Zemsame tɩ b tall yãmb n ta vɩɩm ko-bunds zĩisẽ
Zemsame tɩ b tall yãmb n ta vɩɩm ko-bunds zĩisẽ
“Pe-bila . . . na n dɩlga bãmba, la b na n talla bãmb n ta vɩɩm ko-bunds zĩisẽ.”—WIL. 7:17.
1. Wẽnnaam Gomdã pʋgẽ, b boonda kiris-neb nins sẽn zae ne vʋʋsem sõngã tɩ bõe, la tʋʋm bʋg la a Zezi bobl-ba?
WẼNNAAM GOMDÃ pʋgẽ, b boonda kiris-neb nins b sẽn zae ne vʋʋsem sõngã n kɩt tɩ b get Kiristã tẽng zug paoongã yellã tɩ “tʋm-tʋmd sẽn tũud sɩd la sẽn tar yam.” Yʋʋmd 1918 soabã pʋgẽ, Kiristã sẽn wa n na n ges a tʋm-tʋmdã, a mikame t’a geta a tẽedbã yell sõma, n moenegd-b wa sẽn zemse. Rẽ n kɩt t’a Zezi sẽn yaa b Zusoabã rɩk a paoongã fãa n gũnug-a. (Karm-y Matɩe 24:45-47.) Woto wilgdame tɩ nand tɩ nin-kãensã tɩ reeg b keoorã saasẽ, b sõngda a Zeova nin-buiidã tẽng zugu.
2. Wilg-y-yã a Zezi paoongã sẽn yaa bũmb ninsi.
2 Zusoab maanda a yam ne a paoongo. A Zezi Kirist sẽn yaa Rĩm ning a Zeova sẽn yãkã me tara paoongo. A paoongã yaa a nebã la bũmb nins fãa b sẽn sigl tẽng zug ka Rĩungã yĩngã. Kiristã sẽn so neb ninsã sʋka, kʋʋn-kãseng ning tʋm-tʋmd a Zã sẽn yã wã me naagame. A Zã bilga kʋʋngã sẽn yaa to-to wã n yeel woto: “Mam gesame, la haya, kʋʋng n be be tɩ ned ka tõe n sõd n sɛ ye, sẽn yi soolem fãa, la buud fãa, la neb sẽn gomd goam toɛ-toɛya fãa. Bãmb yalsa geerã ne Pe-bilã taoore, la bãmb yera fu-peelse, n tar koms vãad b nusẽ.”—Wil. 7:9.
3, 4. Zu-no-bʋg la kʋʋn-kãsengã neb tara?
3 Kʋʋn-kãseng ning a Zã sẽn yã wã neb bee a Zezi sẽn bool-b rãmb t’a “piis a taabã” sʋka. (Zã 10:16) Nin-kãens gũud n na n wa vɩɩmda wakat sẽn kõn sa arzãna pʋgẽ tẽngã zugu. B kɩsa sɩd t’a Zezi na n ‘tall-b lame n ta vɩɩm ko-bunds zĩisẽ,’ la tɩ Wẽnnaam na n ‘yẽesa b nintãmã fãa.’ Rẽ n so tɩ b ‘pek b futã tɩ lebg peels ne Pe-bila zɩɩm.’ (Wil. 7:14, 17) Woto rat n yeelame tɩ b kɩsa sɩd t’a Zezi kii tõnd yel-wẽnã yĩnga, tɩ kɩt tɩ b yaa wa neb sẽn yer ‘fu-peels’ Wẽnnaam nifẽ, sẽn dat n yeel tɩ Wẽnnaam geel-b-la wa nin-tɩrs wa a Abrahaam.
4 Sẽn paase, Wẽnnaam sẽn geelgd kʋʋn-kãsengã neb sẽn tar paasgã wa nin-tɩrsã yĩnga, b tõe n wa paam n põsa to-kãsengã pʋgẽ, dũniyã sãoongã sasa. (Zak 2:23-26) B fãa gill tõe n pẽnega a Zeova, la b kɩs sɩd tɩ Armagedõ, b kʋʋng kãseng n na n põse. (Zak 4:8; Wil. 7:15) Kʋʋn-kãsengã neb pa baood n na n maan b mens raab ye. B sakda saasẽ Dĩmã ne a ba-biis nins sẽn zae ne vʋʋsem sõngã n ket tẽng zugã.
5. Wãn-wãn la kʋʋn-kãsengã neb sõngd kiris-neb nins sẽn zae ne vʋʋsem sõngã?
5 A Sʋɩtãan dũniyã neb namsda kiris-neb nins sẽn zae ne vʋʋsem sõngã hal wʋsgo, la b na n kell n nams-b lame. Baasg zãnga, sẽn paam-b zaeebã miime tɩ kʋʋn-kãsengã neb sẽn yaa b tʋmd-n-taasã na n kell n teel-b lame. Sẽn zae-b ne vʋʋsem sõngã sõor pa ye waoog ye. La yʋʋmd fãa kʋʋn-kãsengã neb sõor tara fɩɩgr n paasdẽ. Rẽ kɩtame tɩ sẽn zae-bã pa tõe n ges tigimsã sõor sẽn kolg bãmb 100000 n be dũniyã zugã fãa wã yell ye. Woto yĩnga, rẽndame tɩ piis a taabã neb sõng-ba. B yãka rap bãmb sʋkã sẽn kõt mak-sõng tigimsã pʋsẽ tɩ b yaa yel-gɛtba. Rũndã-rũndã, yaa bãmb n sõngd n get kiris-neb milyõ rãmbã b sẽn bobl “tʋm-tʋmd sẽn tũud sɩd la sẽn tar yamã” yelle.
6. Wãn-wãna la b ra pĩnd n togs tɩ piis a taabã na n sõnga sẽn zae-bã?
6 No-rɛɛs a Ezai ra pĩnd n togsame tɩ piis a taabã na n sõnga kiris-neb nins sẽn zaeyã ne yamleoogo. A yeela woto: “A Zeova yeelame: ‘Ezipt tʋm-tʋmdb nins sẽn pa rɩkd yaoodã, ne Etiopi toandbã la Seba tẽnga nebã sẽn yaa nin-wobda na n waa yãmb nengẽ n lebg yãmb dẽnda. Nin-kãens na n wa tũu yãmba.’” (Ezai 45:14, NW ) Sɩd me, rũndã-rũndã, kiris-neb nins sẽn na n wa vɩɩmd tẽngã zugã tũuda sẽn zae-bã ne Siglgã taoor-lʋɩtba Sulli, rat n yet tɩ b sakda b zu-sobendã. Yaa sẽn zae-bã la Kiristã tʋm tɩ b moon koɛɛgã dũniyã gill zugu. Wala “tʋm-tʋmdb sẽn pa rɩkd yaoodo,” piis a taabã sakda ne b sũy fãa n dɩkd b keelmã la b paoongã n sõngd-b n moond koɛɛgã.—Tʋʋ. 1:8; Wil. 12:17.
7. B segenda kʋʋn-kãsengã neb bõe yĩnga?
7 Kʋʋn-kãsengã neb sõngda b saam-biis nins sẽn paam vʋʋsem sõngã zaeebã, tɩ bãmb me segend-b sẽn na yɩl tɩ Armagedõ poor bɩ b yɩ dũni-paalg ning sẽn na n zĩndã pipi rãmba. B segd n zãmsa nin-kãensã sõma tɩ b ned kam fãa sak Rĩmã ne yamleoogo. Rũndã-rũndã b basda b ned kam fãa t’a wilgd a sã n na n sak n tʋma tʋʋm nins Rĩm a Zezi Kirist sẽn na n bobl-a wã. B fãa sẽn zoe n wilgdẽ tɩ b tara tẽeb la b yaa sakdbã, wilgdame tɩ b ned kam fãa na n saka Rĩmã noy ne yamleoog dũni-paalgã pʋgẽ.
Kʋʋn-kãsengã neb wilgdame tɩ b sɩd tara tẽebo
8, 9. Wãn-wãn la kʋʋn-kãsengã neb wilgd tɩ b sɩd tara tẽebo?
8 Piis a taabã sẽn yaa sẽn zae-b ne vʋʋsem sõngã tũud-n-taasã wilgdame tɩ b sɩd tara tẽebo. Pipi, b sõngda sẽn zae-bã n moond Wẽnnaam Rĩungã koe-noogo. (Mat. 24:14; 28:19, 20) Yiib-n-soaba, b sakda Siglgã taoor lʋɩtb Sull ne yamleoogo.—Heb. 13:17; karm-y Zakari 8:23.
9 Bũmb a tãab-n-soab kʋʋn-kãsengã neb sẽn maand n teend b saam-biis nins sẽn zaeyã, yaa b sẽn tũud a Zeova noyã. B maoodame n baood zʋg-sõma, wala ‘nonglem, sũ-noogo, laafɩ la sũ-mare, maan neere, sũ-maasem, tẽebo, sũ-bʋgsem la yõk-m-menga.’ (Gal. 5:22, 23) Rũndã-rũndã, pa nebã fãa n modgd n baood zʋg-sõma kãensã n basd yĩngã ratem tʋʋmã ye. La baasgo, kʋʋn-kãsengã neb modgda ne b sũy fãa n lakd b mens ne ‘yoobo, nin-yoolem la raglem, bõn-naands pʋʋsgo, bagre, beem la mo-beedo, sũ-kiir la kisgri, no-koɛɛma, welgr la tẽeb toɛ-toɛya, zoe-bõne, dã-tɩgr la yão-beedo, la yɛl a taab sẽn wõnd woto.’—Gal. 5:19-21.
10. Bõe la kʋʋn-kãsengã neb modgd b pãng tɛk n maandẽ?
10 D sẽn yaa koangdbã yĩnga, tõe n yɩɩ toog ne-d tɩ d tall zʋg-sõma nins vʋʋsem sõngã sẽn kõtã fãa, n lak d mens ne yĩngã ratem tʋʋma, la d ra bas t’a Sʋɩtãan dũniyã wẽnemd d yamã tɩ d tũ-a ye. La ne rẽ fãa, tõnd ket n modgda d pãng tɛka, n pa rat tɩ baa fʋɩ boog d tẽebã la nonglem ning d sẽn tar ne a Zeova wã ye. Wala makre, d pa basd tɩ d pãn-komsmã la d sẽn mi n pa tõogd n maand wa a Zezi kɛpɩ wã, wall laafɩ kaalem bɩ kʋʋlem koms d raood ye. D kɩsa sɩd t’a Zeova sẽn pʋlem t’a na n kogla kʋʋn-kãsengã neb tɩ b põs to-kãsengã sasa wã, a na n sɩd kogl-b lame.
11. Wãn-wãn la a Sʋɩtãan maand n dat n koms kiris-nebã tẽebo?
11 La d gũusda d mens wakat fãa, bala d miime tɩ yaa a Sʋɩtãan la tõnd bɛ wã meng-menga, la d miime me t’a pa basd ned laafɩ nana ye. (Karm-y 1 Pɩɛɛr 5:8.) A tũnugda ne sɩdã kɩɩsdb la neb a taab n dat n kɩt tɩ d tẽ tɩ b sẽn zãmsd tõnd bũmb nins Biiblã zugã pa sɩd ye. La a sɩlem kãngã pa wae n tõogdẽ ye. A sẽn kɩtd tɩ nebã namsd tõnd d tẽebã yĩngã sã n mi n boog d koe-moonegã me, naoor wʋsgo, b sẽn namsd-b rãmbã tẽeb kengdame. Woto kɩtame t’a nong n bẽt-d ne raood-komsgã, bala a tagsdame tɩ rẽ n tõe n koms d tẽebã n yɩɩda. Pipi kiris-nebã wakate, b keoog-b lame tɩ b gũus t’a Sʋɩtãan da bẽd-b ne yel-kãngã ye. B yeel-b-la woto: “Bɩ y tags namsg ninga [Kirist] sẽn sakã yelle, yel-wẽna rãmb sẽn yɩ wãn n kɩɩs bãmbã.” Bõe yĩnga? Verse wã paasa woto: “Tɩ yãmb da yɛ la tɩ yãmb sũyã da sãam ye.”—Heb. 12:3.
12. Wãn to la Biiblã sagls tõe n sõng sẽn mi n komsd-b raoodã?
12 Yãmb zoe n tagsame tɩ y sẽn basd a Zeova tũub n são bɩ? Y mi n wa tagsdame tɩ y zɩ n tõog n maan wa a Zeova sẽn datã bɩ? Sã n yaa woto bɩ y ra bas a Sʋɩtãan weer t’a tũnug ne tags-kãensã n kɩt tɩ y bas a Zeova ye. Y sã n baood n bãngd Biiblã sõma n paasdẽ, y sã n pʋʋsdẽ la y kẽnd tigissã, la y nong y tẽed-n-taasã tũud-n-taare, na n kenga y tẽebã n kɩt tɩ y kell n tũ a Zeova. D tõe n kɩsa sɩd t’a Zeova sẽn pʋlem t’a na n sõnga neb nins sẽn maand a raabã, a sɩd na n sõng-b lame. (Karm-y Ezai 40:30, 31.) Kell-y n wɩng-y ne Rĩungã tʋʋmde. Wall tɩ y sãamd y sẽkã ne reem la pemsem kokrã, modgd-y ne nebã sõngre. Y sã n maand woto fãa, na n sõng-y lame tɩ baa ne y sũy sẽn mi n sãamdẽ wã bɩ y ra bas a Zeova ye.—Gal. 6:1, 2.
B yii to-kãsengã pʋgẽ n kẽ dũni-paalg pʋgẽ
13. Tʋʋm bʋg n gũud sẽn na n põs-b Armagedõ sasa wã?
13 Armagedõ loogr poore, na n yɩɩ tɩlae tɩ b sõng nin-tɩrsã sõor ka tɛkã sẽn na n vʋʋgã tɩ b bãng a Zeova noyã. (Tʋʋ. 24:15) B segd n sõng-b lame tɩ b bãng t’a Zezi kii nebã yel-wẽn yĩnga, la sẽn yɩɩd fãa, tɩ b bãng b sẽn segd n maan bũmb ning n wilg tɩ b tẽeda rẽ, tɩ kɩt tɩ b wa tõog n dɩ rẽ nafa. Nin-kãens segd n basa b pĩnd ziri tũudmã tags-kɛgã fãa la b toeem b zʋgã. B tog n baoa zʋg-sõma nins sẽn kɩtd tɩ b bãng kiris-neb hakɩkã n bakã. (Ef. 4:22-24; Kol. 3:9, 10) Vẽenega, sẽn na n põs-b Armagedõ sasa wã na n tʋma tʋʋm wʋsgo. La b na n tʋma tʋʋm kãens tɩ dũni-wẽngã zu-loeesã la a weoogrã fãa kaẽ ye. Ad woto sɩd na n kõ-b-la sũ-noog tɛkẽ!
14, 15. Neb nins b sẽn na n vʋʋgã la sẽn na n põs-b to-kãsengã sasa wã na n sõsa bõe zugu?
14 Sẽn da sak-b a Zeova ne b sũy fãa n maan kaalem nand t’a Zezi sɩng a koe-moonegã tẽng zugã me na n bãnga yɛl wʋsg sasa kãnga. B na n bãnga Mesi ning b sẽn gũ n pa paam n yã wã sẽn yɩ ned ninga. Nand tɩ b maan kaalem, nin-kãens ra wilgame tɩ b tʋllame t’a Zeova wilgd-b sẽn segde. Tags-y n ges-y sũ-noog ning y sẽn na n paame, y sẽn na n tõog n sõng nin-kãensã. Wala makre, y na n sõnga a Daniɛll t’a wʋm bãngr-goam nins a sẽn gʋls n pa wʋm b võorã võore.—Dan. 12:8, 9.
15 Yaa sɩd tɩ d na n wilga sẽn na n vʋʋg-bã yɛl wʋsg b sẽn pa bãnge, la bãmb me tara b sẽn na n wilg tõndo. Wala makre, kibay kẽer sẽn be Biiblã pʋgẽ tara yel-bõoneg b sẽn pa wilgi, tɩ nin-kãensã tõe n wilg tõnd rẽ bal-balle. Tags-y n ges-y-yã a Zãmbatiis sẽn kĩ ne a Zezi wã sẽn na n wilg tõnd bũmb nins fãa a Zezi zugã! Yaa vẽeneg tɩ bũmb nins nin-kãensã sẽn na n wilg-dã na n kɩtame tɩ d wʋm Wẽnnaam Gomdã võor n yɩɩg d sẽn wʋmd-a masã wã. Neb nins sẽn da maan a Zeova raabã ne b sũy fãa n maan kaalmã, la kʋʋn-kãseng ning b sẽn tigimd rũndã-rũndã wã neb nins sẽn maand kaalmã na n paama “vʋʋgr sẽn yaa neer n yɩɩda.” Nin-kãens ra sɩng n maanda a Zeova raabã hal baa a Sʋɩtãan dũniyã pʋgẽ. Woto yĩnga, b sũy na n yɩɩ noog wʋsgo, b sẽn na n paam n kell n maan a Zeova raabã dũni-paalg pʋgẽ, t’a Sʋɩtãan ne a poorẽ dãmbã ka le beẽ wã.—Heb. 11:35; 1 Zã 5:19.
16. Sẽn zems ne bãngr-gomdã sẽn togsã, bõe n na n maan a Zeova bʋ-kaoorã daare?
16 Bʋ-kaoorã daar sasa, b na n wa laka sɛba. Yaa noy nins sẽn be seb-kãens ne Biiblã pʋgẽ wã la b na n tik n kao nebã fãa bʋʋdo, n yãk sẽn segd n paam-b vɩɩm sẽn pa satã. (Karm-y Wilgr 20:12, 13.) Bʋ-kaoorã daar baasgẽ, na n mikame tɩ ned kam fãa paama weer n wilg a sã n datame bɩ a pa rat t’a Zeova yɩ yĩngr la tẽng naaba. Rẽ yĩnga sasa kãnga, d ned kam fãa na n wilgame t’a teenda a Zeova Rĩungã n bas tɩ Pe-bilã tall-d n kẽng “vɩɩm ko-bunds zĩisẽ” bɩ, bɩ d na n tõdgame tɩ wilg tɩ d pa sak Wẽnnaam Rĩungã? (Wil. 7:17; Ezai 65:20) Wakat kãnga, na n mikame tɩ ãdem-biisã fãa sẽn be tẽng zugã ra reng n paama b mens ne yel-wẽndã biisi, tɩ bũmb baa a ye pa tiisd-ba, tɩ b tõog n yãk b sẽn na n maanegã. Ned baa a yembr pa na n tõog n wɩd a Zeova bʋʋdã sẽn na n baas to-to wã ye. Yaa nin-wẽnsã bal la a na n sãam wakat fãa yĩnga.—Wil. 20:14, 15.
17, 18. Bõe yĩng tɩ sẽn zae-bã la piis a taabã gũud bʋ-kaoorã daar ne sũ-noogo?
17 Rũndã-rũndã, kiris-neb nins sẽn zaeyã sẽn paam tɩ b geelg tɩ zemsame tɩ b kõ-b Rĩungã yĩnga, b gũuda ne yãgb n na n dɩ naam bʋ-kaoorã daar sasa. Waoogr tek woto! Keoor ning b sẽn gũudã kɩtame tɩ b maood n tũud saglg ning a Pɩɛɛr sẽn da kõ pipi kiris-nebã. A yeel-b-la woto: “Bɩ y maan yãmb sẽn tõe tɛka, n da kong yãmb boolgã ne y tũusgã ye, tɩ bõe, yãmb sã n maan woto yãmb kõn lak abada ye. Yaa woto la yãmb na n paam kõom kãseng tõnd Zusoaba la d Fãagd a Zezi Kirist [Rĩungã] sẽn ka sɛta pʋgẽ.”—2 Pɩɛ. 1:10, 11.
18 Piis a taabã me sũy nooma wʋsgo, b tẽed-n-taas nins sẽn zaeyã sẽn na n kẽng saasẽ wã yĩnga. B modgdame n teend-b ne b sũy fãa. Rũndã-rũndã, b sẽn yaa Wẽnnaam zo-rãmbã, b tʋmda a tʋʋmdã ne b sũy fãa. Bʋ-kaoorã daar sasa, a Zezi sã n wa tar-b n debd vɩɩm ko-bundsã zĩigẽ, b na n sakda segls nins fãa Wẽnnaam sẽn dɩkã ne sũ-noogo. Rẽ wẽnd la a Zeova na n yaool n ges tɩ zemsame tɩ b lebg a nin-buiid tẽngã zug wakat sẽn kõn sa yĩnga!—Rom 8:20, 21; Wil. 21:1-7.
Y tõe n leokame bɩ?
• A Zezi paoongã yaa bõe ne bõe?
• Wãn-wãn la kʋʋn-kãsengã neb teend b saam-biis nins sẽn zae ne vʋʋsem sõngã?
• Kʋʋn-kãsengã neb tara tʋʋm bʋg sẽn pa wõnd a taaba, la saag-bʋg me la b tara?
• Yãmb tagsg yaa bõe ne bʋ-kaoorã daare?
[Zãmsgã sogsgã]
[Foto, seb-neng 29]
Kʋʋn-kãsengã neb peka b fut ne Pe-bilã zɩɩm tɩ lebg peelse
[Foto, seb-neng 31]
Wẽn-sakdbã vʋʋgr poore, bõe la y na n dat tɩ b wilg-yã?