D yɩ nimbãan-zoɛtba

NINSAALBÃ sɩd ratame tɩ b kʋm b nimbãaneg la b sõng-ba, komã, bãasã, talemdã, wẽnemã, tẽng-n-biis ne taab zabã la sabaab-wẽnsã sẽn namsd-bã. Nimbãan-zoeer yaa f sẽn na n tags sõma n bãng neb a taabã namsg sẽn zabd to-to, n dat n sõng-b tɩ b namsgã sa. Wala wamd ne ko-maasg sẽn maagd ned koɛɛg wĩndg sẽn zabd sasa to-to wã, d sã n kʋmd neb nins sẽn namsdã nimbãanega, tõe n kõ-b-la belsgo, n boog b yɩɩrã, la keng b raoodo.

Yɩ nimbãan-zoet rat n yeelame tɩ d get neb a taabã yelle, la d kẽnd b nengẽ b sã n wa rat sõngre. D pa segd n kʋm d zak rãmba, d zo-rãmb la d mitins bal nimbãaneg ye. D segd n kʋma neb nins d sẽn pa mi wã meng nimbãanega. A Zezi Kirist sẽn wa n sõsd ne nebã tãngã zugã, a soka woto: “Yãmb sã n nong neb nins sẽn nong yãmbã, yãmb keoor yaa bõe?” A le yeela woto: “Yãmb sẽn dat tɩ neba maan yãmb bũmb ningã, bɩ yãmb me maan bãmb boto.”—Matɩe 5:46, 47; 7:12.

Y tõe n karma a Zezi gom-kãensã Gʋlsg Sõamyã pʋgẽ. Neb wʋsg sak n deegame tɩ Biiblã bal n tõe n sõng tõnd tɩ d yɩ nimbãan-zoɛtba. Biiblã togsda tõnd n yɩlemdẽ tɩ d segd n sõnga neb nins sẽn pa tõe n sõng b mensã, baa sẽn yaa bũmb ning n kɩt tɩ b pa tõeyã. Biiblã wilgdame tɩ Wẽnnaam a Zeova sẽn yaa d Naandã yaa mak-sõng sẽn ka to nimbãan-zoeerã wɛɛngẽ.

Wala makre, d karemda woto: “[Wẽnnaam] maanda kɩɩbs ne pʋg-kõap neere. Bãmb nonga sãambã n kõt-b rɩɩb ne futu.” (Tõodo 10:18) B wilgame tɩ Wẽnnaam a Zeova “maanda tɩrg namsdba yĩng n kõt kom sẽn tar-b rãmba rɩɩbo.” (Yɩɩl Sõamyã 146:7) Sã n yaa ne sãamb nins sẽn yaa nimbãan-nebã, a Zeova kõo noor n yeel woto: “Bɩ y maan sãan sẽn be yãmb sʋk wa tẽnga neda, la f nong yẽ wa f menga.”—Maankʋʋre 19:34.

Yɩl n zoe nebã nimbãaneg pa nana ye. Tʋm-tʋmd a Poll gʋlsa Kolos kiris-nebã n yeel tɩ b bas “nin-kʋdga ne a tʋʋmã n lebg nin-paals sẽn paamd yam manegre n lebgd wa sẽn da naan-a yãmbã. . . . Yãmb sẽn yaa  Wẽnnaam nin-tũusds la pʋ-peelem dãmba, la nin-nongdsã, bɩ y paas nimbãan-zoeer wʋsgo.”—Kolos rãmba 3:9, 10, 12.

Dẽnd yɩl n tall nimbãan-zoeer baooda modgr wʋsgo. Nimbãan-zoeerã bee zʋg-sõma nins b sẽn baood tɩ kiris-nebã tallã sʋka. A Poll ra zĩnda Rom soolmã sẽn da yaa nin-toos zãmaanã pʋgẽ. A sagla a tẽed-n-taasã tɩ b toeem zʋgdo, sẽn na yɩl n tõog n tags neb a taabã yell sõma la b kʋm b nimbãanega, la b sõng-ba.

Nimbãan-zoeerã nafa

Neb sãnda geta neb nins sẽn yaa nimbãan-zoɛtbã wa pãn-komsem dãmba. Tags-kãngã zemsame sɩda?

Ayo! Yaa nonglem hakɩk nin-kãensã sẽn tarã n kɩt tɩ b kʋmd neb a taabã nimbãanegã. La nonglem kãng yita Wẽnnaam nengẽ, bala ‘Wẽnnaam yaa nonglem.’ (1 Zã 4:16) B boonda a Zeova tɩ “nimbãan-zoeer Ba la belsg fãa Wẽnnaam.” (2 Korẽnt dãmba 1:3) Bala a “maanda zɩ-beoog rãmba ne nin-wẽnsa neere.”—Luk 6:35.

D Naandã ratame tɩ tõnd me tall zʋg-sõma. Wala makre, nimbãan-zoeere. Miise 6:8 yeta woto: “Ninsaalba, Zusoaba wilga yãmb sẽn yaa neere. Yaa bõe la bãmb baood yãmb nengẽ, sã n ka tɩ y maan sẽn yaa tɩrga n wilg nonglem daar fãa.” Yelbũna 19:22 me yeelame tɩ “yaa ned sõmblem n kɩtd tɩ neb nong-a.” Wẽnnaam Bi-ribl a Zezi Kirist me sẽn dɩk a Ba wã togs-n-taar kɛpɩ wã yeela a karen-biisã woto: “Bɩ y yɩ nin-sõama wa yãmb Ba wã me sẽn yaa nin-sõngã.” (Luk 6:36) Sebr Sõng yeelame tɩ: “Yɩ-y nimbãan-zoɛtba, wa [yãmb] Ba wã sẽn ya nimbãan-zoɛtã.”

D sẽn zoet nebã nimbãanegã pa zaalem yĩng ye. Bala nimbãan-zoeerã wata ne nafa wʋsgo. B yeela Yelbũna 11:17 pʋgẽ tɩ “nin-sõng maanda a meng neere,” tɩ d mi n ne gomd kãensã pidsgu. D sã n zoet ned sẽn dat sõngr nimbãanega, Wẽnnaam getame tɩ yaa wa yẽ la d maan neere. A na n maana neer n dol nimbãan-zoɛtbã, b nimbãan-zoeerã yĩnga. Rĩm a Salomo yeelame tɩ “ned sã n sõng naong rãmba, a bĩngda Zusoaba nengẽ. Yaa bãmb n na n yao a tʋʋm  sõama wã fãa.” (Yelbũna 19:17) A Poll me gʋlsa woto: “Yãmb miimi tɩ bõn-neer ninga ned sẽn maane, a na leb n deeg bõn-kãng Zusoaba nengẽ.”—Efɛɛz rãmba 6:8.

Nimbãan-zoeerã sõngda tõnd tɩ d welgd mo-yõsã, n kõt taab sugri, tɩ laafɩ zĩnd tõnd ne taab sʋka. Mo-yõs tõe n wa zĩnda d sʋka, bala sasa ninga d tõe n tudg n gomame tɩ sãam ned sũuri, bɩ n maan bũmb tɩ nebã pa wʋm a võor sõma n dɩk a lebende. Nimbãan-zoeerã tõe n sõng-d lame tɩ d welg yell a woto buudu, tɩ laafɩ kell n zĩnd d sʋka. Nimbãan-zoɛt sugr kũun yaa nana. Nimbãan-zoeerã sõngda tõnd tɩ d tũ saglg ning a Poll sẽn kõ kiris-nebã. A yeela woto: “Bɩ y maan sũ-mar ne taaba la y kõ taab sugri, ned sã n tar yell ne a to.”—Kolos rãmba 3:13.

B zoeta nebã nimbãanega

Naoor wʋsgo, nimbãan-zoeerã kɩtdame tɩ ned namsg booge. Wala d sẽn zoe n yeelã, kɩtdame tɩ d tagsd neb nins sũy sẽn sãamã yell la d kʋmd sẽn namsdbã nimbãanega. Nimbãan-zoeer baoodame tɩ d kʋm sẽn be-b namsg pʋgẽ wã nimbãaneg la d maan bũmb n sõng-ba.

Kiris-nebã sã n kʋmd nebã nimbãanega, b rɩkda a Zezi togs-n-taare. A ra zɩ n kong sẽk sẽn na yɩl n sõng nebã ye. A sõng-b lame tɩ b paam rɩɩbo, la a sõng-b tɩ b bãng b sẽn segd n maan bũmb ning n tõog n ta Wẽnnaam yam. A Zezi sẽn yã neb sẽn dat sõngrã, a sõng-b lame.

A Zezi sẽn yã kʋʋngã b sẽn da bas n pa zãms-b b sẽn segd n tũ Wẽnnaam sõma to-to wã, a manesem yɩɩ wãna? Kibarã yeta woto: “La a Zezi sẽn yã kʋʋngã, b nimbãanega yõka [yẽnda], tɩ bõe, bãmb sũyã sãama wʋsgo la bãmb pãnga fãa sɛɛme. Bãmb yaa wa piis sẽn ka tar kɩɩm ye.” (Matɩe 9:36) Biibl mit a yembr wilgame tɩ ned nimbãaneg sã n yõk neda, kɩtdame t’a bãng a soabã namsg sẽn taẽ zĩig ninga. Verse kãnga pʋgẽ, b tũnuga ne gɛrk gom-biig sẽn tar pãnga.

Woto me, kiris-neb nins sẽn yaa nimbãan-zoɛtbã maanda modgr n sõngd neb nins sẽn dat sõngrã tɩ b paamd fut la rɩɩbo, la b le sõngd-b Wẽnnaamã tũub wɛɛngẽ. Tʋm-tʋmd a Pɩɛɛr gʋlsa woto: “M sẽn kot bũmb zãnga, yaa y fãa yɩ yam yɛnga, ne taab kʋmbo, ne taab nonglem, ne taab nimbãan-zoeere.” (1 Pɩɛɛr 3:8, Sebr Sõngo) Wala makre, kiris-ned sẽn yaa talg yika ne a zak rãmb n na n toeem zĩiga, laafɩ kaalem yĩnga. Saam-biis nins sẽn be zĩig ning b sẽn kẽngẽ wã kõ-b-la zak tɩ b zĩnd kiis a yoob zaalem n ka yao ye. Sɩdã yeela woto: “Daar fãa b ra wat n bãngda d keelem. La b goamã sẽn kengd raoodã ra kɩtame tɩ yaa wa d pa sãamb ye.”

Sãambã me yell gesg paka kiris-neb hakɩkã. B rɩkda b sẽkã, b pãngã la b tarmã n sõngd neb b sẽn pa mi ne sũ-noogo. Sõsg ning sẽn loogã pʋgẽ, d goma neb sẽn sõng sãamb yelle. Nin-kãensã yaa a Zeova Kaset rãmba.

Kiris-nebã tiging pida ne nimbãan-zoeer la maan-neere. Nonglmã yĩngã, kɩtame tɩ b fãa baood n na n sõng b taabã. Kɩɩbsã la pʋg-kõap nins sẽn be tigingã pʋgẽ wã tõe n datame tɩ y kʋm b nimbãaneg la y ges b yelle, bala b tara zu-loees toɛy-toɛyã. Y tõe n sõnga nin-kãensã tɩ b mao ne talemdã, bãasã, la y sõng-b tɩ b paam ro-gãase, wall y sõng-b zu-loees a taab pʋsẽ.

Gɛrɛse, rao a ye ne a pag paama sõngr woto buudu. Raoã ra bẽeda ki-bogre, t’a pagã yãag-a tɩ b kẽng logtor yir sẽn be zĩ-zãrg wʋsgo. B ra tara orãnz pʋʋgo, tɩ yaa rẽ bal la b ra wobd n koosd n paamd b noorã rɩɩbo. La sẽn mik tɩ b bee logtor yirã, ãnd n na n wob orãnzã n koos n kõ-ba? Tigingã neb yikame n tɩ wob zãng n koos wa kõ-ba, tɩ b sũurã yɩ noog wʋsgo.

 D tõe n kʋma nebã nim-bãaneg ne manesem toɛy-toɛya. Wala makre, kiris-neb nins sẽn yaa nimbãan-zoɛtbã bãngame tɩ sasa ninga, sẽn be-b namsg pʋgẽ wã kẽer sẽn dat bũmb ning n yɩɩd yaa tɩ nebã kaagd-b la b kelgd-b zu-loeesã neere, n kʋmd b nimbãaneg la b tikd Biiblã n belsd-ba.—Rom dãmba 12:15.

Wa-y n naag-y nimbãan-zoɛtbã

Kiris-nebã tiging sẽn be dũniyã gill zugã yaa laafɩ la belsg zĩiga, la zĩig b sẽn kʋmd nebã nimbãaneg la b maand-b neere. Kiris-neb hakɩkã bãngame tɩ b sã n yaa nimbãan-zoɛtba, na n kɩtame tɩ nebã pẽnegd-ba. La b sã n yaa nin-toose, nebã na n zãaga b mens ne-ba. Woto yĩnga, b sẽn maood n dat n dɩk b saasẽ Ba wã togs-n-taarã, b modgdame n na n yɩ nimbãan-zoɛtb ne manesem toɛy-toɛya.

A Zeova Kaset rãmbã boond-y lame tɩ y wa naag-ba, n bãng nimbãan-zoeer la nonglem ning sẽn be b sʋkã. B kɩsa sɩd tɩ y na n yãame tɩ yaa sũ-noog zĩiga.—Rom dãmba 15:7.

[Foto, seb-neng a 5]

A Poll sagla Kolos kiris-nebã tɩ b modg n yɩ nimbãan-zoɛtba

[Foto rãmba, seb-neng a 7]

A Zezi sẽn yã neb sẽn dat sõngrã, a sõng-b lame