Wẽnnaam Rĩungã yaa bõe?

BÕE yell la a Zezi ra gomd n yɩɩd a koe-​moonegã sasa? Wala yẽ meng sẽn wilgã, yaa Wẽnnaam Rĩungã yelle. (Luk 4:⁠43) A goma Rĩungã yell naoor wʋsg ne nebã. La rẽ ling-⁠b lame bɩ? Rẽ yĩnga b sokame n na n bãng Rĩungã sẽn yaa bũmb ning bɩ? Ayo. Evãnzill dãmbã pa gom rẽ yell ye. Rẽ yĩnga nebã ra zoe n mii Wẽnnaam Rĩungã sẽn yaa bũmb ning bɩ?

Pĩnd sɛb nins Zʋɩf rãmbã sẽn da get tɩ yita Wẽnnaam nengẽ wã wilga Rĩungã sẽn yaa a soab vẽenega, la a sẽn na n wa maan bũmb ning me. Rũndã-rũndã me, d tõe n bãnga yɛl wʋsg Wẽnnaam Rĩungã zug n paase, d sã n karemd Biiblã wa Zʋɩf rãmbã me sẽn da karemd sɛbã. Bɩ d ges bũmb a yopoe yell Biiblã sẽn gomd Wẽnnaam Rĩungã zugu. A tãab la Zʋɩf rãmbã ra zoe n miẽ nand t’a Zezi wa tẽngã zug menga. A tãabã sẽn pʋgdã yaa a Zezi wall a tʋm-​tʋmdbã n wilgi. Yaoolem soabã võor wʋmb lebga vẽeneg rũndã-rũndã.

1. Wẽnnaam Rĩungã yaa goosneema sɩd-​sɩd sẽn na n kell n zĩnd wakat fãa. Biiblã pʋgẽ pipi bãngr-​gomdã wilgame tɩ Wẽnnaam na n tʋma ned t’a wa fãag neb nins sẽn sakd-⁠a wã. Nin-​kãng b sẽn boond tɩ “yagengã” na n kɩtame tɩ zu-​loees nins a Ãdem ne a Hawa n paas a Sʋɩtãan kɩɩsgã sẽn wa ne wã fãa sɛ. (Sɩngre 3:​15) Kaoosg zugẽ, b togsa rĩm a Davɩɩd sẽn yɩ wẽn-​sakdã koe-​noog “yagengã” bɩ Mesi wã zugu. A na n lebga Naab n soog Rĩungu. Rĩung kãng pa na n tol n tall to ye. A na n paa wakat sẽn kõn sa.​—⁠2 Sãmwɛll 7:​12-⁠14.

2. Wẽnnaam Rĩungã na n menesa goosneema nins fãa sẽn be dũniyã zugã. Wẽnnaam vẽnega no-​rɛɛs a Daniɛll t’a yã dũniyã pãn-​soaadb sẽn dɩt-⁠b naamã n pʋgd taab to-⁠to hal pĩnd n tãag masã. Ad a Daniɛll meng sẽn yeel rẽ wɛɛngẽ: “Rĩm dãmb kãens sẽn dɩt naam wakate, Wẽnnaam sẽn be yĩngrã na n kɩtame tɩ soolem sẽn ka tõe n sãam la buud a taab sẽn ka tõe n deeg zĩndi. A na n wãa soolem kãens fãa tɩ b menem n bas-⁠a t’a yaas wakat fãa.” Dẽnd Wẽnnaam na n sãama goosneema rãmbã fãa, la a kɩt tɩ zabã, wẽgbã la weoogrã b sẽn kɩt tɩ beẽ wã sɛ. Biiblã wilgdame tɩ Wẽnnaam Rĩungã bee saasẽ, la a na n sooga tẽngã ka la bilfu. (Daniɛll 2:⁠44, 45) Wẽnnaam Rĩungã yaa goosneema sɩd-​sɩda, la yẽ n na n wa soog tẽngã wakat sẽn kõn sa yĩnga. *

3. Wẽnnaam Rĩungã na n menesa zabã, bãasã, komã la kũumã menga. Biiblã pʋgẽ, bãngr-​goam kẽer wilgda bũmb nins Wẽnnaam Rĩungã sẽn na n wa maan tẽngã zugu. Wẽnnaam Rĩungã na n wa maana bũmb ninsaalbã sigls sẽn na zɩ n tõog n maane, la b sẽn kõn tol n tõog n maane. Tags-⁠y n ges-⁠y Wẽnnaam sẽn na n wa sãam zab-​teed buud fãa “tɩ zabr sɛ hal dũniyã tɛk fãa.” (Yɩɩl Sõamyã 46:⁠10) Logtoɛɛmba, logto-​yiya, la bãag buud fãa kõn le zĩnd ye. “Tẽngã ned ba a ye ka na n le yeel t’a ka laafɩ ye.” (Ezai 33:⁠24) Kom kõn le zĩnd ye. Nebã fãa na n paamda rɩ-​sõma n dɩtẽ tɩ sekdẽ. “Ki wʋsg na n zĩnda soolem pʋgẽ.” (Yɩɩl Sõamyã 72:⁠16) Kʋya, yaado, la kũ-rot pa na n le zĩnd ye. B na n menesa kũumã sẽn yaa d fãa bɛ-​kãsengã. Wẽnnaam “na n sãama kũum wakat sẽn ka sɛta. Zusoabã sẽn yaa soaalã na n yẽesa nintãm nins fãa sẽn be nebã ninẽ wã.”​—⁠Ezai 25:⁠8.

4. Wẽnnaam meng n yãk a Rĩungã Naaba. Pa Mesi wã n yik a toor n na n lebg Wẽnnaam Rĩungã Naab ye. Leb n pa ninsaalbã sẽn pa zems zãngã me n yãk-⁠a ye.  Yaa Wẽnnaam a Zeova meng n yãk-⁠a. Naam yʋy nins sẽn yaa Mesi la Kiristã sɩd wilgda rẽ. Mesi bɩ Kiristã rat n yeelame tɩ b sẽn “zae a soabã.” Dẽnd Rĩm kãng paama zaeebo, sẽn wilgd t’a Zeova yãk-⁠a lame n bobl-⁠a tʋʋmd sẽn yaa kãsenga. Wẽnnaam yeela woto a zugu: “Ad mam tʋm-​tʋmd mam sẽn sõngda. Yaa mam nin-​tũusdg mam sẽn nong ne m sũur fãa zãngã. Mam ninga m sɩɩgã yẽ pʋgẽ. Yẽ na n waa ne tɩrlem buud fãa sʋka.” (Ezai 42:⁠1; Matɩe 12:⁠17,  18) Vẽenega, yaa Naandã a ye bal n mi Naab ning buud ãdem-​biisã sẽn date.

5. Wẽnnaam Rĩungã Naab wilga nebã a sẽn tõe n maan bũmb ning n kõ-ba. Mesi wã b sẽn da togs tɩ watame wã yɩɩ Nazarɛt rao a Zezi. B rog-⁠a-⁠la buud ning Wẽnnaam sẽn da yãkã pʋgẽ. (Sɩngre 22:⁠18; 1 Kibaya 17:⁠11; Matɩe 1:⁠1) A sẽn wa n be tẽngã zugã, a pidsa bãngr-​goam wʋsg b sẽn da togs yẽ zugu, yʋʋm wʋsg nand t’a wa tẽngã zugu. Kaset meng yii saasẽ n wilg tɩ yaa yẽ la Mesi wã. Wãn to? Wẽnnaam zĩnda saasẽ n yeel t’a yaa yẽ Bi-​ribla. Malɛgsã me wilgame tɩ yaa a Zezi la Mesi wã b sẽn da togs tɩ na n waame wã. Sẽn paase, a Zezi maana yel-​soalem neb wʋsg nifẽ, tɩ wilg vẽeneg tɩ yaa Wẽnnaam n kõ-a tõog kãng. * Naoor wʋsgo, a kɩtame tɩ nebã bãng a sẽn na n wa yɩ Naab ning buudu. A ra pa sõngd nebã ta tara tõog bal ye, a ra tʋllame me n sõng-⁠ba. (Matɩe 8:​1-⁠3) A ra pa baood a meng nafr ye. A ra kʋmda nebã nimbãanega, n tar raood la sik-⁠m-​menga. B wilga a sẽn tʋm tʋʋm ninsã Biiblã pʋgẽ, tɩ nebã fãa tõe n karem.

6. Neb 144 000 n na n naag Kiristã n dɩ naam Wẽnnaam Rĩungã pʋgẽ. A Zezi yeelame t’a tʋm-​tʋmdbã n paas neb a taab n na n naag-⁠a n dɩ naam saasẽ. A boola nin-​kãensã fãa sẽn naag taabã tɩ “bãg-​bila.” (Luk 12:⁠32, NW ) Kaoosg zugẽ, b togsa tʋm-​tʋmd a Zã tɩ bãg-​bilã neb sõor na n yɩɩ 144 000. B bobl-⁠b-⁠la tʋʋm-​kãseng saasẽ. Tʋʋm-​kãng yaa tɩ b na n yɩɩ nanambs la maan-​kʋʋdb n dɩ naam ne Kiristã saasẽ.​—⁠Wilgri 5:​9, 10; 14:​1, 3.

7. Wẽnnaam Rĩungã zoe n lugla saasẽ, la ka la bilfu a na n sooga tẽngã gilli. Woto bãngr tara yõod hal wʋsg la kõt sũ-noogo. Biiblã kõta kaset wʋsg sẽn wilgd vẽeneg t’a Zezi zoe n lebga Rĩm saasẽ. Masã menga, a rɩta naam saasẽ, la ka la bilfu a na n sooga tẽngã, la a kɩt tɩ bãngr-​goam nins yell d sẽn zoe n gomã pidsi. Wãn to la d tõe n bãng vẽeneg tɩ Wẽnnaam Rĩungã zoe n lugla saasẽ? La wakat bʋg la a na n soog tẽngã?

[Tẽngr not rãmbã]