, rẽ n tõe n sõng-a n yɩɩda. Tʋm-tʋmd a Poll meng ra miime tɩ tara yõod tɩ d nong neb nins d sẽn zãmsdã.—Karm-y 1 Tesalonik rãmba 2:7, 8.
17. Wãn to la d na n wilg tɩ d karen-biigã yell pak-d lame?
17 Sẽn na yɩl n wilg tɩ d karen-biigã yell sɩd pak-d lame, d tõe n modgame n bao n bãng-a sõma. D sã n sõsd ne-a Biiblã noy zut wakat fãa, tõe tɩ d na n wa bãnga a sẽn vɩ to-to wã sõma. Tõe tɩ d na n yãame t’a zoe n tũuda yɛl kẽer a sẽn zãms Biiblã pʋgẽ. La tõe tɩ yɛl kẽer la a segd n dems n paase. Dẽnd tõnd sã n sõng karen-biigã t’a bãng yẽ mengã sẽn tõe n tũ bũmb ning a sẽn zãmsd Biiblã pʋgẽ wã to-to, d na n tõog n sõng-a lame t’a lebg Kiristã karen-biig hakɩka.
18. Bõe yĩng tɩ tar yõod tɩ d pʋʋs ne d karen-biigã la d gom a yell pʋʋsgã pʋgẽ?
18 Bũmb ning sẽn tar yõod n yɩɩd yaa d pʋʋs ne d karen-biigã, la d gom a yell d pʋʋsgã pʋgẽ. Karen-biigã segd n bãnga vẽeneg tɩ tõnd ratame n sõng-a t’a wa bãng d Naandã sõma, n pẽneg-a la a paam t’a wilgd-a sore. (Karm-y Yɩɩl Sõamyã 25:4, 5.) Tõnd sã n pʋʋsd a Zeova t’a sõng karen-biigã t’a kell n modg n tũ a sẽn zãmsdã, karen-biigã na n bãngame tɩ tara yõod t’a yɩ ‘koe-sakda.’ (Zak 1:22) Sẽn paase, a sã n kelgd tõnd sẽn pʋʋsd Wẽnnaam ne d sũur fãa to-to wã, a na n bãnga yẽ me sẽn tõe n pʋʋs Wẽnnaam to-to. Tõnd sã n tõog n sõng ned t’a wa lebg a Zeova zoa, d sũ-noogã pa tõe n bãng n bilg ye.
19. Bõe yell la d na n gom sõsg ning sẽn pʋgdã pʋgẽ?
19 Dũniyã gill zugu, a Zeova Kaset rãmb sẽn yɩɩd milyõ a yoob la pʋɩ-sʋk n modgd n bãngd b sẽn na n zãms nebã to-to sõma, sẽn na yɩl n sõng pʋ-peelem dãmbã tɩ b tũ a Zezi sẽn togs bũmb ninsã fãa. Woto sɩd kengda raoodo! La bi-bʋs la tõnd koe-moonegã womda? D na n bãnga rẽ sõsg ning sẽn pʋgdã pʋgẽ.
Yãmb ket n tẽrame bɩ?
• Bõe yĩng tɩ d segd n maneg d sẽn zãmsd nebã to-to wã tɩ yɩ sõma?
• Wãn to la d tõe n maneg d sẽn zãmsd nebã to-to wã tɩ wom biisi?
• Tõnd sã n pa tar minim wʋsg nebã zãmsg pʋgẽ, bõe n tõe n lok rẽ?
[Zãmsgã sogsgã]
[Foto, seb-neng 13]
Yãmb bee Wẽnnaam tʋʋmdã lekollẽ bɩ?
[Foto, seb-neng 15]
Bõe yĩng tɩ y segd n kɩt tɩ karen-biigã karem Biiblã pʋgẽ?
[Foto, seb-neng 16]
Pʋʋs-y ne karen-biigã la y gom a yell pʋʋsgã pʋgẽ