Kirist waoongã rat n yeelame tɩ bõe?
Kirist waoongã rat n yeelame tɩ bõe?
“Bɩ y togs tõnd . . . bãnd ninga sẽn na n wilg yãmb waoongo, la dũniyã sɛɛb wakate.”—MAT. 24:3.
1. Bõe la a Zezi tʋm-tʋmdb ra kos-a tɩ d rat n wʋm dẽ võore?
SẼN dat n maan yʋʋm 2 000 la woto, a Zezi ne a tʋm-tʋmdb a naas n da sõsd oliiv tɩɩs tãngã zugu, tɩ b wa kos-a woto: “Bɩ y togs tõnd bõn-kãens sẽn na n zĩnd wakat ninga, la bãnd ninga sẽn na n wilg yãmb waoongo, la dũniyã sɛɛb wakate.” (Mat. 24:3) Tʋm-tʋmdbã kosgã pʋgẽ, b goma a Zezi “waoong” yelle, la “dũniyã sɛɛb wakat” yelle. Gom-kãensã rat n yeelame tɩ bõe?
2. ‘Dũniyã sɛɛb wakatã’ rat n yeelame tɩ bõe?
2 D reng n bao n bãng “dũniyã sɛɛb wakatã” sẽn dat n yɛɛlga. Yaa synteleia sẽn yit gɛrk gom-biig a ye pʋgẽ wã la b sẽn lebg moorã Biibl pʋgẽ Matɩe 24:3 pʋgẽ wã tɩ “sɛɛbã.” La gɛrk buud-gomdã pʋgẽ, sɛɛb yaa telos. Pa synteleia ye. Synteleia rat n yeelame tɩ “baasgo.” Rẽ n so tɩ Traduction du monde nouveau wã pʋgẽ, zĩig zãnga, b lebgda synteleia tɩ “baasgo” la telos tɩ “sɛɛbo.” Gom-biis a yiibã võor pa ye zãng ye. Sẽn na yɩl n wilg b võorã sẽn welg to-to wã, d na n dɩka makre. Wala ned sã n sõsd ne zãma wã Rĩungã Roogẽ, a sõsgã baasg yaa a yaoolem goamã. Wakat kãnga, a lebgd n tẽegda kɛlgdbã bũmb nins yell a sẽn gom a sõsgã pʋgẽ wã, la a wilgd-b b sẽn tõe n tũ saglsã to-to. La sõsgã sɛɛb yaa sõsdã sẽn wat n viig kɛlgdbã taoor n loogdẽ wã. Dẽnd b sẽn yeel moorã Biibl pʋgẽ tɩ “dũniyã sɛɛb wakatã,” yaa a baasgã bɩ a yaoolem dayã yell la b gomda. Yaa a sẽn wat n kolg sɛɛbã, n tall n tɩ ta a sɛɛbã.
3. Sõdg-y yɛl kẽer sẽn maand a Zezi waoongã wakate.
3 La ‘waoongã’ yẽ võor yaa bõe? Yaa parousia * sẽn yaa gɛrk gom-biigã la b sẽn lebg ka tɩ ‘waoongã.’ B sẽn gomd waoong yell Matɩe 24:3 pʋgẽ wã pa wa n wẽneg n loog wakat bilf pʋgẽ ye. Yaa wa n kaoose. Kirist parousia wã bɩ a waoongã wakatã sɩnga ne a naamã reegr saasẽ yʋʋmd 1914 soabã tɛka, n tar n watẽ. Yaa wakat kãng pʋgẽ me la a sẽn na n wa sãam nin-wẽnsã. (Mat. 24:21) Dũniyã ‘yaoolem dayã’ bɩ a “sɛɛbã wakatã” sɩngda a Zezi naamã reegr tɛka, tɩ yɛl a taab me na n maan da-kãens pʋsẽ. Wala makre, b na n ket n tigimda nin-tũusdsã. B vʋʋgrã la b saasẽ kẽngrã me na n yɩɩ sasa kãnga. (2 Tɩm. 3:1; 1 Kor. 15:23; 1 Tes. 4:15-17; 2 Tes. 2:1) Dẽnd d tõe n yeelame tɩ wakat ning b sẽn bool tɩ ‘dũniyã sɛɛb wakatã’ (synteleia) ne Kirist waoongã (parousia) wakatã yaa wakat yɛnga.
Pa wakat sẽn yaa koɛɛg ye
4. A Zezi sẽn yeel t’a waoongã wakat na n yɩɩ wa a Nowe wakatã rat n yeelame tɩ bõe?
4 Parousia wã pa gomd wakat sẽn yaa koɛɛg yell ye. A Zezi maka a waoongã bɩ a parousia wã ne bũmb tɩ tõe n sõng-d tɩ d bãng t’a sɩd pa wakat sẽn yaa koɛɛg ye. (Karm-y Matɩe 24:37-39.) Gũus-y n ges-y t’a Zezi pa mak a waoongã ne sãoong sa-kãsengã niib wakat ye. A mak-a-la ne a Nowe wakatã tõre. Sẽn dat n yeel tɩ wakat ning sẽn deng n loog tɩ sa-kãsengã yaool n ni wã me naagame. Wakat kãng sasa, a Nowe kaa koom koglgã la a moon koɛɛgã n gũ sa-kãsengã niibu. Yel-kãens fãa kaoosa yʋʋma. Woto me, Kirist waoongã pa wakat sẽn yaa koɛɛg ye. A tara sɩngr la saabo. Yɛl wʋsg n na n maan wakat kãnga, t’a sẽn na n wa sãam nin-wẽnsã to-kãsengã sasa wã be yel-kãens sʋka.—2 Tes. 1:6-9.
5. Wãn to la Wilgr sak a 6 pʋg goamã wilgd t’a Zezi waoongã wakat yaa wakat sẽn na n wogle?
5 Biiblã goam a taab me wilgda vẽeneg tɩ Kirist waoongã yaa wakat sẽn na n wogle, la tɩ b pa gomd a sẽn na n wa sãam nin-wẽnsã wakat bilf pʋgẽ balã yell ye. Wilgr sebrã pʋgẽ, b bilgda a Zezi sẽn fõgen maanf n zao wed-mo-pɛɛlga. (Karm-y Wilgr 6:1-8.) Yɩɩ yʋʋmd 1914 soabã pʋgẽ la b sẽn kõ-a naamã n fõgen-a maanfã. Yaa rẽ poor la b sẽn bilgd a sẽn yi n na n zab zabrã, la b yeel t’a ‘tara tõogrã.’ Bilg-kãngã pʋgẽ me, b goma we-rʋʋdb a taab sẽn zao wiidi sẽn tar kõbg toɛy-toɛy n pʋgd-a yelle. Rẽ ra pĩnd n wilgdame tɩ zaba, kom la bã-longds n na n zĩnd wakat kãnga. La woto fãa segd n zĩnda wakat ning b sẽn boond tɩ ‘yaoolem dayã’ sasa. D sɩd nee woto fãa b sẽn pĩnd n togsã sẽn pidsd rũndã-rũndã.
6. Wilgr sak 12 wã sõngd-d lame tɩ d wʋm bõe Kirist waoongã wɛɛngẽ?
6 Wilgr sebrã sak 12 wã me gomda Wẽnnaam saasẽ Rĩungã luglg yelle, n vẽnegd-d ne yɛl a taaba. Be, b gomda zabr sẽn zĩnd saasẽ yelle, n yetẽ t’a Misɛll ne a malɛgsã zaba ne a Sʋɩtãan ne a zĩn dãmbã. Yaa a Zezi Kirist la b sẽn boond t’a Misɛllã. A sẽn zab ne a Sʋɩtãan ne a poorẽ dãmbã, a rig-b-la saasẽ tɩ b sig tẽnga. Biiblã paasame tɩ rẽ tɛka, a Sʋɩtãan sũur yika wʋsgo, “a sẽn bãng t’a wakat yaa bilfa yĩnga.” (Karm-y Wilgr 12:7-12.) Woto wilgda vẽeneg tɩ b sẽn lugl Kiristã Rĩung saasẽ wã poore, “toog” sẽn da na n tall paasg n na n paam tẽngã ne a nin-buiidã.
7. Yɩɩl Sõamyã yɩɩll a yiib-n-soabã gomda bõe yelle, la b bilga be tɩ b basa weer bõe yĩnga?
7 Yɩɩl Sõamyã yɩɩll a yiib-n-soabã me ra pĩnd n goma a Zezi sẽn da na n wa reeg naam saasẽ Siõ tãngã zugã yelle. (Karm-y Yɩɩl Sõamyã 2:5-9; 110:1, 2.) La yɩɩl-kãngã wilgame me tɩ b na n kõo dũniyã rĩm dãmb ne b nin-buiidã weer tɩ b wilg b sã n na n saka Kirist naamã. B sagl-b lame tɩ b ‘bãng la b rɩk yam.’ Wakat kãnga, “neb nins sẽn baood zĩ-lilldg [Wẽnnaam] nengẽ wã,” rat n yeel tɩ neb nins sẽn na n sak a Zeova ne rĩm ning a sẽn yãkã sɩd na n paama sũ-noogo. Rẽnd a Zezi naamã reegr tɛka, b basa weer sẽn na yɩl tɩ dũniyã rĩm dãmb ne b nin-buiidã ges n toeem yam.—Yɩɩl 2:10-12.
B na n bãnga bãndã
8, 9. Ãnd dãmb n da na n wa bãng bãnd ning sẽn wilgd tɩ Kiristã waame wã la b wʋm a võore?
8 Fariziẽ rãmbã sẽn da wa n sok a Zezi n dat n bãng Wẽnnaam soolmã bɩ a Rĩungã sẽn na n wa wakat ningã, a leok-b lame tɩ “Wẽnnaam soolem waoong ka bãngd ne nin gesg ye.” (Luk 17:20, 21) Woto wilgda vẽeneg tɩ neb nins sẽn pa tẽed-a wã pa na n bãng a wakatã ye. B pʋd n pa sak n deeg t’a Zezi na n wa lebga b Rĩm meng ye. Dẽnd yaa ãnd dãmb n da na n wa bãng bãnd ning sẽn wilgd t’a Zezi waame wã la b bãng a sẽn dat n yɛɛlgã?
9 A Zezi yeelame t’a karen-biisã na n yãa bãndã vẽeneg “wa sa-yãgb sẽn yit yĩngr zĩig a yembr n yãgd tɩ ta zĩig a to” tɩ yaa vẽeneg to-to wã. (Karm-y Luk 17:24-29.) Matɩe 24:23-27 pʋgẽ wã me, a Zezi goma a waoongã yell n yeel t’a bãndã na n yɩɩ wa sa-yãgbo.
Zãmaan ninga sẽn yã bãndã
10, 11. a) Gũusg Gasgã ra wilgame tɩ “zãmaan” ning yell b sẽn gom Matɩe 24:34 yaa bʋgo? b) A Zezi karen-biisã bãngame tɩ ãnd dãmb me n naag “zãmaan-kãng” nebã sʋka?
10 Gũusg Gasgã ra wilgame tɩ “zãmaan” ning yelle b sẽn gom Matɩe 24:34 pʋgẽ wã yɩɩ pipi kiris-nebã wakatẽ “Zʋɩf rãmb nins sẽn pa tẽ a Zezi wã.” * Wõnda b ra tara bʋʋm. Bala, verse rãmb a taab pʋsẽ a Zezi sẽn pʋd gom-bil ning b sẽn lebg tɩ “zãmaanã,” a pa pẽgd a nebã ye. A paasame tɩ b yaa ‘nin-wẽnse.’ (Mat. 12:39; 17:17; Mark 8:38) Dẽnd Gũusg Gasgã ra wilgdame tɩ rũndã-rũndã wã, zãmaan ning sẽn na n bãng-a “dũniyã baasg” (synteleia) bãndã la a sɛɛbã (telos) yaa neb nins fãa sẽn pa tẽed a Zezi wã.
11 Yaa sɩd t’a Zezi sã n da wa pʋd gom-bil ning b sẽn lebg tɩ zãmaanã n pa pẽgd-a, sã n pa ne nin-wẽns la a gomd ne, yaa b yell la a gomda. La rẽ yĩnga d tõe n yeel tɩ yaa nin-wẽnsã bal yell la a sẽn gom Matɩe 24:34 pʋgẽ wã bɩ? D tẽeg t’a ra gomda ne a karen-biis a naase, “neb a taab sẽn ka be be wakate.” (Mat. 24:3) La baraare, a Zezi pa sãbg “zãmaan” ning a sẽn yeel tɩ pa na n loog tɩ bõn-kãens fãa pa paam pidsgã ye. Dẽnd yaa vẽeneg tɩ tʋm-tʋmdbã bãngame tɩ bãmb ne b tẽed-n-taasã fãa me naaga “zãmaan-kãng” nebã.
12. Wãn to la Matɩe 24:32, 33 wã sõngd-d tɩ d bãng sẽn yaa “zãmaan” ning yell la a Zezi sẽn da gomdã?
12 Bõe yĩng tɩ d yet woto? D sã n maag d yĩng n karem Matɩe 24:32, 33 wã, d wʋmda a võore. Beenẽ, a Zezi yeela woto: ‘Bɩ y zãms yel-bũnd ne kankanga. A wila sẽn ket n yaa poala, la a sẽn tobda, yãmb bãngame tɩ sig-noor kolgame. Woto me, yãmb sã n yã bõn-kãens fãa, bɩ y bãng tɩ Ninsaal Biiga waoong kolgame n ta rig-noorẽ.’ (Ges-y Mark 13:28-30; Luk 21:30-32.) Yaa rẽ zugẽ la a sẽn yeel Matɩe 24:34 pʋgẽ wã tɩ ‘mam yeta yãmb sɩda, tɩ zãmaan-kãnga kõn loog hal tɩ bõn-kãens fãa paam pidsgã.’
13, 14. Bõe yĩng tɩ d tõe n yeel t’a Zezi sẽn yeel tɩ “zãmaan-kãngã” wã, yaa karen-biisã yell la a sẽn da gomdã?
13 A Zezi yeelame tɩ b sã n wa yã “bõn-kãens fãa pidsgu,” yaa a karen-biisã sẽn da na n paam vʋʋsem sõngã zaeeb ka la bilfã n na n tõog n bãng a võorã. Dẽnd a sẽn yeel verse 34 soabã pʋgẽ tɩ ‘zãmaan-kãngã kõn loog hal tɩ bõn-kãens fãa paam pidsgã,’ tog n yaa bãmb yell la a sẽn da gomdã.
14 A Zezi karen-biisã ra pa na n wõneg neb nins sẽn da pa tũud-a wã ye. Bãmb sã n da wa yã yɛlã, b na n bãngame tɩ yaa bãndã la rẽ la b bãng b sẽn segd n maanega. A Zezi karen-biisã ra na n bãngame t’a “kolgame n ta rig-noorẽ.” Yaa sɩd tɩ pipi kiris-nebã wakate, Zʋɩf rãmb nins sẽn pa tẽ a Zezi wã ne kiris-nebã sẽn da zae ne vʋʋsem sõngã fãa yãa gom-kãensã pipi pidsgu, la yɩɩ karen-biisã bal n tõog n bãng tɩ yel-kãens la bãnd ning b sẽn da gũudã, la a võore.
15. a) Rũndã-rũndã, yaa ãnd dãmb la “zãmaan” ning yell a Zezi sẽn gomã? b) Bõe yĩng tɩ d pa tõe n bãng “zãmaan-kãngã” sẽn na n kaoos to-to wã takɩ? (Ges-y zĩ-gũbrã sẽn be seb-neng 29 wã.)
15 Rũndã-rũndã, sẽn pa wʋmd-b Wẽnnaam Gomdã võorã pa ne tɩ yɛlã wilgda vẽeneg t’a Zezi waame ye. B yetame tɩ bũmba fãa ket n yaa wa dũniyã naaneg wakate. (2 Pɩɛ. 3:4) La Kiristã ba-biis nins sẽn zae ne vʋʋsem sõngã tɩ b boond-b t’a Zã sullã nebã yẽ? Bãmb nee bãndã la b bãnga b sẽn segd n maan bũmb ninga. A yaa wa saag sẽn yãg zĩig a yembr n tɩ ta zĩig a to. Rũndã-rũndã, yaa nin-kãens sullã n yaa “zãmaan” ning a Zezi sẽn yeel t’a kõn loog hal tɩ ‘bõn-kãens fãa paam pidsgã.’ * Woto wilgdame tɩ to-kãseng ning d sẽn gũudã sɩngr na n mikame tɩ Kirist ba-biisã sẽn zae ne vʋʋsem sõngã kẽer ket tẽngã zugu.
Ket-y n gũud-y
16. Bõe la Kiristã karen-biis fãa segd n maane?
16 Bãndã bãngr bal pa sek ye. A Zezi paasa woto: ‘Bũmb ninga mam sẽn yet yãmbã, mam yeta nebã fãa. Bɩ y gũ.’ (Mark 13:37) D yaa kiris-ned sẽn paam zaeebã tɩ d yaa kʋʋn-kãsengã ned me, sagl-kãngã tũub tara yõod wʋsg ne d fãa. Yaa sẽn yɩɩd yʋʋm 90 la woto masã b sẽn kõ a Zezi naam saasẽ. Baa d vɩɩmã sẽn yaa toog to-to fãa, d segd n wilgame tɩ d segla d mens n ket n gũudẽ. D sẽn mi tɩ Kiristã lebga Rĩm saasẽ wã sõngd-d lame tɩ d ket n gũudẽ. Leb n kɩtdame tɩ d miẽ tɩ ka la bilfu, a na n waa “wakat ninga [tõnd] sẽn ka tẽeda,” n sãam a bɛɛbã.—Luk 12:40.
17. D sẽn wʋmd Kirist waoongã sẽn dat n yɛɛlgã, kɩtame tɩ d mi bõe, la bõe la d segd n modg n maane?
17 D sẽn wʋmd Kirist waoongã sẽn dat n yɛɛlgã kɩtame tɩ d miẽ tɩ yaa masã la d segd n maand d sẽn tõe fãa n gũud wakat fãa. D miime t’a Zezi zoe n waame, la t’a lebga Rĩm n dɩt naam saasẽ yʋʋmd 1914 soabã tɛka. Ka la bilfu, a na n sãama nin-wẽnsã la a toeem yɛl wʋsg dũniyã gill zugu. Woto yĩnga, d segd n modg n sõng n tʋma tʋʋmd ning a Zezi sẽn da pĩnd n togs tɩ b na n tʋmame wã. A ra yeela woto: “Wẽnnaam [Rĩungã, NW ] koe-no-kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb [telos] na yaool n ta.”—Mat. 24:14.
[Tẽngr not rãmbã]
^ sull 3 Sẽn na yɩl n paam kibay a taab bɩ y ges Étude perspicace des Écritures sebrã, a volim a 2 soabã neng 648-51.
^ sull 10 Ges-y yʋʋmd 1995, sɩpaolg kiuug pipi daar Gũusg Gasgã pʋgẽ, a seb-nens 11-15, 19, 30, 31 wã ne farendã.
^ sull 15 D nee Wilgr sebrã pʋgẽ pipi yãabã sẽn pidsd rũndã-rũndã zãmaanã. (Wil. 1:10–3:22) Be b gomda Zusoabã daar yelle, la bũmb nins b sẽn bilgdã sɩnga yʋʋmd 1914 soabã pʋgẽ n na n tall n tãag kiris-neb nins sẽn paam zaeebã yaoolem soabã kaalem la a vʋʋgre.—Ges-y La Révélation : le grand dénouement est proche ! sebrã neng 24, sull a 4.
Wãn-to la y na n leoke?
• Bõe n kɩt tɩ d miẽ t’a Zezi waoongã wakat pa wakat sẽn yaa koɛɛga?
• Ãnd dãmb n bãng a Zezi waoongã bãnd la b wʋm a võore?
• Rũndã-rũndã, yaa ãnd dãmb zãmaan yell la a Zezi sẽn gom Matɩe 24:34 pʋgẽ wã?
• Bõe n kɩt tɩ d pa tõe n bãng “zãmaan” ning yell b sẽn goma sẽn na n kaoos to-to wã takɩ?
[Zãmsgã sogsgã]
[Zĩ-gũbri, seb-neng 29]
Tõnd tõe n bãnga “Zãmaanã” sẽn na n kaoos to-to bɩ?
B sã n gomd zãmaan yelle, yaa neb sẽn tar yʋʋm toɛy-toɛy n vɩ wakat yɛng pʋgẽ yell la b gomda. Yikr 1:6 soabã sɩd wilgda rẽ. Be b yeta woto: ‘A Zozɛf ne a ba-biisã la zãmaan-kãng nebã fãa kiime.’ A Zozɛf ne a ba-biisã yʋʋm da yaa toor-toore, la b fãa vɩɩmda wakat yɛng pʋgẽ. Yaa a Zozɛf wakatẽ nebã fãa sẽn naag taab la b sẽn bool tɩ ‘zãmaan-kãng nebã.’ B sãnda vɩɩmdame n kaoos n yɩɩg a Zozɛfe. (Sɩng. 50:24) Tõe tɩ kẽer me yʋʋm sẽn pa ta a Zozɛf wa a Bẽnzame kell n vɩɩmda a Zozɛf kũumã poore.
Dẽnd “zãmaanã” yaa neb sull sẽn vɩ wakat yɛng pʋgẽ tɩ b miẽ tɩ wakat kãng na n talla tɛk la a pa na n kaoos wʋsgo, tɩ b yaool n pa tõe n bãng a sẽn na n kaoos to-to wã takɩ n wilg ye. Woto yĩnga, a Zezi sẽn gom “zãmaan” yell Matɩe 24:34 pʋgẽ wã, a pa wilg a karen-biisã b sẽn tõe n mag to-to n bãng “yaoolem dayã” sẽn na n tek wakat ning ye. A Zezi pʋd n yeel-b-la vẽeneg tɩ b pa na n bãng a raarã la a wakatã ye.—2 Tɩm. 3:1; Mat. 24:36.
[Foto, seb-neng 26, 27]
A Zezi naamã reegr yʋʋmd 1914 pʋgã poore, b bilga a sẽn zabd zabr n “tar tõogre”
[Foto, seb-neng 28]
“Zãmaan kãngã kõn loog ye, hal tɩ bõn-kãens fãa paam pidsgu”