D rɩk misioneer sẽn ka to wã togs-n-taare
D rɩk misioneer sẽn ka to wã togs-n-taare
“Bɩ yãmb yɩ mam togs-n-taas wa mam me sẽn yaa Kirist togs-n-taagã.”—1 KOR. 11:1.
1. Bõe yĩng tɩ d segd n dɩk a Zezi Kirist togs-n-taare?
TƲM-TƲMD a Poll rɩka a Zezi Kirist sẽn yaa misioneer sẽn ka to wã togs-n-taare. A yeela a tẽed-n-taasã yaa: “Bɩ yãmb yɩ mam togs-n-taas wa mam me sẽn yaa Kirist togs-n-taagã.” (1 Kor. 11:1) A Zezi sẽn sik a meng n sak n waas a tʋm-tʋmdbã nao n wilg-b sik-m-mengã yõodã poore, a yeel-b-la woto: “Mam kõo yãmb mamsg tɩ y maan wa mam me sẽn maan yãmbã.” (Zã 13:12-15) Tõnd me sẽn yaa kiris-nebã, d segd n dɩka a Zezi Kirist togs-n-taare, d manesmã la d no-goamã fãa pʋgẽ.—1 Pɩɛ. 2:21.
2. Baa Siglgã taoor lʋɩtb Sull sã n pa tʋm tõnd tɩ d tɩ yɩ misioneer tẽn-zẽnga, bõe la d tõe n maane?
2 Sõsg ning sẽn loogã pʋgẽ, d bãngame tɩ misioneer yaa ned b sẽn tʋm t’a tɩ moon koe-noogã. Tʋm-tʋmd a Poll soka sogsg sẽn tar yõod rẽ wɛɛngẽ. (Karm-y Rom dãmb 10:11-15.) A sokame tɩ “b na n yɩɩ wãn n wʋm tɩ ned ka togs koɛɛga?” Rẽ poore, a lebg n dɩka no-rɛɛs a Ezai goamã n yeel woto: “Neb nins sẽn wat ne koe-noogã nao tara dasãnde.” (Ezai 52:7) Baa b sã n pa tʋm tõnd tɩ d tɩ moon tẽn-zẽnga, d tõe n talla manesem sẽn wilgd tɩ d nonga koe-noogã moonego, n moon ne yẽesem wa a Zezi. Rɩẽ, yɩɩ Rĩungã koe-moondb 6 957 852 n moon koɛɛgã tẽns 236 pʋsẽ.—2 Tɩm. 4:5.
“Tõnd basa bũmb fãa n tũ yãmba”
3, 4. Bõe la a Zezi bas saasẽ n wa tẽngã zugu, la bõe la d segd n maan n tõog n yɩ a karen-biisi?
3 A Zezi basa naam la ziir ning a sẽn da tar saasẽ wã, n wa tẽng zug “n lebg wa yamba,” sẽn na yɩl n pids tʋʋmd ning a sẽn da segd n tʋm tẽng zugã. (Fil. 2:7) Baa tõnd sẽn maan a soab fãa n na n dɩk Kiristã togs-n-taare, pa tõe n mak ne Kiristã sẽn sak n bas bũmb ning saasẽ n wa tẽng zugã ye. La d sẽn yaa a karen-biisã, d tõe n kell n yalsa kãn-kãe, n da maand d bãngẽ, d sẽn bas bũmb nins a Sʋɩtãan dũniyã pʋgẽ wã yĩng ye.—1 Zã 5:19.
4 Daar a yembre, tʋm-tʋmd a Pɩɛɛr yeela a Zezi yaa: “Gese, tõnd basa bũmb fãa n tũ yãmba.” (Mat. 19:27) A Zezi sẽn wa n yeel a Pɩɛɛre, a Ãndere, a Zak la a Zã tɩ b wa tũ yẽ wã, b basa b gãmba wã tao-tao n pʋg-a. B sẽn da yaa zĩm-yẽedbã, b basa tʋʋm-kãng n lebg koe-moondba. A Luk Evãnzillã pʋgẽ, b wilgame t’a Pɩɛɛr yeela a Zezi yaa: “Gese, tõnd basa tõnd bũmb fãa n tũ yãmba.” (Luk 18:28) Pa yɩ tɩlae tɩ wʋsg tõnd sʋkã bas d sẽn tarã fãa n pʋg a Zezi ye. La d segd n ‘kɩɩsa d meng’ n lebg Kiristã karen-biis la d tũ a Zeova ne d sũy fãa. (Mat. 16:24) Woto tara nafa wʋsgo. (Karm-y Matɩe 19:29.) Tõnd sã n moond koɛɛgã ne yẽesem wa Kiristã, d na n paama sũ-noogo, sẽn tɩ yɩɩd fãa tõnd me sã n naag n sõng ned t’a paam zood ne Wẽnnaam la a Bi-riblã.
5. Togs-y kibar sẽn wilgd ned sẽn vɩ tẽn-zẽng sẽn tõe n sak n maan bũmb ninga, a sã n wa bãng sɩdã.
5 A Valmir yaa Berzill rao a ye sẽn vɩ Suriname n da tʋmd sãnemã zĩigẽ. A ra yaa rã-yũud la yoaada. Daar a yembr a sẽn wa n kẽng galʋ-tẽng a ye pʋgẽ, a Zeova Kaset rãmbã sɩnga Biiblã zãmsg ne-a. Zãmsgã ra maanda daar fãa. A toeema yɛl wʋsg a vɩɩmã pʋgẽ, la pa yã n kaoos la a reeg lisg ye. A sẽn wa n mik t’a tʋʋmdã kɩtame t’a pa tõe n tũ Biiblã sẽn yetã sõma wã, a basa a tʋʋmdã sẽn da kõt-a ligd wʋsgã, n leb Berzill n na n tɩ sõng a zakã rãmb tɩ b bãng sɩdã. Neb wʋsg yikdame n tɩ vɩ tẽns nins sẽn tar laog wʋsgã pʋsẽ. La b sã n wa bãng sɩdã, b sakdame n bas b tʋʋmã n leb b ba-yiyã n na n tɩ sõng b nebã tɩ bãmb me bãng a Zeova. Koe-moondb kãensã wilgdame tɩ b sɩd nonga koɛɛgã moonego.
6. Baa tõnd sã n pa tõe n yik n kẽng zĩis nins b sẽn baood koe-moondb wʋsgã, bõe la d tõe n maane?
6 A Zeova Kaset rãmb wʋsg n sak n yik b sẽn da beẽ wã n kẽng zĩis nins b sẽn baood koe-moondb wʋsgo. Kẽer meng sakd n yika b tẽngẽ wã n kẽng tẽng a to n na n tɩ moon koɛɛgã. Tõe tɩ tõnd pa tõe n maan a buud ye. La d tõe n dɩka a Zezi togs-n-taar n maand d sẽn tõe fãa koe-moonegã pʋgẽ wakat fãa.
A Zeova zãmsda tõndo
7. Lekol-bʋs n sõngd Rĩungã koe-moondb nins sẽn dat n paas b minimã?
7 Wala a Zezi sẽn paam t’a Ba wã zãms-a wã, tond me tõe n dɩɩ zãmsg ning a Zeova sẽn kõt rũndã-rũndã wã nafa. A Zezi mengã yeela woto: “Gʋlsa Wẽnnaam no-rɛɛsdbã sɛbã pʋsẽ yaa: ‘Bãmb fãa na n paama zãmsg Wẽnnaam nengẽ.’ ” (Zã 6:45; Ezai 54:13) Rũndã-rũndã, lekoll dãmb n be n sõngd tõnd tɩ d tõe n moon Rĩungã koɛɛg sõma. Yaa vẽeneg tɩ tõnd fãa rɩta Wẽnnaam tʋʋmdã lekoll sẽn maand tõnd tigimsã pʋsẽ wã yõodo. So-pakdbã tara zu-noog n tõe n kẽng so-pakdbã lekolle. So-pakdb wʋsg sẽn kaoos tʋʋmdã pʋgẽ le paama zu-noog n kẽng lekollã naoor a yiibu. Kãsem dãmb la kãsemb sõngdb me kẽnga Rĩungã Tʋʋmd Lekoll n tɩ paam zãmsg sẽn na yɩl n tõog n zãms tigingã neb sõma n paase, la b bãng b sẽn na n sõng-b sõma to-to n paase. Kãsem dãmb la kãsemb sõngdb wʋsg sẽn yaa ra-kõap kẽnga Wẽnnaam tʋʋmdã zãmsg lekoll n paam zãmsg sẽn na yɩl n tõog n zãms neb a taabã tɩ b moon koɛɛgã. Saam-biis la saam-bi-pogs wʋsg me kẽnga Gileaad lekollã, n lebg misioneer dãmb tɩ b tʋm-b tẽn-zẽmse.
8. Bõe la saam-biis kẽer sakd n basdẽ sẽn na yɩl n dɩ zãmsg ning a Zeova sẽn kõtã nafa?
8 A Zeova Kaset rãmb wʋsg toeema b yɛlã kẽer la b sigl b sẽkã sõma, sẽn na yɩl n tõog n kẽng lekoll kãensã pʋsẽ. A Yugu kosa a tʋʋmã taoor soab sor n na n kẽng Wẽnnaam tʋʋmdã zãmsg lekoll Kanada, la a tʋʋmã taoor soab zãgsame. A Yugu basa a tʋʋmdã n kẽnge. Ad a sẽn yete: “Mam pa maand m bãngẽ ye. B sã n da sak n kõ maam sor tɩ m kẽnge, tõe tɩ b ra na n wa ratame tɩ mam kell n tʋmd be wakat fãa, b sẽn maan maam neerã yĩnga. La masã, mam tara vɩʋʋg n tõe n tʋm a Zeova sẽn na n bobl maam tʋʋmd ning fãa.” Sẽn na yɩl n dɩ zãmsg ning Wẽnnaam sẽn kõtã nafa, neb wʋsg sakame n bas bũmb nins bãmb sẽn da get tɩ tara yõod wʋsgã.—Luk 5:28.
9. Togs-y kibar sẽn wilgd tɩ zãmsg ning sẽn yit Biiblã pʋgẽ wã ne modgr wʋsg womda bi-sõma.
9 Zãmsg ning sẽn yit Biiblã pʋgẽ wã, n paas modgr wʋsg tõe n sõnga ned hal sõma. (2 Tɩm. 3:16, 17) D ges biig a ye sẽn vɩ Guatemala t’a yʋʋr boondẽ t’a Saulo kibarã. B rog-a lame t’a yamã pa ta zãng ye. A karen-saamb a ye yeela a ma wã t’a ra modg biigã t’a zãms karengo, bala rẽ na n nams-a-la zaalem. A Saulo kell n basa lekollã n pa bãng sebr kareng baa bilf ye. La a Zeova Kaset soab a ye n tũnug ne Modg-y n tõog kareng la gʋlsgã seb-bilã n zãms a Saulo karengo. Tarẽ-n-tarẽ, a Saulo modgame hal n wa tõe n wɛgs sõsg Wẽnnaam tʋʋmdã lekollẽ. Daar a yembre, a Saulo ma wã moona zak-zak n tɩ seg a Saulo pĩnd karen-saambã. Karen-saambã sẽn wʋm t’a Saulo zãmsa karengã, a yeela a Saulo ma wã tɩ semen ning sẽn watã bɩ a tall-a n wa. B sẽn kẽnga, karen-saambã soka a Saulo yaa: “Yaa bõe la fo wa n na n zãms maam?” A Saulo laka Biiblã sɩd yetame tɩ bõe? sebrã n yãk sull bal n sɩng karengo. Linga a karen-saambã t’a yeel-a yaa: “Mam da pa tẽed tɩ fo na wa n tõog n zãms maan bũmb ye!” A nintãmã sɩnga raagr t’a mobg a Saulo.
Zãmsg sẽn kẽed sũuri
10. Seb-bʋg n sõngd tõnd tɩ d zãmsd nebã Biiblã sõma?
10 A Zezi zãmsgã ra tika bũmb ning a Zeova meng sẽn zãms-a wã zugu, la Wẽnnaam Gomdã zugu. (Luk 4:16-21; Zã 8:28) D sẽn tũud a Zezi saglsã la d kɩtdẽ tɩ d zãmsgã tikd Biiblã zugã, d rɩkda a togs-n-taare. Rẽ kɩtame tɩ tõnd fãa tar tagsg a yembre, la d zãmsd nebã bũmb a yembre, tɩ rẽ paasd tõnd zems-n-taarã. (1 Kor. 1:10) Tõnd sũyã nooma wʋsgo, bala “tʋm-tʋmd sẽn tũud sɩd la sẽn tar yamã” yiisda sɛb sẽn tik Biiblã zugu, sẽn na yɩl n sõng-d tɩ d fãa tõog n zãms nebã bũmb a yembr la d moon koe-noogã sõma. (Mat. 24:45; 28:19, 20) Sɛb nins a sẽn yiisdã sʋka, d tõe n sõdga Biiblã yetame sebrã b sẽn zoe n yiis ne buud-goam 179 wã.
11. Wãn to la Etiopi saam-bi-poak tũnug ne Biiblã yetame sebrã n sõng ned sẽn da pa nong koe-noogã?
11 D sã n zãmsd nebã ne Biiblã yetame sebrã, tõe n kɩtame meng tɩ neb nins sẽn pa nong tõndã toeem yam. Saam-bi-poak a Lula yaa so-pakd n be Etiopi. Daar a yembre, a ra zãmsda ned a ye Biiblã, tɩ pag a ye sẽn yaa nin-kãng ned wa ta n sɩng goam n tãsdẽ tɩ b pa segd n zãms Biiblã ye. La a Lula tika makr ning b sẽn dɩk Biiblã yetame sebrã sak 15 wã pʋgẽ sẽn gomd fobiye rãmbã yellã zugu, n maag a yĩng n gom ne pagã. Pagã sika a sũur n bas-b tɩ b lebg n sɩng Biiblã zãmsgo. A lebg n waa nindaar meng n zĩnd n kelg zãmsgã, la a bõos tɩ b wat n zãmsd yẽ me. A pʋd n yeelame t’a na n yaoome tɩ b wat n zãmsd-a. A wa n zãmsda Biiblã naoor a tãab semen fãa, n modgd hal sõma.
12. Togs-y kibar a ye sẽn wilgd tɩ kom-biisã tõe n zãmsã neb a taabã Biiblã sõma.
12 Kom-biisã me tõe n sõnga neb a taabã ne Biiblã yetame sebrã maasem. Yʋʋm 11 biig a Keanu sẽn vɩ Hawaii wã ra karemda Biiblã yetame sebrã a lekollẽ wã daar a yembre, t’a karen-bi-taag sok-a yaa: “Bõe yĩng tɩ fo pa maand kibs rãmbã?” A Keanu kell n laka sebrã n karem vẽnegrã zĩig ning sẽn sokd tɩ “D segd n maana tig bɩ?” wã. Rẽ poore, a laka sagsã zĩig n yeel a karen-bi-taagã t’a wilg sak ning sẽn noom-a n yɩɩda. A karen-bi-taagã sakame n na n zãms Biiblã. Rɩẽ, a Zeova Kaset rãmbã zãmsa Biiblã ne neb 6 561 426. Bãmb wʋsg talla Biiblã yetame sebrã n zãms nebã. Yãmb me tara seb-kãngã n zãmsd nebã Biiblã bɩ?
13. Wãn to la Biiblã zãmsg tõe n sõng nebã wʋsgo?
13 Biiblã zãmsg ne Biiblã yetame sebrã maasem tõe n sõnga neb nins sẽn dat n maan Wẽnnaam daabã wʋsgo. Saam-biig ne a pag sẽn yaa so-pakdb n vɩ Norvɛɛz sɩnga Biiblã zãmsg ne zak a ye neb sẽn yit Zãmbi. Zãmbi raoã ne a pagã ra tara kom-pugli a tãabo, la b ra pa ye rat biig ye. La pagã le rɩka pʋga, tɩ b yãk yam n na n yiis pʋgã. Rasem a wãn sẽn deng tɩ b kẽng n tɩ yã logtore, b zãmsa Biiblã yetame sebrã sak ning gom-zug sẽn yet tɩ “D ges vɩɩmã wa Wẽnnaam sẽn get-a to-to wã.” Foto ning sẽn be sag-kãngã pʋgẽ n wilgd biig sẽn nan ket a ma pʋgẽ wã kɩtame tɩ b tags wʋsgo, la b yeelame tɩ b pa na n le yiis pʋgã ye. B kell n kẽnga taoor ne Biiblã zãmsg n bɩɩsd b tẽebã. B sẽn wa n dog b biigã, b rɩka saam-biig ning sẽn zãms-a Biiblã ne bãmbã yʋʋr n pʋd b biigã.
14. Togs-y kibar sẽn wilgd tɩ d sã n tũud d sẽn zãmsd nebã bũmb ningã, womda bi-sõma.
14 Bũmb ning me a Zezi sẽn da maand koe-noogã mooneg pʋgẽ tɩ tar yõod wʋsg yaa a sẽn da tũud a sẽn zãmsd nebã bũmb ningã. A Zeova Kaset rãmbã rɩkda a Zezi togs-n-taar n tar manesem sõng tɩ neb wʋsg neẽ n pẽgda. Nuvɛll Zelãnde, wagda n kao rao a ye mobil n zuk a korgo. Raoã sẽn tɩ togs polɩɩs rãmbã, polɩɩs a ye n yeel-a yaa: “Fo zug sã n yɩ noog t’a Zeova Kaset soab yã f korgã n dɩke, f na n lebg n paam-a lame.” Saam-bi-poak n yã korgã n dɩke. B sẽn togs korgã soabã, a kẽnga saam-bi-poakã nengẽ. Sebr a ye sẽn tar yõod wʋsg ne-a n da be korgẽ wã. A sẽn vaees n mik tɩ sebrã keta korgẽ wã a sũurã yɩɩ noogo. Saam-bi-poakã yeel-a-la woto: “Mam sẽn kɩt korgã ne a teedã fãa wã yaa bũmb sẽn segde, bala mam yaa a Zeova Kaset soaba.” Woto linga raoã, bala a tẽega polɩɩsã sẽn da yeel-a bũmb ning baraar yibeoogã. Vẽenega, kiris-neb hakɩkã tũuda b sẽn zãmsd bũmb ning Biiblã pʋgẽ wã, n dɩkd a Zezi togs-n-taare.—Heb. 13:18.
D tall manesem ning buud a Zezi sẽn da tar ne nebã
15, 16. Wãn to la d tõe n kɩt tɩ nebã tʋlg n kelg koɛɛg ning tõnd sẽn moondã?
15 A Zezi sẽn tall manesem ning ne nebã kɩtame tɩ b sak n kelg-a. Wala makre, a nonglmã la a sik-m-mengã kɩtame tɩ naong rãmbã ra nong a zĩigẽ. A ra zoeta neb nins sẽn da wat a nengẽ wã nimbãanega, n gomd goam sẽn noogd sũur n belsd-ba, la a sãoogd neb wʋsg baase. (Karm-y Mark 2:1-5.) Tõnd pa tõe n maan yel-soalem ye. La d tõe n talla nonglem, sik-m-meng la nimbãan-zoeere, bala yaa woto fãa n kɩtd tɩ nebã sakd sɩdã.
16 Nimbãan-zoeer sɩd tara yõodo. Wala makre, Kiribati tẽng a ye sẽn be Pasifik disiidã pʋgẽ, so-pakd a ye yʋʋr sẽn boond t’a Tariua moona nin-kẽem yʋʋr sẽn boond t’a Beere. Nin-kẽemã ra pa rat n kelg ye. La a Tariua yãame t’a yaa koamsa, t’a nimbãaneg yõk-a. A soka raoã yaa: “Yãmb mii Wẽnnaam sẽn yeel t’a na n wa maana bũmb ning n kõ bãad dãmbã la sẽn kʋʋl-bã bɩ?” Rẽ poore, a laka Biiblã n karem a Ezai bãngr gomdã. (Karm-y Ezai 35:5, 6.) Woto linga nin-kẽemã t’a yeel woto: “Mam sɩng n karemda Biiblã sẽn na maan yʋʋma, tɩ mam tũudmã misioneer a ye me wat n sõsd ne maam hal yʋʋm wʋsgo, la m zɩ n karem Biiblã n seg gom-kãensã ye.” A Beere sɩnga Biiblã zãmsgo, hal n modgd wʋsgo. Baa ne a sẽn yaa koamsã, a reega lisgu, n sõngd sull a ye neb sẽn zãr ne tigingã, la a modgd n gilgd a tẽngẽ wã n moond koe-noogã.
D kell n dɩk Kiristã togs-n-taare
17, 18. a) Wãn to la d tõe n moon koɛɛgã tɩ wom biisi? b) Bõe la neb nins sẽn pa reemd ne koɛɛgã moonegã na n wa paame?
17 Wala kibay wʋsg sẽn wilgdã, tõnd sã n tall nonglem, nimbãan-zoeer la sik-m-meng wa a Zezi, d koe-moonegã na n woma biis sõma. Dẽnd d sɩd segd n dɩka Kiristã togs-n-taar n moon koɛɛgã ne yẽesem.
18 A Pɩɛɛr ne neb a taab sẽn lebg a Zezi karen-biisã poore, a Pɩɛɛr soka a Zezi woto: “Yaa bõe la tõnd na n deege?” T’a Zezi leok tɩ: “Ned sã n bas a yir walla a ba-bi-raop bɩ a ba-bi-pogse, walla a ba bɩ a ma, walla a pag bɩ a kamba, walla a pʋt mam yʋʋrã yĩnga, yẽ na n deegame n yɩɩd a sẽn basã wʋsgo, la a na n paama vɩɩm sẽn ka sɛta.” (Mat. 19:27-29) Tõnd sã n sɩd modg n kell n dɩk a Zezi sẽn yaa misioneer sẽn ka to wã togs-n-taare, gom-kãensã na n pidsa tõnd me zugu.
Yãmb na n leokame tɩ bõe?
• Wãn to la a Zeova zãmsd tõnd sẽn na yɩl tɩ d moon koe-noogã?
• Bõe yĩng tɩ Biiblã yetame sebrã yaa sõma koe-moonegã pʋgẽ?
• Wãn to la d tõe n tall manesem ning buud a Zezi sẽn da tar ne nebã?
[Zãmsgã sogsgã]
[Foto, seb-neng 21]
A Zezi sẽn bool a Pɩɛɛre, a Ãndere, a Zak la a Zã wã, b saka tao-tao
[Foto, seb-neng 23]
“Biiblã yetame” sebrã sõngda tõnd tɩ d zãmsd nebã bũmb a yembre