A Zezi Kirist yaa misioneer sẽn ka to
A Zezi Kirist yaa misioneer sẽn ka to
“Mam yii bãmb nengẽ, la bãmb n tʋm maam.”—ZÃ 7:29.
1, 2. Misioneer rat n yeelame tɩ bõe, la ãnd la b tõe n bool tɩ misioneer kãseng sẽn pa tar to?
YÃMB sã n wʋm tɩ b gomd misioneer yelle, bõe n wat yãmb yamẽ? Kẽer na n tagsa kiris-neb ne yʋʋrã misioneer dãmb yelle. Bãmb wʋsg kẽesa b mens politikã la ligdã baoob pʋgẽ, tẽns nins b sẽn tʋm-bã pʋsẽ. La tõnd sẽn yaa a Zeova Kaset rãmbã, b sã n gomd misioneer yelle, tõnd tagsda misioneer nins Siglgã taoor lʋɩtb Sull sẽn tʋmd tẽns toɛy-toɛy pʋsẽ tɩ b tɩ moond koe-noogã yelle. (Mat. 24:14) Misioneer kãensã rɩkda b sẽkã la b pãngã fãa n sõngd nebã tɩ b pẽnegd Wẽnnaam a Zeova n paamd zems-n-taar ne-a.—Zak 4:8.
2 Gɛrk gom-biig ning b sẽn lebg tɩ “koe-moond” Efɛɛz rãmb 4:11 pʋgẽ wã me tõe n lebgame tɩ “misioneere.” A Zeova yaa koe-moond sẽn yaa kãseng n pa tar to, la b pa tõe n bool-a tɩ misioneer ye. Bala misioneer dat n yeelame tɩ ned b sẽn tʋme, la ned baa a ye pa tõe n tʋm a Zeova ye. A Zezi yeela a Ba wã wɛɛngẽ woto: “Mam yii bãmb nengẽ, la bãmb n tʋm maam.” (Zã 7:29) A Zeova wilgame t’a nonga ninsaalbã hal wʋsgo, n tʋm a Bi-ribl sẽn-ka-to wã t’a wa tẽngã zugu. (Zã 3:16) B tõe n boola a Zezi Kirist tɩ misioneer kãseng sẽn pa tar to, bala bũmb ning me sẽn kɩt t’a wa tẽngã zugã yaa sẽn na n “kɩs sɩdã kaseto.” (Zã 18:37) A moona Wẽnnaam Rĩungã koe-noog tɩ wom biis hal sõma, la hal ne rũndã-rũndã menga, tõnd dɩta a koe-moonegã nafa. Bala d yaa misioneer tɩ d pa misioneer me, d fãa tõe n zãmsa nebã koe-moonegã sasa wa a Zezi me sẽn da zãmsd nebã to-to wã.
3. Sogs-bʋs leoor la d na n paam sõs-kãngã pʋgẽ?
3 A Zezi sẽn yaa Rĩungã koe-moondã yĩng kɩtame tɩ d tõe n sok d mens woto: A vɩɩmã yɩɩ wãn to tẽngã zugu? Bõe n da kɩt t’a ra mi nebã zãmsg sõma? La bõe yĩng t’a zãmsgã ra womd biisi?
A Zezi sak n vɩɩmda toog pʋgẽ
4-6. A Zezi sẽn wa tẽng zugã, a vɩɩmã toeema wãn to?
4 Rũndã-rũndã wã, misioneer dãmbã la kiris-neb nins sẽn yikd ne yamleoog n kẽngd zĩis nins koe-moondb sẽn pa waoogẽ wã nong n sakd n tɩ vɩɩ zĩis vɩɩmã noom sẽn pa ta b sẽn da beẽ wã. Bɩ d tags bilf n ges a Zezi nengẽ wã sẽn yɩ to-to: A vɩɩmã sẽn yɩ to-to saasẽ wã pa tol n tõe n dɩk n mak ne a vɩɩmã sẽn yɩ to-to tẽngã zugã ye. Saasẽ wã, a ra vɩɩ ne a Ba a Zeova la malɛgs nins sẽn sõgend a Zeova ne b sũy fãa wã. (Zoob 38:7) La tẽngã zugu, a ra vɩɩ yel-wẽn-maandb sʋka, la dũni sẽn yaa wẽng pʋgẽ. (Mark 7:20-23) A sak n vɩɩmda ne a karen-biisã sẽn da maand sũ-kiir ne taabã menga. (Luk 20:46; 22:24) La a sẽn da be yell ning fãa taoore, a manesmã yɩɩ sõma zãnga.
5 A Zezi sẽn wa n yaa yãagã, a pa tiig n bãng goam woto bal ye. Yẽ me zãmsa goam wa kamb a taabã. Saasẽ wã, yẽ n yaool n da wilgd malɛgsã b sẽn segd n maan bũmb ninga. A Zezi sẽn da wa n be tẽngã zugã, a ra gomda ninsaalbã buud goama. Ra yaa toor fasɩ ne ‘malɛk rãmbã goamã.’ (1 Kor. 13:1) La baa ne rẽ fãa, ned baa a ye ra pa tõe n gom gom-nood n ta a Zezi ye.—Luk 4:22.
6 Zĩis a taab wɛɛngẽ me la a Zezi vɩɩmã toeem-yã, a sẽn wa n be tẽngã zugã. Baa a Ãdem yel-wẽndã sã n pa long-a me, a yɩɩ ninsaal wa neb nins sẽn da na n wa paam vʋʋsem sõngã zaeeb n lebg a “ba-biisã.” (Karm-y Hebre dãmb 2:17, 18.) A kũumã daar yʋngo, a Zezi ra tõẽ lame n kos a Ba wã t’a tʋm “malɛk rãmb tus pis-yopoe la a yiib” tɩ b sõng-a, la a pa maan dẽ ye. La d yaool n miime tɩ yẽ la malɛgsã fãa naab a Misɛlle! (Mat. 26:53; Ziid 9) Yaa sɩd t’a Zezi maana yel-soalma. La a sẽn maan bũmb nins tẽngã zugã pa tõe n dɩk n mak ne bũmb nins a sẽn da na n tõog n maane, a sã n da ket saasẽ ye.
7. Zʋɩf rãmbã manesem yɩɩ wãn to ne Tõogã?
7 A Zezi sẽn wa n be saasẽ tɩ b boond-a tɩ “Gomdã,” tõe tɩ yaa yẽ n yɩ Wẽnnaam koe-taasd ning sẽn yãag Israɛll nebã weoogã pʋgẽ wã. (Zã 1:1; Yik. 23:20-23) La ‘malɛk rãmb togsa bãmb tõogã la b ka reeg ye.’ (Tʋʋ. 7:53; Heb. 2:2, 3) Sɩd me, pipi kiris-nebã wakate, Zʋɩf rãmbã taoor dãmb ra pa mi Tõogã võor sõma ye. Wala makre, b ra pa mi noor ning sẽn be Tõogã pʋgẽ n gomd Vʋʋsg daarã yellã võor sõma ye. (Karm-y Mark 3:4-6.) Gʋlsdbã la Fariziẽ rãmbã ra “basda bũmb nins sẽn yaa neer n yɩɩd tõogã pʋgẽ sẽn yaa tɩrlem la nimbãan-zoeer la sɩdã.” (Mat. 23:23) La baa ne rẽ fãa, a Zezi pa tags tɩ b pa tõe n toeem ye. A kell n togs-b-la sɩdã n pa bas ye.
8. Bõe n kɩt t’a Zezi tõe n sõng tõndo?
8 A Zezi ra nonga nebã sõngre. A sẽn da nong nebã yĩng kɩtame t’a ra tʋll ne a sũur fãa n sõng-ba. A yam zɩ n yi ne koe-noogã mooneg ye. A sẽn kell n sak a Zeova tẽngã zugã yĩnga, a lebga “fãagr sẽn ka sɛtã soaba, neb nins fãa sẽn sakd bãmbã yĩnga.” Sẽn paase, yẽ “menga sẽn paam makr n namsã, [a] tõe n sõnga neb [wa tõnd taabã] sẽn tar makrã.”—Heb. 2:18; 5:8, 9.
A paama zãmsg sõma
9, 10. Nand t’a Zezi wa tẽngã zugu, zãms-bʋg buud la a paam-yã?
9 Rũndã-rũndã, Siglgã taoor lʋɩtb Sull rengd n zãmsa misioneer dãmbã n yaool n tʋm-ba. Rẽ yĩnga a Zezi Kirist me paama zãmsg bɩ? N-ye. La a pa kẽng rabẽ rãmbã lekoll dãmbẽ n tɩ karem tɩ Wẽnnaam yaool n yãk-a t’a lebg Mesi ye. Leb n pa tũudmã taoor dãmb nengẽ la a paam zãmsgã ye. (Zã 7:15; Ges-y Tʋʋm 22:3.) La a Zezi maana wãn n wa mi nebã zãmsg hal sõma?
10 Yaa sɩd t’a Zezi ma a Maari la a ba wubdg a Zozɛf zãms-a-la yɛl wʋsgo, la sẽn tɩ yɩɩd fãa, yaa a Zeova meng a toor n zãms-a t’a na n tõog n moon koe-noogã. A Zezi mengã yeela woto: “Mam ka gom ne m meng pãng ye. La m Ba sẽn tʋm maamã, b kõo maam noor ne bũmb nins mam sẽn na n togsã, la mam sẽn na n gomã.” (Zã 12:49) Dẽnd Wẽnnaam ra wilga a Zezi a sẽn segd n zãms nebã bũmb ning takɩ. Yaa vẽeneg tɩ nand t’a Zezi wa tẽngã zugu, a rɩka sẽk wʋsg n kelg a Ba wã sẽn da togsd-a bũmb nins a sẽn segd n wa maanã. A ra pa tõe n paam zãmsg sẽn yaa sõma woto zĩig a to ye.
11. Wãn to la a Zezi wilg t’a rɩka a Ba wã togs-n-taare?
11 Hal a Zezi Ba wã sẽn naan-a tɛka, yẽ ne a Ba wã nonga taaba. A sẽn wa n ket saasẽ wã, a gesa a Zeova sẽn tar manesem ning ne ninsaalbã, n bãng t’a nong-b lame. A Zezi me nonga ninsaalbã wa Wẽnnaam sẽn nong-b to-to wã, tɩ kɩt t’a yeel woto: “Ninsaalbã kõo maam sũ-noogo.”—Yel. 8:22, 31.
12, 13. a) A Zezi sẽn ges a Ba wã sẽn tall manesem ning ne Israɛll nebã, a zãmsa bõe? b) Wãn to la a Zezi tũ bũmb nins a sẽn zãmsã?
12 Zu-loeesã welgr wɛɛngẽ me, a Zezi gesa a Ba wã sẽn maand to-to wã. Wala makre, d ges a Zeova sẽn tall manesem ning ne Israɛll nebã sẽn da yaa tõtbã. Nehemi 9:28 yeta woto: “La bãmb sẽn paam n vʋʋsã, bãmb le yikame n beeg yãmb [a Zeova]. Woto, yãmb me basa bãmb b bɛɛbã nusẽ tɩ b maan-b pʋ-toogo. La bãmb le kelmame n bool yãmba. La yãmb le zĩnda yĩngr n wʋm b kelemsã, la yãmb sẽn yaa nimbãan-zoeer soabã yĩnga, y fãaga bãmb naoor wʋsgo.” A Zezi sẽn naag a Zeova n tʋm la a ges a sẽn maand to-to wã, yẽ me sẽn wa tẽngã zugã a zoee nebã nimbãanega.—Zã 5:19.
13 A Zezi tũu a sẽn zãms bũmb ning a Ba wã nengẽ wã, n kell n tall nonglem la nimbãan-zoeer ne a karen-biisã. A kũumã daar yʋngo, a tʋm-tʋmdbã fãa a sẽn da nong wʋsgã zoe n bas-a lame. (Mat. 26:56; Zã 13:1) Tʋm-tʋmd a Pɩɛɛr meng kɩɩsa naoor a tãab tõr t’a pa mi a Zezi ye. La baa ne rẽ fãa, a Zezi pa bas-b ye. A maaname tɩ b bãng tɩ b tõe n kell n yɩɩ a tʋm-tʋmdba. A yeela a Pɩɛɛr woto: “Mam pʋʋsa fo yĩng tɩ f tẽebã ra tol n paoog ye. La fo . . . sã n wa lebge, bɩ f sõng f ba-biisã tɩ b paam pãnga.” (Luk 22:32) Israɛll sẽn yaa Wẽnnaam dẽndã sɩnga ne “tʋm-tʋmdbã” sẽn yɩ wẽn-sakdbã. Sẽn paase, Zerizalɛm paalgã yẽbgr kugã zutu, Pe-bil a Zezi Kirist tʋm-tʋmdb 12 wã sẽn yɩ sakdbã yʋy gʋlsa be. Rũndã-rũndã, ne Wẽnnaam pãngã la a Bi-riblã sor-wilgri, kiris-neb nins sẽn paam vʋʋsem sõngã zaeebã, n paas b tũud-n-taasã sẽn yaa ‘piis a taabã’ moonda Rĩungã koe-noog tɩ womd biis sõma.—Ef. 2:20; Zã 10:16; Wil. 21:14.
A Zezi sẽn da zãmsd nebã to-to
14, 15. Bõe n kɩt t’a Zezi sẽn da zãmsd nebã to-to wã yaa toor fasɩ ne gʋlsdbã la Fariziẽ rãmbã sẽn da zãmsd to-to wã?
14 A Zezi sẽn wa n zãmsd a karen-biisã, wãn to la a tũ yẽ meng sẽn da zãms bũmb ning a Ba wã nengẽ wã? Tõnd sã n na n mak a Zezi sẽn da zãmsd nebã to-to wã ne Zʋɩf rãmbã taoor dãmb sẽn zãmsd to-to wã, d yãta vẽeneg t’a Zezi sẽn da maand to-to wã n yaa sõma n yɩɩda. Gʋlsdbã la Fariziẽ rãmbã ra maaname tɩ bãmb meng tagsa wã reeg Wẽnnaam gomdã zĩiga. La a Zezi yẽ ra pa zãmsd nebã a meng tagsa ye. Yaa Wẽnnaam koɛɛgã la a ra taasd nebã wakat fãa. (Mat. 15:6; Zã 14:10) Tõnd me segd n maana woto.
15 Bũmb a to me n kɩt t’a Zezi ra yaa toor fasɩ ne tũudmã taoor dãmba. Ad a sẽn yeel nebã bũmb ning gʋlsdbã la Fariziẽ rãmbã wɛɛngẽ: “Bɩ y maan la y sak bũmb nins bãmb sẽn yeel yãmb tɩ y maanã, la y ra togs bãmb tʋʋmã ye. Tɩ bõe, bãmb yetame la b ka maand ye.” (Mat. 23:3) A Zezi ra tũuda a sẽn zãmsd nebã bũmb ningã. D ges makr a ye sẽn wilgd rẽ vẽenega.
16. Bõe yĩng tɩ d tõe n yeel t’a Zezi tũu bũmb ning a sẽn yeel tɩ be Matɩe 6:19-21 pʋgẽ wã?
16 A Zezi sagla a karen-biisã tɩ b bĩng b paoong saasẽ. (Karm-y Matɩe 6:19-21.) Rẽ yĩnga a Zezi mengã maana woto bɩ? N-ye. Rẽ n kɩt t’a tõog n yeel a mengã wɛɛngẽ tɩ: “Waas tara bogdo, la liuuli tara tʋgdo, la Ninsaal Biigã ka tar zĩig sẽn na n gãneg b zug ye.” (Luk 9:58) A Zezi pa bao bũmb wʋsg a vɩɩmã pʋgẽ ye. Yaa Rĩungã koe-noog mooneg n da pak-a n yɩɩda. A sẽn vɩɩmd to-to wã me kɩtame tɩ d bãng d sẽn tõe n maan to-to n gil yɩɩr ning arzɛkã bĩngr dũniyã zugã sẽn wat ne wã. A Zezi wilgame tɩ bũmb ning sẽn yaa sõma n yɩɩda, yaa ned bĩng a arzɛk saasẽ, “zĩig ninga mogd la tẽngempiisim sẽn ka sãamda, la wagda sẽn ka kẽed la sẽn ka wʋkda.” Rẽ yĩnga tõnd tũuda a Zezi saglgã n bĩngd d arzɛk saasẽ bɩ?
Bũmb ning sẽn kɩt tɩ nebã ra nong a Zezi wã
17. Bõe ne bõe n kɩt t’a Zezi ra yaa koe-moond sẽn pa wõnd neb a taabã?
17 Bõe ne bõe n kɩt t’a Zezi ra yaa koe-moond sẽn pa wõnd neb a taabã? Bũmb a yembr yaa manesem ning a sẽn da tar ne neb nins a sẽn da sõngdã. A Zezi me talla sik-m-menga, nonglem la nimbãan-zoeer wa a Zeova. Bɩ d ges rẽ fãa sẽn kɩt tɩ neb wʋsg ra nong a Zezi zĩigẽ to-to.
18. Bõe yĩng tɩ d tõe n yeel t’a Zezi yaa sik-m-meng soaba?
18 A Zezi sẽn sak n na n wa tẽngã zugã, ‘a basa a naamã n lebg wa yamba,’ n dɩk ninsaal yĩnga. (Fil. 2:7) Woto wilgdame t’a sɩd talla sik-m-menga. Sẽn paas me, a Zezi zɩ n paoog neb a taabã ye. A zɩ n tall manesem sẽn na n kɩt tɩ nebã tẽ tɩ yẽ sẽn yit saasẽ wã yĩnga, b segd n kelg-a lame ye. A Zezi ra pa saad n togsd zĩig fãa tɩ yẽ la Mesi wã meng-menga, wa neb nins sẽn yagd tɩ b yaa Mesi wã sẽn maandã ye. Wakat ning menga, a yeela neb kẽer tɩ b ra togs neb a taabã yẽ sẽn yaa ned ninga, bɩ a sẽn maan bũmb ninsã ye. (Mat. 12:15-21) A Zezi da ratame tɩ nebã sã n yãk yam n na n tũ-a, bɩ yɩ bãmb mensã sẽn yã yẽ sẽn maan bũmb ninsã yĩnga. A Zezi karen-biisã sũy ra segd n yaa noog hal wʋsgo, bala b ra miime tɩ b Zusoabã ra pa gũud tɩ b yɩ neb sẽn zems zãng wa malɛgs nins a sẽn da be ne saasẽ wã ye.
19, 20. Wãn to la nonglmã la nimbãan-zoeerã kɩt t’a Zezi sõng nebã?
19 A Zezi tara nonglem me, wa a saasẽ Ba wã meng sẽn yaa nonglmã. (1 Zã 4:8) A Zezi zãmsa nebã ne nonglem. Wala makre, d ges a sẽn da tagsd to-to ne bi-bɩɩg a ye sẽn yaa arzɛk soaba. (Karm-y Mark 10:17-22.) A Zezi ra “nong-a lame” n dat n sõng-a, la bi-bɩɩgã pa sak n bas a arzɛkã sẽn da yaa wʋsgã n lebg Kiristã karen-biig ye.
20 Bũmb ning me sẽn da kɩt tɩ nebã nong a Zezi wã, yaa a sẽn yaa nimbãan-zoɛtã. Neb nins sẽn da sakd n kelgd a goamã ra yaa neb sẽn tar zu-loees wʋsg wa ãdem-biis a taabã fãa. A Zezi sẽn da mi rẽ wã yĩnga, a zoee b nimbãaneg n zãms-ba. Wala makre daar a yembre, a Zezi ne a tʋm-tʋmdbã tʋma wʋsg hal n pa paam sẽk meng n na n dɩ ye. La a Zezi sẽn wa n yã tɩ neb wʋsg n tigim taab n gũud-a wã, a maana bõe? ‘B nimbãanegã yõka yẽnda, tɩ bõe, bãmb wẽnda wa piis sẽn ka tar pe-kɩɩm ye. La a sɩngame n zãms bãmb bũmb wʋsgo.’ (Mark 6:34) A Zezi sẽn yã nebã yɛlã sẽn da yaa to-to wã, b nimbãanegã yõk-a lame t’a maan a sẽn tõe fãa n zãms-b la a maan yel-soalem n sõng-ba. A sẽn da tar sik-m-meng la nonglem la nimbãan-zoeerã kɩtame tɩ neb kẽer reeg a goamã n lebg a karen-biisi.
21. Bõe yell la d na n gom sõsg ning sẽn pʋgdã pʋgẽ?
21 Wala sõsg ning sẽn pʋgdã sẽn na n wilgã, yɛl wʋsg n ket d sẽn tõe n bao n bãng a Zezi koe-moonegã zugu. Zĩ-bʋs wɛɛngẽ me la d tõe n dɩk a Zezi sẽn yaa misioneer sẽn ka to wã togs-n-taare?
Wãn to la y na n leoke?
• Nand t’a Zezi wa tẽngã zugu, zãms-bʋg buud la a paam-yã?
• Bõe n kɩt t’a Zezi sẽn da zãmsd nebã to-to wã yaa sõma n yɩɩd gʋlsdbã la Fariziẽ rãmbã sẽn da zãmsd to-to wã?
• Bõe ne bõe n kɩt tɩ nebã ra nong a Zezi?
[Zãmsgã sogsgã]
[Foto, seb-neng 18]
Wãn to la a Zezi ra zãmsd nebã?